Pamati ha Ginsisiring han Espiritu!

“An may-ada talinga, papamatia kon ano an ginsisiring han espiritu ngadto ha mga singbahan.”—PAHAYAG 3:22.

1, 2. Ano nga sagdon an gin-utro mahitungod han mga mensahe ni Jesus ngadto ha pito nga kongregasyon nga gin-unabi ha Pahayag?

 KINAHANGLAN tagdon han mga surugoon ni Jehova an giniyahan-han-espiritu nga mga pulong ni Jesu-Kristo ha pito nga kongregasyon nga gin-unabi ha libro han Biblia nga Pahayag. Oo, an tagsa hini nga mga mensahe may-ada hini nga sagdon: “An may-ada talinga, papamatia hiya kon ano an ginsisiring han espiritu ngadto ha mga singbahan [“kongregasyon,” NW].”—Pahayag 2:7, 11, 17, 29; 3:6, 13, 22.

² Ginhisgotan na naton an mga mensahe ni Jesus ha mga anghel, o mga paramangno, ha Efeso, Smirna, ngan Pergamo. Paonan-o kita magpapahimulos tikang ha iya ginsiring pinaagi han baraan nga espiritu ngadto ha upat pa nga kongregasyon?

Ha Anghel ha Tiatira

 3. Diin nahimutang an Tiatira, ngan bantogan ito labi na ha ano nga produkto?

³ “An Anak han Dios” naghatag hin kumendasyon ngan pagsaway ha kongregasyon ha Tiatira. (Basaha an Pahayag 2:18-29.) An Tiatira (Akhisar na yana) nahimutang ha ligid han usa nga sapa nga tipakadto ha Salog Gedis (kadaan nga Hermos) ha weste nga Asia Minor. An siyudad bantogan ha damu nga mga produkto nga hinimo-han-kamot. An mga parahimo hin tina hito nga siyudad nagamit hin gamot han herba nga Rubia sugad nga surok han ira bantogan nga eskarlata, o purpura. Hi Lydia, nga nagin Kristiano durante han pagbisita ni Pablo ha  Filipos ha Gresya, usa nga “parabaligya hin purpura, nga taga-bungto han Tiatira.”—Buhat 16:12-15.

 4. Kay ano nga tinagan hin kumendasyon an kongregasyon ha Tiatira?

⁴ Tinagan ni Jesus hin kumendasyon an kongregasyon ha Tiatira tungod han maopay nga mga buhat, gugma, pagtoo, pagpailob, ngan buruhaton ha ministeryo hito. Ha pagkamatuod, ‘an ira urhi nga mga buhat labi pa kay han siyahan.’ Kondi, bisan kon may-ada kita maopay nga rekord han aton mga nahimo, kinahanglan diri gud naton pasibay-an an mahitungod han aton moral.

5-7. (a) Hin-o “an babaye nga hi Jesebel,” ngan ano an kinahanglan pagbuhaton mahitungod han iya impluwensya? (b) An mensahe ni Kristo ha kongregasyon ha Tiatira nabulig ha diosnon nga kababayin-an nga buhaton an ano?

⁵ Gintugotan han kongregasyon ha Tiatira an idolatriya, palso nga katutdoan, ngan seksuwal nga imoralidad. Kaupod nira “an babaye nga hi Jesebel”—bangin usa ka grupo han kababayin-an nga may-ada mga kinaiya nga pariho hadton ha maraot nga hi Rayna Jesebel han napulo-ka-tribo nga Ginhadian han Israel. An iba nga mga eskolar nasiring nga an ‘mga propetisa’ han Tiatira nagsari ha pagdani ha mga Kristiano nga magsingba ha mga dios ngan mga diosa han komersyo ngan trabaho ngan makigbahin ha mga piyesta diin may-ada mga pagkaon nga iginhalad ha mga idolo. Diri sadang tugotan an bisan hin-o nga naghihimo han iya kalugaringon nga magin propetisa nga manguna ha iba dida ha Kristiano nga kongregasyon yana!

