Kapitulo Disisais

Usa nga Mensahe han Paglaom Para ha Masurub-on nga mga Bihag

Isaias 55:1-13

 1. Isaysay an kahimtang han bihag nga mga Judio ha Babilonya.

 MADULOM adto nga peryodo ha kasaysayan han Juda. An may kauyonan nga katawohan han Dios pinirit nga gindara tikang ha ira natawohan nga tuna ngan yana nag-aantos han kabihag ha Babilonya. Oo, gintagan hira hin gutiay nga kagawasan ha pagbuhat han ira adlaw-adlaw nga buruhaton. (Jeremias 29:4-7) An iba nahibaro hin propesyonal nga mga kaabtik o nagin okupado ha pagnegosyo. a (Nehemia 3:8, 31, 32) Kondi, makuri an kinabuhi para ha bihag nga mga Judio. Uripon hira, ha pisikal ngan ha espirituwal. Aton kitaon kon paonan-o.

2, 3. Paonan-o an pagkabihag nakaapekto ha pagsingba han mga Judio kan Jehova?

² Han an Jerusalem ginbungkag han mga sundalo han Babilonya han 607 A.K.P., an ira ginbuhat lahos pa ha pagbungkag ha usa nga nasud; gindaot liwat nira an totoo nga pagsingba. Ira ginkuha an mga garamiton ha templo ni Jehova ngan gin-guba ito, gindaot an kahikayan ha pagkasaserdote pinaagi han pagbihaga han pipira ha tribo ni Lebi ngan pagpataya han iba. Tungod kay waray na templo para ha pagsingba, waray halaran, ngan waray organisado nga mga saserdote, imposible nga makaghalad an mga Judio ngadto ha totoo nga Dios sumala ha iginsugo han Balaud.

³ Mahimo pa gihapon matipigan han matinumanon nga mga Judio an ira relihiyoso nga pangirilal-an pinaagi han pagturi ngan pagsunod ha Balaud tubtob ha mahihimo. Pananglitan, mahimo nira likyan an igindidiri nga mga pagkaon ngan igsaurog an Sabbath. Kondi ha pagbuhat hito, namimeligro hira nga tamayon han mga nagbihag ha ira, tungod kay gintatagad han mga Babilonyahanon nga kalurongan an relihiyoso nga mga rituwal han mga Judio. An makasurubo nga kahimtang han mga bihag masasabtan ha mga pulong han salmista: “Ha ligid han mga salog ha Babilonya, didto nanlilingkod kami, oo, nagtitinook kami, nahinunumdom kami han Sion. Ha mga kahoy ha butnga didto hito isinab-ong namon an amon mga arpa. Kay didto hira, nga nagbihag ha amon nangaro hin mga kanta, ngan hira nga naglaglag ha amon pinangaro ha amon an kalipay, nasiring: Pagkantaha ha amon an usa han mga kanta ha Sion.”—Salmo 137:1-3.

 4. Kay ano nga magigin waray pulos kon sumarig an mga Judio ha iba nga mga nasud para ha katalwasan, kondi kan kanay hira makakaaro hin bulig?

⁴ Kan kanay, kon sugad, makakalaom hin pagliaw an mga Judio nga bihag? Diin magtitikang an ira kaluwasan? Sigurado nga diri tikang ha nakapalibot nga mga nasud! Ito ngatanan waray mahihimo kontra ha kasundalohan han Babilonya, ngan damu hito an nasisina ha mga Judio. Kondi may paglaom pa an kahimtang. Hi Jehova, nga ira gintalapas han diri pa hira bihag, maloloy-on nga nagpahayag ha ira hin makapadasig nga imbitasyon, bisan kon bihag pa hira.

