Mga Kristiano nga Neutral ha Kataposan nga mga Adlaw

“Diri hira kanan kalibotan, sugad nga diri man ako kanan kalibotan.”​—JUAN 17:16.

1, 2. Ano an ginsiring ni Jesus mahitungod han relasyon han iya mga sumurunod ngada ha kalibotan, ngan ano nga mga pakiana an iginbabangon han iya mga pulong?

HA KATAPOSAN nga gab-i han iya kinabuhi sugad nga hingpit nga tawo, hi Jesus nag-ampo hin hilawig nga nababatian han iya mga disipulo. Hiton nga pag-ampo, gin-unabi niya an usa ka butang nga naghuhulagway han kinabuhi han ngatanan nga totoo nga mga Kristiano. Han nag-uunabi mahitungod han iya mga sumurunod, hiya nagsiring: “Akon iginhatag ha ira an imo pulong, ngan an kalibotan nagdumot ha ira, kay hira diri kanan kalibotan, sugad gud nga ako diri man kanan kalibotan. Ako diri nag-aampo ha imo, nga imo hira kuhaon ha kalibotan, kondi nga imo hira pagtipigan gawason ha mga karat-an. Diri hira kanan kalibotan, sugad nga diri man ako kanan kalibotan.”​—Juan 17:14-16.

² Makaduha, hi Jesus nagsiring nga an iya mga sumurunod diri magigin bahin han kalibotan. Dugang pa, iton nga pagin bulag magriresulta hin mga pag-ipit​—an kalibotan magdudumot ha ira. Kondi, diri kinahanglan mabaraka an mga Kristiano; hi Jehova magbabantay ha ira. (Proberbios 18:10; Mateo 24:​9, 13) May kalabotan ha mga pulong ni Jesus, mahimo kita magpakiana: ‘Kay ano nga an totoo nga mga Kristiano diri bahin han kalibotan? Ano an kahulogan han pagin  diri bahin han kalibotan? Kon an mga Kristiano gindudumtan han kalibotan, paonan-o nira gintatagad an kalibotan? Paonan-o nira gintatagad labi na an mga gobyerno han kalibotan?’ Importante an Kasuratanhon nga mga baton hini nga mga pakiana tungod kay nakakaapekto ito ha aton ngatanan.

“Kita Nagtitikang ha Dios”

3. (a) Ano an hinungdan nga bulag kita ha kalibotan? (b) Ano an ebidensya nga an kalibotan “aada ha gahum han usa nga maraot”?

³ An aton duok nga relasyon kan Jehova usa nga hinungdan kon kay ano nga kita diri bahin han kalibotan. Hi apostol Juan nagsurat: “Maaram kita nga kita nagtitikang ha Dios, kondi an bug-os nga kalibotan aada ha gahum han usa nga maraot.” (1 Juan 5:​19, NW) Matin-aw nga totoo an mga pulong ni Juan mahitungod han kalibotan. An mga girra, krimen, kabangis, panalumpigos, pagin diri tangkod, ngan imoralidad nga kaylap hinduro yana nga panahon nagpapamatuod han impluwensya ni Satanas, diri han Dios. (Juan 12:31; 2 Korinto 4:4; Efeso 6:12) Kon an indibiduwal nagigin usa han mga Saksi ni Jehova, diri niya bubuhaton o uuyonan an sugad nga sayop nga mga buhat, ngan ito an hinungdan nga hiya diri bahin han kalibotan.​—Roma 12:2; 13:12-14; 1 Korinto 6:9-11; 1 Juan 3:10-12.

4. Ha ano nga mga paagi ipinapakita naton nga kan Jehova kita?

⁴ Siring ni Juan nga an mga Kristiano, kabaliktaran han kalibotan, “nagtitikang ha Dios.” An ngatanan nga nagdidedikar han ira kalugaringon kan Jehova panag-iya niya. Hi apostol Pablo nagsiring: “Kon kita nabuhi, nabuhi kita tungod ha Ginoo; ngan kon mamatay kita, namatay kita tungod ha Ginoo; busa, kon kita nabuhi, o kon kita namatay, kanan Ginoo kita.” (Roma 14:8; Salmo 116:15) Tungod kay kita kan Jehova, aton iginhahatag ha iya an esklusibo nga debosyon. (Eksodo 20:4-6) Salit, diri ginagamit han totoo nga Kristiano an iya kinabuhi para ha mga ambisyon hini nga kalibotan. Ngan bisan kon gintatahod niya an mga simbolo han nasud, diri niya ginsisingba ito, ha buhat man o ha hunahuna. Diri niya ginsisingba an mga bantogan ha isport o iba nga moderno nga mga idolo. Siyempre, iya gintatahod an katungod han iba nga buhaton an ira karuyag, kondi an Maglalarang la an iya ginsisingba. (Mateo 4:10; Pahayag 19:10) Ini liwat an hinungdan nga bulag hiya ha kalibotan.

