An Pag-ilob ha mga Pagsari Nagriresulta hin Kadayawan ni Jehova

“Kon kamo magbubuhat hin maopay, ngan mag-aantos hito, ngan mag-iilob, kinaruruyag ini han Dios.”—1 PEDRO 2:20.

 1. Tungod kay an totoo nga mga Kristiano disidido ha pagtuman han ira dedikasyon, ano nga pakiana an kinahanglan tagdon?

 AN MGA Kristiano dedikado kan Jehova ngan naruruyag ha pagbuhat han iya kaburut-on. Basi matuman an ira dedikasyon, nangangalimbasog gud hira nga sundon an mga pitad han ira Susbaranan, hi Jesu-Kristo, ngan magtestigo han kamatuoran. (Mateo 16:24; Juan 18:37; 1 Pedro 2:21) Kondi, hi Jesus ngan an iba nga mga magtinumanon nagsakripisyo han ira kinabuhi sugad nga mga martir tungod han ira pagtoo. Nangangahulogan ba ini nga an ngatanan nga mga Kristiano makakalaom nga mamatay tungod han ira pagtoo?

 2. Paonan-o gintatagad han mga Kristiano an mga pagsari ngan pag-antos?

² Sugad nga mga Kristiano, ginsasagda kita nga magin matinumanon tubtob ha kamatayon, kondi diri ini nangangahulogan nga kinahanglan kita pirme mamatay tungod han aton pagtoo. (2 Timoteo 4:7; Pahayag 2:10) Nangangahulogan ini nga bisan kon disidido kita mag-antos—ngan, kon kinahanglanon, mamatay—tungod han aton pagtoo, diri naton karuyag mag-antos ngan mamatay. Diri kita nalilipay ha pag-antos ngan ha kasakit o pagtamay. Kondi, tungod kay malalaoman an mga pagsari ngan pagtimaraot, kinahanglan aton hunahunaon hin maopay kon paonan-o kita magios kon umatubang kita hito.

Matinumanon Ilarom han Pagsari

 3. Ano nga mga ehemplo ha Biblia mahitungod han paglampos ha pagtimaraot an imo maisasaysay? (Kitaa an kahon nga “Kon Paonan-o Hira Naglampos ha Pagtimaraot,” ha sunod nga pahina.)

³ Ha Biblia, mababasa naton an damu nga mga asoy nga nagpapakita kon paonan-o ginios an mga surugoon han Dios ha naglabay han inatubang hira hin mga kahimtang diin nameligro an ira kinabuhi. An magkalainlain nga mga paagi han ira paggios naghahatag hin giya para ha mga Kristiano yana kon kinahanglan umatubang hira hin pariho nga mga pagsari ngan pagtimaraot. Tagda an mga asoy ha kahon nga “Kon Paonan-o Hira Naglampos ha Pagtimaraot,” ngan kitaa kon ano an mahibabaroan mo tikang ha ira.

 4. Ano an masisiring mahitungod han paggios ni Jesus ngan han iba nga magtinumanon nga mga surugoon han nag-antos hira hin pagsari?

⁴ Bisan kon ibaiba an reaksyon ni Jesus ngan han iba nga matinumanon nga mga surugoon han Dios ha pagtimaraot, depende ha mga kahimtang, matin-aw nga waray nira tuyoa nga ibutang ha peligro an ira kinabuhi. Han nahingada hira ha peligroso nga mga kahimtang, hira maisugon kondi maikmat. (Mateo 10:16, 23) An ira katuyoan amo an pagpadayon ha pagsangyaw nga buruhaton ngan pagtipig han ira integridad ngadto kan Jehova. An ira mga paggios ha magkalainlain nga mga kahimtang naghahatag hin mga susbaranan para hadton mga Kristiano yana nga naatubang hin mga pagsari ngan pagtimaraot.

