‘Magpabilin Kamo ha Akon Pulong’

“Kon kamo magpabilin ha akon pulong, kamo an totoo gud nga akon mga disipulo.”—JUAN 8:31, NW.

 1. (a) Han binalik hi Jesus ngadto ha langit, ano an iginbilin niya dinhi ha tuna? (b) Ano nga mga pakiana an aton paghihisgotan?

 HAN hi Jesu-Kristo, an Nagtukod han Kristianidad, binalik ngadto ha langit, waray hiya magbilin dinhi ha tuna hin mga libro nga iginsurat niya, mga monumento nga gintukod niya, o mga bahandi nga gintirok niya. Lugod, nagbilin hiya hin mga disipulo ngan espisipiko nga mga kinahanglanon ha pagin usa nga disipulo. Ha pagkamatuod, ha Ebanghelyo ni Juan, makikita naton nga gin-unabi ni Jesus an tulo nga importante nga kinahanglanon nga sadang tumanon han bisan hin-o nga naruruyag magin disipulo niya. Ano ini nga mga kinahanglanon? Ano an mahimo naton buhaton basi tumanon ito? Ngan paonan-o kita makakasiguro nga kuwalipikado kita sugad nga mga disipulo ni Kristo yana nga panahon? a

 2. Ano an importante nga kinahanglanon ha pagin disipulo, sugad han iginrekord ha Ebanghelyo ni Juan?

² Mga unom ka bulan antes hiya mamatay, hi Jesus kinadto ha Jerusalem ngan nagsangyaw ha damu nga mga tawo nga nagkatirok didto ha pagsaurog han usa-ka-semana nga Piyesta han mga Payag. Sugad nga resulta, ha kabutngaan han piyesta, “damu han katawohan an nagtoo ha iya.” Nagpadayon hi Jesus ha pagsangyaw, salit ha kataposan nga adlaw han piyesta, “damu an mga nagtoo ha iya” liwat. (Juan 7:10, 14, 31, 37; 8:30) Hito nga panahon, iginhatag ni Jesus an iya atensyon ha bag-o nga mga tumuroo ngan iginsaysay an usa nga importante nga kinahanglanon ha pagin disipulo, sugad han iginrekord ni apostol Juan: “Kon kamo magpabilin ha akon pulong, kamo an totoo gud nga akon mga disipulo.”—Juan 8:31, NW.

 3. Ano nga kalidad an ginkikinahanglan han usa basi “magpabilin ha pulong [ni Jesus]”?

³ Hito nga mga pulong, diri iginpapasabot ni Jesus nga an bag-o nga mga tumuroo waray igo nga pagtoo. Lugod, iginpapatin-aw niya nga may-ada hira higayon nga magin iya totoo nga mga disipulo—kon hira magpabilin ha iya pulong, kon hira magpailob. Kinarawat na nira an iya pulong, kondi yana kinahanglan magpabilin hira dida hito. (Juan 4:34; Hebreo 3:14) Oo, gintagad ni Jesus an pagpailob sugad nga importante nga kalidad para ha iya mga sumurunod salit ha iya kataposan nga pakiistorya ha iya mga apostol, nga iginrekord ha Ebanghelyo ni Juan, hi Jesus makaduha nga nagsagda: “Padayon nga sumunod kamo ha akon.” (Juan 21:19, 22, NW) Ito gud an ginbuhat han damu han siyahan nga mga Kristiano. (2 Juan 4) Ano an nakabulig ha ira nga magpailob?

 4. Ano an nakabulig ha siyahan nga mga Kristiano nga makailob?

⁴ Hi apostol Juan, nga matinumanon nga disipulo ni Kristo hin mga 70 ka tuig na, nagpatin-aw han usa ka importante nga butang. Gintagan niya hin kumendasyon an matinumanon nga mga Kristiano, nasiring: “Magkusog kamo, ngan an pulong han Dios nabilin ha iyo, ngan gindaog niyo an maraot.” Ito nga mga disipulo ni Kristo nagpailob, o nagpabilin ha pulong han Dios, tungod kay an pulong han Dios nagpabilin ha ira. Kinasingkasing nga ira ginpabilhan ito. (1 Juan 2:14, 24) Sugad man yana nga panahon, basi ‘makailob tubtob ha kataposan,’ kinahanglan siguruhon naton nga an pulong han Dios nagpapabilin ha aton. (Mateo 24:13) Paonan-o naton mahihimo ito? Usa nga ilustrasyon nga iginsaysay ni Jesus an naghahatag han baton.

