Mga Nasuporta ha Totoo nga Pagsingba—Hadto Ngan Yana

NAHINUNUMDOMAN mo ba an ngaran han lalaki nga nagtangis tungod han kadaan nga siyudad han Jerusalem? ‘Hi Jesus,’ bangin sumiring ka—ngan, totoo ito, hi Jesus nagtangis. (Lukas 19:28, 41) Kondi, mga siglo antes kumanhi hi Jesus ha tuna, usa pa nga matinumanon nga surugoon han Dios an nagtangis tungod han Jerusalem. Hiya hi Nehemia.—Nehemia 1:3, 4.

Kay ano nga nasubo hinduro hi Nehemia salit nagtangis hiya tungod han Jerusalem? Ano an iya ginbuhat para ha kaopayan han siyudad ngan han mga umurukoy hito? Ngan ano an aton mahibabaroan tikang ha iya susbaranan? Basi ini mabaton, aton repasuhon an pipira nga mga hitabo durante han iya panahon.

Usa nga Tawo nga May Pagbati Ngan Buhat

Ginpili hi Nehemia nga gobernador han Jerusalem, kondi antes hito, usa hiya nga hitaas-an-ranggo nga opisyal ha palasyo han Persia ha siyudad han Susan. Kondi, an iya mahayahay nga kinabuhi waray magwara han iya pagtagad ha kaopayan han iya kabugtoan nga Judio ha hirayo nga Jerusalem. Ha pagkamatuod, an siyahan nga iya ginbuhat han an usa nga grupo han mga Judio nga tikang ha Jerusalem binisita ha Susan amo an “[pagpakiana] ha ira mahitungod han mga Judio nga nangalagiw, nga nahibilin ha kabihagan, ngan mahitungod ha Jerusalem.” (Nehemia 1:2) Han an mga bisita binaton nga an katawohan han Jerusalem

 “aada ha daku nga kasakitan” ngan an kuta han siyudad “nabungkag,” hi Nehemia “linmingkod ngan nagtangis, ngan nagmabidoon ha pira ka adlaw.” Katapos hito iya iginpahayag an iya mga kasubo ha kinasingkasing nga pag-ampo ngadto kan Jehova. (Nehemia 1:3-11) Kay ano nga nasubo hinduro hi Nehemia? Tungod kay an Jerusalem amo an sentro han pagsingba kan Jehova ha tuna, ngan ginpabay-an ito. (1 Hadi 11:36) Dugang pa, an bungkag nga kahimtang han siyudad usa nga pangirilal-an han maraot nga espirituwal nga kahimtang han mga umurukoy hito.—Nehemia 1:6, 7.

An pagtagad ni Nehemia ha Jerusalem ngan an iya gugma ha mga Judio nga nag-uukoy didto nagpagios ha iya nga itanyag an iya kalugaringon ha serbisyo. Han gintugotan hiya han hadi han Persia nga bumaya anay ha iya mga obligasyon, nagtikang pagplano hi Nehemia para han hirayo nga biyahe ngadto ha Jerusalem. (Nehemia 2:5, 6) Karuyag niya ihatag an iya kusog, panahon, ngan mga kaabtik ha pagsuporta ha ginkinahanglan nga pag-ayad nga buruhaton. Ha sulod hin pipira ka adlaw tikang han iya pag-abot, may-ada na hiya plano nga magagamit para han pag-ayad han bug-os nga kuta han Jerusalem.—Nehemia 2:11-18.

Ginbahin-bahin ni Nehemia an daku nga buruhaton han pag-ayad han kuta ha damu nga mga pamilya, nga an ngatanan nagtrabaho nga magkasarapit. a Sobra 40 nga magkalainlain nga grupo an igintoka ha pag-ayad hin usa ka “sinukol nga bahin” para ha kada tagsa. Ano an resulta? Tungod han damu hinduro nga mga magtatrabaho—upod na an mga kag-anak ngan han ira mga anak—nga naghatag han ira panahon ngan kusog, an baga hin daku hinduro nga buruhaton nagin masayon. (Nehemia 3:11, 12, 19, 20, NW) Ha sulod hin duha ka bulan nga puno hin trabaho, naayad an bug-os nga kuta! Hi Nehemia nagsurat nga bisan adton kinontra ha pag-ayad napiritan pagkilala nga “ini nga buhat binuhat han amon Dios.”—Nehemia 6:15, 16.