 5. Ano nga pagtimaraot an nahitabo ha Malawi ha dekada han 1960, ngan paonan-o ginios an mga Saksi didto?

⁵ Ha moderno nga mga panahon, an katawohan ni Jehova agsob nga nakakaeksperyensya hin duro nga kakurian ngan kawad-i hin mga kinahanglanon tungod han mga girra, mga pagdiri, o direkta nga pagtimaraot. Pananglitan, ha dekada han 1960, an mga Saksi ni Jehova ha Malawi gintimaraot hinduro. An ira mga Kingdom Hall, mga balay, mga pagkaon, ngan mga negosyo—haros an ngatanan nga ira mga panag-iya—ginbungkag. Nag-antos hira hin mga pagkastigo ngan iba pa nga makuri hinduro nga mga eksperyensya. Paonan-o  ginios an kabugtoan? Yinukot an kinahanglan bumaya ha ira mga baryo. Damu an pinalagiw ngadto ha kagurangan, samtang an iba temporaryo nga binalhin ha kahirani nga nasud nga Mozambique. Bisan kon damu nga magtinumanon an namatay, an iba pinalagiw tikang hiton peligroso nga lugar, nga matin-aw nga amo an angay buhaton ha sugad nga mga kahimtang. Ha pagbuhat hito, ginsubad han kabugtoan an susbaranan nga ipinakita ni Jesus ngan ni Pablo.

 6. Ano an waray pasibay-i han mga Saksi ha Malawi bisan pa han mabangis nga pagtimaraot?

⁶ Bisan kon an taga-Malawi nga kabugtoan kinahanglan pumalagiw o magtago, ginbiling ngan ginsunod nira an teokratiko nga giya ngan nagpadayon ha ira Kristiano nga mga buruhaton hin patago ha bug-os nga mahihimo nira. Ano an resulta? Nadangat an pungkay nga 18,519 nga magwarali han Ginhadian antes gud han pagdiri han 1967. Bisan kon nagpadayon pa gihapon an pagdiri ngan damu an pinalagiw na ngadto ha Mozambique, usa ka bag-o nga pungkay nga 23,398 nga magwarali an iginreport han 1972. Nag-aberids hira hin sobra 16 ka oras ha ministeryo kada bulan. Sigurado, an ira mga buhat nagresulta hin kadayawan ni Jehova, ngan ginbendisyonan ni Jehova adton magtinumanon nga  kabugtoan durante hiton makuri hinduro nga panahon. a

7, 8. Ano an mga hinungdan nga nagdesisyon an iba nga diri pumalagiw, bisan kon an pagkontra nakakahimo hin mga problema?

⁷ Ha luyo nga bahin, ha mga nasud diin an pagkontra nakakahimo hin mga problema, an iba nga kabugtoan bangin magdesisyon nga diri bumaya, bisan kon mahihimo nira ito. An pagbaya bangin makasulbad hin pipira nga mga problema, kondi bangin makahimo ito hin iba liwat nga mga problema. Pananglitan, maipapadayon ba nira an pakigkita ha Kristiano nga kabugtoan ngan diri mahibulag ha espirituwal? Makakagpadayon ba hira ha ira espirituwal nga rutina samtang nangangalimbasog hira nga magin maopay utro an ira kahimtang, bangin ha mas mainuswagon nga nasud o ha usa nga naghahatag hin damu nga mga higayon para ha pag-uswag ha materyal?—1 Timoteo 6:9.

⁸ An iba waray bumalhin tungod kay interesado hira ha espirituwal nga kaopayan han ira kabugtoan. Ginpili nira nga magpabilin ngan atubangon an kahimtang basi makagpadayon ha pagsangyaw ha ira teritoryo ngan magin surok han pagparig-on ha mga igkasi-tumuroo. (Filipos 1:14) Pinaagi hito nga mga desisyon, an iba nakabulig pa ngani ha legal nga mga kadaogan ha ira nasud. b

 9. Ano nga mga butang an kinahanglan tagdon han usa ka tawo kon nagdidesisyon kon magpapabilin ba o mabalhin tungod han pagtimaraot?

