Gintimaraot Tungod han Katadongan

“Bulahan an mga gintitimaraot tungod han katadongan.”—MATEO 5:10.

 1. Kay ano nga hi Jesus nakadto ha atubangan ni Ponsio Pilato, ngan ano an ginsiring ni Jesus?

 “TUNGOD hini nagpakatawo ako ngan tungod hini ako kinanhi ha kalibotan, basi ako magtestigo han kamatuoran.” (Juan 18:37) Han ginsiring ni Jesus iton nga mga pulong, nakadto hiya ha atubangan ni Ponsio Pilato, an Romano nga gobernador han Judea. Nakadto hi Jesus diri tungod kay karuyag niya o tungod kay gindapit hiya ni Pilato. Lugod, nakadto hiya tungod kay an Judio nga mga lider han relihiyon sayop nga nag-akusar ha iya han pagin magburuhat hin maraot nga takos patayon.—Juan 18:29-31.

 2. Ano an ginbuhat ni Jesus, nga nagresulta hin ano?

² Maaram gud hi Jesus nga hi Pilato may-ada awtoridad ha pagpagawas ha iya o ha pagpatay ha iya. (Juan 19:10) Kondi waray ito makapugong ha iya ha pagyakan hin maisugon ngadto kan Pilato mahitungod han Ginhadian. Bisan kon nameligro an kinabuhi ni Jesus, ginsalingabot niya an higayon ha pagtestigo ha gihitaasi nga opisyal han gobyerno hiton nga rehiyon. Bisan pa hiton nga pagtestigo, hi Jesus ginkondenar ngan ginpatay, namatay ha masakit nga paagi sugad nga martir ha pasakitan nga kahoy.—Mateo 27:24-26; Markos 15:15; Lukas 23:24, 25; Juan 19:13-16.

Testigo o Martir?

 3. Ano an kahulogan han pulong nga “martir” ha mga panahon han Biblia, kondi ano an kahulogan hito yana?

³ Para ha damu nga mga tawo yana nga panahon, an usa nga martir baga in katugbang han usa nga panatiko, usa nga rebelde. An mga tawo nga disidido mamatay tungod han ira tinotoohan, labi na ha relihiyon, agsob nga ginsususpetsahan sugad nga mga terorista o peligroso ha komunidad. Kondi, an pulong nga martir nagtikang ha Griego nga termino (marʹtys) nga ha mga panahon han Biblia nangahulogan hin “testigo,” usa ka tawo nga nag-aasoy, bangin ha bista ha hukmanan, han kamatuoran nga iya tinotoohan. Ha urhi na la nga an termino nagkaada kahulogan nga “usa nga nagsasakripisyo han iya kinabuhi tungod ha pagtestigo,” o pagtestigo pa ngani pinaagi han pagsakripisyo han kinabuhi han usa.

 4. Ano an siyahan nga hinungdan nga hi Jesus usa nga martir?

⁴ Hi Jesus usa nga martir sumala ha nahiuna nga kahulogan han pulong. Sugad han iya ginsiring kan Pilato, hiya kinanhi basi “magtestigo han kamatuoran.” An iya pagtestigo nag-aghat hin  magkaiba gud nga mga reaksyon ha mga tawo. An iba nga ordinaryo nga mga tawo nabantad gud han ira hinbatian ngan hinkit-an, ngan hira nagtoo kan Jesus. (Juan 2:23; 8:30) An damu nga mga tawo ha kabug-osan ngan labi na an mga lider han relihiyon duro liwat an reaksyon—kondi diri maopay. Iginpatin-aw ni Jesus ha iya diri-tumuroo nga mga paryente: “An kalibotan diri makakagdumot ha iyo, kondi nagdudumot ha akon, kay ako nagmamatuod, nga an mga buhat hito magraot.” (Juan 7:7) Tungod kay hiya nagtestigo han kamatuoran, an mga lider han nasud nasina kan Jesus, nga nagresulta ha iya kamatayon. Oo, hiya “an matinumanon ngan matuod nga testigo (marʹtys).”—Pahayag 3:14.

