Yana Labaw ha Kan-o Pa Man, Magpabilin nga Nagmamata!

“Diri kita mangaturog, sugad han iba, kondi mag-agma kita ngan magmaligdong.”—1 TESALONIKA 5:6.

1, 2. (a) Ano nga klase hin mga siyudad an Pompeii ngan Herculaneum? (b) Ano nga pahamangno an ginbalewaray han damu nga mga umurukoy ha Pompeii ngan Herculaneum, ngan ano an resulta?

 HAN siyahan nga siglo han aton Komon nga Panahon, an Pompeii ngan Herculaneum duha nga mainuswagon nga siyudad han Roma nga hirani ha Mount Vesuvius. Para ha bahandianon nga mga Romano, popular ito nga mga lugar nga bakasyonan. An ira mga teatro may-ada sobra usa ka yukot nga mga lingkoran, ngan ha Pompeii may-ada daku hinduro nga awditoryum nga makakalingkod an bug-os nga populasyon han bungto. An mga nakaukab ha Pompeii nakaihap hin 118 nga irignoman, nga an iba hito mga balay nga huruygoan o mga balay han mga bigaon. Pinamamatud-an han mga dibuho ngan iba nga mga guba nga nagsasarang an imoralidad ngan materyalismo hadto.

² Han Agosto 24, 79 K.P., an Mount Vesuvius nagtikang bumuto. An mga bulkanologo natoo nga an siyahan nga pagbuto, nga nag-uran hin sugad-kristal nga lapok nga mapaso ngan abo ngada ha duha nga siyudad, posible nga waray makapugong ha mga umurukoy ha pagpalagiw. Oo, damu gud an nakapalagiw. Kondi, nagpabilin an iba nga naghunahuna nga gutiay la an peligro o nagbalewaray la han nagpapahamangno nga mga tigaman. Katapos, ha mga katutnga han kagab-ihon, tigda nga nagtimpag an mapaso hinduro nga gas, sugad-kristal nga lapok, ngan mga bato ngada ha Herculaneum, salit nakurian pagginhawa an ngatanan nga mga umurukoy nga nanhibilin ha siyudad. Temprano pa han kinabuwasan, an pariho nga pagbuto nagpatay han ngatanan ha Pompeii. Makamaratay gud ito nga resulta han diri pagsunod ha nagpapahamangno nga mga tigaman!

An Kataposan han Judio nga Sistema han mga Butang

 3. Ano an pagkapariho han kabungkagan han Jerusalem ngan han Pompeii ngan Herculaneum?

³ An makaharadlok nga kataposan han Pompeii ngan Herculaneum nalabawan pa gud han kabungkagan han Jerusalem siyam ka tuig una pa, bisan kon iton nga kabungkagan amo an resulta han binuhatan han mga tawo. Iginhulagway ito sugad nga “usa han pinakamakaharadlok nga mga paglikos ha bug-os nga kasaysayan,” sumala ha sumat sobra usa ka milyon nga Judio an nagkamatay. Kondi, pariho han kalamidad ha Pompeii ngan Herculaneum, an kabungkagan han Jerusalem nahitabo nga may pahamangno.

 4. Ano nga matagnaon nga tigaman an iginhatag ni Jesus ha pagpahamangno ha iya mga sumurunod nga hirani na an kataposan han sistema han mga butang, ngan paonan-o ito siyahan nga natuman ha siyahan nga siglo?

⁴ Igintagna ni Jesu-Kristo an kabungkagan han siyudad, ngan igintagna niya an mga hitabo nga mahiuuna hito—an nakakaguol nga mga hitabo sugad han mga girra, mga kakulang hin pagkaon, mga linog, ngan karaotan. Magigin aktibo an palso nga mga propeta, kondi an maopay nga sumat han Ginhadian han Dios isasangyaw ha bug-os nga kalibotan. (Mateo 24:4-7, 11-14) Bisan kon an mga pulong ni Jesus may-ada daku nga katumanan yana nga panahon, may-ada ito gutiay nga katumanan hadto. An kasaysayan nagrekord hin duro nga gutom ha Judea. (Buhat 11:28) An Judio nga historyador nga hi Josephus nagsumat mahitungod han usa nga linog ha lugar han Jerusalem antes gud han kabungkagan han siyudad. Samtang nagtitikahirani an kataposan han Jerusalem, may-ada padayon nga mga pagrebelde, araway butnga han politikal nga mga grupo han mga Judio, ngan mga pamatay ha damu nga mga siyudad diin nag-uukoy an mga Judio ngan mga Hentil. Kondi bisan pa hito, an maopay nga sumat han Ginhadian iginsasangyaw hadto “ha ngatanan nga mga binuhat ha ilarom han langit.”—Kolosas 1:23.

