Importante an Pagsarig Para ha Malipayon nga Kinabuhi

DIRI gud maopay an kahiloi ha pagkaon. An tawo nga pauro-utro nga nakakaeksperyensya hito kinahanglan magin mas mabinantayon ha iya mga batasan ha pagkaon. Kondi an diri na gud pagkaon basi malikyan an peligro han kahiloi diri makatadunganon nga solusyon. An pagbuhat hito magriresulta hin mas damu nga mga problema kay han masusulbad hito. Waray mabubuhi hin maiha kon waray pagkaon.

Ha pariho nga paagi, makabibido an matraydoran an pagsarig han usa. An pauro-utro nga pagtraydor ha pagsarig bangin makaaghat ha aton nga hunahunaon hin maopay an mahitungod ha aton pagpili hin mga kaupod. Kondi, an bug-os nga pagbulag ha mga tawo basi malikyan an peligro han katraydori diri amo an solusyon. Kay ano nga diri? Tungod kay an kawaray pagsarig ha iba magwawara han aton kalipay. Basi magin tagbaw ha kinabuhi, nagkikinahanglan kita hin mga relasyon nga iginbasar ha pagsarig ha usa kag usa.

“An pagsarig usa han mga basihan para han diri-komplikado nga pakig-upod ha iba kada adlaw,” siring han libro nga Jugend 2002. “An ngatanan naghihingyap hin pagsarig,” nagreport an pahayagan nga Neue Zürcher Zeitung. “Ginpapauswag han pagsarig an kalidad han kinabuhi” ha daku nga sukol salit “importante [ito] basi mabuhi.” Ha pagkamatuod, an pahayagan nagpapadayon nga kon waray pagsarig, “an usa ka tawo diri makakalampos ha kinabuhi.”

Tungod kay may-ada kita importante nga panginahanglan nga sumarig ha usa, hin-o an aton masasarigan nga diri kita mamimeligro nga mapakyas?

Sarig kan Jehova ha Bug-os Mo nga Kasingkasing

“Sarig kan Jehova ha bug-os mo nga kasingkasing,” siring ha aton han Biblia. (Proberbios 3:5) Ha pagkamatuod, pauro-utro nga gindadasig kita han Pulong han Dios nga sumarig ha aton Maglalarang, hi Jehova nga Dios.

Kay ano nga makakasarig kita ha Dios? An usa nga hinungdan, tungod kay baraan an Dios. Hi propeta Isaias nagsurat: “Baraan, baraan, baraan, hi Jehova.” (Isaias 6:3) Diri ka ba nadadani ha ideya han pagkabaraan? Ha pagkatinuod, sadang ito makadani ha imo tungod kay an pagkabaraan ni Jehova nangangahulogan nga hiya putli, waray sayop nga buhat, ngan matataporan gud. Diri gud hiya magigin malimbong o abusado, ngan imposible nga dauton niya an aton pagsarig.

Dugang pa, masasarigan naton an Dios tungod han iya abilidad ngan hingyap ha pagsuporta hadton nag-aalagad ha iya. Pananglitan, an iya supremo nga gahum nakakabulig  ha iya nga magbuhat. An iya hingpit nga hustisya ngan kinaadman naggigiya ha paagi han iya pagbuhat. Ngan an iya diri matupngan nga gugma nagpapagios ha iya ha pagbuhat. “An Dios amo an gugma,” nagsurat hi apostol Juan. (1 Juan 4:8) An gugma han Dios nakakaimpluwensya ha ngatanan nga iya binubuhat. An pagkabaraan ni Jehova ngan an iya iba nga bantogan nga mga kalidad nakakahimo ha iya nga hingpit nga Amay, usa nga aton masasarigan hin bug-os. Waray bisan ano ngan waray usa nga mas takos han pagsarig kay ha kan Jehova.

Sarig kan Jehova Ngan Magin Malipayon

An usa pa nga makatadunganon nga hinungdan ha pagsarig kan Jehova amo nga mas hinsasabtan niya kita kay han bisan hin-o. Maaram hiya nga an tagsa nga tawo may-ada importante nga panginahanglan hin may-kasigurohan, nagpapadayon, ngan may-pagsarig nga relasyon ha Maglalarang. Adton nakakaeksperyensya han sugad nga relasyon mas naabat hin kasigurohan. “Bulahan [“Malipayon,” NW] an tawo nga nasarig kan Jehova,” nagsiring hi Hadi David. (Salmo 40:4) Minilyon yana an bug-os-kasingkasing nga nauyon ha panhunahuna ni David.

