Eskwelahan han Gilead—60 ka Tuig han Pagbansay ha mga Misyonero

“TUNGOD han amon seryoso nga pag-aram han Biblia, nagin mas duok kami kan Jehova ngan mas nahibaro pa mahitungod han iya organisasyon. Igin-andam kami hini para ha pagkinabuhi ha usa nga toka ha langyaw nga dapit.” Ha sugad hito nga paagi iginhulagway han usa nga naggradwar ha siyahan nga klase an kurso han mga aradman nga iya gin-adman ha Watchtower Bible School of Gilead. Tikang nga gintikangan ito 60 ka tuig na an naglabay, an Eskwelahan han Gilead nagpapadara hin mga misyonero tubtob yana. Han Marso 8, 2003, gindumara an gradwasyon han ika-114 nga klase ha Watchtower Educational Center ha Patterson, New York. An 6,404 nga nagkatirok ha awditoryum ngan ha dugang pa nga mga lugar diin iginpasalida an programa ha telebisyon namati hin maopay ha programa, nga may-ada mga pahayag, mga interbyu, ngan usa nga grupo nga paghisgot.

Hi Theodore Jaracz, usa nga membro han Nagmamando nga Lawas, amo an tsirman. An iya pahayag ha pagtikang han programa nagpabug-at han pagin internasyonal han mga mamarati, nga ginkompwesto hin mga bisita tikang ha Asia, ha Caribbean, Sentral Amerika ngan Amerika del Sur, ngan Europa. An pahayag ni Bugto Jaracz nakasentro ha 2 Timoteo 4:5 (NW), ngan iya ginpabug-atan an nangunguna nga buruhaton han nabansay ha Gilead nga misyonero—an ‘pagbuhat han buruhaton han usa nga ebanghelisador.’ An mga misyonero nagpapamatuod han kamatuoran pinaagi han pagtutdo ha mga tawo mahitungod han Biblia.

Nakarawat han mga Estudyante an Pangataposan nga Instruksyon

Ha pagtikang han usa nga serye han haglipot nga mga pahayag, hi John Larson, usa nga membro han Komite han Sanga han Estados Unidos, naghisgot mahitungod han makaparig-on ha pagtoo nga topiko nga “Kon an Dios Kaupod Naton, Hin-o an Makontra ha Aton?” (Roma 8:31) Iginsaysay niya an basihan ha Biblia basi an mga estudyante magkaada bug-os nga pagsarig ha gahum ni Jehova nga buligan hira nga malamposan an bisan ano nga ulang nga bangin maeksperyensyahan nira ha ira mga teritoryo. Ginagamit an Roma 8:38, 39, ginsagdonan ni Bugto Larson an mga estudyante: “Ukoy anay ngan pamalandonga an gahum nga ginagamit han Dios para ha imo, ngan hinumdumi nga waray gud makakagwara han personal nga interes ni Jehova ha imo.”

An sunod nga may bahin ha programa amo hi Guy Pierce, usa nga membro han Nagmamando nga Lawas. Ginpili niya an tema nga “Tipigi nga Malipayon an Iyo mga Mata!” (Lukas 10:23) Iya iginsaysay nga an totoo nga kalipay nag-uupod han pagkilala kan Jehova ngan pagsabot han iya katuyoan para ha kadayonan, sugad man han pakakita han katumanan han mga tagna ha Biblia. Diin man hira kumadto, matitipigan han mga estudyante an totoo nga kalipay pinaagi han pagtipig han ira mga mata nga malipayon. Gindasig ni Bugto Pierce an mga naggradwar nga pamalandungon gud an pagkamaopay ni Jehova ngan pirme isentro an ira mga hunahuna ngan kasingkasing ha pagbuhat han Iya kaburut-on. (Salmo 77:12) Pinaagi han pagtipig hin positibo nga disposisyon, malalamposan han mga naggradwar an bisan ano nga mga problema nga bangin atubangon nira.

