Mga Pakiana Tikang ha mga Magbarasa

Kay ano nga An Barantayan han Abril 1, 2002, ha pahina 11, parapo 7, nasiring nga an bawtismo ha tubig han bag-o nga mga tumuroo nga Judio han Pentekostes 33 K.P. nagsimbolo han “ira personal nga dedikasyon ha Dios pinaagi kan Kristo,” samtang gintoohan ito hadto nga an bawtismo han mga Judio tikang han 33 K.P. tubtob han 36 K.P. waray magkinahanglan han sugad nga personal nga dedikasyon?

Han 1513 A.K.P., gintagan ni Jehova nga Dios an mga Israelita hin higayon nga magin iya baraan nga nasud kon ira ‘sugton hin ungod an iya tingog ngan pagbantayan an iya kauyonan.’ Hira binaton: “An ngatanan nga iginyakan ni Jehova amon bubuhaton.”—Eksodo 19:3-8; 24:1-8.

Pinaagi han pag-uyon nga tumanon an kauyonan han Mosaiko nga Balaud, igindedikar han mga Israelita an ira kalugaringon ngadto ha Dios. An sumunod nga mga henerasyon han mga Judio natawo dinhi hinin dedikado nga nasud. Kondi, an bawtismo han mga Judio nga nagin mga sumurunod ni Jesu-Kristo tikang han Pentekostes 33 K.P. padayon nag-upod hin labaw pa kay han pagpresenta la han ira kalugaringon ngadto ha Dios sugad nga mga membro han usa nga dedikado nga nasud. Nagsimbolo ito han ira dedikasyon kan Jehova nga Dios ha bag-o nga relasyon ha iya pinaagi kan Jesu-Kristo. Paonan-o?

Katapos han pagbubo han baraan nga espiritu ha mga 120 nga disipulo nga nagkatirok ha igbaw nga kuwarto ha Jerusalem han Pentekostes 33 K.P., hi apostol Pedro tinukdaw ngan nagtikang pagsangyaw ha damu hinduro nga mga Judio ngan mga proselita nga nagkatirok ha pagkita kon ano an nahitabo. Katapos maghatag hin maopay nga pagpamatuod, hiya nagsiring ha nakukonsensya nga mga Judio: “Magbasol kamo, ngan magpabaptis an tagsatagsa ha iyo ha ngaran ni Jesu-Kristo, ha pagpasaylo han iyo mga sala.” Sugad nga paggios uyon ha dugang nga pagsagda ni Pedro, “adton mga kinarawat hin malipayon han iya pulong, nagkababaptisan; ngan may igindugang ha ira hadto nga adlaw nga tulo ka yukot nga mga kalag.”—Buhat 2:1-41.

Diri ba adton mga Judio nga nabawtismohan katapos han pagsagda ni Pedro mga membro na han usa nga dedikado nga nasud? Diri ba hira nagpapahimulos na hin dedikado nga relasyon ha Dios? Oo. Nagsurat hi apostol Pablo nga ‘ginkuha na han Dios an Balaud pinaagi han pagraysanga hito ha pasakitan nga kahoy.’ (Kolosas 2:14, NW) Pinaagi han kamatayon ni Kristo han 33 K.P., ginkuha ni Jehova nga Dios an Balaud nga kauyonan—an basihanan mismo han pagdad-a han mga Israelita ngadto ha dedikado  nga relasyon ha Iya. An nasud nga nagsalikway han Anak han Dios, iginsalikway yana han Dios mismo. ‘An Israel sumala ha lawasnon nga paagi’ diri na makakasiring nga nasud ito nga dedikado ngadto ha Dios.—1 Korinto 10:18; Mateo 21:43.

An Balaud nga kauyonan ginkuha han 33 K.P., kondi an peryodo han Dios para han espesyal nga pag-uyon ngan atensyon ha mga Judio waray matapos hito nga panahon. a Ito nga peryodo magpapadayon pa tubtob han 36 K.P., han nagsangyaw hi Pedro ha debotado nga Italyano nga hi Cornelio ngan ha iya panimalay sugad man ha iba nga mga Hentil. (Buhat 10:1-48) Ano an basihanan para hinin pagpadayon han pabor?

“[An Mesias] maghihimo hin kauyonan nga marig-on ha kadam-an ha usa ka semana,” siring han Daniel 9:27. An kauyonan nga iginpatuman ha sulod hin pito ka tuig, o “usa ka semana,” tikang ha bawtismo ni Jesus ngan ha tinikangan han pagministeryo ha publiko han Mesias han 29 K.P. amo an Abrahamiko nga kauyonan. Basi magin kaapi hiton may kauyonan nga relasyon, an usa ka tawo kinahanglan magin tulin ni Abraham. Ito nga unilateral nga kauyonan waray maghatag ha indibiduwal hin dedikado nga relasyon kan Jehova. Salit, an Judio nga mga tumuroo nga nagpabawtismo katapos han pahayag ni Pedro han Pentekostes 33 K.P., bisan kon kinarawat hin espesyal nga pagtagad sugad nga natural nga mga Judio, diri makakasiring nga may-ada hira dedikado nga relasyon ha Dios kon kuhaon na an Balaud nga kauyonan. Kinahanglan personal nga igdedikar nira an ira kalugaringon ngadto ha Dios.

An personal nga dedikasyon ha bahin han mga Judio ngan mga proselita nga nagpipresenta han ira kalugaringon ha pagpabawtismo ha adlaw han Pentekostes 33 .K.P. importante tungod han usa pa nga hinungdan. Ginsagda ni apostol Pedro an iya mga mamarati nga magbasol ngan magpabawtismo ha ngaran ni Jesus. An pagbuhat hito nagkinahanglan nga bayaan nira an paagi han kalibotan ngan kilalahon hi Jesus sugad nga Ginoo ngan Mesias, sugad nga Hitaas nga Saserdote, ngan sugad nga usa nga nalingkod ha too nga kamot han Dios ha langit. Kinahanglan tawagon nira an ngaran ni Jehova nga Dios para han kaluwasan pinaagi kan Jesu-Kristo, nga nag-upod han pagtoo kan Kristo ngan pagkilala ha iya sugad nga ira Lider. An bug-os nga basihanan ha pagkaada relasyon ha Dios ngan pagkarawat hin kapasayloan han mga sala nagbag-o na yana. Sugad nga mga indibiduwal, kinahanglan karawaton han matinoohon nga mga Judio ini nga bag-o nga kahikayan. Paonan-o? Pinaagi han pagdedikar ngadto ha Dios ngan pinaagi han pagpahayag ha publiko nga nagbuhat hira hito nga dedikasyon pinaagi han bawtismo ha tubig ha ngaran ni Jesu-Kristo. An bawtismo ha tubig usa nga simbolo han ira dedikasyon ngadto ha Dios, nagdadara ha ira ngada ha bag-o nga relasyon ha iya pinaagi kan Jesu-Kristo.—Buhat 2:21, 33-36; 3:19-23.

[Footnote]