Patuboa an Mahinatagon nga Disposisyon

WARAY usa an natawo nga may-ada na mahinatagon nga disposisyon. An natural nga hilig han usa nga minasus-an amo an pagtagbaw han iya kalugaringon nga mga karuyag ngan mga kinahanglanon, nga diri gintatagad an mga kaopayan bisan han mga nag-aataman ha iya. Kondi, naabot an panahon nga hinbabaroan han bata nga diri la hiya an may-ada mga panginahanglan. Kinahanglan niya tagdon an mga panginahanglan han iba, ngan kinahanglan hiya mahibaro diri la ha pagkarawat kondi ha paghatag ngan pagpaangbit. An mahinatagon nga disposisyon kinahanglan patuboon.

Diri ngatanan nga nahatag—bisan ha hura nga paagi—may-ada mahinatagon nga disposisyon. Bangin humatag an iba ha usa nga charity para han ira kalugaringon nga mga interes. An iba bangin humatag basi dayawon han mga tawo. Kondi, naiiba an paghatag han totoo nga mga Kristiano. Ano, kon sugad, an mga pangirilal-an han paghatag nga igin-aaghat ha Pulong han Dios? An halipot nga paghisgot mahitungod ha paghatag nga ginbuhat han siyahan-siglo nga mga Kristiano mabaton hito nga pakiana.

Mga Ehemplo han Kristiano nga Paghatag

An Kristiano nga paghatag, sugad han iginsaysay ha Biblia, ha kabug-osan amo an “pagpaangbit hin mga butang ha iba” nga totoo  nga nanginginahanglan. (Hebreo 13:16, NW; Roma 15:26) Diri ito sadang buhaton nga napipiritan la. Hi apostol Pablo nagsurat: “An tagsatagsa humatag sugad han uyon han iya kasingkasing; diri ha kasubo o ha kinahanglan; kay an Dios nahigugma ha malipayon nga humaratag.” (2 Korinto 9:7) An paghatag diri liwat sadang buhaton basi magparayaw ha iba. Hira Ananias ngan Sapira naghimo han sugad nga pagkasalingkapaw ngan nag-ani hin maraot gud nga mga resulta.—Buhat 5:1-10.

Nagkaada daku gud nga panginahanglan ha paghatag han an damu nga mga Judio ngan mga proselita tikang ha hirayo nga mga lugar nagkatirok ha Jerusalem para ha piyesta han Pentekostes 33 K.P. Didto nahitabo nga an mga sumurunod ni Jesus “napuno han espiritu santo, ngan nagtikang pagyakan ha iba nga mga yinaknan.” Usa ka daku nga grupo han mga tawo an nagpalibot ha ira ngan namati ha makapabantad nga pahayag ni Pedro mahitungod kan Jesu-Kristo. Ha urhi, nakita han mga tawo an pagtambal ni Pedro ngan ni Juan ha usa nga piay nga lalaki ha purtahan han templo, ngan makausa pa nga hinbatian nira hi Pedro nga nagyakan mahitungod kan Jesus ngan han panginahanglan hin pagbasol. Yinukot an nagbasol ngan nabawtismohan sugad nga mga sumurunod ni Kristo.—Buhat, kapitulo 2 ngan 3.

Karuyag han bag-o nga mga nakombirte nga magpabilin ha Jerusalem ngan kumarawat hin dugang nga instruksyon tikang ha mga apostol ni Jesus. Kondi paonan-o itatagana han mga apostol an mga panginahanglan han ngatanan nga mga bisita? An asoy han Biblia nagsusumat ha aton: “An kadam-an nga may mga tuna o mga kabalayan, ipinamaligya nira, ngan panad-on an mga bayad han mga butang nga ipinamaligya, ngan ipinamutang dida ha mga tiil han mga apostol; ngan pagbahin-bahinon ha tagsatagsa, sugad han iya kinahanglan.” (Buhat 4:33-35) Oo, an naporma pa la nga kongregasyon ha Jerusalem may-ada mahinatagon nga disposisyon!

