An Husto nga Hinungdan ha Pagtoo

AN Koreano nga libro nga 31 Reasons Why Young People Leave the Church marig-on nga nasiring nga damu an naundang ha pagsingba tungod kay diri hira nakakabiling hin makapatagbaw nga mga baton ha ira mga pakiana. Pananglitan, napakiana hira, ‘Kay ano nga nag-aantos an mga tawo nga natoo ha Dios?’ ngan ‘Kay ano nga kinahanglan naton karawaton an ngatanan nga igintututdo han mga singbahan samtang damu han mga katutdoan hito an nakakawurok ngan nagkakasumpaki?’

Tungod kay waray matagbaw ha mga baton han ira mga klero, damu an naghuhunahuna nga waray baton ha Biblia. Kon an pagsaysay han usa nga klero basado la ha iya personal nga opinyon, agsob nga nagriresulta ito ha sayop nga pagsabot, pagsalikway pa ngani, ha Dios ngan ha Biblia.

Ito an eksperyensya ni Abel, nga nagdaku sugad nga Luterano ha Aprika del Sur. Hiya nahinunumdom: “Nagtututdo an singbahan nga an ngatanan nga namamatay ‘kinukuha’ han Dios. Kondi diri ko masabtan kon kay ano nga ‘kukuhaon’ han Dios han gugma an mga kag-anak tikang ha ira mga anak. Ha usa nga baryo han Aprika diin ako nagtubo, diri kami nag-iihaw hin ugang kon diri pa dagku an mga piso. Kon hibaroan namon nga burod an usa nga baka, diri anay namon iniihaw ito tubtob nga manganak ito ngan malutas an mga anak. Diri ko masabtan kon kay ano nga an mahigugmaon nga Dios waray magpakita hin pariho nga konsiderasyon ha mga tawo.”

Hi Aram, nga taga-Canada, may-ada mga pagruhaduha nga pariho hito. “Han 13 anyos an akon pangidaron, namatay hi Tatay,” siring niya. “Ha misa para han patay, usa nga prominente nga klero an nagsaysay nga karuyag han Dios nga mamatay hi Tatay basi magin mas duok hiya ha Dios ha langit. ‘Kinukuha han Dios an mag-opay nga mga tawo,’ nagsiring hiya, ‘tungod kay hinigugma han Dios an  mga magtadong.’ Diri ko masabtan kon kay ano nga sugad hito kahakog an Dios.”

Ha urhi, nakaistorya hi Abel ngan hi Aram hin mga Saksi ni Jehova, nag-aram ha Biblia kaupod ha ira, ngan ha kataposan, nakabiling han mga baton ha ira mga pakiana. Napatubo nira an gugma ha Dios ngan an marig-on nga pagtoo ha iya. Ha kataposan, igindedikar nira an ira kinabuhi ngadto kan Jehova ngan nagin maunungon nga mga surugoon niya.

Husto nga Kahibaro—Usa nga Yawi ha Pagtoo ha Dios

Ano an aton mahibabaroan tikang hini nga mga eksperyensya? Nagsusumat ito ha aton nga may kalabotan ha pagtoo ha Dios, kinahanglanon an husto nga kahibaro ha Biblia. Hi apostol Pablo nagsiring ha mga Kristiano ha kadaan nga siyudad han Filipos: “Ini an akon igin-ampo, nga an iyo gugma magtubo gud kaopay ha kaaram [“husto nga kahibaro,” NW] ngan ha ngatanan nga sarabotan.” (Filipos 1:9) Ginpapabug-atan dinhi ni Pablo nga an gugma ha Dios ngan ha mga igkasi-tumuroo duok nga may kalabotan ha husto nga kahibaro ha Dios ngan pagsabot ha iya kaburut-on.

Makatadunganon ini, tungod kay an siyahan nga kinahanglanon ha pagkaada pagsarig ha usa amo an pagkilala hito nga tawo—kon mas duok ngan mas husto an imo kahibaro ngan pagkilala hito nga tawo, magigin mas daku an imo pagsarig. Ha pariho nga paagi, ginkikinahanglan mo an husto nga kahibaro basi maaghat ka nga tumoo ha Dios. “An pagtoo amo an karig-onan han mga bagay nga ginlalaoman, an proyba han mga bagay nga waray pa kikitaa,” nagsiring ni Pablo. (Hebreo 11:1) An pagtoo ha Dios nga waray husto nga kahibaro ha Biblia pariho hin balay nga hinimo ha mga baraha. An gutiay la nga hangin igo na ha pagbungkag hito.