‘Namamati han Pulong’

 5. (a) Ano an magkalainlain nga klase han tuna nga gin-uunabi ni Jesus ha usa han iya mga ilustrasyon? (b) Ano an ginrirepresentaran han liso ngan han tuna ha ilustrasyon ni Jesus?

⁵ Iginsaysay ni Jesus an ilustrasyon mahitungod han parasabwag nga nagsabwag hin liso, ngan nakarekord ito ha mga Ebanghelyo ni Mateo, Markos, ngan Lukas. (Mateo 13:1-9, 18-23; Markos 4:1-9, 14-20; Lukas 8:4-8, 11-15) Samtang binabasa mo an mga asoy, matitigamnan mo nga an pinakaimportante nga bahin han ilustrasyon amo nga an uusa nga klase hin liso nahulog ha magkalainlain nga klase hin tuna, nga may-ada magkalainlain nga mga resulta. Matig-a an siyahan nga klase han tuna,  hababaw an ikaduha, ngan tinuboan hin mga tunok an ikatulo. An ikaupat nga klase, diri pariho ha tulo, “maopay nga tuna.” Sumala ha pagsaysay ni Jesus, an liso amo an mensahe han Ginhadian nga makikita ha Pulong han Dios, ngan an tuna nagrirepresentar han mga tawo nga ibaiba an mga kahimtang han kasingkasing. Bisan kon an mga tawo nga ginrepresentaran han magkalainlain nga klase han tuna may-ada magkapariho nga mga kuwalidad, adton ginrepresentaran han maopay nga tuna may-ada kuwalidad nga naiiba kay ha iba.

 6. (a) Paonan-o naiiba an ikaupat nga klase han tuna ha ilustrasyon ni Jesus tikang ha tulo nga klase, ngan ano an kahulogan hito? (b) Ano an importante basi makailob sugad nga mga disipulo ni Kristo?

⁶ Ipinapakita han asoy ha Lukas 8:12-15 nga ha ngatanan nga upat nga higayon, an mga tawo ‘nakabati han pulong.’ Kondi, adton may-ada “maopay nga kasingkasing” linahos pa ha ‘pakabati han pulong.’ Ira ‘gintipigan ito ngan nagbunga nga may pagpailob.’ An maopay nga tuna, tungod kay mahumok ngan hilarom, nakahimo ha liso nga makagamot hin marig-on, ngan sugad nga resulta, an liso nanaringsing ngan namunga. (Lukas 8:8) Ha pariho man nga paagi, adton may-ada maopay nga kasingkasing nasabot, naapresyar, ngan nakarawat han pulong han Dios. (Roma 10:10; 2 Timoteo 2:7) An pulong han Dios nagpapabilin ha ira. Sugad nga resulta, namumunga hira nga may pagpailob. Salit importante an hilarom, kinasingkasing nga apresasyon ha Pulong han Dios basi makailob sugad nga mga disipulo ni Kristo. (1 Timoteo 4:15) Kondi, paonan-o naton mapapatubo an sugad kinasingkasing nga apresasyon ha Pulong han Dios?

Kahimtang han Kasingkasing Ngan Seryoso nga Pamalandong

 7. Ano nga buruhaton an duok nga iginkakaw-ing ha maopay nga kasingkasing?

⁷ Tigamni kon ha ano nga buruhaton pauroutro nga iginkakaw-ing han Biblia an maopay nga kasingkasing. “An kasingkasing han matadong namamalandong basi makabaton.” (Proberbios 15:28, NW) “Makarawat unta ha imo atubangan an mga pulong han akon baba ngan an pamalandong han akon kasingkasing, O Jehova.” (Salmo 19:14) “An pamalandong han akon kasingkasing amo an mga butang may kalabotan ha pagsabot.”—Salmo 49:3, NW.

 8. (a) Kon binabasa an Biblia, ano an sadang likyan naton, kondi ano an aton sadang buhaton? (b) Ano nga mga kapulsanan an nakakarawat naton tikang ha mainampoon nga pamalandong ha Pulong han Dios? (Iupod an kahon nga “Magrig-on ha Kamatuoran.”)

