Sumat han mga Parasamwak han Ginhadian

“Nakakagtutdo Gud Ini!”

GIN-UPDAN ni Dorota, usa nga bug-os-panahon nga ministro han mga Saksi ni Jehova ha Polandia, an iya 14-anyos nga anak nga lalaki ngadto ha regular nga pagpa-check-up ha klinika han eskwelahan. Durante han pag-check-up, ginpakianhan hi Dorota han doktora nga hi Janina, a mahitungod han mga buruhaton han iya anak ha balay.

“An akon anak an nag-aandam han panihapon para ha amon ngatanan nga unom nga membro han pamilya, kon diri ako nakakag-andam,” binaton hi Dorota. “Naglilimpyo liwat hiya ha balay ngan nabulig ha pag-ayad han mga guba. Naruruyag hiya ha pagbasa ngan maduruto hiya nga estudyante.”

“Talagsahon gud ito,” siring ni Janina. “Dose ka tuig na ako nga nagtatrabaho dinhi, ngan waray pa gud ako makabati hin bisan ano nga pariho hini.”

Tungod kay nakita an higayon ha pagsangyaw, hi Dorota nagsaysay: “Damu nga mga kag-anak yana an napapakyas ha paghatag hin husto nga pagbansay ha ira mga anak. Salit an ira mga anak agsob nga gutiay la an pagtahod ha kalugaringon.”

“Paonan-o mo hinbaroan ini ngatanan?” nagpakiana hi Janina. “Kadam-an nga mga kag-anak an diri maaram hini.”

“An Biblia presyoso nga surok han sugad nga impormasyon,” binaton hi Dorota. “Pananglitan, sumala ha Deuteronomio 6:6-9, an pagtutdo ha aton mga anak nagtitikang ha pagtutdo ha aton kalugaringon. Diri ba sadang naton ipasilsil anay ha aton kalugaringon nga kasingkasing ngan hunahuna an mga hiyas nga karuyag naton ipasilsil ha aton mga anak?”

“Talagsahon gud ito,” siring ni Janina. “Talagsahon gud ito!” Katapos ginpakianhan niya hi Dorota kon paonan-o nakabulig ha iya an Biblia ha pagpatubo ngan pagtutdo ha iya mga anak.

“Gin-aadman namon an Biblia upod han amon mga anak kada semana,” nagsaysay hi Dorota. “Nagamit kami hin libro nga may ulohan nga Questions Young People Ask—Answers That Work.” b Katapos nagpadayon hiya ha paghulagway han libro ngan pag-unabi han pipira han mga topiko nga ginhihisgotan hito.

“Nakakagtutdo gud ini!” siring ni Janina ha daku nga tingog. “Mahimo ko ba makita ito nga libro?”

Paglabay hin usa ka oras, binalik hi Dorota nga dara na an libro.

“Ano an imo relihiyon?” nagpakiana hi Janina, samtang iya gin-uusisa an libro.

“Usa ako han mga Saksi ni Jehova.”

“Paonan-o gintatrato han mga Saksi ni Jehova an mga membro han iba nga relihiyon?”

“Sugad han akon pagtrato ha imo—may pagtahod,” binaton hi Dorota, ngan hiya nagdugang: “Syempre, hingyap namon nga mahibaro hira han kamatuoran han Biblia.”

“Mas maopay na an akon pag-abat,” siring ni Janina.

Ha kataposan han iya pagbisita, ginsagda ni Dorota hi Janina nga basahon an Biblia. “Maghahatag ito hin kahulogan ha imo kinabuhi ngan mabulig ha imo dida ha imo trabaho.”

“Naaghat mo gud ako ha pagbuhat hito,” siring ni Janina.

Pinaagi han taktika ngan determinasyon, ginhimo ni Dorota an usa nga regular nga pagbisita ha klinika han doktor nga magin higayon ha maopay gud nga pagpamatuod.—1 Pedro 3:15.

[Mga footnote]