“An Akon Ginhadian Diri Kanan Hini nga Kalibotan”

5, 6. Paonan-o nga an pagpasakop ha Ginhadian han Dios amo an hinungdan nga bulag kita ha kalibotan?

⁵ An mga Kristiano mga sumurunod ni Kristo Jesus ngan mga sakop han Ginhadian han Dios, nga tungod hito liwat hira diri bahin han kalibotan. Han ginbibista hi Jesus ha atubangan ni Ponsio Pilato, hiya nagsiring: “An akon ginhadian diri kanan hini nga kalibotan. Kon an akon ginhadian kanan hini nga kalibotan, an akon mga surugoon makikig-away, basi diri ako itubyan ngadto ha mga Judio; kondi yana an akon ginhadian diri tikang dinhi.” (Juan 18:36) Pinaagi han Ginhadian pagbabaraanon an ngaran ni Jehova, igbibindikar an iya pagkasoberano, ngan matutuman an iya kaburut-on ha tuna sugad ha langit. (Mateo 6:​9, 10) Ha iya bug-os nga ministeryo, iginsangyaw ni Jesus an maopay nga sumat han Ginhadian, ngan hiya nagsiring nga ipapasamwak ito han iya mga sumurunod tubtob ha kataposan han sistema han mga butang. (Mateo 4:23; 24:14) Han 1914 natuman an matagnaon nga mga pulong han Pahayag 11:15: “An ginhadian han kalibotan nagin iya han aton Ginoo, ngan han iya Kristo: ngan hiya maghahadi ha mga katuigan ha mga katuigan.” Hirani na gud, nga iton nga langitnon nga Ginhadian magigin amo la nga nagmamando nga gahum ha bug-os nga katawohan. (Daniel 2:44) Ha usa nga higayon, bisan an sekular nga mga magmarando mapipiritan nga kilalahon an awtoridad hito.​—Salmo 2:6-12.

 ⁶ Tungod hito ngatanan, an totoo nga mga Kristiano yana nga panahon mga sakop han Ginhadian han Dios, ngan ira ginsusunod an sagdon ni Jesus nga ‘[“padayon nga,” NW] pamilngon siyahan an ginhadian ngan an katadongan han Dios.’ (Mateo 6:33) Diri ito nakakahimo ha ira nga magin diri-maunungon ha nasud nga ira inuukyan, kondi ha espirituwal nga paagi, ito an hinungdan nga hira bulag ha kalibotan. An importante nga buruhaton han mga Kristiano yana nga panahon, sugad ha siyahan nga siglo, amo ‘an pagpamatuod mahitungod han ginhadian han Dios.’ (Buhat 28:23) Waray gobyerno han tawo an may katungod ha pagpugong hito nga hatag-han-Dios nga buruhaton.

7. Kay ano nga neutral an totoo nga mga Kristiano, ngan paonan-o nira ipinapakita ini?

⁷ Uyon ha ira pagin panag-iya ni Jehova ngan pagin mga sumurunod ni Jesus ngan mga sakop han Ginhadian han Dios, an mga Saksi ni Jehova nagpapabilin nga neutral ha nasyonal ngan internasyonal nga mga araway han ika-20 ngan ika-21 ka mga siglo. Diri hira nadapig ha bisan ano nga grupo ha araway, diri nagamit hin armas kontra ha bisan hin-o, ngan diri nagpapasarang hin propaganda para ha anoman nga katuyoan hini nga kalibotan. Ha makatirigamnan nga pagpakita hin pagtoo bisan pa han baga in daku hinduro nga pagkontra, ira ginsusunod an mga prinsipyo nga iginpahayag ha Nazi nga mga magmarando ha Alemanya han 1934: “Diri kami interesado ha mga buruhaton ha politika, kondi bug-os nga maunungon ha Ginhadian han Dios pinaagi kan Kristo sugad nga iya Hadi. Diri kami magbubuhat hin maraot o magdadaot ha bisan hin-o. Malipayon nga mag-uukoy kami nga mamurayawon ngan magbubuhat hin maopay ha ngatanan nga mga tawo tubtob nga may-ada kami higayon.”

