Ginpahitaas ni Jehova an Iya Mesias nga Surugoon
Kapitulo Katorse
Ginpahitaas ni Jehova an Iya Mesias nga Surugoon
1, 2. (a) Ihulagway an kahimtang nga naeksperyensyahan han damu nga mga Judio ha tinikangan han siyahan nga siglo K.P. (b) Ano nga bulig an iginhatag ni Jehova ha matinumanon nga mga Judio basi makilala nira an Mesias?
HANDURAWA nga makikigkita ka ha usa nga tawo nga hitaas an katungdanan. Itinanda na an oras ngan an lugar han iyo pagkita. Kondi may-ada problema: Diri ka maaram kon ano an iya hitsura, ngan magbibiyahe hiya nga waray aringasa, ngan waray pagpasigarbo. Paonan-o mo hiya makikilala? Makakabulig kon may-ada ka detalyado nga pangirilal-an ha iya.
2 Temprano pa han siyahan nga siglo K.P., sugad hini an kahimtang nga naeksperyensyahan han damu nga mga Judio. Ginhihinulat nira an Mesias—an pinakaimportante nga tawo nga mabubuhi. (Daniel 9:24-27; Lukas 3:15) Kondi paonan-o hiya makikilala han matinumanon nga mga Judio? Pinaagi han Hebreohanon nga mga propeta, detalyado nga iginsaysay na ni Jehova an mga hitabo may kalabotan ha Mesias nga makakabulig ha mga masinabuton nga makilala hiya hin sigurado.
3. Ano nga hulagway mahitungod han Mesias an aada ha Isaias 52:13–53:12?
3 Ha Hebreo nga mga tagna mahitungod han Mesias, posible nga waray na iba nga naghuhulagway hin mas matin-aw kay han nakarekord ha Isaias 52:13–53:12. Sobra 700 ka tuig una pa, iginhulagway na ni Isaias, diri an pisikal nga hitsura han Mesias, kondi an mas importante nga mga detalye—an katuyoan ngan paagi han iya pag-antos ngan an mga detalye mahitungod han iya kamatayon, paglubong, ngan pagpasidunggi. Makakalipay han aton mga kasingkasing ngan makakaparig-on han aton pagtoo an paghisgot hini nga tagna ngan han katumanan hito.
“An Akon Surugoon”—Hin-o Hiya?
4. Ano nga mga opinyon mahitungod han pangirilal-an han “surugoon” an iginhatag han iba nga Judio nga mga eskolar, kondi kay ano nga diri ini nauyon ha tagna ni Isaias?
4 Iginsumat pa la ni Isaias an pakagawas han mga Judio tikang ha pagkabihag ha Babilonya. Yana, samtang ginlalantaw ha unhan an mas daku nga hitabo, iya iginrekord an mga pulong ni Jehova: “Kitaa! An akon surugoon magios nga may pagsabot. Himumutang hiya ha hitaas nga katungdanan ngan sigurado nga pagpapahitas-on ngan pasisidunggan hinduro.” (Isaias 52:13, “NW”) Hin-o gud ba ini nga “surugoon”? Ha paglabay han mga siglo, an Judio nga mga eskolar naghatag hin magkalainlain nga mga opinyon. An iba nagsiring nga nagrepresentar hiya han bug-os nga nasud han Israel durante han kabihag hito ha Babilonya. Kondi ito nga pagsaysay diri nauyon ha tagna. Kinaburut-on nga nag-antos an Surugoon han Dios. Bisan kon waray sala, nag-antos hiya tungod ha mga sala han iba. Kaiba gud hini an paghulagway mahitungod han Judio nga nasud, nga nagin bihag tungod ha makasasala nga mga buhat hito. (2 Hadi 21:11-15; Jeremias 25:8-11) An iba nagsiring nga an Surugoon nagrepresentar ha nagpapakamatadong-ha-kalugaringon nga kilala nga mga tawo ha Israel ngan nga ini hira nag-antos tungod ha makasasala nga mga Israelita. Kondi, durante han mga panahon han duro nga kakurian ha Israel, waray espisipiko nga grupo nga nag-antos tungod ha iba.
5. (a) Ano nga aplikasyon han tagna ni Isaias an ginhimo han iba nga Judio nga mga eskolar? (Kitaa an footnote) (b) Ano an matin-aw nga pangirilal-an han Surugoon nga igin-aasoy ha libro han Biblia nga Mga Buhat?
5 Antes umabot an Kristianidad ngan madaliay la durante han siyahan nga mga siglo han Komon nga Panahon, igin-aplikar han pipira nga Judio nga mga eskolar ini nga tagna ha Mesias. Mababasa ha Kristiano Griego nga Kasuratan nga ini an husto nga aplikasyon. An libro nga Mga Buhat nag-aasoy nga han an Etiopiahanon nga yunuko nagsiring nga diri hiya maaram han pangirilal-an han Surugoon ha tagna ni Isaias, hi Felipe ‘nagsumat ha iya han maopay nga sumat mahitungod kan Jesus.’ (Buhat 8:26-40; Isaias 53:7, 8) An iba nga mga libro han Biblia nagpapakilala liwat kan Jesus sugad nga an Mesias nga Surugoon ha tagna ni Isaias. a Samtang ginhihisgotan naton ini nga tagna, makikita naton an diri maninigaran nga mga kaparihoan han usa nga tinatawag ni Jehova nga “akon surugoon” ngan ni Jesus han Nasaret.
