Mga Pakiana Tikang ha mga Magbarasa

May-ada ba mga kahikayan nga mahihimo kon imposible makatambong an usa nga baldado nga dinihogan nga Kristiano ha pagsaurog han kongregasyon ha Panihapon han Ginoo?

Oo. May-ada mahihimo ngan sadang himoon sugad nga konsiderasyon ha dinihogan nga Kristiano nga baldado ngan bangin diri na nakakabuhát ha higdaan ngan salit diri na makatambong kon saurugon han kongregasyon an Memoryal han kamatayon ni Kristo. Ha sugad nga kahimtang, mahimo hikayon han lawas han mga tigurang nga an usa nga tigurang o an iba nga hamtong nga Kristiano nga lalaki magdara hin mga bahin han emblema nga tinapay ngan alaksiw ngadto hito nga igkasi-tumuroo hito mismo nga gab-i antes sumirang an adlaw.

Depende ha mga kahimtang, an nabisita nga tigurang o an lain nga bugto nga lalaki mahimo maghatag hin halipot nga mga pagsaysay ngan magbasa hin angayan nga mga teksto. Mahimo niya sundon an paagi nga ginhimo ni Jesus han gintikangan Niya an Panihapon han Ginoo. Pananglitan, mahimo basahon an Mateo 26:26 ngan ihatag an waray ipaturubo nga tinapay katapos han pag-ampo. Katapos, mahimo basahon han nabisita nga bugto an Mateo kapitulo 26, bersikulo 27 ngan 28, ngan ihatag an alaksiw katapos han usa pa nga pag-ampo. Mahimo isaysay hin halipot an mahitungod han bili han tagsa nga emblema, ngan angayan an pangataposan nga pag-ampo.

Siyempre, sadang himoon an ngatanan nga makatadunganon nga pangalimbasog basi makatambong ha pagsaurog han kongregasyon ha Panihapon han Ginoo. Kondi ano an mahimo buhaton ha seryoso gud nga kahimtang may kalabotan ha usa nga dinihogan nga Kristiano nga masakit hinduro, aadto ha ospital, o aada ha iba nga kahimtang nga makakapugong ha iya ha pagtambong ha Memoryal ha katunod han adlaw han Nisan 14? An sugad nga dinihogan makakapahimulos han usa nga kahikayan ha Mosaiko nga Balaud ngan mahimo magsaurog hito hin pribado paglabay hin 30 ka adlaw.—Numeros 9:9-14.