5, 6. (a) Ano nga matagnaon nga mga pulong ni Jesus an natuman han 66 K.P.? (b) Kay ano nga damu hinduro an nagkamatay han ha kataposan napukan an Jerusalem han 70 K.P.?

⁵ Ha kataposan, han 66 K.P., nagrebelde an mga  Judio kontra ha Roma. Han nanguna hi Cestius Gallus ha kasundalohan basi likosan an Jerusalem, nahinumdom an mga sumurunod ni Jesus han iya mga pulong: “Kon makita niyo an Jerusalem, nga ginlilibotan han mga sundalo, niyan hibabaroan niyo, nga hirani na an kaguba niya. Niyan an mga aadto ha Judea, manmalagiw ngadto ha mga kabukiran; ngan an aada ha butnga, man-gowa; ngan an mga ha kauumhan, diri manulod.” (Lukas 21:20, 21) Inabot an panahon nga kinahanglan bayaan an Jerusalem—kondi paonan-o? Diri ginlalaoman, ginpabaya ni Gallus an iya kasundalohan, nga naghatag hin paagi para han mga Kristiano ha Jerusalem ngan Judea nga sundon an mga pulong ni Jesus ngan pumalagiw ngadto ha kabukiran.—Mateo 24:15, 16.

⁶ Paglabay hin upat ka tuig, ha panahon han Paskua, binalik an Romano nga kasundalohan ha panguna ni Heneral Tito, nga determinado nga tapuson an pagrebelde han mga Judio. Ginpalibotan han iya kasundalohan an Jerusalem ngan naghimo hin ‘alad nga tais nga mga poste’ salit imposible an pakapalagiw. (Lukas 19:43, 44, NW) Bisan pa han tarhog han girra, an mga Judio tikang ha bug-os nga Imperyo han Roma nagkaabot ha Jerusalem para han Paskua. Yana diri na hira makagawas. Sumala kan Josephus, inin makalolooy nga mga bisita amo an kadam-an han mga nagkamatay ha paglikos han mga Romano. a Han ha kataposan napukan an Jerusalem, mga ikapito ka bahin han ngatanan nga mga Judio ha Imperyo han Roma an nagkamatay. An kabungkagan han Jerusalem ngan han templo hito nangahulogan han kataposan han Judio nga estado ngan han relihiyoso nga sistema hito nga iginbasar ha Mosaiko nga Balaud. b—Markos 13:1, 2.

 7. Kay ano nga natalwas an matinumanon nga mga Kristiano ha kabungkagan han Jerusalem?

⁷ Han 70 K.P., nagkamatay o nauripon unta an Judio nga mga Kristiano upod an ngatanan dida ha Jerusalem. Kondi, sumala ha ebidensya han kasaysayan, ginsunod nira an pahamangno ni Jesus nga iginhatag 37 ka tuig una pa. Binayaan nira an siyudad ngan waray na balik.

Napapanahon nga mga Pahamangno Tikang ha mga Apostol

 8. Ano nga panginahanglan an nasabtan ni Pedro, ngan ano nga mga pulong ni Jesus an sigurado nga iya nahinumdoman?

⁸ Yana nga panahon, nagtitiarabot an mas haluag-an-lukop nga kabungkagan, usa nga magtatapos hinin bug-os nga sistema han mga butang. Unom ka tuig antes han kabungkagan han Jerusalem, hi apostol Pedro naghatag hin apurado ngan napapanahon nga sagdon nga naaplikar labi na ha mga Kristiano ha aton panahon: Magpabilin nga alerto! Nasabtan ni Pedro nga kinahanglan pukawon an ira ‘matin-aw nga panhunahuna’ basi diri nira igbalewaray ‘an sugo han Ginoo,’ hi Jesu-Kristo. (2 Pedro 3:1, 2) Ha pagsagda ha mga Kristiano nga magin alerto, sigurado nga nahinumdoman ni Pedro an iya hinbatian nga ginsiring ni Jesus ha Iya mga apostol mga pipira ka adlaw antes han Iya kamatayon: “Pagmatngon kamo, ngan pag-agma, ngan mag-ampo, kay diri kamo maaram kon san-o an panahon.”—Markos 13:33.

