Pahimulusi hin Maopay an Bag-o nga mga Kahimtang

Damu an ginkakaparihoan nira Pum, Jan, Dries, ngan Otto, upat nga Kristiano nga tigurang nga nag-uukoy ha Netherlands. Hira nga upat inasaw-an ngan may-ada mga anak. Dugang pa, mga pipira ka tuig na an naglabay, hira ngatanan may-ada bug-os-panahon nga sekular nga mga trabaho ngan nag-ukoy ha mag-opay nga mga balay. Kondi, hira ngatanan inundang ha ira sekular nga trabaho ngan nagtikang ha paggamit han ira bug-os nga panahon ngan kusog ha pagsuporta han mga interes han Ginhadian. Ano an nakabulig ha ira ha paghimo hini nga pagbag-o? Pinahimulsan hin maopay nira nga upat an bag-o nga mga kahimtang.

HA KATAPOSAN, an kadam-an ha aton makakaeksperyensya nga an aton mga kahimtang nagbabag-o ha magkalainlain nga paagi. Damu nga mga pagbag-o, sugad han pag-asawa, panganak, o pag-ataman han lagas nga mga kag-anak, nagriresulta hin dugang nga mga responsabilidad. Kondi, an pipira nga mga pagbag-o naghahatag ha aton hin dugang nga kagawasan ha pagpahaluag han aton Kristiano nga ministeryo. (Mateo 9:37, 38) Pananglitan, an aton adulto nga mga anak bangin bumaya na ha balay, o bangin magretiro na kita ha trabaho.

Dugang pa, bisan kon totoo nga mahimo magbag-o an aton mga kahimtang karuyag man naton ito o diri, an pipira nga mga Kristiano naglampos ha paghimo hin mga pagbag-o ha ira mga kahimtang nga naghatag hin mga higayon ha pagbuhat hin dugang pa ha ministeryo. Ito gud an ginbuhat nira Pum, Jan, Dries, ngan Otto. Paonan-o?

Han Binaya Na an mga Anak ha Balay

Hi Pum nagtrabaho sugad nga bookkeeper ha usa nga kompanya nga nagbabaligya hin mga medisina. Hiya ngan han iya asawa, hi Anny, agsob mag-auxiliary payunir kaupod han ira duha nga anak nga babaye. Hira Pum ngan Anny naghikay liwat hin mga panahon para ha kaliawan kaupod han iba nga mga payunir. “Nagpanalipod ini tikang ha mga problema nga mahimo magin resulta han iba nga mga klase hin asosasyon,” siring nira. Tungod kay naaghat ha susbaranan han ira mga kag-anak, an duha nga anak nagin regular payunir han maggradwar hira ha hayskul.

Han binaya an ira mga anak ha ira balay, nasantop nira Pum ngan Anny nga ini nga pagbag-o han ira mga kahimtang nakahatag ha ira hin dugang nga kagawasan ngan kwarta nga ira magagamit basi makagbiyahe ngadto ha makaruruyag nga mga lugar o makapahimulos hin iba nga klase hin kaliawan. Kondi, nagdesisyon an mag-asawa nga gamiton lugod an ira nabag-o nga mga kahimtang basi pahaluagon an ira Kristiano nga ministeryo. Salit nagsarit hi Pum ha iya agaron nga diri hiya matrabaho hin usa ka adlaw ha usa ka semana. Ha urhi, hi Pum naghimo hin mga kahikayan nga nakabulig ha iya nga makagtikang ha pagtrabaho ha alas-7:00 h.a. ngan umundang ha alas-2:00 h.k. Siyempre, an pagtrabaho ha mas minos nga panahon nangangahulogan hin pagkinabuhi ha mas gutiay nga suweldo. Ha gihapon, hira naglampos, ngan han 1991, nagregular payunir hi Pum kaupod han iya asawa.

Katapos hito, ginhangyo hi Pum nga magin kabulig nga parabantay han usa nga Assembly Hall han mga Saksi ni Jehova. Ito nga pagdapit  nangahulogan nga an mag-asawa kinahanglan bumaya ha balay nga ira gin-ukyan ha sulod hin 30 ka tuig na ngan bumalhin ha usa nga apartment ha lugar nga hinmumutangan han Assembly Hall. Binalhin hira. Makuri ba ito? Hi Anny nabaton nga ha kada panahon nga naruruyag hiya pag-uli, ginpapakianhan niya an iya kalugaringon, ‘Pariho ba ako han asawa ni Lot?’ Nagdumiri hiya ha ‘paglingi.’—Genesis 19:26; Lukas 17:32.