6. Paonan-o ipinapakita han tagna ni Isaias nga malampuson nga matutuman han Mesias an kaburut-on han Dios?
6 Nagtikang an tagna pinaagi han paghulagway han ultimo nga kalamposan han Mesias ha pagtuman han kaburut-on han Dios. An pulong nga “surugoon” nagpapasabot nga masunod hiya ha kaburut-on han Dios, sugad han ginbubuhat han surugoon ha iya agaron. Ha pagbuhat hito, hiya “magios nga may pagsabot.” An pagsabot amo an abilidad ha pagkita han kahimtang. An paggios nga may pagsabot amo an pagbuhat ha maaramon nga paagi. Mahitungod han Hebreohanon nga berbo nga ginamit dinhi, an usa nga reperensya nasiring: “An punto hito amo an ideya han mataktika ngan maaramon nga pakig-upod. Hiya nga nakikig-upod ha maaramon nga paagi maglalampos.” Masasabtan nga an Mesias sigurado nga maglalampos tungod kay an tagna nasiring nga hiya “pagpapahitas-on ngan pasisidunggan hinduro.”
7. Paonan-o hi Jesu-Kristo ‘ginios nga may pagsabot,’ ngan paonan-o hiya ‘ginpahitaas ngan ginpasidunggan hinduro’?
7 Hi Jesus ‘ginios gud man nga may pagsabot,’ nga nagpapakita hin pagsabot ha mga tagna han Biblia nga naaplikar ha iya ngan ito an naggiya ha iya ha pagbuhat han kaburut-on han iya Amay. (Juan 17:4; 19:30) Ano an resulta? Katapos han pagkabanhaw ngan pagsaka ni Jesus ha langit, “ginbayaw hiya han Dios ha hitaas gud, ngan tinagan hiya hin ngaran nga labaw ha ngatanan nga mga ngaran.” (Filipos 2:9; Buhat 2:34-36) Katapos, han 1914 mas ginpahitaas pa gud an ginhimaya nga hi Jesus. Ginpasidunggan hiya ni Jehova pinaagi han kahitrono ha Mesianiko nga Ginhadian. (Pahayag 12:1-5) Oo, hiya ‘ginpahitaas ngan ginpasidunggan hinduro.’
‘Nanhitingala ha Iya’
8, 9. Kon an ginpasidunggan nga hi Jesus umabot na ha pagpadapat hin paghukom, ano an magigin reaksyon han mga magmarando ha tuna, ngan kay ano?
8 Ano an magigin reaksyon han mga nasud ngan han ira mga magmarando ha ginpasidunggan nga Mesias? Kon aton anay lalaktawan an mga pulong ha sulod han parentesis ha urhi nga bahin han bersikulo 14, sugad hini an mababasa ha tagna: “Sugad nga an kadam-an nanhitingala ha [iya] . . . ha amo nga pagkaagi hiya magbabaribi han mga nasud; an kahadian matak-om han ira mga baba ha iya: kay adton waray ha ira igsumat ira kikitaon; ngan adton waray nira hibatii ira masasabot.” (Isaias 52:14a, 15) Pinaagi hini nga mga pulong iginhuhulagway ni Isaias, diri an siyahan nga pagpakita han Mesias, kondi an iya kataposan nga pakighusay ha mga magmarando ha tuna.
9 Kon an ginpahitaas nga hi Jesus umabot na basi magpadapat hin paghukom ngada hinin diri-diosnon nga sistema han mga butang, an mga magmarando ha tuna ‘mahititingala ha iya.’ Totoo, an tawhanon nga mga magmarando diri literal nga makakakita ha ginhimaya nga hi Jesus. Kondi makikita nira an nakikita nga mga ebidensya han iya gahum sugad nga langitnon nga Girriro ni Jehova. (Mateo 24:30) Mapipiritan hira nga hatagan hin atensyon an waray pa nira mahibatii ha relihiyoso nga mga lider—nga hi Jesus amo an Paratuman han mga paghukom han Dios! An ginpasidunggan nga Surugoon nga ira igkakaatubang magios ha paagi nga diri nira ginlalaoman.
10, 11. Ha ano nga paagi masisiring nga gindaot an hitsura ni Jesus ha siyahan nga siglo, ngan paonan-o ini ginbubuhat yana nga panahon?
10 Sumala ha mga pulong ha sulod han parentesis ha bersikulo 14, hi Isaias nagsiring: “An iya nawong nadaot labi kay hin bisan hin-o nga tawo, ngan an iya hitsura labi kay han mga anak han mga tawo.” (Isaias 52:14b) Nadaot ba an pisikal nga hitsura ni Jesus ha anoman nga paagi? Waray. Bisan kon diri iginsasaysay han Biblia an mga detalye mahitungod han hitsura ni Jesus, an hingpit nga Anak han Dios sigurado nga may-ada maopay nga hitsura ngan pamahong-pahong. Matin-aw nga mahitungod ha pagtamay nga naeksperyensyahan ni Jesus an ginsiring ni Isaias. Maisugon nga iginbuhayhag niya an relihiyoso nga mga lider ha iya panahon sugad nga mga salingkapaw, mga buwaon, ngan mga parapamatay; ngan binulos hira pinaagi han pagpakaalo ha iya. (1 Pedro 2:22, 23) Ira gin-akusahan hiya hin pagin paratalapas han balaud, parapasipara, paralimbong, ngan usa nga paraaghat hin pagrebelde kontra ha Roma. Ha sugad nga paagi, inin buwaon nga mga nag-akusar naghimo hin maraot hinduro nga hulagway han personalidad ni Jesus.
11 Nagpapadayon yana an sayop nga pagpakilala kan Jesus. Naghuhunahuna an kadam-an nga mga tawo nga hi Jesus usa nga minasus-an ha pasabsaban o usa nga makalolooy nga tawo nga iginraysang ha krus, nga nahihiwi an nawong tungod han duro nga kasakitan nga may korona nga mga tunok. Igin-aghat han mga klero han Kakristianohan ito nga mga ideya. Napakyas hira nga ipakilala hi Jesus sugad nga an gamhanan nga langitnon nga Hadi nga ha iya an mga nasud may baratunon. Kon umatubang na an tawhanon nga mga magmarando ha ginpasidunggan nga hi Jesus ha hirani nga tidaraon, maatubang hira ha usa nga Mesias nga may-ada han ‘ngatanan nga kagamhanan ha langit ngan ha tuna’!—Mateo 28:18.
