Matinumanon nga Kristiano nga Kababayin-an—Presyoso nga mga Magsiringba ha Dios

“An kaangayan malimbungon, ngan an katahom kawang. Kondi an babaye nga nahahadlok kan Jehova, hiya pagdadayawon.”—PROBERBIOS 31:30.

 1. Paonan-o gintatagad ni Jehova an kaanyag kon itanding ha pagtagad hito han kalibotan?

 PINABIBILHAN gud han kalibotan an panggawas nga hitsura, labi na may kalabotan ha kababayin-an. Kondi, hi Jehova interesado labi na ha totoo nga pagkatawo, nga nagigin mas makaruruyag samtang nagtitikalagas an usa. (Proberbios 16:31) Salit, an Biblia nagsasagda ha kababayin-an: “Iton iyo pagrayandayan diri magin ha gowa ha pagsalapid ha buhok, ngan paggamit hin mga alahas nga bulawan, o pagsul-ot hin panapton. Kondi maasya unta an tinago nga tawo ha kasingkasing, ha panapton nga waray pagkadunot han maaghop ngan mabuot nga espiritu, nga amo an mahal gud ha atubangan han Dios.”—1 Pedro 3:3, 4.

2, 3. Paonan-o nakabulig an kababayin-an ha pagpasarang han maopay nga sumat ha siyahan nga siglo, ngan paonan-o ini igintagna?

² An sugad nga darayawon nga disposisyon ipinakita han damu nga kababayin-an nga gin-unabi ha Biblia. Ha siyahan nga siglo, an iba hini nga kababayin-an nakapribilehiyo ha pagmangno kan Jesus ngan ha iya mga apostol. (Lukas 8:1-3) Ha urhi, an Kristiano nga kababayin-an nagin madasigon nga mga ebanghelisador; an iba naghatag hin birilhon nga suporta ha Kristiano nga kalalakin-an nga nangunguna, upod na hi apostol Pablo; ngan an pipira nagpakita hin makatirigamnan gud nga pagkamaabiabihon, iginpagamit pa ngani an ira balay para ha mga katirok han kongregasyon.

³ Igintagna ha Kasuratan nga gagamiton ni Jehova an kababayin-an ha gamhanan nga paagi ha pagtuman han iya katuyoan. Pananglitan, an Joel 2:28, 29 nagtagna nga an kalalakin-an ngan kababayin-an, batan-on ngan lagas, makarawat han baraan nga espiritu ngan makikigbahin ha pagpasarang han maopay nga sumat han Ginhadian. Iton nga tagna nagtikang matuman han Pentekostes 33 K.P. (Buhat 2:1-4, 16-18) An iba nga kababayin-an nga dinihogan-han-espiritu tinagan hin milagroso nga mga regalo, sugad han panagna. (Buhat 21:8, 9) Tungod han ira kadasig ha ministeryo, inin daku, espirituwal nga kasundalohan han matinumanon nga kabugtoan nga kababayin-an nakabulig ha madagmit nga pagsarang han Kristianidad ha siyahan nga siglo. Ha pagkamatuod, han mga 60 K.P., hi apostol  Pablo nagsurat nga an maopay nga sumat “iginwali ha ngatanan nga mga binuhat ha ilarom han langit.”—Kolosas 1:23.

Tinagan hin Kumendasyon Tungod han Ira Kaisog, Kadasig, Ngan Pagkamaabiabihon

 4. Kay ano nga hi Pablo may-ada maopay nga hinungdan ha paghatag hin kumendasyon ha damu nga kababayin-an ha siyahan-siglo nga Kristiano nga kongregasyon?

⁴ Hi apostol Pablo, pananglitan, mapasalamaton ha ministeryo nga ginbuhat han pipira nga kababayin-an—sugad la nga pinabibilhan yana han Kristiano nga mga paramangno an ministeryo han madasigon nga kababayin-an. Kaupod han kababayin-an nga gin-unabi ni Pablo amo “hi Trepena ngan hi Triposa, nga nagbubuhat tungod han Ginoo,” ngan “hi Persida nga hinigugma nga nagbuhat hin damu tungod ha Ginoo.” (Roma 16:12) Hi Euodia ngan hi Sintike, nagsurat hi Pablo, “nagbuhat man . . . upod [niya] ha maopay nga sumat.” (Filipos 4:2, 3) Hi Prisila, upod an iya bana, hi Akila, nag-alagad liwat kaupod ni Pablo. Hiya ngan hi Akila, ‘nagbutang han ira mga liog ha peligro’ para kan Pablo, nga nakaaghat ha iya nga magsurat: “Diri la ako an nagpapasalamat ha ira, kondi sugad man an ngatanan nga mga singbahan han mga Hentil.”—Roma 16:3, 4; Buhat 18:2.

