“Magin Duok Kamo ha Dios, Ngan Hiya Magigin Duok ha Iyo”

Antes Ngan Katapos—An mga Prinsipyo han Biblia Nakabulig ha Iya nga Magbag-o

SUGAD nga batan-on, hi Adrian puno hin kasina ngan kapungot. An iya pagin madagmit masina nagresulta ha madarahog nga pagpahayag hin duro nga kasina. Nagin parahubog hiya, nagsigarilyo, ngan nagkinabuhi ha imoral nga paagi. Kilala hi Adrian sugad nga punk ngan may-ada hiya tato nga nagpakita nga natoo hiya ha anarkiya. Ha pagsaysay mahitungod han naglabay nga katuigan, hiya nasiring: “Ginpaarutan ko an akon buhok sugad han kanan punk, naggamit ako hin papilit basi tumindog ito, ngan usahay gintina ko ito hin pula o iba nga kolor.” Pinabuhoan liwat ni Adrian an iya irong.

Binalhin hi Adrian ha guba nga balay kaupod an pipira nga rebelyoso nga mga batan-on. Didto hira nag-irignom ngan nagdroga. “Naggamit ako hin igindidiri nga droga nga nagpapauswag han akon enerhiya ngan dungan hito nag-indeksyon ako hin valium ngan bisan ano nga masayon ko makuha,” nahinunumdom hi Adrian. “Kon waray mga droga o rugby, nagkakawat ako hin gasolina tikang ha mga awto han mga tawo ngan nahuhubog ako hito.” Tungod kay nahidabi gud hi Adrian ha mga krimen ha kakalsadahan, nagin tarhog gud hiya ngan nagin labi nga mabangis. Ha kabug-osan, an mga tawo diri na naruruyag ha iya. Ha pariho nga panahon, an iya reputasyon nagdani han magraot nga mga kaupod.

Hinay-hinay nga nasantop ni Adrian nga nakig-upod la ha iya an iya “kasangkayan” tungod han ira nakukuha ha iya. Dugang pa, napamatud-an niya nga “waray kapulsanan an ngatanan nga kasina ngan kamadarahog.” Tungod kay inabat hin kawaray-katuyoan ngan kapakyasan, ginbayaan niya an iya mga kaupod. Han nakakita hiya hin usa nga kopya han The Watchtower ha usa nga dapit han konstruksyon, nadani hiya han basado-ha-Biblia nga mensahe hito, ngan nagresulta ini ha pag-aram han Biblia kaupod han mga Saksi ni Jehova. Positibo nga kinarawat ni Adrian an pagdapit: “Magin duok kamo ha Dios, ngan hiya magigin duok ha iyo.” (Jakobo 4:8, NW) Sugad nga resulta, nakita dayon ni Adrian an panginahanglan ha pag-aplikar han mga prinsipyo nga aada ha Baraan nga Kasuratan.

An nag-uuswag nga kahibaro ha Biblia nagkaada daku nga epekto ha konsensya ni Adrian ngan ginbag-o hito an iya kinabuhi. Nabuligan hiya nga makontrol an iya pagin madagmit masina ngan mapatubo an pagpugong-ha-kalugaringon. Tungod ha bulig han gahum han Pulong han Dios, nagbag-o gud an personalidad ni Adrian.—Hebreo 4:12.

Kondi, paonan-o nagkakaada sugad kagamhanan nga epekto an Biblia? An kahibaro mahitungod ha Kasuratan nabulig ha aton nga “isul-ot an bag-o nga personalidad.” (Efeso 4:24, NW) Oo, nagbabag-o an aton personalidad pinaagi ha pag-aplikar han kahibaro nga aada ha Biblia. Kondi paonan-o ginbabag-o han sugad nga kahibaro an mga tawo?

Siyahan, espisipiko nga iginsusumat han Biblia an magraot nga mga kinaiya nga kinahanglan kuhaon. (Proberbios 6:16-19) Ikaduha, ginsasagda kita han Kasuratan nga ipakita an makaruruyag nga mga kalidad nga bunga han baraan nga espiritu han Dios. Nag-uupod ini han “gugma, kalipay, pakigdait, pagkamailob, pagkamalolooyon, pagkamaopay, pagkamatinoohon, pagkaaghop, paggahum ha kalugaringon.”—Galasia 5:22, 23.

