“Ipakita Niyo nga Kamo Mapasalamaton”

“An kamurayawan ni Kristo maghadi unta ha iyo mga kasingkasing . . . ngan magpasalamat kamo [“ipakita niyo nga kamo mapasalamaton,” NW].”​—⁠KOLOSAS 3:15.

1. Ano nga magkaiba nga kahimtang an nakikita naton ha Kristiano nga kongregasyon ngan ha kalibotan nga ginmamandoan ni Satanas?

HA 94,600 nga kongregasyon han mga Saksi ni Jehova ha bug-os nga kalibotan, nakikita naton an mapasalamaton nga espiritu. An tagsa nga katirok nagtitikang ngan natatapos pinaagi han pag-ampo nga nag-uupod hin mga kapahayagan han pagpasalamat kan Jehova. Agsob nga nababatian naton an “salamat,” “waray sapayan,” o pariho hini nga mga kapahayagan han mga batan-on ngan mga lagas sugad man han mga bag-ohan ngan maiha na nga mga Saksi samtang naapi hira ha pagsingba ngan ha malipayon nga pakig-upod. (Salmo 133:1) Kabaliktaran gud ini ha kahakog nga nakikita ha damu nga ‘diri nakilala ha Dios ngan diri nagtutuman han maopay nga sumat’! (2 Tesalonika 1:8) Naukoy kita ha kalibotan nga diri-mapasalamaton. Ngan diri ini urusahon kon ginhuhunahuna naton an dios hini nga kalibotan​—⁠hi Satanas nga Yawa, an pinakabantogan nga nasuporta ha pagin makikalugaringon, nga an iya pagpahitaas ngan pagin rebelyoso naglulukop ha tawhanon nga sosiedad!​—⁠Juan 8:44; 2 Korinto 4:⁠4; 1 Juan 5:19.

2. Ano nga pahamangno an kinahanglan sundon naton, ngan ano nga mga pakiana an aton paghihisgotan?

² Tungod kay ginpapalibotan kita han kalibotan ni Satanas, kinahanglan mag-ikmat kita nga diri kita mahugawan han mga paggawi hito. Ha siyahan nga siglo, ginpahinumdom ni apostol Pablo an mga Kristiano ha Efeso: “Hadto nga panahon nanggawi kamo sugad han kahimtangan dinhi ha kalibotan, sugad ha prinsipe han mga kagamhanan han hangin, han espiritu nga niyan nagbubuhat dida ha mga anak han diri-masinugtanon. Nga han una nga panahon nag-ukoy man kita ngatanan upod ha ira ha kairiphon han aton mga unod, nga nagbuhat ha kaburut-on han unod ngan hunahuna, ngan ha kinaiya mga anak han kasina, sugad ha iba.” (Efeso 2:​2, 3) Ito liwat an kahimtang han damu nga mga  tawo yana. Salit, paonan-o naton matitipigan an mapasalamaton nga espiritu? Ano nga bulig an igintatagana ni Jehova? Ha ano nga praktikal nga mga paagi maipapakita naton nga kita totoo nga mapasalamaton?

Mga Hinungdan ha Pagin Mapasalamaton

3. Tungod ha ano nga mapasalamaton kita kan Jehova?

³ Kinahanglan magpasalamat kita kan Jehova nga Dios, an aton Maglalarang ngan Humaratag-Kinabuhi, labi na kon ginhuhunahuna naton an pipira han damu nga mga regalo nga iginhahatag niya ha aton. (Jakobo 1:17) Adlaw-adlaw, nagpapasalamat kita kan Jehova nga kita buhi. (Salmo 36:9) Ha aton palibot, nakikita naton an damu nga ebidensya han mga linarang ni Jehova, sugad han adlaw, bulan, ngan mga bitoon. An abunda nga bodega han aton planeta nga puno hin mga mineral nga nagsusustento han kinabuhi, an timbang nga pagkasaralakot han importante nga mga gas han atmospera, ngan an makuti nga mga sikolo ha palibot nagpapamatuod ngatanan nga may utang kita ha aton mahigugmaon, langitnon nga Amay. “O Jehova, nga akon Dios, damu an mga urusahon nga buhat nga imo ginhimo,” nagkanta hi Hadi David, “ngan an imo mga hunahuna nga ngadi ha amon; diri ito mahuhusay ha atubangan mo; kon ako magpahayag ngan magyakan tungod hito. Mamadamu pa ito han maiisip.”​—⁠Salmo 40:5.