Usa nga Susbaranan nga Angay Hinumdoman

Hi Nehemia naghatag diri la han iya panahon ngan abilidad ha pag-organisa. Iya liwat ginamit an iya materyal nga mga panag-iya ha pagsuporta ha totoo nga pagsingba. Iya ginamit an iya kalugaringon nga kwarta ha paglukat han iya Judio nga kabugtoan tikang ha pagkabihag. Nagpahuram hiya hin kwarta nga waray tubo. Waray gud hiya magin “luran” ha mga Judio pinaagi han pag-obligar hin suweldo sugad nga gobernador, usa nga katungod niya. Lugod, abrido an iya balay ha pagpakaon hin “usa ka gatos kalim-an ka tawo, labot hadto nga nakanhi ha amon tikang dida ha mga nasud nga naglilibot ha amon.” Kada adlaw hiya nagtagana hin “usa nga baka nga lalaki ngan unom nga karnero nga pinili; [ngan] mga tamsi” para ha iya mga bisita. Dugang pa, makausa ha kada napulo ka adlaw nagtatanyag hiya ha ira han “ngatanan nga klase han alaksiw”—nga gasto niya ngatanan.—Nehemia 5:8, 10, 14-18.

Maopay gud nga susbaranan han pagkamahinatagon an iginpakita ni Nehemia ha ngatanan nga mga surugoon han Dios hadto ngan yana! Ini nga maisugon nga surugoon han Dios hura ngan kinaburut-on nga naggamit han iya materyal nga mga panag-iya ha pagsuporta ha mga magburuhat basi mapauswag an totoo nga pagsingba. Angayan nga makakaghangyo hiya kan Jehova: “Panumdoma, o Dios ko, para ha akon kaopayan, an ngatanan nga akon nabuhat para hini nga katawohan.” (Nehemia 5:19) Sigurado nga bubuhaton gud ito ni Jehova.—Hebreo 6:10.

Ginsusubad Yana an Susbaranan ni Nehemia

Makalilipay gud nga makita nga an katawohan ni Jehova yana nga panahon ha pariho nga paagi nagpapakita hin mahigugmaon nga mga pagbati, pagkadisidido ha pagbuhat, ngan nagsasakripisyo-ha-kalugaringon nga disposisyon para ha totoo nga pagsingba. Kon nakakabati kita nga an mga igkasi-tumuroo nag-aantos hin mga kakurian, nababaraka gud kita mahitungod han ira kaopayan. (Roma 12:15) Pariho kan Nehemia, nag-aampo kita kan Jehova ha pagbulig ha aton ginsasakit nga kabugtoan ha pagtoo, naghahangyo ha iya: “Itugot nga yana an imo talinga mamati han pag-ampo han imo surugoon, ngan han pag-ampo han imo mga surugoon, nga nagkalipay ha pagkahadlok ha imo ngaran.”—Nehemia 1:11; Kolosas 4:2.

Kondi, an aton pagtagad ha espirituwal ngan pisikal nga kaopayan han aton Kristiano nga kabugtoan ngan ha pag-uswag han totoo nga pagsingba diri nakakaapekto la ha aton mga pagbati. Nag-aaghat  liwat ito ha aton nga gumios. Adton gintutugotan han mga kahimtang, naaaghat han gugma nga bayaan an kahimyang ha ira mga balay ngan, pariho gud kan Nehemia, nabalhin ngadto ha iba nga mga lugar basi buligan adton nagkikinahanglan. Diri nanluluya tungod han diri komportable nga mga kahimtang han pagkinabuhi nga bangin naieksperyensyahan han sugad nga mga boluntaryo ha iba nga mga bahin han kalibotan, sinusuportahan nira an pag-uswag han totoo nga pagsingba didto, nag-aalagad kaupod han ira Kristiano nga kabugtoan. An espiritu han pagsakripisyo ha kalugaringon nga ira ipinapakita totoo nga angay kumendasyonan.

