Paghibaro ha Sekreto han Pagkasupisyente-ha-kalugaringon

Ha usa nga makapadasig nga surat ha mga Kristiano ha Filipos, hi apostol Pablo nagsurat: “Naton-an ko na, nga bisan ano an akon himutangan, malipayon [“supisyente-ha-kalugaringon,” NW] ako hito. . . . Ha tagsatagsa nga bagay ngan ha ngatanan nga mga bagay naton-an ko an kahibaro, han kabusog, sugad man han kagutom, han kahuraan sugad man ha kakablasan.”—Filipos 4:11, 12.

Ano an sekreto han pagkasupisyente-ha-kalugaringon ni Pablo? Tungod han dagku nga kagarastosan ngan han kawaray-kasigurohan ha ekonomiya ha aton panahon, sigurado nga mapulsanon para ha totoo nga mga Kristiano nga mahibaro kon paonan-o magin supisyente-ha-kalugaringon basi makagpabilin hira nga nakasentro ha ira pag-alagad ha Dios.

HA TINIKANGAN nga bahin han iya surat, iginhulagway ni Pablo an iya malampuson nga propesyon hadto. Hiya nagsiring: “Kon an iba nga tawo magdudumdom ha pagsarig ha unod, labi pa hi ako: nga ginsirkumsisyonan ha ikawalo ka adlaw, ha katulinan ni Israel, ha panon ni Benjamin, Hebreohanon ha mga Hebreohanon; nahitutungod ha Kasugoanan, ako Pariseo; mahitungod ha kasindak, gintimaraot ko an singbahan; mahitungod ha katadongan nga aada ha kasugoanan, waray ko sala.” (Filipos 3:4-6) Dugang pa, sugad nga madasigon nga Judio, hi Pablo ginsugo ngan ginsuportahan han punoan nga mga saserdote ha Jerusalem. Ini ngatanan naghatag ha iya hin hinungdan nga maglaom hin gahum ngan dungog—politikal, relihiyoso, ngan waray ruhaduha pinansyal—ha Judio nga sistema.—Buhat 26:10, 12.

Kondi han nagin madasigon nga Kristiano nga ministro hi Pablo, nagbag-o gud an mga kahimtang. Tungod han maopay nga sumat, kinaburut-on nga ginbayaan niya an iya malampuson nga propesyon ngan an ngatanan nga ginhunahuna nga importante han mga Judio hadto. (Filipos 3:7, 8) Paonan-o niya yana aatamanon an iya kalugaringon? Makarawat ba hiya hin sweldo sugad nga ministro? Paonan-o matataparan an iya personal nga mga panginahanglan?

Ginbuhat ni Pablo an iya ministeryo nga waray sweldo. Basi diri magin pabug-at ngada hadton iya ginsiserbisyohan, inapi hiya kanda Akila ngan Prisila ha paghimo hin tolda samtang nakadto ha Korinto, ngan may-ada pa liwat hiya iba nga ginbuhat basi masuportahan an iya kalugaringon. (Buhat 18:1-3; 1 Tesalonika 2:9; 2 Tesalonika 3:8-10) Tulo ka beses nga nagbiyahe hi Pablo sugad nga misyonero ngadto ha higrayo nga mga lugar, ngan nagbiyahe liwat hiya ngadto ha mga kongregasyon nga kinahanglan bisitahon. Tungod kay okupado gud hiya ha pagserbisyo para ha Dios, gutiay la an iya materyal nga mga panag-iya. Kasagaran nga kabugtoan an nagtagana han iya mga panginahanglan. Kondi, usahay tungod han makuri nga mga kahimtang, kablas hiya. (2 Korinto 11:27; Filipos 4:15-18) Bisan pa hito, waray gud magreklamo hi Pablo mahitungod han iya kahimtang, ngan waray hiya maghingyap han tinatag-iya han iba. Kinaburut-on ngan malipayon  nga nagbuhat gud hiya para ha kaopayan han mga igkasi-Kristiano. Ha pagkamatuod, hi Pablo an nagkotar han bantogan nga mga pulong ni Jesus: “May-ada darodaku nga kalipay ha paghatag kay ha pagkarawat.” Maopay gud ito nga susbaranan para ha aton ngatanan!—Buhat 20:33-35, NW.

