“Tipigi nga Maopay an Iyo Paggawi ha Butnga han mga Nasud”

“Tahuron niyo an ngatanan nga mga tawo. Higugmaon niyo an mga kabugtoan.”​—1 PEDRO 2:17.

1, 2. (a) Ano an komento han usa nga parasurat han pahayagan mahitungod han mga Saksi ni Jehova? (b) Kay ano nga nangangalimbasog an mga Saksi ni Jehova nga tipigan an hitaas nga mga suruklan han paggawi?

MGA tuig na an naglabay, usa nga parasurat ha pahayagan ha Amarillo, Texas, E.U.A., an binisita ha mga singbahan hito nga lugar ngan nagreport mahitungod han resulta han iya pag-usisa. Usa nga grupo an natigamnan niya nga naiiba gud. Hiya nagsiring: “Ha sulod hin tulo ka tuig, tinambong ako ha tinuig nga mga kombensyon han mga Saksi ni Jehova ha Amarillo Civic Center. Samtang kaupod ko hira, waray gud ako makakita hin bisan usa nga nagdagkot hin sigarilyo, nag-abri hin lata han serbesa, o nagyakan hin maraot. Hira an pinakalimpyo, pinakapormal, pinakadesente mamado, pinakamaopay-an-disposisyon nga grupo han mga tawo nga akon nakita.” An pariho hito nga mga komento mahitungod han mga Saksi ni Jehova agsob nga nakikita ha mga pahayagan. Kay ano nga an mga Saksi agsob nga gindadayaw han mga tawo nga naiiba ha ira pagtoo?

² Kasagaran, gindadayaw an katawohan han Dios tungod han ira maopay nga paggawi. Bisan kon nagtitikaraot an mga suruklan ha kabug-osan, gintatagad han mga Saksi ni Jehova an hitaas nga mga suruklan han paggawi sugad nga obligasyon, usa nga bahin han ira pagsingba. Maaram hira nga an ira mga buhat nagsusumat ha iba mahitungod kan Jehova ngan han ira Kristiano nga kabugtoan ngan nga an ira maopay nga paggawi nagrirekumenda han kamatuoran nga ira iginsasangyaw. (Juan 15:8; Tito 2:​7, 8) Aton kitaon, kon sugad, kon paonan-o naton matitipigan an maopay nga paggawi ngan magpadayon ha pagparig-on han maopay nga reputasyon ni Jehova ngan han iya mga Saksi ngan kon paonan-o kita magpapahimulos ha pagbuhat hito.

An Kristiano nga Pamilya

3. Tikang ha ano kinahanglan panalipdan an Kristiano nga mga pamilya?

³ Tagda an aton paggawi ha sulod han pamilya. An libro nga Die Neuen Inquisitoren: Religionsfreiheit und Glaubensneid (An Bag-o nga mga Nagpapakiana: Kagawasan ha Relihiyon Ngan  Relihiyoso nga Kaawa), ni Gerhard Besier ngan Erwin K. Scheuch, nasiring: “Para ha [mga Saksi ni Jehova] an pamilya usa nga butang nga angay panalipdan.” Totoo iton nga iginpahayag, ngan yana nga panahon, damu an mga peligro nga tikang hito kinahanglan panalipdan an pamilya. May-ada kabataan nga “diri-masinugtanon ha mga ginikanan” ngan mga adulto nga “waray kinaiya nga pagbati” o “waray pagpugong ha kalugaringon.” (2 Timoteo 3:​2, 3, NW) Dida ha mga pamilya ginbubuhat an kamadarahog ha padis, an mga ginikanan nag-aabuso o nagpapasibaya ha ira mga anak, ngan an kabataan nagrirebelde, nahidadabi ha pag-abuso ha droga ngan imoralidad, o nabaya ha panimalay. Ini ngatanan amo an resulta han nakakadaot nga impluwensya han ‘espiritu han kalibotan.’ (Efeso 2:​1, 2, NW) Kinahanglan panalipdan naton an aton mga pamilya kontra hiton nga espiritu. Paonan-o? Pinaagi han pagsunod ha sagdon ngan giya ni Jehova para ha mga membro han pamilya.