Pagbuhat han Aton Bahin Dida Mismo ha Aton Komunidad

Natural la nga kadam-an ha aton an diri makakabalhin ngadto ha iba nga dapit. Sinusuportahan naton an totoo nga pagsingba dida mismo ha aton komunidad. Igin-iilustrar liwat ito ha libro ni Nehemia. Tigamni an detalye nga igindugang ni Nehemia mahitungod han pipira nga matinumanon nga mga pamilya nga nakigbahin ha pag-ayad nga buruhaton. Hiya nagsurat: “Nag-ayad hi Jedaya an anak nga lalaki ni Harumap, dida ha atubangan han iya balay . . . Nag-ayad hi Benjamin ngan hi Hasub dida ha atbang han ira balay. Sunod ha ira nag-ayad hi Asaria an anak nga lalaki ni Maaseya an anak nga lalaki ni Anania ha tupad han iya kalugaringon nga balay.” (Nehemia 3:10, 23, 28-30) Ito nga kalalakin-an ngan an ira mga pamilya binulig gud ha pagpauswag han totoo nga pagsingba pinaagi han pagbuhat han ira bahin ha pag-ayad ha hirani han ira balay.

Yana nga panahon, damu ha aton an nasuporta ha totoo nga pagsingba ha aton kalugaringon nga  mga komunidad ha magkalainlain nga paagi. Nakikigbahin kita ha mga proyekto han pagtukod hin Kingdom Hall, mga buruhaton ha pagbulig durante han kalamidad ngan, labaw ha ngatanan, ha buruhaton nga pagsangyaw han Ginhadian. Dugang pa, personal nga nakakabulig man kita ha pagtukod o pagbulig nga buruhaton durante han kalamidad o diri, kita ngatanan may-ada kinasingkasing nga hingyap ha pagsuporta ha totoo nga pagsingba pinaagi han aton materyal nga mga panag-iya, sugad gud han hura nga ginbuhat ni Nehemia ha iya panahon.—Kitaa an kahon nga “Mga Kalidad han Boluntaryo nga Paghatag.”

An pagtirok han ginkikinahanglan nga pundo ha pagtapar han mga gastos ha aton nag-uuswag nga mga buruhaton ha pag-imprinta, mga pangalimbasog ha pagbulig, ngan damu nga iba pa nga buruhaton ha bug-os nga globo bangin usahay baga hin imposible. Kondi, hinumdumi nga baga hin imposible liwat an daku nga buruhaton han pag-ayad han daku nga kuta han Jerusalem. (Nehemia 4:10) Kondi, tungod kay ginbahin-bahin an buruhaton ha damu nga mga pamilya nga disidido bumulig, natapos an buruhaton. Sugad man yana nga panahon, an pagtirok hin daku nga kwarta basi maipadayon an aton mga buruhaton ha bug-os nga kalibotan magigin posible kon an kada usa ha aton magpapadayon ha pagtuman han usa ka bahin han buruhaton.

An kahon nga “Mga Paagi kon Paonan-o Naamot an Iba” nagpapakita hin pipira nga mga paagi nga masusuportahan ha pinansyal an buruhaton han Ginhadian. Durante han naglabay nga tuig, damu han katawohan han Dios an naghatag hin sugad  nga suporta, ngan karuyag han Nagmamando nga Lawas han mga Saksi ni Jehova nga pahimulosan ini nga higayon nga ipahayag an ira hilarom nga pagpasalamat ha ngatanan nga an kasingkasing nagpagios ha ira nga makigbahin hinin boluntaryo nga paghatag. Labaw ha ngatanan, nagpapasalamat kami kan Jehova tungod han iya hura nga bendisyon ha bug-os-kasingkasing nga mga pangalimbasog han iya katawohan ha pagpasamwak han totoo nga pagsingba ha bug-os nga kalibotan. Oo, kon aton pinamamalandong an paagi nga ginigiyahan kita ni Jehova ha paglabay han katuigan, naaaghat kita ha pag-utro han mga pulong ni Nehemia, nga mapasalamaton nga nagsiring: “[An] kamot han akon Dios . . . maopay dida ha akon.”—Nehemia 2:18.

