‘An Ira Tingog Nagsarang ha Bug-os nga Tuna’
‘An Ira Tingog Nagsarang ha Bug-os nga Tuna’
“Manhimo kamo hin mga tinon-an ha ngatanan nga mga nasud ngan pamaptisan hira ha ngaran han Amay, han Anak, ngan han espiritu santo.”—MATEO 28:19.
1, 2. (a) Ano nga sugo an iginhatag ni Jesus ha iya mga disipulo? (b) Kay ano nga daku hinduro an nahimo han siyahan-siglo nga mga Kristiano?
DIRI pa maiha antes hiya sumaka ngadto ha langit, hi Jesus naghatag hin usa nga sugo ha iya mga disipulo. Hiya nagsiring ha ira: “Manhimo kamo hin mga tinon-an ha ngatanan nga mga nasud ngan pamaptisan hira ha ngaran han Amay, han Anak, ngan han espiritu santo.” (Mateo 28:19) Daku gud ito nga buruhaton!
2 Hunahunaa la! Ha Pentekostes 33 K.P., mga 120 nga disipulo an nakakarawat han pagbubo han baraan nga espiritu ngan nagtikang pagtuman han sugo pinaagi han pagsumat ha iba nga hi Jesus an maiha na nga iginsaad nga Mesias, nga pinaagi ha iya makakarawat an kaluwasan. (Buhat 2:1-36) Paonan-o madadangat hiton gutiay nga grupo an mga tawo “ha ngatanan nga mga nasud”? Ha tawo diri gud ito mahihimo, kondi “ha Dios an ngatanan nga mga bagay mahihimo.” (Mateo 19:26) An siyahan nga mga Kristiano may-ada han bulig han baraan nga espiritu ni Jehova, ngan inabat nira an pagkaapurado. (Sakarias 4:6; 2 Timoteo 4:2) Salit, paglabay hin pipira la ka dekada, hi apostol Pablo makakasiring nga an maopay nga sumat iginpasamwak na “ha ngatanan nga mga binuhat ha ilarom han langit.”—Kolosas 1:23.
3. Ano an nagtabon ha putli nga Kristiano nga “trigo”?
3 Ha kadak-an han siyahan nga siglo, padayon nga nagsarang an totoo nga pagsingba. Kondi, hi Jesus nagtagna nga maabot an panahon nga hi Satanas magsasabwag hin ‘mga banwa’ ngan an totoo nga Kristiano nga “trigo” matatabonan ha sulod hin damu ka siglo tubtob ha panahon han pag-ani. Natuman ito nga tagna han magkamatay an mga apostol.—Mateo 13:24-39.
Madagmit nga Pag-uswag Yana
4, 5. Tikang han 1919, ano nga buruhaton an gintikangan han dinihogan nga mga Kristiano, ngan kay ano nga daku ito nga ayat?
4 Han 1919, panahon na nga ibulag an putli nga Kristiano nga trigo tikang ha mga banwa. Maaram an dinihogan nga mga Kristiano nga aplikado pa gihapon an daku nga sugo ni Jesus. Marig-on nga natoo hira nga nagkikinabuhi na hira ha “kataposan nga mga adlaw” ngan maaram hira han tagna ni Jesus: “Ini nga maopay nga sumat han ginhadian igwawali ha bug-os nga kalibotan ha pagpamatuod ha ngatanan nga mga nasud; ngan niyan an kataposan maabot.” (2 Timoteo 3:1; Mateo 24:14) Oo, maaram hira nga daku hinduro pa an pagbubuhaton.
5 Kondi, pariho han mga disipulo han 33 K.P., adton dinihogan nga mga Kristiano inatubang hin daku nga ayat. Pipira ka yukot la hira nga naukoy ha pipira la nga mga nasud. Paonan-o hira makakagsangyaw han maopay nga sumat “ha bug-os nga kalibotan”? Hinumdumi, an populasyon han tuna nag-uswag tikang ha bangin 300 ka milyon ha panahon han mga Cesar ngadto ha haros 2 ka bilyon katapos han siyahan nga girra ha kalibotan. Ngan ha bug-os nga ika-20 ka siglo, magpapadayon ito ha madagmit nga pag-uswag.
6. Ano nga pag-uswag an nahimo han pagpasarang han maopay nga sumat ha dekada han 1930?
6 Kondi, pariho han ira siyahan-siglo nga kabugtoan, gintikangan han dinihogan nga mga surugoon ni Jehova an buruhaton nga igintoka ha ira nga may bug-os nga pagtoo kan Jehova, ngan an iya espiritu nabulig ha ira. Ha kabutngaan han dekada han 1930, mga 56,000 nga ebanghelisador an nagpasamwak na han kamatuoran han Biblia ha 115 nga nasud. Daku na nga buruhaton an nahimo, kondi mas daku pa gud an nagpapabilin.
