Buligi an Iba nga Karawaton an Mensahe han Ginhadian

“Hi Agripa nagsiring kan Pablo: ‘Ha halipot nga panahon makukombinse mo ako nga magin Kristiano.’ ”—BUHAT 26:28, NW.

1, 2. Kay ano nga hi apostol Pablo nakadto ha atubangan ni Gobernador Pesto ngan ni Hadi Herodes Agripa II?

 HA Cesarea han 58 K.P., an Romano nga hi Gobernador Porsio Pesto ginbisita ni Hadi Herodes Agripa II ngan han iya manghod nga bugto nga babaye nga hi Bernise. Tungod han imbitasyon ni Gobernador Pesto, inabot hira nga may ‘daku nga padayaw ngan sinulod ngadto ha pamatian upod an mga kiliarka, ngan an mga dagku nga tawo han bungto.’ Ha sugo ni Pesto, gindara an Kristiano nga hi apostol Pablo ha ira atubangan. Paonan-o nahitabo nga inin sumurunod ni Jesu-Kristo tinukdaw ha atubangan han hukmanan ni Gobernador Pesto?—Buhat 25:13-23.

² An iginsumat ni Pesto ha iya mga bisita nabaton hiton nga pakiana. Hiya nagsiring: “Hadi Agripa, ngan kamo ngatanan nga mga tawo nga hahani upod namon, kitaa, ini nga tawo, nga tungod ha iya an kadam-an han mga Judio dinangop ha akon ha Jerusalem ngan dinhi man, nga nagsisinggit, nga diri na angay nga mabuhi pa hiya. Kondi, han hibaroi ko, nga hiya waray pagbuhat hin bisan ano nga takos igpatay, ngan kay hiya ngahaw dinangop kan Augusto, ako naghukom nga hiya igpadara. Kondi ako waray hin bisan ano nga matuod nga igsusurat ha akon ginoo mahitungod ha iya. Tungod yana akon ipinaatubang hiya ha iyo, ngan labi pa gud ha imo, hadi nga Agripa, basi nga ha katapos pag-usisa, may maada ako sadang igsusurat. Kay ha akon paghunahuna gawas ha katadongan an pagpadara hin binilanggo, nga diri man igpahayag an mga sumbong kontra ha iya.”—Buhat 25:24-27.

 3. Kay ano nga an relihiyoso nga mga lider nag-akusar kan Pablo?

³ An mga pulong ni Pesto nagpapasabot nga inatubang ni Pablo an buwa nga mga akusasyon nga sedisyon—usa nga krimen nga kamatayon an sirot. (Buhat 25:11) Kondi, inosente hi Pablo. An mga akusasyon nagtikang ha pangabugho han relihiyoso nga mga lider ha Jerusalem. Kinontra hira ha buruhaton ni Pablo sugad nga parasamwak han Ginhadian ngan nasina gud nga binuligan niya an iba nga magin mga sumurunod ni Jesu-Kristo. Gindara hi Pablo tikang ha Jerusalem han armado hinduro nga mga guwardya ngadto ha duruongan-hin-barko nga siyudad han Cesarea, diin nag-apela hiya kan Cesar. Tikang didto dadad-on hiya ngadto ha Roma.

 4. Ano nga diri-linalaoman nga mga pulong an ginyakan ni Hadi Agripa?

⁴ Handurawa hi Pablo ha palasyo han gobernador ha atubangan han usa nga grupo upod an  magmarando han usa nga importante nga bahin han Romano nga Imperyo. Hi Hadi Agripa liningi kan Pablo ngan nagsiring: “Ikaw tinutugotan pagyakan.” Samtang nagyayakan hi Pablo, may-ada makatirigamnan nga nahitabo. An ginsisiring ni Pablo nakaapekto ha hadi. Oo, hi Hadi Agripa nagsiring: “Ha halipot nga panahon makukombinse mo ako nga magin Kristiano.”—Buhat 26:1-28, NW.

 5. Kay ano nga epektibo hinduro an mga pulong ni Pablo kan Agripa?

⁵ Hunahunaa la! Sugad nga resulta han maopay nga depensa ni Pablo, usa nga magmarando an naapektohan han nadulot nga gahum han Pulong han Dios. (Hebreo 4:12) Kay ano nga epektibo hinduro an depensa ni Pablo? Ngan ano an mahibabaroan naton tikang kan Pablo nga makakabulig ha aton buruhaton nga paghimo hin disipulo? Kon aton usisahon an iya depensa, duha nga importante nga punto an matin-aw: (1) Hi Pablo nakakakombinse ha iya presentasyon. (2) Ginamit niya hin maabtik an iya kahibaro ha Pulong han Dios, sugad la han maabtik nga paggamit hin garamiton han usa nga panday.