Katapos, kinarawat an klase hin pangataposan nga mga pulong hin pagdasig tikang ha duha han mga instruktor nga nagtinutdo ha ira ha kada adlaw. “Namimiling Ka ba hin Himaya?” an pakiana nga iginbangon ni Lawrence Bowen ha ulohan han iya pahayag. Ginhuhunahuna han kadam-an nga mga tawo nga an himaya katugbang han pagdayaw, dungog,  ngan pagkabantogan para ha ira kalugaringon. Kondi, nagtikang hisabtan ni salmista Asap an totoo nga himaya—an presyoso nga bahandi han dungganon nga relasyon kan Jehova. (Salmo 73:24, 25) Gindasig an naggradwar nga mga estudyante nga magtipig hin duok nga relasyon kan Jehova pinaagi han padayon nga makahuluganon nga pag-aram han Biblia. An mga anghel “nagtitinguha ha pag-usisa” han mga detalye mahitungod han katumanan han katuyoan ni Jehova pinaagi kan Kristo. (1 Pedro 1:12) Karuyag nira mahibaro hin damu gud kon posible mahitungod han ira Amay basi ipasanag an iya kahimayaan. Katapos ginsagda han mamumulong an mga estudyante nga himayaon hi Jehova ha ira mga toka sugad nga mga misyonero pinaagi ha pagbulig ha iba nga hiagian an bahandi nga presyoso gud.

Hi Wallace Liverance, an pararehistro han eskwelahan, an nagtapos han siyahan nga mga serye han mga pahayag pinaagi hin usa nga pahayag nga may ulohan nga “Igyakan an Kinaadman han Dios Sugad nga Sagrado nga Tinago.” (1 Korinto 2:7, NW) Ano inin diosnon nga kinaadman nga ginhisgotan ni apostol Pablo durante han iya pagmisyonero? Ito an makinaadmananon ngan gamhanan nga mga pamaagi ni Jehova ha pagpahinabo hin kamurayawan ngan pagkaurosa ha bug-os nga uniberso. Ini nga kinaadman nakasentro kan Jesus. Imbes nga magsinangyaw hin pag-aplikar hin Kristiano nga mga prinsipyo para ha mga problema han katawohan, ginbuligan ni Pablo an mga tawo nga hisabtan kon paonan-o susulbaron han Dios an mga epekto han sala ni Adan. (Efeso 3:8, 9) Ginsagda han mamumulong  an iya mga mamarati: “Gamita an iyo espesyal nga pribilehiyo han pag-alagad sugad han ginbuhat ni Pablo, nga ginhunahuna an iya toka ha pagmisyonero sugad nga higayon ha pagbulig ha mga tawo nga masabtan kon paonan-o hi Jehova magtutuman han iya katuyoan.”

Katapos hini, hi Mark Noumair, usa pa nga instruktor ha Gilead, an nanguna ha usa nga makapadasig nga paghisgot kaupod han pipira nga mga estudyante ha klase. An tema nga “An Pag-aram han Pulong han Dios Nagbubunga hin Madasigon nga mga Ministro” nagpabug-at han mga pulong ni Pablo ha Roma 10:10. Iginsaysay han klase an damu nga mga eksperyensya ha pag-alagad ha kanataran nga ira napahimulsan durante han ira pag-eskwela. Iginpakita han ira mga eksperyensya nga kon aton gin-aadman ngan pinamamalandong an Pulong han Dios, an urusahon nga mga butang mahitungod kan Jehova nga Dios ngan ha iya Ginhadian magpupuno han aton kasingkasing ngan mababatian ha aton. Durante han ira lima-ka-bulan nga pag-ukoy ha Watchtower Educational Center, an mga estudyante nakagtikang hin sobra 30 ka pag-aram ha Biblia ha balay kaupod han mga interesado ha pirme nasasangyawan nga mga teritoryo han kahirani nga mga kongregasyon.

An mga Hamtong Naghatag hin Maopay nga Sagdon

Durante han ira pag-eskwela, nagpahimulos an mga estudyante han pakig-upod ha mga membro han pamilya han Bethel han Estados Unidos. Gindumara han duha nga membro han E.U. nga sanga nga hira Robert Ciranko ngan Robert P. Johnson an mga interbyu ha pipira nga maiha na nga matinumanon nga mga surugoon ni Jehova, upod na an nagbibiyahe nga mga paramangno nga nakarawat yana hin espesyal nga pagbansay ha Watchtower Educational Center. An ngatanan nga gin-interbyu mga naggradwar ha Gilead nga nag-alagad hadto sugad nga mga misyonero. Makapadasig gud ha mga estudyante ngan ha ira mga pamilya ngan kasangkayan nga makabati hin makinaadmananon nga mga pulong tikang hinin eksperyensyado na nga espirituwal nga kalalakin-an.