An pag-aram ha Biblia makakabulig ha imo nga hiagian an mga baton ha mga pakiana nga pariho han usa nga maiha nga nakawurok kan Abel ngan Aram, Kay ano nga namamatay an mga tawo? An Biblia nagsasaysay nga “tungod ha usa ka tawo, sinulod an sala ha kalibotan, ngan tungod ha sala an kamatayon; ngan sugad man an kamatayon inagi ha ngatanan nga katawohan, kay an ngatanan nakasala.” (Roma 5:12) Nalalagas ngan namamatay an mga tawo, diri tungod kay kinukuha hira han Dios basi makaupod niya, kondi tungod kay nakasala hi Adan. (Genesis 2:16, 17; 3:6, 17-19) Dugang pa, iginsusumat han Biblia an totoo nga paglaom nga igintatanyag ni Jehova nga Dios. Pinaagi han iya Anak, hi Jesu-Kristo, iya igintatagana an paglaom nga pagkabanhaw para ha makasasala nga katawohan.—Juan 5:28, 29; Buhat 24:15.

Basi mabuligan kita nga hisabtan an kamatuoran mahitungod ha pagkabanhaw, an rekord han Biblia nagsusulod hin pipira nga mga ehemplo han mga indibiduwal nga ginbanhaw ni Jesus. (Lukas 7:11-17; 8:40-56; Juan 11:17-45) Samtang imo binabasa ini nga mga asoy han Biblia, tigamni an kalipay ngan pagrayhak han kasangkayan ngan pamilya han mga binanhaw. Tigamni liwat nga naaghat hira ha pagdayaw ha Dios ngan ha pagtoo kan Jesus.

An husto nga kahibaro mahitungod ha Dios ngan ha iya mga katuyoan mahimo magkaada pariho nga epekto ha mga tawo yana. Damu an nagupong hadto, nabug-atan, ngan nahipakdol pa ngani tungod han importante nga mga pakiana nga waray nira mabilngi hin makapatagbaw nga mga baton. Kondi samtang gin-aadman nira an Biblia, hin-agian nira an mga baton, ngan bug-os nga ginbag-o hito an ira mga kinabuhi.

Gugma ha Dios—An Siyahan nga Hinungdan ha Pag-alagad ha Iya

Bisan kon importante an husto nga kahibaro ha pagtoo ha Dios, labaw pa an ginkikinahanglan basi mapagios an usa nga sumugot ngan mag-alagad ha iya. Han ginpakianhan hi Jesus kon ano an gidadakui nga sugo tikang ha Dios, hiya siniring: “Higugmaon mo an imo Ginoo nga Dios ha bug-os mo nga kasingkasing, ngan ha bug-os mo nga kalag, ngan ha bug-os mo nga hunahuna, ngan ha bug-os mo nga kusog.” (Markos 12:30) Kon hinigugma han usa ka tawo an Dios ha paagi nga ginsiring ni Jesus, magigin disidido gud hiya ha pagsugot ngan pag-alagad ha Iya. Sugad ka ba hito?

Iginsumat ni Rachel, nga nag-aalagad sugad nga misyonera ha Korea ha sulod hin pipira ka mga dekada na, ini nga hinungdan han iya pagtoo: “Ginhuhunahuna ko an mahitungod ha pagkamahinatagon ni Jehova ha iya mga linarang, an iya pagpasaylo ha iya katawohan, ngan an iya hingyap nga magpahimulos kita pinaagi han pagsumat ha aton kon ano an iya karuyag ha aton. Ito ngatanan  nagpapatubo han akon gugma ha Dios. Ngan ito nga gugma nag-aaghat ha akon nga mag-alagad ha iya.”

Hi Martha, usa nga balo nga taga-Alemanya, nag-aalagad kan Jehova ha sulod hin 48 ka tuig na. Hiya nasiring: “Kay ano nga nag-aalagad ako kan Jehova? Tungod kay hinigugma ko hiya. Kada gab-i nakikiistorya ako kan Jehova ha pag-ampo ngan ginsusumatan ko hiya nga mapasalamaton gud ako tungod han ngatanan niya nga mga bendisyon, labi na tungod han halad lukat.”