⁸ Pariho hini nga mga parasurat han Biblia, kita liwat kinahanglan mamalandong hin maapresyaron ngan mainampoon ha Pulong han Dios ngan ha iya buruhaton. Kon nagbabasa han Biblia o basado-ha-Biblia nga mga publikasyon, diri kita sadang gumios nga baga in apurado kita nga mga turista nga nagdadagmit ha usa nga matahom nga lugar ngadto ha sunod, ginriretratohan an ngatanan kondi diri gud nagpapahimulos hin maopay han mga kiritaon. Lugod, kon nag-aaram ha Biblia, karuyag naton nga may-ada kita panahon ha paghunong ngan pahimulosan an kiritaon, siring pa. b Samtang hilom nga pinamamalandong naton an aton binabasa, an pulong han Dios nakakaapekto ha aton kasingkasing. Nakakabantad ito han aton mga pagbati ngan nakakaapekto han aton panhunahuna. Nagpapagios liwat ito ha aton nga isumat ha Dios ha pag-ampo an aton hilarom nga mga ginhuhunahuna. Sugad nga resulta, napaparig-on an aton relasyon kan Jehova, ngan an aton gugma ha Dios nagpapagios ha aton nga magpadayon ha pagsunod kan Jesus bisan ha makuri nga mga kahimtang. (Mateo 10:22) Matin-aw, importante an pamalandong ha ginsisiring han Dios kon karuyag naton nga magpabilin nga matinumanon tubtob ha kataposan.—Lukas 21:19.

 9. Paonan-o naton masisiguro nga an aton kasingkasing nagpapabilin nga makinarawaton ha pulong han Dios?

 ⁹ Ipinapakita liwat han ilustrasyon ni Jesus nga may-ada mga ulang ha pagtubo han liso, an pulong han Dios. Salit, basi magpabilin nga matinumanon nga mga disipulo, sadang naton (1) kilalahon an mga ulang nga ginrepresentaran han diri maopay nga mga kahimtang han tuna nga gin-unabi ha ilustrasyon ngan (2) buhaton an mga paagi ha pagtadong o paglikay hito. Hito nga paagi, masisiguro naton nga an aton kasingkasing nagpapabilin nga makinarawaton ha liso han Ginhadian ngan padayon nga namumunga.

“Ha Daplin han Dalan”—Adton Okupado Hinduro

10. Ihulagway an siyahan nga klase han tuna ha ilustrasyon ni Jesus, ngan isaysay an kahulogan hito.

¹⁰ An siyahan nga klase han tuna nga dida nahulog an liso amo an ha “daplin han dalan,” diin ‘natatamakan’ an liso. (Lukas 8:5) An tuna ha daplin han dalan nga pakadto ha taranman hin lugas nagtitig-a tungod han padayon nga pagtamak han mga naagi. (Markos 2:23) Ha sugad man nga paagi, adton natugot nga an damu nga buruhaton han kalibotan sobra nga magkinahanglan hin daku nira nga panahon ngan kusog bangin makasiring nga duro hira kaokupado salit makuri nira mapatubo an anoman nga kinasingkasing nga apresasyon ha pulong han Dios. Ira nababatian ito, kondi napakyas hira ha pamalandong hito. Salit an ira kasingkasing nagpapabilin nga diri makinarawaton. Antes nira mapatubo an gugma para hito, “an Yawa naabot, ngan kinukuha an pulong tikang ha ira kasingkasing, basi diri tumoo, ngan diri hira maluwas.” (Lukas 8:12) Mapupugngan ba ini?

11. Paonan-o naton mapupugngan an kahimtang han aton kasingkasing nga magin pariho han matig-a nga tuna?

¹¹ Damu an mahihimo basi mapugngan an kasingkasing nga magin pariho han diri-mabungahon  nga tuna ha daplin han dalan. An tinatamakan ngan matig-a nga tuna mahimo magin mahumok ngan mabungahon kon araduhon ito ngan ibalhin an aragian han mga nagkakalakat dida hito. Ha sugad man nga paagi, an pagkaada panahon para ha pag-aram ngan pamalandong ha Pulong han Dios mahimo magresulta ha kahimtang han kasingkasing nga magin pariho han maopay, mabungahon nga tuna. An importante diri kay magin okupado hinduro ha ordinaryo nga mga butang han kinabuhi. (Lukas 12:13-15) Lugod, siguroha nga may-ada ka panahon ha pamalandong ha ‘mas importante nga mga butang’ ha kinabuhi.—Filipos 1:9-11.

