Pag-alagad ha Naiiba nga Grupo hin Yinaknan ha Korea

USA nga madasigon hinduro kondi diri maaringasa nga grupo an nagkatirok para ha usa ka distrito nga kombensyon han mga Saksi ni Jehova ha katpaso han 1997. Ini an siyahan nga kombensyon ha Korea para ha bungol ngan may depekto ha pamati nga mga tawo. May-ada ito pungkay nga tinambong nga 1,174. An bug-os nga programa—upod na an mga pahayag, mga interbyu, ngan usa nga drama—iginpresenta ha Koreano nga Sinyas nga Lenggwahe ngan ginamitan ini hin projector basi makita ha bug-os nga Assembly Hall. Ini an resulta han damu ka tuig han maduruto nga pangalimbasog han damu nga mga boluntaryo.

Maabot an panahon nga ha paraiso ha tuna “an mga talinga han mga bungol pangunguhaan han sarop.” (Isaias 35:5) Basi maeksperyensyahan an kinabuhi dida hito nga Paraiso, an ngatanan, upod na an bungol nga mga tawo, kinahanglan sumulod anay ha espirituwal nga paraiso, an mainuswagon nga espirituwal nga kahimtang han malipayon nga katawohan han Dios. Kinahanglan hira magin dedikado, bawtismado nga mga Saksi ni Jehova, nga tinutdoan niya.—Mika 4:1-4.

Gutiay nga mga Tinikangan

Bisan kon may-ada na pagsangyaw ha bungol nga mga tawo ha dekada han 1960, dida na ha dekada han 1970 nga an pipira ha ira nagtikang tumambong ha mga katirok han mga Saksi ni Jehova ha Seoul, an kapital nga siyudad han Korea. Usa nga Kristiano nga bugto nga lalaki nga malaksi magsurat an naggamit hin pisara basi isurat an importante nga mga punto han mga pahayag, upod na an ginamit nga mga teksto ha Biblia.

Han 1971 ha siyudad han Taejon, usa nga Saksi nga may-ada bungol nga anak nga lalaki an nagtikang magtutdo ha iya ngan ha iya bungol nga kasangkayan mahitungod ha mensahe han Ginhadian. Hini nga grupo nagtikang an pipira nga madasigon nga mga indibiduwal nga nangunguna yana ha kanataran han sinyas nga lenggwahe.—Sakarias 4:10.

Kinaburut-on nga Nagbuboluntaryo an mga Batan-on han Ira Kalugaringon

Basi an bungol nga mga tawo mahibaro mahitungod kan Jehova ngan kan Jesus ngan tungod hito mahingada ha dalan ngadto ha kinabuhi, daku nga  pangalimbasog an kinahanglan ihatag han iba nga mga boluntaryo. (Juan 17:3) Basi matuman ito nga tumong, an pipira han mga Saksi ni Jehova nag-aram na han sinyas nga lenggwahe ngan ginbabalosan hin makalilipay nga mga eksperyensya.

Ginhimo nga tumong han 15-anyos nga hi Park In-sun nga mahibaro han sinyas nga lenggwahe. Basi matuman ito, nag-aprentis hiya ha usa nga pabrika diin nagtatrabaho an usa ka grupo han 20 nga bungol nga tawo. Ha sulod hin walo ka bulan nagtrabaho hiya kaupod gud ha ira basi mahibaro han yinaknan ngan panhunahuna han bungol nga mga tawo. Han sunod nga tuig, nagin regular payunir hiya, o bug-os-panahon nga parasamwak han Ginhadian, ngan nagbuhat kaupod han usa nga grupo han bungol nga mga tawo nga interesado ha kamatuoran han Biblia. Madagmit hinduro nga nagdamu an grupo, ngan waray pag-iha sobra 35 an tinambong ha mga katirok ha Domingo.—Salmo 110:3.

Katapos hito, ha siyahan nga panahon ha Seoul, an Kristiano nga mga katirok esklusibo nga ginhikay ha sinyas nga lenggwahe. Hi Bugto Park In-sun nag-alagad sugad nga espesyal payunir hinin nagtitikadaku nga grupo. Hito nga panahon hiya nagin maabtik na ha sinyas nga lenggwahe. May mga bulan nga nagdumara hiya hin 28 nga pag-aram ha Biblia ha balay ha bungol nga mga tawo. Damu hini an nag-uswag ngan nagin mga Saksi ni Jehova.

Sugad nga resulta hinin aktibo hinduro nga boluntaryo nga buruhaton, an siyahan nga kongregasyon ha sinyas nga lenggwahe ha Seoul naporma han Oktubre 1976, nga may 40 nga magwarali ngan 2 nga regular payunir. Nag-aghat ini han buruhaton ha iba nga mga siyudad ha Korea. Damu nga bungol nga mga tawo an nagugutom han maopay nga sumat ngan naghuhulat nga bisitahon.