5, 6. Ha ano nga mga paagi nagpakita hin maopay nga susbaranan hi Prisila para ha kabugtoan nga kababayin-an yana?

⁵ Ano an hinungdan han kadasig ngan kaisog ni Prisila? An asoy aada ha Buhat 18:24-26, diin mababasa naton nga sinuporta hiya ha iya bana ha pagbulig kan Apolo, usa nga maopay nga mamumulong, nga mahibaro mahitungod han bag-o nga iginpahayag nga kamatuoran. Matin-aw, kon sugad, hi Prisila usa ka maopay nga estudyante han Pulong han Dios ngan han katutdoan han mga apostol. Sugad nga resulta, napatubo niya an maopay nga mga kalidad nga tungod hito nagin presyoso hiya ha Dios ngan ha iya bana ngan nagin birilhon nga membro han siyahan nga kongregasyon. Sugad hito kapresyoso an damu nga maduruto nga Kristiano nga kabugtoan nga kababayin-an yana nga mauyatom nga nag-aaram ha Biblia ngan nakarawat liwat hin espirituwal nga pagkaon nga igintatagana ni Jehova pinaagi han “matinumanon nga tinaporan.”—Lukas 12:42.

⁶ Hi Akila ngan hi Prisila maabiabihon hinduro. Nag-ukoy hi Pablo ha ira balay han nagtrabaho hiya kaupod nira ha ira negosyo nga paghimo hin tolda ha Korinto. (Buhat 18:1-3) Han binalhin an mag-asawa ngadto ha Efeso ngan ha urhi ngadto ha Roma, padayon nga ipinakita nira an Kristiano nga pagkamaabiabihon, iginpagamit pa ngani an ira balay para ha mga katirok han kongregasyon. (Buhat 18:18, 19; 1 Korinto 16:8, 19) Iginpagamit liwat ni Nimpa ngan ni Maria nga iroy ni Juan Markos an ira mga balay para ha mga katirok han kongregasyon.—Buhat 12:12; Kolosas 4:15.

Usa ka Presyoso nga Bulig Yana

7, 8. Ano an darayawon nga rekord han sagrado nga pag-alagad han damu nga Kristiano nga kababayin-an yana, ngan ha ano hira makakasarig?

⁷ Sugad han siyahan nga siglo, an matinumanon nga Kristiano nga kababayin-an yana may-ada importante nga bahin ha pagtuman han katuyoan han Dios, labi na ha pag-ebanghelyo nga buruhaton. Ngan maopay gud an rekord hini nga kabugtoan nga kababayin-an! Tagda an susbaranan ni Gwen, nga matinumanon nga nag-alagad kan Jehova ha sulod hin sobra 50 ka tuig tubtob nga namatay hiya han 2002. “An kadasig ni Gwen sugad nga ebanghelisador hinbabaroan gud ha amon siyudad,” siring han iya bana. “Para ha iya, an tagsa nga tawo mahimo kumarawat han gugma ngan mga saad ni Jehova. An iya pagkamaunungon ha Dios, ha iya organisasyon, ngan ha amon pamilya—dugang pa han iya mahigugmaon nga pagdasig kon nanluluya kami—daku gud nga suporta ha akon ngan ha amon mga anak ha bug-os nga panahon han amon makapatagbaw ngan may balos nga kinabuhi nga magkaupod. Nahihidlaw gud kami ha iya.” Hi Gwen ngan an iya bana mag-asawa ha sulod hin 61 ka tuig.