Oo, an gugma ha Dios nag-aaghat ha aton nga kinasingkasing nga mag-alagad ha iya. Kondi paonan-o napapatubo han usa an sugad nga gugma? An gidadakui nga hinungdan ha pagpatubo hin gugma ha Dios amo an hilarom nga apresasyon ha gugma nga iya ipinapakita ha aton. Tigamni inin makalilipay nga pahinumdom tikang ha Biblia: “An waray paghigugma waray makakilala ha Dios; kay an Dios amo an gugma; tungod hini an gugma han Dios iginpahayag ha sulod naton, nga an Dios nagsugo ha iya bugtong nga Anak nganhi ha kalibotan, basi nga mabuhi kita pinaagi ha iya. Tungod hini aada an gugma, diri nga naghigugma kita ha Dios, kondi nga ginhigugma kita niya, ngan ginsugo niya an iya Anak nga magin halad tungod ha aton mga sala.”—1 Juan 4:8-10.

Nasasantop mo ba kon mationan-o kadaku ini nga gugma? Handurawa la nga nagtitikalumos ka ha masulog nga salog ngan usa nga tawo an nagbutang han iya kinabuhi ha peligro basi luwason ka. Hingangalimtan mo ba hiya, o diri ka ba magigin mapasalamaton gud ha iya? Diri ka ba magigin disidido ha pagbuhat hin bisan ano para ha iya? An gugma nga iginpakita han Dios ha paghatag han iya Anak, hi Jesu-Kristo, sugad nga halad lukat waray kapariho an pagin mas labaw. (Juan 3:16; Roma 8:38, 39) Kon nababantad an imo kasingkasing han gugma han Dios, mapapagios ka ha paghigugma ngan pag-alagad ha iya ha bug-os nga kasingkasing.

Mga Bendisyon Yana Ngan ha Tidaraon

Bisan kon an aton gugma ha Dios sadang magin an siyahan nga hinungdan ha pagbuhat han iya kaburut-on, makalilipay an paghibaro nga ginbabalosan han Dios adton nag-aalagad ha iya. Hi apostol Pablo nasiring: “Kon waray pagtoo diri gud mahihimo nga makalipay ha Iya; kay kinahanglan nga an  nadaop ha Dios tumoo nga amo hiya, ngan nga hiya magbabalos han ngatanan nga nagbibiling ha iya.”—Hebreo 11:6.

Adton nahigugma ngan nasugot ha Dios ginbibendisyonan gud niya. Damu an nagpapahimulos hin maopay nga kahimsog tungod han pagsunod ha mga prinsipyo ha Biblia. (Proberbios 23:20, 21; 2 Korinto 7:1) Adton nag-aaplikar han mga prinsipyo ha Biblia may kalabotan ha pagin tangkod ngan pagkamaduruto kasagaran nga sinasarigan han ira mga agaron ngan salit mas nakakasiguro ha pinansyal. (Kolosas 3:23) Pinaagi han pagsarig kan Jehova, an mga surugoon han Dios may-ada kamurayawan ha hunahuna bisan durante han makuri nga mga kahimtang. (Proberbios 28:25; Filipos 4:6, 7) Labaw ha ngatanan, may-pagsarig nga naglalaom hira ha bendisyon nga kinabuhi nga waray kataposan ha tiarabot nga Paraiso nga tuna.—Salmo 37:11, 29.

Ano an inaabat mahitungod kan Jehova hadton nagpapahimulos han sugad nga mga bendisyon? Hi Jacqueline, usa nga Kristiano ha Canada, nagsusumat han iya apresasyon ha Dios: “Pirme hiya naghahatag ha aton hin mag-opay nga mga regalo, ngan nagtatagana hiya han sigurado nga paglaom nga kinabuhi nga waray kataposan.” Hi Abel, nga gin-unabi kanina, nagsasaysay han iya mga pagbati ha sugad hini nga paagi: “An paglaom nga mabuhi ha waray kataposan ha paraiso nga tuna bag-o ha akon, ngan ginpapamulat ko ito. Kondi, bisan kon waray Paraiso, nalilipay la gihapon ako nga ipakita an akon gugma ha Dios pinaagi han pag-alagad ha iya.”

