Parig-ona an Imo mga Kamot

HA Biblia, gin-uunabi an kamot hin sobra 1,800 ka beses. An mga ekspresyon may kalabotan ha kamot ginagamit ha magkalainlain nga mga paagi. Pananglitan, an limpyo nga kamot nagpapasabot hin pagin inosente. (2 Samuel 22:21; Salmo 24:3, 4) An pagbuklad han kamot nangangahulogan hin pagin mahinatagon ngadto ha iba. (Deuteronomio 15:11; Salmo 145:16) An usa nga nagbubutang han iya kinabuhi ha peligro ginsisiring nga nagbubutang han iya kalag ha iya kamot. (1 Samuel 19:5) An pagluyloy han kamot han usa nangangahulogan hin kahulop. (2 Kronikas 15:7) Ngan an pagparig-on han kamot han usa amo an pagpabaskog ngan pagpakusog ha pagbuhat.—1 Samuel 23:16.

Yana nga panahon may-ada apurado nga panginahanglan ha pagparig-on han aton mga kamot. Nagkikinabuhi kita ha “peligroso nga mga panahon nga makuri pakibagayan.” (2 Timoteo 3:1, NW) Kon nahuhulop kita, an tendensya han tawo amo an pag-undang, sugad hin naluyloy an aton mga kamot tungod han kawaray kusog. Komon an pakakita hin mga tinedyer nga naundang ha pag-eskwela, mga bana nga nabaya ha ira pamilya, ngan mga iroy nga nagsasalikway ha ira mga anak. Sugad nga mga Kristiano, kinahanglan parig-unon naton an aton mga kamot basi mailob an mga pagsari nga aton inaatubang ha aton pag-alagad ha Dios. (Mateo 24:13) Ha pagbuhat hito, ginlilipay naton an kasingkasing ni Jehova.—Proberbios 27:11.

Kon Paonan-o Paririg-unon an mga Kamot

Ha panahon ni Esra, kinahanglan parig-unon han mga Judio an ira mga kamot basi matapos an pagtukod-utro han templo ni Jehova ha Jerusalem. Paonan-o ginparig-on an ira mga kamot? An asoy nasiring: “Nagsaurog [hira] han piyesta han tinapay nga waray ipaturubo ha pito ka adlaw upod an kalipay: kay ginhimo hira ni Jehova nga malipayon, ngan ginpabirik an kasingkasing han hadi ha Asirya ngadto ha ira, ha pagparig-on han ira mga kamot dida ha buruhaton ha balay han Dios, an Dios ha Israel.” (Esra 6:22) Matin-aw, pinaagi han iya aktibo nga puwersa nga gin-aghat ni Jehova “[an] hadi ha Asirya” nga tugotan an mga tawo nga bumalik, ngan ginpagios Niya an mga tawo, salit nahuman nira an buruhaton nga ira gintikangan.

Ha urhi, han kinahanglan aydon an mga pader han Jerusalem, ginparig-on ni Nehemia an mga kamot han iya mga igkasi-Judio para han buruhaton. Aton mababasa: “Akon hira ginsumatan mahitungod han kamot han akon Dios nga maopay dida ha akon, sugad man han mga pulong han hadi nga iya iginyakan ha akon. Nga hira nagsiring: Panindog kita ngan magtukod. Busa ira ginparig-on an ira mga kamot para han maopay nga buruhaton.” Pinaagi han ginparig-on nga mga kamot, natukod-utro ni Nehemia ngan han iya mga igkasi-Judio an mga pader han Jerusalem ha sulod hin makatirigamnan nga 52 ka adlaw!—Nehemia 2:18; 6:9, 15.

Ha pariho nga paagi, ginpaparig-on ni Jehova an aton mga kamot ha pagsangyaw han maopay nga sumat han Ginhadian. (Mateo 24:14) Ginbubuhat niya ito pinaagi han ‘pagsangkap ha aton han ngatanan nga mag-opay nga butang ha pagbuhat han iya kaburut-on.’ (Hebreo 13:21, NW) Nagtatagana hiya ha aton hin mga garamiton nga gihitaasi an kuwalidad. May-ada kita Biblia ngan basado-ha-Biblia nga mga libro, mga magasin, mga brosyur, mga tract, ngan audio ngan video nga mga recording nga magagamit  naton ha pagdangat han mga tawo ha bug-os nga kalibotan. Ha pagkamatuod, an aton mga publikasyon mapapahimulosan ha sobra 380 nga yinaknan. Dugang pa, pinaagi han mga katirok ha kongregasyon, mga asembleya, ngan mga kombensyon, nagtatagana hi Jehova hin teokratiko nga edukasyon ngan pagbansay ha kon paonan-o gagamiton inin maopay nga garamiton ha pagtuman han aton ministeryo.