⁸ Napuplo ka yukot nga Kristiano nga kababayin-an, solo ngan inasaw-an, an nag-aalagad sugad nga payunir nga mga ministro ngan mga misyonero, nga kontento ha mga kinahanglanon ha kinabuhi samtang iginpapasarang nira an mensahe han Ginhadian ha mga teritoryo tikang ha mga siyudad ngadto ha nahibubulag nga mga lugar. (Buhat 1:8) Damu an waray magtag-iya hin balay o magkaada mga anak basi mas bug-os nga makag-alagad kan Jehova. Aada adton maunungon nga nasuporta ha mga bana nga nag-aalagad sugad nga nagbibiyahe nga mga paramangno, ngan yinukot nga kabugtoan nga kababayin-an an nag-aalagad ha Bethel ha bug-os nga kalibotan. Sigurado, inin nagsasakripisyo-ha-kalugaringon  nga kababayin-an kaupod han “birilhon nga mga butang han ngatanan nga nasud” nga nagpupuno hin himaya ha balay ni Jehova.—Hagay 2:7.

9, 10. Paonan-o iginpahayag han iba nga mga membro han pamilya an apresasyon ha maopay nga susbaranan nga ipinapakita han Kristiano nga mga asawa ngan mga iroy?

⁹ Syempre, damu nga Kristiano nga kababayin-an an may-ada mga responsabilidad ha pamilya; kondi, inuuna nira an mga buruhaton han Ginhadian. (Mateo 6:33) Usa nga solo nga payunir nga babaye an nagsurat: “Hi Nanay, tungod han iya marig-on nga pagtoo ngan maopay nga susbaranan, nakabulig gud ha akon nga magregular payunir. Ha pagkamatuod, usa hiya han akon gimaopayi nga mga kaupod nga payunir.” Usa nga bana an nasiring mahitungod han iya asawa, nga usa nga iroy han lima nga dagku na nga mga anak nga kababayin-an: “An amon balay pirme malimpyo ngan mahamis. Gintitipigan ito ni Bonnie nga simple ngan mahamis basi an amon pamilya makagsentro ha espirituwal nga mga tinguha. An iya bulig ha maopay nga pagpanginano ha amon pinansyal nagtugot ha akon nga magtrabaho hin part-time ha sulod hin 32 ka tuig, nga tungod hito mas damu nga panahon an nagagamit ko para ha amon pamilya ngan ha espirituwal nga mga butang. Gintutdoan liwat han akon asawa an amon mga anak han bili han pagin maduruto. Takos gud hiya han akon pagdayaw.” Yana hira nga duha nag-aalagad ha sentro nga opisina han mga Saksi ni Jehova.

¹⁰ Usa nga bana an nagsurat mahitungod han iya asawa, usa nga iroy han dagku na nga mga anak: “An mga kalidad nga gindadayaw ko gud kan Susan amo an iya daku nga gugma ha Dios ngan ha mga tawo, sugad man an iya pagsabot, empatiya, ngan katangkod. Inaabat niya pirme nga takos hi Jehova han gimaopayi gud nga maihahatag naton ha iya—usa nga prinsipyo nga inaaplikar niya ha iya kalugaringon sugad nga surugoon han Dios ngan sugad nga iroy.” Tungod han suporta han iya asawa, kinarawat hini nga bana an damu nga espirituwal nga mga pribilehiyo, upod na an pag-alagad sugad nga tigurang, payunir, kabulig nga paramangno han sirkito, ngan membro han Hospital Liaison Committee. Presyoso gud an sugad nga kababayin-an ha ira mga bana, ha mga igkasi-Kristiano, ngan labaw ha ngatanan, kan Jehova!—Proberbios 31:28, 30.

Presyoso nga Kababayin-an nga Waray Bana

11. (a) Paonan-o iginpapahayag ni Jehova an iya pagtagad ha matinumanon nga kababayin-an, labi na ha mga balo? (b) Ha ano makakasiguro an Kristiano nga mga balo ngan an iba pa nga matinumanon nga kabugtoan nga kababayin-an nga waray bana?

¹¹ Agsob igpahayag ni Jehova an iya pagtagad para ha kaopayan han mga balo. (Deuteronomio 27:19; Salmo 68:5; Isaias 10:1, 2) Diri hiya nagbabag-o. Padayon nga interesado gud hiya diri la ha mga balo kondi liwat ha solo nga mga iroy sugad man ha kababayin-an nga mga solo tungod kay ito an karuyag nira o tungod kay waray pa hira makabiling hin angayan nga Kristiano nga bana. (Malakias 3:6; Jakobo 1:27) Kon usa ka hiton matinumanon nga nag-aalagad kan Jehova nga waray suporta han Kristiano nga bana, makakasiguro ka nga presyoso ka ha paniplatan han Dios.