7. (a) Ano nga bag-o nga ayat an inatubang han dinihogan nga mga Kristiano? (b) Pinaagi han bulig han ‘iba nga mga karnero,’ paonan-o an pagtirok nga buruhaton nag-uuswag tubtob ha aton panahon?
7 Katapos, an mas hilarom nga pagsabot mahitungod ha pangirilal-an han “daku nga panon” nga gin-unabi ha Pahayag 7:9 (NW) naghatag hin usa ka bag-o nga ayat ngan nagsaad liwat hin bulig ha magduruto nga mga Kristiano. An diri-maihap nga panon han ‘iba nga mga karnero,’ nga mga tumuroo nga may-ada tunan-on nga paglaom, kinahanglan tirukon “tikang ha tagsatagsa nga nasud ngan ha ngatanan nga mga panon, ngan mga katawohan ngan mga yinaknan.” (Juan 10:16) Hira ‘maghahatag kan Jehova hin baraan nga pag-alagad ha adlaw ngan gab-i.’ (Pahayag 7:15, NW) Nangangahulogan ito nga mabulig hira ha pagsangyaw ngan pagtutdo nga buruhaton. (Isaias 61:5) Sugad nga resulta, an dinihogan nga mga Kristiano nalipay ha pagkita ha kadamu han mga ebanghelisador nga nag-uuswag ngadto ha napuplo ka yukot ngan katapos, ngadto ha minilyon. Han tuig 2003, usa ka bag-o nga pungkay nga 6,429,351 an nakigbahin ha pagsangyaw nga buruhaton—an kadam-an ha ira mga kaapi han daku nga panon. a An dinihogan nga mga Kristiano mapasalamaton hini nga bulig, ngan an iba nga mga karnero mapasalamaton ha pribilehiyo han pagbulig ha ira dinihogan nga kabugtoan.—Mateo 25:34-40.
8. Paonan-o ginios an mga Saksi ni Jehova ha sobra nga pag-ipit nga nahitabo durante han ikaduha nga girra ha kalibotan?
8 Han nakita utro an trigo nga klase, hi Satanas nakig-away hinduro hito. (Pahayag 12:17) Ano an iya reaksyon han nagtikang makita an daku nga panon? Hiya nagin sobra kamadarahog! Magruruhaduha ba kita nga hiya an nag-aghat han bug-os-kalibotan nga pag-atake ha totoo nga pagsingba nga nahitabo durante han ikaduha nga girra ha kalibotan? An mga Kristiano nag-antos han pag-ipit han magkontra nga grupo hiton nga girra. Damu nga kabugtoan an nag-antos hin duro nga mga kakurian, an iba namatay tungod han ira pagtoo. Ha gihapon, pariho an ira pagbati ha ginsiring han salmista: “Ha Dios pagdadayawon ko an iya pulong, ha Dios ibinutang ko an akon pagsarig, diri ako mahahadlok; ano an mahihimo ha akon han unod?” (Salmo 56:4; Mateo 10:28) An dinihogan nga mga Kristiano ngan an iba nga mga karnero, nga naparig-on han espiritu ni Jehova, magkaupod nga nagpabilin nga marig-on. (2 Korinto 4:7) Sugad nga resulta, “an pulong han Dios tinubo.” (Buhat 6:7) Han 1939, han binuto an girra, 72,475 nga matinumanon nga mga Kristiano an nagreport nga nakikigbahin ha pagsangyaw nga buruhaton. Kondi, an diri-kompleto nga report para han 1945, an tuig nga natapos an girra, nagpakita nga 156,299 nga aktibo nga mga Saksi an nagpapasamwak han maopay nga sumat. Kapirdihan gud ito para kan Satanas!
9. Ano nga bag-o nga mga eskwelahan an iginpahibaro durante han Girra ha Kalibotan II?
9 Matin-aw, an kasamok han ikaduha nga girra ha kalibotan waray makaaghat ha mga surugoon ni Jehova nga magruhaduha nga matutuman an pagsangyaw nga buruhaton. Oo, han 1943, han duro na gud an girra, iginpahibaro an duha nga eskwelahan. An usa, nga tinatawag yana nga Teokratiko nga Eskwelahan ha Ministeryo, pagdudumarahon ha ngatanan nga mga kongregasyon basi bansayon an indibiduwal nga mga Saksi ha pagsangyaw ngan paghimo hin mga disipulo. An usa pa, an Watchtower Bible School of Gilead, gindisenyo ha pagbansay ha mga misyonero nga magpapauswag han pagsangyaw nga buruhaton ha langyaw nga mga nasud. Oo, han natapos an girra, an totoo nga mga Kristiano andam na para ha dugang nga buruhaton.
