Istorya han Kinabuhi

Gintutdoan ni Jehova Tikang ha Akon Pagkabatan-on

IGINSUMAT NI RICHARD ABRAHAMSON

“O Dios, gintutdoan mo ako tikang han akon kabata; ngan ngada yana nagpahayag ako han imo mga urusahon nga buhat.” Akon isusumat ha iyo kon kay ano nga ito nga mga pulong han Salmo 71:17 may-ada espesyal nga kahulogan para ha akon.

HAN 1924, an akon iroy, hi Fannie Abrahamson, iginkaistorya han mga Estudyante ha Biblia, an pagtawag ha mga Saksi ni Jehova hadto nga panahon. Usa ka tuig pa la ako hadto. Samtang gintututdoan hi Nanay mahitungod han mga kamatuoran han Biblia, ginbibisita dayon niya an iya mga amyaw ngan ginsusumatan hira han iya hinbaroan, ngan gintutdoan liwat niya ako ngan an akon magurang nga lalaki ngan babaye. Antes ako makabasa, ginbuligan na niya ako nga mamemorya an damu nga mga teksto mahitungod han mga bendisyon han Ginhadian han Dios.

Han ikatarapos han dekada han 1920, an amon grupo han mga Estudyante han Biblia ha La Grande, ha estado han Oregon, E.U.A., diin ako natawo ngan nagdaku, ginkompuwesto hin pipira nga kababayin-an ngan kabataan. Bisan kon nahibulag kami, binibisita kami hin usa o duha ka beses ha usa ka tuig han nagbibiyahe nga mga ministro, nga kilala sugad nga mga pilgrimo. Naghatag hira hin makapadasig nga mga pahayag, nag-upod ha amon ha balay-balay nga ministeryo, ngan nagpakita hin mahigugmaon nga interes ha kabataan. Kaupod hadton mga hinigugma amo hira Shield Toutjian, Gene Orrell, ngan John Booth.

Han 1931 waray usa tikang ha amon grupo an nakatambong ha kombensyon ha Columbus, Ohio, diin ginkarawat han mga Estudyante han Biblia an ngaran nga mga Saksi ni Jehova. Kondi an mga company, sugad nga pagtawag ha mga kongregasyon hadto nga panahon, ngan an nahibulag nga mga grupo nga waray membro nga nakatambong ha kombensyon nagkaada lokal nga katirok hito mismo nga Agosto basi karawaton an usa nga  resolusyon ha pagkarawat han ngaran. Ginbuhat ini han amon gutiay nga grupo ha La Grande. Katapos, han 1933 nga kampanya ha pagpanaltag han bokleta nga The Crisis, nagmemorya ako hin usa nga presentasyon ha Biblia, ngan ha siyahan nga higayon, nagsangyaw ako ha balay-balay nga nag-uusahan.

Durante han dekada han 1930, may-ada nag-uuswag nga pagkontra ha amon buruhaton. Basi malamposan ini, gingrupo an mga company ngadto ha gintawag hadto nga mga dibisyon, nga nagdumara hin gudtiay nga mga asembleya ngan nakigbahin ha mga misyon ha pagsangyaw, nga gintawag sugad nga gingrupo-grupo nga mga kampanya, hin usa o duha ka beses ha usa ka tuig. Dinhi hini nga mga asembleya, gintutdoan kami hin mga paagi ha pagsangyaw ngan iginpakita ha amon kon paonan-o matinalahuron nga makikiistorya ha mga polis nga nag-uulang han amon buruhaton. Tungod kay an mga Saksi agsob pagdad-on ngadto ha usa nga huwes nga polis o ha usa nga regular nga korte, nagbabansay kami pinaagi han materyal tikang ha sinurat nga mga instruksyon nga gintawag nga Order of Trial. Ginsangkapan kami hini nga atubangon an pagkontra.