⁹ An pagpabilin o pagbalhin—personal gud nga desisyon. Syempre, an sugad nga mga desisyon sadang la himoon katapos han aton mainampoon nga pamiling han giya ni Jehova. Kondi, anoman an aton buhaton, kinahanglan hinumdoman naton an mga pulong ni apostol Pablo: “An tagsatagsa ha aton maghahatag ha Dios hin ihap mahitungod han iya kalugaringon.” (Roma 14:12) Sugad han natigamnan naton kanina, ginkikinahanglan ni Jehova nga an kada usa han iya mga surugoon magpabilin nga matinumanon ha ngatanan nga mga kahimtang. An iba han iya mga surugoon naatubang hin mga pagsari ngan pagtimaraot yana;  an iba bangin ha urhi. An ngatanan sasarihan ha anoman nga paagi, ngan waray sadang maglaom nga diri hiya makakaeksperyensya hito. (Juan 15:19, 20) Sugad nga dedikado nga mga surugoon ni Jehova, diri naton malilikyan an isyu ha uniberso nga may kalabotan ha pagbaraan han ngaran ni Jehova ngan pagbindikar han iya pagkasoberano.—Esekiel 38:23; Mateo 6:9, 10.

“Diri Kamo Magbayad Bisan Kanay hin Maraot ha Maraot”

10. Ano nga importante nga susbaranan an ipinakita ni Jesus ngan han mga apostol para ha aton ha paglampos ha mga pag-ipit ngan pagkontra?

¹⁰ Usa pa nga importante nga prinsipyo nga mahibabaroan naton tikang ha paggios ni Jesus ngan han mga apostol durante han pag-ipit amo an diri gud pagbulos ha aton mga persigidor. Waray kita mababasa ha Biblia nga bisan ano nga nagpapasabot nga hi Jesus o an iya mga sumurunod nag-organisa han ira kalugaringon basi magin usa nga grupo han mga nakontra o naggamit hin kamadarahog basi makig-away ha ira mga persigidor. Ha kabaliktaran, “diri kamo magbayad bisan kanay hin maraot ha maraot,” nagsagdon hi apostol Pablo ha mga Kristiano. “Diri kamo bumulos, mga hinigugma, kondi tagi niyo hin lugar an kasina han Dios; kay nahisurat na: akon an pagbulos; ako an mabayad, siring han Ginoo.” Dugang pa, “ayaw padaog han maraot; kondi dumaog ka ha maraot biling ha maopay.”—Roma 12:17-21; Salmo 37:1-4; Proberbios 20:22.

11. Ano an ginsiring han usa nga historyador mahitungod han iginawi han siyahan nga mga Kristiano ha Estado?

¹¹ Ginsunod han siyahan nga mga Kristiano iton nga sagdon. Ha iya libro nga The Early Church and the World, iginhuhulagway han historyador nga hi Cecil J. Cadoux an iginawi han mga Kristiano ha Estado durante han peryodo han 30-70 K.P. Hiya nagsurat: “Waray kami direkta nga ebidensya nga an mga Kristiano hini nga peryodo nangalimbasog ha pagkontra han pagtimaraot pinaagi han puwersa. An pinakamakatirigamnan na nga nahihimo nira amo an mapuwersa nga pagkondenar ha ira mga magmarando o pagwurok ha ira pinaagi han pagpalagiw. Kondi, an normal nga paggios han mga Kristiano ha pagtimaraot amo an kontrolado kondi marig-on nga pagdumiri ha pagsugot ha mga sugo han gobyerno nga kombinsido hira nga nakontra ha pagsugot kan Kristo.”