Ha urhi, iginpakita han iba nga mga kongregasyon an pariho nga mahinatagon nga disposisyon. Pananglitan, an mga Kristiano ha Masedonia, bisan kon kablas, naghatag hin lahos pa han ira aktuwal nga maaakos para ha ira nanginginahanglan nga kabugtoan ha Judea. (Roma 15:26; 2 Korinto 8:1-7) An kongregasyon ha Filipos susbaranan gud ha pagsuporta ha ministeryo ni Pablo. (Filipos 4:15, 16) An kongregasyon ha Jerusalem mismo adlaw-adlaw nga nanhatag hin pagkaon ha nanginginahanglan nga mga balo, ngan nagpili an mga apostol hin pito nga kuwalipikado nga kalalakin-an basi siguruhon nga mahatagan an ngatanan nga takos nga mga balo.—Buhat 6:1-6.

Madagmit nga gumios an siyahan Kristiano nga mga kongregasyon bisan sugad nga pangandam para ha tiarabot nga makuri nga mga panahon. Pananglitan, han igintagna ni propeta Agabus an tiarabot nga daku nga kagutom, an mga disipulo ha kongregasyon han Antiokia ha Syria “sugad han iya madangat naglarang [“nagsiguro,” NW] pagpadara hin tambulig nga salapi ngadto ha mga kabugtoan, nga nangungukoy ha Judea.” (Buhat 11:28, 29) Maopay gud nga disposisyon an ira ipinakita pinaagi han pag-usisa kon ano an bangin pagkinahanglanon han iba ngan pagtagana basi matagbaw an mga panginahanglan!

Ano an nakaaghat ha siyahan nga mga Kristiano nga magin duro kamahinatagon ngan kamahigugmaon? Ha pagkamatuod, paonan-o an usa nagkakaada mahinatagon nga disposisyon? Daku an aton hibabaroan pinaagi han madaliay nga paghisgot ha susbaranan ni Hadi David.

Hura nga Suporta ni David ha Totoo nga Pagsingba

Ha sulod hin haros 500 ka tuig, an arka han kauyonan—usa nga sagrado nga baul nga nagrepresentar han presensya ni Jehova—waray permanente nga ginbubutangan. Gintipigan ito ha usa nga tolda, o tabernakulo, nga iginbalhin-balhin tikang ha usa nga lugar ngadto ha lain durante han paglakaton han Israel ha kamingawan ngan katapos ngadto ha Tuna nga Iginsaad. Hingyap gud ni Hadi David nga kuhaon an arka tikang ha tolda diin igintago ito ngan magtukod hin angayan nga balay para kan Jehova nga pagbubutangan han sagrado nga arka. Ha pakiistorya kan propeta Natan, hi David nagsiring: “Kitaa, ako naukoy ha balay nga sedro, kondi an arka han kauyonan ni Jehova naukoy ha ilarom han mga biray.”—1 Kronikas 17:1.

Kondi, hi David nagin usa nga girriro. Salit nagsugo hi Jehova nga an iya anak nga hi Salomon, durante han mamurayawon nga pagmando, an magtutukod han templo nga bubutangan han arka han kauyonan. (1 Kronikas 22:7-10) Kondi, waray  ini makapugong han mahinatagon nga disposisyon ni David. Nag-organisa hiya hin daku nga grupo nga magtatrabaho, ngan nagtikang hiya ha pagtagana hin mga materyales nga gagamiton ha pagtukod han templo. Ha urhi hiya nagsiring kan Salomon: “Nag-andam ako para ha balay ni Jehova hin usa ka gatos ka yukot ka talento nga bulawan, ngan hin usa ka yukot ka talento nga salapi, ngan hin tumbaga ngan hin puthaw ha waray timbang; kay ini damu hinduro: hin tigkahoy liwat ngan hin bato ako nag-andam.” (1 Kronikas 22:14) Tungod kay waray makontento hito, naghatag hi David hin bulawan ngan salapi tikang ha iya personal nga panag-iya, nga sobra $1,200,000,000 an presente nga kantidad. Dugang pa, an mga prinsipe hura liwat nga naghatag. (1 Kronikas 29:3-9) Matin-aw, hi David nagpakita hin mahinatagon nga disposisyon!