“Kamo Pagdudumtan”

 5. Temprano ha iya ministeryo, ano an ginsiring ni Jesus mahitungod han pagtimaraot?

⁵ Diri la kay nag-antos hi Jesus hin mabangis nga pagtimaraot kondi iya liwat ginpahamangnoan nga daan an iya mga sumurunod nga hira mag-aantos hin pariho nga pagtimaraot. Temprano ha iya ministeryo, hi Jesus nagsiring ha iya mga mamarati ha iya Sermon ha Bukid: “Bulahan an mga gintitimaraot tungod han katadongan, kay ira an ginhadian han langit. Bulahan kamo, kon kamo pagdurugasan, ngan pagtitimarat-an ngan kon pagyayaknan ha ngatanan nga magraot hin buwa kontra ha iyo tungod ha akon. Magkalipay ngan maghimaya kamo, kay daku an iyo balos ha langit.”—Mateo 5:10-12.

 6. Ano an iginpahamangno ni Jesus han sinugo niya an 12 nga apostol?

⁶ Ha urhi, han sinugo niya an 12 nga apostol, hi Jesus nagsiring ha ira: “Magtagam kamo ha mga tawo; kay igtutubyan kamo nira ha mga hukmanan, ngan didto ha ira mga sinagoga paghahampakon kamo nira. Oo, ngan ha atubangan han mga gobernador ngan han mga hadi pagdadad-on kamo tungod ha akon, ha pagpamatuod ha ira, ngan ha mga Hentil.” Kondi diri la mga lider ha relihiyon an magtitimaraot ha mga disipulo. Hi Jesus nagsiring liwat: “An bugto nga lalaki magtutubyan ha kamatayon han iya bugto nga lalaki; ngan an amay, ha anak; ngan an mga anak matindog kontra ha mga kag-anak, ngan pamamatayon hira. Ngan kamo pagdudumtan han  ngatanan nga mga tawo tungod han akon ngaran, kondi an magpadayon tubtob ha kataposan, ini amo an maluluwas.” (Mateo 10:17, 18, 21, 22) An kasaysayan han siyahan-siglo nga mga Kristiano usa nga ebidensya han pagkatotoo hiton nga mga pulong.

Usa nga Rekord han Matinumanon nga Pagpailob

 7. Ano an mga hitabo nga nagresulta ha pagin martir ni Esteban?

⁷ Waray pag-iha katapos mamatay hi Jesus, hi Esteban an siyahan nga Kristiano nga namatay tungod ha pagtestigo han kamatuoran. Hiya “puno han grasya ngan han gahum, [ngan] nagbubuhat han dagku nga mga katingalahan, ngan mga tigaman ha butnga han katawohan.” An iya relihiyoso nga mga kaaway “waray pakahimo pag-ato han kinaadman ngan han espiritu, nga iya iginyayakan.” (Buhat 6:8, 10) Tungod kay napuno hin pangabugho, ira gindanas hi Esteban ngadto ha atubangan han Sanhedrin, an hitaas nga hukmanan han mga Judio, diin inatubang niya an palso nga mga nag-akusar ha iya ngan nagtestigo hiya hin marig-on. Kondi, ha kataposan, ginpatay han mga kaaway ni Esteban inin matinumanon nga testigo.—Buhat 7:59, 60.

 8. Ano an reaksyon han mga disipulo ha Jerusalem ha pagtimaraot nga inabot ha ira katapos patayon hi Esteban?

⁸ Katapos patayon hi Esteban, “nahinabo an daku nga pagtimaraot kontra ha singbahan nga nakada ha Jerusalem; ngan an ngatanan nagpatlaag ha mga katunaan ha Judea ngan ha Samaria.” (Buhat 8:1) Napaundang ba han pagtimaraot an pagtestigo han mga Kristiano? Ha kabaliktaran, an asoy nagsusumat ha aton nga “an mga nagpatlaag, nagkarokalakat, ngan nanwali han pulong.” (Buhat 8:4) Sigurado nga inabat nira an inabat ni apostol Pedro han hiya nagsiring una pa: “Kinahanglan namon nga sugton an Dios san-o an mga tawo.” (Buhat 5:29) Bisan pa han pagtimaraot, adton matinumanon ngan maisugon nga mga disipulo nagpadayon ha buruhaton nga pagtestigo han kamatuoran, bisan kon maaram hira nga magriresulta ini hin dugang nga kakurian.—Buhat 11:19-21.