Inabat nira Pum ngan Anny nga an ira desisyon nagresulta hin damu nga mga bendisyon. Gawas pa han damu nga mga butang, naruruyagan nira an ira serbisyo ha Assembly Hall, an pagpangandam para ha distrito nga mga kombensyon, ngan an asosasyon ha mga paramangno han sirkito (nagbibiyahe nga mga ministro) nga nagpapahayag ha katirokan. Usahay, nabisita hira ha magkalainlain nga mga kongregasyon kon nag-aalagad hi Pum sugad nga kasaliwan nga paramangno han sirkito.

Kay ano nga naglampos ini nga mag-asawa ha pagpahaluag han ira pag-alagad? Hi Pum nasiring: “Kon may-ada daku nga pagbag-o ha imo kinabuhi, kinahanglan magin determinado ka ha pagpahimulos han bag-o nga mga kahimtang ha gimaopayi nga paagi nga posible.”

Paghimo hin Mas Simple nga Kinabuhi

Hi Jan ngan an iya asawa, hi Woth, may-ada tulo nga anak. Pariho kan Pum ngan han iya pamilya, maaramon nga ginpahimulosan ni Jan an usa ka pagbag-o han mga kahimtang. Ha sulod hin damu ka mga tuig, maopay an trabaho ni Jan ha usa nga bangko ngan nagtagana hin komportable nga estilo han pagkinabuhi ha iya pamilya. Kondi, inabat hiya hin nagtitikadaku nga hingyap ha pagpahaluag han iya ministeryo. Hiya nagsaysay: “Durante han akon pagkinabuhi, nagtikahilarom an akon apresasyon para ha kamatuoran, ngan nagtubo an akon gugma para kan Jehova.” Salit han 1986, naghimo hin pagbag-o hi Jan ha iya mga kahimtang. Hiya nasiring: “Ginpahimulosan ko an higayon nga nagkaada pagbag-o ha pag-organisa han mga empleyado ha opisina ngan nagtikang ako magtrabaho hin mas halipot nga panahon. Gin-agnayan ako han nahipausa ko nga mga katrabaho hin Diwodo tungod kay natrabaho la ako ha dinsdag [Martes], woensdag [Mierkoles], ngan donderdag [Huwebes]. An akon suweldo inubos hin 40 porsyento. Iginbaligya ko an amon balay ngan pumalit hin usa nga lantsa nga mauukyan basi makag-alagad kami ha lugar nga may-ada mas daku nga panginahanglan hin mga magwarali han Ginhadian. Ha urhi, ginpahimulosan ko an temprano nga pagretiro; an akon suweldo inubos pa hin 20 porsyento, kondi han 1993, nakagtikang ako pagregular payunir.”

Yana, hi Jan usa nga membro han Hospital Liaison Committee ngan regular nga nag-aalagad sugad  nga paramangno han kombensyon. Bisan pa han iya maluya nga panlawas, auxiliary payunir hi Woth ha pana-panahon. Inasaw-an na yana an ira tulo nga anak, ngan kaupod han ira mga padis, madasigon nga mga ministro han Ginhadian.

Paonan-o nakapahiuyon hira Jan ngan Woth ha pinasimple nga pagkinabuhi? “Durante han panahon nga may-ada pa kami damu nga kwarta,” binaton hi Jan, “determinado kami nga diri maapektohan hinduro han materyal nga mga butang. Yana bangin diri kombinyente nga kinahanglan maghulat anay antes makuha an usa nga butang, kondi an espirituwal nga mga bendisyon ngan mga pribilehiyo nga amon nakakarawat nagtatabon gud hito.”

Pariho kan Jan ngan Woth, hi Dries ngan an iya asawa, hi Jenny, nagdesisyon liwat ha pagtipig han ira kinabuhi nga simple basi makahatag hin dugang nga panahon ha mga interes han Ginhadian. Hira Dries ngan Jenny nag-alagad sugad nga mga payunir tubtob nga nagkaanak hira. Katapos, basi maataman an iya pamilya, nagtrabaho hi Dries sugad nga administrador ha usa nga daku nga kompanya. Gin-apresyar han iya agaron an iya trabaho ngan gintanyagan hiya hin mas hitaas nga katungdanan. Kondi, waray karawata ni Dries ito nga katungdanan tungod kay an pagkarawat hito mangangahulogan unta hin mas gutiay nga panahon para ha Kristiano nga mga buruhaton.