Pagtrabaho Kaupod han Bungol nga mga Tawo

Bangin maghunahuna ka kon paonan-o nabilngan an bungol nga mga tawo. Damu ha ira an hin-agian pinaagi han pagpakilala ha ira han iba. Ginpakianhan liwat an mga tag-iya han mga tindahan hin bugas hito nga lugar, ngan naghatag hira hin mga ngaran ngan mga adres han bungol nga mga tawo. An iba nga mga opisina han gobyerno nakabulig ha paghatag han sugad nga impormasyon. Naglampos gud an maduruto nga pagkobre han teritoryo nga inuukyan han mga bungol, salit inabot an panahon nga naporma an upat nga kongregasyon nga nagamit hin sinyas nga lenggwahe. Damu nga Kristiano nga mga batan-on an gindasig nga mag-aram han sinyas nga lenggwahe.

An espesyal payunir nga mga ministro nga maaram na han sinyas nga lenggwahe igintoka han sanga nga opisina han mga Saksi ni Jehova nga magbuhat kaupod han mga kongregasyon. Mas bag-o pa la, an mga naggradwar ha Ministerial Training School igintoka na ngada hini nga mga kongregasyon ngan nagpaparig-on ha ira ha espirituwal.

May-ada mga kakurian nga kinahanglan malamposan. An pag-alagad dida hini nga teritoryo nagkikinahanglan hin pangalimbasog nga hisabtan an panhunahuna ngan panggawi han bungol nga mga tawo. Direkta hinduro hira ha ira panhunahuna ngan ha panggawi. Usahay nagigin hinungdan ini nga mahipausa an mga tawo ngan mahimo magin hinungdan han mga diri pagsinabtanay. Dugang pa, kon an mga Saksi nagdudumara hin mga pag-aram ha Biblia ha balay ha bungol nga mga tawo, may-ada panginahanglan ha pagbulig ha ira nga magin maabtik ha ira sinyas nga lenggwahe ngan ha pagdasig ha ira nga mag-uswag ha ira kalugaringon nga programa han pagbasa ngan pag-aram.

Ha ira adlaw-adlaw nga mga buruhaton, naatubang hin mga kakurian an bungol nga mga tawo nga kadak-an diri hinbabaroan han iba. An komunikasyon ha mga opisina han gobyerno ngan ha mga ospital, sugad man ha simple nga mga transaksyon han negosyo, agsob nga nagigin dagku nga  mga problema para ha ira. Tungod kay an mga Saksi tikang ha kahirani nga mga kongregasyon nagtatanyag hin mahigugmaon nga bulig, an bungol nga mga tawo ha Kristiano nga kongregasyon nakakaeksperyensya hin totoo nga pagminagburugto.—Juan 13:34, 35.

An Diri-pormal nga Pagsangyaw Nagdadara hin Maopay nga mga Resulta

Ha Pusan, an sentro nga duruongan nga siyudad han sur han Korea, usa nga Saksi an waray tuyoa nga iginkita hin duha nga indibiduwal nga nagsurat ha papel: “Karuyag namon an Paraiso. Karuyag namon hibaroan an mga teksto nga nagsusumat mahitungod han kinabuhi nga waray kataposan.” Iginsurat han bugto nga lalaki an ira adres ngan naghikay ha pagbisita ha ira. Han binisita hiya, nakita niya an usa nga kuwarto nga puno hin bungol nga mga tawo nga naghuhulat nga mahibaro han mensahe han Ginhadian. Ini nga eksperyensya nag-aghat ha iya nga mag-aram han sinyas nga lenggwahe. Waray pag-iha naporma an usa nga kongregasyon nga sinyas an lenggwahe ha Pusan.

Usa nga bugto nga lalaki tikang hito nga kongregasyon an nakakita hin duha nga bungol nga nagsisinyas ha kada tagsa ngan iya gindaop hira. Han hibaroan niya nga tikang pa la hira ha usa nga relihiyoso nga katirok, iya gindapit hira nga tumambong ha Kingdom Hall ha alas dos hito mismo nga kulop. Inabot hira, ngan gintikangan an pag-aram ha Biblia. Waray pag-iha katapos hito, tinambong hira nga 2 ha distrito nga kombensyon kaupod an 20 han ira bungol nga kasangkayan. Tikang hito nga grupo, may-ada na pipira nga nagdedikar han ira kinabuhi kan Jehova. Duha an nagin mga tigurang ha kongregasyon ngan usa an nagin ministeryal nga surugoon ha mga kongregasyon ha sinyas nga lenggwahe.

 Ginbalosan an Determinasyon

Tungod kay an pipira nga bungol nga mga tawo hirayo an inuukyan tikang ha bisan ano nga kongregasyon nga sinyas an lenggwahe, agsob nga ginkikinahanglan an daku nga pangalimbasog ngan determinasyon basi makagtagana ha ira hin regular nga espirituwal nga pagkaon tikang ha Biblia. Pananglitan, usa nga 31-anyos nga lalaki an nanginginabuhi pinaagi han pangisda ha usa nga isla. Nahibaro hiya mahitungod han mensahe han Biblia tikang ha iya manghod nga lalaki, nga nakaistorya na han mga Saksi ni Jehova. Tungod ha pangalimbasog nga matagbaw an iya espirituwal nga kagutom, an bungol nga mangingisda nagbiyahe hin disisais ka kilometro pinaagi hin baluto ngadto ha Siyudad han Tongyoung, ha sur nga bahin han baybayon han Korea. Iya ginbuhat ito basi makigkita ha usa nga espesyal payunir nga tikang ha kongregasyon nga sinyas an lenggwahe ha Siyudad han Masan. Kada Lunes, ini nga espesyal payunir nabiyahe hin 65 kilometro basi la makagdumara hin pag-aram ha Biblia ngada ha bungol nga parapangisda.