 9. (a) Ano nga peligroso nga paggios an napapatubo han iba? (b) Kay ano nga peligroso gud an maruhaduhaon nga paggios?

 ⁹ Yana nga panahon, an iba may pagtamay nga nagpapakiana: “Hain na an saad han iya pagkanhi?” (2 Pedro 3:3, 4) Matin-aw, inaabat hiton nga mga tawo nga an mga kahimtang diri gud nagbabag-o kondi nagpapadayon nga amo la gihapon tikang pa ha paglaranga han kalibotan. Peligroso an sugad nga pagruhaduha. An mga pagruhaduha makakapaluya han aton pag-abat hin pagkaapurado, nakakaimpluwensya ha aton nga magin mahilig ha pagpatagbaw-ha-kalugaringon. (Lukas 21:34) Gawas pa, sugad han iginpapatin-aw ni Pedro, hinngangalimtan hiton nga mga magyubiton an Baha ha panahon ni Noe, nga nagbungkag han bug-os-kalibotan nga sistema han mga butang. Nagbag-o gud an kahimtang hito nga panahon!—Genesis 6:13, 17; 2 Pedro 3:5, 6.

10. Pinaagi han ano nga mga pulong gindadasig ni Pedro adton bangin diri na makahulat?

¹⁰ Binubuligan ni Pedro adton nagbabasa han iya surat nga patuboon an pagpailob pinaagi han pagpahinumdom ha ira kon kay ano nga an Dios agsob nga diri nagios dayon. Siyahan, hi Pedro nasiring: “An usa ka adlaw ha atubangan han Ginoo sugad hin usa ka yukot ka tuig, ngan an usa ka yukot ka tuig sugad hin usa ka adlaw.” (2 Pedro 3:8) Tungod kay hi Jehova nabubuhi ha kadayonan, mahimo niya tagdon an ngatanan nga butang nga nahiuupod ngan pilion an gimaopayi nga panahon ha paggios. Katapos, iginpapatin-aw ni Pedro an hingyap ni Jehova nga sadang magbasol an mga tawo ha bisan diin. An pagpailob han Dios nangangahulogan hin kaluwasan para han damu nga nagkamatay unta kon ginios dayon hiya. (1 Timoteo 2:3, 4; 2 Pedro 3:9) Kondi, an pagpailob ni Jehova diri nangangahulogan nga diri na gud hiya magios. “An adlaw han Ginoo maabot sugad hin usa nga kawatan,” siring ni Pedro.—2 Pedro 3:10.

11. Ano an mabulig ha aton nga magpabilin nga nagmamata ha espirituwal, ngan paonan-o ini ‘magpapadagmit,’ siring pa, han adlaw ni Jehova?

¹¹ Makatirigamnan an pagtanding ni Pedro. Diri masayon madakop an mga kawatan, kondi an usa nga bantay nga nagpapabilin nga nagmamata ha bug-os nga gab-i mas posible nga makakakita hin kawatan kay ha usa nga nakaturog hin madaliay ha pana-panahon. Paonan-o magpapabilin nga nagmamata an usa nga bantay? Mas masayon para ha  usa nga bantay nga magpabilin nga nagmamata kon naglalakat-lakat hiya imbes nga nagliliningkod ha bug-os nga gab-i. Ha sugad man nga paagi, an pagpabilin nga aktibo ha espirituwal mabulig ha aton sugad nga mga Kristiano nga magpabilin nga nagmamata. Salit, ginsasagda kita ni Pedro nga magin okupado pirme ha “baraan nga mga paggawi ngan mga buhat han diosnon nga debosyon.” (2 Pedro 3:11, NW) An sugad nga buruhaton mabulig ha aton nga magpadayon nga ‘gintitipigan nga hirani ha hunahuna an presensya han adlaw ni Jehova.’ An Griego nga pulong nga iginhubad nga ‘gintitipigan nga hirani ha hunahuna’ mahimo ighubad ha literal nga “ginpapadagmit.” (2 Pedro 3:12) Totoo, diri naton mababag-o an itinanda nga panahon ni Jehova. An iya adlaw maabot ha iya itinanda nga panahon. Kondi an panahon tikang yana tubtob hiton nga panahon baga in malabay hin mas madagmit kon okupado kita ha pag-alagad ha iya.—1 Korinto 15:58.