“Ha mga Kabatoan”—Adton Mahadlukon

12. Ano an totoo nga hinungdan nga nalalaya an bag-o nga tanom ha ikaduha nga klase han tuna nga gin-unabi ha ilustrasyon ni Jesus?

¹² Kon an liso nahuhulog ha ikaduha nga klase han tuna, diri ito nagpapabilin la ha bawbaw hito, sugad ha siyahan nga kahimtang. Nanggagamot ito ngan nananaringsing. Kondi kon nasirak an adlaw, nauuga an saringsing tungod han kapaso han adlaw ngan nalalaya. Kondi, tigamni inin importante nga detalye. Diri kapaso an totoo nga hinungdan nga nalalaya an bag-o nga tanom. Aw, an tanom nga tinubo ha maopay nga tuna nasisirakan liwat han adlaw, kondi diri ito nalalaya—ha pagkamatuod, nagigin marabong ito. Ano an kaibahan? Ini nga bag-o nga tanom nalalaya, siring ni Jesus, “tungod kay waray kahilarom han tuna” ngan “waray kahulosan.” (Mateo 13:5, 6; Lukas 8:6) An bato, nga nahimumutang ha ilarom la han bawbaw nga tuna, nagpupugong ha liso nga makagamot hin hilarom basi makakuha hin tubig ngan magin marig-on. An bag-o nga tanom nalalaya tungod kay hababaw an tuna.

13. Ano nga klase hin mga indibiduwal an pariho han hababaw nga tuna, ngan ano an mas hilarom nga hinungdan han ira paggios?

¹³ Ini nga bahin han ilustrasyon nagtutudlok ha mga indibiduwal nga “kinarawat han pulong ha kalipay” ngan madasigon nga nasunod kan Jesus “ha gutiay nga panahon.” (Lukas 8:13) Kon nasisirakan han mapaso nga adlaw han “kagol-anan o pagtimaraot,” nagigin mahadlukon hinduro hira salit nawawara an ira kalipay ngan karig-on ngan naundang hira ha pagsunod kan Kristo. (Mateo 13:21) Kondi diri pagkontra an mas hilarom nga hinungdan han ira kahadlok. Aw, minilyon han mga disipulo ni Kristo an nag-iilob han magkalainlain nga klase hin kagol-anan, kondi nagpapabilin hira nga matinumanon. (2 Korinto 2:4; 7:5) An totoo nga hinungdan nga an iba nagigin mahadlukon ngan nagpapahirayo ha kamatuoran amo nga an sugad-bato nga kahimtang han ira kasingkasing nagpupugong ha ira nga mamalandong hin hilarom gud ha nagpaparig-on ngan espirituwal nga mga butang. Sugad nga resulta, an apresasyon nga ira napatubo para kan Jehova ngan ha iya pulong hababaw hinduro ngan maluya hinduro salit diri nakakailob han pagkontra. Paonan-o mapupugngan han usa an sugad nga resulta?

14. Ano nga mga paagi an sadang buhaton han usa nga indibiduwal basi mapugngan an kahimtang han iya kasingkasing nga magin pariho han hababaw nga tuna?

¹⁴ Kinahanglan siguruhon han indibiduwal nga waray sugad-bato nga mga ulang, sugad han nakagamot na nga kapaitan, nakatago nga kahakog, o pariho hito nga matig-a kondi nakatago nga mga pagbati, nga manggamot ha iya kasingkasing. Kon an sugad nga ulang nakagamot na, an gahum han pulong han Dios makakakuha hito. (Jeremias 23:29; Efeso 4:22; Hebreo 4:12) Katapos hito, an mainampoon nga pamalandong magdadasig nga ‘maitanom an pulong’ hin hilarom ha kasingkasing han indibiduwal. (Jakobo 1:21) Maghahatag ini hin kusog basi malamposan an mga panahon han panluya ngan hin kaisog basi magpabilin nga matinumanon bisan pa han mga pagsari.

