“Magin Duok Kamo ha Dios, Ngan Hiya Magigin Duok ha Iyo”

Antes Ngan Katapos—Nagios an Pulong han Dios

KON nakilala mo hi Tony han tinedyer pa hiya, nakilala mo unta an usa nga bastos ngan madarahog nga olitawohay nga agsob umistambay ha diri-desente nga mga lugar han Sydney, Australia. Kasangkayan niya an mga membro han gang. Agsob nga kaupod hira ha mga pangawat, araway han mga membro han gang, ngan purupsilay ha kalsada.

Noybe anyos hi Tony han magtikang hiya pagsigarilyo. Han 14 anyos an iya pangidaron, regular nga nagmamarijuana na hiya ngan nagkikinabuhi ha imoral nga paagi. Han 16 anyos na hiya, giyan na hiya ha heroin, ngan nagresulta ini ha paggamit niya hin cocaine, LSD—“ha pagkamatuod, hin bisan ano nga pinaagi hito magigin high ako,” siring ni Tony. Katapos nagkaada hiya koneksyon ha mga nagbabaligya hin droga han duha nga kinahahadlokan nga mga sindikato ha krimen. Waray pag-iha nagin kilala hi Tony sugad nga usa han pinakamasasarigan nga mga parasuplay hin droga ha este nga baybayon han Australia.

An gasto ni Tony ha iya bisyo ha heroin ngan marijuana ada ha kabutngaan han $160 (E.U.) ngan $320 (E.U.) kada adlaw. Kondi sobra pa hito an gin-aantos han iya pamilya. “Damu ka beses na nga gintutokan ako ngan an akon asawa hin mga pusil ngan mga kutsilyo ha amon nawong han mga kriminal nga namimiling hin mga droga ngan kwarta ha amon balay,” siring niya. Katapos mapriso hin tulo ka beses, napiritan hi Tony nga usisahon an direksyon han iya pagkinabuhi.

Bisan kon nasingba hiya hadto, inabat ni Tony nga hirayo hiya ha usa nga Dios nga gintoohan niya nga waray kataposan nga nagsusunog han mga magpakasasala ha impyerno sugad nga sirot. Kondi, han ginbisita hiya hin mag-asawa nga mga Saksi ni Jehova, nahipausa hi Tony ha paghibaro nga diri sugad hito an Dios. Ngan nalipay hi Tony nga matatadong pa niya an iya kinabuhi ngan makakarawat an mga bendisyon tikang ha Dios. Naaghat hi Tony han mga pulong ni Jesu-Kristo: “An ngatanan nga mga bagay nahihimo han Dios.” (Markos 10:27) Labi nga nabantad hi Tony han makapadasig nga mga pulong: “Magin duok kamo ha Dios, ngan hiya magigin duok ha iyo.”—Jakobo 4:8, NW.

Inatubang yana ni Tony an makuri nga buruhaton ha pagpahiuyon han iya kinabuhi ha mga suruklan ha Biblia. Hiya nasiring: “An siyahan nga akon gin-undang amo an pagsigarilyo, usa nga butang nga diri ko gud nahihimo hadto, bisan kon makadamu ka beses na ako nagsari. Pinaagi han gahum tikang kan Jehova, nahimo ko bayaan an heroin ngan marijuana, mga bisyo ha droga nga nagkontrol ha akon ha naglabay nga 15 ka tuig. Waray ko gud mahunahuna nga posible umundang hini nga mga bisyo.”

Imbes nga mahadlok ha Dios nga nagpapasakit ha mga tawo ha kadayonan ha impyerno—usa nga doktrina nga diri makikita ha Biblia—ginkarawat ni Tony ngan han iya asawa an paglaom nga mabuhi ha waray kataposan ha paraiso nga tuna. (Salmo 37:10, 11; Proberbios 2:21) “Naggasto ako hin daku nga panahon ngan duro nga pangalimbasog basi ipahiuyon an akon kinabuhi ha mga suruklan han Dios,” siring ni Tony, “kondi tungod han bulig ni Jehova naglampos ako.”

 Oo, ini nga giyan ha droga hadto nagin usa nga Kristiano. Samtang iginhahatag an ira panahon ngan materyal nga mga panag-iya, hiya ngan an iya asawa nagasto hin yinukot ka oras ha buruhaton han pagtutdo han Biblia. Okupado liwat hira ha pagpatubo hin duha nga kabataan nga mahadlukon ha Dios. Nahimo inin tigda nga pagbag-o pinaagi han diri-malilikyan nga gahum han Pulong han Dios, an Biblia. Oo, sugad han siring ni apostol Pablo, “an pulong han Dios buhi, ngan maabtik [“may gahum,” NW].—Hebreo 4:12.

Bisan pa han sugad nga positibo nga mga ehemplo, an pipira diri-makatadunganon nga nagpipirit nga an basado-ha-Biblia nga edukasyonal nga buruhaton han mga Saksi ni Jehova nagbubungkag han mga pamilya ngan nagdadaot han maopay nga mga pamatasan han mga batan-on. Sigurado nga an kahimtang ni Tony nagpapamatuod nga buwa ito nga aligasyon.

Pariho kan Tony, damu an nahibabaro nga malalamposan an makamaratay nga mga pagkagiyan. Paonan-o? Pinaagi han pagtoo ha Dios ngan pagsarig ha iya ngan ha iya Pulong, sugad man pinaagi han suporta han napaid ngan mahigugmaon nga Kristiano nga mga kaupod. Hi Tony malipayon nga nagtapos: “Nakita ko kon paonan-o ginpapanalipdan han mga prinsipyo han Biblia an akon mga anak. Gintipigan han mga katutdoan han Biblia an akon pag-asawa. Ngan mas masayon mahingaturog an akon mga amyaw tungod kay diri na ako tarhog ha ira.”

[Blurb ha pahina 9]

‘Pinaagi han gahum tikang kan Jehova, naundang ko an bisyo ha droga nga nakaimpluwensya ha akon ha sulod hin 15 ka tuig’

[Kahon ha pahina 9]

Mga Prinsipyo ha Biblia nga Nagios

An magkalainlain nga mga prinsipyo ha Biblia nakabulig ha damu nga mga giyan ha droga nga makagawas tikang hinin nakakadaot nga bisyo. An pipira hini nga mga prinsipyo amo an masunod:

“Maglinis kita tikang ha ngatanan nga mga hugaw han unod ngan han espiritu, ngan paghingpiton ta an pagkaputli ha kahadlok ha Dios.” (2 Korinto 7:1) An paggamit hin mga droga kontra ha balaud han Dios.

“An kahadlok kan Jehova, amo an tinikangan han kinaadman; ngan an pagkilala ha Uusa nga Baraan amo an sarabotan.” (Proberbios 9:10) An pagtahod kan Jehova nga iginbasar ha husto nga kahibaro mahitungod ha iya ngan ha iya mga paagi nakakabulig ha damu nga makagawas tikang ha impluwensya han mga droga.

“Sarig kan Jehova ha bug-os mo nga kasingkasing, ngan ayaw sandig dida ha imo kalugaringon nga pagsabot: ha ngatanan mo nga dalan kilalaha hiya, ngan hiya magtututdo han imo agianan. (Proberbios 3:5, 6) Mahimo maundang an nakakadaot nga mga bisyo pinaagi han kinasingkasing nga pagtapod ha Dios ngan bug-os nga pagsarig ha iya.