Ano an nakaaghat kan David nga maghatag hin hura? Nasantop niya nga an ngatanan nga iya tinatag-iya ngan nahimo amo an resulta han bendisyon ni Jehova. Iya ginkilala ha pag-ampo: “O Jehova nga amon Dios, ini ngatanan nga andam nga amon gin-andam ha pagtindog para ha imo hin balay para ha imo baraan nga ngaran nagtikang ha imo kamot, ngan an ngatanan imo kalugaringon. Maaram liwat ako, Dios ko, nga ikaw nagsasari han kasingkasing, ngan may-ada kalipay ha  kaligdong. Han para ha akon, ha kaligdong han akon kasingkasing ha kinaburut-on akon ini ngatanan nga butang ihinalad: ngan yana ha daku nga kahimongaya hinkit-an ko an imo katawohan, nga hahani dinhi, naghahalad ha kinaburut-on ngada ha imo.” (1 Kronikas 29:16, 17) Ginpabilhan ni David an iya relasyon kan Jehova. Iya ginkilala an panginahanglan ha pag-alagad ha Dios nga “may hingpit nga kasingkasing ngan may malipayon nga kalag,” ngan nakabiling hiya hin kalipay ha pagbuhat hito. (1 Kronikas 28:9, NW) Ini nga mga kalidad nakaaghat liwat ha siyahan nga mga Kristiano ha pagpakita hin mahinatagon nga disposisyon.

Hi Jehova—An Pinakahura nga Humaratag

Hi Jehova an gimaopayi nga susbaranan han pagkamahinatagon. Mahigugmaon ngan mapinairon gud hiya amo nga iya “ginpapasirang an iya adlaw ngadto ha mga magraot ngan ha mga mag-opay, ngan pinauuranan an mga magtadong ngan diri mga magtadong.” (Mateo 5:45) Ha ngatanan nga katawohan hiya nahatag hin “kinabuhi ngan pagginhawa ngan ha ngatanan nga mga butang.” (Buhat 17:25) Oo, sugad han iginpapatin-aw ni disipulo Jakobo, “an ngatanan nga hingpit nga hatag tikang ha igbaw, tikang ha Amay han mga kalamragan.”—Jakobo 1:17.

 An gidadakui nga regalo ni Jehova ha aton amo an iya paghatag han iya “bugtong nga Anak, basi nga an ngatanan nga natoo ha iya, diri mawara, kondi mamay kinabuhi nga waray kataposan.” (Juan 3:16) Waray makakasiring nga takos hiya han sugad nga regalo ‘kay an ngatanan nagpakasala, ngan nawad-an hira han himaya han Dios.’ (Roma 3:23, 24; 1 Juan 4:9, 10) An lukat ni Kristo amo an basihan ngan agianan han kanan Dios “hatag, nga diri sadang mahiasoy ha mga pulong,” nga amo an “damu gud nga grasya [“diri-takos nga pagkabuotan,” NW] han Dios.” (2 Korinto 9:14, 15) Tungod kay mapasalamaton ha regalo han Dios, gin-una ni Pablo ha iya kinabuhi an “pagtestigo han maopay nga sumat mahitungod han grasya han Dios.” (Buhat 20:24) Nasabtan niya nga kaburut-on han Dios nga “an ngatanan nga mga tawo maluwas, ngan nga makadangat ha pagkilala han kamatuoran.”—1 Timoteo 2:4.

Yana, ginbubuhat ini pinaagi han daku nga pagsangyaw ngan pagtutdo nga buruhaton nga inabot na yana ha 234 nga nasud ha bug-os nga tuna. Igintagna ni Jesus ini nga pagkaylap han hiya nagsiring: “Ini nga maopay nga sumat han ginhadian igwawali ha bug-os nga kalibotan ha pagpamatuod ha ngatanan nga mga nasud; ngan niyan an kataposan maabot.” (Mateo 24:14) Oo, “an maopay nga sumat kinahanglan nga igwali anay ha ngatanan nga mga nasud.” (Markos 13:10) Han naglabay nga tuig sobra unom ka milyon nga parasamwak han maopay nga sumat an gumamit hin 1,202,381,302 ka oras para hini nga buruhaton ngan nagdumara hin sobra 5,300,000 nga pag-aram ha Biblia. Tungod kay namimeligro an mga kinabuhi, importante gud ini nga pagtutdo ha mga tawo.—Roma 10:13-15; 1 Korinto 1:21.

Minilyon nga mga publikasyon—upod na an mga Biblia, mga libro, ngan mga brosyur—an iniimprinta kada tuig basi mabuligan adton naghihingyap han kamatuoran han Biblia. Dugang pa, sobra usa ka bilyon nga kopya han Barantayan ngan Awake! nga mga magasin an ginhihimo. Samtang kinakarawat han mga tawo an maopay nga sumat, nagtitikadamu nga mga Kingdom Hall ngan mga Assembly Hall han mga Saksi ni Jehova an gintutukod, nga ginagamit sugad nga mga katirokan para han pagtutdo ha Biblia. Kada tuig, ginhihikay an sirkito nga mga asembleya ngan espesyal nga mga asembleya, sugad man an distrito nga mga kombensyon. An pagbansay ha mga misyonero, nagbibiyahe nga mga paramangno, mga tigurang, ngan ministeryal nga mga surugoon nagpapadayon liwat nga proseso. Mapasalamaton kita kan Jehova ha pagtagana hini ngatanan nga mga kahikayan pinaagi han “matinumanon ngan maaramon nga uripon.” (Mateo 24:45-47, NW) Sigurado nga karuyag gud naton ipahayag an aton pagpasalamat ha Iya!