Tagda an pipira nga mga ehemplo. Hi Doris nag-ukoy na ha Dominican Republic, Alemanya, Gresya, ngan ha Estados Unidos. Hiya nasiring: “Malipayon ako hinduro ha pagsarig kan Jehova. Maaram hiya ha pag-ataman ha akon ha pisikal, espirituwal, ngan ha emosyonal. Hiya an gimaopayi nga sangkay nga maaangkon han usa.” Hi Wolfgang, usa nga magsaragdon may kalabotan ha legal nga mga butang, nagsaysay: “Makalilipay an pagsarig ha usa nga naghuhunahuna han pinakamaopay para ha imo, usa nga makakahimo—ngan ha kamatuoran maghihimo—han gimaopayi para ha imo!” Hi Ham nga natawo ha Asia kondi nag-uukoy na yana ha Europa, nagkomento: “May kompyansa ako nga kontrolado ni Jehova an ngatanan nga mga butang, ngan diri hiya nagsasayop, salit nalilipay ako ha pagsarig ha iya.”

Syempre, an tagsa ha aton kinahanglan sumarig diri la ha aton Maglalarang kondi ha mga tawo liwat. Salit, hi Jehova, sugad nga maaramon ngan eksperyensyado nga sangkay, nagsasagdon ha aton kon ano nga klase hin mga indibiduwal an sadang naton sarigan. Pinaagi han pagbasa hin maopay ha Biblia, mahibabaroan naton an iya sagdon mahitungod hini.

Mga Tawo nga Aton Masasarigan

“Ayaw niyo ibutang an iyo pagsarig ha mga prinsipe, bisan ngani dida ha anak han tawo, ha kan kanay waray pagbulig [“kaluwasan,” NW],” nagsurat an salmista. (Salmo 146:3) Ini nga giniyahan nga mga pulong nabulig ha aton nga hibaroan nga damu han mga tawo an diri takos han aton pagsarig. Bisan adton gintatahod gud sugad nga “mga prinsipe” hini nga kalibotan, pariho ha mga eksperto ha partikular nga mga kanataran han kahibaro o buruhaton, diri awtomatiko nga takos han aton pagsarig. An ira giya agsob nga nakakalimbong, ngan an pagsarig ha sugad nga “mga prinsipe” madagmit magin kapakyasan.

Syempre, diri ini sadang magin hinungdan nga diri naton sarigan an ngatanan. Kondi, matin-aw nga kinahanglan pilion naton adton aton sasarigan. Ano nga suruklan an sadang naton gamiton? An usa nga ehemplo tikang ha kadaan nga nasud han Israel mahimo makabulig ha aton. Han ginkinahanglan an pagpili hin mga indibiduwal nga magtutuman han mabug-at nga mga responsabilidad ha Israel, ginsagdonan hi Moises nga  ‘magbiling tikang ha bug-os nga katawohan hin mga tawo nga may katakos, mahadlukon ha Dios, mga tawo ha kamatuoran nga nangangalas han mga kahikaw.’ (Eksodo 18:21) Ano an aton mahibabaroan tikang hini?

Ini hira kalalakin-an nga nagpakita hin pipira nga mga kalidad han Dios antes ibutang ha mga katungdanan nga takos han pagsarig. Pinamatud-an na nira nga nahadlok hira ha Dios; may-ada hira daku nga pagtahod ha Maglalarang ngan nahadlok nga mapasubo hiya. Matin-aw ha ngatanan nga ginbuhat hini nga kalalakin-an an ira gimaopayi ha pagparig-on han mga suruklan han Dios. Nangalas hira ha kahikaw o diri makatadunganon nga ganansya, nga nagpakita hin karig-on ha moralidad nga magpupugong ha ira ha pagin maraot tungod han gahum. Diri nira aabusuhon an pagsarig basi pauswagon an ira personal nga mga interes o an mga interes han ira mga paryente o kasangkayan.

Diri ba maaramon nga aton gamiton an pariho nga suruklan yana kon nagpipili han aton sasarigan? May kilala ba kita nga mga tawo nga an panggawi nagpapakita nga nahahadlok hira ha Dios? Determinado ba hira nga tumanon an iya mga suruklan han panggawi? May-ada ba hira integridad nga likyan an pagbuhat hin mga sayop? Tangkod ba hira salit diri nira ginmamaniobra an usa nga kahimtang para ha ira kalugaringon nga bentaha o para makuha an ira karuyag? Sigurado nga an kalalakin-an ngan kababayin-an nga nagpapakita han sugad nga mga kalidad takos han aton pagsarig.

Ayaw Panluya Tungod han Panalagsa nga Kapakyas

Ha pagdesisyon kon hin-o an aton sasarigan, kinahanglan magin mapailubon kita, tungod kay napaparig-on an pagsarig ha paglabay han panahon. An maaramon nga paagi amo an hinay-hinay nga paghatag han aton pagsarig ha usa. Paonan-o? Aw, mahimo naton obserbahan an panggawi han usa ha sulod hin usa ka peryodo han panahon, gintitigamnan kon paonan-o hiya nagios ha partikular nga mga kahimtang. Masasarigan ba an tawo ha gudtiay nga mga butang? Pananglitan, igin-uuli ba niya an hinuram nga mga butang sugad han iya iginsaad ngan iya ba gintutuman ha husto nga panahon an mga ginkasabotan? Kon amo, niyan bangin umabat kita nga masasarigan gud naton hiya ha mas seryoso nga mga butang. Uyon ini ha prinsipyo nga: “An tawo nga matinumanon ha gutiay matinumanon man ha daku.” (Lukas 16:10, NW) An pagin mapili ngan mapailubon mahimo makabulig ha aton nga malikyan an dagku nga mga kapakyasan.