“Kadi Kamo ha mga Tubig”

 5. Ano an iginpapasabot han mga pulong nga “kadi kamo ha mga tubig”?

⁵ Pinaagi kan Isaias, hi Jehova matagnaon nga nagyakan ha mga Judio nga bihag ha Babilonya: “Hala, an tagsatagsa nga inuuhaw, kadi kamo ha mga tubig, ngan hiya nga waray kwarta; kadi kamo, palit, ngan kumaon; oo, kadi, palit hin alaksiw ngan hin gatas hin waray kwarta ngan waray bali.” (Isaias 55:1) Ini nga mga pulong puno hin simbolismo. Pananglitan, tagda an imbitasyon nga: “Kadi kamo ha mga tubig.” Kon waray tubig, imposible nga mabuhi. Kon waray iton importante nga likido, kita nga mga tawo mabubuhi hin mga usa ka semana la. Salit, angayan nga ginamit ni Jehova an tubig sugad nga pagtanding ha magigin epekto han iya mga pulong ha Judio nga mga bihag. An iya mensahe makakarepresko ha ira, pariho han matugnaw nga irinmon durante han mapaso nga adlaw. Tatapuson hito an ira kasub-anan, ngan diri na hira mauuhaw ha kamatuoran ngan katadongan. Ngan maghahatag ito ha ira hin paglaom han kagawasan tikang ha pagkabihag. Kondi, basi magpahimulos, an mga Judio nga bihag kinahanglan uminom ha mensahe han Dios, mamati hito, ngan gumios uyon hito.

 6. Paonan-o magpapahimulos an mga Judio kon hira ‘pumalit hin alaksiw ngan hin gatas’?

 ⁶ Nagtanyag liwat hi Jehova hin “alaksiw ngan hin gatas.” An gatas nagpapakusog ha bata pa nga mga lawas ngan nabulig ha kabataan nga tumubo. Ha pariho nga paagi, an mga pulong ni Jehova magpapakusog ha iya katawohan ha espirituwal ngan mabulig ha ira nga maparig-on an ira relasyon ha iya. Kondi, kumusta man an alaksiw? An alaksiw agsob nga ginagamit ha marisyo nga mga okasyon. Ha Biblia, igin-uupod ito ha pag-uswag ngan pagrayhak. (Salmo 104:15) Ha pagsiring ha iya katawohan nga “palit hin alaksiw,” ginpapasarig hira ni Jehova nga an bug-os-kasingkasing nga pagbalik ha totoo nga pagsingba makakahimo ha ira nga ‘magmalipayon gud.’—Deuteronomio 16:15; Salmo 19:8; Proberbios 10:22.

 7. Kay ano nga makatirigamnan an pagpaid ni Jehova ha mga bihag, ngan ano an igintututdo hito ha aton mahitungod ha iya?

⁷ Maloloy-on gud hi Jehova ha paghatag hiton espirituwal nga karepresko ha bihag nga mga Judio! Mas makatirigamnan gud an iya pagpaid kon nahinunumdoman naton an kasaysayan han pagin matinalapason ngan pagin rebelyoso han mga Judio. Diri gud hira takos han pag-uyon ni Jehova. Kondi, hi salmista David nagsurat mga siglo antes pa: “Hi Jehova malolooyon ngan puno hin grasya, mahinay ha kasina, ngan hura hin mahigugmaon nga kalooy. Diri hiya magbabadlong ha gihapon; bisan ngani diri hiya magtitipig hiton iya kasina hin waray kataposan.” (Salmo 103:8, 9) Imbes nga utdon an iya relasyon ha iya katawohan, hi Jehova an nag-uuna ha pakigmurayaw. Tinuod gud nga usa hiya nga Dios nga “nalilipay ha mahigugmaon nga pagpaid.”—Mika 7:18.

Sayop nga Pagsarig

 8. Diin sarig an damu nga mga Judio, bisan pa han ano nga pahamangno?

⁸ Tubtob yana, damu nga mga Judio an waray sumarig hin bug-os kan Jehova para han kaluwasan. Pananglitan, antes mabungkag an Jerusalem, an mga magmarando hito sinarig ha suporta han gamhanan nga mga nasud, nagin puta hira, siring pa, ha Ehipto ngan ha Babilonya. (Esekiel 16:26-29; 23:14) May maopay nga hinungdan nga ginpahamangnoan hira ni Jeremias: “Maghikaraot an tawo nga nasarig hin tawo, ngan naghihimo han unod nga iya butkon, ngan kanay kasingkasing nabaya kan Jehova.” (Jeremias 17:5) Kondi, ito gud an ginbuhat han katawohan han Dios!