12. Kay ano nga mas maopay an pag-ilob han pag-antos kay ha pagbulos?

¹² An sugad ba nga baga in kontrolado nga buhat amo an pinakamaaramon nga desisyon? Diri ba an bisan hin-o nga nagios hito nga paagi magigin masayon mabiktima hadton determinado nga poohon hira? Diri ba maaramon an pagdepensa ha kalugaringon? Tikang ha punto-de-bista han tawo, bangin ito an angay. Kondi, sugad nga mga surugoon ni Jehova, nasarig kita nga an pagsunod ha giya ni Jehova ha ngatanan nga mga butang amo an gimaopayi. Nahinunumdoman naton an mga pulong ni Pedro: “Kon kamo magbubuhat hin maopay, ngan mag-aantos hito, ngan mag-iilob, kinaruruyag ini han Dios.” (1 Pedro 2:20) Nasarig kita nga maaram gud hi Jehova han kahimtang ngan diri hiya matugot nga magpadayon ito ha waray kataposan. Paonan-o kita makakasiguro hito? Ha iya katawohan nga bihag ha Babilonya, hi Jehova nagpahayag: “Hiya nga nakawkaw ha iyo nakawkaw ha tawotawo han akon mata.” (Sakarias 2:8) Tubtob san-o tutugotan han  bisan hin-o nga kawkawon an tawotawo han iya mata? Hi Jehova maghahatag hin katalwasan ha husto nga panahon. Waray bisan ano nga pagruhaduha mahitungod hito.—2 Tesalonika 1:5-8.

13. Kay ano nga gintugotan ni Jesus nga dakpon hiya han mga kaaway?

¹³ May kalabotan hini, makakalaom kita kan Jesus sugad nga aton susbaranan. Han gintugotan niya an iya mga kaaway nga dakpon hiya ha hardin han Getsemani, diri ito tungod kay diri niya mahihimo nga depensahan an iya kalugaringon. Ha pagkamatuod, iya ginsumatan an usa han iya mga disipulo: “Naghuhunahuna ka ba, nga diri ako yana sadang makaaro ha akon Amay, ngan hiya mapakanhi ha akon hin labi hin napulo kag duha nga legion nga mga anghel? Busa, ano an katuman han Santos nga Surat kay kinahanglan paghimoon hin sugad?” (Mateo 26:53, 54) Importante gud kan Jesus an pagbuhat han kaburut-on ni Jehova, bisan kon mangahulogan ito han iya pag-antos. Bug-os nga nasarig hiya ha mga pulong han matagnaon nga salmo ni David: “Diri mo babayaan an akon kalag ha lubnganan; diri ka man matugot nga an imo kabaraan makakita hin kaduntan.” (Salmo 16:10) Paglabay hin mga tuig hi apostol Pablo nagsiring mahitungod kan Jesus: “Hiya tungod han kalipay nga ibinutang ha iya atubangan, nag-antos han krus [“pasakitan nga kahoy,” NW], nagtamay han kaalo, ngan naglingkod didto ha too han lingkuranan han Dios.”—Hebreo 12:2.

An Kalipay ha Pagbaraan han Ngaran ni Jehova

14. Ano nga kalipay an nagpakusog kan Jesus basi makailob han ngatanan nga mga pagsari ha iya?

¹⁴ Ano nga kalipay an nagpakusog kan Jesus basi makailob han makuri hinduro nga pagsari? Ha ngatanan nga mga surugoon ni Jehova, hi Jesus, an hinigugma nga Anak han Dios, sigurado nga amo an nangunguna nga puntirya ni Satanas. Salit an pagtipig ni Jesus han iya integridad ilarom han pagsari amo an pinakamakatirigamnan nga baton ha pagtamay ni Satanas kan Jehova. (Proberbios 27:11) Mahahanduraw mo ba an kalipay ngan katagbaw nga  inabat ni Jesus han ginbanhaw hiya? Sigurado nga malipayon gud hiya, maaram nga natuman niya an obligasyon nga iginhatag ha iya sugad nga hingpit nga tawo ha pagbindikar han pagkasoberano ni Jehova ngan ha pagbaraan han Iya ngaran! Dugang pa, an iya paglingkod “ha too han lingkuranan han Dios” sigurado nga usa ka urusahon nga kadungganan ngan gidadakui nga hinungdan han kalipay para kan Jesus.—Salmo 110:1, 2; 1 Timoteo 6:15, 16.