An hilarom nga pagsabot mahitungod ha mga ginkikinahanglan han Dios nakabulig kan Adrian nga usisahon an iya kalugaringon ngan hisabtan an mga kinaiya nga kinahanglan niya patuboon ngan adton sadang  niya kuhaon. (Jakobo 1:22-25) Kondi tinikangan la ito. Dugang pa ha kahibaro, ginkinahanglan an determinasyon—an hinungdan nga mag-aaghat kan Adrian nga magbag-o.

Hinbaroan ni Adrian nga an makaruruyag nga bag-o nga personalidad ginmumolde “sugad han dagway han nagbuhat ha iya.” (Kolosas 3:10) Nasantop niya nga an personalidad han usa nga Kristiano kinahanglan magin pariho ha personalidad han Dios mismo. (Efeso 5:1) Pinaagi han pag-aram ha Biblia, hinbaroan ni Adrian an mahitungod ha mga pakig-upod ni Jehova ha katawohan ngan iya gintigamnan an maopay nga mga kalidad han Dios, sugad han iya gugma, pagkabuotan, pagkamaopay, kalooy, ngan pagkamatadong. Ito nga kahibaro nagpagios kan Adrian nga higugmaon an Dios ngan mangalimbasog nga magin an klase han tawo nga inuuyonan ni Jehova.—Mateo 22:37.

Ha hinay-hinay ngan pinaagi han bulig han baraan nga espiritu han Dios, nakontrol ni Adrian an iya pagin mabangis. Hiya ngan an iya asawa yana sagipo ha pagbulig ha iba nga bag-ohon an ira mga kinabuhi pinaagi han bulig han kahibaro ha Biblia. “Diri pariho ha damu han akon kasangkayan hadto nga mga patay na yana, buhi pa ako ngan nagpapahimulos hin malipayon nga kinabuhi kaupod han akon pamilya,” siring ni Adrian. Usa hiya nga buhi nga pamatuod han gahum han Biblia ha pagbag-o han mga kinabuhi para ha mas maopay.

[Blurb ha pahina 25]

“Waray kapulsanan an ngatanan nga kasina ngan kamadarahog”

[Kahon ha pahina 25]

Mga Prinsipyo han Biblia nga Epektibo

An masunod amo an pipira nga mga prinsipyo han Biblia nga nakabulig ha damu nga madagmit masina ngan mabangis nga mga tawo nga magin mamurayawon:

“Makigmurayaw kamo ha ngatanan nga mga tawo. Diri kamo bumulos, mga hinigugma, kondi tagi niyo hin lugar an kasina.” (Roma 12:18, 19) An Dios an padesisyona kon san-o ngan kon kan kanay niya ipapadapat an panimalos. Mahihimo niya ito nga may bug-os nga kahibaro mahitungod han mga panhitabo, ngan an bisan ano nga pagbulos nga tikang ha iya magpapakita han iya hingpit nga hustisya.

“Kasina, kondi ayaw pakasala: diri katunoran han adlaw an iyo kasina: diri niyo tagan hin lugar an Yawa.” (Efeso 4:26, 27) An usa nga tawo bangin may husto nga hinungdan nga masina usahay. Kon mahitabo ini, diri hiya sadang magpabilin ha “kasina.” Kay ano? Tungod kay mahimo ini mag-aghat ha iya nga magbuhat hin maraot, hito nga paagi tinatagan niya hin “lugar an Yawa,” nga nagriresulta hin diri pag-uyon han Dios.

“Bayai an kasina, ngan bayai an kangalas; diri ka magmasamdong, iton tikadto la ha pagbuhat hin maraot.” (Salmo 37:8) An diri-pinupugngan nga mga emosyon nagriresulta ha diri-mapugngan nga mga buhat. Kon nasisina an usa ka tawo, posible nga hiya makagyakan o makabuhat hin mga butang nga makakasakit ha ngatanan nga nahidadabi.