12. Sugad nga mga indibiduwal paonan-o naton mapapahimulsan an pagpailob ni Jehova?

¹² Salit, bisan hin-o nga naabat nga nalalangan an adlaw ni Jehova gindadasig nga sundon an sagdon ni Pedro nga maghulat hin mapailubon ha itinanda nga panahon ni Jehova. Oo, magagamit naton hin maaramon an dugang nga panahon nga igintutugot han pagpailob han Dios. Pananglitan, makakagpadayon kita ha pagpatubo han importante nga Kristiano nga mga kalidad ngan pagpaangbit han maopay nga sumat ha damu pa nga mga tawo nga imposible unta matuman kon waray na panahon. Kon magpabilin kita nga nagmamata, makikita ni Jehova nga aada kita “ha paghidait, nga waray buring ngan waray kasaypanan” ha kataposan hini nga sistema han mga butang. (2 Pedro 3:14, 15) Daku gud nga bendisyon ito!

13. Ano nga mga pulong ni Pablo ha mga Kristiano ha Tesalonika an labi nga angayan yana nga panahon?

¹³ Ha iya siyahan nga surat ngadto ha mga Kristiano ha Tesalonika, gin-uunabi liwat ni Pablo an panginahanglan ha pagpabilin nga nagmamata. Hiya nagsasagdon: “Diri kita mangaturog, sugad han iba, kondi mag-agma kita ngan magmaligdong.” (1 Tesalonika 5:2, 6) Kinahanglanon gud ito yana nga panahon, nga nagtitiarabot na an kabungkagan han bug-os-kalibotan nga sistema han mga butang! An mga magsiringba ni Jehova nag-uukoy ha kalibotan nga waray interes ha espirituwal nga mga butang, ngan mahimo ini makaapekto ha ira. Salit, hi Pablo nagsasagdon: “Magmaligdong kita, ngan magsul-ot kita han taming han pagtoo ngan paghigugma; ngan han kalasag han paglaom han kaluwasan.” (1 Tesalonika 5:8) An regular nga pag-aram ha Pulong han Dios ngan regular nga pakig-upod ha aton kabugtoan ha mga katirok mabulig ha aton nga sundon an sagdon ni Pablo ngan tipigan an aton pag-abat hin pagkaapurado.—Mateo 16:1-3.

Minilyon an Padayon nga Nag-aagma

14. Ano nga mga estadistika an nagpapasabot nga damu yana nga panahon an nasunod ha sagdon ni Pedro nga magpabilin nga nagmamata?

¹⁴ Damu ba yana nga panahon an nasunod ha inspirado nga pagdasig nga magpabilin nga alerto? Oo. Durante han 2002 nga tuig han pag-alagad, an pungkay han 6,304,645 nga magwarali—3.1-porsyento nga pag-uswag kay ha naglabay nga tuig han 2001—nagpamatuod han ira pagin alerto ha espirituwal pinaagi han paggasto hin 1,202,381,302 ka oras ha pakiistorya ha iba mahitungod han Ginhadian han Dios. Para ha ira, importante gud an sugad nga buruhaton. Nangunguna gud ito nga bahin han ira kinabuhi. An paggios han damu ha ira ipinakita ni Eduardo ngan Noemi ha El Salvador.

15. Ano nga eksperyensya tikang ha El Salvador an nagpapakita nga damu an nagpapabilin nga alerto ha espirituwal?

¹⁵ Pipira ka mga tuig na an naglabay, gintigamnan ni Eduardo ngan Noemi an mga pulong ni Pablo: “Nagbabag-o an dagway hini nga kalibotan.” (1 Korinto 7:31, NW) Ginpasimple nira an ira kinabuhi ngan sinulod ha bug-os-panahon, payunir nga ministeryo. Samtang nalabay an panahon, ginbendisyonan hira ha damu nga mga paagi ngan nakigbahin pa ngani hira ha buruhaton ha sirkito ngan distrito. Bisan kon inatubang hin seryoso nga mga problema, kombinsido hi Eduardo ngan Noemi nga husto an ira desisyon han iginsakripisyo nira an materyal nga kahimyang para ha bug-os-panahon nga pag-alagad. Damu han 29,269 nga magwarali—upod na an 2,454 nga payunir—ha El Salvador an nagpapakita hin pariho nga nagsasakripisyo-ha-kalugaringon nga disposisyon, nga amo an usa nga hinungdan nga ito nga nasud nagkaada hin 2-porsyento nga pag-uswag ha kadamu han mga magwarali ha naglabay nga tuig.