Temprano nga Pag-uswag ha Kamatuoran han Biblia

Nag-uuswag an akon pagsabot ngan apresasyon ha mga kamatuoran han Biblia ngan ha basado ha Biblia nga paglaom nga mabuhi ha waray kataposan ha tuna ilarom han langitnon nga Ginhadian han Dios. Hito nga panahon, diri gud pinapabug-atan an bawtismo ngada hadton waray paglaom ha pagmando ha langit kaupod ni Kristo. (Pahayag 5:10; 14:1, 3) Kondi, ginsumatan ako nga kon kinasingkasing nga nagdesisyon na ako nga buhaton an kaburut-on ni Jehova, angayan nga magpabawtismo ako. Salit nabawtismohan ako han Agosto 1933.

Han 12 anyos an akon pangidaron, naghunahuna an akon maestra nga maopay ako ha pagyakan ha publiko, salit ginsagda niya hi Nanay nga tagan ako hin dugang nga pagbansay. Ginhunahuna ni Nanay nga bangin makabulig ini ha akon ha pag-alagad hin mas maopay kan Jehova. Salit naglabada hiya para ha akon instruktor ha sulod hin usa ka tuig sugad nga bayad ha pagtutdo ha akon. Nakabulig gud an pagbansay ha akon ministeryo. Han 14 anyos na ako, nagkaada ako rheumatic fever, salit waray ako makaeskwela ha sulod hin sobra usa ka tuig.

Han 1939, hi Warren Henschel nga bug-os-panahon nga ministro, kinadto ha amon lugar. a Sugad hin nagin espirituwal nga magurang ko hiya, igin-uupod niya ako basi maggasto hin hilawig nga mga adlaw ha ministeryo ha kanataran. Waray pag-iha iya ako ginbuligan nga magin vacation pioneer, usa nga temporaryo nga klase han bug-os-panahon nga ministeryo. Hito nga katpaso, gin-organisa an amon grupo sugad nga usa nga company. Ginpili hi Warren sugad nga company servant, ngan ginpili ako ha pagdumara han Pag-aram han Watchtower. Han binaya hi Warren basi magboluntaryo ha Bethel, an bug-os-kalibotan nga sentro nga opisina han mga Saksi ni Jehova ha Brooklyn, New York, ako an nagin company servant.

Pagtikang ha Bug-os-Panahon nga Ministeryo

Han 17 anyos ako, katapos han ikatulo ko ka tuig ha high school, sinulod ako ha regular nga bug-os-panahon nga pagministeryo tungod kay an dugang nga responsabilidad han pag-alagad sugad nga company servant mas nagparig-on han akon hingyap ha pagsulod hito. Iba an relihiyon ni Tatay, kondi gin-ataman niya an mga panginahanglan han amon pamilya ngan usa hiya nga tawo nga hitaas an mga prinsipyo. Karuyag niya nga magkolehiyo ako. Kondi,  hiya siniring nga basta diri la ako magdepende ha iya para han akon pagkaon ngan urukyan, mabubuhat ko an bisan ano nga akon karuyag. Salit nagtikang ako pagpayunir han Septyembre 1, 1940.

Han tibaya na ako ha balay, ginpabasa ako ni Nanay han Proberbios 3:5, 6: “Sarig kan Jehova ha bug-os mo nga kasingkasing, ngan ayaw sandig dida ha imo kalugaringon nga pagsabot: ha ngatanan mo nga dalan kilalaha hiya, ngan hiya magtututdo han imo mga agianan.” Ha pagkatinuod, an pagsarig pirme kan Jehova daku nga bulig ha akon.

Waray pag-iha, inupod ako kanda Joe ngan Margaret Hart ha ministeryo ha norte-sentro han Washington State. Ibaiba an teritoryo—mga rantso han kabakahan ngan kakarnerohan, mga lugar nga iginreserba para ha mga Indian, sugad man an damu nga gudtiay nga mga bungto ngan mga barangay. Ha katsaringsing han 1941, igintoka ako sugad nga company servant ha kongregasyon ha Wenatchee, Washington.

