“Mag-agma Kamo”!
“Mag-agma Kamo”!
“An akon igsisiring ha iyo, akon igsisiring ha ngatanan: Mag-agma kamo.”—MARKOS 13:37.
1, 2. (a) Ano nga leksyon an hinbaroan han usa nga lalaki mahitungod han pagpanalipod ha iya panag-iya? (b) Ha ilustrasyon ni Jesus mahitungod han kawatan, ano an hinbaroan naton mahitungod han pagpabilin nga nagmamata?
GINTIPIGAN ni Juan an iya birilhon nga mga butang ha balay. Iya igintago ito ha ilarom han iya higdaan—nga ha iya hunahuna amo an may seguridad nga lugar ha balay. Kondi, usa ka gab-i, samtang nakaturog hira nga mag-asawa, usa nga kawatan an sinulod ha kuwarto. Matin-aw, maaram an kawatan kon diin gud mamimiling. Waray aringasa nga ginkuha niya an ngatanan nga birilhon nga butang ha ilarom han higdaan sugad man an kwarta nga iginbutang ni Juan ha hunos han lamesa nga tupad han higdaan. Pagkaaga, hinbaroan ni Juan nga may-ada nangawat. Mahinunumdoman niya pirme an nakakaguol nga leksyon nga iya hinbaroan: An nakaturog nga tawo diri makakagbantay han iya mga panag-iya.
2 Totoo ito ha espirituwal nga paagi. Diri naton mapapanalipdan an aton paglaom ngan an aton pagtoo kon mahingaturog kita. Salit, an sagdon ni Pablo: “Diri kita mangaturog, sugad han iba, kondi mag-agma kita ngan magmaligdong.” (1 Tesalonika 5:6) Basi maipakita nga importante gud an pagpabilin nga nagmamata, ginamit ni Jesus an ilustrasyon mahitungod han usa nga kawatan. Iya iginsaysay an mga hitabo nga magtutugway ha iya pag-abot sugad nga Hukom, ngan katapos hiya nagpahamangno: “Busa magbantay kamo, kay diri kamo maaram kon ano nga adlaw an pagkanhi han iyo Ginoo. Kondi kilalaha ini, nga kon an agaron han balay mahibaro kon ha ano nga agma han kagab-ihon an pag-abot han kawatan, hiya mag-aagma kunta, ngan diri pinababay-an an iya balay nga mabungkag. Busa mag-andam man kamo, kay an Anak han tawo makanhi ha oras nga diri niyo ginhuhunahuna.” (Mateo 24:42-44) An kawatan diri nagsusumat nga daan kon san-o hiya maabot. Karuyag niya nga umabot ha panahon nga waray naglalaom ha iya. Ha pariho man nga paagi, sugad han ginsiring ni Jesus, maabot an kataposan hini nga sistema ha ‘oras nga diri naton ginhuhunahuna.’
“Magbantay Kamo, Magmarig-on Kamo ha Pagtoo”
3. Ha paggamit hin ilustrasyon mahitungod han mga uripon nga naghuhulat ha pagbalik han ira agaron tikang ha kasal, paonan-o ipinakita ni Jesus an pagkaimportante han pagpabilin nga nagmamata?
3 Ha mga pulong nga nakarekord ha Ebanghelyo ni Lukas, iginpariho ni Jesus an mga Kristiano ha mga uripon nga naghuhulat ha pagbalik han ira agaron tikang ha kasal. Kinahanglan magpabilin hira nga alerto basi kon umabot hiya nagmamata hira, andam ha pagtapo ha iya. Ha pariho nga paagi, hi Jesus nagsiring: “An Anak han tawo makanhi ha oras, nga diri niyo ginhuhunahuna.” (Lukas 12:40) An iba nga nag-aalagad kan Jehova ha damu na nga katuigan bangin mawad-an han ira pag-abat hin pagkaapurado mahitungod han mga panahon diin kita nagkikinabuhi. Bangin makasiring pa ngani hira nga maiha pa umabot an kataposan. Kondi an sugad nga panhunahuna mahimo magpahirayo han aton atensyon tikang ha espirituwal nga mga butang ngan mahingada ha materyal nga mga tumong, mga ulang nga makakahimo ha aton nga mahingaturog ha espirituwal.—Lukas 8:14; 21:34, 35.