15, 16. Ano nga mabangis nga pagtimaraot an gin-ilob han mga Saksi ha Sachsenhausen, ngan ano an nagpakusog ha ira basi makailob?

¹⁵ Para ha mga Kristiano, makalilipay liwat an pakigbahin ha pagbaraan han ngaran ni Jehova pinaagi han pag-ilob ha mga pagsari ngan pagtimaraot, nga ginsusunod an susbaranan ni Jesus. Usa nga angayan nga ehemplo amo an eksperyensya han mga Saksi nga nag-antos ha bantog-ha-karaotan nga kampo nga prisohan han Sachsenhausen ngan nakatalwas ha ira makangingirhat hinduro nga martsa ha kamatayon ha kataposan han Girra ha Kalibotan II. Durante han martsa, yinukot nga mga priso an namatay tungod ha kapaso ngan katugnaw, sakit, o gutom o mabangis nga ginpatay han SS nga mga gwardya dida mismo ha ligid han dalan. An mga Saksi, 230 hira ngatanan, nakatalwas pinaagi han duok nga pagtarampo ngan pagbulig ha usa kag usa bisan kon nameligro an ira kalugaringon nga kinabuhi.

¹⁶ Ano an nagpakusog hini nga mga Saksi basi makailob hiton mabangis nga pagtimaraot? Ha pakadangat gud nira ha talwas nga lugar, ira iginpahayag an ira kalipay ngan pagpasalamat kan Jehova ha usa nga dokumento nga may ulohan nga “An resolusyon han 230 nga mga Saksi ni Jehova tikang ha unom nga nasud, nga nagkatirok ha usa nga kagurangan hirani ha Schwerin ha Mecklenburg.” Hito nga resolusyon, hira nagsiring: “Natapos na an hilawig, makuri nga peryodo han pagsari ha amon ngan adton nagpapabilin nga buhi, ginkuha tikang ha naglalaga nga hudno siring pa, waray ngani hira mangamyon hin kalayo. (Kitaa an Daniel 3:27.) Ha kabaliktaran, puno hira hin kusog ngan gahum tikang kan Jehova ngan madasigon nga naghuhulat hin bag-o nga mga sugo tikang ha Hadi ha pagpauswag han Teokratiko nga mga buruhaton.” c

17. Ano nga mga klase hin mga pagsari an inaatubang han katawohan han Dios yana?

¹⁷ Pariho hadton 230 nga magtinumanon, bangin sarihan liwat an aton pagtoo, bisan kon waray pa kita “makig-away tubtob ha dugo.” (Hebreo 12:4, NW) Kondi damu nga klase an pagsari. Bangin pagtamay ito han mga kaklase, o bangin pag-ipit han mga kaupod nga magbuhat hin imoralidad ngan iba pa nga mga sayop. Dugang pa, an determinasyon ha paglikay ha dugo, pag-asawa ha Ginoo la, o pagmangno ha kabataan ha paagi han kamatuoran dida ha ibaiba an relihiyon nga panimalay usahay mahimo magresulta ha duro nga mga pag-ipit ngan mga pagsari.—Buhat 15:29; 1 Korinto 7:39; Efeso 6:4; 1 Pedro 3:1, 2.

18. May-ada kita ano nga pasarig nga maiilob naton bisan an makuri hinduro nga pagsari?

¹⁸ Kondi, anoman nga pagsari an umabot ha aton, maaram kita nga nag-aantos kita tungod kay inuuna naton hi Jehova ngan an iya Ginhadian, ngan gintatagad naton nga usa ka daku nga pribilehiyo ngan kalipay an pagbuhat hito. Nagkakaada kita kaisog tikang ha nagpapasarig nga mga pulong ni Pedro: “Kon mga ginpapasipara kamo tungod ha ngaran ni Kristo, mga bulahan kamo; kay an espiritu han himaya ngan an espiritu han Dios aada ha iyo.” (1 Pedro 4:14) Ha gahum han espiritu ni Jehova, may-ada kita kusog ha pag-ilob bisan han makuri hinduro nga mga pagsari, an ngatanan ha paghimaya ngan pagdayaw ha iya.—2 Korinto 4:7; Efeso 3:16; Filipos 4:13.

