Mga Pakiana Tikang ha mga Magbarasa

Sadang ba tumanon pirme an mga iginsumpa ha Dios?

Ha Biblia, an sumpa usa nga seryoso nga saad ha Dios ha pagbuhat, paghalad, pagtikang ha pagbuhat hin espesyal nga buruhaton o pagsulod ha usa nga kahimtang, o paglikay ha pipira nga mga butang nga diri man sayop ha balaud. An Biblia nag-aasoy mahitungod han may-kondisyon nga mga sumpa tungod kay nag-uupod ito hin sumpa ha pagtuman ha iginpahayag nga pagkinabuhi kon buhaton anay han Dios an usa nga butang. Pananglitan, hi Hana, an iroy ni propeta Samuel, “nagsaad hin usa nga saad, ngan nagsiring: O Jehova han mga kasundalohan, kon . . . diri mo hingalimtan an imo surugoon nga babaye, kondi nga hatagan mo an imo surugoon nga babaye hin bata nga lalaki, dida hito ihahatag ko hiya kan Jehova ha ngatanan nga adlaw han iya kinabuhi, ngan waray labaha nga madapat ha iya ulo.” (1 Samuel 1:11) Iginhuhulagway liwat han Biblia an mga sumpa sugad nga boluntaryo. Kinahanglan ba tumanon an mga sumpa ha Dios?

“Kon ikaw magsaad hin usa nga saad ha Dios,” siring ni Hadi Salomon han kadaan nga Israel, “ayaw pag-ihaa an pagbayad hini.” Hiya nagdugang: “Pagbayad hadton imo iginsaad. Gabay ka pa diri magsaad, kay nga magsaad ka ngan diri bayaran.” (Eklesiastes 5:4, 5) An Balaud nga iginhatag ha Israel pinaagi kan Moises nasiring: “Kon magsaad ka hin usa nga saad kan Jehova nga imo Dios, diri ka magluya-luya hin pagbayad hito: kay hi Jehova nga imo Dios ha waray ruhaduha magkikinahanglan ha imo hito: ngan ito maiimo sala.” (Deuteronomio 23:21) Matin-aw, seryoso an paghimo hin sumpa ha Dios. Sadang ito himoon nga may husto nga motibo, ngan an usa nga naghihimo hito sadang magin sigurado ha iya abilidad ha pagtuman han anoman nga iya mga iginsasaad ha sumpa. Kay kon diri, mas maopay pa nga diri hiya magsumpa. Kondi, kon nakagsumpa na, sadang ba tumanon an ngatanan nga sumpa?

Kumusta man kon an usa nga sumpa nag-oobligar ha usa ha pagbuhat hin usa nga butang nga ha urhi hinbaroan niya nga diri uyon ha kaburut-on han Dios? Pananglitan, sumpa ito nga ha usa nga paagi magkakaw-ing han imoralidad ha totoo nga pagsingba? (Deuteronomio 23:18) Matin-aw, an sugad nga sumpa diri sadang tumanon. Dugang pa, ilarom han Mosaiko nga Balaud, an sumpa nga ginhimo han usa nga babaye mahimo paraon han iya amay o han iya bana.—Numeros 30:3-15.

Tagda liwat an kahimtang han indibiduwal nga naghimo hin sumpa ha Dios ha pagpabilin nga solo kondi yana nagkakaproblema. Tungod han iya sumpa aada hiya ha kahimtang diin inaabat niya nga an pagtuman hito nagpapahirani ha iya ha pagsupak ha mga suruklan han Dios may kalabotan ha moralidad. Sadang ba hiya mangalimbasog pa gihapon ha pagtuman han iya sumpa? Diri ba mas maopay nga iya panalipdan an iya kalugaringon nga diri makasala hin imoralidad pinaagi han diri pagtuman han iya sumpa ngan manginyupo lugod han kalooy han Dios ngan mangaro hin kapasayloan? Hiya la mismo an makakagdesisyon hito. Waray iba nga tawo an makakadesisyon para ha iya.

Ano man kon nagsumpa an usa nga ha urhi iya hinsabtan nga ginhimo ito ha apurado nga paagi? Sadang ba hiya mangalimbasog pa gihapon pagtuman han sumpa? Diri masayon para kan Jepte nga tumanon an iya iginsumpa ha Dios, kondi gintuman niya ito uyon ha iya konsensya. (Hukom 11:30-40) An kapakyas han tawo ha pagtuman han usa nga sumpa mahimo magresulta ha ‘kasina’ han Dios ngan pagkabungkag han nahimo na han indibiduwal. (Eklesiastes 5:6) An pagbalewaray ha pagtuman han sumpa mahimo makagwara han pag-uyon han Dios.

Hi Jesu-Kristo nagsiring: “An imo pagyakan sugara hini: Oo, oo; diri, diri: kay an iba pa hini tikang ha karat-an.” (Mateo 5:37) Kinahanglan tagdon han usa nga Kristiano diri la an pagtuman han mga sumpa ha Dios kondi an pagin masasarigan liwat ha ngatanan nga iya iginsiring—ha Dios ngan ha mga tawo. Ano man kon nagkakaproblema hiya tungod ha pakigsabot ha usa ka tawo nga baga hin maopay ha siyahan kondi ha mas duok nga pag-usisa hinsasabtan nga kalurongan? Diri niya sadang balewarayon an sugad nga mga butang. Kondi tungod han sinsero nga paghisgot, an kasabot mahimo magdesisyon nga kuhaan hiya han obligasyon.—Salmo 15:4; Proberbios 6:2, 3.

May kalabotan ha mga sumpa ngan ha ngatanan iba pa nga mga butang, ano an siyahan nga sadang naton tagdon? Mangalimbasog kita pirme ha pagtipig hin maopay nga relasyon kan Jehova nga Dios.