Mga Embahador Ngan mga Sinugo Para kan Kristo

8, 9. Ha ano nga paagi nga an mga Saksi ni Jehova yana nga panahon mga embahador ngan mga sinugo, ngan paonan-o ini nakakaapekto han ira relasyon ha mga nasud?

⁸ Iginhulagway ni Pablo an iya kalugaringon ngan an mga igkasi-dinihogan nga mga Kristiano sugad nga “mga embahador nga kasaliwan ni Kristo, nga an Dios baga in nakikimalooy pinaagi ha amon.” (2 Korinto 5:​20, NW; Efeso 6:20) Tikang han 1914, an dinihogan-han-espiritu nga mga Kristiano husto nga matatawag nga mga embahador para ha Ginhadian han Dios, nga hira amo an “mga anak” hito. (Mateo 13:38; Filipos 3:20; Pahayag 5:​9, 10) Dugang pa, ginpapagawas ni Jehova tikang ha mga nasud an ‘daku nga panon’ han “iba man nga mga karnero,” an mga Kristiano nga may-ada tunan-on nga paglaom, basi buligan an dinihogan nga mga anak ha ira buruhaton sugad nga mga embahador. (Pahayag 7:9; Juan 10:16) Inin “iba man nga mga karnero” mahimo tawagon nga “mga sinugo” han Ginhadian han Dios.

⁹ An embahador ngan an iya mga opisyal diri naghihilabot ha mga buruhaton han nasud nga ira ginsiserbihan. Ha sugad man nga paagi, an mga Kristiano nagpapabilin nga neutral ha mga buruhaton ha politika han mga nasud ha kalibotan. Diri hira nadapig o nakontra ha bisan ano nga grupo han nasud, rasa, sosiedad, o ekonomiya. (Buhat 10:​34, 35) Lugod, hira ‘nagbubuhat hin maopay ha ngatanan.’ (Galasia 6:10) An pagin neutral han mga Saksi ni Jehova nangangahulogan nga waray usa nga tangkod nga makakagsalikway han ira mensahe pinaagi han pag-angkon nga kaupod hira han kakontra nga grupo han usa nga rasa, nasud, o tribo.

Nakikilala Tungod han Gugma

10. Para ha usa nga Kristiano, mationan-o kaimportante an gugma?

¹⁰ Dugang pa ha iginsaysay na, neutral an mga  Kristiano ha mga buruhaton han kalibotan tungod han ira relasyon ha iba nga mga Kristiano. Hi Jesus nagsiring ha iya mga sumurunod: “Tungod hini an ngatanan makilala, nga kamo akon mga tinon-an, kon kamo maghigugmaay an usa kag usa.” (Juan 13:35) An minagburugto nga gugma amo an importante nga bahin han pagin usa nga Kristiano. (1 Juan 3:14) Tungod kay may kalabotan ito ha iya relasyon kan Jehova ngan kan Jesus, duok hinduro an relasyon han usa nga Kristiano ha iba nga mga Kristiano. An iya gugma diri la para hadton ha lokal nga kongregasyon. Nag-uupod ito han “bug-os nga katig-uban han [iya] kabugtoan ha kalibotan.”​—1 Pedro 5:​9, NW.