Hin-o an Matoo Hinin Maopay nga Sumat?
12. Ano nga makapainteres nga mga pakiana an iginbabangon han mga pulong ha Isaias 53:1?
12 Katapos ihulagway an urusahon nga pagbag-o han Mesias—tikang ha pagin “nadaot” ngadto ha pagin ‘pinasidunggan hinduro’—hi Isaias nagpakiana: “Hin-o an tinmuod han amon mensahe? Ngan ha kan kanay an butkon ni Jehova igpakita?” (Isaias 53:1) Ini nga mga pulong ni Isaias nagbabangon hin makapainteres nga mga pakiana: Matutuman ba ini nga tagna? Maipapahayag ba “an butkon ni Jehova,” nga nagrirepresentar han iya abilidad ha paggamit han gahum, ngan pahihinaboon nga matuman ini nga mga pulong?
13. Paonan-o ipinakita ni Pablo nga an tagna ni Isaias natuman kan Jesus, ngan ano an nagin reaksyon han mga tawo ngada hini?
13 An baton sigurado nga oo! Ha iya surat ha mga taga-Roma, ginkotar ni Pablo an mga pulong ni Isaias basi ipakita nga an tagna nga hinbatian ngan iginrekord ni Isaias natuman kan Jesus. An paghimayaa kan Jesus katapos han iya mga pag-antos ha tuna maopay gud nga sumat. “Kondi,” siring ni Pablo mahitungod ha diri-tumuroo nga mga Judio, “waray hira ngatanan pamati ha maopay nga sumat. Kay hi Isaias nagsiring: Ginoo, hin-o ba an nagtoo han amon mga sumat? Busa, an pagtoo tikang ha pagpamati, ngan an pagpamati tikang ha pulong ni Kristo.” (Roma 10:16, 17) Kondi, makasurubo nga gutiay la ha panahon ni Pablo an tinoo ha maopay nga sumat mahitungod ha Surugoon han Dios. Kay ano?
14, 15. Ano an nagin kahimtang han Mesias han kinanhi na hiya ha tuna?
14 Sunod, an tagna nagsaysay ha mga Israelita han mga hinungdan han mga pakiana nga nakarekord ha bersikulo 1, ngan pinaagi hito, nagin matin-aw kon kay ano nga damu an diri makarawat ha Mesias: “Hiya nagtubo ha . . . atubangan [han usa nga nagkikita] sugad hin usa nga tanom nga langbo, ngan sugad hin usa nga gamot tikang ha mamara nga tuna: hiya waray hitsura o diri angayan; ngan kon makita kita ha iya, waray kaanyag nga umungara kita ha iya.” (Isaias 53:2) Aton makikita dinhi an magigin kahimtang han Mesias kon kumanhi na hiya ha tuna. Magkakaada hiya kablasanon nga tinikangan, ngan para ha mga magkirita baga in diri hiya magigin bantogan. Dugang pa, hiya magigin pariho la hin gutiay nga sanga, usa nga bag-o nga saringsing, nga natubo ha lawas o sanga han usa nga kahoy. Magigin pariho liwat hiya hin nakadepende-ha-tubig nga gamot ha mamara, diri-matambok nga tuna. Ngan diri hiya maabot nga may-ada hadianon nga pagpakita han pagkaharangdon—waray hadianon nga mga panapton o bisan ano nga nagraranggat nga mga korona. Lugod, magigin ubos ngan simple an iya tinikangan.
15 Nagsasaysay gud ito hin husto han ubos nga tinikangan ni Jesus sugad nga tawo! An Judio nga birhen nga hi Maria nag-anak ha iya ha usa nga kuwadra ha gutiay nga bungto nga kilala sugad nga Betlehem. b (Lukas 2:7; Juan 7:42) Hi Maria ngan an iya bana, hi Jose, mga kablas. Mga 40 ka adlaw katapos matawo hi Jesus, ira gindara an halad para han sala nga itinutugot para ha mga kablas, “usa ka padis nga tukmo, o usa ka padis nga sarapati.” (Lukas 2:24; Lebitiko 12:6-8) Inabot an panahon, hi Maria ngan hi Jose nag-ukoy ha Nasaret, diin nagtubo hi Jesus ha usa ka daku nga pamilya, nga posible nga simple la an pagkinabuhi.—Mateo 13:55, 56.
16. Paonan-o nagin totoo nga hi Jesus waray maopay nga “hitsura” o pagin “angayan”?
16 Sugad nga tawo, hi Jesus baga in waray pakagamot ha husto nga tuna. (Juan 1:46; 7:41, 52) Bisan kon hiya hingpit nga tawo ngan usa nga tulin ni Hadi David, an iya ubos nga kahimtang waray makahatag ha iya hin anoman nga “hitsura” o pagin “angayan”—labi na ha mga mata hadton naglalaom nga an Mesias magtitikang ha mas harangdon nga tinikangan. Tungod kay ginsulsolan han Judio nga relihiyoso nga mga lider, damu an napagios nga igbalewaray ngan tamayon pa ngani hiya. Ha kataposan an damu nga mga tawo waray nakita nga maopay ha hingpit nga Anak han Dios.—Mateo 27:11-26.
“Gintamay Ngan Ginlikyan han mga Tawo”
17. (a) Ano an iginhulagway ni Isaias, ngan kay ano nga nagsurat hiya nga ginagamit an berbo para han naglabay nga panhitabo? (b) Hin-o an “nagtamay” ngan ‘nagdumiri’ kan Jesus, ngan paonan-o nira ginbuhat ito?