An pag-ataman han pamilya—sugad man an pag-ataman ha masakit nga iroy ni Jenny—nagkinahanglan hin daku nga panahon ngan kusog han mag-asawa. Ha gihapon, padayon nga ginpatubo nira an espiritu ha pagpayunir. Ano an nakabulig ha ira ha pagbuhat hini? Hi Jenny nagsaysay: “May-ada mga payunir nga amon ginpaukoy ha amon, nagdapit liwat kami hin mga payunir para ha mga pangaon, ngan nagpaukoy kami hin mga paramangno han sirkito ha amon balay.” Hi Dries nagdugang: “Gintipigan namon nga simple an amon kinabuhi ngan ginlikyan namon an pangutang. Nagdesisyon kami nga diri gud umapi ha dagku nga mga negosyo o pumalit hin balay, basi ha tidaraon diri kami maulang han sugad nga mga butang.”

An desisyon nira Dries ngan Jenny ha paghimo hin mga higayon nga makakahatag ha ira hin dugang nga panahon para ha mga interes han Ginhadian nagkaada makapatagbaw nga mga resulta. Yana, an ira mga anak nag-aalagad sugad nga mga tigurang ngan an usa payunir kaupod han iya asawa. Hira Dries ngan Jenny nag-alagad sugad nga mga espesyal payunir, ngan ha urhi hi Jenny inupod kan Dries ha sirkito nga buruhaton. Yana mga boluntaryo hira ha Bethel, diin nag-aalagad hi Dries sugad nga usa nga membro han Komite han Sanga.

Temprano nga Pagretiro

Pariho kan Dries ngan Jenny, hi Otto ngan an iya asawa, hi Judy, nagpayunir antes hira magkaanak hin duha nga babaye. Han magburod hi Judy han ira siyahan nga anak, hi Otto nakatrabaho sugad nga maestro.

Han nagtutubo an mga bata, hira Otto ngan Judy agsob nga nag-iimbitar hin mga payunir ha ira balay basi makita han ira mga anak an kalipay han bug-os-panahon nga Kristiano nga mga  magburuhat. Inabot an panahon, nagpayunir an ira suhag nga anak. Ha urhi, tinambong hiya ha Eskwelahan han Gilead, ngan kaupod han iya bana, nag-aalagad yana sugad nga misyonera ha usa nga nasud ha Aprika. An ira putó nga anak nagpayunir han 1987, ngan nagtikang liwat magpayunir hi Judy.

Han an bag-o nga mga kahimtang nagtugot kan Otto nga magtrabaho hin mas gutiay nga oras ha eskwelahan, ginamit niya an sobra nga panahon ha pagpayunir. Ha urhi, inundang na gud hiya ha iya trabaho. Yana, ginagamit ni Otto ha nagbibiyahe nga buruhaton an iya abilidad sugad nga magturutdo ha pagparig-on han mga kongregasyon ha espirituwal nga paagi.

Ano an sagdon ni Otto para hadton nagriretiro hin temprano ha ira sekular nga trabaho? “Kon magretiro kamo, ayaw pagpahayahay ha sulod hin usa ka tuig o sobra pa. Masayon la an pagpahiara ha waray ginhihimo. Diri mag-iiha, mahingangalimot ka ha pagpayunir. Lugod, tikangi dayon an imo ginpauswag nga mga buruhaton ha ministeryo ngan ha kongregasyon.”

Ginagamit hin Maaramon an Imo Eksperyensya ha Kinabuhi

Oo, an kabugtoan nga pariho kan Pum, Jan, Dries, ngan Otto waray na yana han kusog ngan enerhiya nga pariho han mga batan-on pa hira. Kondi mas hamtong, mas eksperyensyado, ngan mas maaramon na hira yana. (Proberbios 20:29) Maaram hira kon ano an kahulogan ha pagin mga amay, ngan ha pagtrabaho kaupod han ira mga asawa, nagkaada hira ideya kon mationan-o kadaku an nahidadabi ha pagin usa nga iroy. Kaupod han ira mga asawa, ginsulbad nira an mga problema han pamilya ngan naghimo hin teokratiko nga mga tumong para ha ira mga anak. Hi Otto nasiring: “Kon nagsasagdon ako sugad nga paramangno han sirkito ha mga butang may kalabotan ha pamilya, nakakabulig an akon pagin pamilyado mismo.” Ha pariho nga paagi, an eksperyensya ni Dries sugad nga amay nakakahimo ha iya yana nga birilhon nga bahin ha pamilya han Bethel, tungod han damu nga batan-on nga nagtatrabaho didto.