4. Kay ano nga sadang kita magpasalamat kan Jehova tungod han malipayon nga asosasyon nga pinahihimulsan naton ha aton mga kongregasyon?

⁴ Bisan kon diri nag-uukoy ha pisikal nga paraiso, an mga surugoon ni Jehova yana malipayon nga nagkikinabuhi ha espirituwal nga paraiso. Ha aton mga Kingdom Hall ngan ha aton mga kombensyon ngan mga asembleya, naieksperyensyahan naton an mga bunga han espiritu han Dios nga nagios ha aton mga igkasi-tumuroo. Oo, kon nagsasangyaw ha mga tawo nga gutiay la an kahibaro ha relihiyon o waray gud kahibaro mahitungod hito, gin-uunabi han iba nga mga Saksi an iginhulagway ni Pablo ha iya surat ngadto ha mga taga-Galasia. Siyahan, ira iginsasaysay an “mga buhat han unod” ngan ginpapakianhan an ira mga mamarati kon ano an ira naoobserbahan. (Galasia 5:19-23) Kadam-an an nauyon dayon nga ini an mga kinaiya han tawhanon nga sosiedad yana. Kon ginsasaysayan mahitungod han mga bunga han espiritu han Dios ngan kon gindadapit ngadto ha lokal nga Kingdom Hall basi makita nira mismo an ebidensya hini, damu an nasiring dayon: “An Dios aada ha iyo.” (1 Korinto 14:25) Ngan nakikita ini diri la ha lokal nga Kingdom Hall. Diin ka man magbiyahe, kon igkita ka  han bisan hin-o han sobra unom ka milyon nga mga Saksi ni Jehova, makikita mo an pariho hito nga malipayon nga espiritu. Oo, inin nagpaparig-on nga asosasyon usa nga hinungdan ha pagpasalamat kan Jehova, an usa nga naghahatag han iya espiritu basi magin posible ito.​—⁠Sepania 3:⁠9; Efeso 3:​20, 21.

5, 6. Paonan-o naton maipapakita nga kita mapasalamaton ha gidadakui nga regalo han Dios, an lukat?

⁵ An gidadakui nga regalo, an pinakahingpit nga regalo nga iginhatag ni Jehova, amo an iya Anak, hi Jesus, nga pinaagi ha iya iginhatag an halad nga lukat. “Kon an Dios nahigugma sugad hito ha aton,” nagsurat hi apostol Juan, “kinahanglan man nga maghigugmaay kita an usa kag usa.” (1 Juan 4:11) Oo, ipinapakita naton nga kita mapasalamaton tungod ha lukat diri la pinaagi han pagpahayag hin gugma ngan pagpasalamat kan Jehova kondi pinaagi liwat han aton pagkinabuhi nga nagpapakita hin gugma ha iba.​—⁠Mateo 22:37-39.

⁶ Damu pa an mahibabaroan naton mahitungod han pagpasalamat pinaagi han paghisgot han paagi han pakig-upod ni Jehova ha kadaan nga Israel. Pinaagi han Balaud, nga iya iginhatag ha nasud pinaagi kan Moises, gintutdoan ni Jehova an katawohan hin damu nga mga leksyon. Pinaagi han “istruktura han kahibaro ngan han kamatuoran ha Balaud,” mas damu pa gud an mahibabaroan naton nga mabulig ha aton nga sundon an sagdon ni Pablo: “Ipakita niyo nga kamo mapasalamaton.”​—⁠Roma 2:​20, NW; Kolosas 3:​15, NW.

Tulo nga Leksyon Tikang ha Mosaiko nga Balaud

7. Paonan-o an kahikayan han ikanapulo naghatag ha mga Israelita hin higayon nga ipakita nga hira mapasalamaton kan Jehova?