Ha usa han amon mga asembleya ha Walla Walla, Washington, nagboluntaryo ako sugad nga attendant, nag-aabiabi hadton tisulod ha awditoryum. Nakita ko an usa nga batan-on nga bugto nga lalaki nga pakyas nga nangangalimbasog ha pagpatunog han loud-speaker. Salit nagsuhestyon ako nga buhaton niya an akon toka, ngan akon bubuhaton an iya. Han an regional servant, hi Albert Hoffman, binalik ngan nakita nga ginbayaan ko an akon toka, nahiyom nga iya iginsaysay ha akon an bili han pagpabilin ha toka han usa tubtob nga waray instruksyon ha pagbaya. Nahinunumdoman ko an iya sagdon tikang hito nga panahon.

Han Agosto 1941, nagplano an mga Saksi ni Jehova hin daku hinduro nga kombensyon ha St. Louis, Missouri. Gin-atopan nira Joe ngan Margaret an luyo han ira pick-up nga sarakyan ngan ginbutangan ito hin mga lingkoran. Siyam kami nga payunir nga nagbiyahe hin 2,400 kilometro tipakadto ha St. Louis nga sakay hito nga sarakyan. Inabot hin haros usa ka semana an kada biyahe. Ha kombensyon, ginbanabana han polisya nga mga 115,000 an pungkay han tinambong. Bisan kon an mga tinambong bangin waray umabot hito nga ihap, sigurado nga mas damu ito kay han ginbabanabana nga 65,000 nga mga Saksi ha Estados Unidos hito nga panahon. Tinuod gud nga makaparig-on ha espirituwal an kombensyon.

Pag-alagad ha Brooklyn Bethel

Ha pagbalik ko ha Wenatchee, kinarawat ako hin surat nga naghahangyo ha akon nga magreport ha Brooklyn Bethel. Ha akon pag-abot han Oktubre 27, 1941, ginpakadto ako ha opisina ni Nathan H. Knorr, an paramangno han pabrika. Ha buotan nga paagi iya iginsaysay ha akon kon ano an kinabuhi ha Bethel ngan ginpabug-atan niya nga an pagpabilin nga duok kan Jehova importante ha paglampos didto. Katapos ginpakadto ako ha Shipping Department ngan ginpatrabaho hin pagbinutok hin mga karton han mga literatura nga ipapadara.

Han Enero 8, 1942, namatay hi Joseph Rutherford, an nangunguna han mga Saksi ni Jehova ha bug-os nga kalibotan. Paglabay hin lima ka adlaw ginpili han mga direktor han Sosiedad hi Bugto Knorr basi sumaliwan ha iya. Han iginpahibaro ini ha pamilya han Bethel ni W. E. Van Amburgh, an maiha na nga sekretaryo-tesurero han Sosiedad, hiya nagsiring: “Nahinunumdom ako han mamatay hi C. T. Russell [han 1916] ngan ginsaliwnan ni J. F. Rutherford. Padayon nga gingiyahan ngan ginpauswag han Ginoo an Iya buruhaton. Yana, naglalaom gud ako nga mag-uuswag an buruhaton  pinaagi kan Nathan H. Knorr sugad nga presidente tungod kay buruhaton ini han Ginoo, diri han tawo.”

Han Pebrero 1942, iginpahibaro nga titikangan an “Pinauswag nga Kurso ha Teokratiko nga Ministeryo.” Gindisenyo ito ha pagbansay hadton aada ha Bethel basi mapauswag an ira abilidad ha pagsaliksik ha mga topiko ha Biblia, pag-organisa han ira materyal ha husto nga paagi, ngan epektibo nga pagpresenta hito. Tungod han akon nakarawat hadto nga pagbansay ha pagyakan ha publiko, madagmit ako nga nag-uswag ha programa.

Waray pag-iha, igintoka ako ha Service Department, nga nagdudumara han ministeryo han mga Saksi ni Jehova ha Estados Unidos. Ha ikatarapos hito nga tuig, gindesisyonan nga organisahon-utro an usa nga programa para ha mga ministro nga bisitahon an mga company han mga Saksi. Inabot an panahon, ini nga nagbibiyahe nga mga ministro, nga gintawag hadto nga mga surugoon ngadto ha kabugtoan, gintawag na nga mga paramangno han sirkito. Durante han katpaso han 1942, ginhikay an usa nga kurso ha Bethel ha pagbansay ha kabugtoan nga kalalakin-an para hini nga klase han ministeryo, ngan nakapribilehiyo ako nga magin usa han mga kinarawat hin pagbansay. Nahinunumdoman ko gud nga ginpabug-atan ni Bugto Knorr, usa han mga instruktor, ini nga punto ha amon: “Ayaw pangalimbasog nga lipayon an mga tawo. Waray ka mapapalipay. Lipaya hi Jehova, ngan mapapalipay mo an ngatanan nga nahigugma kan Jehova.”

