Magpabilin nga Marig-on, Ngan Magdaog ha Rumba Para ha Kinabuhi

KON kinahanglan mo magbiyahe ha mabalud nga kadagatan, ano nga klase hin sarakyan ha dagat an imo pipilion? Karuyag mo ba an gutiay nga baluto, o an marig-on, maopay an pagkahimo nga barko? Waray ruhaduha nga pipilion mo an barko, tungod kay mas epektibo nga malalamposan hito an peligroso nga mga balud.

Samtang naagi kita hinin mabalud ngan peligroso nga sistema han mga butang, naatubang kita hin mga ayat nga makakagwara han aton karig-on. Pananglitan, an mga batan-on usahay mahimo umabat hin kawurok ngan kawaray-kompyansa ha butnga han nakakagupong nga mga ideya ngan mga uso hini nga kalibotan. An mga indibiduwal nga nagtitikang pa la han ira pagkinabuhi sugad nga Kristiano bangin umabat pa gihapon hin pagruhaduha. Bisan an pipira nga marig-on nga mga tawo nga maiha na ha matinumanon nga pag-alagad ha Dios mahimo umatubang hin pagsari tungod kay an ira mga linalaoman diri pa bug-os nga natutuman.

Ito nga mga pagbati diri bag-o. An matinumanon nga mga surugoon ni Jehova, sugad kan Moises, Job, ngan David, nawad-an hin karig-on usahay. (Numeros 11:14, 15; Job 3:1-4; Salmo 55:4) Kondi, nakita ha ira paagi han pagkinabuhi an marig-on nga debosyon ngadto kan Jehova. An ira maopay nga susbaranan nag-aaghat ha aton nga magin marig-on liwat, kondi hi Satanas nga Yawa naruruyag nga mahisimang kita tikang ha rumba para ha kinabuhi nga dayon. (Lukas 22:31) Salit paonan-o kita makakapabilin nga maunungon, ‘marig-on ha pagtoo’? (1 Pedro 5:9) Ngan paonan-o naton mapaparig-on an aton mga igkasi-tumuroo?

Karuyag ni Jehova nga Magin Marig-on Kita

Kon matinumanon kita kan Jehova, pirme kita bubuligan niya nga matipigan an aton karig-on. Hi salmista David inatubang hin damu nga magkuri nga mga kahimtang, kondi naglaom hiya ha Dios ngan salit nakagkanta hiya: “Ginkuha ako [ni Jehova] tikang ha bubon nga makalilisang, tikang ha lapok; ngan iya ibinutang an akon tiil ha bawbaw han bato, ngan ginparig-on niya an akon mga biksal.”—Salmo 40:2.

Ginpaparig-on kita ni Jehova ha pakig-away “hin maopay nga pakig-away ha pagtoo” basi nga aton ‘madakop an kinabuhi nga waray kataposan.’ (1 Timoteo 6:12) Nagtatagana liwat hiya hin mga paagi basi makapabilin kita nga marig-on ngan magin madaugon ha aton espirituwal nga pakig-away. Hi apostol Pablo nagsagda ha mga igkasi-Kristiano nga ‘magmarig-on ha Ginoo, ngan ha kusog han iya gahum,’ ngan ‘magsul-ot han bug-os nga hinganiban han Dios basi nga maatubang nira an mga limbong han Yawa.’ (Efeso 6:10-17) Kondi ano an makakapaluya ha aton? Ngan paonan-o naton madidepensahan an aton kalugaringon kontra ha sugad nga peligroso ngan nakakapaluya nga mga butang?

Mag-ikmat ha Nakakapaluya nga mga Butang

Importante nga hinumdoman naton inin importante nga kamatuoran: Maabot an panahon nga an mga desisyon nga aton hinihimo makakaapekto ha aton karig-on sugad nga Kristiano ha positibo o negatibo man nga paagi. An mga batan-on naatubang hin mga desisyon may kalabotan ha mga butang sugad han propesyon, dugang nga edukasyon, ngan pag-asawa. An mga adulto bangin kinahanglan magdesisyon kon mabalhin ba hira ngadto ha iba nga  lugar o magkaada dugang nga trabaho. Nagdidesisyon kita kada adlaw may kalabotan ha paggamit han panahon ngan damu nga iba pa nga mga butang. Ano an mabulig ha aton nga maghimo hin maaramon nga mga desisyon nga makakaparig-on ha aton sugad nga mga surugoon han Dios? Usa nga maiha na nga Kristiano an nagsiring: “Naghahangyo ako han bulig ni Jehova kon nagdidesisyon ako. Natoo ako nga importante an pagkarawat ngan pag-aplikar han sagdon nga iginhahatag ha Biblia, ha Kristiano nga mga katirok, han mga tigurang, ngan ha mga publikasyon nga basado ha Biblia.”

Kon naghihimo hin mga desisyon, sadang naton pakianhan an aton kalugaringon: ‘Malilipay pa ba ako ha akon mga desisyon, o pagbabasulan ko ba ito paglabay hin lima o napulo ka tuig tikang yana? Nangangalimbasog ba ako ha pagsiguro nga an akon mga desisyon diri makakapaluya han akon espirituwalidad kondi makakabulig ha akon espirituwal nga pag-uswag?’—Filipos 3:16.