 9. Ano nga pagtimaraot an padayon nga inabot ha mga sumurunod ni Jesus?

⁹ Oo, nagpadayon an duro nga kakurian. Siyahan, hinbaroan naton nga hi Saulo—an tawo nga may pag-uyon nga nagkita ha pagbato kan Esteban—nga “naghahangos pa ha panarhog ngan pamatay ha mga tinon-an han Ginoo, dinaop . . . ha gihitaasi nga saserdote, ngan nangaro ha iya hin mga surat ngadto ha mga sinagoga ha Damasko, basi kon may niya hiagian bisan hin-o nga aada hini nga Dalan, bisan lalaki, bisan babaye, iya pagdadad-on nga ginapos ngadto ha Jerusalem.” (Buhat 9:1, 2) Katapos, han mga tuig 44 K.P., “hi Hadi Herodes nagsugo nga pagsakiton an iba nga mga membro han singbahan. Ngan ginpatay niya han kampilan hi Jakobo, nga bugto ni Juan.”—Buhat 12:1, 2.

10. Ano nga rekord han pagtimaraot an mababasa naton ha Mga Buhat ngan ha Pahayag?

¹⁰ An nahibibilin nga mga kapitulo han libro nga Mga Buhat nagsusulod hin permanente nga rekord han mga kakurian, kaprisohan, ngan pagtimaraot nga gin-ilob han mga magtinumanon sugad kan Pablo, an persigidor hadto nga nagin apostol, nga posible nga ginpatay sugad nga martir ha sugo han Romano nga hi Emperador Nero han mga 65 K.P. (2 Korinto 11:23-27; 2 Timoteo 4:6-8) Ha kataposan, ha libro nga Pahayag, nga iginsurat ha ikatarapos han siyahan nga siglo, hibabaroan naton nga an lagas nga hi apostol Juan ginpriso ha isla han Patmos “tungod ha pagyakan han pulong han Dios ngan pagpamatuod kan Jesus.” An Pahayag nag-unabi liwat kan “Antipas nga akon testigo, an matinumanon nga ginpatay” ha Pergamo.—Pahayag 1:9; 2:13.

11. Paonan-o pinamatud-an han buruhaton han siyahan nga mga Kristiano nga natuman an ginsiring ni Jesus may kalabotan ha pagtimaraot?

¹¹ Pinamatud-an hini ngatanan nga natuman an ginsiring ni Jesus ha iya mga disipulo: “Kon ako  ginbiling nira hin pagtimaraot amo man kamo pagbibilngon hin pagtimaraot.” (Juan 15:20) An matinumanon nga siyahan nga mga Kristiano disidido ha pag-atubang ha ultimo nga pagsari, an kamatayon—pinaagi han pagpasakit, paglaboga ngadto ha ihalas nga mga mananap, o ha iba nga paagi—basi matuman an sugo tikang ha Ginoo nga hi Jesu-Kristo: “Kamo magigin akon mga saksi ha Jerusalem ngan ha bug-os nga Judea ngan Samaria ngan tubtob ha gihirayoi nga dapit han tuna.”—Buhat 1:8, NW.

12. Kay ano nga an pagtimaraot ha mga Kristiano nahitabo diri la ha naglabay?

¹² Kon may-ada naghuhunahuna nga an sugad nga mabangis nga pagtrato ha mga sumurunod ni Jesus ha naglabay la nahitabo, nagsasayop gud hiya. Hi Pablo, nga sugad han aton hinbaroan nag-ilob hin damu nga kakurian, nagsurat: “An ngatanan nga nahigugma mabuhi nga matinahuron ha Dios kan Kristo Jesus mag-aantos hin pagtimarauta.” (2 Timoteo 3:12) Mahitungod han pagtimaraot, hi Pedro nagsiring: “Tungod hini mga gintawag kamo: kay hi Kristo nag-antos man tungod ha iyo, nga gintagan kamo hin susbaranan, basi kamo magsunod ha iya mga pitad.” (1 Pedro 2:21) Tikang pa hadto tubtob hinin “kataposan nga mga adlaw” hini nga sistema han mga butang, an katawohan ni Jehova padayon nga gindudumtan ngan gintitimaraot. (2 Timoteo 3:1) Ha bug-os nga tuna, ilarom han diktador nga mga gobyerno ngan ha demokratiko nga mga nasud, may-ada mga panahon nga an mga Saksi ni Jehova nag-aantos hin pagtimaraot, sugad nga indibiduwal ngan sugad nga grupo.

Kay Ano nga Gindudumtan Ngan Gintitimaraot Hira?