An pagbiyahe nga buruhaton gintikangan han Oktubre 1942. An pipira ha amon ha Bethel nakigbahin hito ha pipira nga mga kataposan han semana, nabisita ha mga kongregasyon nga sulod hin 400 kilometro han New York City. Ginrepaso namon an mga report ha pagsangyaw nga buruhaton ngan pagtambong ha katirok han kongregasyon, nakigkatirok ha mga may responsabilidad ha kongregasyon, naghatag hin usa o duha nga pahayag, ngan nagsangyaw kaupod han mga Saksi hito nga lugar.

Han 1944, usa ako han mga iginpadara tikang ha Service Department ngadto ha pagbiyahe nga buruhaton ha sulod hin unom ka bulan nga peryodo, nga nag-aalagad ha Delaware, Maryland, Pennsylvania, ngan Virginia. Ha urhi, ha sulod hin pipira ka bulan, ginbisita ko an mga kongregasyon ha Connecticut, Massachusetts, ngan Rhode Island. Han binalik na ako ha Bethel, nagtrabaho ako hin part-time ha opisina upod ni Bugto Knorr ngan han iya sekretaryo nga hi Milton Henschel, diin nagin pamilyar ako ha aton buruhaton ha bug-os nga kalibotan. Nagtrabaho liwat ako hin part-time ha Treasurer’s Office ha pagdumara ni W. E. Van Amburgh ngan han iya kabulig nga hi Grant Suiter. Katapos, han 1946, nagin paramangno ako han damu nga mga opisina ha Bethel.

Dagku nga mga Pagbag-o ha Akon Kinabuhi

Samtang nag-aalagad ha mga kongregasyon han 1945, nakilala ko hi Julia Charnauskas ha Providence, Rhode Island. Ha kabutngaan han 1947 nagplano kami pagpakasal. Karuyag ko gud an pag-alagad ha Bethel, kondi hito nga panahon, waray kahikayan nga dad-on ha sulod an asawa basi mag-alagad didto. Salit han Enero 1948, binaya ako ha Bethel, ngan nagpakasal kami ni Julia (Julie). Nakatrabaho ako hin part-time ha usa nga merkado ha Providence, ngan nagpayunir kami nga duha.

Han Septyembre 1949, ginhangyo ako ha sirkito nga buruhaton ha norte-weste nga Wisconsin. Daku gud nga pagbag-o para ha amon ni Julie an pagsangyaw ha kasagaran gudtiay nga mga bungto ngan mga baryo ha mga lugar han kabakahan. Maiha ngan mahagkot an mga panahon han katugnaw, nga damu an mga semana nga –20 grado Celsius o ubos pa an temperatura ngan damu hinduro an niebe. Waray kami awto. Kondi, pirme may-ada napasakay ha amon ngadto ha sunod nga kongregasyon.

Waray pag-iha katapos ko tikangan an sirkito nga buruhaton, nagkaada kami sirkito nga asembleya. Nahinunumdoman ko pa an akon pag-usisa hin maopay basi masiguro nga gintutuman an ngatanan nga mga kahikayan, nga nagin hinungdan nga kulbaon an iba. Salit ha buotan nga paagi iginsaysay ha akon han paramangno han distrito nga hi Nicholas Kovalak, nga an lokal nga kabugtoan hiara ha pagtuman han mga kahikayan ha ira kalugaringon nga paagi salit diri ko kinahanglan mabaraka mahitungod han ngatanan nga detalye. Tikang hadto ito nga sagdon nakabulig ha akon ha pagtuman han damu nga mga toka.