17 Nagtikang yana hi Isaias hin detalyado nga paghulagway kon paonan-o huhunahunaon ngan tatagdon an Mesias: “Hiya gintamay, ngan diniri [“ginlikyan,” “NW”] han mga tawo; tawo han mga kasub-anan, ngan nakilala han kasamdong [“sakit,” “NW”]: ngan sugad hin usa tikang kanay an mga tawo natago han ira nawong hiya gintamay; ngan waray kita magmahal ha iya.” (Isaias 53:3) Tungod kay sigurado nga matutuman an iya mga pulong, hi Isaias nagsurat nga ginagamit an berbo para han naglabay nga panhitabo, nga baga in natuman na ito. Totoo ba nga hi Jesu-Kristo gintamay ngan ginlikyan han mga tawo? Oo, totoo gud! Naghunahuna an nagpapakamatadong-ha-kalugaringon nga relihiyoso nga mga lider nga hiya an pinakamaraot ha ngatanan nga mga tawo. Hiya gintawag nira nga sangkay han mga parasukot han buhis ngan han mga puta. (Lukas 7:34, 37-39) Ira ginluraan an iya nawong. Ira ginsuntok, ginpakaraot, ngan gintamay hiya. (Mateo 26:67) Tungod kay naimpluwensyahan hini nga mga kaaway han kamatuoran, hi Jesus “waray karawata han iya kalugaringon nga katawohan.”—Juan 1:10, 11, NW.
18. Kon hi Jesus waray gud magkasakit, paonan-o hiya nagin “tawo han mga kasub-anan, ngan nakilala han kasamdong [“sakit,” NW]?
18 Sugad nga hingpit nga tawo, hi Jesus waray magkasakit. Kondi, hiya “tawo han mga kasub-anan, ngan nakilala han kasamdong [“sakit,” NW].” An sugad nga mga kaul-ol ngan mga sakit diri iya. Tikang ha langit nahinganhi hi Jesus ha masakit nga kalibotan. Nagkinabuhi hiya ha butnga han pag-antos ngan kasakit, kondi waray niya likyi adton may sakit, ha pisikal man o ha espirituwal. Pariho hin mapinairon nga doktor, inabat gud niya an pag-antos hadton nakapalibot ha iya. Dugang pa, nabuhat niya an diri mahihimo han ordinaryo nga tawhanon nga doktor.—Lukas 5:27-32.
19. Kan kanay nawong an ‘gintago,’ ngan paonan-o ipinakita han mga kaaway ni Jesus nga hira ‘waray magmahal ha iya’?
19 Bisan pa hito, naghunahuna an mga kaaway ni Jesus nga hiya an may sakit ngan nagdumiri hira nga karawaton hiya nga may pag-uyon. An iya nawong ‘gintago’ ha paniplatan kondi diri tungod kay gintago niya an iya nawong ha iba. Ha paghubad han Isaias 53:3, ginamit han The New English Bible an mga pulong nga “usa nga butang nga diri karuyag makita han mga tawo.” An mga kaaway ni Jesus ‘nagtago han ira mga nawong’ tikang ha iya, ira gintagad hiya sugad nga makangaralas hinduro salit diniri ha iya nga baga in mangil-ad hinduro hiya pagkit-on. Naghunahuna hira nga an iya bili katugbang la han bili han usa nga uripon. (Eksodo 21:32; Mateo 26:14-16) An ira pagkita ha iya mas ubos pa kay ha parapamatay nga hi Barabas. (Lukas 23:18-25) Ano pa an ira mahimo buhaton basi ipakita an ira nakakaminos nga pagtagad kan Jesus?
20. An mga pulong ni Isaias naghahatag hin ano nga pagliaw ha katawohan ni Jehova yana?
20 An mga surugoon ni Jehova yana mahimo kumarawat hin daku nga pagliaw tikang ha mga pulong ni Isaias. Usahay, an mga parakontra bangin magtamay ha matinumanon nga mga magsiringba ni Jehova o tagdon hira nga baga in waray hira pulos. Kondi, sugad han nahitabo kan Jesus, an importante amo an pagtagad ha aton ni Jehova nga Dios. Bisan kon an mga tawo ‘waray magmahal kan Jesus,’ sigurado nga waray ini makagbag-o han iya daku nga bili ha pagkita han Dios!
“Ginsamad Tungod han Aton mga Pagtalapas”
21, 22. (a) Ano an ginpas-an ngan gin-antos han Mesias para ha kaopayan han iba? (b) Paonan-o gintagad han damu nga mga tawo an Mesias, ngan ha ano nga pungkay inabot an iya pag-antos?
21 Kay ano nga an Mesias kinahanglan mag-antos ngan mamatay? Hi Isaias nagsaysay: “Ha waray ruhaduha hiya nagpas-an han aton mga kasamdong, ngan nagdara han aton mga kasub-anan; kondi aton hiya kinilala nga binalbag [“ginsirotan,” “NW”], hinampak han Dios, ngan ginpaantos. Kondi hiya ginsamad tungod han aton mga pagtalapas, hiya ginpilas tungod han aton mga karat-an; an pagbadlong han aton kamurayaw nakada ha iya; ngan pinaagi han iya mga labod kita nag-opay. Ngatanan kita sugad han mga karnero nanhisalaag; kita nagpaturon an tagsatagsa ha iya kalugaringon nga dalan; ngan iginbutang ni Jehova dida ha iya an karat-an naton ngatanan.”—Isaias 53:4-6.
22 Ginpas-an han Mesias an mga sakit han iba ngan gin-antos an ira mga kasakitan. Iya gin-alsa an ira mga pinas-an, siring pa, iginbutang ito ha iya mga sugbong, ngan ginpas-an ito. Ngan tungod kay an sakit ngan kasub-anan mga epekto han makasasala nga kahimtang han tawo, ginpas-an han Mesias an mga sala han iba. Damu an waray makasabot ha hinungdan han iya pag-antos ngan tinoo hira nga ginhahampak hiya han Dios, ginsisirotan hiya hin makangingirhat nga sakit. c Inabot ha pungkay an pag-antos han Mesias han hiya ginbuno, ginkastigo, ngan ginsamad—mapuwersa nga mga pulong nga nagpapasabot hin madarahog ngan makuri nga kamatayon. Kondi an iya kamatayon may-ada nagtutubos-han-sala nga gahum; nagtatagana ito han basihan nga mabawi adton nahisimang tungod han sayop ngan sala, binubuligan hira nga magkaada pakigmurayaw ha Dios.