⁷ Ha Mosaiko nga Balaud, hi Jehova nagtagana hin tulo nga paagi nga maipapakita han mga Israelita an ira totoo nga apresasyon ha iya pagkamaopay. Siyahan amo an ikanapulo. An ikanapulo nga bahin han mga ani han tuna, upod an “ikapulo han kapangon han kabakahan, o han kakarnerohan,” ini “mababaraan kan Jehova.” (Lebitiko 27:30-32) Han sinugot an mga Israelita, hi Jehova hura nga nagbendisyon ha ira. “Dad-on niyo an bug-os nga ikapulo ngada ha burutangan, nga mamay-ada karaunon dida ha akon balay, ngan sarihi ako yana hini, nasiring hi Jehova han mga kasundalohan, kon diri ko ba abrihan ngada ha iyo an mga tamboanan ha langit, ngan buboan kamo han bendisyon nga mawaray igo nga surudlan ha pagkarawat hini.”​—⁠Malakias 3:10.

8. Ano an kaibahan han kinaburut-on nga mga halad ngan han ikanapulo?

⁸ Ikaduha, dugang pa ha kinahanglanon nga ikanapulo, hi Jehova naghikay nga an mga Israelita maghatag hin kinaburut-on nga mga amot. Iya ginsugo hi Moises nga sumatan an mga Israelita: “Kon kamo sumulod ngadto ha tuna nga pagdadad-an ko ha iyo, dida hito mahinanabo, nga kon kumaon kamo han tinapay han tuna, maghalad kamo hin usa nga halad nga inundong kan Jehova.” An iba han siyahan nga mga bunga han ira ‘minasa nga malidong nga torta’ ipipresenta sugad nga “halad nga inundong kan Jehova” ha ngatanan nira nga mga katulinan. Tigamni nga waray magkinahanglan hin espisipiko nga kadamu hinin siyahan nga mga bunga. (Numeros 15:18-21) Kondi han an mga Israelita naghalad hin pagpasalamat, ginpasarig hira han bendisyon tikang kan Jehova. Pariho hito an  kahikayan may kalabotan ha templo ha bisyon ni Esekiel. Aton mababasa: “An siyahan han ngatanan nga siyahan nga mga bunga han tagsatagsa nga butang, ngan an tagsatagsa nga halad han tagsatagsa nga butang, han ngatanan nga iyo halad, makakanan saserdote; iyo liwat ihahatag ngadto ha mga saserdote an siyahan han iyo minasa, ha pagpahamutang hin bendisyon dida ha iyo balay.”​—⁠Esekiel 44:30.

9. Ano an igintutdo ni Jehova pinaagi han kahikayan nga pamurot?

⁹ Ikatulo, hi Jehova naghimo han kahikayan para han pamurot. “Kon magbari kamo han katbari han iyo tuna,” nagsugo an Dios, “diri mo ubuson pag-ani an aada ha mga kanto han imo uma, ngan diri ka man liwat magtirok han mga nanhisalin han pag-ani, han imo katbari. Diri mo pag-anihon an mga nanhisalin han imo urubasan, ngan diri ka man liwat magtirok han mga bunga nga nagkahulog han imo urubasan; ibilin mo hira ha mga kablas ngan ha mga dumuruong: Ako hi Jehova nga imo Dios.” (Lebitiko 19:​9, 10) Dinhi, waray na liwat magkinahanglan hin espisipiko nga kadamu. An tagsa nga Israelita an magdidesisyon kon mationan-o kadamu an ibibilin niya para ha mga kablas. An maaramon nga hi Hadi Salomon angayan nga nagsaysay: “Hiya nga may pagbati han kablas naalayon kan Jehova, ngan han iya maopay nga buhat Iya hiya pagbabayaran liwat.” (Proberbios 19:17) Hito nga paagi igintutdo ni Jehova an pagpaid ngan pagtagad ha mga kablas.

10. Ano an mga resulta ha katawohan han Israel han napakyas hira ha pagpakita hin pagin mapasalamaton?

¹⁰ Ginbendisyonan ni Jehova an mga Israelita han masinugtanon nga nagdara hira han ikanapulo, naghatag hin kinaburut-on nga mga amot, ngan nagtagana para ha mga kablas. Kondi han an katawohan han Israel napakyas ha pagin mapasalamaton, nawad-an hira han pag-uyon ni Jehova. Nagresulta ini hin kalamidad ngan ha kataposan pagkabihag. (2 Kronikas 36:17-21) Ano, kon sugad, an mga leksyon para ha aton?