16. Ano nga paggios an ipinakita han usa nga batan-on nga olitawo ha Côte d’Ivoire?

¹⁶ Ha Côte d’Ivoire, ito nga paggios ipinakita  liwat han usa nga batan-on nga Kristiano nga lalaki nga nagsurat ha sanga nga opisina: “Nag-aalagad ako sugad nga ministeryal nga surugoon. Kondi diri ko maaaghat an kabugtoan nga magpayunir samtang ako mismo diri nagpapakita hin maopay nga susbaranan. Salit binayaan ko an hitaas-an-sweldo nga trabaho ngan may-ada na ako yana kalugaringon nga trabaho, nga naghahatag ha akon hin dugang nga panahon para ha ministeryo.” Ini nga batan-on nga olitawo nagin usa han 983 nga payunir nga nag-aalagad ha Côte d’Ivoire, nga nagreport hin 6,701 nga magwarali ha naglabay nga tuig, nga 5-porsyento nga pag-uswag.

17. Paonan-o ipinakita han usa ka batan-on nga Saksi ha Belgium nga waray hiya mahadlok ha sayop nga panhunahuna?

¹⁷ An pagin panatiko, sayop nga panhunahuna, ngan pagpasulabi padayon nga naghahatag hin mga problema ha 24,961 nga magwarali han Ginhadian ha Belgium. Kondi, madasigon hira ngan diri nahahadlok. Han an 16-anyos nga Saksi nakabati nga ginpapakaraot an mga Saksi ni Jehova sugad nga usa nga kulto ha panahon han klase mahitungod han mga pamatasan ha eskwelahan, naghangyo hiya hin permiso nga isaysay an punto-de-bista han mga Saksi ni Jehova. Ginagamit an video nga Jehovah’s Witnesses—The Organization Behind the Name ngan an brosyur nga Mga Saksi ni Jehova—Hin-o Hira?, naisaysay niya kon hin-o gud an mga Saksi. Inapresyar gud an impormasyon, ngan ha sumunod nga semana gintagan hin eksamin an mga estudyante diin an ngatanan nga mga pakiana may kalabotan ha Kristiano nga relihiyon han mga Saksi ni Jehova.

18. Ano an ebidensya nga an mga problema ha ekonomiya waray makaulang ha mga magwarali ha Argentina ngan Mozambique ha pag-alagad kan Jehova?

¹⁸ An kadam-an nga mga Kristiano naatubang hin makuri nga mga problema durante hinin kataposan nga mga adlaw. Kondi, nangangalimbasog hira nga diri maulang. Bisan pa han nahibantog nga mga problema ha ekonomiya, an Argentina nagreport hin bag-o nga pungkay han 126,709 nga Saksi ha naglabay nga tuig. Nagsasarang pa gihapon an kakablas ha Mozambique. Bisan pa hito, 37,563 an nagreport nga nakigbahin ha pagsangyaw nga buruhaton, 4-porsyento nga pag-uswag. Makuri an kinabuhi han damu nga mga tawo ha Albania, kondi ito nga nasud nagreport hin maopay nga pag-uswag nga 12 porsyento, nadangat an pungkay han 2,708 nga magwarali. Matin-aw, an espiritu ni Jehova diri napupugngan han makuri nga mga kahimtang kon inuuna han iya mga surugoon an mga interes han Ginhadian.—Mateo 6:33.

19. (a) Ano an nagpapamatuod nga damu pa gihapon an karnerohon nga mga tawo nga gutom ha kamatuoran han Biblia? (b) Ano an pipira pa nga mga detalye han tinuig nga report nga nagpapakita nga an mga surugoon ni Jehova nagpapabilin nga nagmamata ha espirituwal? (Kitaa an tsart ha pahina 12-15.)