23. Ha ano nga paagi ginpas-an ni Jesus an gin-aantos han iba?
23 Paonan-o ginpas-an ni Jesus an gin-aantos han iba? An Ebanghelyo ni Mateo, nga nagkukotar han Isaias 53:4, nasiring: “Gindara nira ha iya an damu nga mga yawan-on, ngan iya pinapanggowa an mga espiritu ha usa ka pulong, ngan nagkaopay an ngatanan nga mga magsakit, basi matuman an iginyakan ni Isaias nga manaragna, nga nasiring: Hiya ngahaw kinuha han aton mga sakit, ngan gindara niya an aton mga kagol-anan.” (Mateo 8:16, 17) Pinaagi han iya pagtambal hadton nadangop ha iya nga magkalainlain an sakit, sugad hin ginpas-an ni Jesus an ira pag-antos. Ngan an sugad nga mga pagtambal nakaiban han iya kusog. (Lukas 8:43-48) An iya abilidad ha pagtambal han ngatanan nga klase hin sakit—ha pisikal ngan espirituwal—nagpamatuod nga gintagan hiya hin gahum ha paglimpyo ha ngatanan nga katawohan tikang ha sala.—Mateo 9:2-8.
24. (a) Kay ano nga ha panhunahuna han damu nga tawo hi Jesus baga in “ginsirotan” han Dios? (b) Kay ano nga hi Jesus nag-antos ngan namatay?
24 Kondi, ha hunahuna han damu nga tawo hi Jesus baga in “ginsirotan” han Dios. Aw, nag-antos hiya tungod han mga pagsulsol han talahuron nga relihiyoso nga mga lider. Kondi, hinumdumi nga nag-antos hiya diri tungod han anoman nga sala nga nabuhat niya. “Hi Kristo nag-antos man tungod ha iyo,” siring ni Pedro, “nga gintagan kamo hin susbaranan, basi kamo magsunod ha iya mga pagpitad: nga hiya waray makasala, ngan an limbong waray hiagii ha iya baba: nga amo hiya an nagdara han aton mga sala ha iya lawas ha ibabaw han kahoy, basi nga hi kita, nga nagkamamatay na ngadto ha mga sala, magkabubuhi unta kita ngadto ha katadongan; ngan tungod ha iya mga kasamdan nagkatatambal kamo.” (1 Pedro 2:21, 22, 24) Kita ngatanan hadto nagkawawara tungod ha pagin makasasala, ‘sugad hin mga karnero nga nagsasarang.’ (1 Pedro 2:25) Kondi, pinaagi kan Jesus, nagtagana hi Jehova hin pagtubos tikang ha aton makasasala nga kahimtang. Iya ginpahinabo nga an aton sala ‘maibutang’ kan Jesus, mahingada ha iya. Kinaburut-on nga gin-antos han waray sala nga hi Jesus an sirot para ha aton mga sala. Pinaagi han diri-angay nga pag-antos niya han makaarawod nga kamatayon ha pasakitan nga kahoy, nagin posible para ha aton nga makighiuli ha Dios.
“Iya Gintugotan nga Pakurian Hiya”
25. Paonan-o kita nahibaro nga an Mesias kinaburut-on nga nag-antos ngan namatay?
25 Disidido ba mag-antos ngan mamatay an Mesias? Hi Isaias nagsiring: “Hiya gintalumpigos, [“ngan iya gintugotan nga pakurian hiya,” “NW”] kondi han pagsakita ha iya waray hiya bumungat han iya baba; sugad hin nati nga karnero nga gintugwayan ngadto ha pangihawan, ngan sugad hin usa nga karnero nga ha atubangan han iya mga mag-aarot ngula, amo man hiya waray bungat han iya baba.” (Isaias 53:7) Ha ultimo nga gab-i han iya kinabuhi, mahimo unta magtawag hi Jesus hin sobra ha “napulo kag duha nga lehiyon [han] mga anghel” basi buligan hiya. Kondi hiya nagsiring: “Busa, ano an katuman han Santos nga Surat kay kinahanglan paghimoon hin sugad?” (Mateo 26:53, 54) Lugod, waray umato an “Kordero han Dios.” (Juan 1:29, NW) Han gin-akusahan hiya hin buwa han mga saserdote ngan han katigurangan ha atubangan ni Pilato, hi Jesus “waray magbaton.” (Mateo 27:11-14) Diri niya karuyag magyakan hin bisan ano nga makakaulang ha pagtuman han kaburut-on han Dios para ha iya. Disidido hi Jesus nga mamatay sugad nga halad nga Kordero, kay maaram gud hiya nga an iya kamatayon makakatubos ha masinugtanon nga katawohan tikang ha sala, sakit, ngan kamatayon.
26. Ha ano nga paagi ginbuhat han mga nakontra kan Jesus an “pagpugong”?
26 Naghatag yana hi Isaias hin dugang pa nga mga detalye mahitungod han pag-antos ngan pagpakaalohi han Mesias. An propeta nagsurat: “Pinaagi ha pagtalumpigos [“pagpugong,” “NW”] ngan ha paghukom hiya ginkuha; ngan mahitungod han iya lito, hin-o dida ha ira an nagpainoino nga hiya kukuhaon tikang ha tuna han mga buhi tungod han pagtalapas han akon katawohan ngain an pagbalbag ipaiigo?” (Isaias 53:8) Han gindara na hi Jesus han iya mga kaaway, ginamit hini nga relihiyoso nga mga parakontra an “pagpugong” ha ira paagi han pagtrato ha iya. Diri tungod kay nagpugong hira ha pagpahayag han ira kasina kondi tungod kay ira ginpugngan, o waray ihatag, an hustisya. Ha hubad hito han Isaias 53:8, ginamit han Griego nga Septuagint an “pagpakaalo” imbes han “pagpugong.” Ginpakaalohan hi Jesus han iya mga kaaway pinaagi han diri paghatagi han makatadunganon nga pagtrato nga bisan ngani an ordinaryo nga kriminal takos hito. An pagbista kan Jesus usa nga pagpasipara ha hustisya. Kay ano?