13. Ano an sadang hinumdoman han mga surugoon ni Jehova yana may kalabotan ha pagtimaraot?

¹³ Bisan kon an kadam-an ha aton yana nagpapahimulos hin kagawasan ha pagsangyaw ngan ha pagkatirok nga mamurayawon, kinahanglan tagdon naton an pahinumdom han Biblia nga “an taran-awon hini nga kalibotan nagbabag-o.” (1 Korinto 7:31, NW) Mahimo magbag-o dayon an mga butang salit kon diri kita andam ha hunahuna, ha emosyon, ngan ha espirituwal, mahimo kita mahipakdol. Ano, kon sugad, an mahimo naton buhaton ha pagpanalipod ha aton kalugaringon? Usa nga epektibo nga paagi han pagdepensa amo an paghinumdom hin matin-aw kon kay ano nga gindudumtan ngan gintitimaraot an mahigugmaon-ha-kamurayawan ngan masunuron-ha-balaud nga mga Kristiano.

14. Ano an ginsiring ni Pedro nga hinungdan kon kay ano nga gintimaraot an mga Kristiano?

¹⁴ Hi apostol Pedro nagkomento mahitungod hini ha iya siyahan nga surat, nga iya iginsurat han mga 62-64 K.P., han an mga Kristiano ha bug-os nga Imperyo han Roma nag-aantos hin mga kakurian ngan pagtimaraot. Hiya nagsiring: “Mga hinigugma, diri kamo magdumdom nga makatitingala an pagsulaya nga mapaso ha butnga niyo, nga nahinabo ha iyo ha pagproyba ha iyo, sugad nga daw usa nga makatitingala nga butang an nahinabo ha iyo.” Basi maisaysay kon ano an iya ginsisiring, hi Pedro nagpadayon: “Ayaw pagtugot nga usa ha iyo mag-antos sugad hin usa nga parapatay, o kawatan, o magburuhat hin maraot, o malabot ha mga butang han iba: kondi kon an usa ka tawo mag-antos tungod nga hiya Kristohanon, diri hiya maawod; kondi paghimayaon niya an Dios hini nga ngaran.” Iginpatin-aw ni Pedro nga hira nag-aantos, diri tungod ha pagbuhat hin maraot, kondi tungod ha pagin mga Kristiano. Kon hira nagbubuhat hin “kasamokan” sugad han ginbubuhat han mga tawo ha ira palibot, bangin kinarawat na unta hira han mga tawo. Kondi ha pagkamatuod, nag-antos hira tungod kay nangalimbasog hira ha pagtuman han ira buruhaton sugad nga mga sumurunod ni Kristo. Sugad liwat hito an kahimtang han totoo nga mga Kristiano yana.—1 Pedro 4:4, 12, 15, 16.

15. Ano an magkaiba nga pagtrato ha mga Saksi ni Jehova yana?

¹⁵ Ha damu nga mga lugar ha kalibotan, an mga Saksi ni Jehova gindadayaw han publiko tungod han pagkaurosa ngan kooperasyon nga ipinapakita nira ha ira mga kombensyon ngan mga proyekto ha pagtukod, tungod han ira pagin tangkod ngan pagin maduruto, tungod han ira maopay nga susbaranan ha moral nga paggawi ngan kinabuhi han pamilya, ngan tungod han ira maopay nga hitsura ngan paggios. a Ha luyo nga bahin, an ira buruhaton igindidiri ha 28 nga nasud han iginsurat ini nga artikulo, ngan damu nga mga Saksi an nag-aantos  hin pag-abusoha ha pisikal ngan kawad-i hin mga panag-iya tungod han ira pagtoo. Kay ano nga an mga Saksi ni Jehova, nga kilala ha maopay nga paggawi, igindidiri ngan inaabuso? Ngan kay ano nga tinutugotan ito han Dios?

16. Ano an pinakaimportante nga hinungdan nga tinutugotan han Dios an iya katawohan nga mag-antos hin pagtimaraot?

¹⁶ Siyahan ha ngatanan, sadang hinumdoman naton an mga pulong han Proberbios 27:11: “Anak ko, pagmakinaadmananon, ngan himoa an akon kasingkasing nga malipayon, nga ako makabaton ha iya nga nagsasaway [“nagtatamay,” NW] ha akon.” Oo, tungod ito han maiha na hinduro nga isyu han pagkasoberano ha uniberso. Bisan pa han damu na hinduro nga pagtestigo han ngatanan nga nagtipig han ira integridad ngadto kan Jehova ha paglabay han mga siglo, hi Satanas diri naundang ha pagtamay kan Jehova sugad han iya ginbuhat ha panahon han matadong nga hi Job. (Job 1:9-11; 2:4, 5) Sigurado, hi Satanas nagigin mas mabangis ha iya ultimo nga pangalimbasog ha pagpamatuod han iya pag-angkon, yana nga an Ginhadian han Dios natukod na hin marig-on, nga may-ada maunungon nga mga sakop ngan mga representante ha bug-os nga tuna. Magpapabilin ba hira nga matinumanon ha Dios anoman nga pag-antos ngan kakurian an umabot ha ira? Ini an pakiana nga kinahanglan personal nga batunon han tagsa nga surugoon ni Jehova.—Pahayag 12:12, 17.