Han 1950, kinarawat ako hin usa nga temporaryo nga toka—ha pagdumara han akomodasyon han mga delegado ha siyahan han amon damu nga dagku nga mga kombensyon ha Yankee Stadium ha New York City. Makalilipay gud an kombensyon tikang ha tinikangan tubtob ha pagtapos, nga may mga delegado tikang ha 67 nga nasud ngan 123,707  an pungkay nga tinambong! Katapos han kombensyon, iginpadayon namon ni Julie an amon pagbiyahe nga ministeryo. Malipayon gud kami ha sirkito nga buruhaton. Kondi, inabat namon nga sadang namon padayon nga iandam an amon kalugaringon para ha bisan ano nga bug-os-panahon nga pag-alagad. Salit kada tuig, nagpasa kami hin mga aplikasyon para ha Bethel ngan para ha Gilead. Han 1952 nalipay kami ha pagkarawat hin imbitasyon ha pagtambong ha ika-20 nga klase han Watchtower Bible School of Gilead, diin kinarawat namon an pagbansay para ha pagmisyonero.

Pag-alagad ha Iba nga Nasud

Han maggradwar kami han 1953, igintoka kami ha Britanya, diin nag-alagad ako ha distrito nga buruhaton ha sur han Inglatera. Katapos hin diri pa mausa ka tuig dinhi hini nga buruhaton, nga naruyagan na gud namon ni Julie, nasurprisa kami ha pagkarawat han toka ha pagbalhin ngadto ha Denmark. Nagkikinahanglan an Denmark hin bag-o nga magdudumara han sanga nga opisina. Tungod kay hirani la ako ngan kinarawat na hin pagbansay para ha sugad nga buruhaton ha Brooklyn, iginpadara ako basi bumulig. Sinakay kami hin barko ngadto ha Netherlands, ngan tikang didto nagtren kami ngadto ha Copenhagen, Denmark. Inabot kami han Agosto 9, 1954.

Usa han mga problema nga kinahanglan atubangon amo nga an pipira nga kabugtoan nga may mga katungdanan waray magkarawat han giya tikang ha sentro nga opisina ha Brooklyn. Ngan tulo han upat nga naghuhubad han aton mga publikasyon ngadto ha yinaknan han Denmark an binaya ha Bethel ngan ha urhi inundang ha pakig-upod ha mga Saksi ni Jehova. Kondi ginbaton ni Jehova an amon mga pag-ampo. Duha nga payunir, hira Jørgen ngan Anna Larsen, nga part-time nga naghubad na hadto, an nagpagamit han ira kalugaringon para ha bug-os-panahon nga pagboluntaryo. Salit nagpadayon an paghubad han ngatanan nga gowa han aton mga magasin ha yinaknan han Denmark.  Hira Jørgen ngan Anna aada pa gihapon ha Bethel ha Denmark, ngan hi Jørgen an nagdudumara han Komite han Sanga.

An usa nga totoo nga surok han pagdasig durante hadton temprano nga mga tuig amo an regular nga mga pagbisita ni Bugto Knorr. Nagahin hiya hin panahon ha pagbisita ha kada usa, nagsusumat hin mga eksperyensya nga naghatag hin hilarom nga pagsabot kon paonan-o aatubangon an mga problema. Durante han usa nga pagbisita han 1955, gindesisyonan nga sadang kami magtukod hin usa nga bag-o nga sanga nga may-ada mga pasilidad ha pag-imprinta basi makahimo kami hin mga magasin para ha Denmark. Nakapalit hin lote ha kahirani nga lugar ha norte han Copenhagen, ngan ha katpaso han 1957, binalhin kami ngadto ha bag-o nga tinukod. Hi Harry Johnson, kaupod han iya asawa nga hi Karin, nga inabot pa la ha Denmark katapos maggradwar ha ika-26 nga klase han Gilead, binulig ha pag-establisar han amon imprintahan ngan ha pagpaandar hito.