4. Ano nga determinasyon an magpapagios ha aton nga magpabilin nga nag-aagma, ngan paonan-o ipinakita ini ni Jesus?
4 Usa pa nga leksyon an makukuha naton tikang ha ilustrasyon ni Jesus. Bisan kon diri maaram an mga uripon ha oras han pag-abot han ira agaron, matin-aw nga maaram hira kon san-o ito nga gab-i. Bangin makuri an pagpabilin nga nagmamata ha bug-os nga gab-i kon naghunahuna hira nga an ira agaron maabot ha iba nga gab-i. Kondi diri, maaram hira kon san-o nga gab-i hiya maabot, ngan naghatag ito ha ira hin marig-on nga hinungdan nga magpabilin nga nagmamata. Ha pariho nga paagi, matin-aw nga iginpapahayag han mga tagna han Biblia nga nagkikinabuhi na kita ha panahon han kataposan; kondi diri ito nagsusumat ha aton han adlaw o han oras han kataposan mismo. (Mateo 24:36) An aton pagtoo nga maabot an kataposan nabulig ha aton nga magpabilin nga nagmamata, kondi kon kombinsido kita nga hirani na gud an adlaw ni Jehova, magkakaada kita mas marig-on pa gud nga hinungdan nga magpabilin nga nag-aagma.—Sepania 1:14.
5. Paonan-o kita magios ha pagsagda ni Pablo nga “magbantay”?
5 Ha pagsurat ha mga taga-Korinto, hi Pablo nagsagda: “Magbantay kamo, magmarig-on kamo ha pagtoo.” (1 Korinto 16:13) Oo, an pagpabilin nga nagmamata iginkakaw-ing ha aton pagpabilin nga marig-on ha Kristiano nga pagtoo. Paonan-o kita makakapabilin nga nagmamata? Pinaagi han pagkaada hin mas hilarom nga kahibaro ha Pulong han Dios. (2 Timoteo 3:14, 15) An maopay nga mga rutina ha personal nga pag-aram ngan regular nga pagtambong ha mga katirok nabulig ha pagparig-on han aton pagtoo, ngan importante nga bahin han aton pagtoo an pagtipig ha hunahuna nga hirani na an adlaw ni Jehova. Salit an aton pagrepaso ha pana-panahon han Kasuratanhon nga ebidensya nga nagkikinabuhi kita nga hirani na ha kataposan hini nga sistema mabulig ha aton nga diri hingalimtan an importante nga mga kamatuoran mahitungod hiton tiarabot nga kataposan. a Mapulsanon liwat an pag-obserba ha mga panhitabo ha kalibotan nga nagtutuman han tagna han Biblia. Usa nga bugto nga lalaki ha Alemanya an nagsurat: “Ha kada panahon nga nagkikita ako ha mga sumat—an mga girra, mga linog, kamadarahog, ngan kahugaw ha aton planeta—iginpapatin-aw hito ha akon an pagkahirani han kataposan.”
6. Ha ano nga paagi igin-ilustrar ni Jesus an posibilidad nga mawara an espirituwal nga kaalerto samtang nagpapadayon an panahon?
6 Ha Markos kapitulo 13, makikita naton an usa pa nga asoy mahitungod han pagsagda ni Jesus ha iya mga sumurunod nga magpabilin hira nga nagmamata. Sumala hini nga kapitulo, iginpariho ni Jesus an ira kahimtang ha usa nga parabantay han purtahan nga naghuhulat ha pagbalik han iya agaron tikang ha pagbiyahe ha iba nga nasud. An parabantay han purtahan diri maaram ha oras han pagbalik han iya agaron. Kinahanglan la niya magpadayon nga nag-aagma. Gin-unabi ni Jesus an upat nga magkalainlain nga pag-agma nga bangin umabot an agaron. An ikaupat nga pag-agma tikang ha mga alas tres han kaagahon tubtob ha pagsidlit han adlaw. Ha kataposan nga pag-agma, masayon mahingaturog an parabantay han purtahan. Sumala ha mga sumat, gintatagad han mga sundalo nga an oras antes han kaagahon amo an gimaopayi nga panahon nga maabotan an kaaway nga diri naglalaom. Ha pariho nga paagi, hinin ultimo nga bahin han kataposan nga mga adlaw, nga ha espirituwal nga paagi hilarom an pagkaturog han kalibotan nga nakapalibot ha aton, bangin kinahanglan mangalimbasog pa gud kita nga magpabilin nga nagmamata. (Roma 13:11, 12) Salit, ha iya ilustrasyon, pauro-utro hi Jesus nga nagsasagda: “Pagmatngon kamo, ngan pag-agma . . . Busa mag-agma kamo . . . An akon igsisiring ha iyo, akon igsisiring ha ngatanan, Mag-agma kamo.”—Markos 13:32-37.