10. Paonan-o nakita an kadasig han katawohan ni Jehova durante han 2003?
10 Ngan urusahon gud nga buruhaton an ira nahimo! Tungod kay nabansay ha Teokratiko nga Eskwelahan ha Ministeryo, an ngatanan—batan-on ngan lagas, mga ginikanan ngan mga anak, bisan an masakiton—nakigbahin ngan padayon nga nakikigbahin ha pagtuman han daku nga sugo ni Jesus. (Salmo 148:12, 13; Joel 2:28, 29) Han tuig 2003, ha aberids kada bulan, 825,185 an nagpakita han ira pag-abat hin pagkaapurado pinaagi han ira pakigbahin, temporaryo man o padayon, ha payunir nga pag-alagad. Hiton liwat nga tuig, an mga Saksi ni Jehova naggasto hin 1,234,796,477 ka oras ha pakiistorya ha iba mahitungod han maopay nga sumat han Ginhadian. Sigurado nga nalilipay hi Jehova ha kadasig han iya katawohan!
Ha Langyaw nga Kanataran
11, 12. Ano nga mga ehemplo an nagpapakita han maopay nga rekord han mga misyonero?
11 Ha paglabay han mga tuig, an mga naggradwar ha Gilead ngan, an mas bag-o la nga mga naggradwar ha Ministerial Training School nakahimo hin maopay nga rekord. Ha Brazil, pananglitan, may-ada mas gutiay pa ha 400 nga magwarali han an siyahan nga mga misyonero inabot han 1945. Ini nga mga misyonero ngan an sinunod pa ha ira maduruto nga nagbuhat kaupod han ira madasigon nga kabugtoan nga taga-Brazil, ngan hura nga ginbendisyonan ni Jehova an ira mga pangalimbasog. Makalilipay gud para ha bisan hin-o nga nahinunumdom hiton naglabay nga panahon nga makita nga nagreport an Brazil hin bag-o nga pungkay nga 607,362 han 2003!
12 Tagda an Japan. Antes han ikaduha nga girra ha kalibotan, mga usa ka gatos la an magwarali han Ginhadian hiton nga nasud. Durante han girra, tungod han madarahog nga pagtimaraot nag-iban an kadamu han mga magwarali, ngan ha kataposan han girra, pipira la nga mga Saksi an buhi pa gihapon ha espirituwal ngan ha pisikal. (Proberbios 14:32) Iton gutiay nga makatirigamnan nga mga magtiripig han integridad sigurado nga nalipay han 1949 ha pagkarawat han siyahan nga 13 nga nabansay ha Gilead nga mga misyonero, ngan ginhigugma dayon han mga misyonero an ira madasigon, maabiabihon nga kabugtoan nga mga Hapon. Paglabay hin 50 ka tuig, han tuig 2003, an Japan nagreport hin pungkay nga 217,508 nga magwarali! Hura gud nga ginbibendisyonan ni Jehova an iya katawohan hiton nga nasud. May-ada pariho nga mga report tikang ha damu nga iba nga mga nasud. Adton nakakasangyaw ha langyaw nga mga teritoryo nakabulig hin daku ha pagpasarang han maopay nga sumat, salit han 2003 hinbatian ito ha 235 nga nasud, mga isla, ngan mga teritoryo ha bug-os nga kalibotan. Oo, an daku nga panon nagkakagawas tikang ha ‘ngatanan nga mga nasud.’
‘Tikang ha Ngatanan nga Panon Ngan Katawohan Ngan Yinaknan’
13, 14. Ha ano nga paagi ipinakita ni Jehova an bili han pagsangyaw han maopay nga sumat ha ‘ngatanan nga mga yinaknan’?
13 An siyahan nga iginsumat nga milagro katapos dihogan han baraan nga espiritu an mga disipulo ha Pentekostes 33 K.P. amo an ira pagyakan hin mga yinaknan nga nasasabtan han nagkakatirok nga damu nga mga tawo. An ngatanan nga nakabati ha ira bangin nagyayakan hin yinaknan nga ginamit ha damu nga mga nasud, bangin Griego. Tungod kay hira “mag-inampoon,” posible nga nasabtan liwat nira an Hebreo nga mga sermon ha templo. Kondi nadani an ira atensyon han hinbatian nira an maopay nga sumat ha yinaknan nga ira hinbaroan tikang ha ira pagkabata.—Buhat 2:5, 7-12.