Kaupod ha ira sagdon amo ini: “Magin sagipo gud tubtob ha mahihimo, ha ministeryo ngan ha kongregasyon.” “Ayaw tagda hin sobra an imo kalugaringon. Magpabilin nga nakasentro ha imo katuyoan sugad nga misyonero, ngan tagda an imo teritoryo nga sugad hin imo panimalay.” An iba pa nga nakakabulig nga mga komento nagpatin-aw kon paonan-o an pagbansay ha Gilead nagsasangkap ha usa nga ministro para ha maopay nga buhat, diin man hiya itoka. Iini an pipira hito: “Nahibaro kami ha pagburubligay ngan ha pagbuhat nga magkaurupod.” “Ginbuligan kami han eskwelahan nga karawaton an bag-o nga mga kultura.” “Gintutdoan kami nga gamiton an Kasuratan ha iba nga paagi.”

Hi John E. Barr, nga maiha na nga membro han Nagmamando nga Lawas, naghatag han pinakaimportante nga pahayag ha programa. An iya Kasuratanhon nga tema amo an “Ngadto ha Bug-os nga Tuna Nakaabot an Ira Tingog.” (Roma 10:18, NW) Iya iginbangon an pakiana nga, Nabuhat na ba han katawohan han Dios ini nga makuri nga buruhaton yana? Oo! Han 1881, an mga magbarasa han Watchtower nga magasin ginpakianhan: “Nagsasangyaw ka ba?” Katapos, ginpahinumdom han mamumulong an ngatanan nga mamarati mahitungod han makasaysayan nga panawagan ha kombensyon han 1922 ha Cedar Point, Ohio, E.U.A.: “Ipasamwak an Hadi ngan an iya Ginhadian!” Ha paglabay han panahon, an kadasig han matinumanon nga mga surugoon han Dios nagpagios ha ira nga ipasamwak an urusahon nga mga kamatuoran han Ginhadian ngadto ha ngatanan nga nasud. Pinaagi han inimprinta nga mga barasahon ngan han pakiistorya, an maopay nga sumat nakadangat na ha mga sidsid han inuukyan nga tuna—an ngatanan para ha dungog ngan kadayawan ni Jehova. Ha makapabantad nga konklusyon, ginsagda ni Bugto Barr an mga naggradwar nga ihapon an ira mga bendisyon, nasiring: “Kada adlaw, ha imo pag-ampo kan Jehova didto ha imo teritoryo, kinasingkasing nga pasalamati hiya tungod han imo nahimo ha katumanan han mga pulong, ‘Ngadto ha bug-os nga tuna nakaabot an ira tingog.’ ”

Katapos hini nga pahayag, ginbasa an mga pangumusta, ngan gintagan han tsirman hin diploma an tagsa nga naggradwar. Katapos, ha magkausa nga mga pagbati hin kalipay ngan kasubo ha pagbaya ha hinigugma nga eskwelahan, usa nga representante han klase an nagbasa hin kinasingkasing nga resolusyon nga para ha Nagmamando nga Lawas ngan ha pamilya han Bethel, nga nagpapahayag han determinasyon han mga naggradwar nga dayawon hi Jehova “tikang yana ngan tubtob ha waray kataposan.”—Salmo 115:18.

Nag-aampo kami nga ini nga mga naggradwar magpapahiuyon ha ira bag-o nga mga urukyan ngan makakabulig gud ha pag-uswag han bug-os-kalibotan nga pagsangyaw nga buruhaton, sugad la han ginbubuhat hadton nauna ha ira ha sulod hin 60 ka tuig na.

[Kahon ha pahina 23]

ESTADISTIKA HAN KLASE

Kadamu han nasud nga ginrepresentaran: 12

Kadamu han nasud nga gintokahan: 16

Kadamu han estudyante: 48

Aberids nga edad: 34.4

Aberids nga mga tuig ha kamatuoran: 17.6

Aberids nga mga tuig ha bug-os-panahon nga ministeryo: 13.5

[Retrato ha pahina 24]

Ika-114 nga Naggradwar nga Klase han Watchtower Bible School of Gilead

Ha lista ha ubos, an mga rumbay may numero tikang ha unahan tipaluyo, ngan an mga ngaran iginlista tikang ha wala tipatoo ha kada rumbay.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.