Gamita an Arte han Pagkombinse

6, 7. (a) Sumala ha paggamit ha Biblia, ano an kahulogan han “pagkombinse”? (b) Ano an nahihimo han pagkombinse ha pagbulig ha iba nga karawaton an katutdoan han Biblia?

⁶ Ha libro nga Mga Buhat, an Griego nga mga termino para ha pagkombinse pauro-utro nga ginamit may kalabotan kan Pablo. Ano an kalabotan hini ha aton buruhaton nga paghimo hin disipulo?

⁷ Ha orihinal nga yinaknan han Kristiano Griego nga Kasuratan, an “pagkombinse” nangangahulogan hin “pagdaog” o “pagbag-o han panhunahuna han usa pinaagi han impluwensya han pangatadongan o mga paghisgot ha moral,” siring han Expository Dictionary of New Testament Words ni Vine. An pag-usisa ha kahulogan han pulong naghahatag hin dugang nga kahayag. Nagpapasabot ito han ideya han pagsarig. Salit kon nakombinse mo an usa ka tawo nga karawaton an katutdoan han Biblia, nakuha mo an iya pagsarig, salit tinoo hiya ha pagkatotoo hiton nga katutdoan. Matin-aw, diri igo na an pagsumat ha usa ka tawo kon ano an ginsisiring han Biblia basi tumoo hiya hito ngan magbuhat uyon hito. An imo mamarati kinahanglan makombinse nga totoo an imo ginsisiring, bata man ito nga indibiduwal, usa nga amyaw, kaupod ha trabaho, kaeskwela, o paryente.—2 Timoteo 3:14, 15.

 8. Ano an nahiuupod ha pagkombinse ha usa ka tawo mahitungod han usa nga kamatuoran ha Kasuratan?

⁸ Paonan-o mo makukombinse an usa ka tawo nga kamatuoran an imo iginpapasamwak tikang ha Pulong han Dios? Pinaagi han lohikal nga pangatadongan, husto nga argumento, ngan sinsero nga panginyupo, nangalimbasog hi Pablo nga mabag-o an panhunahuna han mga indibiduwal nga iya nakaistorya. a Salit, imbes nga igpahayag la nga totoo an usa ka butang, kinahanglan maghatag ka hin makapatagbaw nga ebidensya nga magpapamatuod han imo pahayag. Paonan-o ini bubuhaton? Siguroha nga an imo pahayag marig-on nga iginbasar ha Pulong han Dios ngan diri ha personal nga opinyon. Gamita liwat an dugang nga ebidensya nga magpaparig-on han imo kinasingkasing nga mga pahayag tikang ha Kasuratan. (Proberbios 16:23) Pananglitan, kon imo iginpapatin-aw nga an masinugtanon nga katawohan magpapahimulos han kinabuhi ha paraiso nga tuna, pamatud-i iton nga mga pulong pinaagi han mga teksto ha Kasuratan, sugad han Lukas 23:43 o Isaias 65:21-25. Paonan-o mo ihahatag an dugang nga ebidensya han imo Kasuratanhon nga punto? Mahimo mo gamiton an mga ehemplo tikang ha eksperyensya han imo mamarati. Mahimo mo pahinumdumon hiya han simple ngan waray bayad nga mga kalipay nga nakakarawat tikang ha kaanyag han pagtunod han adlaw, han kahamot han bukad, han karasa han prutas, o han kalipay han pagkita ha usa nga iroy nga tamsi nga nagpapakaon ha iya piso. Buligi hiya nga masabtan nga an sugad nga mga kalipay ebidensya nga karuyag han Maglalarang nga malipay kita ha pagpahimulos han kinabuhi dinhi ha tuna.—Eklesiastes 3:11, 12.