⁶ Kan Kristo ‘ibubutang ha higdaan an babaye nga hi Jesebel, ngan an mga nagpanlibog ha iya ha daku nga kakurian, kon diri hira magbasol han iya mga buhat.’ An mga paramangno diri gud sadang sumunod ha sugad maraot nga katutdoan ngan impluwensya, ngan waray Kristiano nga sadang magbuhat hin espirituwal ngan pisikal nga pornikasyon o magbuhat hin idolatriya basi la hibaroan nga an “higlarom nga mga bagay ni Satanas” bug-os nga maraot. Kon sundon naton an pahamangno ni Jesus, ‘babantayan naton an aada ha aton,’ ngan an sala diri magmamando ha aton. Tungod kay ira iginsalikway an diri-diosnon nga mga buhat, mga kalaw-ayan, ngan mga hingyap, an binanhaw nga mga dinihogan nakarawat hin “kagamhanan ha mga nasud” ngan maupod kan Kristo ha pagbungkag han mga nasud. An mga kongregasyon yana may-ada simboliko nga mga bitoon, ngan an mga dinihogan tatagan han ‘masilaw nga bitoon ha kaagahon,’ an Nobyo, hi Jesu-Kristo, kon banhawon na hira ngadto ha langit.—Pahayag 22:16.

⁷ An kongregasyon ha Tiatira ginpahamangnoan nga diri tugotan an maraot nga impluwensya han apostata nga kababayin-an. An inspirado-han-espiritu nga mensahe ni Kristo ha kongregasyon nabulig ha diosnon nga kababayin-an nga tipigan an ira igintoka-han-Dios nga lugar yana. Diri hira nangangalimbasog nga magkaada awtoridad ha kalalakin-an ngan diri nagsusulay ha bisan hin-o nga kabugtoan nga kalalakin-an nga magbuhat hin espirituwal o pisikal nga pakighilawas. (1 Timoteo 2:12) Lugod, an sugad nga kababayin-an nagpapakita hin maopay nga susbaranan pinaagi han mag-opay nga mga buhat ngan pag-alagad para ha kadayawan han Dios. (Salmo 68:11; 1 Pedro 3:1-6) Kon an kongregasyon nagbabantay ha kon ano an aada hito—putli nga doktrina ngan paggawi ngan birilhon nga pag-alagad ha Ginhadian—maabot hi Kristo nga may-ada mag-opay hinduro nga mga balos, diri pagpatay.

Ha Anghel ha Sardis

 8. (a) Diin nahimutang an Sardis, ngan ano an pipira nga mga impormasyon mahitungod hito? (b) Kay ano nga an kongregasyon ha Sardis nagkinahanglan hin bulig?

⁸ An kongregasyon ha Sardis nagkinahanglan hin apurado nga bulig tungod kay patay ito ha espirituwal. (Basaha an Pahayag 3:1-6.) Nahimutang mga 50 kilometro ha sur han Tiatira, an Sardis usa nga mainuswagon nga siyudad. An komersyo, an pagkamabungahon han tuna, ngan an paghimo hin de-lana nga tela ngan mga alpombra nakabulig nga magin bahandianon ito nga siyudad nga may-ada hadto mga 50,000 nga umurukoy. Sumala ha historyador nga hi Josephus, an Sardis may-ada daku nga Judio nga komunidad han siyahan nga siglo A.K.P. Kaupod ha mga naguba ha siyudad amo an usa nga sinagoga  ngan usa nga templo han diosa han Efeso nga hi Artemis.

 9. Ano an sadang buhaton kon rutina la an aton mga buruhaton ha pag-alagad?

⁹ Hi Kristo nagsiring ha anghel han kongregasyon ha Sardis: “Maaram ako han imo mga buhat, nga may-ada mo ngaran, nga nabubuhi ka, ngan patay ka.” Ano man kon may-ada kita reputasyon han pagin espirituwal nga tawo kondi diri kita interesado ha mga pribilehiyo han Kristiano nga pag-alagad ngan rutina la an aton mga buruhaton ha pag-alagad, ngan ha espirituwal “andam na mamatay”? Niyan kinahanglan naton ‘hinumdoman kon mationan-o naton kinarawat ngan hinbatian’ an mensahe han Ginhadian, ngan sadang parig-unon naton utro an aton mga pangalimbasog ha sagrado nga pag-alagad. Kinahanglan gud nga tikangan naton an kinasingkasing nga pakigbahin ha Kristiano nga mga katirok. (Hebreo 10:24, 25) Hi Kristo nagpahamangno ha kongregasyon ha Sardis: “Kon diri ka mag-agma, makanhi ako sugad hin kawatan, ngan diri ka maaram kon ano nga oras an akon ikakanhi ha imo.” Naaplikar ba ini nga pahamangno ha aton panahon? Diri na mag-iiha maatubang kita hin pakighusay.