 9. Paonan-o an mga Judio mahimo “maggasto . . . hin kwarta para hadton diri tinapay”?

⁹ Yana uripon na hira ha usa han mga nasud nga ira sinarigan. Nahibaro ba hira hin leksyon? Posible nga damu an waray maleksyon, kay hi Jehova nagpakiana: “Kay ano nga maggasto kamo hin kwarta para hadton diri tinapay? Ngan han iyo kabudlay para hadton diri nakakabusog?” (Isaias 55:2a) Kon an bihag nga mga Judio nasarig ha bisan hin-o imbes nga kan Jehova, hira ‘nagasto hin kwarta para hadton diri tinapay.’ Sigurado nga diri hira pagagawson han Babilonya tungod ha palisiya hito nga diri gud tugotan an mga bihag ha pag-uli. Ha kamatuoran, an Babilonya, upod na an imperyalismo, komersyalismo, ngan palso nga pagsingba hito, waray gud maihahatag nga bisan ano ha bihag nga mga Judio.

10. (a) Paonan-o babalosan ni Jehova an bihag nga mga Judio kon mamati hira ha iya? (b) Ano nga kauyonan an ginhimo ni Jehova kan David?

¹⁰ Naghangyo hi Jehova ha iya katawohan: “Pamati ha mainuyatmon ha akon, ngan kumaon kamo hadton maopay, ngan papaghimongayaa an iyo kalag ha pagkamatambok. Ihilig an iyo talinga, ngan kumadi ha akon; pamati, ngan an iyo kalag mabubuhi: ngan ako makikighimo ha iyo hin dayon nga kauyonan, bisan an siguro nga mga kalooy kan David.” (Isaias 55:2b, 3) An malalaoman la hinin gutom ha espirituwal nga katawohan amo hi Jehova, nga matagnaon nga nakikiistorya yana ha ira pinaagi kan Isaias. An ira mismo kinabuhi nadepende ha pamati ha mensahe han Dios, tungod kay nagsiring hiya nga ha ira pagbuhat hin sugad, an ira “kalag mabubuhi.” Kondi, ano an “dayon nga kauyonan” nga hihimoon ni Jehova kaupod hadton namamati ha iya? Ito nga kauyonan may kalabotan ha ‘sigurado nga mga kalooy kan David.’ Mga siglo una pa, nagsaad hi Jehova kan David nga an iya trono “matutukod ha waray kataposan.” (2 Samuel 7:16) Kon sugad, an “dayon nga kauyonan” nga gin-unabi dinhi nagtutudlok ha pagmando.

Permanente nga Manurunod han Waray Kataposan nga Ginhadian

11. Kay ano nga an katumanan han saad han Dios kan David baga in imposible matuman ha mga bihag ha Babilonya?

¹¹ Oo, an ideya mahitungod han pagmando han tulin ni David baga in imposible matuman ha bihag nga mga Judio. Nawad-an na hira han ira tuna ngan bisan han ira pagin nasud! Kondi temporaryo la ito. Waray hingalimot hi Jehova han iya kauyonan kan David. Bisan kon ha paghunahuna han tawo imposible ini matuman, maglalampos gud an katuyoan han Dios may kalabotan han waray kataposan nga Ginhadian ha tulin ni David. Kondi paonan-o ngan san-o? Han 537 A.K.P., ginpagawas ni Jehova an iya katawohan tikang ha pagkabihag ha Babilonya ngan ginpabalik hira ha ira natawohan nga tuna. Nagresulta ba ini ha katukod han waray kataposan nga ginhadian? Waray, nagpadayon hira nga sakop han usa pa nga pagano nga imperyo, an Medo-Persia. “An itinanda nga mga panahon” para ha pagmando han mga nasud waray pa matapos. (Lukas 21:24, NW) Tungod kay waray pa hadi ha Israel, an saad ni Jehova  kan David magpapabilin nga diri pa natutuman ha sulod han maabot pa nga mga siglo.