[Mga footnote]

Maisasaysay Mo Ba?

• Paonan-o ginhuhunahuna han mga Kristiano an pag-antos ngan pagtimaraot?

• Ano an mahibabaroan naton tikang ha paggios ni Jesus ngan han iba nga mga magtinumanon han nag-antos hira hin pagsari?

• Kay ano nga maaramon an diri pagbulos kon gintitimaraot kita?

• Ano nga kalipay an nagpakusog kan Jesus basi makailob han mga pagsari ha iya, ngan ano an mahibabaroan naton tikang hini?

[Mga Pakiana]

[Kahon/Mga Retrato ha pahina 15]

Kon Paonan-o Hira Naglampos ha Pagtimaraot

• Antes umabot ha Betlehem an mga sundalo ni Herodes basi patayon an ngatanan nga kabataan nga lalaki nga dos anyos an edad ngan paubos, pinaagi han giya han anghel gindara ni Jose ngan ni Maria an minasus-an nga hi Jesus ngan pinalagiw ngadto ha Ehipto.—Mateo 2:13-16.

• Damu ka beses durante han ministeryo ni Jesus, an iya mga kaaway nag-iparatay ha iya tungod han iya mapuwersa nga pagtestigo. Ginlikyan hira ni Jesus ha tagsa nga okasyon.—Mateo 21:45, 46; Lukas 4:28-30; Juan 8:57-59.

• Han an mga sundalo ngan mga opisyal inabot ha hardin han Getsemani ha pagdakop kan Jesus, dayag nga iginpakilala niya an iya kalugaringon, makaduha nga nagsiring hiya ha ira: “Amo ako.” Ginpaundang pa ngani niya an iya mga sumurunod ha pag-ato ngan gintugotan an grupo nga dad-on hiya.—Juan 18:3-12.

• Ha Jerusalem, hi Pedro ngan an iba pa gindakop, ginkastigo, ngan ginsugo nga diri na magyakan mahitungod kan Jesus. Kondi, han pakagawas “hira nagkalakat . . . , ngan adlaw-adlaw waray hira ukoy ha panutdo, ngan pagwali, nga hi Jesus amo an Kristo, didto ha templo ngan ha ira balay.”—Buhat 5:40-42.

• Han hinbaroan ni Saulo, nga ha urhi nagin hi apostol Pablo, an plano han mga Judio ha Damasko nga patayon hiya, iginbutang hiya han kabugtoan ha usa nga alat ngan igintunton hiya ha usa nga buho ha pader han siyudad han gab-i na, ngan pinalagiw hiya.—Buhat 9:22-25.

• Paglabay hin mga tuig, nagdesisyon hi Pablo nga dumangop kan Cesar, bisan kon hi Gobernador Pesto ngan hi Hadi Agripa waray makaagi “hin bisan ano nga takos igpatay, o iggapos” ha iya.—Buhat 25:10-12, 24-27; 26:30-32.

[Mga Retrato ha pahina 16, 17]

Bisan kon napiritan ha pagpalagiw tungod han makuri nga pagtimaraot, yinukot nga magtinumanon nga mga Saksi ha Malawi an malipayon nga nagpadayon ha pag-alagad ha Ginhadian

[Mga Retrato ha pahina 17]

An kalipay ha pagbaraan han ngaran ni Jehova nagpakusog hini nga mga magtinumanon basi makailob han Nazi nga martsa ha kamatayon ngan ha mga kampo nga prisohan

[Ginkuhan han Retrato]

Martsa ha kamatayon: KZ-Gedenkstätte Dachau, ha pagtugot han USHMM Photo Archives

[Mga Retrato ha pahina 18]

Damu nga klase an mga pagsari ngan mga pag-ipit