12. (a) Paonan-o ipinapakita han iba nga Kristiano nga kabugtoan nga kababayin-an an ira pagkamaunungon kan Jehova? (b) Ano nga mga pagbati an gin-iilob han iba han aton kabugtoan nga kababayin-an?

¹² Tagda, pananglitan, an aton Kristiano nga kabugtoan nga kababayin-an nga waray mag-asawa tungod kay maunungon nga nasugot hira ha sagdon ni Jehova nga mag-asawa “ha Ginoo la.” (1 Korinto 7:39, NW; Proberbios 3:1) An Pulong han Dios nagpapasarig ha ira: “Ha maunungon [hi Jehova] magios hin maunungon.” (2 Samuel 22:26, NW) Kondi, para ha damu ha ira, makuri an pagpabilin nga solo. Usa nga bugto nga babaye an  nasiring: “Determinado ako mag-asawa ha Ginoo la, kondi damu ka beses nga nagtatangis ako kon nakikita ko an akon kasangkayan nga nakaasawa hin mag-opay nga Kristiano nga kalalakin-an, samtang ako nag-uusahan pa gihapon.” Usa pa nga bugto an nasiring: “Nag-aalagad ako kan Jehova ha sulod hin 25 ka tuig na. Determinado ako nga magpabilin nga maunungon ha iya, kondi an pagbati hin kamingaw agsob nga nakakapasubo ha akon.” Hiya nasiring pa: “An kabugtoan nga kababayin-an sugad ha akon naghahandom hin pagdasig.” Paonan-o naton mabubuligan an sugad nga mga maunungon?

13. (a) Ano an hinbaroan naton tikang ha susbaranan nga ipinakita hadton binisita ha anak nga babaye ni Jepte? (b) Ha ano pa nga mga paagi maipapakita naton an pagtagad para ha solo nga kabugtoan nga kababayin-an ha aton kongregasyon?

¹³ An usa nga paagi makikita ha kadaan nga susbaranan. Han iginsalikway han anak nga babaye ni Jepte an iya higayon ha pagkaada hin bana, nasabtan han katawohan nga nagsasakripisyo hiya. Ano an ginbuhat basi dasigon hiya? “An mga anak nga kababayin-an ha Israel nakadto kada tuig pagsaurog [“paghatag hin kumendasyon,” NW] ha anak nga babaye ni Jepte an Galaadnon ha upat ka adlaw ha usa ka tuig.” (Hukom 11:30-40) Ha sugad man nga paagi, sadang naton ihatag an kinasingkasing nga kumendasyon ha solo nga kabugtoan nga kababayin-an nga maunungon nga nasugot ha balaud han Dios. a Ano an usa pa nga paagi nga maipapakita naton an aton pagtagad? Ha aton mga pag-ampo sadang kita mangamuyo kan Jehova nga suportahan an sugad nga hinigugma, matinumanon nga kabugtoan nga kababayin-an nga magpadayon nga maunungon ha ira pag-alagad. Takos hira han pasarig nga hinigugma gud hira ngan pinabibilhan gud hira ni Jehova ngan han bug-os nga Kristiano nga kongregasyon.—Salmo 37:28.

Kon Paonan-o Naglalampos an Solo nga mga Ginikanan

14, 15. (a) Kay ano nga sadang dumaop an Kristiano nga solo nga mga iroy kan Jehova para han bulig? (b) Paonan-o mahimo gumios an solo nga mga ginikanan uyon ha ira mga pag-ampo?

