Panhilabot han Dios—Ano an Aton Malalaoman?

HAN ikawalo ka siglo A.K.P., hinbaroan han 39-anyos nga hi Hadi Hesekia han Juda nga may-ada hiya makamaratay nga sakit. Tungod kay nasubo ha sumat, nanginyupo hi Hesekia ha Dios pinaagi han pag-ampo nga tambalon hiya. Binaton an Dios pinaagi han iya propeta: “Akon hinbatian an imo pag-ampo, akon hinkit-an an imo mga luha: kitaa, akon dudugangan an imo mga adlaw manapulo kag lima ka tuig.”—Isaias 38:1-5.

Kay ano nga naghilabot an Dios hito nga partikular nga okasyon? Mga siglo una pa, ginsaaran han Dios an matadong nga hi Hadi David: “An imo balay ngan an imo ginhadian magmamarig-on ha waray kataposan ha imo atubangan: an imo lingkoran nga hadianon  matutukod ha waray kataposan.” Iginsumat liwat han Dios nga an Mesias matatawo ha katulinan ni David. (2 Samuel 7:16; Salmo 89:20, 26-29; Isaias 11:1) Han nagkasakit hi Hesekia, waray pa hiya anak nga lalaki. Salit, an hadianon nga katulinan ni David namimeligro nga mautod. An panhilabot han Dios ha kahimtang ni Hesekia may-ada espisipiko nga katuyoan nga amo an pagtipig han katulinan nga magtutugway ngadto ha Mesias.

Basi matuman an iya mga saad, napagios hi Jehova nga maghilabot para ha iya katawohan ha damu nga mga okasyon ha bug-os han antes-Kristiano nga panahon. Iginpahayag ni Moises an may kalabotan ha kagawasan han Israel tikang ha pagkabihag ha Ehipto: “Tungod kay hi Jehova nahigugma ha iyo, ngan tungod kay iya ginbantayan an panumpa nga ipinanumpa niya ha iyo mga amay, hi Jehova pinaagi han makusog nga kamot, nagdara ha iyo.”—Deuteronomio 7:8.

Han siyahan nga siglo, an panhilabot han Dios nakabulig liwat ha padayon nga katuman han iya mga katuyoan. Pananglitan, ha dalan tipakadto ha Damasko, an Judio nga hi Saulo kinarawat hin milagroso nga bisyon basi paundangon hiya ha pagtimaraot ha mga disipulo ni Kristo. An kakombirte hini nga tawo, nga ha urhi nagin hi apostol Pablo, importante ha pagpasarang han maopay nga sumat ngadto ha mga nasud.—Buhat 9:1-16; Roma 11:13.

An Panhilabot ba han Dios Nahiaraan Na?

An panhilabot ba han Dios nahiaraan na nga panhitabo o diri? An Kasuratan matin-aw nga nagpapakita nga an panhilabot han Dios sigurado nga diri amo an nahiaraan na nga panhitabo hadto. Bisan kon ginluwas han Dios an tulo nga batan-on nga Hebreo tikang ha kamatayon ha naglalaga nga hudno ngan an propeta nga hi Daniel tikang ha lungib han mga leon, waray niya luwasa an iba nga mga propeta tikang ha kamatayon. (2 Kronikas 24:20, 21;  Daniel 3:21-27; 6:16-22; Hebreo 11:37) Milagroso nga nakagawas hi Pedro tikang ha ginprisohan ha iya ni Herodes Agripa I. Kondi, ito mismo nga hadi an nagpapatay kan apostol Jakobo, ngan waray manhilabot an Dios ha pagpugong hini nga krimen. (Buhat 12:1-11) Bisan kon gintagan han Dios an mga apostol hin gahum ha pagtambal ha mga magsakit ngan pagbanhaw pa ngani ha mga patay, waray hiya umuyon nga kuhaon an “tunok ha unod” nga nagsakit kan apostol Pablo, nga posible nga usa nga pisikal nga sakit.—2 Korinto 12:7-9; Buhat 9:32-41; 1 Korinto 12:28.

Waray manhilabot an Dios basi pugngan hi Emperador Nero han Roma ha iya tigda nga madarahog nga pagtimaraot ha mga disipulo ni Kristo. An mga Kristiano ginpasakitan, buhi nga ginsunog, ngan iginlabog ngadto ha ihalas nga mga hayop. Kondi, waray mahipausa an siyahan nga mga Kristiano hini nga pagtimaraot, ngan waray gud ito magpaluya han ira pagtoo ha pag-eksister han Dios. Aw, ginpahamangnoan ni Jesus an iya mga disipulo nga pagdadad-on hira ngadto ha mga hukmanan ngan sadang hira magin andam ha pag-antos ngan ha kamatay pa ngani tungod han ira pagtoo.—Mateo 10:17-22.

Sugad la han iya ginbuhat ha naglabay, sigurado nga maluluwas han Dios yana an iya mga surugoon tikang ha peligroso nga mga kahimtang, ngan adton naabat nga nagpapahimulos hira han iya proteksyon diri sadang pakarauton. Kondi, makuri an paghimo hin konklusyon kon an Dios ba naghilabot o waray maghilabot ha sugad nga mga kahimtang. May-ada pipira nga matinumanon nga mga surugoon ni Jehova nga nadaot tungod han pagbuto han usa nga planta han kemikal ha Toulouse, ngan yinukot han matinumanon nga mga Kristiano an namatay ha mga kampo han mga Nazi ngan han mga Komunista o ha iba pa nga makuri nga mga kahimtang nga waray paghilabot an Dios ha pagpugong hito. Kay ano nga diri sistematiko nga naghihilabot an Dios para ha kaopayan han ngatanan nga iya inuuyonan?—Daniel 3:17, 18.