7. Ano nga totoo nga peligro an naeksister, ngan tungod hini, ano nga pagdasig an agsob nga mababasa naton ha Biblia?
7 Durante han iya ministeryo ngan katapos han iya pagkabanhaw, damu ka beses nga iginsagda ni Jesus an pag-agma. Ha pagkamatuod, haros ha kada panahon nga gin-uunabi han Kasuratan an kataposan hini nga sistema han mga butang, makikita naton an pahamangno nga magpabilin nga nagmamata o magpadayon nga nag-aagma. b (Lukas 12:38, 40; Pahayag 3:2; 16:14-16) Matin-aw, totoo gud nga peligro an espirituwal nga kahingaturog. Ginkikinahanglan naton ngatanan ito nga mga pahamangno!—1 Korinto 10:12; 1 Tesalonika 5:2, 6.
Tulo nga Apostol nga Waray Magpabilin nga Nagmamata
8. Ha hardin han Getsemani, paonan-o ginios an tulo han mga apostol ni Jesus ha iya hangyo nga magpadayon ha pag-agma?
8 An pagpabilin nga nagmamata nagkikinahanglan hin labaw pa kay han maopay nga mga katuyoan, sugad han makikita naton tikang ha ehemplo ni Pedro, Jakobo, ngan Juan. Espirituwal nga kalalakin-an ini nga tulo nga maunungon nga nagsunod kan Jesus ngan naghigugma gud ha iya. Kondi, ha gab-i han Nisan 14, 33 K.P., waray hira magpabilin nga nagmamata. Han pagbaya ha igbaw nga kuwarto diin ginselebrar nira an Paskua, an tulo nga apostol inupod kan Jesus ngadto ha hardin han Getsemani. Didto hi Jesus nagsiring ha ira: “An akon kalag nasusubo gud kaopay tubtob ha kamatayon; ukoy dinhi, ngan pag-agma kamo upod ha akon.” (Mateo 26:38) Tulo ka beses nga nag-ampo hin sinsero hi Jesus ha iya langitnon nga Amay, ngan tulo ka beses nga binalik hiya ha iya kasangkayan, ngan nakita hira nga nangangaturog.—Mateo 26:40, 43, 45.
9. Posible nga ano an hinungdan han kahingaturog han mga apostol?
9 Kay ano nga inin matinumanon nga kalalakin-an napakyas ha pagsunod kan Jesus hiton nga gab-i? Usa nga hinungdan an pisikal nga kakapoy. Gab-i na hinduro, bangin naglabay na an katutnga han kagab-ihon, ngan “an ira mga mata magbug-at kaopay” salit nanhingaturog hira. (Mateo 26:43) Kondi, hi Jesus nagsiring: “Magbantay kamo, ngan pag-ampo, basi diri kamo mahulog ha pagsulay. Matuod, an espiritu andam, kondi an unod maluya.”—Mateo 26:41.
10, 11. (a) Bisan pa han iya kakapoy, ano an nakabulig kan Jesus nga magpadayon nga nag-aagma ha hardin han Getsemani? (b) Ano an mahibabaroan naton tikang ha nahitabo ha tulo nga apostol han ginhangyo hira ni Jesus nga magpadayon nga nag-aagma?