 9. Paonan-o naton maipapakita an pagin makatadunganon ha aton pagsangyaw nga buruhaton?

⁹ Kon nangangalimbasog ha pagkombinse ha usa ka tawo nga karawaton an usa nga katutdoan han Biblia, pag-ikmat nga an imo kadasig diri makahimo ha imo nga baga in diri-makatadunganon, nga tungod hito nagigin sarado na an hunahuna ngan kasingkasing han imo mamarati. An Eskwelahan ha Ministeryo nga libro nagpapahamangno: “Kasagaran  nga diri kinakarawat an sobra kaprangka nga pagsaysay han kamatuoran nga nagbubuhayhag kan kabuwaan han maiha na nga gintotoohan han iba nga mga tawo, bisan kon an pagsaysay sinusuportahan hin damu nga mga teksto han Kasuratan. Pananglitan, kon an popular nga mga selebrasyon ginkukondenar la tungod han pagano nga gintikangan, bangin diri ini makabag-o han pagtagad hito han iba nga mga tawo. Pinaagi han pagin makatadunganon kasagaran nga magigin mas malampuson ka.” Kay ano nga sadang mangalimbasog gud kita nga magin makatadunganon? An aradman-nga-libro nasiring: “An nangangatadongan nga paagi nag-aaghat han paghisgot, naghahatag ha mga tawo hin butang nga huhunahunaon ha urhi, ngan nag-aabri hin mga higayon para ha mga pag-istorya ha tidaraon. Mahimo ito magin makakombinse gud.”—Kolosas 4:6.

Pagkombinse nga Nagpapagios han Kasingkasing

10. Ha ano nga paagi gintikangan ni Pablo an iya depensa ha atubangan ni Agripa?

¹⁰ Aton usisahon pa gud yana an mga pulong han depensa ni Pablo ha Buhat kapitulo 26. Tigamni kon paonan-o hiya nagtikang han iya pahayag. Ha pagtikang han iya ulohan, may nakita hi Pablo nga usa nga makatadunganon nga basihan basi hatagan hin kumendasyon hi Agripa, bisan kon an hadi may-ada imoral nga relasyon ha iya bugto nga hi Bernise. Hi Pablo nagsiring: “Iginmamalipay ko, hadi Agripa, kay ako tipaghirimo hin depensa nakon ha imo atubangan niyan nga adlaw, han mahitungod ha ngatanan nga mga bagay, nga iginsumbong ha akon han mga Judio. Labi pa gud, nga maaram ka ha ngatanan nga mga batasan ngan mga ginlalarisan han mga Judio. Busa, nakikimalooy ako ha imo, nga imo pamatian ako hin mapailubon.”—Buhat 26:2, 3.

11. Paonan-o an mga pulong ni Pablo kan Agripa nagpakita hin pagtahod, ngan ano an nagin kapulsanan?

¹¹ Natigamnan mo ba nga kinilala ni Pablo an hitaas nga katungdanan ni Agripa pinaagi han pagtawag ha iya titulo, nga Hadi? Ipinakita hini an pagtahod, ngan pinaagi han iya maaramon nga pagpili hin mga pulong, ginpasidunggan ni Pablo hi Agripa. (1 Pedro 2:17) Kinilala han apostol hi Agripa sugad nga eksperto ha magkalainlain nga mga kustomre ngan mga balaud han iya nasasakopan nga mga Judio ngan nagsiring nga malipayon hiya ha pagpahayag han iya depensa ha atubangan han sugad nga magmarando nga damu an hinbabaroan.  Hi Pablo, nga usa nga Kristiano, waray gumios nga baga in mas labaw hiya kan Agripa, nga diri Kristiano. (Filipos 2:3) Lugod, nakimalooy hi Pablo ha hadi nga mapailubon nga mamati ha iya. Hito nga paagi, naghimo hi Pablo hin kahimtang diin hi Agripa, sugad man an iba nga mga mamarati, mas posible nga kumarawat han iya ipapahayag. Nagbutang hiya hin pundasyon, usa nga butang nga ginkakauyonan han duha nga bahin nga dida hito igbabasar an iya mga argumento.

12. Ha buruhaton nga pagpasamwak han Ginhadian, paonan-o naton matutugkad an kasingkasing han aton mga mamarati?

¹² Pariho kan Pablo han nakikiistorya hiya kan Agripa, tikang ha introduksyon tubtob ha kataposan han aton presentasyon han mensahe han Ginhadian, mangalimbasog kita nga matugkad naton an kasingkasing han aton mamarati. Mahihimo naton ini pinaagi han pagpakita hin sinsero nga pagtahod ha tawo nga aton ginsasangyawan ngan pinaagi han pagpakita hin totoo nga interes ha iya partikular nga gintikangan ngan panhunahuna.—1 Korinto 9:20-23.

Gamita hin Maabtik an Pulong han Dios

13. Pariho kan Pablo, paonan-o mo mapapagios an imo mga mamarati?

¹³ Ginhingyap ni Pablo nga pagiuson an iya mga mamarati nga magbuhat uyon ha maopay nga sumat. (1 Tesalonika 1:5-7) Tungod hito, iya gintugkad an ira simboliko nga kasingkasing, an gintitikangan han motibo. Ha pagpadayon ha aton paghisgot mahitungod han depensa ni Pablo ha atubangan ni Agripa, tigamni kon gin-onan-o ni Pablo an ‘paggamit hin husto han pulong han Dios’ pinaagi han pag-unabi han mga butang nga ginsiring ni Moises ngan han mga propeta.—2 Timoteo 2:15, NW.