11. Paonan-o an paggawi han mga Saksi ni Jehova naiimpluwensyahan han ira gugma ha usa kag usa?

¹¹ Yana nga panahon, ipinapakita han mga Saksi ni Jehova an ira minagburugto nga gugma pinaagi han pagtuman han mga pulong han Isaias 2:4: “Ira pamamandayon an ira mga kampilan nga mga punta hin arado, ngan an ira mga bangkaw nga mga garab nga ipangarapon; an nasud diri na mabikyaw hin kampilan patok ha nasud, diri na man nira mababatasan an away.” Tungod kay gintututdoan ni Jehova, an totoo nga mga Kristiano nakikigmurayaw ha Dios ngan ha usa kag usa. (Isaias 54:13) Tungod kay nahigugma hira ha Dios ngan ha ira kabugtoan, diri gud mahuhunahuna nga magbibikyaw hira hin kampilan kontra han mga igkasi-Kristiano​—o ha bisan hin-o​—ha iba nga mga nasud. An ira kamurayawan ngan pagkaurosa importante nga bahin han ira pagsingba, nga nagpapakita nga hira tinuod nga may-ada han espiritu han Dios. (Salmo 133:1; Mika 2:12; Mateo 22:37-39; Kolosas 3:14) Hira ‘nagbibiling han kamurayawan ngan ginsusunod ito,’ tungod kay maaram hira nga “an mga mata ni Jehova [aadto] ha mga magtadong.”​—Salmo 34:​14, 15.

Kon Paonan-o Gintatagad han mga Kristiano an Kalibotan

12. Ano nga paggios ni Jehova ha mga tawo ha kalibotan an ginsusubad han mga Saksi ni Jehova, ngan paonan-o?

¹² Hi Jehova nagpahayag na hin makabungkag nga paghukom ngada hini nga kalibotan, kondi diri pa niya ginhuhukman an ngatanan nga mga tawo ha kalibotan. Bubuhaton niya ito pinaagi kan Jesus ha Iya mismo igo nga panahon. (Salmo 67:​3, 4; Mateo 25:31-46; 2 Pedro 3:10) Samtang yana, iya ipinapakita an daku nga gugma ha katawohan. Iya pa ngani iginhatag an iya bugtong nga Anak basi an ngatanan magkaada unta higayon nga makakarawat hin kinabuhi nga waray kataposan. (Juan 3:16) Sugad nga mga Kristiano, aton ginsusubad an gugma han Dios pinaagi han pagsumat ha iba mahitungod han mga tagana han Dios para han kaluwasan, bisan kon an aton mga pangalimbasog agsob nga diri kinakarawat.

13. Paonan-o naton sadang tagdon an sekular nga mga magmarando?

¹³ Paonan-o naton sadang tagdon an sekular nga mga magmarando ha kalibotan? Ginbaton ni Pablo iton nga pakiana han hiya nagsurat: “An ngatanan nga mga kalag magpasakop ha mga kagamhanan nga higtaas; kay waray kagamhanan nga diri tikang ha Dios; ngan an mga kagamhanan nga aada niyan tikang ha Dios  [“iginbutang han Dios ha ira relatibo nga mga katungdanan,” NW].” (Roma 13:​1, 2) An mga tawo may-ada “relatibo” nga mga katungdanan han awtoridad (mas hitaas o mas habubo may kalabotan ha usa kag usa, kondi pirme ubos kan Jehova) tungod kay tinutugotan hira han Makagarahum-ha-ngatanan. An Kristiano nagpapasakop ha sekular nga awtoridad tungod kay usa nga bahin ito han iya pagsugot kan Jehova. Kondi, ano man kon nabangon an pagkasumpaki han mga kinahanglanon han Dios ngan han gobyerno han tawo?

Balaud han Dios Ngan ni Cesar

14, 15. (a) Ha ano nga paagi nalikyan ni Daniel an pagkasumpaki may kalabotan han pagsugot? (b) Ano an nagin desisyon han tulo nga Hebreohanon han diri malikyan an pagkasumpaki may kalabotan han pagsugot?

¹⁴ Hi Daniel ngan an iya tulo nga kaupod nagpakita hin maopay nga susbaranan kon paonan-o magigin balanse ha pagpasakop ha mga gobyerno han tawo ngan ha pagpasakop ha awtoridad han Dios. Han bihag ha Babilonya an upat nga batan-on nga Hebreohanon, ira ginsugot an mga balaud hiton nga nasud ngan ginpili dayon hira para ha espesyal nga pagbansay. Hi Daniel, nga nakasabot nga an pagbansay bangin nasumpaki ha Balaud ni Jehova, nakiistorya mahitungod hito ha opisyal nga tinaporan. Sugad nga resulta, ginhimo an espesyal nga mga kahikayan sugad nga pagtahod ha konsensya han upat nga Hebreohanon. (Daniel 1:8-17) Ginsusubad han mga Saksi ni Jehova an susbaranan ni Daniel kon mataktika nga iginsasaysay nira an ira punto de bista ha mga opisyal basi malikyan an diri kinahanglanon nga mga problema.

