Mga Pakiana Tikang ha mga Magbarasa

Kay ano nga nangaro hi Eliseo hin “duha ka bahin” han espiritu ni Elias?

Antes gud matapos ni Elias an iya toka sugad nga propeta ha Israel, an barubata nga hi propeta Eliseo naghangyo ha iya: “Nanginginyupo ako ha imo, itugot nga an duha ka bahin han imo espiritu manganhi ha akon.” (2 Hadi 2:9) Ha espirituwal nga pagkayakan, matin-aw nga nangangaro hi Eliseo hin duha ka bahin sugad han iginhahatag ha suhag nga anak nga lalaki. (Deuteronomio 21:17) An halipot nga paghisgot han asoy magpapatin-aw hini ngan mabulig ha aton nga makakuha hin mga leksyon tikang ha nahitabo.

Uyon ha sugo ni Jehova, gindihogan ni propeta Elias hi Eliseo sugad nga manurunod ha iya. (1 Hadi 19:19-21) Ha sulod hin mga unom ka tuig, nagin matinumanon nga kabulig ni Elias hi Eliseo ngan determinado hiya nga buhaton ini tubtob ha kataposan. Duok nga nagbuhat hi Eliseo kaupod ni Elias, bisan ha ultimo nga adlaw ni Elias sugad nga propeta ha Israel. Bisan kon ginsagda ni Elias hi Eliseo nga diri na magsinunod ha iya, tulo ka beses nga nagsiring an barubata nga propeta: “Diri ako mabaya ha imo.” (2 Hadi 2:2, 4, 6; 3:11) Oo, gintagad ni Eliseo an lagas nga propeta sugad nga iya espirituwal nga amay.—2 Hadi 2:12.

Kondi, diri la hi Eliseo an espirituwal nga anak ni Elias. Hi Elias ngan hi Eliseo nakig-upod ha usa ka grupo han kalalakin-an nga kilala sugad nga “an mga anak nga kalalakin-an han mga manaragna.” (2 Hadi 2:3) An asoy ha Ikaduha nga Mga Hadi nagpapakita nga ini nga “mga anak nga kalalakin-an” may-ada liwat duok nga relasyon ha ira espirituwal nga amay, hi Elias. (2 Hadi 2:3, 5, 7, 15-17) Kondi, sugad nga an dinihogan nga manurunod, hi Eliseo an nangunguna ha espirituwal nga mga anak nga kalalakin-an ni Elias—pariho hiya hin suhag nga anak nga lalaki. Ha kadaan nga Israel, an literal nga suhag nga lalaki nakarawat hin duha nga bahin han napanunod han iya amay, samtang an tagsa han iba nga mga anak nga lalaki nakarawat hin usa ka bahin. Salit, hi Eliseo nangaro hin duha ka bahin han espirituwal nga panurundon ni Elias.

Kay ano nga ginhangyo ini ni Eliseo hito nga partikular nga panahon? Tungod kay titikangan na niya an pagtuman han mabug-at nga buruhaton—an pagsaliwan kan Elias sugad nga propeta ha Israel. Maaram hi Eliseo nga basi matuman an mga responsabilidad nga may kalabotan hinin daku nga toka, kinahanglan niya an espirituwal nga gahum nga labaw gud han iya kalugaringon nga mga abilidad, gahum nga hi Jehova la an makakahatag. Kinahanglan hiya magin maisugon sugad nga nagin maisugon hi Elias. (2 Hadi 1:3, 4, 15, 16) Salit, naghangyo hiya hin duha ka bahin han espiritu ni Elias, an espiritu han kaisog ngan han pagin ‘bug-os nga maabugho para kan Jehova’—makaruruyag nga mga kalidad nga iginbubunga han espiritu han Dios. (1 Hadi 19:10, 14) Paonan-o binaton hi Elias?

Maaram hi Elias nga waray hiya katungod ha paghatag han pinangaro ni Eliseo, kondi an Dios la. Salit ha mapainubsanon nga paagi binaton hi Elias: “Nangaro ka hin makuri nga butang: bisan pa, kon ikaw makakita han pagkuha ha akon tikang ha imo, maamo ito para ha imo.” (2 Hadi 2:10) Ngan, nahinabo gud, igintugot ni Jehova nga makita ni Eliseo hi Elias nga nagtitipaigbaw ha alipuros nga hangin. (2 Hadi 2:11, 12) Natuman an hangyo ni Eliseo. Gintagan hiya ni Jehova han espiritu nga ginkinahanglan niya basi matikangan an iya bag-o nga buruhaton ngan basi maatubang an tiarabot nga mga pagsari.

Yana nga panahon, an dinihogan nga mga Kristiano (gintatawag usahay nga Eliseo nga klase) ngan mga surugoon han Dios ha kabug-osan makakakuha hin daku nga pagdasig tikang hini nga asoy ha Biblia. Usahay, kon tinatagan kita hin bag-o nga toka bangin mabug-atan kita ngan umabat nga diri takos, o bangin mawad-an kita hin kaisog nga magpadayon ha aton pagsangyaw-han-Ginhadian nga buruhaton samtang naatubang kita hin nagtitikaduro nga kawaray-interes o pagkontra ha aton teritoryo. Kondi, kon manginyupo kita para han bulig ni Jehova, tatagan kita niya han baraan nga espiritu tungod kay ginkikinahanglan naton ito basi maatubang an mga kakurian ngan nagbabag-o nga mga kahimtang. (Lukas 11:13; 2 Korinto 4:7; Filipos 4:13) Oo, sugad la nga ginparig-on ni Jehova hi Eliseo para ha iya mas mabug-at nga mga responsabilidad, bubuligan niya kita ngatanan, batan-on ngan lagas, nga matuman an aton ministeryo.—2 Timoteo 4:5.