10. Bisan ha kahimtang nga pariho han ha Sardis, ano an mahimo mahitabo liwat ha pipira nga mga Kristiano?

¹⁰ Bisan ha kahimtang nga pariho han ha Sardis, bangin may-ada pipira nga ‘waray maghugaw han ira mga panapton ngan naglalakat upod ni Kristo nga nagpapanapton hin busag kay hira mga takos.’ Ira gintitipigan an ira Kristiano nga pangirilal-an, nagpapabilin nga waray hugaw, waray buring ha moral ngan ha relihiyon tikang hini nga kalibotan. (Jakobo 1:27) Salit, hi Jesus ‘diri magpapanas han ira mga ngaran tikang ha basahon han kinabuhi, kondi iya igtutug-an an ira ngaran ha atubangan han iya Amay ngan han mga anghel.’ Tungod kay iginpahayag nga takos maglakat upod ni Kristo, an iya nobya nga klase han mga dinihogan pagpapanaptonan hin masilaw, limpyo, maopay nga lino nga nagsisimbolo han matadong nga mga buhat han mga baraan han Dios. (Pahayag 19:8) An urusahon nga mga pribilehiyo han pag-alagad nga naghuhulat ha ira ha langit nagdadasig ha ira nga daugon ini nga kalibotan. Igin-aandam liwat an mga bendisyon para hadton may paglaom nga magkaada waray kataposan nga kinabuhi ha tuna. An ira mga ngaran nanhisurat liwat ha basahon han kinabuhi.

11. Ano an sadang buhaton naton kon nahingangaturog kita ha espirituwal?

¹¹ Waray bisan hin-o ha aton nga karuyag mahingada ha makasurubo nga espirituwal nga kahimtang han kongregasyon ha Sardis. Kondi ano man kon nasasabtan naton nga nahingangaturog kita ha espirituwal? Sadang gumios kita dayon para ha aton kaopayan. Pananglitan nadadani kita ha diri-diosnon nga mga paagi o nagigin diri-aktibo na ha pagtambong ha mga katirok o ha aton ministeryo. Hangyoon naton an bulig ni Jehova ha sinsero nga pag-ampo. (Filipos 4:6, 7, 13) An adlaw-adlaw nga pagbasa han Biblia ngan pag-aram ha Kasuratan ngan mga publikasyon han ‘matinumanon nga tinaporan’ makakabulig ha aton espirituwal nga pag-agma. (Lukas 12:42-44) Niyan magigin pariho kita hadton ha Sardis nga nagkaada han pag-uyon ni Kristo, ngan magigin bendisyon kita ha mga igkasi-tumuroo.

Ha Anghel ha Piladelpia

12. Paonan-o mo isasaysay an kahimtang han relihiyon ha kadaan nga Piladelpia?

¹² Tinagan ni Jesus hin kumendasyon an kongregasyon ha Piladelpia. (Basaha an Pahayag 3:7-13.) An Piladelpia (Alasehir na yana) amo an mainuswagon nga sentro han rehiyon nga naghihimo hin alaksiw ha weste nga Asia Minor. Ha pagkamatuod, an punoan nga dios hito amo hi Dionysus, an dios han alaksiw. Matin-aw, an mga Judio ha Piladelpia waray maglampos ha pagsari ha pagkombinse ha Judio nga mga Kristiano didto nga magpabilin ha pipira nga mga buhat nga uyon ha Mosaiko nga Balaud o bumalik ngada hito.

13. Paonan-o ginamit ni Kristo “an yawi ni David”?

¹³ Hi Kristo ‘may-ada han yawi ni David,’ salit igintapod ha iya an ngatanan nga mga interes han Ginhadian ngan an pagdumara ha panimalay han pagtoo. (Isaias 22:22; Lukas 1:32) Ginamit ni Jesus iton nga yawi ha pag-abri han mga higayon ngan mga pribilehiyo may kalabotan ha Ginhadian, ha mga Kristiano ha kadaan nga Piladelpia ngan ha bisan diin. Tikang han 1919 inabrihan niya ha atubangan han ‘matinumanon nga tinaporan’ an “daku nga ganghaan” nga nagtutugway ngadto ha pagsangyaw han Ginhadian nga waray parakontra nga makakasada. (1 Korinto 16:9; Kolosas 4:2-4) Syempre, an ganghaan ngadto ha mga pribilehiyo may kalabotan ha Ginhadian ginsadhan na para hadton ha “sinagoga ni Satanas,” tungod kay diri hira espirituwal nga mga Israelita.

