Mga Pakiana Tikang ha mga Magbarasa

• Sayop ba an pagpusta kon gutiay la nga kantidad hin kwarta an nahidadabi?

An Pulong han Dios diri naghihisgot mahitungod han paghuygo hin detalyado, kondi igo na an ginsisiring hito nga nagpapakita nga an ngatanan nga paghuygo diri nauyon ha mga prinsipyo han Biblia. * Pananglitan, kaylap nga hinbabaroan nga an paghuygo nag-aaghat hin kahakog. Bisan ito la nga kamatuoran sadang tagdon han mga Kristiano, tungod kay an Biblia nasiring nga an “hakog nga mga tawo” diri makakapanunod han Ginhadian han Dios ngan an kahakog iginpapariho ha idolatriya.​—1 Korinto 6:​9, 10, NW; Kolosas 3:5.

An paghuygo nag-aaghat liwat han pagpaimportante ha kalugaringon ngan han diri maopay nga espiritu han kompetisyon, an makusog nga hingyap nga magdaog. Hi apostol Pablo nagpahamangno kontra han sugad nga mga butang han hiya nagsurat: “Diri ta pangitaon an waray pulos nga himaya, nga diri magkasuhay-suhay an usa kag usa nga diri maggiawa-awa an usa kag usa.” (Galasia 5:26) Dugang pa, an paghuygo nagdadasig ha iba nga mapatootoohon nga sumarig ha suwerte. Napapatubo han mga parahuygo an ngatanan nga klase han mga patootoo, naglalaom nga susuwertihon hira para ha ira kaopayan. Nagpapahinumdom ito ha aton han diri-matinumanon nga mga Israelita nga “nag-aandam hin usa nga lamesa para han Kapalaran, ngan nga nagsusulod hin salakot nga alaksiw para han Destino.”​—Isaias 65:11.

Bangin mangatadongan an iba nga an pagpusta hin gutiay nga kantidad hin kwarta samtang diri-nakikigkompetensya nga nagbabaraha o nagdadama upod han mga paryente o duok nga kasangkayan diri nakakadaot nga kaliawan. Oo, an usa nga napusta hin gutiay nga kantidad hin kwarta bangin diri maghunahuna han iya kalugaringon nga hakog, naghihingyap hin pagpaimportante ha kalugaringon, nakikigkompetensya, o mapatootoohon. Kondi, ano an epekto han iya paghuygo ha iya mga kauyag? Damu han giyan nga mga parahuygo an nagtikang pinaagi han pagpusta hin gutiay nga kantidad ‘para la ha kaliawan.’ (Lukas 16:10) An baga hin inosente nga kaliawan nagin mas maraot pa gud ha ira bahin.

Labi nga totoo ito kon may nahidadabi nga kabataan. Damu nga kabataan an nalilipay ha pagdaog hin gutiay nga pusta ngan nadadani ha pagpusta hin mas daku nga kantidad. (1 Timoteo 6:10) Usa nga surbey nga gindumara hin maiha nga panahon nga iginpublikar ha Estados Unidos han Arizona Council on Compulsive Gambling an nagpaparig-on nga damu han mga giyan ha huygo an nagtikang han batan-on pa hira “pinaagi han mga pagpusta hin gutiay nga kantidad ha mga isport o ha pagbaraha kaupod han kasangkayan o mga paryente.” Usa pa nga report an nasiring nga “nagtitikang an kabataan ha paghuygo ha balay, kasagaran ha mga pagbaraha kaupod han pamilya ngan kasangkayan.” An report nagdudugang nga “trenta porsyento han kabataan nga naghuhuygo an nagtikang antes hira mag-onse anyos.” Sinusuportahan han damu nga tinedyer nga mga parahuygo an ira pagkagiyan pinaagi han krimen o imoralidad, sumala ha surbey nga Why Do People Gamble Too Much​—Pathological and Problem Gambling. Makasurubo gud ito nga resulta nga ha tinikangan baga hin diri-nakakadaot!

Tungod kay nagkikinabuhi kita ha kalibotan nga damu na gud an mga lit-ag ngan mga pagsulay, kay ano nga tugotan naton an aton kalugaringon nga magpahirani ha usa pa nga pagsulay? (Proberbios 27:12) An paghuygo​—may-ada o waray presente nga kabataan, para ha gutiay o ha daku nga kantidad hin kwarta​—nakakadaot ha espirituwalidad ngan sadang likyan. Mas maopay nga an mga Kristiano nga karuyag magdama o magbaraha sugad nga kaliawan  magsurat la han iskor o mag-uyag para la ha kaliawan nga waray tinitipigan nga iskor. An maaramon nga mga Kristiano nga nagtatagad han ira kalugaringon nga espirituwalidad sugad man han espirituwalidad han ira kasangkayan ngan pamilya naglilikay ha paghuygo​—bisan ha gutiay nga kantidad hin kwarta.