10 Sigurado, nakapoy liwat hi Jesus hiton makatirigamnan nga gab-i. Kondi, imbes nga kumaturog, ginamit niya iton importante, kataposan nga mga takna nga may kagawasan pa hiya ha sinsero nga pag-ampo. Mga pipira ka adlaw una pa, iya ginsagda an iya mga sumurunod nga mag-ampo, nasiring: “Busa, pag-agmahi niyo ha ngatanan nga panahon, ngan mag-ampo basi kamo magpakapalagiw ha ngatanan hini nga mga bagay nga maabot, ngan pagtukdaw hin marig-on ha atubangan han Anak han tawo.” (Lukas 21:36; Efeso 6:18) Kon aton sundon an sagdon ni Jesus ngan subaron an iya maopay nga susbaranan ha pag-ampo, an aton kinasingkasing nga mga pangamuyo kan Jehova mabulig ha aton nga magpabilin nga nagmamata ha espirituwal.
11 Siyempre, maaram hi Jesus—kondi waray hisabti han iya mga disipulo hiton nga panahon—nga diri na mag-iiha dadakpon hiya ngan sisirotan hin kamatayon. An mga pagsari ha iya maabot ha masakit nga pungkay dida ha pasakitan nga kahoy. Nagpahamangno hi Jesus ha iya mga apostol mahitungod hini nga mga butang, kondi waray hira makasabot han iya ginsiring. Salit, nahingaturog hira samtang nagpabilin hiya nga nagmamata ngan nag-aampo. (Markos 14:27-31; Lukas 22:15-18) Sugad la ha mga apostol, an aton unod maluya liwat ngan may-ada mga butang nga diri pa naton hinbabaroan. Kondi, kon diri naton masabtan an pagkaapurado han mga panahon diin nagkikinabuhi kita, bangin mahingaturog kita ha espirituwal nga paagi. Pinaagi la han pagin alerto nga magpapabilin kita nga nagmamata.
Tulo nga Importante nga Kalidad
12. Ano nga tulo nga kalidad an iginpapariho ni Pablo ha pagtipig han aton mga sarabotan?
12 Paonan-o naton matitipigan an aton pag-abat hin pagkaapurado? Nasabtan na naton an pagkaimportante han pag-ampo ngan an panginahanglan han pagtipig ha hunahuna han adlaw ni Jehova. Dugang pa, gin-uunabi ni Pablo an tulo nga importante nga kalidad nga sadang patuboon naton. Hiya nasiring: “Kondi kita, nga kanan adlaw, magmaligdong kita, ngan magsul-ot kita han taming han pagtoo ngan paghigugma; ngan han kalasag han paglaom han kaluwasan.” (1 Tesalonika 5:8) Aton paghisgotan hin halipot an bahin han pagtoo, paglaom, ngan gugma ha aton pagpabilin nga nagmamata ha espirituwal.
13. Ano an nahihimo han pagtoo ha aton pagpabilin nga alerto?
13 Kinahanglan magkaada kita diri-nababantad nga pagtoo nga naeksister hi Jehova ngan nga “hiya magbabalos ha ngatanan nga nagbibiling ha iya.” (Hebreo 11:6) An una, siyahan-siglo nga katumanan han tagna ni Jesus mahitungod han kataposan nagpaparig-on han aton pagtoo ha darodaku nga katumanan hito durante han aton panahon. Ngan an aton pagtoo nabulig ha aton nga magpabilin nga madasigon ha paghulat han adlaw ni Jehova, sigurado nga “[an matagnaon nga bisyon] ha waray ruhaduha maabot. Ini diri maglalangan.”—Habakuk 2:3.
14. Ha ano nga paagi importante an paglaom kon karuyag naton magpabilin nga nagmamata?
14 An aton sigurado nga paglaom pariho hin ‘angkla para han kalag’ nga nabulig ha aton nga makailob ha mga kakurian bisan kon kinahanglan maghulat kita han katumanan han mga saad han Dios. (Hebreo 6:18, 19) Hi Margaret, usa nga dinihogan-han-espiritu nga bugto nga babaye nga sobra 90 anyos na an edad ngan nabawtismohan sobra 70 ka tuig na an naglabay, nagsiring: “Han tikamatay na an akon bana tungod ha kanser han 1963, inabat ko nga maopay unta kon umabot dayon an kataposan. Kondi yana nasasabtan ko nga ginhunahuna ko la an akon kalugaringon nga mga kaopayan. Diri kami maaram hiton nga panahon kon mationan-o kahaluag pa nga mag-uuswag an buruhaton ha bug-os nga kalibotan. Bisan yana, damu pa gihapon an mga lugar diin gintitikangan pa la an buruhaton. Salit nalilipay ako nga hi Jehova nagpapailob.” Hi apostol Pablo nagpapasarig ha aton: ‘An pagpailob [nabunga] hin inuyonan nga kahimtang; an inuyonan nga kahimtang hin paglaom, ngan an paglaom diri nahatag hin kaawod.’—Roma 5:3-5.