27. Han ginbibista han relihiyoso nga mga lider hi Jesus, ano nga mga balaud an ginbalewaray nira, ngan ha ano nga mga paagi gintalapas nira an Balaud han Dios?
27 Ha ira pangalimbasog nga mawara hi Jesus, gintalapas han Judio nga relihiyoso nga mga lider an ira kalugaringon nga mga balaud. Sumala ha tradisyon, an Sanhedrin mahimo la magbista hin kaso nga kamatayon an sirot kon himoon ito ha katirokan nga hinimo ha tinabas nga mga bato didto ha sulod han templo, diri ha balay han hitaas nga saserdote. An sugad nga pagbista sadang buhaton nga adlaw pa, diri ha gab-i. Ngan ha kaso nga kamatayon an sirot, an sentensya ha sala nga nahimo sadang ipahibaro kinabuwasan katapos han pagbista. Kon sugad, waray mga pagbista nga paghihimoon ha bisperas han Sabbath o piyesta. Ini nga mga balaud ginbalewaray ngatanan ha pagbista kan Jesus. (Mateo 26:57-68) Mas maraot pa gud, dayag nga gintalapas han relihiyoso nga mga lider an Balaud han Dios samtang gindudumara nira an kaso. Pananglitan, nanhukip hira basi madakop hi Jesus. (Deuteronomio 16:19; Lukas 22:2-6) Tinoo hira ha buwaon nga mga testigo. (Eksodo 20:16; Markos 14:55, 56) Ngan nagsarabot hira nga buhian an usa nga parapamatay, salit hira ngan an ira tuna nagin salaan ha dugo. (Numeros 35:31-34; Deuteronomio 19:11-13; Lukas 23:16-25) Kon sugad, waray “paghukom,” waray makatadunganon nga pagbista nga nagresulta ha husto, waray-ginpasulabi nga desisyon.
28. Ano an waray panginanoa han mga kaaway ni Jesus?
28 Nag-usisa ba an mga kaaway ni Jesus kon hin-o gud an tawo nga ira ginbibista? Ito liwat an iginpakiana ni Isaias: “Mahitungod han iya lito, hin-o dida ha ira an nagpainoino?” An pulong nga “lito” mahimo magpasabot hin katulinan, o gintikangan han usa. Han ginbibista hi Jesus ha atubangan han Sanhedrin, waray tagda han mga membro hito an iya gintikangan—nga iya natuman an mga ginkikinahanglan ha iginsaad nga Mesias. Lugod, ira gin-akusahan hiya hin pagpasipara ngan nagdesisyon nga angay hiya patayon. (Markos 14:64) Ha urhi, an Romano nga gobernador nga hi Ponsio Pilato nadaog han pag-ipit ngan ginsentensyahan hi Jesus nga iraysang. (Lukas 23:13-25) Salit hi Jesus, ha edad nga 33 1/2 ka tuig la, ‘ginkuha,’ o gin-utod, ha kabutngaan han iya kinabuhi.
29. Paonan-o nahitabo nga an lubnganan ni Jesus kaupod ha “mga magraot” ngan ha mga “bahandianon”?
29 Mahitungod han kamatayon ngan paglubong ha Mesias, ini an sunod nga iginsurat ni Isaias: “Ha iya kamatay, ira ginhimo an iya lubnganan nga tampo han mga magraot, ngan . . . [han] bahandianon; bisan kon hiya waray magbuhat hin pungka, waray man bisan ano nga limbong dida ha iya baba.” (Isaias 53:9) Paonan-o masisiring nga ha iya kamatay ngan paglubngan, nakaupod ni Jesus an mga magraot sugad man an mga bahandianon? Han Nisan 14, 33 K.P., namatay hiya ha poste nga ginraysangan ha iya ha gawas han mga pader han Jerusalem. Tungod kay iginraysang hiya ha poste ha butnga han duha nga magburuhat hin maraot, hito nga kahimtang kaupod niya ha lubnganan an mga magraot nga tawo. (Lukas 23:33) Kondi, han patay na hi Jesus, hi Jose, usa nga bahandianon nga tawo nga taga-Arimatea, maisugon nga naghangyo hin permiso kan Pilato nga kuhaon an lawas ni Jesus ngan ilubong ito. Kaupod hi Nikodemo, igin-andam ni Jose an lawas para ha paglubong ngan iginbutang ito ha gintatag-iya niya nga bag-o pa nga ginhimo nga lubnganan. (Mateo 27:57-60; Juan 19:38-42) Salit an lubnganan ni Jesus kaupod liwat ha mga bahandianon.
