Sumat han mga Parasamwak han Ginhadian

An Usa nga Programa ha Telebisyon Nagpagios ha Iya nga Dayawon an Dios

HI APOSTOL Pablo nagsiring nga ‘an iba nagwawali han Kristo tungod ha kaawa ngan ha pagkabahinbahin, kondi an iba man ha maopay nga kaburut-on.’ (Filipos 1:15) Usahay, bisan adton nagsasari ha pagpakaraot ha katawohan ni Jehova diri-tinuyo nga nagigin hinungdan nga madani an magtadong-an-kasingkasing nga mga tawo ngada ha kamatuoran.

Han Nobyembre 1998, usa nga dokumentaryo nga nagpapakita hin mga retrato han Bethel, an mga pasilidad han sanga han mga Saksi ni Jehova ha Louviers, Fransia, an iginpasalida ha telebisyon han nasud ha Fransia. Bisan pa han magkalainlain nga mga reaksyon nga nakarawat hito, nagbunga an programa hin maopay nga mga resulta ha diri-linalaoman nga mga paagi.

Usa han mga nakakita han programa hi Anna-Paula, nga naukoy hin 60 kilometro la tikang ha Bethel. Hi Anna-Paula, usa nga diborsyada nga duha an anak, namimiling hin trabaho hito nga panahon. Salit kinabuwasan, tumawag hiya ha Bethel basi magpakiana kon mahimo hiya makatrabaho didto. “Tungod han programa ha telebisyon nagkaada ako impresyon nga desente ito nga lugar ngan nga mapulsanon an buruhaton didto,” nagsiring hiya. Nahipausa gud hiya ha paghibaro nga an ngatanan nga nagtatrabaho ha Bethel mga ministro nga naghahatag han ira panahon nga waray bayad! Katapos hin halipot nga paghisgot mahitungod ha mga buruhaton han mga Saksi ni Jehova, inuyon hiya nga bisitahon hin usa nga Saksi.

Han binisita hi Léna, usa nga bug-os-panahon nga ministro ha lokal nga kongregasyon, nag-istorya hira hin maiha, ngan ginkarawat ni Anna-Paula an libro nga Kahibaro nga Nagtutugway Ngadto ha Kinabuhi nga Waray Kataposan.⁠ * Ha sunod nga pagbisita, nabasa na ni Anna-Paula an bug-os nga libro ngan may-ada hiya damu nga mga pakiana. Ginkarawat dayon niya an pag-aram ha Biblia. Hi Anna-Paula nagsiring: “Para ha akon, ito an higayon nga madiskobrehan an Pulong han Dios. Waray pa gud ako makakapot hin Biblia hadto.”

Han Enero 1999, hi Anna-Paula binisita ha Bethel, ngan han sunod nga semana tinambong hiya ha Kristiano nga katirok ha siyahan nga higayon. Waray pag-iha katapos hito, nagtikang hiya ha pagdumara hin pag-aram ha Biblia ha iya mga anak ngan ha pagsangyaw ha iya kasangkayan. “Diri ko mapugngan an pag-istorya ha iba mahitungod ha mga kamatuoran ha Biblia nga akon hinbabaroan,” siring niya. “Karuyag ko isumat an mga kamatuoran ha Biblia ha mga tawo ngan liawon hira.” Katapos pangalimbasogan nga malamposan an pipira nga personal nga mga problema, hi Anna-Paula nagtikang tumambong hin regular ha mga katirok. Madagmit hiya nga nag-uswag ngan nabawtismohan han Mayo 5, 2002.

Dugang pa, tungod han maopay nga susbaranan ngan madasigon nga pagsangyaw ni Anna-Paula, nagtikang pag-aram ha Biblia an iya iroy ngan waray pag-iha nga nabawtismohan. “Diri maisaysay han mga pulong an akon kalipay,” siring ni Anna-Paula. “Nagpapasalamat ako kan Jehova kada adlaw ha pagtugot ha akon ha pagkilala ngan pag-alagad ha iya ngan para han ngatanan nga mga bendisyon nga iya iginhahatag ha akon.”

[Footnote]

[Mga Retrato ha pahina 8]

Igbaw: Anna-Paula

Ubos: Ganghaan tipakadto ha sanga nga opisina han Fransia