Pagpasalamat kan Jehova

Pariho han ha pagtukod han templo ngan ha pagtagana han mga panginahanglan han siyahan nga Kristiano nga mga kongregasyon, an mga gastos para hini ngatanan nga mga tagana tikang gud la ha boluntaryo nga mga kontribusyon. Kondi, kinahanglan hinumdoman nga waray usa nga makakapagpariko kan Jehova, an Tag-iya han ngatanan nga mga butang. (1 Kronikas 29:14; Hagay 2:8) Salit, an mga kontribusyon mga pamatuod han aton gugma kan Jehova ngan han aton hingyap ha pagpauswag han totoo nga pagsingba. Ini nga mga kapahayagan han pagin mahinatagon, siring ni Pablo, nagbubunga hin “kapahayagan han pagpasalamat ha Dios.” (2 Korinto 9:8-13, NW) Igindadasig ni Jehova an sugad nga paghatag tungod kay ipinapakita hito nga may-ada kita mahinatagon nga disposisyon ngan mahigugmaon nga kasingkasing ngadto ha iya. Adton mahinatagon ngan nasarig kan Jehova bibendisyonan niya ngan mag-uuswag ha espirituwal. (Deuteronomio 11:13-15; Proberbios 3:9, 10; 11:25) Ginpasarig kita ni Jesus nga magriresulta ito hin kalipay, nasiring: “May-ada labaw nga kalipay ha paghatag kay ha pagkarawat.”—Buhat 20:35, NW.

An mga Kristiano nga may-ada mahinatagon nga disposisyon diri la nahatag durante han mga panahon han panginahanglan. Lugod, namimiling hira hin mga higayon ha “[pagbuhat] han maopay ha ngatanan nga mga tawo, labi na gud ha panimalay han pagtoo.” (Galasia 6:10) Ha pagdasig han diosnon nga pagkamahinatagon, hi Pablo nagsurat: “Ayaw niyo hikalimti an pagbuhat hin maopay ngan pagkamahatagon: kay ha sugad nga mga halad an Dios nalilipay.” (Hebreo 13:16) An paggamit han aton mga panag-iya—panahon, kusog, ngan kwarta—ha pagbulig ha iba ngan ha pagpauswag han putli nga pagsingba nakakalipay gud kan Jehova nga Dios. Oo, hinigugma gud niya an mahinatagon nga disposisyon.

[Kahon/Retrato ha pahina 28, 29]

Mga Paagi kon Paonan-o Naamot an Iba

MGA AMOT PARA HA BUG-OS-KALIBOTAN NGA BURUHATON

Damu an nagtitirok, o naggagahin, hin kantidad nga ira ibinubutang ha mga kahon para han donasyon nga minarkahan hin “Contributions for the Worldwide Work—Matthew 24:14.”

Kada bulan, ini nga kantidad iginpapadara han mga kongregasyon ngadto ha opisina han mga Saksi ni Jehova nga nagsiserbi ha ira mga nasud. An kinaburut-on nga mga donasyon nga kwarta mahimo liwat direkta nga ipadara ha Watch Tower Bible and Tract Society of the Philippines, Inc., P.O. Box 2044, 1060 Manila, o ha opisina han sanga nga nagsiserbi ha iyo nasud. An mga tseke sadang igngaran ha “Watch Tower.” Mahimo liwat maghatag hin mga alahas o iba nga birilhon nga mga butang. Sadang updan ini nga mga donasyon hin halipot nga surat nga nagsusumat nga ito nga butang usa ka direkta nga regalo.

KAHIKAYAN HAN MAY-KONDISYON NGA DONASYON

An kwarta mahimo idonar ilarom han espesyal nga kasabotan, nga kon hangyoon ito han nagdonar, mahimo ibalik an donasyon ha iya. Para ha dugang nga impormasyon, alayon pakigkomunikar ha Treasurer’s Office ha adres nga aada ha igbaw.