4. Ano an mga responsabilidad han mga membro han Kristiano nga pamilya ha usa kag usa?

⁴ Kinikilala han Kristiano nga mga mag-asawa nga hira may-ada emosyonal, espirituwal, ngan pisikal nga mga obligasyon ha usa kag usa. (1 Korinto 7:3-5; Efeso 5:21-23; 1 Pedro 3:7) An Kristiano nga mga ginikanan may-ada mabug-at nga mga responsabilidad ha ira mga anak. (Proberbios 22:6; 2 Korinto 12:14; Efeso 6:4) Ngan samtang nagtitikadagku an mga anak ha Kristiano nga mga panimalay, nahibabaro hira nga hira liwat may-ada mga obligasyon. (Proberbios 1:​8, 9; 23:22; Efeso 6:1; 1 Timoteo 5:​3, 4, 8) An pagtuman han mga obligasyon ha pamilya nagkikinahanglan hin pangalimbasog, determinasyon, ngan espiritu han gugma ngan pagsakripisyo ha kalugaringon. Kondi, kon ginbubuhat han ngatanan nga membro han pamilya an ira hatag-han-Dios nga mga obligasyon, nagigin bendisyon hira ha usa kag usa ngan ha kongregasyon. Labaw ha ngatanan, ginpapasidunggan nira an Tinikangan han pamilya, hi Jehova nga Dios.​—Genesis 1:​27, 28; Efeso 3:15.

An Kristiano nga Pagminagburugto

5. Ano nga mga bendisyon an nakakarawat naton tikang ha pakig-upod ha mga igkasi-Kristiano?

⁵ Sugad nga mga Kristiano, may-ada liwat kita  mga responsabilidad ha mga igkasi-tumuroo ha kongregasyon, ngan labi na gud, ngada hadton nagkukompuwesto han “bug-os nga katig-uban han . . . kabugtoan ha kalibotan.” (1 Pedro 5:​9, NW) An aton relasyon ha kongregasyon importante ha aton espirituwal nga kahimsog. Kon nakikig-upod kita ha mga igkasi-Kristiano, nagpapahimulos kita han ira nakakadasig nga pakig-upod sugad man han nagpapakusog nga espirituwal nga pagkaon tikang ha “matinumanon ngan maaramon nga uripon.” (Mateo 24:45-47, NW) Kon may-ada kita mga problema, mahimo kita dumaop ha aton kabugtoan para han maopay nga sagdon nga iginbasar ha Kasuratanhon nga mga prinsipyo. (Proberbios 17:17; Eklesiastes 4:9; Jakobo 5:13-18) Kon nanginginahanglan kita hin bulig, an aton kabugtoan diri nabaya ha aton. Usa gud nga bendisyon an magin bahin han organisasyon han Dios!

6. Paonan-o ipinakita ni Pablo nga may-ada kita mga responsabilidad ha iba nga mga Kristiano?

⁶ Kondi, diri kay aada kita ha kongregasyon basi la makakarawat; aada liwat kita basi maghatag. Oo, hi Jesus nagsiring: “May-ada labaw nga kalipay ha paghatag kay ha pagkarawat.” (Buhat 20:​35, NW) Iginpatin-aw ni apostol Pablo an pagkadisidido ha paghatag han hiya nagsurat: “Rig-onon ta an pagsumat han aton paglaom basi diri ito magkauruuy-og; kay matinumanon hiya nga nagsaad: magpinalandunganay an usa kag usa ha aton ha pag-aghat ha gugma ngan ha mga mag-opay nga buhat; diri ta bayaan an aton pagtarotarampo, sugad han batasan han iba, kondi maglinaygayay kita labi na gud, nga iyo gintatan-aw nga an adlaw nagtitikahirani na.”​—Hebreo 10:23-25.

7, 8. Paonan-o naton ipinapakita an pagkadisidido ha paghatag ha sulod han aton kongregasyon ngan ha mga Kristiano ha iba nga mga nasud?

⁷ Ha sulod han kongregasyon, aton ‘iginsusumat an aton paglaom’ kon kita nagkukomento ha katirok o nakikigbahin ha iba nga mga paagi ha programa. Iton nga mga pangalimbasog sigurado nga nagdadasig ha aton kabugtoan. Aton gindadasig liwat hira pinaagi han aton pakiistorya ha ira antes ngan katapos han katirok. Ito an panahon nga mapaparig-on naton an magluya, mapapalipay an nasusubo, ngan maliliaw an masakit. (1 Tesalonika 5:14) An sinsero nga mga Kristiano hura hiton nga klase hin paghatag, salit damu hinduro nga tinambong ha aton mga katirok ha siyahan nga panahon an nadadasig han gugma nga nakikita nira ha aton.​—Salmo 37:21; Juan 15:12; 1 Korinto 14:25.