¹⁵ Kondi, ha urhi nga okasyon, diri malikyan an pagkasumpaki may kalabotan ha pagpasakop. An hadi han Babilonya naghimo hin daku nga imahen ha patag han Dura ngan nagsugo ha higtaas nga mga opisyal, upod na an mga administrador han mga distrito, nga magkatirok para ha inagurasyon hito. Hito nga panahon, an tulo nga sangkay ni Daniel ginpili na nga mga administrador ha distrito han Babilonya, salit an sugo aplikado ha ira. Ha usa ka takna samtang nagpapadayon an mga seremonya, an ngatanan nga nagkatirok kinahanglan yumukbo ha atubangan han imahen. Kondi maaram an mga Hebreohanon nga kontra ini ha balaud han Dios. (Deuteronomio 5:8-10) Salit han yinukbo an ngatanan, nagpabilin hira nga natindog. Tungod han pagtalapas ha sugo han hadi, nameligro hira ha makaharadlok nga kamatayon, ngan naluwas an ira mga kinabuhi pinaagi la han usa nga milagro; kondi ginpili nira nga mameligro ha kamatayon imbes nga talapason hi Jehova.​—Daniel 2:49–​3:29.

16, 17. Paonan-o binaton an mga apostol han ginsugo hira nga diri na magsangyaw, ngan kay ano?

¹⁶ Ha siyahan nga siglo, an mga apostol ni Jesu-Kristo gintawag ha atubangan han Judio nga mga lider ha Jerusalem ngan ginsugo nga diri na isangyaw an ngaran ni Jesus. Ano an ira ginbuhat? Ginsugo hira ni Jesus nga manhimo hin mga disipulo ha ngatanan nga nasud, nga mag-uupod han Judea. Iya ginsugo liwat hira nga magin iya mga saksi ha Jerusalem sugad man ha bug-os nga kalibotan. (Mateo 28:​19, 20; Buhat 1:8) Maaram an mga apostol nga an sugo ni Jesus amo an kaburut-on han Dios para ha ira. (Juan 5:30; 8:28) Salit, hira nagsiring: “Kinahanglan sugton namon an Dios sugad nga magmarando imbes nga an mga tawo.”​—Buhat 4:​19, 20; 5:​29, NW.

¹⁷ An mga apostol diri rebelyoso. (Proberbios 24:21) Kondi, han an tawhanon nga mga magmarando nagdiri ha ira ha pagbuhat han kaburut-on han Dios, nakasiring la hira, ‘Kinahanglan sugton  namon an Dios, diri an tawo.’ Hi Jesus nagsiring nga aton “ihatag kan Cesar an mga butang ni Cesar, ngan ha Dios, an kanan Dios.” (Markos 12:17) Kon aton talapason an sugo han Dios tungod kay may-ada tawo nga nagsusugo ha aton, aton iginhahatag ha tawo an mga butang han Dios. Lugod, aton binabayaran an ngatanan nga utang naton kan Cesar, kondi kinikilala naton an supremo nga awtoridad ni Jehova. Hiya an Soberano han Uniberso, an Maglalarang, an Surok mismo han awtoridad.​—Pahayag 4:11.

Magpapabilin Kita nga Marig-on

18, 19. Ano an nagin maopay nga desisyon han damu han aton kabugtoan, ngan paonan-o naton masusubad an ira susbaranan?

¹⁸ Yana nga panahon, kinikilala han kadam-an nga sekular nga mga gobyerno an pagin neutral han mga Saksi ni Jehova, ngan mapasalamaton kita tungod hito. Kondi, ha iba nga mga nasud, an mga Saksi naatubang hin makuri nga pagkontra. Ha bug-os han ika-20 ka siglo ngan tubtob yana nga panahon, an iba han aton kabugtoan nangangalimbasog gud, ha espirituwal nga paagi nakikig-away ha “maopay nga pakig-away ha pagtoo.”​—1 Timoteo 6:12.