¹⁹ Ipinapakita han binulan nga aberids nga 5,309,289 nga mga pag-aram ha Biblia nga iginreport ha bug-os nga kalibotan ha naglabay nga tuig nga damu pa gihapon an karnerohon nga mga tawo nga gutom ha kamatuoran han Biblia. Ha bag-o nga pungkay han 15,597,746 nga tinambong ha Memoryal, kadam-an an diri pa aktibo nga nag-aalagad kan Jehova. Hinaot magpadayon hira ha pagtubo ha kahibaro ngan ha gugma, kan Jehova ngan ha kabugtoan. Makalilipay makita nga an “daku nga panon” han “iba man nga mga karnero” nagpapadayon nga mabungahon samtang nag-aalagad hira ha Maglalarang “adlaw ngan gab-i ha iya templo” kaupod an ira dinihogan-ha-espiritu nga kabugtoan.—Pahayag 7:9, 15, NW; Juan 10:16.

Usa nga Leksyon Tikang kan Lot

20. Ano an hibabaroan naton tikang ha ehemplo ni Lot ngan han iya asawa?

²⁰ Siyempre, bisan an matinumanon nga mga surugoon han Dios mahimo mawad-an hin madaliay han ira pag-abat hin pagkaapurado. Hunahunaa an umangkon ni Abraham nga hi Lot. Hinbaroan niya tikang ha duha nga anghel nga mga bisita nga bubungkagon na han Dios an Sodoma ngan Gomorra.  An sumat diri na urusahon kan Lot, nga “nasakit ha maglaw-ay nga ginawian han mga magraot.” (2 Pedro 2:7) Kondi, han inabot an duha nga anghel basi updan hiya pagawas ha Sodoma, hiya “naglangan.” Haros danason hiya ngan an iya pamilya han mga anghel pagawas ha siyudad. Katapos, ginbalewaray han asawa ni Lot an pahamangno han mga anghel nga diri lumingi. An iya pagbalewaray hito nagwara han iya kinabuhi. (Genesis 19:14-17, 26) “Hinumdumi an asawa ni Lot,” nagpahamangno hi Jesus.—Lukas 17:32.

21. Kay ano nga importante nga magpabilin nga nagmamata yana labaw kay ha kan-o pa man?

²¹ An kalamidad ha Pompeii ngan ha Herculaneum ngan an mga hitabo nga may kalabotan ha kabungkagan han Jerusalem, sugad man an mga panhitabo durante han Baha ha panahon ni Noe ngan ni Lot, nagpapakita han pagkaimportante han seryoso nga pagsunod ha mga pahamangno. Sugad nga mga surugoon ni Jehova, kinikilala naton an tigaman han panahon han kataposan. (Mateo 24:3) Binulag na kita ha palso nga relihiyon. (Pahayag 18:4) Pariho han siyahan-siglo nga mga Kristiano, kinahanglan aton ‘tipigan nga hirani ha hunahuna an presensya han adlaw ni Jehova.’ (2 Pedro 3:12, NW) Oo, yana labaw kay ha kan-o pa man, kinahanglan magpabilin kita nga nagmamata! Ano nga mga paagi an mahihimo naton, ngan ano nga mga kalidad an mapapatubo naton basi magpabilin kita nga nagmamata? An masunod nga artikulo an maghihisgot hito nga mga butang.

[Mga footnote]

Paonan-o Mo Babatunon?

• Ano nga hitabo an nakabulig ha Judio nga mga Kristiano nga makapalagiw ha kabungkagan han Jerusalem?

• Paonan-o an sagdon ha mga surat ni apostol Pedro ngan Pablo nabulig ha aton nga magpabilin nga nagmamata?

• Hin-o yana nga panahon an nagpapakita hin ebidensya han pagin bug-os nga nagmamata?

• Ano nga leksyon an hibabaroan naton tikang ha asoy mahitungod kan Lot ngan han iya asawa?

[Mga Pakiana]

 [Tsart ha pahina 12-15]

2002 TUIG HAN PAG-ALAGAD NGA REPORT HAN MGA SAKSI NI JEHOVA HA BUG-OS KALIBOTAN

 (Kitaan an bound volume)

[Retrato ha pahina 9]

Han 66 K.P., ginsunod han Kristiano nga mga tuminungnong ha Jerusalem an pahamangno ni Jesus

[Mga Retrato ha pahina 10]

An pagpabilin nga aktibo nabulig ha mga Kristiano nga magpabilin nga nagmamata