Relihiyoso nga Pagtimaraot—Kay Ano?

NAGHUHUNAHUNA ka ba nga sadang pagtimarauton an mga tawo tungod han ira relihiyon? Bangin diri—basta diri la hira maghilabot ha mga katungod han iba. Kondi, an relihiyoso nga pagtimaraot maiha na nga nag-eksister ngan naeksister pa gihapon. Pananglitan, damu han mga Saksi ni Jehova ha Europa ngan iba nga mga bahin han kalibotan an agsob kuhaan han ira mga katungod ngan madarahog nga gintrato ha bug-os han ika-20 ka siglo.

Durante hito nga panahon, an mga Saksi ni Jehova nag-antos hin madarahog, sistematiko, ngan maiha nga pagtimaraot ilarom han duha nga dagku nga diktadorya nga pagmando ha Europa. Ano an igintututdo ha aton han ira eksperyensya mahitungod han relihiyoso nga pagtimaraot? Ngan ano an aton mahibabaroan tikang ha paagi han ira paggios ha pag-antos?

“Diri Bahin han Kalibotan”

An mga Saksi ni Jehova nangangalimbasog nga magin masinugtanon ha balaud, mamurayawon, ngan matadong ha moral nga mga tawo. Diri hira nakontra ha mga gobyerno o nakikig-away hito, diri man hira nag-aaghat hin pagtimaraot tungod kay karuyag nira magin mga martir. Neutral ha politika ini nga mga Kristiano. Uyon ini ha mga pulong ni Jesus: “[An akon mga sumurunod] diri bahin han kalibotan, sugad la nga diri ako bahin han kalibotan.” (Juan 17:16, NW) Kinikilala han kadam-an nga mga gobyerno an pagin neutral han mga Saksi. Kondi an diktador nga mga magmarando gutiay la an pagtahod ha kinahanglanon han Biblia nga an mga Kristiano sadang magin diri bahin han kalibotan.

An hinungdan hini iginsaysay durante han usa  nga komperensya ha University of Heidelberg, Alemanya, han Nobyembre 2000. An tema han komperensya amo an “Repression and Self-Assertion: Jehovah’s Witnesses Under the National Socialist and Communist Dictatorships.” Hi Dr. Clemens Vollnhals han Hannah-Arendt-Institute for Research Into Totalitarianism nagsiring: “An awtoridad han diktadorya nga mga gobyerno diri limitado ha politika la. Nagkikinahanglan hira han bug-os nga pagpasakop han kada tawo.”

An totoo nga mga Kristiano diri makakahatag han ira “bug-os nga pagpasakop” ha usa nga gobyerno han tawo, tungod kay nanumpa hira hin bug-os nga pagkamaunungon ngadto kan Jehova nga Dios la. Naieksperyensyahan han mga Saksi nga nag-uukoy ha diktadorya nga mga gobyerno nga usahay nagkakasumpaki an mga ginkikinahanglan han Estado ngan han ira relihiyon. Ano an ira ginbubuhat kon naatubang hira hin sugad nga mga pagkasumpaki? Damu ka beses ha naglabay, inaplikar han mga Saksi ni Jehova an prinsipyo nga iginpahayag han mga disipulo ni Jesu-Kristo: “Kinahanglan namon nga sugton an Dios san-o an mga tawo.”—Buhat 5:29.

Damu han mga Saksi an padayon nga maunungon ha ira relihiyoso nga mga gintotoohan ngan nagpabilin nga neutral ha mga buruhaton ha politika, bisan pa han pinakamabangis nga pagtimaraot. Paonan-o hira naglampos? Diin nira nakuha an kusog basi makalampos? Pabatunon naton hira mismo. Ngan kitaon naton kon ano an mahibabaroan han ngatanan, mga Saksi ngan mga diri-Saksi, tikang ha ira mga eksperyensya.

[Blurb ha pahina 4]

An mga Saksi ni Jehova ha Alemanya nag-antos hin madarahog ngan maiha nga pagtimaraot ilarom han duha nga diktadorya nga pagmando han ika-20 ka siglo

[Blurb ha pahina 4]

“An awtoridad han diktadorya nga mga gobyerno diri limitado ha politika la. Nagkikinahanglan hira han bug-os nga pagpasakop han kada tawo.”—Dr. Clemens Vollnhals

[Retrato ha pahina 4]

Ginkuhaan hin kagawasan an pamilya nga Kusserow tungod kay waray nira ikompromiso an ira pagtoo

[Retrato ha pahina 4]

Hi Johannes Harms ginpatay ha usa nga prisohan han mga Nazi tungod han iya mga gintotoohan