An Aton mga Kapahayagan han Pagin Mapasalamaton

11. Ano an pinakaimportante nga paagi nga maipapakita naton an aton pagin mapasalamaton kan Jehova?

¹¹ An pinakaimportante nga paagi nga mahimo naton dayawon hi Jehova ngan ipahayag an aton pagin mapasalamaton nag-uupod liwat hin “halad.” Oo, sugad nga mga Kristiano, diri na kita ilarom han Mosaiko nga Balaud, nga obligado ha paghalad hin mga hayop o mga ani. (Kolosas 2:14) Kondi, hi apostol Pablo nagsagda ha Hebreohanon nga mga Kristiano: “Halaran ta gihapon an Dios hin halad han pagdayeg, nga amo, an bunga han mga im-im nga nagsusumat han iya ngaran.” (Hebreo 13:15) Pinaagi han paggamit han aton mga abilidad ngan mga panag-iya ha paghalad hin pagdayaw kan Jehova, ha publiko nga ministeryo man o ha “mga katig-uban” han mga igkasi-Kristiano, maipapahayag naton an kinasingkasing nga pagpasalamat ha aton mahigugmaon, langitnon nga Amay, hi Jehova nga Dios. (Salmo 26:12) Ha pagbuhat hito, ano an mahibabaroan naton tikang ha mga paagi nga sadang igpahayag han mga Israelita an ira pagin mapasalamaton kan Jehova?

12. May kalabotan ha aton Kristiano nga responsabilidad, ano an mahibabaroan naton tikang ha kahikayan nga ikanapulo?

¹² Siyahan ha ngatanan, sugad han aton ginhisgotan na, an kahikayan han ikanapulo diri kay mahimo buhaton o diri; obligado hini an tagsa nga Israelita. Sugad nga mga Kristiano, responsabilidad naton nga makigbahin ha ministeryo ngan tumambong ha Kristiano nga mga katirok. Ini nga mga buruhaton diri kay mahimo buhaton o diri. Ha iya daku nga tagna may kalabotan ha panahon han kataposan, hi Jesus matin-aw nga nagsiring: “Ini nga maopay nga sumat han ginhadian igwawali ha bug-os nga kalibotan ha pagpamatuod ha ngatanan nga mga nasud; ngan niyan an kataposan maabot.” (Mateo 24:14; 28:​19, 20) Mahitungod han Kristiano nga mga katirok, hi apostol Pablo giniyahan nga magsurat: “Magpinalandunganay an usa kag usa ha aton ha pag-aghat ha gugma ngan ha mga mag-opay nga buhat; diri ta bayaan an aton pagtarotarampo, sugad han batasan han iba, kondi maglinaygayay kita labi na gud, nga iyo gintatan-aw nga an adlaw nagtitikahirani na.” (Hebreo 10:​24, 25) Ipinapakita naton an aton pagin mapasalamaton kan Jehova kon malipayon nga kinakarawat naton an aton responsabilidad ha pagsangyaw ngan pagtutdo sugad man ha regular nga pakig-upod ha aton kabugtoan ha mga katirok ha kongregasyon, gintatagad ito sugad nga pribilehiyo ngan kadungganan.

