‘Andam ha Ngatanan  nga Mag-opay nga Buhat’

“PAHINUMDOMA hira nga magpasakop hira ha mga punoan, ha mga magburuot, nga magmasinugtanon, ngan mag-andam hira ha ngatanan nga mag-opay nga buhat.” (Tito 3:1) Ano nga maopay nga buhat an ginhunahuna ni apostol Pablo han iginsurat niya ito nga mga pulong ha iya mga igkasi-tumuroo? An eskolar ha Biblia nga hi E. F. Scott nag-unabi hin usa nga klase han maopay nga buhat, nasiring: “An mga Kristiano diri la kinahanglan sumunod ha awtoridad, kondi kinahanglan hira magin andam para ha bisan ano nga maopay nga buhat. . . . Kon ginkinahanglan han okasyon, an mga Kristiano sadang magin kaupod ha mga nangunguna ha pagpakita hin pagtagad ha mga tawo ha komunidad. An ngatanan nga maopay nga mga tuminungnong maghihingyap ha pagbulig ha ira mga igkasi-tawo ha kada panahon nga may-ada sunog, kadaot, magkalainlain nga klase hin kalamidad.”

An mga Kristiano nakikigbahin ha pipira nga mga buhat nga mapulsanon ha publiko kon ito nga mga buhat diri nasupak ha mga balaud han Dios. (Buhat 5:29) Pananglitan, ha pagsunod ha sugo han lokal nga departamento ha pagpugong han sunog, kada tuig an sanga nga opisina han mga Saksi ni Jehova ha Japan, nga nahimumutang ha Ebina, nagdudumara hin pagbansay ha pagpugong ngan pakatalwas kon may sunog. Hito nga mga okasyon, nagkakatirok an ngatanan nga membro han pamilya han Bethel basi mamati ha mga instruksyon nga iginhahatag han usa nga representante han lokal nga departamento ha pagpugong han sunog.

Dugang pa, ha sulod hin sobra usa ka dekada na, an sanga nga opisina nakooperar ha lokal nga mga awtoridad ha usa nga pasundayag nga gindudumara ha pagpauswag han kahibaro ha pagpugong han sunog. Didto ha pasundayag, an mga kompanya ngan mga establisimento ha siyudad nagpapakita han ira pagin andam ha pagsugpo-han-sunog ngan pagpugong-han-sunog. Agsob na nga pinapasidunggan an sanga nga opisina tungod han mga kaabtik ngan kooperasyon han mga boluntaryo hito. Han 2001, hira an kinarawat han siyahan nga premyo ha pasundayag. Andam hira ha maopay nga buhat nga mahimo magluwas han kinabuhi ha panahon han sunog.

Usa nga Birilhon nga Serbisyo

Kondi, an mga Saksi ni Jehova interesado ha mas importante nga klase han maopay nga buhat, nga nagluluwas han kinabuhi liwat. Regular nga nabisita hira ha ira mga igkasi-tawo basi ipaangbit an maopay nga sumat han Ginhadian han Dios. (Mateo 24:14) Gindadasig han mga Saksi an mga tawo nga mahibaro ngan mag-aplikar han mga prinsipyo han Biblia ha ira mga kinabuhi basi mapauswag an kuwalidad han ira kinabuhi yana ngan magkaada paglaom nga kinabuhi nga waray kataposan ha kalibotan diin may-ada totoo nga kamurayawan ngan seguridad.

Bangin diri hisabtan han iba an bili han serbisyo nga igintatagana han mga Saksi ni Jehova, gintatagad hira nga nakakadisturbo. Kondi, iba an opinyon ni Justice Jean Crepeau han Quebec Superior Court ha Canada. Ginkontra han mga Saksi ni Jehova didto an usa nga balaud han siyudad han Blainville, Quebec, nga nagkinahanglan hin permit para ha ira mga pagbisita ha kada balay. Ha desisyon han korte, hi Justice Crepeau nagsiring: “An mga pagbisita han mga Saksi ni Jehova usa nga Kristiano nga serbisyo ha komunidad ngan . . . an mga publikasyon nga igintanyag han mga Saksi ha interesado nga mga tuminungnong importante nga literatura, nga naghihisgot han mga topiko sugad han relihiyon, Biblia, mga droga, alkoholismo, edukasyon han mga batan-on, mga problema han pag-asawa ngan diborsyo.” An desisyon nagpadayon: “Masisiring la han korte nga an pagparihoa han mga Saksi ni Jehova ha mga parabaligya nakakainsulto, nakakatamay, nakakadaot, ngan nagpapakaraot.”

Nakakabulig an mga Saksi ni Jehova ha pagpauswag han kaopayan han komunidad nga ira inuukyan pinaagi han pagbulig ha mga tawo nga malamposan an mga problema ha ira adlaw-adlaw nga pagkinabuhi ngan pagdara ha ira hin paglaom para ha tidaraon. Sinasangkapan hira han Biblia ha pagtuman hito nga buruhaton. “An ngatanan nga mga Baraan nga Surat nga ginpakaaghat han Dios may kapulsanan man ha pagtututdoan, ha pagbadlong, ha pagsaway, ha panutdoan nga ha katadongan: basi nga an tawo han Dios mahingpit, ngan maandam tungod ha ngatanan nga maopay nga buhat.”​—⁠2 Timoteo 3:​16, 17.

Karuyag mo ba mahibaro kon paonan-o nagigin ‘andam ha ngatanan nga mag-opay nga buhat’ an mga Saksi ni Jehova? Ginhahangyo ka namon nga karawaton an ira bulig ha pag-aram hin dugang pa mahitungod ha Biblia ngan hito nga paagi makakapahimulos hinin importante nga serbisyo ha komunidad nga ira ginbubuhat ha iyo lugar ngan ha bug-os nga kalibotan.

[Retrato ha pahina 30, 31]

An mga Saksi ni Jehova nangangalimbasog ha pakigkooperar ha sekular nga mga awtoridad

[Retrato ha pahina 31]

Kilala an mga Saksi ha pagbulig ha ira mga igkasi-tawo