‘Ha Katunokan’—Adton Nababahin an Kasingkasing

15. (a) Kay ano nga an ikatulo nga klase han tuna nga gin-unabi ni Jesus labi nga takos han aton atensyon? (b) Ha urhi ano an nahitatabo ha ikatulo nga klase han tuna, ngan kay ano?

¹⁵ An ikatulo nga klase han tuna, an usa nga may mga tunok, labi  nga takos han aton atensyon tungod kay ha pipira nga paagi pariho ito han maopay nga tuna. Pariho han maopay nga tuna, an tunukon nga tuna natugot ha liso nga makagamot ngan manaringsing. Ha tinikangan, waray kaibahan ha pagtubo han bag-o nga tanom hinin duha nga klase han tuna. Kondi, ha paglabay han panahon, nagtutubo an kahimtang nga ha kataposan nalulumsan an tanom. Diri pariho ha maopay nga tuna, ini nga tuna tinutuboan hin mga tunok. Samtang naulpot an bag-o nga tanom tikang hini nga tuna, naatubang ito ha kompetisyon tikang ha ‘mga tunok nga nanurok upod hito.’ Ha usa ka panahon an duha nga tanom nangangalimbasog ha pakakarawat hin sustansya, kalamrag, ngan espasyo, kondi ha kataposan an mga tunok nalabaw ha tanom ngan ‘nalulumsan ito.’—Lukas 8:7.

16. (a) Ano nga mga indibiduwal an pariho ha tunukon nga tuna? (b) Sumala ha mga asoy han tulo nga Ebanghelyo, ano an ginrirepresentaran han mga tunok?—Kitaa an footnote.

¹⁶ Ano nga klase hin mga indibiduwal an pariho ha tunukon nga tuna? Hi Jesus nagsasaysay: “Amo adton mga nagpakabati, ngan nagkalakat, ngan nalumos hira ha mga pangarit, ngan mga kamanggaran, ngan mga kalipayan han kinabuhi: ngan waray mamunga ha kahinog.” (Lukas 8:14) Sugad la nga an liso han parasabwag ngan an mga tunok dungan nga natubo ha tuna, ha sugad man nga paagi an iba nga mga indibiduwal nangangalimbasog nga dungan nga karawaton an pulong han Dios ngan an “mga kalipayan han kinabuhi.” An kamatuoran han pulong han Dios iginsasabwag ha ira kasingkasing, kondi may-ada iba nga mga tinguha nga nakikigkompetensya nga makuha an ira atensyon. Nababahin an ira simboliko nga kasingkasing. (Lukas 9:57-62) Nagpupugong ini ha ira ha paghatag hin igo nga panahon ha mainampoon ngan makahuluganon nga pamalandong ha pulong han Dios. Napapakyas hira ha bug-os nga pagkarawat han pulong han Dios ngan salit kulang hira han kinasingkasing nga apresasyon nga ginkikinahanglan basi makailob. Hinay-hinay nga an ira espirituwal nga mga interes natatabonan han diri-espirituwal nga mga tinguha tubtob nga hira ‘bug-os nga nalulumsan.’ c Masurub-on gud ito nga kataposan para hadton diri nahigugma kan Jehova ha bug-os nga kasingkasing!—Mateo 6:24; 22:37.

17. Ano nga mga pagpili an kinahanglan buhaton naton ha kinabuhi basi diri malumsan han simboliko nga mga tunok nga gin-unabi ha ilustrasyon ni Jesus?

¹⁷ Pinaagi han pag-una han espirituwal nga mga butang imbes han materyal nga mga butang, nalilikyan naton nga malumsan han mga kasakit ngan mga kalipayan hini nga kalibotan. (Mateo 6:31-33; Lukas 21:34-36) An pagbasa han Biblia ngan pamalandong ha aton binabasa diri gud sadang pasibay-an. Magkakaada kita dugang nga panahon ha paghunahuna ngan mainampoon nga pamalandong kon hihimoon naton nga simple an aton kinabuhi. (1 Timoteo 6:6-8) An mga surugoon han Dios nga nagbubuhat hito—nga, siring pa, naggabot han mga tunok tikang ha tuna basi maghatag hin dugang nga sustansya, kalamrag, ngan espasyo ha namumunga nga tanom—nakakaeksperyensya han mga bendisyon ni Jehova. Hi Sandra, nga 26 anyos an edad nasiring: “Kon namamalandong ako han mga bendisyon ha akon ha kamatuoran, nasasabtan ko nga an kalibotan waray maihahatag nga kapariho hito!”—Salmo 84:11.