12. Ano nga pitad an ginbuhat ni Jehova para ha katumanan han iya kauyonan kan David para ha Ginhadian?

¹² Sobra 500 ka tuig katapos makagawas an Israel tikang ha pagkabihag ha Babilonya, nagbuhat hi Jehova hin daku nga pitad para ha katumanan han kauyonan han Ginhadian han iya iginbalhin an kinabuhi han iya suhag nga Anak, an siyahan han iya mga linarang, tikang ha kahimayaan ha langit ngadto ha tagoangkan han Judio nga birhen nga hi Maria. (Kolosas 1:15-17) Han iginpapahibaro ito nga hitabo, an anghel ni Jehova nagsiring kan Maria: “Ini madaku, ngan pagngangaranan nga Anak han Gihitaasi. Ngan an Ginoo nga Dios mahatag ha iya han lingkoran nga hadianon ni David, nga iya amay; ngan maghahadi hiya ha balay ni Jakob ha kagihaponan ngan an iya ginhadian diri matatapos.” (Lukas 1:32, 33) Salit hi Jesus iginpanganak tikang ha hadianon nga tulin ni David ngan nakapanunod han katungod han pagkahadi. Kon mahitrono na, hi Jesus magmamando “ha kadayonan.” (Isaias 9:7; Daniel 7:14) Salit matutuman na yana an saad ni Jehova nga mga siglo na an kaihaon, nga tatagan hi Hadi David hin permanente nga manurunod.

“Kumander ha mga Nasud”

13. Paonan-o hi Jesus nagin “saksi ha mga nasud” durante han iya ministeryo ngan katapos niya sumaka ha langit?

¹³ Ano an bubuhaton hinin magigin hadi? Hi Jehova nagsiring: “Kitaa! Sugad nga saksi ha mga nasud akon ihinatag hiya, sugad nga lider ngan kumander ha mga nasud.” (Isaias 55:4, “NW”) Han nagdaku na hi Jesus, hiya an representante ni Jehova ha tuna, an saksi han Dios ha mga nasud. Durante han iya bug-os nga kinabuhi sugad nga tawo, an iya ministeryo nakasentro ha “nagkawawara nga mga karnero han balay ni Israel.” Kondi, han hirani na gud hiya sumaka ha langit, hi Jesus nagsiring ha iya mga sumurunod: “Busa, lakat kamo, ngan manhimo kamo hin mga tinon-an ha ngatanan nga mga nasud . . . Kitaa, ako upod ha iyo ha ngatanan nga mga adlaw tubtob ha kataposan han kalibotan.” (Mateo 10:5, 6; 15:24; 28:19, 20) Salit, pag-abot han panahon, an mensahe han Ginhadian gindara ngadto ha mga diri-Judio, ngan an iba ha ira nakigbahin ha katumanan han kauyonan nga ginhimo kan David. (Buhat 13:46) Hini nga paagi, bisan katapos han iya kamatay, pagkabanhaw, ngan pagsaka ha langit, hi Jesus nagpadayon sugad nga kan Jehova “saksi ha mga nasud.”

14, 15. (a) Paonan-o pinamatud-an ni Jesus an iya pagin “lider ngan kumander”? (b) Ano nga paglaom an ginhulat han siyahan-siglo nga mga sumurunod ni Jesus?