‘Nalipay hi Jehova ha Pagpilas ha Iya’
30. Ha ano nga kahulogan nalipay hi Jehova nga gintalumpigos hi Jesus?
30 Sunod, may ginsiring hi Isaias nga urusahon: “Nakalipay kan Jehova an pagpilas [“pagtalumpigos,” “NW”] ha iya; iya hiya ginsamdong: kon imo paghimoon an iya kalag nga halad tungod han sala, hiya makita han iya tulin, iya pagpapahilawigon an iya mga adlaw, ngan an karuyag ni Jehova mauswag dida ha iya kamot. Hiya makakakita han bunga han pag-antos han iya kalag, ngan matatagbaw: pinaagi han iya hibaro an akon surugoon nga matadong magmamatadong han kadam-an; ngan iya pagpapas-anon an ira mga karat-an.” (Isaias 53:10, 11) Kay ano nga malilipay hi Jehova ha pagkita nga gintalumpigos inin matinumanon nga surugoon? Matin-aw, diri hi Jehova mismo an nagpahinabo nga mag-antos an iya hinigugma nga Anak. An mga kaaway ni Jesus an bug-os nga may baratunon ha ira ginbuhat ha iya. Kondi ginpasagdan hira ni Jehova nga gumios hin mabangis. (Juan 19:11) Ano an hinungdan? Sigurado nga an Dios nga mapinairon ngan maloloy-on nakurian gud pagkita nga an iya waray-sala nga Anak nag-aantos. (Isaias 63:9; Lukas 1:77, 78) Sigurado nga hi Jehova waray masina kan Jesus ha anoman nga paagi. Bisan pa hito, nalipay hi Jehova ha pagkadisidido han iya Anak nga mag-antos tungod han ngatanan nga mga bendisyon nga magigin bunga hito.
31. (a) Ha ano nga paagi iginhatag ni Jehova an kalag ni Jesus sugad nga “halad tungod han sala”? (b) Katapos han ngatanan nga kakurian nga naeksperyensyahan ni Jesus sugad nga tawo, ano an labi nga makapatagbaw ha iya?
31 An usa han mga bendisyon, iginhatag ni Jehova an kalag ni Jesus sugad nga “halad tungod han sala.” Tungod hini, han pagbalik ni Jesus ngadto ha langit, sinulod hiya ha presensya ni Jehova nga dara an bili han iya iginhalad nga tawhanon nga kinabuhi sugad nga halad tungod han sala, ngan nalipay hi Jehova ha pagkarawat hito para ha ngatanan nga katawohan. (Hebreo 9:24; 10:5-14) Pinaagi han iya halad tungod han sala, hi Jesus nagkaada mga “tulin.” Sugad nga ‘Amay ha Kadayonan,’ maihahatag niya an kinabuhi—waray kataposan nga kinabuhi—ha ngatanan nga natoo ha iya iginbubo nga dugo. (Isaias 9:6) Katapos han ngatanan nga kakurian nga gin-agian ni Jesus sugad nga tawhanon nga kalag, sigurado nga makapatagbaw gud ha iya an pagkaada hin higayon ha pagluwas han katawohan tikang ha sala ngan kamatayon! Siyempre, sigurado nga mas makapatagbaw pa gud ha iya an paghibaro nga an iya integridad naghatag ha iya langitnon nga Amay hin ibabaton ha mga pagtamay han Iya Kaaway, hi Satanas nga Yawa.—Proberbios 27:11.
32. Pinaagi han ano nga “hibaro” ‘ginpapakamatadong [ni Jesus] an kadam-an,’ ngan hin-o an makarawat hinin matadong nga pagtindog?
32 An usa pa nga bendisyon nga resulta han kamatayon ni Jesus amo nga iya ‘ginpapakamatadong an kadam-an,’ bisan yana. Ginbubuhat niya ito, siring ni Isaias, “pinaagi han iya hibaro.” Matin-aw, ini an kahibaro nga nakuha ni Jesus tikang ha pagin tawo ngan ha diri-makatadunganon nga pag-antos tungod ha iya pagsugot ha Dios. (Hebreo 4:15) Tungod kay nag-antos tubtob ha kamatayon, naihatag ni Jesus an halad nga ginkikinahanglan ha pagbulig ha iba nga magkaada matadong nga pagtindog. Hin-o an makarawat hinin matadong nga pagtindog? Siyahan, an iya dinihogan nga mga sumurunod. Tungod kay natoo hira ha halad ni Jesus, iginpapahayag hira ni Jehova nga matadong nga ginhuhunahuna an pagkarawat ha ira sugad nga mga anak ngan paghimo ha ira nga kaupod nga mga manurunod ni Jesus. (Roma 5:19; 8:16, 17) Katapos, an ‘daku nga panon’ han “iba man nga mga karnero” natoo ha iginbubo nga dugo ni Jesus ngan nagpapahimulos hin matadong nga pagtindog nga naglalaom nga magin mga sangkay han Dios ngan makatalwas ha Armagedon.—Pahayag 7:9; 16:14, 16; Juan 10:16; Jakobo 2:23, 25.
33, 34. (a) Ano an aton hinbabaroan mahitungod kan Jehova nga nakakalipay ha aton kasingkasing? (b) Hin-o an “damu” nga makakaupod han Mesias nga Surugoon ha pagkarawat hin “usa nga bahin”?
33 Ha kataposan iginhulagway ni Isaias an mga kadaogan han Mesias: “Busa akon hiya babahinan hin usa nga bahin kaupod han mga dagku [“damu,” “NW”], ngan iya pagbabahinon an dinag-an kaupod han kusgan; tungod kay hiya naghuho han iya kalag ngadto ha kamatayon, ngan inihap kaupod han mga matinalapasnon: kondi iya ginpas-an an sala han kadam-an ngan nag-ampo para han mga matinalapasnon.”—Isaias 53:12.
34 An kataposan nga mga pulong hini nga bahin han tagna ni Isaias may igintututdo nga makalilipay mahitungod kan Jehova: Iya ginpapabilhan adton nagpapadayon nga maunungon ha iya. Iginpapasabot ini han saad nga iya “babahinan” an Mesias nga Surugoon “hin usa nga bahin kaupod han damu.” Ini nga mga pulong posible nga nagtikang ha kustomre nga pagbahin-bahin han mga dinag-an ha girra. Inaapresyar ni Jehova an pagkamaunungon han “damu” nga magtinumanon ha kadaan nga mga panahon, upod na hira Noe, Abraham, ngan Job, ngan nagreserba hiya hin “usa nga bahin” para ha ira ha tiarabot nga bag-o nga kalibotan. (Hebreo 11:13-16) Ha pariho nga paagi, hahatagan niya hin bahin an iya Mesias nga Surugoon. Oo, diri gud pababay-an ni Jehova nga diri mabalosan an iya integridad. Kita liwat makakalaom nga hi Jehova diri ‘mahingangalimot han aton buhat ngan han gugma nga aton iginpakita tungod ha iya ngaran.’—Hebreo 6:10.