18. Paonan-o kita magpapabilin ha pulong han Dios ngan magpapailob sugad nga mga Kristiano?

 ¹⁸ Matin-aw, kon sugad, nga kita ngatanan, batan-on ngan lagas, magpapabilin ha pulong han Dios ngan magpapailob sugad nga mga disipulo ni Kristo kon nagpapabilin ha aton an pulong han Dios. Salit, siguruhon naton nga an tuna han aton simboliko nga kasingkasing diri gud magin matig-a, hababaw, o natatabonan han mga tunok kondi nagpapabilin nga mahumok ngan hilarom. Hito nga paagi, makakarawat naton hin bug-os an pulong han Dios ngan ‘mamumunga nga may pagpailob.’—Lukas 8:15.

[Mga footnote]

Ano an Imo mga Baton?

• Kay ano nga kita kinahanglan ‘magpabilin ha pulong ni Jesus’?

• Paonan-o naton tutugotan an pulong han Dios nga magpabilin ha aton kasingkasing?

• Ano nga klase hin mga indibiduwal an ginrirepresentaran han upat nga magkalainlain nga klase han tuna nga gin-unabi ni Jesus?

• Paonan-o ka magkakaada panahon ha pamalandong ha pulong han Dios?

[Mga Pakiana]

[Kahon/Retrato ha pahina 10]

“MAGRIG-ON HA KAMATUORAN”

KADA tuig pinamamatud-an han damu nga mga disipulo ni Kristo nga hira “magrig-on ha kamatuoran.” (2 Pedro 1:12) Ano an nabulig ha ira nga makailob? Tagda an pipira han ira mga komento.

“Tinatapos ko an tagsa nga adlaw pinaagi han pagbasa hin usa nga bahin han Biblia ngan pag-ampo. Katapos, ginhuhunahuna ko an akon nabasa.”—Jean, nabawtismohan han 1939.

“An pamalandong kon paonan-o hi Jehova, an usa nga gihitaasi, nahigugma gud ha aton naghahatag ha akon hin seguridad ngan kusog nga magpabilin nga matinumanon.”—Patricia, nabawtismohan han 1946.

“Pinaagi han pagpadayon ha maopay nga mga batasan ha pag-aram ha Biblia ngan pinaagi han pagin mahunahunaon ha ‘higlarom nga mga butang han Dios,’ nakakagpadayon ako ha pag-alagad kan Jehova.”—1 Korinto 2:10; Anna, nabawtismohan han 1939.

“Binabasa ko an Biblia ngan an aton basado-ha-Biblia nga mga publikasyon nga an katuyoan amo an pag-usisa han akon kasingkasing ngan mga motibo.”—Zelda, nabawtismohan han 1943.

“An akon gimaopayi nga mga panahon amo an kon naglalakat-lakat ako ngan nakikiistorya kan Jehova ha pag-ampo ngan iginpapahibaro ko la ha iya kon ano gud an akon inaabat.”—Ralph, nabawtismohan han 1947.

“Gintitikangan ko an adlaw pinaagi han pagbasa han inadlaw nga teksto ngan han usa ka bahin han Biblia. Naghahatag ini ha akon hin bag-o nga butang nga pamamalandungon durante han adlaw.”—Marie, nabawtismohan han 1935.

“Para ha akon, nagpapakusog gud an bersikulo-por-bersikulo nga paghisgot ha usa nga libro han Biblia.”—Daniel, nabawtismohan han 1946.

San-o ka nagasto hin panahon ha mainampoon nga pamalandong ha pulong han Dios?—Daniel 6:10b; Markos 1:35; Buhat 10:9.

[Retrato ha pahina 13]

Pinaagi han pag-una han espirituwal nga mga butang, kita ‘mamumunga nga may pagpailob’