¹⁴ Hi Jesus magigin “lider ngan kumander” liwat. Sugad nga katumanan hinin matagnaon nga hulagway, han nakanhi pa ha tuna bug-os nga ginkarawat ni Jesus an mga responsabilidad han iya pagkaulo ngan nanguna ha ngatanan nga paagi, nga nagdadani hin damu gud nga mga tawo, gintututdoan hira han mga pulong nga kamatuoran, ngan iginpapakita an mga kaopayan nga naabot ngada hadton nasunod ha iya pagpanguna. (Mateo 4:24; 7:28, 29; 11:5) Epektibo nga ginbansay niya an iya mga disipulo, igin-aandam hira ha pagbuhat han pagsangyaw nga kampanya ha tidaraon. (Lukas 10:1-12; Buhat 1:8; Kolosas 1:23) Ha sulod la hin tulo ngan tunga ka tuig, naipahamutang ni Jesus an pundasyon han usa nga nagkakaurosa, internasyonal nga kongregasyon nga may yinukot nga mga membro nga nagtikang ha damu nga mga rasa! An totoo la nga “lider ngan kumander” an makakatuman han sugad kadaku nga buruhaton. b

¹⁵ Adton gintirok ngada ha siyahan-siglo nga Kristiano nga kongregasyon gindihogan han baraan nga espiritu han Dios, ngan may-ada hira paglaom nga magin kaupod ni Jesus sugad nga mga magmarando ha iya langitnon nga Ginhadian. (Pahayag 14:1) Kondi, an tagna ni Isaias naghisgot han lahos pa ha mga panahon han pagtikang han Kristianidad. Ipinapakita han ebidensya nga han 1914 la nagtikang magmando hi Jesus sugad nga Hadi han Ginhadian han Dios. Waray pag-iha katapos hito, nahitabo ha dinihogan nga mga Kristiano ha tuna an kahimtang nga may-ada damu nga kaparihoan ha kahimtang han bihag nga mga Judio han ikaunom ka siglo A.K.P. Ha pagkamatuod, an nahitabo hito nga mga Kristiano nagkukompuwesto han mas daku nga katumanan han tagna ni Isaias.

Pagkabihag Ngan Kagawasan ha Moderno nga Panahon

16. Ano nga kakurian an sinunod ha kahitrono ni Jesus han 1914?

¹⁶ An kahitrono ni Jesus sugad nga Hadi han 1914 gintigamnan han waray kapariho nga kakurian ha kalibotan. Kay ano? Tungod kay han magin Hadi na, ginpaiwas ni Jesus hi Satanas ngan an iba pa nga magraot nga espirituhanon nga mga linarang tikang ha langit. Han nakanhi na ha tuna, hi Satanas nagtikang makig-away ha nabibilin pa nga mga baraan, an nahisalin han dinihogan nga mga Kristiano. (Pahayag 12:7-12, 17) Inabot ha pungkay han 1918 han haros naundang an buruhaton nga pagsangyaw ha publiko ngan ginpriso an responsable nga mga opisyal han Watch Tower Society tungod han buwa nga mga akusasyon nga pag-aghat hin pagrebelde ha gobyerno. Hini nga paagi, an moderno nga mga surugoon ni Jehova nahingada ha pagkabihag ha espirituwal,  nga nagpapahinumdom han pisikal nga pagkabihag han kadaan nga mga Judio. Nag-antos hira hin duro nga pagtamay.

17. Paonan-o nabaliskad han 1919 an kahimtang han mga dinihogan, ngan paonan-o hira ginparig-on hito nga panahon?

¹⁷ Kondi, waray mag-iha an pagin bihag han dinihogan nga mga surugoon han Dios. Han Marso 26, 1919, ginpagawas an napriso nga mga opisyal, ngan ha urhi ginbalewaray an ngatanan nga mga akusasyon kontra ha ira. Iginbubo ni Jehova an baraan nga espiritu ngada ha iya nakagawas nga katawohan, ginpapakusog hira para ha tiarabot nga buruhaton. Malipayon nga ginkarawat nira an pagdapit nga ‘uminom han tubig han kinabuhi ha waray bayad.’ (Pahayag 22:17) Pinalit hira hin “alaksiw ngan hin gatas hin waray kwarta ngan waray bali” ngan naparig-on ha espirituwal tungod ha makatirigamnan nga pag-uswag nga mahitatabo, pag-uswag nga waray pa makita han dinihogan nga nanhibilin.