14. Isaysay kon paonan-o ginamit ni Pablo an pagkombinse han inatubang hiya kan Agripa.

¹⁴ Maaram hi Pablo nga hi Agripa usa nga Judio ha ngaran la. Ha pag-unabi han kahibaro ni Agripa mahitungod han Judaismo, nangatadongan hi Pablo nga an iya pagsangyaw tinuod nga ‘waray ginsisiring nga bisan ano kondi adton mga bagay nga ginsiring han mga Manaragna ngan ni Moises nga mahitatabo’ mahitungod han kamatay ngan kabanhaw han Mesias. (Buhat 26:22, 23) Direkta  nga nakikiistorya kan Agripa, hi Pablo nagpakiana: “Hadi Agripa, natoo ka ba ha mga manaragna?” Nagkaproblema hi Agripa. Kon magsiring hiya nga iya iginsalikway an mga propeta, madadaot an iya reputasyon sugad nga Judio nga tumuroo. Kondi kon umuyon hiya ha pangatadongan ni Pablo, igpapahayag niya ha publiko nga nauyon hiya kan Pablo ngan mamimeligro nga tawagon hiya nga usa nga Kristiano. Maaramon nga ginbaton ni Pablo mismo an iya pakiana, nasiring: “Ako maaram nga ikaw natoo.” Paonan-o an kasingkasing ni Agripa nagpagios ha iya nga bumaton? Hiya binaton: “Ha halipot nga panahon makukombinse mo ako nga magin Kristiano.” (Buhat 26:27, 28, NW) Bisan kon hi Agripa waray magin Kristiano, matin-aw nga nabantad ni Pablo an iya kasingkasing pinaagi han iya mensahe.—Hebreo 4:12.

15. Paonan-o nakagtikang hi Pablo hin kongregasyon ha Tesalonika?

¹⁵ Natigamnan mo ba nga an pagpresenta ni Pablo han maopay nga sumat nag-upod han pagpasamwak ngan pagkombinse? Tungod kay ginamit ni Pablo iton nga paagi samtang iya ‘ginamit hin husto an pulong han Dios,’ an iba nga nakabati ha iya diri kay nagin mga mamarati la kondi nagin mga tumuroo. Ini an nahitabo ha Tesalonika, diin ginbiling ni Pablo an mga Judio ngan an mahadlukon-ha-Dios nga mga Hentil ha sinagoga. An asoy ha Buhat 17:2-4 nasiring: “Hi Pablo, sugad han iya batasan, sinulod ngadto ha sinagoga, ngan, ha sulod hin tulo ka adlaw nga iparahuway, nagsaysay ha ira tikang ha santos nga surat. Ngan, han igin-aasoy ngan iginlalaygay ha ira, nga kinahanglan nga hi Kristo mag-antos ngan mabanhaw tikang ha mga minatay . . . an iba ha ira nagtoo.” Hi Pablo nakakakombinse. Hiya nangatadongan, nagsaysay, ngan nagpamatuod pinaagi han Kasuratan nga hi Jesus an maiha na nga iginsaad nga Mesias. Ano an resulta? Naorganisa an usa nga kongregasyon han mga tumuroo.

16. Paonan-o ka mas malilipay ha pagpasamwak han Ginhadian?

¹⁶ Mahimo ka ba magin mas maabtik ha arte han pagkombinse kon iginsasaysay an Pulong han Dios? Kon amo, magkakaada ka labaw nga katagbaw ngan kalipay ha imo buruhaton nga pagsangyaw ngan pagtutdo ha mga tawo mahitungod han Ginhadian han Dios. Ini an naeksperyensyahan han mga magwarali han maopay nga sumat nga nag-aplikar han mga suhestyon nga gamiton hin mas agsob an Biblia ha pagsangyaw nga buruhaton.

17. Ha pagpakita nga mapulsanon an paggamit han Biblia ha aton ministeryo, isaysay an usa nga personal nga eksperyensya o isumaryo an aada hini nga parapo.