14. (a) Ano an iginsaad ni Jesus ha kongregasyon ha Piladelpia? (b) Paonan-o naton malilikyan an kahulog durante han “oras han pagsulay”?

 ¹⁴ Iginhatag ni Jesus ha mga Kristiano ha kadaan nga Piladelpia ini nga saad: “Kay ginbantayan mo an pulong han akon pagpailob, pagbabantayan ko man liwat ikaw ha oras han pagsulay, an oras nga tiarabot ha bug-os nga kalibotan.” An pagsangyaw nagkikinahanglan hin klase han pagpailob nga ipinakita ni Jesus. Waray gud hiya magpadaog ha kaaway kondi nagpadayon ha pagbuhat han kaburut-on han iya Amay. Salit, ginbanhaw hi Kristo ngadto ha diri-mamaratyon nga kinabuhi ha langit. Kon nagpapabilin kita nga marig-on ha aton desisyon ha pagsingba kan Jehova ngan sinusuportahan naton an Ginhadian pinaagi han pagsangyaw han maopay nga sumat, diri kita mahuhulog durante han presente nga peryodo han pagsari, “an oras han pagsulay.” Kita ‘magpapadayon ha pagkapot hin marig-on han aada ha aton’ tikang kan Kristo pinaagi han pangalimbasog ha pagpauswag hiton nga mga interes han Ginhadian. An pagbuhat hini magriresulta ha presyoso hinduro nga langitnon nga pudongpudong para ha mga dinihogan ngan kinabuhi nga waray kataposan ha tuna para han ira maunungon nga mga kaupod.

15. Ano an ginkikinahanglan ha magigin ‘mga harigi ha templo han Dios’?

¹⁵ Hi Kristo nagdudugang: “An makadaog, hihimoon ko hiya nga harigi ha templo han akon Dios, . . . ngan susuratan ko hiya han ngaran han akon Dios, an bag-o nga Jerusalem, nga nalusad ha langit tikang ha akon Dios, ngan han akon kalugaringon nga bag-o nga ngaran.” Kinahanglan parig-unon han dinihogan nga mga paramangno an totoo nga  pagsingba. Kinahanglan magpabilin hira nga kuwalipikado nga mga membro han “bag-o nga Jerusalem” pinaagi han pagsangyaw mahitungod han Ginhadian han Dios ngan pagpabilin nga limpyo ha espirituwal. Kinahanglanon ini kon karuyag nira nga magin mga harigi ha ginhimaya nga langitnon nga templo ngan kon karuyag nira nga magkaada han ngaran han siyudad han Dios sugad nga langitnon nga mga tuminungnong hito, ngan makiangbit ha ngaran ni Kristo sugad nga iya nobya. Ngan syempre, kinahanglan may-ada hira mga talinga nga ‘namamati ha ginsisiring han espiritu ha mga kongregasyon.’

Ha Anghel ha Laodisea

16. Ano an pipira nga mga impormasyon mahitungod han Laodisea?

¹⁶ Ginsaway ni Kristo an kampante na nga kongregasyon ha Laodisea. (Basaha an Pahayag 3:14-22.) Mga 150 kilometro ha este han Efeso ngan nahimutang ha ginkadugtungan han dagku nga mga ruta han negosyo ha mabungahon nga walog han Salog Laykos, an Laodisea usa ka mainuswagon hinduro nga siyudad nga may mga pabrika ngan sentro han negosyo han pagbangko. Bantogan an mga panapton nga hinimo ha itom nga de-lana hito nga lugar. Tungod kay nahimutang didto an usa nga bantogan nga eskwelahan han medisina, posible nga an Laodisea an naghimo han medisina ha mata nga tinatawag nga Pregiano nga pulbos. Hi Asclepius, nga dios han medisina, amo an usa han nangunguna nga mga dios han siyudad. An Laodisea baga in may-ada daku nga populasyon han mga Judio, nga an iba ha ira mga bahandianon.