An Daku nga Panon Nadalagan Ngada ha mga Dinihogan han Dios

18. Ano an duha nga grupo han mga disipulo ni Jesu-Kristo, ngan ha ano hira nagkukompuwesto yana nga panahon?

¹⁸ Ginlalaoman han mga disipulo ni Jesus an usa han duha nga paglaom. Siyahan, gintirok an “gutiay nga panon” nga 144,000 an kadamu—dinihogan nga mga Kristiano nga nagtikang ha mga Judio ngan mga Hentil nga amo an ‘Israel han Dios’ ngan may-ada paglaom nga magmando upod ni Jesus ha iya langitnon nga Ginhadian. (Lukas 12:32; Galasia 6:16; Pahayag 14:1) Ikaduha, ha kataposan nga mga adlaw, nakita na “an daku nga panon” han “iba nga mga karnero.” Ini hira may-ada paglaom nga mabuhi hin waray kataposan ha paraiso nga tuna. Antes bumuto an daku nga kagol-anan, inin daku nga kadam-an—nga an kadamu diri pa hinbabaroan—nag-aalagad upod han gutiay nga panon, ngan ini nga duha nga grupo an nagkukompuwesto han “usa nga panon” ilarom han “usa nga paramangno.”—Pahayag 7:9, 10, NW; Juan 10:16, NW.

19. Paonan-o “an nasud” nga diri kilala hadto han Israel han Dios ginios ha panawagan hiton espirituwal nga nasud?

¹⁹ An pagtirok hinin daku nga panon mahimo masabtan ha masunod nga mga pulong han tagna ni Isaias: “Kitaa, imo tatawagon an nasud nga diri mo kinikilala; ngan an usa nga nasud nga diri nakilala ha imo madalagan ngada ha imo, tungod kan Jehova nga imo Dios, ngan tungod han baraan nga Usa ha Israel; kay hiya naghimaya ha imo.” (Isaias 55:5) Ha mga tuig katapos han ira pakagawas tikang ha espirituwal nga pagkabihag, an dinihogan nga nanhibilin waray anay pakasabot nga antes han Armagedon gagamiton hira ha pagtirok hin usa nga daku nga “nasud” ngada ha pagsingba kan Jehova. Kondi, samtang nalabay an panahon, damu nga mga tangkod-an-kasingkasing nga waray langitnon nga paglaom an nagtikang makig-upod ha mga dinihogan ngan mag-alagad kan Jehova nga may kadasig nga sugad han kanan mga dinihogan. Naobserbahan hinin bag-o nga nagkakaabot an mahimayaon nga kahimtang han katawohan han Dios, ngan ira kinilala nga hi Jehova kaupod nira. (Sakarias 8:23) Ha dekada han 1930, nasabtan han mga dinihogan an totoo nga pangirilal-an hini nga grupo, nga nagtitikadamu kaupod nira. Nahisabtan nira nga may maabot pa nga daku nga buruhaton ha pagtirok. An daku nga panon nagdadagmit ha pag-upod ha may kauyonan nga katawohan han Dios, ngan may-ada hira maopay nga hinungdan.

20. (a) Ha aton panahon, kay ano nga sadang mag-apura gud ha ‘pamiling kan Jehova,’ ngan paonan-o ini ginbubuhat? (b) Paonan-o magios hi Jehova ngada hadton namimiling ha iya?