¹⁹ Paonan-o kita magpapabilin nga marig-on pariho ha ira? Siyahan, hinumdoman naton nga kinahanglan laoman naton an pagkontra. Diri kita sadang manluya o mahipausa pa ngani kon umatubang kita hito. Hi Pablo nagpahamangno kan Timoteo: “An ngatanan nga nahigugma mabuhi nga matinahuron ha Dios kan Kristo Jesus mag-aantos hin pagtimarauta.” (2 Timoteo 3:12; 1 Pedro 4:12) Ha kalibotan diin gamhanan an impluwensya ni Satanas, kay ano nga diri kita maatubang hin pagkontra? (Pahayag 12:17) Samtang matinumanon kita, may-ada pirme iba nga ‘nahipapausa ngan padayon nga nagyayakan hin maraot mahitungod ha aton.’​—1 Pedro 4:4.

20. Ano an iginpapahinumdom ha aton han makaparig-on nga mga kamatuoran?

²⁰ Ikaduha, kombinsido kita nga hi Jehova ngan an iya mga anghel mabulig ha aton. Sugad han ginsiring ni Eliseo ha kadaan nga panahon, “hira nga dapig ha aton darodamu kay ha ira nga dapig ha ira.” (2 Hadi 6:16; Salmo 34:7) Bangin tungod han maopay nga katuyoan ni Jehova, nga iya tinutugotan an pag-ipit tikang ha mga parakontra nga magpadayon anay. Kondi, pakukusgon kita niya pirme basi makailob. (Isaias 41:​9, 10) An iba pinanmatay, kondi diri kita sadang mahadlok hito. Hi Jesus nagsiring: “Diri kamo mahadlok ha nakakamatay han lawas, kondi diri sadang makamatay han kalag; kondi kahadluki lugod an nakakahimo makahibang han kalag ngan han lawas man ha impyerno [“Gehenna,” NW].” (Mateo 10:16-23, 28) “Mga lumalabay” la kita hini nga sistema han mga butang. Ginagamit naton an aton panahon dinhi basi ‘madakop an kinabuhi nga amo an kinabuhi nga totoo,’ an kinabuhi nga waray kataposan ha bag-o nga kalibotan han Dios. (1 Pedro 2:11; 1 Timoteo 6:19) Waray tawo nga makakapugong ha aton ha pagkarawat hiton nga balos tubtob nga nagpapabilin kita nga matinumanon ha Dios.

21. Ano an sadang hinumdoman naton pirme?

²¹ Salit, hinumdoman naton an aton presyoso nga relasyon kan Jehova nga Dios. Hinaot magin mapasalamaton kita pirme ha pagin mga sumurunod ni Kristo ngan mga sakop han Ginhadian. Bug-os-kasingkasing nga higugmaon naton an aton kabugtoan, ngan hinaot malipay kita pirme ha gugma nga nakakarawat naton tikang ha ira. Labaw ha ngatanan, sundon naton an mga pulong han salmista: “Hulat kan Jehova: pangusog, ngan papintasa an imo kasingkasing; oo, hulat ikaw kan Jehova.” (Salmo 27:14; Isaias 54:17) Niyan, pariho han damu nga mga Kristiano antes ha aton, magpapabilin kita nga marig-on nga may-ada sigurado nga paglaom​—matinumanon nga mga Kristiano nga neutral nga diri bahin han kalibotan.

Maisasaysay Mo Ba?

• Paonan-o nga an aton relasyon kan Jehova amo an hinungdan nga bulag kita hini nga kalibotan?

• Sugad nga mga sakop han Ginhadian han Dios, paonan-o kita nagpapabilin nga neutral hini nga kalibotan?

• Ha ano nga mga paagi nga an gugma ha aton kabugtoan nagtitipig ha aton nga neutral, bulag ha kalibotan?

[Mga Pakiana]

[Retrato ha pahina 15]

Paonan-o an aton pagpasakop ha Ginhadian han Dios nakakaapekto ha aton relasyon ha kalibotan?

[Retrato ha pahina 16]

Malipayon nga magkaupod nga nagtatrabaho an Hutu ngan an Tutsi

[Retrato ha pahina 17]

Mga Judio ngan Arabo nga Kristiano nga kabugtoan

[Retrato ha pahina 17]

An mga Kristiano ha Serbia, Bosnia, ngan Croatia malipayon ha pakig-upod ha usa kag usa

[Retrato ha pahina 18]

Ano an husto nga buhaton kon an mga magmarando nagsusugo ha aton nga talapason an balaud han Dios?