¹⁴ An Kristiano nga kababayin-an nga solo nga mga ginikanan naatubang liwat hin damu nga mga kakurian. Kondi, makakadaop hira kan Jehova para han bulig ha pagmangno ha ira mga anak uyon ha mga prinsipyo han Biblia. Oo, kon ikaw usa nga solo nga ginikanan, diri mo mahihimo an buruhaton han iroy ngan han amay ha ngatanan nga mga bahin. Kondi, bubuligan ka ni Jehova ha pagbuhat han imo damu nga mga responsabilidad kon hangyoon mo an iya bulig nga may pagtoo. Ha pag-ilustrar: Pananglitan may-ada ka mabug-at nga bag han mga pinamalit nga dadad-on ngadto ha imo apartment ha igbaw han hitaas nga tinukod. Maghahagdan ka ba kon may-ada hirani nga elevator? Syempre diri! Ha sugad man nga paagi, ayaw pag-inusahan ha pagdara hin mabug-at nga mga pinas-an ha emosyon kon mahimo ka man maghangyo kan Jehova hin bulig. Ha pagkamatuod, gin-aaghat ka niya nga dumaop ha iya. An Salmo 68:19 nasiring: “Mabulahan kunta an Ginoo, nga ha ikinaadlaw nagpapas-an han aton kabug-atan.” An 1 Pedro 5:7 nag-aaghat liwat ha imo nga itubyan kan Jehova an ngatanan mo nga pangarit “kay hiya nagmamangno  ha iyo.” Salit kon an mga problema ngan mga pangarit nagpapabug-at ha imo, ibutang an imo pinas-an ngadto ha imo langitnon nga Amay, ginbubuhat ito nga “waray udong-udong.”—1 Tesalonika 5:17; Salmo 18:6; 55:22.

¹⁵ Pananglitan, kon ikaw usa nga iroy, sigurado nga nababaraka ka nga an imo mga anak bangin maimpluwensyahan han mga kaupod ha eskwelahan o nga bangin umatubang hira hin mga pagsari ha integridad. (1 Korinto 15:33) Sadang gud ikabaraka ito. Kondi sadang liwat ito ig-ampo. Ha pagkamatuod, kay ano nga diri ig-ampo an sugad nga mga butang upod an imo mga anak antes hira sumulod ha eskwelahan, bangin katapos han urosa nga paghisgot han inadlaw nga teksto? An kinasingkasing, espisipiko nga mga pag-ampo mahimo magkaada daku nga epekto ha hunahuna han imo mga anak. Labaw ha ngatanan, makakarawat mo an bendisyon ni Jehova kon mapailubon nga nangangalimbasog ka ha pagpasilsil han iya Pulong ha kasingkasing han imo mga anak. (Deuteronomio 6:6, 7; Proberbios 22:6) Hinumdumi, “an mga mata han Ginoo itinatamod ha mga magtadong, ngan an iya mga talinga nanmamati ha ira pag-ampo.”—1 Pedro 3:12; Filipos 4:6, 7.

16, 17. (a) Ano an ginsiring han usa nga anak nga lalaki mahitungod han gugma nga ipinakita han iya iroy? (b) Paonan-o an espirituwal nga panlantaw han iroy nakaapekto ha iya mga anak?

¹⁶ Tagda an ehemplo ni Olivia, usa nga iroy han unom nga anak. An iya bana nga diri-tumuroo binaya ha pamilya katapos gud matawo an ultimo nga anak, kondi kinaburut-on nga ginbuhat niya an responsabilidad ha pagbansay ha iya mga anak ha mga paagi han Dios. An anak nga lalaki ni Olivia, hi Darren, nga 31 anyos na yana ngan nag-aalagad sugad nga Kristiano nga tigurang ngan payunir, mga 5 anyos la hadto nga panahon. Nakadugang ha mga problema ni Olivia an pagkaada grabe nga sakit ni Darren hadto, nga nagpapakuri pa gihapon ha iya yana. Ha paghinumdom han iya pagkabata, hi Darren nagsurat: “Nahinunumdoman ko pa nga nalingkod ako ha akon higdaan ha ospital nga naghuhulat gud kan Nanay. Nalingkod hiya tupad ko ngan ginbabasa ha akon an Biblia kada adlaw. Katapos, nagkakanta hiya han karantahon han Ginhadian nga ‘Nagpapasalamat Kami ha Imo, Jehova.’ b Tubtob yana, iton an paborito ko nga karantahon han Ginhadian.”