²⁰ Ha panahon ni Isaias, ini an panawagan: “Pamilnga niyo hi Jehova samtang nga mahiaagian hiya; tawag kamo ha iya samtang nga hiya hiraniay.” (Isaias 55:6) Ha aton panahon, angayan ini nga mga pulong, para hadton nagkukompuwesto han Israel han Dios ngan para ha nagtitikadamu nga daku nga panon. An mga bendisyon ni Jehova may-ada kondisyon, diri man an iya imbitasyon magpapadayon ha waray kataposan. Yana na an panahon ha pangalimbasog nga pamilngon an pag-uyon han Dios. Kon umabot na an itinanda nga panahon para ha paghukom ni Jehova, magigin urhi na hinduro. Amo nga hi Isaias nagsiring: “Pabayaa an maraot han iya dalan, ngan an tawo nga diri matadong han iya mga hunahuna; ngan pabalika hiya kan Jehova, ngan hiya mamamay-ada kalooy ha iya; ngan ha aton Dios, kay hiya magpapasaylo hin damu gud.”—Isaias 55:7.

21. Paonan-o napamatud-an nga an nasud han Israel diri matinumanon ha iginpahayag han ira mga kaapoy-apoyan?

²¹ An mga pulong nga “pabalika hiya kan Jehova” nagpapasabot nga adton kinahanglan magbasol may-ada hadto relasyon ha Dios. Ito nga mga pulong nagpapahinumdom ha aton nga damu nga mga kahimtang hini nga bahin han tagna ni Isaias an siyahan nga naaplikar ha bihag nga mga Judio ha Babilonya. Mga siglo una pa, iginpahayag han mga kaapoy-apoyan hini nga mga bihag an ira determinasyon nga magin masinugtanon kan Jehova han hira nagsiring: “Imposible gud mahitabo nga amon bayaan hi Jehova basi mag-alagad ha iba nga mga dios.” (Josue 24:16, NW) Ipinapakita han kasaysayan nga an “imposible” nahitabo—hin pauroutro! An kakulang hin pagtoo han katawohan han Dios amo an hinungdan kon kay ano nga nagin mga bihag hira ha Babilonya.

22. Kay ano nga nasiring hi Jehova nga an iya mga panhunahuna ngan mga paagi mas hitaas kay han kanan mga tawo?

²² Ano an mahitatabo kon magbasol hira? Pinaagi kan Isaias, hi Jehova nagsaad nga hiya “magpapasaylo hin damu gud.” Ngan hiya nagdugang: “Kay an akon  mga hunahuna diri an iya mga hunahuna, diri man an iyo mga paagi an akon mga paagi, nasiring hi Jehova. Kay sugad nga an mga langit hiruhitaas kay han tuna, amo man an akon mga paagi hiruhitaas kay han iyo mga paagi, ngan an akon mga hunahuna kay han iyo mga hunahuna.” (Isaias 55:8, 9) Hi Jehova hingpit, ngan an iya mga panhunahuna ngan mga paagi diri gud maaabot an kahitaas. Bisan an kalidad han iya kalooy diri gud naton matutupngan sugad nga mga tawo. Hunahunaa ini: Kon ginpapasaylo naton an usa nga igkasi-tawo, pagpasaylo ito han usa nga makasasala ha usa nga makasasala liwat. Aton nasasantop nga may mga panahon nga nagkikinahanglan liwat kita han pagpasaylo han aton igkasi-tawo. (Mateo 6:12) Kondi hi Jehova, bisan kon diri gud hiya kinahanglan pasayloon, nagpapasaylo “hin damu gud”! Totoo gud nga hiya usa nga Dios nga may daku nga mahigugmaon-nga-pagkabuotan. Ngan ha iya kalooy, gin-aabrihan ni Jehova an mga tamboanan han mga langit, nagpapauran hin mga bendisyon ngada hadton bug-os-kasingkasing nga nabalik ha iya.—Malakias 3:10.