• Usa ba nga porma han pagtarampo-han-pagtoo an pagpalit hin tinukod tikang ha iba nga relihiyon ngan himoon ito nga Kingdom Hall?

Ha kabug-osan, ginlilikyan han mga Saksi ni Jehova an sugad nga mga pakigtransaksyon ha iba nga mga relihiyon. Ha gihapon, an sugad nga transaksyon mahimo magin diri buhat han pagtarampo-han-pagtoo. Mahimo ito tagdon sugad nga usa la ka higayon han pakigtransaksyon may kalabotan ha negosyo. An lokal nga kongregasyon han mga Saksi ni Jehova diri nakikigsabot ha iba nga relihiyon ha pagtukod hin lugar para ha pagsingba basi gamiton han duha nga grupo.

Paonan-o an usa nga buhat nagigin pagtarampo-han-pagtoo ha paniplatan ni Jehova? Tagda an giya ni apostol Pablo: “Diri kamo magpas-an han yugo upod han mga diri magtinoohon; kay oonan-on ba an pagkatampo han katadongan ngan han diri katadongan? O oonan-on ba an pagkaangbit han kalamrag ngan han kangitngit? Ngan oonan-on ba an pagkaangay nira Kristo ngan hi Belial? O oonan-on ba an pagkaangbit han matinoohon ngan han diri matinoohon? Ngan oonan-on ba an pagkaangay han templo han Dios ngan ha mga diosdios? . . . Busa gumowa ngan bumulag kamo tikang ha ira, siring han Ginoo, ngan diri kamo dumuot hin mahugaw nga bagay; ngan kakarawaton ko kamo.” (2 Korinto 6:14-17) Ano an iginpapasabot ni Pablo han mga pulong nga “pagkatampo” ngan “pagkaangbit”?

An pagkatampo nga gin-uunabi ni Pablo matin-aw nga nag-uupod han pagsingba ngan espirituwal nga mga buruhaton kaupod han mga idolatroso ngan mga diri-tumuroo. Iya ginpahamangnoan an mga taga-Korinto kontra ha “[pakiangbit] ha . . . lamesa han mga yawa.” (1 Korinto 10:​20, 21) Salit, an buhat han pagtarampo-han-pagtoo amo an pakiangbit ha pagsingba o pagkaada espirituwal nga pakig-upod-upod ha iba nga relihiyoso nga mga organisasyon. (Eksodo 20:5; 23:13; 34:12) Kon ginpalit an usa nga tinukod nga gingamit han usa nga relihiyoso nga organisasyon, ginhihimo la ini basi magkaada hin tinukod nga kinahanglanon para han Kingdom Hall. Antes ito gamiton sugad nga Kingdom Hall, ginkuha na dida hito an bisan ano nga may kalabotan ha buwa nga pagsingba. Tungod kay iginpahiuyon na, igindidedikar ito kan Jehova para la ha katuyoan ha pagsingba ha iya. Waray pagkaangbit o pagkatampo han totoo ngan buwa nga pagsingba.

Ha paghisgot han mga detalye may kalabotan han sugad nga pagpalit, an pakiistorya ha ginpapalitan diri sadang mag-iha ngan sadang magin may kalabotan gud la ha pagpalit. Sadang hinumdoman han mga membro han Kristiano nga kongregasyon an pahamangno ni Pablo nga diri “magpas-an han yugo upod han mga diri magtinoohon.” Bisan kon diri kita naabat nga hitaas kita hadton iba an mga relihiyon, aton linilikyan nga makig-upod ha ira o maimpluwensyahan ha pag-api ha ira pagsingba. *

Ano an Kasuratanhon nga panlantaw may kalabotan ha kongregasyon nga naplete hin tinukod nga gintatag-iya han usa nga relihiyoso nga organisasyon? An pagplete kasagaran nga nag-uupod hin regular nga pakiistorya, nga kinahanglan likyan. Bisan ha pagplete han sugad nga tinukod para ha usa la ka okasyon, sadang tagdon han lawas han mga tigurang an masunod: May-ada ba bisan ano nga mga imahen ngan relihiyoso nga mga pangirilal-an ha sulod o ha gawas han tinukod? Paonan-o tatagdon han mga tawo ha komunidad an aton paggamit han pasilidad? May-ada ba bisan hin-o ha kongregasyon nga mahipapakdol ha aton paggamit hini nga tinukod? (Mateo 18:6; 1 Korinto 8:7-13) Gin-uusisa han mga tigurang ini nga mga bahin ngan nagdidesisyon hira sumala han mga kahimtang. An ira kalugaringon nga konsensya ngan an kanan bug-os nga kongregasyon kinahanglan tagdon liwat ha pagdesisyon kon papaliton ngan babag-ohon an sugad nga tinukod basi himoon nga Kingdom Hall.

[Mga footnote]

[Retrato ha pahina 31]

Ini nga tinukod, nga sinagoga hadto, ginpalit ngan gin-ayad basi magin usa nga Kingdom Hall