⁸ Kondi, an aton gugma diri dida la ha aton kalugaringon nga kongregasyon. Nag-uupod ito han bug-os nga katig-uban han aton kabugtoan ha kalibotan. Salit, may-ada kahon han kontribusyon para ha Pundo han Kingdom Hall ha tagsa nga Kingdom Hall. Bangin maopay an kahimtang han aton Kingdom Hall, kondi maaram kita nga yinukot han aton mga igkasi-Kristiano ha iba nga mga nasud an waray angayan nga lugar para ha pagkatirok. Kon naamot kita hin kwarta para ha Pundo han Kingdom Hall, ipinapakita naton an aton gugma ha sugad nga mga indibiduwal bisan kon bangin diri naton kilala hira ha personal.

9. Tungod han ano nga importante nga hinungdan nga an mga Saksi ni Jehova nahigugma ha usa kag usa?

⁹ Kay ano nga an mga Saksi ni Jehova nahigugma ha usa kag usa? Bueno, hi Jesus nagsugo ha ira nga buhaton ito. (Juan 15:17) Ngan an ira gugma ha usa kag usa amo an pamatuod nga an espiritu han Dios nagios ha ira sugad nga mga indibiduwal ngan sugad nga grupo. An gugma usa nga bahin han “mga bunga han espiritu.” (Galasia 5:​22, 23) Samtang an mga Saksi ni Jehova nag-aaram ha Biblia, natambong ha Kristiano nga mga katirok, ngan padayon nga nag-aampo ha Dios, an gugma nagigin natural ha ira bisan pa han pagkinabuhi ha kalibotan diin “an gugma han kadam-an nagtutugnaw.”​—Mateo 24:​12, NW.

Paglampos Dida Hini nga Kalibotan

10. Ano an aton responsabilidad dida hini nga kalibotan?

¹⁰ An pag-unabi ni Pablo han “pagsumat han aton paglaom [“ha publiko,” NW]” nagpapahinumdom ha aton han usa pa nga responsabilidad. Ini nga pagsumat ha publiko nag-uupod han buruhaton nga pagsangyaw han maopay nga sumat ha mga tawo nga diri pa Kristiano nga kabugtoan naton. (Mateo 24:14; 28:​19, 20; Roma 10:​9, 10, 13-15) An sugad nga pagsangyaw usa pa nga buhat han paghatag. An pakigbahin dida hito nagkikinahanglan hin panahon, kusog, pangandam, pagbansay, ngan paggamit han personal nga mga panag-iya. Kondi, hi Pablo nagsurat liwat: “May utang ako ha mga Gresyahanon ngan ha mga Barbaro, ha mga makinaadmananon ngan ha mga diri-makinaadmananon. Ngani, sugad han akon mahimo, andam ako ha pagwali han maopay nga sumat ha iyo man  nga aada ha Roma.” (Roma 1:​14, 15) Pariho kan Pablo, hinaot magin mahinatagon kita samtang binabayaran naton ini nga “utang.”

11. Ano an duha nga Kasuratanhon nga prinsipyo nga naggigiya ha aton relasyon hini nga kalibotan, kondi ano an kinikilala naton?

¹¹ May-ada ba kita iba nga mga responsabilidad ha diri mga igkasi-tumuroo? Oo. Siyempre, kinikilala naton nga “an bug-os nga kalibotan aada ha gahum han usa nga maraot.” (1 Juan 5:​19, NW) Maaram kita nga hi Jesus nagsiring mahitungod han iya mga disipulo: “Diri hira kanan kalibotan, sugad nga diri man ako kanan kalibotan.” Kondi, nag-uukoy kita ha kalibotan, nagtatrabaho dida hito, ngan nakarawat hin mga serbisyo tikang hito. (Juan 17:​11, 15, 16) Salit may-ada kita mga obligasyon dida hini nga kalibotan. Ano ito? Ginbaton ni apostol Pedro iton nga pakiana. Antes gud han kabungkagan han Jerusalem, hiya nagsurat ha mga Kristiano ha Asia Minor, ngan an usa nga bahin hiton nga surat nabulig ha aton nga magkaada balanse nga relasyon hini nga kalibotan.