[Footnote]

 [Kahon/Mga Retrarto ha pahina 28, 29]

Mga Paagi kon Paonan-o Naamot an Iba

MGA AMOT PARA HA BUG-OS-KALIBOTAN NGA BURUHATON

Damu an naggagahin, o nagtatagana, hin kantidad nga ira ibubutang ha mga kahon para han donasyon nga minarkahan hin “Contributions for the Worldwide Work—Matthew 24:14.”

Kada bulan, ini nga kantidad iginpapadara han mga kongregasyon ngadto ha headquarters han mga Saksi ni Jehova ha Brooklyn, New York, o ha lokal nga sanga nga opisina. An kinaburut-on nga mga donasyon nga kwarta mahimo liwat direkta nga ipadara ha Treasurer’s Office, Watch Tower Bible and Tract Society of the Philippines, P.O. Box 2044, 1060 Manila, o ha opisina han sanga nga nagsiserbi ha iyo nasud. Mahimo liwat maghatag hin mga alahas o iba nga birilhon nga mga butang. Sadang updan ini nga mga donasyon hin halipot nga surat nga nagsusumat nga ito nga butang usa ka direkta nga regalo.

KAHIKAYAN HAN MAY-KONDISYON NGA DONASYON

An kwarta mahimo idonar ilarom han espesyal nga kasabotan, nga kon an nagdonar magkaada personal nga panginahanglan, mahimo ibalik an donasyon ha iya. Para ha dugang nga impormasyon, alayon pakigkomunikar ha Treasurer’s Office ha adres nga aada ha igbaw.

GINPLANO NGA PAGHATAG

Dugang ha direkta nga mga regalo ngan may-kondisyon nga mga donasyon nga kwarta, may-ada pa iba nga mga paagi han paghatag basi magamit ha pag-alagad ha Ginhadian ha bug-os nga tuna. Nag-uupod ini han:

Insurance: An Watch Tower Society mahimo himoon nga beneficiary han palisiya han life insurance o han plano ha pagretiro/pensyon.

Mga Deposito ha Bangko: An mga deposito ha bangko, mga sertipiko han deposito, o indibiduwal nga mga deposito ha pagretiro mahimo itapod o ihatag ha panahon han kamatay ha Watch Tower Society, uyon ha lokal nga mga kahikayan han bangko.

Kapital han Negosyo Ngan mga Bono: An mga kapital han negosyo ngan mga bono mahimo igdonar ha Watch Tower Society sugad nga direkta nga regalo.

Tuna Ngan Balay: An maibabaligya nga tuna ngan balay mahimo igdonar ha Watch Tower Society pinaagi han direkta nga pagregalo o pinaagi han pagreserba hin balay ngan tuna ha nagdonar, nga makakapadayon ha pag-ukoy dida samtang buhi pa hiya. Pahibaroa an sanga nga opisina ha iyo nasud antes himoon an dokumento han pagbalhin han bisan ano nga tuna ngan balay.

Tinuig nga Regalo o Regular nga Donasyon nga Kwarta: An tinuig nga regalo o regular nga donasyon nga kwarta amo an usa nga kahikayan diin an usa nagbabalhin hin kwarta o mga seguridad ngadto ha Watch Tower Society. Ha balyo, an naghatag, o an usa nga ginpili han naghatag, makarawat hin espisipiko nga regular nga kwarta kada tuig samtang hiya buhi. An naghatag iibanan han iya buhis ha panahon nga gintikangan an tinuig o regular nga pagdonar hin kwarta.

Mga Testamento Ngan mga Igintapod: An mga panag-iya o kwarta mahimo ihatag ha Watch Tower Society pinaagi han legal nga testamento, o an Watch Tower Society mahimo magin beneficiary han usa nga kasabotan nga igintapod. An igintapod nga pahihimulsan han usa nga relihiyoso nga organisasyon mahimo maghatag hin pipira nga mga bentaha ha buhis.