“Panahon Ngan Diri Linalaoman nga Panhitabo”

Kon naabot an usa nga kalamidad, mahimo maapektohan an bisan hin-o, ngan an pagin matinumanon ha Dios bangin diri pirme nakakagbag-o ha resulta han kahimtang. Durante han pagbuto ha Toulouse, diin nakapalagiw hira Alain ngan Liliane, 30 ka tawo an namatay ngan ginatos an nadaot, diri tungod kay nakasayop hira. Ha mas daku nga sukol, napuplo ka yukot nga mga tawo an mga biktima han krimen, waray paghirot nga pagmaneho, o mga girra, ngan diri mababasol an Dios tungod han maraot nga nahitabo ha ira. An Biblia nagpapahinumdom ha aton nga an “panahon ngan diri linalaoman nga panhitabo nahitatabo” ha ngatanan.—Eklesiastes 9:11, NW.

Dugang pa, an mga tawo naaapektohan han sakit, kalagas, ngan kamatayon. Bisan an iba nga naghuhunahuna nga milagroso nga ginluwas hira han Dios o nagsiring nga an Dios an hinungdan han diri nira linalaoman nga katambal han ira sakit, ha kataposan namatay. An pagwara han sakit ngan kamatayon ngan an ‘pagpara han ngatanan nga luha’ ha mga mata han tawo ha tidaraon pa.—Pahayag 21:1-4.

Basi mahitabo ito, ginkikinahanglan an mas kaylap gud ngan bug-os nga panhilabot kay ha panalagsa la. An Biblia naghihisgot mahitungod han usa nga okasyon nga gintawag nga “an daku nga adlaw ni Jehova.” (Sepania 1:14) Durante hinin haluag-an-lukop nga paghilabot, paparaon han Dios an ngatanan nga karaotan. Tatagan an katawohan hin higayon nga mabuhi ha waray kataposan ha hingpit nga mga kahimtang, diin “an una nga mga butang diri na hinunumdoman, o diri na maabot ha panumduman.” (Isaias 65:17) Bisan an mga patay babanhawon, salit mawawara na an girarauti gud han ngatanan nga mga trahedya han tawo. (Juan 5:28, 29) Hito nga panahon, tungod han waray-tubtoban nga gugma ngan pagkamaopay han Dios, iya bug-os nga susulbaron an mga problema han katawohan.

Kon Paonan-o Nanhihilabot an Dios Yana nga Panahon

Kondi, diri ini nangangahulogan nga samtang yana, an Dios waray pagpaid nga nagkikinita la samtang nag-aantos an mga linarang. Yana, igintatanyag  han Dios ha ngatanan nga katawohan, anoman an ira rasa o gintikangan nga kahimtang ha sosiedad, an higayon nga makilala hiya ngan mapatubo an duok nga relasyon ha iya. (1 Timoteo 2:3, 4) Iginsaysay ni Jesus ini nga proseso pinaagi hini nga mga pulong: “Waray usa nga sadang makakanhi ha akon, kon diri pagdad-on han Amay nga nagpakanhi ha akon.” (Juan 6:44) Ginpapaduok han Dios an tangkod-an-kasingkasing nga mga tawo ha iya pinaagi han mensahe han Ginhadian nga iginpapasamwak han iya mga surugoon ha bug-os nga kalibotan.

Dugang pa, direkta nga iniimpluwensyahan han Dios an mga kinabuhi hadton nagpapagiya ha iya. Pinaagi han iya baraan nga espiritu, ‘inaabrihan han Dios an ira mga kasingkasing’ basi hisabtan an iya kaburut-on ngan buhaton an iya mga sugo. (Buhat 16:14) Oo, pinaagi han pagtagana han higayon nga makilala hiya, mahibaro han iya Pulong, ngan han iya mga katuyoan, pinamamatud-an han Dios an iya mahigugmaon nga interes ha kada usa ha aton.—Juan 17:3.

Ha kataposan, binubuligan han Dios an iya mga surugoon yana, diri pinaagi han milagroso nga pagluwas ha ira, kondi pinaagi han paghatag ha ira han iya baraan nga espiritu ngan han “kapin kaopay nga gahum” basi malamposan an anoman nga kahimtang nga mahimo nira atubangon. (2 Korinto 4:7) Hi apostol Pablo nagsurat: “Ngatanan mahihimo ko ha gahum han nagpaparig-on [Jehova nga Dios] ha akon.”—Filipos 4:13.

Salit may-ada kita han ngatanan nga hinungdan nga magin mapasalamaton ha Dios kada adlaw tungod han kinabuhi ngan han paglaom nga iya iginhahatag ha aton nga mabuhi hin waray kataposan ha kalibotan diin waray na an ngatanan nga mga pag-antos. “Ano ba an akon ihahatag kan Jehova tungod han iya mga pakaopay ha akon?” nagpakiana an salmista. “Makarawat ako han tagayan han kaluwasan, ngan magsasangpit ako han ngaran ni Jehova.” (Salmo 116:12, 13) An regular nga pagbasa hini nga magasin mabulig ha imo nga hisabtan an ginbuhat, binubuhat, ngan pagbubuhaton pa han Dios nga maghahatag ha imo hin kalipay yana ngan hin marig-on nga paglaom ha tidaraon.—1 Timoteo 4:8.

[Blurb ha pahina 6]

“An una nga mga butang diri na hinunumdoman, o diri na maabot ha panumdoman.”—Isaias 65:17

[Mga Retrato ha pahina 5]

Ha mga panahon han Biblia, waray pugngi ni Jehova an pagbatoha kan Sakarias . . .

bisan an pagpatay ni Herodes ha mga inosente

[Retrato ha pahina 7]

Hirani na an panahon nga mawawaray na an pag-antos; bisan an mga patay babanhawon