Mga Pakiana Tikang ha mga Magbarasa

Ha damu nga mga bahin han kalibotan, kustomre na an pagregalo durante han kasal. Ano nga Kasuratanhon nga mga prinsipyo an sadang naton tagdon kon nahatag o nakarawat hin sugad nga mga regalo?

Inuuyonan han Biblia an pagregalo kon ginbubuhat ito nga may husto nga motibo ngan ha husto nga okasyon. May kalabotan ha paghatag, gindadasig han Biblia an totoo nga mga Kristiano nga subaron an ira hura nga Paratagana, nga hi Jehova. (Jakobo 1:17) Ginsagda ni apostol Pablo an mga igkasi-Kristiano: “Ayaw niyo hikalimti an pagbuhat hin maopay ngan pagkamahatagon: kay ha sugad nga mga halad an Dios nalilipay.” Salit, gindadasig an mga Kristiano nga magin mahinatagon.—Hebreo 13:16; Lukas 6:38.

Kumusta man an paggamit hin gift registry, usa nga komon nga kustomre ha Estados Unidos? Ha Inglatera, gintatagad ito sugad nga listahan hin mga regalo nga karuyag makarawat han karaslon. Kasagaran, an karaslon nagpaparehistro ha usa nga tindahan pinaagi han pag-usisa ha mga baligya han tindahan ngan paglista han mga butang nga karuyag nira makarawat sugad nga mga regalo. An mga paryente ngan kasangkayan han karaslon nakarawat hin imbitasyon nga nagsusuhestyon ha ira nga kumadto ha angayan nga tindahan basi pumalit hin regalo tikang ha lista han gift registry han karaslon. Ha praktikal nga panhunahuna, an gift registry nabulig ha humaratag nga malikyan an kakapoy han paggasto hin daku nga panahon ha pagbiniling hin regalo, samtang nalilikayan han nakarawat an kakapoy han pagbalik ngadto ha tindahan han mga regalo nga diri nira karuyag.

Personal nga desisyon han karaslon an paggamit o diri paggamit hin gift registry. Kondi, an usa nga Kristiano sadang magin mabinantayon basi malikyan an bisan ano nga mga binuhatan nga bangin supak ha mga prinsipyo han Biblia. Pananglitan, kumusta man kon pilion la han karaslon an marahalon hinduro nga mga butang? Ha sugad nga kahimtang, adton limitado an kwarta bangin diri makagregalo, o bangin abaton nira nga mas maopay nga diri-karawaton an imbitasyon nga tumambong ha kasal basi diri maawod ha pagdara hin diri-marahalon nga regalo. Usa nga Kristiano nga babaye an nagsurat: “Nagigin diri na gud makalilipay an paghatag hin mga regalo ha kasal. Nangalimbasog ako nga magin mahinatagon, kondi hinin bag-o la, nawara na an ngatanan ko nga kalipay hadto ha paghatag.” Makasurubo gud kon an usa nga kasal magigin hinungdan han panluya!

Sigurado, diri sadang paabaton an mga humaratag nga basi maruyagan an ira regalo, kinahanglan paliton ito ha espisipiko nga tindahan o ha partikular nga prisyo. Tutal, iginpakita ni Jesu-Kristo nga an pinakabirilhon ha paniplatan han Dios amo an motibo han kasingkasing han humaratag, diri an materyal nga kantidad han regalo. (Lukas 21:1-4) Ha pariho nga paagi, mahitungod han mga regalo han kalooy ha mga pobre, hi apostol Pablo nagsurat: “An tagsatagsa humatag sugad han uyon han iya kasingkasing; diri ha kasubo o ha kinahanglan; kay an Dios nahigugma ha malipayon nga humaratag.”—2 Korinto 9:7.

Sumala ha Biblia, diri sayop an pagpakilala han kalugaringon sugad nga humaratag han regalo, bangin pinaagi han pag-upod hin halipot nga surat ha regalo. Kondi, ha pipira nga mga lugar, kustomre na nga ipakilala an naghatag ngada ha ngatanan nga presente. Ini nga kustomre mahimo magresulta hin mga problema. Adton naruruyag pagregalo bangin karuyag magpabilin nga diri nagpapakilala basi malikyan an kadani hin diri kinahanglanon nga atensyon ngada ha ira kalugaringon. An sugad nga mga indibiduwal nagios sumala ha prinsipyo nga aada ha Mateo 6:3, diin hi Jesus nasiring: “Kondi kon maglimos ka, diri mo pasabuton an imo wala nga kamot, kon ano an binuhat han imo too.” Bangin inaabat han iba nga personal nga butang an pagregalo ngan sadang magpabilin nga pribado butnga han humaratag ngan han nakarawat. Dugang pa, an pagpakilala han mga humaratag mahimo magresulta hin mga pagtanding han mga regalo, nga “nag-aaghat hin kompetisyon.” (Galasia 5:26, NW) Sigurado nga karuyag likyan han mga Kristiano nga magin diri-komportable o maawod an bisan hin-o, tungod ha pagpahibaro ha publiko han mga ngaran han mga humaratag.—1 Pedro 3:8.

Oo, pinaagi han paggios uyon ha mga prinsipyo nga aada ha Pulong han Dios, an pagregalo magpapabilin nga surok han kalipay.—Buhat 20:35.