Tungod ha kaimpluwensyahi han mga pagsulay o pagtugot han ira kalugaringon nga magin duok ha pagtalapas ha mga balaud han Dios, an pipira nga bawtismado nga mga indibiduwal nagkaada diri marig-on nga kinabuhi. An pipira nga ginpaiwas tikang ha kongregasyon tungod han diri-mabinasulon nga pagpadayon ha makasasala nga pagkinabuhi nangalimbasog nga makabalik, ngan katapos ginpaiwas utro—usahay diri la maiha katapos paiwasa—tungod han pariho nga sayop nga buhat. Posible ba nga waray hira mag-ampo para han bulig han Dios nga ‘mangalas ha maraot ngan kumupkop ha maopay’? (Roma 12:9; Salmo 97:10) Kita ngatanan kinahanglan “padayon nga maghimo hin tadong nga mga dalan para ha [aton] mga tiil.” (Hebreo 12:13, NW) Salit aton tagdon an pipira nga mga punto nga makakabulig ha aton nga matipigan an espirituwal nga karig-on.

Magpabilin nga Marig-on Pinaagi han Kristiano nga Buruhaton

Usa nga paagi basi matipigan an padayon nga kalaksi ha aton rumba para ha kinabuhi amo an pagkaada damu nga buruhaton ha pagsangyaw han Ginhadian. Oo, an aton ministeryo sugad nga Kristiano usa nga birilhon nga bulig ha pagtipig han aton mga kasingkasing ngan mga hunahuna nga nakasentro ha pagbuhat han kaburut-on han Dios ngan ha balos nga kinabuhi nga waray kataposan. May kalabotan hini, ginsagda ni Pablo an mga taga-Korinto: “Mga hinigugma ko nga mga kabugtoan, magrig-on kamo, nga diri sadang mabantad, nga magpadayon kamo gihapon ha buruhaton han Ginoo, kay hinbaroan niyo nga an iyo kabudlay tungod ha Ginoo diri waray kapulsanan.” (1 Korinto 15:58) An ‘karig-on’ nangangahulogan hin ‘pagin permanente.’ An pagin “diri sadang mabantad” nangangahulogan hin ‘diri pagtugot han usa nga mahibulag tikang ha iya kinakaw-ingan.’ Salit, an pagin sagipo ha aton ministeryo mahimo magkamay-ada makaparig-on nga epekto ha aton Kristiano nga pagkinabuhi. An pagbulig ha iba nga mga tawo nga makilala hi Jehova naghahatag hin kahulogan ha aton kinabuhi ngan nagdadara ha aton hin kalipayan.—Buhat 20:35.

Hi Pauline, usa nga Kristiano nga naggasto na hin sobra 30 ka tuig sugad nga misyonera ngan ha iba nga bug-os-panahon nga pagsangyaw nga buruhaton, nasiring: “Usa nga panalipod an ministeryo tungod kay an pagsangyaw ha iba nagpaparig-on ha akon nga may-ada gud ako han kamatuoran.” An pariho hito nga pagtoo nagtitikang liwat ha regular nga pakigbahin ha iba nga mga buruhaton sugad nga Kristiano, pariho han pagtambong ha mga katirok para ha pagsingba ngan personal nga pag-aram ha Biblia ha maduruto nga paagi.

Napaparig-on Pinaagi han Mahigugmaon nga Pagminagburugto

An pagin bahin han bug-os-kalibotan nga organisasyon han totoo nga mga magsiringba may-ada gamhanan nga nagpaparig-on nga epekto ha aton. Usa gud nga bendisyon an pagin bahin han sugad mahigugmaon, bug-os-kalibotan nga pagminagburugto! (1 Pedro 2:17) Ngan mahimo kita makaparig-on ha aton mga igkasi-tumuroo.

Tagda an mabinuligon nga mga buhat han matadong nga tawo nga hi Job. Bisan an palso nga paraliaw nga hi Elipas napiritan ha pagkarawat: “An imo mga pulong nag-alang-alang ha iya nga napupukan, ngan imo ginhimo nga marig-on an magluya nga mga tuhod.” (Job 4:4) Mabinuligon ba kita ha iba? An tagsa ha aton may-ada responsabilidad ha pagbulig ha aton kabugtoan ha espirituwal nga makagpadayon ha pag-alagad ha Dios. Ha aton mga pakig-upod ha ira, mahimo kita gumios uyon ha kahulogan han mga pulong: “Pakusgon niyo an magluya nga mga kamot, ngan parig-ona an magluya nga mga tuhod.” (Isaias 35:3) Salit kay ano nga diri mo himoon nga tumong an pagparig-on ngan pagdasig ha usa o duha nga igkasi-Kristiano ha kada panahon nga kaupod mo hira? (Hebreo 10:24, 25) An makapadasig nga mga kumendasyon ngan pagpasalamat para han ira padayon nga mga pangalimbasog ha pagpalipay kan Jehova makakabulig gud  ha ira nga magpabilin nga marig-on nga may tumong nga magdaog ha rumba para ha kinabuhi.