¹⁷ An pagsarig ngan gugma ni Olivia kan Jehova nakabulig ha iya nga maglampos sugad nga solo nga iroy. (Proberbios 3:5, 6) An iya maopay nga paggios nakita ha mga tumong nga ginhimo niya para ha iya mga anak. “Pirme kami gindadasig ni Nanay nga himoon nga tumong an bug-os-panahon nga ministeryo,” siring ni Darren. “Sugad nga resulta, upat han akon lima nga kabugtoan nga kababayin-an ngan ako an sinulod ha bug-os-panahon nga ministeryo. Kondi, waray gud ini ighambog ni Nanay ha iba. Nangangalimbasog gud ako nga subaron an iya mag-opay nga mga kalidad.” Oo, diri ngatanan nga mga anak nagtutubo nga nag-aalagad ha Dios sugad han mga anak ni Olivia. Kondi kon ginbubuhat han usa nga iroy an iya gimaopayi basi magkinabuhi uyon ha mga prinsipyo han Biblia, sigurado hiya  han giya ngan mahigugmaon nga suporta ni Jehova.—Salmo 32:8.

18. Paonan-o naton maipapakita nga pinabibilhan naton an Kristiano nga kongregasyon nga tagana ni Jehova?

¹⁸ Kadak-an han suporta han Dios iginhahatag pinaagi han Kristiano nga kongregasyon, pinaagi han regular nga programa han espirituwal nga pagpakaon hito, han Kristiano nga kabugtoan, ngan han hamtong ha espirituwal nga “mga regalo nga kalalakin-an.” (Efeso 4:8, NW) An matinumanon nga mga tigurang nangangalimbasog nga parig-unon an ngatanan ha kongregasyon, naghahatag hin espesyal nga atensyon ha mga panginahanglan han “mga ilo ngan mga balo nga babaye ha ira mga kasakitan.” (Jakobo 1:27) Salit magpabilin nga duok ha katawohan han Dios, ayaw gud ibulag an imo kalugaringon.—Proberbios 18:1; Roma 14:7.

An Nakakadani nga Kalidad han Pagpasakop

19. Kay ano nga an pagpasakop han asawa diri nagpapasabot hin pagin ubos, ngan ano nga ehemplo ha Biblia an nasuporta hini?

¹⁹ Ginlarang ni Jehova an babaye sugad nga kabulig han lalaki. (Genesis 2:18) Salit, an pagpasakop han babaye ha iya bana diri nagpapasabot hin pagin ubos. Lugod, nagpapasidungog ito ha babaye, naghahatag ha iya hin higayon nga gamiton an iya damu nga mga hiyas ngan mga abilidad uyon ha kaburut-on han Dios. Iginhuhulagway han Proberbios kapitulo 31 an magkalainlain nga mga buruhaton han usa nga may-kapas nga asawa ha kadaan nga Israel. Binulig hiya ha mga kablas, nagtanom hin mga urubasan, ngan pinalit hin tuna. Oo, “ha iya nasarig an kasingkasing han iya bana, ngan waray nakukulang nga ganansya.”—Bersikulo 11, 16, 20.

20. (a) Paonan-o sadang tagdon han Kristiano nga babaye an iya hatag-han-Dios nga mga abilidad, o mga hiyas? (b) Ano nga maopay nga mga kalidad an ipinakita ni Ester, ngan sugad nga resulta, paonan-o ginamit hiya ni Jehova?

²⁰ An mapainubsanon, mahadlukon-ha-Dios nga babaye diri nagpapahitaas han iya kalugaringon o nakikigkompetensya ha iya bana. (Proberbios 16:18) Diri hiya nangangalimbasog nga magkaada daku nga mahimo labi na pinaagi han sekular nga mga tinguha kondi ginagamit niya an iya hatag-han-Dios nga mga hiyas basi magserbi gud ha iba—ha iya pamilya, mga igkasi-Kristiano, mga igkasi-tawo, ngan labaw ha ngatanan, kan Jehova. (Galasia 6:10; Tito 2:3-5) Tagda an susbaranan ni Rayna Ester ha Biblia. Bisan kon mahusay ha pisikal, malumo hiya ngan mapinasakupon. (Ester 2:13, 15) Han nag-asawa, nagpakita hiya hin hilarom nga pagtahod ha iya bana, hi Hadi Ahasuerus, diri sugad han una nga asawa han hadi nga hi Basti. (Ester 1:10-12; 2:16, 17) Matinalahuron nga ginsunod liwat ni Ester an opinyon ni Mordikay, an iya edaran na nga patod, may kalabotan ha angayan nga mga butang—bisan han rayna na hiya. Kondi diri hiya maluya! Maisugon nga iginbuhayhag niya hi Haman, an gamhanan ngan waray-kalooy nga lalaki nga nagplano ha pagpoo ha mga Judio. Ginamit ni Jehova hi Ester ha gamhanan nga paagi ha pagluwas ha iya katawohan.—Ester 3:8–4:17; 7:1-10; 9:13.