Basi makatambong han katirok ha Domingo ha Siyudad han Masan, an bungol nga estudyante ha Biblia kinahanglan magbiyahe hin 16 ka kilometro pinaagi hin baluto ngan katapos, hin 60 pa ka kilometro pinaagi hin bus. Nagkaada maopay nga mga resulta an iya determinasyon. Ha pipira ka bulan la, nag-uswag hiya ha sinyas nga lenggwahe, nahibaro hin dugang nga mga alpabeto han Korea, ngan—pinakaimportante—nahibaro hiya han amo la nga paagi han pagkaada relasyon kan Jehova. Tungod kay nasantop niya an pagin importante han mga katirok ngan regular nga pagsangyaw, binalhin hiya ngadto ha teritoryo han kongregasyon nga sinyas an lenggwahe. Masayon ba ito? Diri. Kinahanglan niya bayaan an iya pangisda nga trabaho nga nakaghatag ha iya hin limpyo nga kita nga $3,800 dolyares kada bulan, kondi ginbalosan an iya determinasyon. Katapos mag-uswag ha kamatuoran, nabawtismohan hiya ngan yana malipayon nga nag-aalagad kan Jehova kaupod han iya pamilya.

Hubad Para ha Bungol nga mga Tawo

An maopay nga sumat mahitungod han Ginhadian agsob nga iginsusumat pinaagi han yinakan nga pulong. Kondi, basi maisumat an mensahe tikang ha Pulong han Dios ha mas husto nga paagi, importante nga an katutdoan han Biblia ipresenta ha mas permanente nga paagi. Salit, ha siyahan nga siglo, an mga libro ngan mga surat iginsurat han eksperyensyado nga mga tigurang nga kalalakin-an. (Buhat 15:22-31; Efeso 3:4; Kolosas 1:2; 4:16) Ha aton panahon, an hura nga espirituwal nga pagkaon igintatagana pinaagi han mga libro ngan iba nga Kristiano nga mga publikasyon. Iginhuhubad ini ngadto ha ginatos nga yinaknan, upod na an magkalainlain nga sinyas nga mga lenggwahe. Basi mabuhat ini ha Koreano nga Sinyas nga Lenggwahe, an sanga nga opisina may-ada departamento han paghubad ngadto ha sinyas nga lenggwahe. Usa nga departamento an naghihimo hin mga video han sinyas nga lenggwahe. Nagtatagana ini hin espirituwal nga pagkaon para ha mga bungol nga mamumulong han maopay nga sumat ngan ha mga interesado ha mga kongregasyon ha bug-os nga Korea.

Bisan kon damu an nagigin maabtik ha sinyas nga lenggwahe ngan nakakabulig ha paghimo hin mga video, kasagaran nga an gimaopayi nga mga parahubad amo an mga anak han bungol nga mga kag-anak. Nahibaro hira han sinyas nga lenggwahe tikang ha pagkabata. Diri la hira nakakasinyas ha husto gud nga paagi kondi nakakahatag hin kinasingkasing nga kahulogan ngan pagpabug-at ha mensahe pinaagi han ira mga pagkiwa ngan mga ekspresyon han nawong, salit naaabot an hunahuna ngan kasingkasing.

Sugad han naobserbahan na, an mga kombensyon ngan mga asembleya ha sinyas nga lenggwahe regular nga gindudumara na yana ha Korea. Daku nga trabaho, kwarta, ngan pangalimbasog an ginkikinahanglan basi matuman ini. Kondi, adton natambong mapasalamaton gud hini nga kahikayan. Kon tapos na ini nga mga katirok, damu an nagpapabilin, naruruyag ha pagpadayon han maopay nga asosasyon ngan pag-iristorya mahitungod han maopay nga espirituwal nga pagkaon nga igintagana. Matin-aw, an pag-alagad dinhi hini nga naiiba nga grupo may-ada mga problema, kondi takos gud ito tungod han espirituwal nga mga bendisyon.

[Retrato ha pahina 10]

Mga video ha sinyas nga lenggwahe nga ginhimo ha Korea: “What Does God Require of Us?,” “Appreciating Our Spiritual Heritage,” “Warning Examples for Our Day,” ngan “Respect Jehovah’s Authority”

[Mga Retrato ha pahina 10]

Tipatoo tikang ha ubos: Video ha sinyas nga lenggwahe nga ginhihimo ha sanga han Korea; pag-andam hin mga sinyas para ha teokratiko nga mga termino; grupo han mga parahubad ngadto ha sinyas nga lenggwahe; pagtutdo ha nagsisinyas durante han paghimo han video