Ginpauswag namon an amon pag-organisa ha pagdumara hin dagku nga mga kombensyon ha Denmark, ngan nagin mapulsanon an akon eksperyensya samtang nagbuboluntaryo ha mga kombensyon ha Estados Unidos. Han 1961 an amon daku nga internasyonal nga kombensyon ha Copenhagen nag-abiabi hin mga delegado tikang ha sobra 30 nga nasud. An pungkay nga tinambong inabot hin 33,513. Han 1969, nagmangno kami han gidadakui han ngatanan nga mga kombensyon nga gindumara ha Scandinavia, nga may pungkay nga 42,073 nga tinambong!

Han 1963, ginhangyo ako pagtambong ha ika-38 nga klase han Gilead. Usa ini nga ginpahiuyon nga napulo-ka-bulan nga kurso nga partikular nga gindisenyo ha pagbansay han mga boluntaryo ha sanga. Makalilipay nga makaupod utro an pamilya han Brooklyn Bethel ngan makapahimulos tikang ha eksperyensya hadton nagtatrabaho na ha pag-ataman han mga kahikayan han sentro nga opisina ha sulod hin damu nga katuigan.

Katapos hini nga kurso ha pagbansay, binalik ako ha Denmark basi ipadayon an pagmangno han mga responsabilidad didto. Dugang pa, nakapribilehiyo ako ha pag-alagad sugad nga paramangno han sona, nabisita ha mga sanga ha weste ngan norte nga Europa basi dasigon ngan buligan an mga boluntaryo didto ha pagtuman han ira mga responsabilidad. Bag-o pa gud la nga ginbisita ko an Weste nga Aprika ngan an Caribbean.

Ha ikatarapos han dekada han 1970, nagtikang mamiling an kabugtoan ha Denmark hin lote nga pagtutukoran hin mas daku nga pasilidad tungod han nag-uuswag nga buruhaton ha paghubad ngan pag-imprinta. Usa nga maopay nga lote an nahiagian ha mga 60 kilometro ha weste han Copenhagen. Kaupod han iba pa, nagtrabaho ako ha pagplano ngan pagdisenyo hini nga bag-o nga pasilidad, ngan naglaom kami ni Julie nga umukoy kaupod han pamilya han Bethel dida hito nga maopay ngan bag-o nga urukyan. Kondi, diri sugad hito an nahitabo.

Balik Ngadto ha Brooklyn

Han Nobyembre 1980, gindapit kami ni Julie nga magboluntaryo ha Bethel ha Brooklyn, diin inabot kami temprano han Enero han 1981. Magsasaisenta na an amon pangidaron hadto, ngan katapos mag-alagad hin haros katunga na han amon kinabuhi kaupod han amon hinigugma nga kabugtoan ha Denmark, diri masayon para ha amon nga bumalik ha Estados Unidos. Kondi, waray kami maghinunahuna kon diin namon karuyag kondi nangalimbasog kami ha pagsentro ha amon bag-o nga mga toka hito nga panahon ngan ha anoman nga mga problema nga bumangon.

Inabot kami ha Brooklyn ngan inukoy didto. Igintoka hi Julie ha opisina han accounting, an iya trabaho pariho han iya ginbuhat ha Denmark. Igintoka ako ha Writing Department ha pagbulig ha pag-eskedyol han pagproseso han aton mga publikasyon. An temprano han dekada han 1980 usa nga panahon han pagbag-o han aton mga kahikayan ha Brooklyn, tungod kay tikang ha paggamit hin mga makinilya ngan typesetting ha mapaso nga tingga  binalhin kita ha paggamit hin kompyuter ngan offset nga pag-imprinta. Waray ako kahibaro ha mga kompyuter kondi may-ada ako hinsasabtan mahitungod ha mga kahikayan han pag-organisa ngan pagtrabaho kaupod ha mga tawo.

Waray pag-iha katapos hito, may-ada panginahanglan ha pagparig-on han pag-organisa han Art Department tungod kay binalhin kita ngadto ha de-kolor nga offset nga pag-imprinta ngan ha paggamit hin de-kolor nga mga ilustrasyon ngan mga retrato. Bisan kon diri ako artistiko, mahimo ako makabulig ha pag-organisa. Salit nakapribilehiyo ako ha pagdumara hito nga departamento ha sulod hin siyam ka tuig.