15. Paonan-o magpapagios ha aton an gugma bisan kon baga in naghihinulat kita hin maiha na nga panahon?
15 An Kristiano nga gugma maopay gud nga kalidad tungod kay ipinapakita hito an motibo han ngatanan nga aton ginbubuhat. Nag-aalagad kita kan Jehova tungod kay nahigugma kita ha iya, anoman an iya itinanda nga panahon. An gugma ha igkasi-tawo nagpapagios ha aton nga isangyaw an maopay nga sumat han Ginhadian, mationan-o man kaiha nga bubuhaton naton ito uyon ha kaburut-on han Dios ngan mationan-o man kadamu ka beses nga mabalik kita hiton mismo nga mga balay. Sugad han iginsurat ni Pablo, “magpapadayon an pagtoo, an paglaom, an gugma, ini nga tulo; ngan an gidadakui hini amo an gugma.” (1 Korinto 13:13) An gugma nabulig ha aton nga magpadayon ha pag-ilob ngan magpabilin nga nagmamata. “[An gugma] naglalaom ha ngatanan nga mga butang, nag-iilob ha ngatanan nga mga butang. An gugma diri napapakyas.”—1 Korinto 13:7, 8, NW.
“Kapti hin Marig-on an Aada ha Imo”
16. Imbes nga magin maluya ha buruhaton, ano nga disposisyon an sadang patuboon naton?
16 Nagkikinabuhi kita ha makatirigamnan nga mga panahon nga an mga hitabo ha kalibotan nagpapahinumdom pirme ha aton nga aada na kita ha ultimo nga bahin han kataposan nga mga adlaw. (2 Timoteo 3:1-5) Diri panahon yana ha pagin maluya ha buruhaton kondi ‘kaptan hin marig-on an aada ha aton.’ (Pahayag 3:11) Pinaagi han pagin ‘nag-aagma ha pag-ampo’ ngan pinaagi han pagpatubo han pagtoo, paglaom, ngan gugma, pamamatud-an naton nga andam kita ha oras han pagsari. (1 Pedro 4:7) Damu an aton pagbubuhaton ha buruhaton han Ginoo. An pagin okupado ha mga buhat han diosnon nga debosyon mabulig ha aton nga magpabilin nga bug-os nga nagmamata.—2 Pedro 3:11.
17. (a) Kay ano nga an mga kapakyasan usahay diri sadang magpaluya ha aton? (Kitaa an kahon ha pahina 21.) (b) Paonan-o naton masusubad hi Jehova, ngan ano nga mga bendisyon an naghuhulat para hadton nagbubuhat hito?
17 “Hi Jehova amo an akon bahin,” an iginsurat ni Jeremias, “busa ako maglalaom ha iya. Hi Jehova maopay ha ira nga naghuhulat ha iya, ha kalag nga nangingita ha iya. Maopay nga an tawo maglalaom ngan ha mahilumon maghuhulat han kaluwasan ni Jehova.” (Pagtangis 3:24-26) An iba ha aton naghihinulat hin halipot pa la nga panahon. An iba naghihinulat hin damu nga katuigan na nga makita an pagluwas ni Jehova. Kondi, halipot gud la ini nga panahon han paghinulat kon itanding ha kadayonan nga aada ha unhan! (2 Korinto 4:16-18) Ngan samtang ginhuhulat naton an itinanda nga panahon ni Jehova, mapapatubo naton an importante nga Kristiano nga mga kalidad ngan mabubuligan an iba nga pahimulosan an pagpailob ni Jehova ngan karawaton an kamatuoran. Salit, hinaot magpadayon kita ngatanan nga nag-aagma. Aton subaron hi Jehova ngan magin mapailubon, mapasalamaton ha paglaom nga iya iginhahatag ha aton. Ngan samtang matinumanon nga nagpapabilin kita nga alerto, hinaot kumapot kita hin marig-on ha paglaom nga kinabuhi nga waray kataposan. Niyan, inin matagnaon nga mga saad sigurado nga matutuman ha aton: “Igpapahitaas ka [ni Jehova] basi ka makapanunod han tuna: makikita nimo kon an magraot mahibulag na.”—Salmo 37:34.