Bisan kon ginpaparig-on ni Jehova an aton mga kamot ha damu hinduro nga mga paagi, naglalaom liwat hiya nga mangangalimbasog kita. Hinumdumi an ginsiring ni propeta Eliseo kan Hadi Joas, nga kumadto kan Eliseo basi magpabulig ha pakig-away kontra ha mga mananakop nga mga Siryahanon. Hi Eliseo nagsiring ha hadi nga kumuha hin pipira nga mga pana ngan ipana ito ha tuna. An asoy han Biblia nasiring: “Hiya hinmampak ha nakatulo, ngan umukoy. Ngan an tawo han Dios napungot ha iya, ngan nagsiring: Nahampak ka unta ha nakalima o nakaunom: dida hito imo hinahampak an Sirya ngada nga imo naanaw ini; samtang yana ikaw makakahampak han Sirya ha matulo la.” (2 Hadi 13:18, 19) Tungod kay waray hiya kadasig ha pakig-away, limitado la an kalamposan ni Joas ha pakig-away kontra ha mga Siryahanon.

Ito nga prinsipyo naaplikar liwat ha aton kon karuyag naton tumanon an iginpapabuhat ni Jehova ha aton. Imbes nga mabaraka mahitungod ha mga nakakaulang ha aton o mahitungod ha kon mationan-o kakuri an toka, sadang magin madasigon ngan bug-os-kasingkasing nga buhaton naton ito. Kinahanglan parig-unon naton an aton mga kamot ngan sumarig kan Jehova para han bulig.—Isaias 35:3, 4.

Paririg-unon ni Jehova an Aton mga Kamot

Diri mapapakyas hi Jehova ha pagbulig ha aton ngan pagparig-on han aton mga kamot ha pagbuhat han iya kaburut-on. Siyempre, hi Jehova diri maghihimo hin usa nga milagro ngan magbubuhat han ngatanan para ha aton. Naglalaom hiya nga bubuhaton naton an aton bahin—pagbasa han Biblia kada adlaw, regular nga pag-andam ngan pagtambong ha mga katirok, agsob nga pakigbahin ha ministeryo kon posible, ngan regular nga pag-ampo ha iya. Kon matinumanon ngan maduruto nga ginbubuhat naton an aton bahin samtang may-ada kita higayon, tatagan kita ni Jehova hin kusog ha pagbuhat han iya ginlalaoman ha aton.—Filipos 4:13.

Tagda an kahimtang han usa nga Kristiano nga namatayan han iya asawa ngan han iya iroy ha sulod hin usa la ka tuig. Bag-o la nga naeksperyensyahan niya an kasakit han ginbayaan han iya umagad an iya anak nga lalaki ngan iginsalikway an Kristiano nga pagkinabuhi. “Hinbaroan ko nga diri kita makakapili hin mga pagsari ha aton, bisan an panahon kon san-o ito mahitatabo o an kaagsob han panhitabo hito,” nagsiring ini nga bugto. Paonan-o hiya naparig-on basi makagpadayon? “An pag-ampo ngan personal nga pag-aram nagin sugad hin salbabida nga nakabulig ha akon nga diri malunod. Ngan an suporta han akon espirituwal nga kabugtoan nakaliaw gud ha akon. Labaw ha ngatanan, nasabtan ko an bili han pagpatubo hin maopay nga personal nga relasyon kan Jehova antes bumangon an makuri nga mga kahimtang.”

Anoman an imo kahimtang ha kinabuhi, magin determinado ha pagsarig hin bug-os kan Jehova ngan ha pagpahimulos gud han ngatanan nga mga tagana nga iya ginhihimo ha pagparig-on han imo mga kamot. Niyan an imo pag-alagad kan Jehova magigin maopay gud an kuwalidad ngan salit magdadara hin pagdayaw ngan dungog ha iya presyoso nga ngaran.—Hebreo 13:15.

[Retrato ha pahina 31]

Tungod kay waray hiya kadasig ha pakig-away, limitado la an kalamposan ni Joas ha pakig-away kontra ha mga Siryahanon