21. Paonan-o magigin mas presyoso pa gud kan Jehova an usa nga Kristiano nga babaye?

²¹ Matin-aw, ha naglabay ngan yana, ipinapakita han diosnon nga kababayin-an an ira esklusibo nga debosyon kan Jehova ngan ha pagsingba ha iya. Salit, an mahadlukon-ha-Dios nga kababayin-an presyoso ha paniplatan ni Jehova. Mga Kristiano nga kabugtoan nga kababayin-an, tuguti niyo hi Jehova pinaagi han iya espiritu nga padayon nga magmolde ha iyo nga magin mas makaruruyag nga “surudlan,” usa nga “igin-andam para ha ngatanan nga maopay nga buhat.” (2 Timoteo 2:21; Roma 12:2) Mahitungod han sugad nga presyoso nga mga magsiringba, an Pulong han Dios nasiring: “Tagi hiya han bunga han iya mga kamot; ngan papagdayawa ha iya dida ha mga ganghaan an iya mga buhat.” (Proberbios 31:31) Hinaot matuman ito ha kada usa ha iyo.

[Mga footnote]

Nahinunumdoman Mo Ba?

• Paonan-o pinamatud-an han pipira nga Kristiano nga kababayin-an ha siyahan nga siglo nga presyoso hira ha paniplatan ni Jehova?

• Paonan-o pinamamatud-an han damu nga kabugtoan nga kababayin-an ha aton panahon nga presyoso hira ha Dios?

• Ha ano nga mga paagi binubuligan ni Jehova an solo nga mga iroy ngan an iba nga kabugtoan nga kababayin-an nga waray bana?

• Paonan-o maipapakita han usa nga babaye an iya kinasingkasing nga pagtahod ha kahikayan han pagkaulo?

[Mga Pakiana]

[Kahon ha pahina 17]

Mga Susbaranan nga Angay Pamalandungon

Karuyag mo ba tagdon an pipira han dugang nga mga susbaranan han matinumanon nga kababayin-an nga gin-unabi ha Biblia? Kon amo, alayon basaha an mga teksto nga aada ha ubos. Samtang pinamamalandong mo an magkalainlain nga mga indibiduwal nga iginlista, pangalimbasugi nga masabtan an mga prinsipyo nga mahimo mo iaplikar hin labaw pa gud ha imo kinabuhi.—Roma 15:4.

◆ Sara: Genesis 12:1, 5; 13:18a; 21:9-12; 1 Pedro 3:5, 6.

◆ Mahinatagon nga Israelita nga kababayin-an: Eksodo 35:5, 22, 25, 26; 36:3-7; Lukas 21:1-4.

◆ Debora: Hukom: 4:1–5:31.

◆ Rut: Rut 1:4, 5, 16, 17; 2:2, 3, 11-13; 4:15.

◆ Babaye ha Sunem: 2 Hadi 4:8-37.

◆ Babaye ha Fenisia: Mateo 15:22-28.

◆ Marta ngan Maria: Markos 14:3-9; Lukas 10:38-42; Juan 11:17-29; 12:1-8.

◆ Tabita: Buhat 9:36-41.

◆ Upat nga anak nga kababayin-an ni Felipe: Buhat 21:9.

◆ Pebe: Roma 16:1, 2.

[Retrato ha pahina 15]

Gintatagan mo ba hin kumendasyon an waray bana nga kabugtoan nga kababayin-an nga maunungon nga nasugot ha balaud han Dios?

[Retrato ha pahina 16]

Ano nga espisipiko nga mga hangyo an mahimo unabihon ha pag-ampo antes umiskwela an mga anak?