14 Yana, damu liwat nga mga yinaknan an ginagamit ha pagsangyaw nga buruhaton. An daku nga panon igintagna nga magawas diri la tikang ha mga nasud kondi liwat ha “mga panon ngan mga katawohan ngan mga yinaknan.” Uyon hini, hi Jehova nagtagna pinaagi kan Sakarias: “An napulo ka tawo tikang ha ngatanan nga yinaknan han mga nasud magunit, hira magunit ha saya niya nga usa nga Judio, ha pagsiring: Kami maupod ha iyo, kay kami nakabati nga an Dios aada kaupod niyo.” (Sakarias 8:23) Bisan kon an mga Saksi ni Jehova waray na regalo nga magyakan hin mga yinaknan, maaram hira han bili han pagtutdo nga ginagamit an mga yinaknan han mga tawo.
15, 16. Paonan-o nalamposan han mga misyonero ngan iba pa an ayat han pagsangyaw ha lokal nga mga yinaknan?
15 Totoo, pipira la nga yinaknan an kaylap nga ginagamit yana, sugad han Ingles, Franses, ngan Espanyol. Kondi, adton binaya ha ira nasud nga natawohan basi mag-alagad ha iba nga mga nasud nangangalimbasog nga mahibaro han lokal nga mga yinaknan basi makadangat an maopay nga sumat ha mas damu nga “husto nga nakahilig ha kinabuhi nga waray kataposan.” (Buhat 13:48, NW) Makuri gud ito. Han an kabugtoan ha nasud han Tuvalu ha Sur Pasipiko nagkinahanglan hin mga publikasyon ha ira kalugaringon nga yinaknan, usa han mga misyonero an nagkarawat hito nga ayat. Tungod kay waray diksyonaryo nga magagamit, nagtikang hiya maghimo hin diksyonaryo han mga pulong nga Tuvaluan. Inabot an panahon, an libro nga Mahimo Ka Mabuhi ha Waray Kataposan ha Paraiso ha Tuna b iginpublikar ha Tuvaluan nga yinaknan. Han inabot an mga misyonero ha Curaçao, waray literatura nga iginbasar ha Biblia ngan waray diksyonaryo ha lokal nga yinaknan nga Papiamento. Duro liwat an diri-pag-uruyon ha kon paonan-o sadang isurat an yinaknan. Bisan pa hini nga mga kakurian, duha ka tuig tikang han pag-abot han siyahan nga mga misyonero, iginpublikar hito nga yinaknan an siyahan nga Kristiano nga tract ha Biblia. Yana, usa an Papiamento ha 133 nga yinaknan diin iginpupublikar An Barantayan nga dungan ha Ingles.
16 Ha Namibia an siyahan nga mga misyonero waray makaagi hin lokal nga Saksi nga mabulig ha ira ha paghubad. Dugang pa, an usa nga lokal nga yinaknan, nga Nama, kulang hin mga pulong nga komon nga ginagamit ha aton mga publikasyon, sugad han “hingpit.” Usa nga misyonero an nagsumat: “Para ha paghubad kasagaran nga ginamit ko an mga magturutdo ha eskwelahan nga nag-aaram ha Biblia. Tungod kay gutiay la an ira kahibaro ha kamatuoran, kinahanglan pag-iristoryahan namon ito hin maopay basi masiguro nga husto an paghubad.” Bisan pa hito, an tract nga Kinabuhi ha Bag-o nga Kalibotan ha urhi iginhubad ha upat nga yinaknan nga Namibiano. Yana, An Barantayan regular nga iginpupublikar ha Kwanyama ngan Ndonga.
17, 18. Ano nga mga ayat an gindudumara ha Mexico ngan ha iba nga mga nasud?
17 Ha Mexico, Kinatsila an nangunguna nga yinaknan. Kondi, antes umabot an mga Espanyol, damu nga yinaknan an ginyayakan didto, ngan damu an ginagamit pa yana. Salit, an mga literatura han mga Saksi ni Jehova ginhihimo na yana ha pito nga Mexicano nga yinaknan ngan ha Mexicano liwat nga Sign Language. An Maya nga Ministeryo ha Ginhadian amo an siyahan nga may petsa nga publikasyon ha Amerikano-Indian nga yinaknan. Oo, pipira ka yukot nga Maya, mga Aztec, ngan iba pa an bahin han 572,530 nga magwarali han Ginhadian ha Mexico.