17. Ano an karuyag sidngon ni Jesus ha mga pulong nga “ini mahinanabo ha iyo ha pagpamatuod”?

¹⁷ Ha pagsumat ha iya mga disipulo mahitungod han mga mahitatabo durante han “kataposan han kalibotan,” iginpakita ni Jesus an usa pa nga hinungdan kon kay ano nga tinutugotan ni Jehova an pagtimaraot nga mahitabo ha iya mga surugoon. Hiya nagsumat ha ira: “Pagdadad-on kamo ha atubangan han mga hadi, ngan ha mga gobernador tungod han akon ngaran. Ini mahinanabo ha iyo ha pagpamatuod.” (Mateo 24:3, 9; Lukas 21:12, 13) Hi Jesus mismo nagtestigo ha atubangan ni Herodes ngan ni Ponsio Pilato. Hi apostol Pablo liwat ‘gindara ha atubangan han mga hadi ngan mga gobernador.’ Tungod kay ginsugo han Ginoo nga hi Jesu-Kristo, hi Pablo naghangyo nga magtestigo ha pinakagamhanan nga magmarando hadto nga panahon han hiya nagsiring: “Ako madangop kan Cesar.” (Buhat 23:11; 25:8-12) Sugad man yana, an makuri nga mga kahimtang agsob nga nagriresulta hin maopay nga pagtestigo ha mga opisyal ngan ha publiko. b

18, 19. (a) Paonan-o kita magpapahimulos ha paglampos ha mga kakurian? (b) Ano nga mga pakiana an paghihisgotan ha masunod nga artikulo?

¹⁸ Ha kataposan, an paglampos ha mga kakurian ngan mga kagol-anan makakahatag ha aton hin kapulsanan. Ha ano nga paagi? Hi disipulo Jakobo nagpahinumdom ha iya mga igkasi-Kristiano: “Mga kabugtoan ko, isipon niyo sugad hin bug-os nga kalipay, kon mahulog kamo ha mga magkadirodilain nga panulay; kay hinbaroan niyo nga an pagproyba ha iyo pagtoo nabunga hin pag-ilob.” Oo, an pagtimaraot mahimo magpauswag han aton pagtoo ngan magparig-on han aton pagpailob. Salit, diri kita nahahadlok hito, diri man kita namimiling hin diri-Kasuratanhon nga paagi ha paglikay o pagtapos hito. Lugod, aton ginsusunod an sagdon ni Jakobo: “An pag-antos maghingpit unta ha iya buhat, basi nga mahingpit kamo ngan mabug-os, waray kakulangan niyo hin bisan ano nga bagay.”—Jakobo 1:2-4.

¹⁹ Bisan kon an Pulong han Dios nabulig ha aton nga masabtan kon kay ano nga gintitimaraot an matinumanon nga mga surugoon han Dios ngan kon kay ano nga tinutugotan ito ni Jehova, diri karuyag sidngon nga tungod hito nagigin masayon na ilubon an pagtimaraot. Ano an magpaparig-on ha aton basi makailob hito? Ano an mahihimo naton kon naatubang kita hin pagtimaraot? Aton paghihisgotan inin importante nga mga butang ha masunod nga artikulo.

[Mga footnote]

Maisaysay Mo Ba?

• Ano an siyahan nga hinungdan nga hi Jesus usa nga martir?

• Ano an epekto han pagtimaraot ha siyahan-siglo nga mga Kristiano?

• Sugad han iginsaysay ni Pedro, kay ano nga gintimaraot an siyahan nga mga Kristiano?

• Ano an mga hinungdan nga tinutugotan ni Jehova an pagtimaraot nga mahitabo ha iya mga surugoon?

[Mga Pakiana]

[Mga Retrato ha pahina 10, 11]

An siyahan-siglo nga mga Kristiano nag-antos, diri tungod han anoman maraot nga mga buhat, kondi tungod han ira pagin mga Kristiano

PABLO

JAKOBO

JUAN

ANTIPAS

ESTEBAN