12. Ha ano nga paagi nga an mga Kristiano “mga lumalabay ngan dumuruong,” ngan tungod hito, ano an sadang nira likyan?

¹² Siyahan, hi Pedro nagsiring: “Mga hinigugma, nanginginyupo ako ha iyo sugad ha mga lumalabay ngan dumuruong nga maglikay kamo tikang ha mga lawasnon nga kairiphon, nga nakikipag-away kontra ha kalag.” (1 Pedro 2:11) An totoo nga mga Kristiano, ha espirituwal nga paagi, “mga lumalabay ngan dumuruong” tungod kay an totoo nga sentro han ira kinabuhi amo an paglaom ha kinabuhi nga waray kataposan​—ha langit para ha mga dinihogan han espiritu ngan ha tidaraon nga paraiso ha tuna para ha “iba man nga mga karnero.” (Juan 10:16; Filipos 3:​20, 21; Hebreo 11:13; Pahayag 7:​9, 14-17) Kondi, ano an mga hingyap han unod? Nag-uupod ini han hingyap nga magin manggaranon, han hingyap nga magin bantogan, han mga hingyap han seksuwal nga imoralidad, ngan han mga hingyap nga iginsaysay sugad nga ‘kaawa’ ngan ‘kaipa.’​—Kolosas 3:5; 1 Timoteo 6:​4, 9; 1 Juan 2:​15, 16.

13. Paonan-o an mga hingyap han unod “nakikipag-away kontra ha [aton] kalag”?

¹³ An sugad nga mga hingyap tinuod nga “nakikipag-away kontra ha [aton] kalag.” Nadadaot hito an aton relasyon ha Dios ngan salit mamimeligro an aton Kristiano nga paglaom (an aton “kalag,” o kinabuhi). Pananglitan, kon aton patuboon an interes ha imoral nga mga butang, paonan-o naton ipipresentar an aton kalugaringon sugad nga “buhi nga halad, maputli, karuruyagon ha Dios”? Kon mahulog kita ha lit-ag han materyalismo, paonan-o naton ‘pinamimiling siyahan an ginhadian’? (Roma 12:​1, 2; Mateo 6:33; 1 Timoteo 6:17-19) An mas maopay nga buhaton amo an pagsunod ha susbaranan ni Moises, isalikway an mga pagsulay han kalibotan, ngan unahon ha aton kinabuhi an pag-alagad kan Jehova. (Mateo 6:​19, 20; Hebreo 11:24-26) Ito an importante nga paagi basi magkaada balanse nga relasyon hini nga kalibotan.

‘Tipigi an Maopay nga Paggawi’

14. Kay ano nga sugad nga mga Kristiano, nangangalimbasog kita nga tipigan an maopay nga paggawi?

¹⁴ An usa pa nga importante nga giya makikita ha sunod nga mga pulong ni Pedro: “Manggawi kamo hin maopay ha butnga han mga Hentil [“Tipigi nga maopay an iyo paggawi ha butnga han mga nasud,” NW], nga, bisan kon naglilibak hira ha iyo nga baga magburuhat kamo hin maraot, ha pagtan-aw ha iyo mga mag-opay nga mga binuhatan, ira unta paghimayaon an Dios ha adlaw han [iya] pagduaw.” (1 Pedro 2:12) Sugad nga mga Kristiano, nangangalimbasog kita nga magin maopay nga susbaranan. Ha eskwelahan maduruto kita nga nag-aaram. Ha aton trabaho, maduruto kita ngan tangkod​—bisan kon an aton agaron baga in diri-makatadunganon. Ha nababahin nga panimalay, an Saksi nga bana o asawa nangangalimbasog gud ha pagsunod ha Kristiano nga mga prinsipyo. Diri ito masayon pirme, kondi maaram kita nga an aton maopay nga paggawi nakakapalipay kan Jehova ngan agsob nga may-ada maopay nga epekto ha diri mga Saksi.​—1 Pedro 2:18-20; 3:1.

15. Kay ano nga maaram kita nga an hitaas nga suruklan han paggawi han mga Saksi ni Jehova kinikilala ha bug-os nga kalibotan?