Mga Bendisyon Para Hadton Nabalik Ngadto kan Jehova

23. Paonan-o igin-iilustrar ni Jehova an pagkasigurado han katumanan han iya pulong?

²³ Hi Jehova nagsasaad ha iya katawohan: “Sugad nga an uran ngan an niebe nahuhulog tikang ha langit, ngan diri nabalik ngadto, kondi nahatag hin tubig ha tuna, ngan nakakapanurok ngan nakakapamiyoos hini, ngan nahatag hin liso ha magsarabwag ngan tinapay ha kumaraon; maaamo man an akon pulong nga magawas ha akon baba: diri ini mabalik ha akon nga kawang, kondi magtutuman hadton akon karuyag, ngan ini mauswag dida ha bagay ngain ko ini igpapadara.” (Isaias 55:10, 11) An ngatanan nga ginsisiring ni Jehova sigurado nga matutuman. Sugad la nga an uran ngan an niebe nga nagkakahulog tikang ha langit nagtutuman han katuyoan hito ha pagbisibis han tuna ngan pagpabunga hito, sugad man an pulong ni Jehova nga nagawas ha iya baba bug-os nga masasarigan. Kon ano an iya iginsasaad, iya tutumanon—nga may bug-os nga pagkasigurado.—Numeros 23:19.

24, 25. Ano nga mga bendisyon an nakaandam para ha bihag nga mga Judio nga ginios uyon ha mensahe ni Jehova pinaagi kan Isaias?

²⁴ Salit, kon pamation han mga Judio an matagnaon nga mga pulong nga iginpahayag ha ira pinaagi kan Isaias, sigurado nga makakarawat nira an kaluwasan nga iginsaad ni Jehova. Sugad nga resulta, maieksperyensyahan nira an daku nga kalipay. Hi Jehova nagsiring: “Kamo magawas nga may kahimongaya, ngan pagmamandoan nga may kamurayaw: an kabukiran ngan an kabungtoran manrarayhak ha pagkanta ha iyo atubangan; ngan an ngatanan nga kakahoyan ha kapunawangan magpapakpak han ira mga kamot. Ha lugar han tunok matubo an kahoy nga abeto; ngan ha lugar han sapinit matubo an kahoy nga mirtel: ngan ini maaamo kan Jehova an usa nga ngaran, usa nga tigaman nga dayon nga diri makukuha.”—Isaias 55:12, 13.

²⁵ Han 537 A.K.P., ginawas gud man nga malipayon an bihag nga mga Judio tikang ha Babilonya. (Salmo 126:1, 2) Pag-abot nira ha Jerusalem, nakita nira nga an tuna natatabonan hin madakmol hinduro nga katunokan ngan nakakatusok nga mga sapinit—hinumdumi nga an tuna binayaan hin mga dekada na. Kondi an nahibalik nga katawohan han Dios makakabulig yana ha pagpahinabo hin makaruruyag nga pagbag-o! An higtaas nga kakahoyan, sugad han abeto ngan mirtel, sinaliwan ha mga tunok ngan mga sapinit. Nakita dayon an mga bendisyon ni Jehova samtang an iya katawohan nag-aalagad ha iya nga ‘nanrarayhak ha pagkanta.’ Baga in an tuna mismo an nagrarayhak.

26. Ano nga binendisyonan nga kahimtang an ginpapahimulsan han katawohan han Dios yana?

²⁶ Han 1919 an nanhibilin han dinihogan nga mga Kristiano nakagawas tikang ha ira espirituwal nga pagkabihag. (Isaias 66:8) Kaupod an daku nga panon han iba nga mga karnero, malipayon nga nag-aalagad hira yana ha Dios ha espirituwal nga paraiso. Tungod kay waray na bisan ano nga mantsa han impluwensya han Babilonya, nagpapahimulos hira hin inuyonan nga kahimtang, nga magigin “usa nga ngaran” para kan Jehova. An ira espirituwal nga kauswagan naghihimaya han iya ngaran ngan nagpapasidungog ha iya sugad nga an Dios han totoo nga tagna. An gintuman ni Jehova para ha ira nagpapakita han iya pagka-Dios ngan nagpapamatuod han iya pagkamatinumanon ha iya pulong ngan han iya kalooy ha mga mabinasulon. Hinaot an ngatanan nga padayon nga “napalit hin alaksiw ngan hin gatas hin waray kwarta ngan waray bali” magkalipay ha pag-alagad ha iya ha kadayonan!

[Mga footnote]

[Mga Pakiana]