An Kahulogan han Pagkasupisyente-ha-kalugaringon

An pagkasupisyente-ha-kalugaringon ni Pablo amo an daku nga hinungdan han iya kalipay ngan katagbaw. Kondi, ano an iginpapasabot han pagin supisyente-ha-kalugaringon? Ha simple nga pagkayakan, nangangahulogan ito hin pagin kontento ha importante nga mga butang. Mahitungod hini, hi Pablo nagsiring kan Timoteo, an iya kaupod ha ministeryo: “Daku nga pagtubo an pagtahod ha Dios [“diosnon nga debosyon,” NW] upod ha kalipay [“pagkasupisyente-ha-kalugaringon,” NW]: kay waray ta gindara nga bisan ano nganhi ha kalibotan, ngan diri sadang ta pagdad-on nga bisan ano ha paggowa; kondi nga may-ada ta kinakaon ngan igintatabon maglipay kita tungod hini.”—1 Timoteo 6:6-8.

Tigamni nga iginkaw-ing ni Pablo an pagkasupisyente-ha-kalugaringon ha diosnon nga debosyon. Iya nasantop nga an totoo nga kalipay tikang ha diosnon nga debosyon, karuyag sidngon, tikang ha pag-una han aton pag-alagad ha Dios, ngan diri tikang ha materyal nga mga panag-iya o bahandi. An “kinakaon ngan igintatabon” mga bahin la nga nakabulig ha iya nga makagpadayon ha diosnon nga debosyon. Salit para kan Pablo an sekreto han pagkasupisyente-ha-kalugaringon amo an pagsarig kan Jehova, anoman an kahimtang.

Damu nga mga tawo yana an nakakaeksperyensya hin sobra nga pangarit ngan kasubo tungod kay diri hira maaram hito nga sekreto o ira ginbabalewaray ito. Imbes nga patuboon an pagkasupisyente-ha-kalugaringon, ira ginpipili nga sumarig ha kwarta ngan han mapapalit hito. Ginpapaabat han industriya han pagpaanunsyo ngan han media an mga tawo nga diri hira mahimo magin malipayon kon diri hira magkaada han pinakabag-o ngan han pinakamaopay nga mga produkto o mga garamiton—ngan kinahanglan hira magkaada dayon hito. Tungod hini, damu an nasusulay ha pangalimbasog ha  pagkaada hin kwarta ngan materyal nga mga butang. Imbes nga makabiling hin kalipay ngan katagbaw, hira “nagkahulog ngadto ha pagsulaya ngan panhilit-ag ngan damu nga mga tinuyaw ngan makahiribang nga mga kaipa, nga nakakalumos ha mga tawo ha pagkaguba ngan pagkawara.”—1 Timoteo 6:9, 10.

Hinbaroan Na Nira an Sekreto

Hini nga panahon, posible gud ba nga magkinabuhi nga may diosnon nga debosyon ngan pagkasupisyente-ha-kalugaringon ngan makabiling hin kalipay ngan katagbaw? Oo. Ha pagkamatuod, minilyon han mga tawo yana an nagbubuhat hin sugad gud hito. Hinbaroan na nira an sekreto han pagin malipayon ha anoman nga materyal nga mga butang nga tinatag-iya nira. Hira an mga Saksi ni Jehova, nga nagdedikar han ira kalugaringon ngadto ha Dios, nagbubuhat han iya kaburut-on ngan nagtututdo ha mga tawo ha bisan diin mahitungod han iya katuyoan.

Pananglitan, tagda adton nagboluntaryo nga bansayon ngan ipadara sugad nga mga misyonero  ngadto ha diri-pamilyar nga mga nasud basi magsangyaw han maopay nga sumat han Ginhadian han Dios. (Mateo 24:14) Agsob nga an mga kahimtang han kinabuhi ha mga nasud diin hira iginpapadara diri sugad kaabanse han ira nahiaraan may kalabotan ha materyal nga mga butang. Pananglitan, han inabot an mga misyonero ha usa nga nasud ha Asia temprano han 1947, kità pa gihapon an mga epekto han girra, ngan gutiay la nga mga balay an may-ada koryente. Ha damu nga mga nasud, hinkit-an han mga misyonero nga an mga labahan, usa-usa nga ginlalabhan ha usa nga tabla o ha mga bato ha sapa imbes nga pinaagi han de-koryente nga washing machine. Kondi kinadto hira basi tutdoan an mga tawo han kamatuoran han Biblia, salit nagpahiuyon hira ha lokal nga mga kahimtang ngan nagin okupado ha ministeryo.