Han 1992, igintoka ako ha pagbulig ha Publishing Committee han Nagmamando nga Lawas ngan iginbalhin ako ngadto ha Treasurer’s Office. Dinhi nagpapadayon ako ha pag-alagad may kalabotan ha pinansyal nga mga buruhaton han mga Saksi ni Jehova.

Pag-alagad Tikang ha Akon Pagkabatan-on Padayon

Tikang pa gud han akon kabata ngan durante han 70 ka tuig han dedikado nga pag-alagad, mapailubon nga gintutdoan ako ni Jehova pinaagi han iya Pulong, an Biblia, ngan han mabinuligon nga kabugtoan ha iya urusahon nga organisasyon. Ginpapahimulosan ko an sobra 63 ka tuig ha bug-os-panahon nga ministeryo, sobra 55 hito nga mga tuig nga kaupod an akon maunungon nga asawa nga hi Julie. Oo, inabat ko nga hura nga ginbendisyonan ako ni Jehova.

Hadton 1940 han binaya ako ha balay basi magpayunir, gintamay han akon amay an akon desisyon ngan siniring: “Anak, kon bumaya ka ha balay basi buhaton ini, ayaw paghunahuna nga makakabalik ka pa ha akon para hin bisan ano nga bulig.” Ha paglabay han mga tuig, diri ko gud kinahanglan buhaton ito. Hura nga nagtatagana hi Jehova para han akon mga panginahanglan, agsob nga pinaagi han mabinuligon nga mga igkasi-Kristiano. Ha urhi, gintahod na han akon amay an aton buruhaton, ngan nag-uswag pa ngani hiya ha paghibaro han kamatuoran han Biblia antes hiya mamatay han 1972. Hi Nanay, nga may-ada paglaom nga kinabuhi ha langit, padayon nga matinumanon nga nag-alagad kan Jehova tubtob han hiya mamatay han 1985, ha edad nga 102.

Bisan kon naabot an mga problema ha bug-os-panahon nga ministeryo, waray gud namon hunahunaa ni Julie an pagbaya ha amon toka. Ginbubuligan kami pirme ni Jehova hini nga amon determinasyon. Bisan han nagtikalagas na an amon mga kag-anak ngan nagkinahanglan hin bulig, an akon bugto nga babaye nga hi Victoria Marlin, binulig ngan gin-ataman hira ha buotan nga paagi. Mapasalamaton gud kami ha iya mahigugmaon nga bulig, nga nakabulig ha amon nga magpadayon ha bug-os-panahon nga ministeryo.

Maunungon nga ginsusuportahan ako ni Julie ha ngatanan nga amon mga toka, ginhuhunahuna ini niya sugad nga bahin han iya kalugaringon nga dedikasyon ngadto kan Jehova. Ngan bisan kon 80 anyos na ako yana ngan nakakaeksperyensya hin pipira nga mga problema ha kahimsog, inaabat ko gud nga hura nga ginbibendisyonan kami ni Jehova. Nadadasig gud ako han salmista nga katapos magpahayag nga gintutdoan hiya han Dios tikang ha iya kabata padayon, nanginyupo, ‘Bisan tubtob ha kalagas, O Dios, ayaw ako bayai, tubtob nga maisumat ko an mahitungod han imo pagkagamhanan ngada hadton naabot.’—Salmo 71:17, 18, NW.

[Footnote]

[Retrato ha pahina 20]

Kaupod hi Nanay han 1940, han nagtikang ako magpayunir

[Retrato ha pahina 21]

Upod han mga igkasi-payunir nga hira Joe ngan Margaret Hart

[Retrato ha pahina 23]

Ha adlaw han amon kasal han Enero 1948

[Retrato ha pahina 23]

Han 1953, kaupod han mga kaklase ha Gilead. Tikang ha wala tipatoo: Don ngan Virginia Ward, Geertruida Stegenga, Julie, ngan ako

[Retrato ha pahina 23]

Kaupod hi Frederick W. Franz ngan hi Nathan H. Knorr ha Copenhagen, Denmark, 1961

[Retrato ha pahina 25]

Kaupod hi Julie yana