18 Ha bag-o la nga mga panahon, damu nga mga tawo an pinalagiw ngadto ha langyaw nga mga nasud sugad nga mga dinangop, o binalhin hira tungod han pangabuhi. Sugad nga resulta, ha siyahan nga panahon, damu nga mga nasud yana an may-ada daku nga kanataran nga langyaw an yinaknan. Ginkarawat han mga Saksi ni Jehova ito nga ayat. Ha Italya, pananglitan, may-ada mga kongregasyon ngan mga grupo ha 22 nga yinaknan gawas pa han Italyano. Basi mabuligan an kabugtoan nga magsangyaw ha mga tawo nga nagyayakan hin iba nga mga yinaknan, bag-o la nga gin-organisa an mga klase ha pagtutdo hin 16 nga yinaknan, upod na an Italyano nga Sign Language. Ha damu nga iba pa nga mga nasud, an mga Saksi ni Jehova naghihimo hin pariho hito nga mga pangalimbasog basi madangat an dayo nga mga tawo. Oo, pinaagi han bulig ni Jehova, an daku nga panon tinuod nga nagawas tikang ha damu hinduro nga mga grupo han yinaknan.
“Ha Bug-os nga Tuna”
19, 20. Ano nga mga pulong ni Pablo an natutuman yana ha makatirigamnan nga paagi? Isaysay.
19 Ha siyahan nga siglo, hi apostol Pablo nagsurat: “Waray ba hira makabati? Matuod gud, an dungog [“tingog,” NW] nira nagsarang ha bug-os nga tuna, ngan an ira mga pulong ngadto ha mga kataposan han kalibotan.” (Roma 10:18) Kon totoo ito ha siyahan nga siglo, totoo ito labi na gud ha aton panahon! Minilyon—bangin sobra pa kay ha bisan san-o nga naglabay nga panahon ha kasaysayan—an nasiring: “Pagbibendisyonan ko hi Jehova ha ngatanan nga takna: an iya pagdayaw mamaada ha akon baba ha dayoday.”—Salmo 34:1.
20 Dugang pa, an buruhaton diri naghihinay. Padayon nga nag-uuswag an kadamu han mga magwarali han Ginhadian. Nagtitikadamu nga panahon an ginagasto ha pagsangyaw nga buruhaton. Minilyon nga mga pagbalik bisita ngan ginatos ka yukot nga mga pag-aram ha Biblia an gindudumara. Ngan an mga bag-ohan padayon nga nagigin interesado. Ha naglabay nga tuig, usa ka bag-o nga pungkay nga 16,097,622 an tinambong ha pagsaurog han Memoryal han kamatayon ni Jesus. Matin-aw, daku pa an pagbubuhaton. Hinaot magpadayon kita ha pagsubad han marig-on nga integridad han aton kabugtoan nga nag-ilob han duro nga pagtimaraot. Ngan hinaot ipakita naton an kadasig han ngatanan naton nga kabugtoan nga tikang han 1919 nagsasakripisyo ha pag-alagad kan Jehova. Hinaot an ngatanan magpadayon ha pagbaton ha koro han salmista: “An ngatanan nga may-ada gininhawa magdayaw kan Jehova. Pagdayawa niyo hi Jehova”!—Salmo 150:6.
[Mga footnote]
a Kitaa an tinuig nga report ha pahina 18 tubtob 21 hini nga magasin.
b Iginpublikar han mga Saksi ni Jehova.
Maisasaysay Mo Ba?
• Ano nga buruhaton an gintikangan han kabugtoan han 1919, ngan kay ano nga usa ito nga ayat?
• Hin-o an gintirok ha pagbulig ha pagsangyaw nga buruhaton?
• Ano nga rekord an natirok han mga misyonero ngan iba pa nga nag-aalagad ha langyaw nga mga nasud?
• Ano nga ebidensya an maihahatag mo ha pagpakita nga ginbibendisyonan ni Jehova an buruhaton han iya katawohan yana?
[Mga Pakiana]
[Tsart ha pahina 18-21]
2003 TUIG HAN PAG-ALAGAD NGA REPORT HAN MGA SAKSI NI JEHOVA HA BUG-OS KALIBOTAN
(Kitaan an bound volume)
[Mga Retrato ha pahina 14, 15]
An kasamok han ikaduha nga girra ha kalibotan waray makaaghat ha mga Kristiano nga magruhaduha nga isasangyaw an maopay nga sumat
[Ginkuhaan han Retrato]
Pagbuto: Retrato han U.S. Navy; iba pa: Retrato han U.S. Coast Guard
[Mga Retrato ha pahina 17]
An daku nga panon magawas tikang ha ngatanan nga panon ngan yinaknan