13. Ano an leksyon han mga kahikayan han boluntaryo nga mga amot ngan han pamurot?

¹³ Dugang pa, makakapahimulos kita ha paghisgot han duha pa nga kahikayan nga pinaagi hito maipapakita han mga Israelita an ira apresasyon​—⁠an  boluntaryo nga mga amot ngan an pamurot. Kabaliktaran ha ikanapulo, nga may-ada espisipiko nga kinahanglanon nga sadang sundon, an boluntaryo nga mga amot ngan an kahikayan han pamurot waray magkinahanglan hin espisipiko nga kadamu. Lugod, gintugotan hito nga an kahilarom han apresasyon nga aada ha kasingkasing han usa nga surugoon ni Jehova magpagios ha iya nga magbuhat. Ha pariho nga paagi, bisan kon hinsasabtan naton nga importante gud nga responsabilidad han tagsa nga surugoon ni Jehova an pakigbahin ha ministeryo ngan pagtambong ha Kristiano nga mga katirok, bug-os-kasingkasing ba nga nakikigbahin kita hito nga may-ada kinaburut-on nga disposisyon? Gintatagad ba naton ito sugad nga higayon ha pagpahayag han aton kinasingkasing nga apresasyon ha ngatanan nga ginbubuhat ni Jehova para ha aton? Nakikigbahin ba kita pirme hini nga mga buruhaton, ha sukol nga igintutugot han aton tagsatagsa nga mga kahimtang? O gintatagad naton ini ngatanan sugad nga obligasyon la nga kinahanglan aton buhaton? Syempre, mga pakiana ini nga kinahanglan personal nga batunon naton. Hi apostol Pablo nagpahayag hini nga paagi: “An tagsatagsa nga tawo magsulay ha iya kalugaringon nga buhat, ngan hiya maghihimaya ha iya kalugaringon, ngan diri tungod ha iya amyaw.”​—⁠Galasia 6:4.

14. Ano an ginlalaoman ni Jehova ha aton ha pag-alagad ha iya?

¹⁴ Maaram gud hi Jehova nga Dios han aton mga kahimtang. Maaram hiya han aton mga limitasyon. Pinabibilhan niya an mga sakripisyo, daku man o gutiay, nga kinaburut-on nga iginhahalad han iya mga surugoon. Diri hiya naglalaom nga kita ngatanan maghahatag hin parapriho nga kadamu, ngan diri liwat naton mahihimo ito. Han naghihisgot mahitungod han paghatag hin materyal, hi apostol Pablo nagsiring ha mga Kristiano ha Korinto: “Kon may-ada pag-andam, ito kinakarawat sugad han sadang han tawo, diri sugad han iya pagkawaray sadang.” (2 Korinto 8:12) Ini nga prinsipyo naaplikar liwat ha aton pag-alagad ha Dios. An aton pag-alagad kinakarawat ni Jehova diri tungod han kadamu han aton ginbubuhat, kondi han paagi han aton pagbuhat hito​—⁠malipayon ngan bug-os-kasingkasing.​—⁠Salmo 100:1-5; Kolosas 3:23.

Patuboa Ngan Tipigi an Espiritu han Pagpayunir

15, 16. (a) Ano an kalabotan han payunir nga ministeryo ngan han pagin mapasalamaton? (b) Paonan-o maipapakita an espiritu han pagpayunir hadton diri makakahimo magpayunir?

¹⁵ Usa nga makapatagbaw nga paagi han pagpakita han aton pagin mapasalamaton kan Jehova amo an pagsulod ha bug-os-panahon nga ministeryo.  Tungod kay napagios han gugma kan Jehova ngan han apresasyon ha iya diri-takos nga pagkabuotan, damu nga dedikado nga mga surugoon an naghimo hin daku nga mga pagbag-o ha ira mga kinabuhi basi magkaada mas damu nga panahon ha pag-alagad kan Jehova. An iba nakakag-alagad sugad nga mga regular payunir, nagasto hin aberids nga 70 ka oras kada bulan ha pagsangyaw han maopay nga sumat ngan pagtutdo han kamatuoran ha mga tawo. An iba, nga bangin limitado an mahihimo tungod han magkalainlain nga mga kahimtang, ha panapanahon naghihikay ha paggasto hin 50 ka oras ha usa ka bulan ha pagsangyaw sugad nga mga auxiliary payunir.

¹⁶ Kondi kumusta man an damu nga mga surugoon ni Jehova nga diri mahimo mag-regular o mag-auxiliary payunir? Maipapakita nira an pagin mapasalamaton pinaagi han pagpatubo ngan pagtipig han espiritu han pagpayunir. Paonan-o? Pinaagi han pagdasig hadton mahimo magpayunir, pinaagi han pagpasilsil ha ira mga anak han hingyap nga himoon nga karera an bug-os-panahon nga pag-alagad, ngan pinaagi han maduruto nga pakigbahin ha pagsangyaw sumala han ira mga kahimtang. An aton maihahatag ha aton ministeryo nadepende gud ha kahilarom han apresasyon nga aada ha aton mga kasingkasing para ha ginbuhat ni Jehova, ginbubuhat yana, ngan pagbubuhaton pa para ha aton.