35. Hin-o an mga “kusgan” nga ginbahinan ni Jesus han mga dinag-an, ngan ano an mga dinag-an?
35 An Surugoon han Dios makarawat liwat hin mga dinag-an ha girra pinaagi han kadaogan kontra ha iya mga kaaway. Ipapaangbit niya ini nga mga dinag-an ha mga “kusgan.” Ha katumanan, hin-o an mga “kusgan”? Hira an grupo han siyahan nga mga disipulo ni Jesus nga nakadaog han kalibotan sugad han iya ginbuhat—an 144,000 nga tuminungnong han ‘Israel han Dios.’ (Galasia 6:16; Juan 16:33; Pahayag 3:21; 14:1) Ano, kon sugad, an mga dinag-an? Matin-aw, kaupod hini an “hatag [nga] mga tawo,” nga gin-agaw ni Jesus tikang kan Satanas, siring pa, ngan ihinatag ha Kristiano nga kongregasyon. (Efeso 4:8-12) An 144,000 nga mga “kusgan” gintagan liwat hin usa nga bahin han usa pa nga dinag-an. Tungod kay nadaog nira an kalibotan, gin-agaw nira kan Satanas an ngatanan nga basihan ha pagtamay ha Dios. An ira marig-on nga debosyon kan Jehova nagpapasidungog ha iya, ngan nakakalipay ha iya kasingkasing.
36. Maaram ba hi Jesus nga iya gintutuman an tagna mahitungod ha Surugoon han Dios? Isaysay.
36 Maaram hi Jesus nga iya gintutuman an tagna mahitungod han Surugoon han Dios. Han gab-i nga gindakop hiya, iya ginkotar an mga pulong nga nakarekord ha Isaias 53:12 ngan igin-aplikar ito ha iya kalugaringon: “Ako nasiring ha iyo, nga kinahanglan matuman ha akon ini nga iginsurat, nga nasiring, ‘Ngan hiya gin-ihap nga upod han mga tampalasan.’ Kay an mahitungod ha akon natutuman na.” (Lukas 22:36, 37, NW) Makasurubo, hi Jesus gintrato gud sugad hin usa nga tampalasan. Ginpatay hiya nga sugad hin paratalapas han balaud, iginraysang ha poste ha butnga han duha nga kawatan. (Markos 15:27) Kondi, kinaburut-on nga gin-antos niya ini nga pagtamay, tungod kay maaram gud hiya nga hiya an manlalaban para ha aton. Sugad hin tinindog hiya ha butnga han mga makasasala ngan han epekto han sirot nga kamatayon, ngan kinarawat niya mismo an epekto.
37. (a) An makasaysayan nga rekord han kinabuhi ngan kamatayon ni Jesus nakakabulig ha aton nga makahimo hin ano nga pagkilala? (b) Kay ano nga sadang gud kita magpasalamat kan Jehova nga Dios ngan ha iya ginpasidunggan nga Surugoon, hi Jesu-Kristo?
37 An makasaysayan nga rekord mahitungod han kinabuhi ngan kamatayon ni Jesus nakakabulig ha aton nga makahimo hin sigurado nga pagkilala: Hi Jesu-Kristo an Mesias nga Surugoon ha tagna ni Isaias. Daku gud an aton pasalamat nga kinaburut-on nga gintugotan ni Jehova an iya hinigugma nga Anak ha pagtuman han matagnaon nga bahin han Surugoon, nga mag-antos ngan mamatay basi kita matubos tikang ha sala ngan kamatayon! Hito nga paagi ipinakita ni Jehova an daku nga gugma ha aton. An Roma 5:8 nasiring: “An Dios nagpahayag gud han iya kalugaringon nga gugma tungod ha aton, nga, amo man hi Kristo namatay tungod ha aton, han mga makasasala pa kita.” Sadang gud liwat kita magpasalamat kan Jesu-Kristo, an ginpasidunggan nga Surugoon, nga kinaburut-on nga naghalad han iya kalag tubtob gud ha kamatayon!
[Mga footnote]
a Ha paghubad hito han Isaias 52:13, an Targum ni Jonathan ben Uzziel (siyahan nga siglo K.P.), sumala ha paghubad ni J. F. Stenning, nasiring: “Kitaa, an akon surugoon, an Dinihogan (o, an Mesias), mag-uuswag.” Sugad man, an Talmud han Babilonya (mga ikatulo ka siglo K.P.) nasiring: “An Mesias—ano an iya ngaran? . . . [; adton] kaupod ha balay han Rabi [pananglitan, An masakit], sugad han ginsiring, ‘Ginpas-an gud niya an aton mga sakit.’ ”—Sanhedrin 98b; Isaias 53:4.
b Gin-unabi ni propeta Mika an Betlehem sugad nga an “gutiay nga nahisasakot ha mga yukot han Juda.” (Mika 5:2) Kondi, an gutiay nga Betlehem la an nagkaada kadungganan han pagin bungto nga natawohan han Mesias.
c An Hebreo nga pulong nga iginhubad nga “ginsirotan” ginagamit liwat may kalabotan ha sanla. (2 Hadi 15:5, NW) Sumala ha iba nga mga eskolar, an ideya nga an Mesias magigin usa nga sanlahon ginkuha han iba nga mga Judio ha Isaias 53:4. Ha Mesias igin-aplikar han Talmud han Babilonya ini nga bersikulo, tinatawag hiya nga “an sanlahon nga eskolar.” An Katoliko nga Douay Version, nga nauyon ha Latin nga Vulgate, naghubad hini nga bersikulo: “Amon ginhunahuna hiya nga sugad hin usa nga sanlahon.”
[Mga Pakiana]