Kondi, kumusta man kon may-ada magpakyas ha aton? Mahinunumdoman han mga estudyante ha Biblia nga ha gab-i han pagdakpa kan Jesu-Kristo, ginpakyas gud hiya han iya mga apostol. Gintraydoran hiya ni Judas Iskariote, ngan pinalagiw an iba tungod ha kahadlok. Iginlirong pa ngani ni Pedro hi Jesus hin tulo ka beses. Kondi hinsabtan ni Jesus nga hi Judas la an tinuyo nga nagpakyas ha iya. An kapakyas durante han sugad importante nga takna waray magpugong kan Jesus nga parig-unon-utro an iya pagsarig ha nabibilin pa nga 11 nga apostol paglabay la hin pipira ka semana. (Mateo 26:45-47, 56, 69-75; 28:16-20) Ha pariho nga paagi, kon naabat kita nga gintraydoran kita han usa nga aton sinasarigan, maopay nga aton hunahunaon kon an buhat nga ginhuhunahuna naton nga pagtraydor usa nga ebidensya han diri masasarigan nga disposisyon o han usa nga temporaryo nga kaluyahan han unod.

Masasarigan ba Ako?

An usa nga nagdidesisyon nga magin mapili mahitungod ha kon hin-o an iya sasarigan kinahanglan magin makatadunganon ngan magpakiana ha iya kalugaringon: ‘Masasarigan ba ako? Ano nga makatadunganon nga mga suruklan han pagkamasasarigan an sadang ko laoman ha akon kalugaringon ngan ha iba?’

Sigurado nga an usa ka tawo nga masasarigan pirme nagyayakan hin kamatuoran. (Efeso 4:25) Diri niya iginpapahiuyon an iya mga pulong ha iya mamarati basi la makakuha hin personal nga bentaha. Ngan kon nakikigsabot hiya, ginbubuhat han masasarigan nga tawo an ngatanan niya nga mahihimo basi tumanon an iya ginsiring. (Mateo 5:37) Kon may-ada nagsusumat ha iya hin sekreto, gintitipigan han masasarigan nga tawo an kompyansa ngan diri niya igintsitsismis. An masasarigan nga tawo matinumanon ha iya pinakasalan nga padis. Diri hiya nagkikita hin pornograpiya, diri hiya naghihinunahuna hin seksuwal nga mga pantasya, ngan diri hiya nagpipikat. (Mateo 5:27, 28) An usa nga takos han aton pagsarig maduruto nga nagtatrabaho basi makakwarta para ha iya kalugaringon ngan han iya pamilya ngan diri hiya namimiling hin ganansya ha gutiay gud la nga pangalimbasog  pinaagi han pagpahimulos ha iba. (1 Timoteo 5:8) An paghunahuna han sugad nga makatadunganon ngan Kasuratanhon nga mga suruklan mabulig ha aton nga makilala an mga tawo nga aton masasarigan. Dugang pa, an pagtipig hin pariho nga mga suruklan han panggawi mabulig ha kada tagsa ha aton nga magin takos han pagsarig han iba.

Magigin makalilipay gud an pag-ukoy ha kalibotan diin masasarigan an ngatanan nga mga tawo ngan an pagpakyas ha pagsarig diri na gud maeksister! Inop la ba ito? Diri para ha mga tawo nga seryoso nga natuod ha mga saad han Biblia, kay an Pulong han Dios nagtatagna han pag-abot han maopay nga “bag-o nga tuna” nga waray panlimbong, mga buwa, ngan pag-abuso ngan waray kasubo, sakit, ngan bisan kamatayon! (2 Pedro 3:13; Salmo 37:11, 29; Pahayag 21:3-5) Diri ba takos hibaroan an dugang pa mahitungod hini nga paglaom? Malilipay an mga Saksi ni Jehova ha pagtagana ha imo hin dugang pa nga impormasyon mahitungod hini ngan han iba pa nga importante nga mga topiko.

[Retrato ha pahina 4]

An diri pagsarig ha iba nagwawara han aton kalipay

[Retrato ha pahina 5]

Hi Jehova takos gud han aton pagsarig

[Mga Retrato ha pahina 7]

Kita ngatanan nagkikinahanglan hin mga relasyon nga iginbasar ha pagsarig ha usa kag usa