Pagpakita han Pagin Mapasalamaton Pinaagi han Aton “Birilhon nga mga Butang”

17, 18. (a) Paonan-o naton maipapakita an pagin mapasalamaton pinaagi han aton “birilhon nga mga butang”? (b) Ano an ginsiring ni Jesus mahitungod han amot han babaye nga balo, ngan kay ano?

¹⁷ “Pasidunggi hi Jehova pinaagi han imo birilhon nga mga butang,” siring han Proberbios 3:9 (NW), “ngan pinaagi han siyahan nga mga bunga han ngatanan mo nga ani.” An mga surugoon ni Jehova diri na kinahanglan maghatag han ikanapulo. Lugod, hi Pablo nagsurat ha kongregasyon ha Korinto: “An tagsatagsa humatag sugad han uyon han iya kasingkasing; diri ha kasubo o ha kinahanglan; kay an Dios nahigugma ha malipayon nga humaratag.” (2 Korinto 9:7) An paghatag hin boluntaryo nga mga amot ha pagsuporta ha bug-os-kalibotan nga pagsangyaw-han-Ginhadian nga buruhaton nagpapakita liwat han aton pagin mapasalamaton. An kinasingkasing nga apresasyon nagpapagios ha aton nga buhaton ini hin regular, bangin nagtitirok hin kantidad kada semana, sugad han ginbuhat han siyahan nga mga Kristiano.​—⁠1 Korinto 16:​1, 2.

¹⁸ Diri an kantidad han naihahatag naton an nagpapakita han aton pagpasalamat kan Jehova. Lugod, amo ito an espiritu han aton paghatag. Ini an naobserbahan ni Jesus han ginkikita niya an mga tawo nga naghuhulog han ira mga amot ngada ha surudlan han salapi ha templo. Han hinkit-an ni Jesus an usa nga kablas nga babaye nga balo nga naghulog hin “duha nga lepta [“sinselyo nga gutiay hinduro an bili,” NW],” hiya nagsiring: “Matuod, nasiring ako ha iyo: ini nga kablas nga babaye nga balo, naglabog hin darodamu ha ngatanan. Kay ngatanan ini naglabog han labaw han ira kahuraan ha mga halad ha Dios; kondi ini nga kablas nga babaye nga balo ha iya kakablasan linabog han ngatanan nga iya pinakabuhian.”​—⁠Lukas 21:1-4.

19. Kay ano nga maopay nga usisahon utro an mga paagi nga ipinapakita naton an aton pagpasalamat?

¹⁹ Hinaot ini nga pag-aram kon paonan-o naton maipapakita nga kita mapasalamaton magpagios unta ha aton nga usisahon utro an mga paagi nga ipinapakita naton an aton pagpasalamat. Mahimo ba naton dugangan an aton halad han pagdayaw kan Jehova, sugad man an aton suporta ha bug-os-kalibotan nga buruhaton ha materyal nga paagi? Ha sukol nga mahihimo naton ito, makakasarig kita nga an aton mahinatagon, mahigugmaon nga Amay, hi Jehova, malilipay gud nga ipinapakita naton nga kita mapasalamaton.

Nahinunumdoman Mo Ba?

• Ano an mga hinungdan nga sadang kita magin mapasalamaton kan Jehova?

• Ano nga mga leksyon an mahibabaroan naton tikang ha ikanapulo, boluntaryo nga mga amot, ngan pamurot?

• Paonan-o naton mapapatubo an espiritu han pagpayunir?

• Paonan-o naton magagamit an aton “birilhon nga mga butang” ha pagpasalamat kan Jehova?

[Mga Pakiana]

[Mga Retrato ha pahina 15]

“An ngatanan nga maopay nga hatag ngan an ngatanan nga hingpit nga hatag tikang ha igbaw”

[Mga Retrato ha pahina 16]

Ano nga tulo nga leksyon tikang ha Balaud an ipinapakita dinhi?

[Mga Retrato ha pahina 18]

Ano nga mga halad an mahihimo naton?