Oo, an personal nga kahibaro nakabulig ha sugad nga kabugtoan nga atamanon an damu kalain nga mga panginahanglan ha mga kongregasyon. An ira eksperyensya, siring pa, nagpatarom han mga garamiton nga ira ginagamit, salit nagagamit nira an ira kusog ha paagi nga nagriresulta hin gidadakui nga kapulsanan. (Eklesiastes 10:10) Ha pagkamatuod, ha espisipiko nga peryodo han panahon, agsob nga nakakahimo hira hin labaw pa kay hadton mas makusog ha pisikal kondi mas gutiay an eksperyensya.

An sugad nga kabugtoan, kaupod han ira mga asawa, mag-opay nga mga susbaranan para ha mga batan-on nga kaupod han katawohan ni Jehova. Naoobserbahan han mga batan-on nga an mga mag-asawa nga pariho ha ira personal nga nakaeksperyensya hin damu nga mga kakurian ngan mga bendisyon nga mababasa ha aton Kristiano nga mga publikasyon. Makapadasig nga makita an kalalakin-an ngan kababayin-an nga nagpapakita hin espiritu nga pariho han kan Kaleb, nga bisan kon edaran na, naghangyo hin makuri nga toka.—Josue 14:10-12.

Subara an Ira Pagtoo

Masusubad mo ba an pagtoo ngan buhat han mga mag-asawa nga gin-unabi hini nga artikulo? Hinumdumi, an ira paagi han pagkinabuhi nakasentro ha kamatuoran. Ira ginpatubo ha ira mga anak an hingyap nga magpayunir. Ira ginbuhat ito, sugad han siring ni Jan, “pinaagi han pagin susbaranan ha gugma para kan Jehova ngan ha iya organisasyon, pinaagi han paghimo hin mga kahikayan para han maopay nga asosasyon, ngan pinaagi han pagtutdo ha mga anak nga mahibaro ha pagsuporta ha ira kalugaringon.” Nagtrabaho ngan nag-uyag liwat hira nga tarampo sugad nga pamilya. “Durante han bakasyon,” nahinunumdom hi Pum, “an bug-os nga pamilya kasagaran nga nagsasangyaw ha aga ngan urosa nga nagpapahayahay ha kulop.”

Dugang pa, ini nga mga Kristiano abanse nga nagplano, salit han nagbag-o an ira mga kahimtang, andam hira ha pagpahimulos han bag-o nga kahimtang. Naghimo hira hin mga tumong ngan hin mga desisyon nga nagpadagmit han pagkab-ot han ira mga tumong. Namiling hira hin mga paagi ha pagbuhat hin mas gutiay nga sekular nga trabaho ngan disidido ha pagkinabuhi uyon ha gutiay la nga kita. (Filipos 1:10) An mga asawa bug-os nga nagsuporta ha ira mga bana. May-ada hira urosa nga marig-on nga hingyap ha pagsulod ha ‘daku nga purtahan nga nagtutugway ngadto ha buruhaton,’ ngan sugad nga resulta, nagpapahimulos hin hura nga mga bendisyon tikang kan Jehova.—1 Korinto 16:9, NW; Proberbios 10:22.

Naghihingyap ka ba liwat nga pahaluagon an imo pakigbahin ha ministeryo? Kon amo, an pagpahimulos hin maopay han bag-o nga mga kahimtang bangin amo an yawi ha pagbuhat hito.

[Retrato ha pahina 20]

Hira Pum ngan Anny nag-aataman han Assembly Hall

[Retrato ha pahina 20]

Hira Jan ngan Woth nakikigbahin ha pagsangyaw nga buruhaton

[Retrato ha pahina 21]

Hira Dries ngan Jenny nagtatrabaho ha Bethel

[Retrato ha pahina 21]

Hira Otto ngan Judy nag-aandam ha pagbisita ha sunod nga kongregasyon