¹⁵ An kalamposan han kadam-an han mga Saksi ni Jehova ha pagtipig han susbaranan nga mga suruklan nakikita ha mga komento mahitungod ha ira nga iginpublikar ha naglabay nga mga tuig. Pananglitan, an Il Tempo han Italya nagreport: “An mga tawo nga may-ada mga kaupod ha trabaho nga mga Saksi ni Jehova naghuhulagway ha ira sugad nga tangkod nga mga trabahador, nga kombinsido gud han ira pagtoo salit baga in panatiko hira hito; bisan pa hito, takos hira han pagtahod tungod  han ira integridad ha moral.” An Herald han Buenos Aires, Argentina, nagsiring: “Pinamamatud-an han mga Saksi ni Jehova ha paglabay han mga tuig nga hira magduruto, seryoso, diri waldas, ngan mahadlukon-ha-Dios nga mga tuminungnong.” An Ruso nga eskolar nga hi Sergei Ivanenko nagsiring: “Kilala an mga Saksi ni Jehova ha bug-os nga kalibotan sugad nga mga tawo nga masinugtanon gud ha balaud ngan labi na tungod han ira istrikto nga pagtagad ha pagbayad han mga buhis.” An manidyer han usa nga pasilidad ha Zimbabwe nga ginamit han mga Saksi ni Jehova para ha ira kombensyon nagsiring: “Nakikita ko an iba han mga Saksi ni Jehova nga namumurot hin papel ngan naglilimpyo ha mga kasilyas. An lugar han kombensyon binabayaan nga mas limpyo kay han antes gamiton ito. An iyo mga tinedyer may prinsipyo. Ginhahandom ko gud nga an bug-os nga kalibotan puno unta hin mga Saksi ni Jehova.”

Kristiano nga Pagpasakop

16. Ano an aton relasyon ha sekular nga mga awtoridad, ngan kay ano?

¹⁶ Gin-uunabi liwat ni Pedro an mahitungod han aton relasyon ha sekular nga mga awtoridad. Hiya nasiring: “Magmatinumanon kamo ha ngatanan nga balaud han tawo tungod han Ginoo: kon ha hadi, sugad nga amo an gilalabawi; o ha mga gobernador, sugad nga mga sinugo niya hira ha pagbulos hin sirot ha mga magraot an binuhatan, ngan pagdayaw hadton mag-opay an binuhatan. Kay amo ini an kaburut-on han Dios, nga tungod ha maopay nga buhat iyo pamimingawon an katapangan han mga tawo nga waray sarabotan.” (1 Pedro 2:13-15) Pinasasalamatan naton an mga kapulsanan nga nakakarawat tikang ha organisado nga gobyerno, ngan tungod kay ginigiyahan han mga pulong ni Pedro, nasugot kita ha mga balaud hito ngan nagbabayad han aton mga buhis. Bisan kon kinikilala naton an hatag-han-Dios nga katungod han mga gobyerno ha pagsirot ha mga nagtatalapas han balaud, an importante nga hinungdan han aton pagpasakop ha sekular nga awtoridad amo an “tungod han Ginoo.” Kaburut-on ito han Dios. Dugang pa, diri naton karuyag nga mapasiparahan an ngaran ni Jehova pinaagi han pagsiruti tungod han maraot nga buhat.​—Roma 13:​1, 4-7; Tito 3:1; 1 Pedro 3:17.

17. Kon an “mga tawo nga waray sarabotan” nakontra ha aton, ha ano kita makakasarig?

¹⁷ Makasurubo, an iba nga “mga tawo nga waray sarabotan” nga may awtoridad nagtitimaraot ha aton o nakontra ha aton ha iba nga mga paagi​—sugad han pagpasamwak hin maraot ngan buwa nga mga impormasyon kontra ha aton. Kondi, ha igo nga panahon ni Jehova, an ira mga buwa pirme nga iginbubuhayhag, ngan an ira “katapangan” epektibo nga ginpapamingaw. An aton rekord han Kristiano nga paggawi amo an nagpapatin-aw kon hin-o an nagyayakan han kamatuoran. Salit an tangkod nga mga opisyal han gobyerno agsob nga naghahatag kumendasyon ha aton sugad nga mga magburuhat han maopay.​—Roma 13:3; Tito 2:​7, 8.

Mga Uripon han Dios

18. Sugad nga mga Kristiano, ha ano nga mga paagi malilikyan naton an sayop nga paggamit han aton kagawasan?

¹⁸ Hi Pedro nagpapahamangno yana: “Sugad nga mga linuwas, ngan diri niyo gamiton an iyo pagkalinuwas nga tabon ha mga magraot, kondi sugad nga mga uripon han Dios.” (1 Pedro 2:16; Galasia 5:13) Yana nga panahon, an aton kahibaro ha kamatuoran han Biblia nagluluwas ha aton tikang ha palso nga relihiyoso nga mga katutdoan. (Juan 8:32) Dugang pa, may-ada kita kagawasan ha pagbuot, ngan makakapili kita han aton karuyag. Kondi, diri naton ginagamit hin sayop an aton kagawasan. Kon nagpipili hin mga kaupod, bado, pag-ayos, kaliawan​—bisan pagkaon ngan irinmon​—nahinunumdom kita nga an totoo nga mga Kristiano mga uripon han Dios, diri nagpapalipay ha ira kalugaringon. Pinipili naton nga mag-alagad kan Jehova imbes nga magin mga uripon han aton lawasnon nga mga hingyap o mga uso ngan mga hilig han kalibotan.​—Galasia 5:24; 2 Timoteo 2:22; Tito 2:​11, 12.