Daku an mahihimo han Kristiano nga mga tigurang pinaagi han pagdasig ha mga bag-ohan. Mahihimo ini pinaagi han paghatag hin mapulsanon nga mga suhestyon ngan maopay nga sagdon tikang ha Kasuratan ngan pinaagi han pagbuhat kaupod ha ira ha ministeryo ha kanataran. Ginpahimulosan pirme ni apostol Pablo an mga higayon ha pagparig-on ha iba. Hingyap niya nga makita an mga Kristiano ha Roma basi makabulig hiya ha pagparig-on ha ira ha espirituwal. (Roma 1:11) Iya ginhunahuna an iya hinigugma nga kabugtoan ha Filipos sugad nga amo an iya “kalipayan ngan pudongpudong” ngan ginsagda hira nga ‘magpakarig-on hin sugad ha Ginoo.’ (Filipos 4:1) Han hinbatian an mga kakurian han iya kabugtoan ha Tesalonika, sinugo ni Pablo hi Timoteo ha ‘pagparig-on ha ira ngan pagpalipay ha ira, basi waray usa nga masamokan hini nga mga kagol-anan.’—1 Tesalonika 3:1-3.

Kinilala ngan inapresyar nira apostol Pablo ngan Pedro an matinumanon nga mga pangalimbasog han ira mga igkasi-magsiringba. (Kolosas 2:5; 1 Tesalonika 3:7, 8; 2 Pedro 1:12) Ha sugad man nga paagi aton isentro an aton pagtagad, diri ha mga kaluyahan han aton kabugtoan, kondi ha ira mag-opay nga mga kalidad ngan ha ira malampuson nga pakig-away basi magpabilin nga marig-on ngan magdayaw kan Jehova.

Kon negatibo kita o kritiko, bangin diri tinuyo nga mas mapakurian naton an iba nga magpabilin nga marig-on ha pagtoo. Angayan gud nga hinumdoman nga hini nga sistema han mga butang an aton kabugtoan “nanluluya ngan nagpapatlaag”! (Mateo 9:36) Sadang hira makaagi hin pagliaw ngan kapahuwayan ha Kristiano nga kongregasyon. Salit, hinaot buhaton naton ngatanan an aton gimaopayi basi maparig-on an aton mga igkasi-tumuroo ngan buligan hira nga magpabilin nga marig-on.

Usahay bangin tratuhon kita han iba ha paagi nga makakapaluya han aton karig-on. Aton ba tutugotan an maraot nga komento o diri-maloloy-on nga buhat nga magpahinay ha aton pag-alagad kan Jehova? Hinaot diri gud naton tugotan an bisan hin-o nga magpaluya han aton karig-on!—2 Pedro 3:17.

Mga Saad han Dios—Usa ka Makaparig-on nga Impluwensya

An saad ni Jehova mahitungod han maopay hinduro nga tidaraon ilarom han pagmando han Ginhadian naghahatag ha aton hin paglaom nga nabulig ha aton nga matipigan an aton karig-on. (Hebreo 6:19) Ngan an pagtoo nga pirme gintutuman han Dios an iya mga saad nagpapagios ha aton nga ‘magpabilin nga nagmamata ngan marig-on ha pagtoo.’ (1 Korinto 16:13, NW; Hebreo 3:6) An baga hin paglangan ha katumanan han pipira han mga saad han Dios mahimo makagsari han aton pagtoo. Salit importante gud nga magbantay kita nga diri malimbongan han palso nga mga katutdoan ngan maipahirayo tikang ha aton paglaom.—Kolosas 1:23; Hebreo 13:9.

An maraot nga ehemplo han mga Israelita nga nagkamatay tungod kay waray hira pagtoo ha mga saad ni Jehova sadang magin pahamangno para ha aton. (Salmo 78:37) Imbes nga magin pariho ha ira, hinaot magin marig-on kita, nag-aalagad ha Dios nga may pagkaapurado durante hinin kataposan nga mga adlaw. “Nagkikinabuhi ako kada adlaw nga sugad hin an daku nga adlaw ni Jehova maabot buwas,” nagsiring an usa nga eksperyensyado nga tigurang.—Joel 1:15.

Oo, hirani na an daku nga adlaw ni Jehova. Kondi, waray kita sadang ikahadlok samtang nagpapabilin kita nga duok ha Dios. Kon determinado nga sundon naton an iya matadong nga mga suruklan ngan magpabilin nga marig-on, malampuson nga madadalagan naton an rumba para han kinabuhi nga dayon!—Proberbios 11:19; 1 Timoteo 6:12, 17-19.

[Retrato ha pahina 23]

Ginbubuhat mo ba an ngatanan nga imo mahihimo ha pagbulig ha mga igkasi-Kristiano nga magpabilin nga marig-on?

[Ginkuhaan han Retrato ha pahina 21]

The Complete Encyclopedia of Illustration/J. G. Heck