GINPLANO NGA PAGHATAG

Dugang ha direkta nga mga regalo ngan may-kondisyon nga mga donasyon nga kwarta, may-ada pa iba nga mga paagi han paghatag basi magamit ha pag-alagad ha Ginhadian ha bug-os nga tuna. Nag-uupod ini han:

Insurance: An Watch Tower Society mahimo himoon nga beneficiary han palisiya han life insurance o han plano ha pagretiro/pensyon.

Mga Deposito ha Bangko: An mga deposito ha bangko, mga sertipiko han deposito, o indibiduwal nga mga deposito ha pagretiro mahimo itapod o ihatag ha panahon han kamatay ha Watch Tower Society, uyon ha lokal nga mga kahikayan han bangko.

Kapital han Negosyo Ngan mga Bono: An mga kapital han negosyo ngan mga bono mahimo igdonar ha Watch Tower Society sugad nga direkta nga regalo.

Tuna Ngan Balay: An maibabaligya nga tuna ngan balay mahimo igdonar pinaagi han direkta nga pagregalo o, kon may kalabotan ha residensya nga panag-iya, pinaagi han pagreserba hin balay ngan tuna ha nagdonar, nga makakapadayon ha pag-ukoy dida samtang buhi pa hiya. Pahibaroa an sanga nga opisina ha iyo nasud antes himoon an dokumento han pagbalhin han bisan ano nga tuna ngan balay.

Tinuig nga Regalo o Regular nga Donasyon nga Kwarta: An tinuig nga regalo o regular nga donasyon nga kwarta amo an usa nga kahikayan diin an usa nagbabalhin hin kwarta o mga seguridad ngadto ha Watch Tower Society. Sugad nga kabalyo, an naghatag, o an usa nga ginpili han naghatag, makarawat hin espisipiko nga regular nga kwarta kada tuig samtang hiya buhi. An naghatag iibanan han iya buhis ha tuig nga gintikangan an tinuig o regular nga pagdonar hin kwarta.

Mga Testamento Ngan mga Igintapod: An mga panag-iya o kwarta mahimo ihatag ha Watch Tower Society pinaagi han legal nga testamento, o an Watch Tower Society mahimo magin beneficiary han usa nga kasabotan nga igintapod. An igintapod nga pahihimulsan han usa nga relihiyoso nga organisasyon mahimo maghatag hin pipira nga mga bentaha ha buhis.

Sugad han iginpapasabot han termino nga “ginplano nga paghatag,” ini nga mga klase hin mga donasyon kasagaran nga nagkikinahanglan han pagplano ha bahin han nahatag. Basi mabuligan an mga indibiduwal nga naghihingyap nga makabulig ha bug-os-kalibotan nga buruhaton han mga Saksi ni Jehova pinaagi han usa nga klase han ginplano nga paghatag, igin-andam an brosyur ha Ingles ngan Espanyol nga may ulohan nga Charitable Planning to Benefit Kingdom Service Worldwide. An brosyur iginsurat tungod han damu nga mga pakiana nga nakakarawat mahitungod han mga regalo, mga testamento, ngan mga igintapod. May-ada liwat ito dugang nga mapulsanon nga impormasyon mahitungod han pagplano ha panag-iya, pinansyal, ngan buhis. Naghahatag ito hin mga impormasyon ha mga indibiduwal mahitungod ha magkalainlain nga mga paagi ha paghikay han mga regalo yana o pinaagi han ibibilin ha kamatayon. Katapos basahon an brosyur ngan magpakiana ha ira mga magsaragdon ha legal o ha buhis ngan ha Charitable Planning Office, damu an nakabulig ha mga Saksi ni Jehova ha bug-os nga kalibotan, ngan ha pariho nga panahon, labaw nga nakakapahimulos ha ira buhis pinaagi han pagbuhat hito. Ini nga brosyur mahimo makuha pinaagi han direkta nga paghangyo hin kopya ha Charitable Planning Office.

Para han dugang nga impormasyon, mahimo ka makigkomunikar ha Charitable Planning Office, ha surat man o ha telepono, ha adres nga nakalista ha ubos o ha opisina han mga Saksi ni Jehova nga nagsiserbi ha iyo nasud.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue,

San Francisco Del Monte

1105 Quezon City

Telepono: (02) 411-6090

[Retrato ha pahina 26]

Ano an nakaaghat han siyahan nga mga Kristiano nga magin mahinatagon?