Sugad han iginpapasabot han termino nga “ginplano nga paghatag,” ini nga mga klase hin mga donasyon kasagaran nga nagkikinahanglan hin pagplano ha bahin han nahatag. Basi mabuligan an mga indibiduwal nga naghihingyap nga makabulig ha bug-os-kalibotan nga buruhaton han mga Saksi ni Jehova pinaagi han usa nga klase han ginplano nga paghatag, igin-andam an brosyur ha Ingles ngan Espanyol nga may ulohan nga Charitable Planning to Benefit Kingdom Service Worldwide. An brosyur iginsurat tungod han damu nga mga pakiana nga nakakarawat mahitungod han mga regalo, mga testamento, ngan mga igintapod. May-ada liwat ito dugang nga mapulsanon nga impormasyon mahitungod han pagplano ha panag-iya, pinansyal, ngan buhis. Naghahatag ito hin mga impormasyon ha mga indibiduwal mahitungod ha magkalainlain nga mga paagi nga mahihimo an mga regalo yana o pinaagi han ibibilin ha kamatayon. Ini nga brosyur mahimo makarawat pinaagi han direkta nga paghangyo hin kopya nga direkta ha Sanga nga Opisina han Mga Saksi ni Jehova.

Katapos basahon an brosyur ngan magpakiana ha Sanga nga Opisina han Mga Saksi ni Jehova, damu an nakabulig ha mga Saksi ni Jehova ha bug-os nga kalibotan ngan ha pariho nga panahon, labaw nga nakapahimulos han buhis pinaagi han pagbuhat hito. An Sanga nga Opisina han Mga Saksi ni Jehova sadang pahibaroon ngan hatagan hin kopya han bisan ano nga kinahanglanon nga mga dokumento may kalabotan han bisan ano hini nga mga kahikayan. Kon interesado ka ha bisan hain hini nga mga kahikayan han ginplano nga paghatag, sadang ka makigkomunikar ha Sanga nga Opisina han Mga Saksi ni Jehova, ha surat man o ha telepono, ha adres nga nakalista ha ubos o ha opisina han mga Saksi ni Jehova nga nagsiserbi ha iyo nasud.

Sanga nga Opisina han Mga Saksi ni Jehova

Watch Tower

186 Roosevelt Avenue,

San Francisco del Monte

1105 Quezon City

Telepono: 411-6090

 [Kahon ha pahina 30]

Mga Kalidad Boluntaryo nga Paghatag

Ha iya mga surat ngadto ha mga taga-Korinto, gin-unabi ni apostol Pablo an tulo nga importante nga mga kalidad han boluntaryo nga paghatag. (1) Han nagsusurat mahitungod han pangulekta hin kwarta, hi Pablo naghatag hin instruksyon: “Ha siyahan nga adlaw han semana an tagsatagsa ha iyo bumahin ha iya nakita.” (1 Korinto 16:2a) Salit, an paghatag kinahanglan planuhon hin abanse, ngan kinahanglan buhaton ito ha sistematiko nga paagi. (2) Hi Pablo nagsurat liwat nga an tagsa sadang maghatag “uyon ha iya kinikita.” (1 Korinto 16:2b, New International Version) Ha iba nga pagkayakan, an indibiduwal nga naruruyag makigbahin ha boluntaryo nga paghatag mahimo magbuhat hito sumala ha maopay nga pagbahin-bahin. Bisan kon gutiay la an kinikita han usa nga Kristiano, an gutiay nga kantidad nga maihahatag niya birilhon kan Jehova. (Lukas 21:1-4) (3) Hi Pablo dugang nga nagsurat: “An tagsatagsa humatag sugad han uyon han iya kasingkasing; diri ha kasubo o ha kinahanglan; kay an Dios nahigugma ha malipayon nga humaratag.” (2 Korinto 9:7) An sinsero nga mga Kristiano kinasingkasing nga naghahatag—nga malipayon.

[Mga Retrato ha pahina 20]

Hi Nehemia usa nga tawo nga may pagbati ngan buhat

[Mga Retrato ha pahina 24]

An boluntaryo nga mga kontribusyon nasuporta ha mga pag-imprinta, mga buruhaton ha pagbulig, pagtukod hin mga Kingdom Hall, ngan iba pa nga mapulsanon nga mga serbisyo ha bug-os nga kalibotan