[Mga footnote]
a Bangin makabulig an pagrepaso han unom nga ebidensya nga nagpapasabot nga nagkikinabuhi na kita ha “kataposan nga mga adlaw” nga iginsaysay ha pahina 12-13 han Enero 15, 2000 nga gowa han An Barantayan.—2 Timoteo 3:1.
b Ha paghisgot han Griego nga berbo nga iginhubad nga “magpabilin nga nagmamata,” an leksikograpo nga hi W. E. Vine nagsasaysay nga literal nga nangangahulogan ito hin ‘pagpugong ha kahingaturog,’ ngan “nagpapahayag diri la han pagin nagmamata, kondi han pag-agma hadton interesado ha usa nga butang.”
Paonan-o Mo Babatunon?
• Paonan-o naton mapaparig-on an aton pagtoo nga hirani na an kataposan hini nga sistema han mga butang?
• Ano an mahibabaroan tikang ha mga ehemplo ni Pedro, Jakobo, ngan Juan?
• Ano an tulo nga kalidad nga mabulig ha aton nga magpabilin nga nagmamata ha espirituwal?
• Kay ano nga ini an panahon ha ‘padayon nga pagkapot hin marig-on han aada ha aton’?
[Mga Pakiana]
[Kahon/Retrato ha pahina 21]
“Malipayon Hiya nga Padayon nga Naghuhulat.”—Daniel 12:12, NW
Handurawa nga an usa nga bantay naghuhunahuna nga may-ada kawatan nga nagpaplano pangawat ha mga tinukod nga iya ginbabantayan. Pagkagab-i, an bantay namamati hin maopay ha anoman nga aringasa nga mahimo magpasabot nga may-ada kawatan. Kada oras alerto an iya mga talinga ngan mga mata. Masayon masabtan kon paonan-o hiya mahimo malimbongan han sayop nga aringasa—an tunog han hangin ha kakahoyan o han usa nga misay nga may-ada nabunggo.—Lukas 12:39, 40.
An pariho nga butang mahimo mahitabo hadton “naghuhulat ha pagpahayag han aton Ginoo Jesu-Kristo.” (1 Korinto 1:7) An mga apostol naghunahuna nga kan Jesus ‘ibabalik an ginhadian ha Israel’ ha gilayon katapos han iya pagkabanhaw. (Buhat 1:6) Paglabay hin mga katuigan, kinahanglan pahinumdumon an mga Kristiano ha Tesalonika nga an presensya ni Jesus ha tidaraon pa. (2 Tesalonika 2:3, 8) Kondi, an waray matuman nga paghinulat mahitungod han adlaw ni Jehova waray magpagios hadton siyahan nga mga sumurunod ni Jesus nga bayaan an dalan nga nagtutugway ngadto ha kinabuhi.—Mateo 7:13.
Ha aton panahon, an pag-abat hin kapakyas ha baga in kalangan ha pag-abot han kataposan hini nga sistema han mga butang diri sadang magpaluya han aton pagin alerto. An alerto nga bantay bangin malimbongan han sayop nga tigaman, kondi kinahanglan magpadayon hiya nga nag-aagma! Ito an iya trabaho. Sugad liwat hito an mga Kristiano.
[Retrato ha pahina 18]
Kombinsido ka ba nga hirani na an adlaw ni Jehova?
[Mga Retrato ha pahina 19]
An mga katirok, pag-ampo, ngan maopay nga mga batasan ha pag-aram nabulig ha aton nga magpadayon nga nag-aagma
[Retrato ha pahina 22]
Pariho kan Margaret, hinaot magin mapailubon kita ngan aktibo ha pagpadayon nga nag-aagma