Mga Pakiana Tikang ha mga Magbarasa

Ha ano nga paagi nagin “ngula” hi Esekiel, durante han paglikusi ngan pagkabungkag han Jerusalem?

Ha paagi nga waray na hiya naidugang pa ha matagnaon nga mensahe ni Jehova nga iya na iginpasamwak.

Gintikangan ni propeta Esekiel an iya pag-alagad sugad nga matinumanon nga magbarantay para ha mga bihag nga Israelita ha Babilonya han “ikalima ka tuig han kan hadi Jehoyatsin pagkabihag,” han 613 A.K.P. (Esekiel 1:​2, 3) Ha ikanapulo nga adlaw han ikanapulo nga lunar nga bulan han 609 A.K.P., ginpahibaro hiya pinaagi han paggiya han Dios mahitungod ha tinikangan han paglikos han mga taga-Babilonya ha Jerusalem. (Esekiel 24:​1, 2) Ano an magigin resulta han paglikos? Nakapalagiw ba an Jerusalem ngan an waray-pagtoo nga mga umurukoy hito? Sugad nga an magbarantay, iginpasamwak na ni Esekiel an matin-aw nga mensahe ni Jehova han kabungkagan, ngan diri na kinahanglan magdugang pa hi Esekiel hin bisan ano basi magin mas makakombinse an mensahe. Nagin ngula hi Esekiel may kalabotan ha bisan ano nga dugang pa nga impormasyon mahitungod han paglikos ha Jerusalem.​—⁠Esekiel 24:25-27.

Mga unom ka bulan katapos han pagkabungkag han Jerusalem han 607 A.K.P., usa nga nakapalagiw an nagdara hin sumat mahitungod ha pagkabinayaan han baraan nga siyudad ngadto kan Esekiel ha Babilonya. Ha gab-i antes umabot ito nga nakapalagiw, ‘ginnganga ni Jehova an baba ni Esekiel ngan diri na hiya ngula.’ (Esekiel 33:22) Dida hito natapos an pagkangula ni Esekiel.

Literal ba nga ngula hi Esekiel durante hito nga panahon? Matin-aw nga diri, kay bisan han nagin “ngula” na hiya, nanagna hiya para gud ha nakapalibot nga mga nasud nga nagrayhak ha kapukan han Jerusalem. (Esekiel, kapitulo 25-32) Temprano pa ha karera ni Esekiel sugad nga propeta ngan magbarantay, hi Jehova nagsiring na ha iya: “Akon hihimoon nga an imo dila dumulot dida ha langaglangag han imo baba, ngan ikaw mangula, ngan diri ha ira maparasaway; kay hira usa nga balay nga masukihon. Kondi kon ako magyakan ha imo, akon bubungaton an imo baba.” (Esekiel 3:​26, 27) Han waray mensahe hi Jehova para ha Israel, kinahanglan magpabilin nga ngula hi Esekiel may kalabotan hito nga nasud. Awtorisado la hi Esekiel pagyakan han karuyag ni Jehova nga iya ipasamwak ha panahon nga karuyag ni Jehova nga buhaton niya ito. An pagin ngula ni Esekiel nagpasabot nga ngula hiya may kalabotan ha mga pulong nga may matagnaon nga kahulogan ha mga Israelita.

An moderno nga magbarantay nga klase, an dinihogan nga mga Kristiano, nagpapahamangno na mahitungod ha kabungkagan han Kakristianohan, an antitipiko nga Jerusalem. Kon umatake na an “daku nga kagol-anan” ngan magbungkag han “Daku nga Babilonya,” an imperyo han palso nga relihiyon ha kalibotan, an dinihogan nga Esekiel nga klase diri na kinahanglan magyakan hin dugang pa mahitungod ha kataposan han Kakristianohan, nga nagkukompuwesto han daku nga bahin hito nga imperyo.​—⁠Mateo 24:21; Pahayag 17:​1, 2, 5.

Oo, maabot an adlaw nga an dinihogan nga nanhibilin ngan an ira mga kaupod magigin ngula, nga waray na dugang pa nga iyayakan ha Kakristianohan. Mahitatabo ito kon bungkagon ngan huboan na han “napulo nga mga sungay” ngan han “mananap” an Babilonya nga Daku. (Pahayag 17:16) Syempre, diri ini nangangahulogan nga literal nga magigin ngula an mga Kristiano. Sugad han ira ginbubuhat yana, magdadayaw hira kan Jehova ngan maghihisgot mahitungod ha iya kada adlaw ngan “ha ngatanan nga mga katulinan.”​—⁠Salmo 45:17; 145:2.