19-21. (a) Paonan-o naton gintatagad adton may-ada mga katungdanan ha sekular nga awtoridad? (b) Paonan-o ipinapakita han iba nga ‘nahigugma hira ha bug-os nga katig-uban han kabugtoan’? (c) Ano an aton pinakaimportante nga responsabilidad?

 ¹⁹ Hi Pedro nagpapadayon ha pagsiring: “Tahuron niyo an ngatanan nga mga tawo. Higugmaon niyo an mga kabugtoan. Kahadluki niyo an Dios. Tahuron niyo an hadi.” (1 Pedro 2:17) Tungod kay tinutugotan ni Jehova nga Dios an mga tawo nga magkaada magkalainlain nga mga katungdanan han awtoridad, ipinapakita naton hiton nga mga tawo an angayan nga pagtahod. Nag-aampo pa ngani kita mahitungod ha ira, basi tugotan kita ha pagpadayon han aton ministeryo nga mamurayawon ngan may diosnon nga debosyon. (1 Timoteo 2:1-4) Kondi, ha pariho nga panahon, aton ‘hinigugma an bug-os nga katig-uban han kabugtoan.’ Pirme kita nagbubuhat para ha kaopayan, diri ha ikakadaot han aton Kristiano nga kabugtoan.

²⁰ Pananglitan, han nasamok an usa nga nasud ha Aprika tungod han kamadarahog han mga tribo, matin-aw nga nakita an Kristiano nga paggawi han mga Saksi ni Jehova. An Reformierte Presse han Switzerland nagreport: “Han 1995, napamatud-an han organisasyon han Mga Katungod han mga Aprikano . . . nga an ngatanan nga mga relihiyon nakigbahin [ha araway] gawas han mga Saksi ni Jehova.” Han an mga sumat mahitungod han makamaratay nga mga hitabo inabot ha iba nga mga nasud, an mga Saksi ni Jehova ha Europa madagmit nga nagpadara hin bulig nga pagkaon ngan medisina ha ira kabugtoan ngan ha iba pa dida hito nga nasud nga makuri an kahimtang. (Galasia 6:10) Ira ginsunod an mga pulong han Proberbios 3:27: “Ayaw ighawid an kaopayan ha ira nga hintutungdan hini, kon an gahum ha pagbuhat hini aada ha imo kamot.”

²¹ Kondi, may-ada mas importante nga responsabilidad kay han pagtahod nga utang naton ha bisan ano nga sekular nga awtoridad ngan bisan ha gugma nga utang naton ha aton kabugtoan. Ano ito? Hi Pedro nagsiring: “Kahadluki niyo an Dios.” Mas damu an utang naton kan Jehova kay ha bisan hin-o nga tawo. Paonan-o nagin sugad hito an kahimtang? Ngan paonan-o naton mababalanse an aton mga obligasyon ha Dios ngan an obligasyon naton ha sekular nga mga awtoridad? Babatunon ini nga mga pakiana ha masunod nga artikulo.

Nahinunumdoman Mo Ba?

• Ano an mga responsabilidad han mga Kristiano ha sulod han pamilya?

• Paonan-o naton maipapakita an pagin mahinatagon ha kongregasyon?

• Ano an aton mga responsabilidad ngada hini nga kalibotan?

• Ano an pipira nga mga kapulsanan han aton pagtipig hin hitaas nga suruklan han paggawi?

[Mga Pakiana]

[Retrato ha pahina 9]

Paonan-o an Kristiano nga pamilya magigin surok han daku nga kalipay?

[Mga Retrato ha pahina 10]

Kay ano nga an mga Saksi ni Jehova nahigugma ha usa kag usa?

[Mga Retrato ha pahina 10]

Maipapakita ba naton an gugma ha aton kabugtoan bisan kon diri naton kilala hira ha personal?