17. Kay ano nga ginsaway an mga taga-Laodisea?

¹⁷ Ha pagyakan ha kongregasyon ha Laodisea pinaagi han “anghel” hito, may awtoridad nga nagyayakan hi Jesus sugad nga “an matinumanon ngan matuod nga testigo, an tinikangan han mga binuhat han Dios.” (Kolosas 1:13-16) Ginsaway an mga taga-Laodisea tungod ha pagin “diri mataghom ngan diri man mapaso” ha espirituwal. Tungod kay hira malanhod, itutupra hira ni Kristo tikang ha iya baba. Diri gud unta makuri masabtan nira ito nga ilustrasyon. An kahirani nga Hierapolis may-ada mapaso nga mga burabod, ngan matugnaw an tubig ha Kolosas. Kondi, tungod kay an tubig kinahanglan umagi ha mga tubo ngadto ha hirayo nga Laodisea, posible nga malanhod na ito pag-abot ha siyudad. Ha dalan, naagi ito ha imburnal. Samtang nagtitikahirani ha Laodisea, naagi ito ha binuhoan nga mga bato nga ginsemento.

18, 19. Paonan-o mabubuligan an mga Kristiano yana nga pariho hadton ha Laodisea?

¹⁸ An mga indibiduwal yana nga pariho han mga taga-Laodisea diri mapaso nga nakakapadasig, diri liwat matugnaw nga nakakarepresko. Pariho han malanhod nga tubig, itutupra hira! Diri karuyag ni Jesus nga hira magin tagapagyakan niya, sugad nga dinihogan nga “mga embahador nga kasaliwan ni Kristo.” (2 Korinto 5:20, NW) Kon diri hira magbasol, mawawara nira an ira pribilehiyo sugad nga mga parasamwak han Ginhadian. An mga taga-Laodisea namiling hin tunan-on nga bahandi ngan ‘diri maaram nga hira mahangol ngan makalolooy ngan kablasanon, ngan buta ngan hubo.’ Basi mawara an ira espirituwal nga kakablas, pagin buta, ngan pagin hubo, an bisan hin-o nga pariho ha ira yana kinahanglan pumalit tikang kan Kristo hin ‘bulawan nga ginputli han kalayo’ han nasarihan nga pagtoo, hin “mga busag nga mga panapton” han pagkamatadong, ngan “tambal nga ighihirog ha mata” nga nagpapauswag han espirituwal nga panan-aw. An Kristiano nga mga paramangno nalilipay ha pagbulig ha ira nga magin mahunahunaon han ira espirituwal nga panginahanglan basi hira magin “manggaranon ha pagtoo.” (Jakobo 2:5; Mateo 5:3) Dugang pa, kinahanglan buligan hira han mga paramangno nga maghirog hin “tambal nga ighihirog ha mata”—kumarawat ngan magpahiuyon ha katutdoan, sagdon, susbaranan ngan panhunahuna ni Jesus. Ini an nagtatambal kontra han “mga hingyap han unod ngan hingyap han mga mata ngan paghambog han mga katigayonan ha kinabuhi han usa.”—1 Juan 2:15-17, NW.

¹⁹ Ginsasaway ngan dinidisiplina ni Jesus adton iya hinigugma. An mga paramangno nga sakop niya kinahanglan magbuhat liwat hito ha mapinairon nga paagi. (Buhat 20:28, 29) An mga taga-Laodisea kinahanglan “magin madasigon ngan magbasol,” ginbabag-o an ira panhunahuna ngan paagi han pagkinabuhi. Bueno, nahiara na ba an iba ha aton ha estilo han pagkinabuhi nga nagmiminos han aton sagrado nga pag-alagad ha Dios ngadto ha pagin diri na importante ha kinabuhi? Niyan, kinahanglan ‘pumalit kita han tambal nga ighihirog ha mata tikang kan Jesus’ basi makita naton an pagkaimportante han madasigon nga pamiling siyahan han Ginhadian.—Mateo 6:33.

20, 21. Hin-o an nabaton hin husto ha ‘pagtuktok’ ni Jesus yana, ngan ano an ira mga ginlalaoman?

²⁰ “Kitaa,” siring ni Kristo, “ako nabakdaw ha purtahan ngan nagtutuktok: kon may-ada namamati ha  akon tingog ngan abrihan iton nga purtahan, masulod ako ha iya, ngan makaon upod ha iya, ngan hiya upod ha akon.” Hi Jesus agsob nga naghahatag hin espirituwal nga instruksyon samtang nakigbahin hiya ha pangaon. (Lukas 5:29-39; 7:36-50; 14:1-24) Nagtutuktok na hiya yana ha purtahan han kongregasyon nga pariho han ha Laodisea. Mabaton ba an mga membro hito ha iya pagtuktok, paririg-unon utro an ira gugma ha iya, kakarawaton hiya ha butnga nira, ngan tutugotan hiya nga tutdoan hira? Kon amo, hi Kristo makaon upod nira, nga magriresulta ha ira daku nga espirituwal nga kapulsanan.