An iba nga diri mga misyonero sinulod ha bug-os-panahon nga ministeryo o binalhin ngadto ha mga lugar nga waray pa masangyawi han maopay nga sumat. Hi Adulfo nag-aalagad sugad nga bug-os-panahon nga ministro ha sulod hin sobra 50 ka tuig na ha magkalainlain nga mga bahin han Mexico. Hiya nasiring: “Pariho kan apostol Pablo, kami han akon asawa nahibabaro ha pagpahiuyon ha mga kahimtang. Pananglitan, usa han mga kongregasyon nga amon ginbisita hirayo tikang ha bisan ano nga siyudad o merkado. Ha kada pangaon, an kabugtoan kontento na ha pagkaon hin usa la nga tortilya nga may gutiay nga keso ngan asin ngan usa ka tasa nga kape. Ito la an ira pagkaon—tulo ka tortilya ha usa ka adlaw. Salit nahibaro kami magkinabuhi pariho gud han kabugtoan. Damu an akon mga eksperyensya nga pariho hini durante han 54 ka tuig nga akon pag-alagad kan Jehova ha bug-os nga panahon.”

Hi Florentino nahinunumdom kon paonan-o hiya ngan an iya pamilya kinahanglan magpahiuyon ha makuri nga mga kahimtang. Ha paghinumdom han mga adlaw han bata pa hiya, hiya nasiring: “Malampuson nga negosyante an akon amay. Damu an iya katunaan. Nahinunumdoman ko pa an lamesa ha amon tindahan. May-ada usa nga hunos nga mga 20 pulgada an kahalapad ngan 8 pulgada an kahilarom, ngan may-ada ito upat ka dibisyon. Didto namon iginbutang an amon kita ha usa ka adlaw. Katapos han adlaw, pirme ito puno hin mga sinselyo ngan papel nga kwarta.

“Katapos, tigda nga nalugi kami, ngan tikang ha kahuraan ha kinabuhi nagin pobre kami. Nawara an ngatanan nga amon tinatag-iya gawas han amon balay. Gawas pa hini, usa han akon magurang nga lalaki an naaksidente ngan nagin paralisado an duha nga bitiis. Nagbag-o gud an ngatanan. Namaligya anay ako hin mga prutas ngan karne. Nag-ani liwat ako hin gapas, mga ubas, ngan alfalfa, ngan binulig ako ha pagpatubig han kaumhan. Gintatawag ako han iba nga mga tawo nga ‘jack of all trades.’ Agsob kami liawon han amon iroy pinaagi ha pagsiring nga may-ada kami han kamatuoran, an espirituwal nga bahandi nga gutiay la an may-ada. Salit hinbaroan ko an pagkaada hin kahuraan ngan an pagkaada liwat hin gutiay o kawarayan. Yana nga bug-os-panahon nga nag-aalagad ako kan Jehova ha sulod hin mga 25 ka tuig na, masisiring ko nga pirme ko naieksperyensyahan an kalipay ha paghibaro nga ginpili ko an gimaopayi nga paagi han pagkinabuhi—pag-alagad kan Jehova ha bug-os-panahon.”

Prangka nga nagsusumat an Biblia ha aton nga an “dagway hini nga kalibotan maagi.” Tungod hini, nagsasagda liwat ito ha aton: “[Hinaot nga] an mga nagkakalipay sugad ha mga waray pagkakalipay; ngan an mga namamalit sugad ha mga waray kalugaringon; ngan an mga nagamit ha kalibotan, sugad ha waray panggagamit hin labi hini nga kalibotan.”—1 Korinto 7:29-31.

Salit, yana an panahon nga usisahon mo hin mas maopay an imo paagi han pagkinabuhi. Kon aada ka ha kahimtang nga limitado ha pinansyal, magin mabinantayon nga diri magin masinahon, mapuno hin kapait o maawa pa ngani. Ha luyo nga bahin, anoman nga materyal nga mga panag-iya an bangin tinatag-iya mo, maaramon nga magkaada husto nga pagtagad hito basi diri ito magkontrol ha imo. Sugad han iginsagdon ni apostol Pablo, sadang mo ibutang an imo paglaom, “diri [ha] kamarig-on han mga bahandi, kondi ha Dios, nga nahatag ha aton hin kahuraan ha ngatanan ha pagkalipay.” Kon bubuhaton mo ito, ikaw liwat makakasiring nga hinbaroan mo na an sekreto han pagkasupisyente-ha-kalugaringon.—1 Timoteo 6:17-19.

[Retrato ha pahina 9]

Nagtrabaho hi Pablo pinaagi han iya kalugaringon nga mga kamot basi diri makapabug-at ha iba

[Mga Retrato ha pahina 10]

Yinukot an nakakabiling hin kalipay ha kinabuhi nga may-ada “diosnon nga debosyon nga may pagkasupisyente-ha-kalugaringon”