¹⁷ Pananglitan, usa nga nagbibiyahe nga paramangno han mga Saksi ni Jehova an nagsurat: “Damu nga kabugtoan an nagdadara na yana han Biblia dida ha ira kamot kon nagsasangyaw hira ha balay-balay. Nakakabulig ini ha mga magwarali nga basahon an usa nga teksto ha damu nga mga tawo nga ira iginkikita. Nakakabulig ito ha tagbalay ngan ha magwarali nga gamiton an Biblia, diri la an mga magasin ngan mga libro, ha aton ministeryo.” Syempre, nakikita man ha aton an Biblia kon nagsasangyaw kita nadepende ha magkalainlain nga mga hinungdan, upod na an lokal nga mga kustomre. Kondi, sadang kita magkaada hin reputasyon ha maabtik nga paggamit han Pulong han Dios ha pagkombinse ha iba nga karawaton an mensahe han Ginhadian.

Magkaada han Pagtagad han Dios ha Ministeryo

18, 19. (a) Ano an pagtagad han Dios ha aton ministeryo, ngan kay ano nga sadang kita magkaada han iya pagtagad? (b) Ano an mabulig ha aton nga magin malampuson ha mga pagbalik bisita? (Kitaa an kahon ha pahina 16 nga may ulohan, “Kon Paonan-o Magigin Malampuson ha mga Pagbalik Bisita.”)

¹⁸ An usa pa nga paagi han pagtugkad han kasingkasing han aton mga mamarati amo an pagkaada han pagtagad han Dios ha ministeryo ngan pagin mapailubon. Kaburut-on han Dios nga an ngatanan nga klase han mga tawo “makadangat ha husto nga kahibaro ha kamatuoran.” (1 Timoteo 2:3, 4, NW) Diri ba ito an ginhihingyap naton? Hi Jehova mapailubon liwat, ngan an iya pagpailob naghahatag hin mga higayon ha damu nga tawo nga magbasol.  (2 Pedro 3:9) Salit, kon nakakabiling kita hin usa nga disidido mamati ha mensahe han Ginhadian, bangin kinahanglanon an pauro-utro nga pagbisita basi mapatubo iton nga interes. Nagkikinahanglan hin panahon ngan pagpailob ha pagkita nga natubo an mga liso han kamatuoran. (1 Korinto 3:6) An kaupod nga kahon nga may ulohan “Kon Paonan-o Magigin Malampuson ha mga Pagbalik Bisita” naghahatag hin mga suhestyon ha pagpatubo hito nga interes. Hinumdumi, an kinabuhi han mga tawo—an ira mga problema ngan mga kahimtang—padayon nga nagbabag-o. Bangin magkinahanglan hin damu ka pagbalik basi hiabotan hira ha balay, kondi takos ito han pangalimbasog. Karuyag naton nga tagan hira hin higayon nga makabati ha mensahe han Dios ha kaluwasan. Salit, pag-ampo kan Jehova nga Dios para han kinaadman nga mapatubo an imo mga kaabtik ha pagkombinse ha imo buruhaton nga pagbulig ha iba nga karawaton an mensahe han Ginhadian.

¹⁹ Kon hiagian an usa ka tawo nga naghihingyap nga makabati hin dugang pa mahitungod han mensahe han Ginhadian, ano pa an aton mahihimo sugad nga Kristiano nga mga magburuhat? An aton masunod nga artikulo naghahatag hin mga suhestyon.

[Footnote]

Nahinunumdoman Mo Ba?

• Kay ano nga epektibo an depensa ni Pablo ha atubangan ni Hadi Agripa?

• Paonan-o an aton mensahe makakapagios han kasingkasing?

• Ano an mabulig ha aton ha epektibo nga paggamit han Pulong han Dios ha pagtugkad han kasingkasing?

• Paonan-o naton tatagdon an ministeryo uyon ha panhunahuna han Dios?

[Mga Pakiana]

[Kahon/Mga Retrato ha pahina 16]

Kon Paonan-o Magigin Malampuson ha mga Pagbalik Bisita

• Ipakita an sinsero, personal nga interes ha mga tawo.

• Pagpili hin makapainteres nga ulohan ha Biblia nga paghihisgotan.

• Iandam an tagbalay para ha kada masunod nga pagbisita.

• Padayon nga hunahunaa an tawo katapos mo bumaya.

• Balik dayon, bangin katapos hin usa o duha ka adlaw, basi magpadayon an pakigkita ha interesado nga tawo.

• Hunahunaa pirme nga an imo katuyoan amo an pagtikang hin pag-aram ha Biblia.

• Pag-ampo nga patuboon ni Jehova an interes.

[Retrato ha pahina 15]

Ginamit ni Pablo an pagkombinse han nakiistorya hiya kan Gobernador Pesto ngan kan Hadi Agripa