Ikaw Liwat Mahimo Magkaada Totoo nga Pagtoo

“Hi Jehova han mga kasundalohan, nga naghuhukom ha matadong, nga nagsasari han kasingkasing ngan han panumdoman,” siring han Biblia. (Jeremias 11:20) Oo, gin-uusisa ni Jehova an gisusuluri han aton pagkatawo. Sadang usisahon han kada tagsa an iya kalugaringon nga motibo ha pagtoo ha Dios. An sayop nga mga gintotoohan ngan mga ideya mahitungod ha Dios bangin nagtugway ha sayop nga mga buhat ha naglabay. Kondi, an husto nga kahibaro ha Biblia mahimo magtugway ha husto nga relasyon ha Maglalarang, hi Jehova nga Dios.—1 Timoteo 2:3, 4.

Pinaagi han ira kahikayan nga libre nga pag-aram ha Biblia ha balay, binubuligan han mga Saksi ni Jehova an mga tawo nga magkaada husto nga kahibaro ha Dios. (Mateo 28:20) Damu han kinarawat han sugad nga bulig an nahibaro ha paghigugma ha Dios ngan nakapatubo hin putli nga pagtoo ha iya. Pinaagi han pag-aram ha Biblia, nagkaada hira “praktikal nga kinaadman ngan abilidad ha paghunahuna,” nga nakabulig ha ira nga “maglakat nga may seguridad” durante hinin makuri nga mga panahon. (Proberbios 3:21-23, NW) Labaw ha ngatanan, may-ada hira yana paglaom nga “mabaskog ngan marig-on” ha tidaraon. (Hebreo 6:19) Ikaw liwat mahimo magkaada totoo nga pagtoo ngan magpahimulos hini nga mga bendisyon.

[Kahon ha pahina 6]

Nakakagupong nga mga Pakiana nga Nagkikinahanglan hin mga Baton

“Samtang ginbabansay ha ospital sugad nga estudyante ha medisina, hinkit-an ko an mag-opay nga mga tawo nga naghaharoy ha kaul-ol tungod han mga sakit ngan mga kalamidad. Kon may-ada Dios, kay ano nga nahitatabo ini? An relihiyon ba usa la nga paagi ha pagkaada kamurayawan ha hunahuna?”—Usa nga Presbiteryano hadto ha Korea.

“Agsob nga ginhunahuna ko kon an akon ba amay, nga usa nga alkoholiko, aadto na ha impyerno o ha langit. Nahadlok ako ha mga patay ngan ha ideya mahitungod han naglalaga nga impyerno. Diri ko masabtan kon kay ano nga an usa ka mahigugmaon nga Dios nakakagpadara hin tawo ngadto ha impyerno basi mag-antos ha kadayonan.”—Usa nga Katoliko hadto ha Brazil.

“Ano an tidaraon han tuna ngan han katawohan? Paonan-o mahimo mabuhi an katawohan ha kadayonan? Paonan-o magkakaada totoo nga kamurayawan an katawohan?”—Usa nga Katoliko hadto ha Alemanya.

“Diri ko masabtan an katutdoan mahitungod han reinkarnasyon. Diri nagsisingba an mga hayop, salit kon tungod han usa nga hinungdan magin usa ka nga hayop basi magbayad han imo mga sala, paonan-o mo matatadong an mga butang ngan mag-uswag tikang hito nga kahimtang?”—Usa nga Hindu hadto ha Aprika del Sur.

“Nagdaku ako ha Confuciano nga pamilya, ngan nakikigbahin ako hadto ha seremonya para ha kamurayaw han amon mga kaapoy-apoyan. Samtang nakikigbahin ako ha pag-andam han halaran nga lamesa ngan ha pagyukbo, ginhunahuna ko kon an amon mga patay nga mga kaapoy-apoyan naabot ba ha pagkaon ngan pagkita han amon pagyukbo ha ira.”—Usa nga Confucianista hadto ha Korea.

Hin-agian hini ngatanan nga mga indibiduwal an mga baton ha ira mga pakiana han mag-aram hira ha Biblia ha mga Saksi ni Jehova.