²¹ An ‘iba nga mga karnero’ yana simboliko nga nakarawat kan Jesus, ngan an sugad nga buhat nagtutugway ngadto ha kinabuhi nga waray kataposan. (Juan 10:16; Mateo 25:34-40, 46) Ha tagsa nga magdaraog nga dinihogan, ihahatag ni Kristo an pribilehiyo han ‘paglingkod upod niya ha iya trono, sugad la han iya pagdaog ngan paglingkod upod han iya Amay ha Iya trono.’ Oo, ngada ha dinihogan nga mga magdaraog, hi Jesus nagsasaad hin urusahon nga balos nga usa ka trono upod niya ha too han iya Amay ha langit. Ngan an magdaraog nga iba nga mga karnero nagpapamulat han urusahon nga lugar dinhi ha tuna ilarom han pagmando han Ginhadian.

Mga Leksyon Para ha Aton Ngatanan

22, 23. (a) Paonan-o mahimo magpahimulos an ngatanan nga mga Kristiano ha ginsiring ni Jesus ngadto ha pito nga kongregasyon? (b) Ano an sadang magin determinasyon naton?

²² Sigurado nga makakapahimulos hin daku an ngatanan nga mga Kristiano tikang ha ginsiring ni Jesus ha pito nga kongregasyon ha Asia Minor. Pananglitan, ha paghatag ni Kristo hin angayan nga kumendasyon, napapagios an mahigugmaon nga Kristiano nga mga tigurang nga maghatag hin kumendasyon ha mga indibiduwal ngan mga kongregasyon nga nagbubuhat hin maopay ha espirituwal. Kon may-ada mga kaluyahan, binubuligan han mga tigurang an mga igkasi-tumuroo nga iaplikar an Kasuratanhon nga mga solusyon. Kita ngatanan mahimo magpadayon ha pagpahimulos tikang ha magkalainlain nga mga bahin han sagdon ni Kristo nga iginhatag ha pito nga kongregasyon, tubtob nga inaaplikar naton ito upod an sinsero nga pag-ampo ngan waray paglangan. a

²³ Inin kataposan nga mga adlaw diri panahon para han pagin-kampante, materyalismo, o bisan ano nga butang nga bangin magin hinungdan han aton pagbuhat hin rutina la nga pag-alagad ha Dios. Salit hinaot an ngatanan nga mga kongregasyon padayon nga naglalamrag sugad hin mga burutangan hin mga kandila nga gintitipigan ni Jesus ha lugar hito. Sugad nga matinumanon nga mga Kristiano, hinaot magin determinado kita pirme nga maghatag hin pagtagad kon nagyayakan hi Kristo ngan mamati ha ginsisiring han espiritu. Niyan magkakaada kita nagpapadayon nga kalipay sugad nga mga paradara hin kalamrag para ha himaya ni Jehova.

[Mga footnote]

Paonan-o Mo Babatunon?

• Hin-o “an babaye nga hi Jesebel,” ngan kay ano nga diri hiya ginsusubad han diosnon nga kababayin-an?

• Ano nga kahimtang an iniksister ha kongregasyon ha Sardis, ngan ano an mahihimo naton basi diri magin pariho han damu nga mga Kristiano nga nag-uukoy didto?

• Ano an mga iginsaad ni Jesus ha kongregasyon ha Piladelpia, ngan paonan-o nahitatabo ito yana?

• Kay ano nga ginsaway an mga taga-Laodisea, kondi ano nga mga paglaom an iginbutang ha atubangan han madasigon nga mga Kristiano?

[Mga Pakiana]

[Retrato ha pahina 16]

Kinahanglan likyan an maraot nga mga paagi han “babaye nga hi Jesebel”

[Mga Retrato ha pahina 18]

Iginbubutang ni Jesus ha atubangan han iya mga sumurunod an “daku nga ganghaan” nga nagtutugway ngadto ha mga pribilehiyo ha Ginhadian

[Retrato ha pahina 20]

Kinakarawat mo ba hi Jesus ngan namamati ka ha iya?