Hatagi an Dios hin Himaya, Diri an Tawo

HA NAGLABAY pa la nga mga bulan, an mga mahigugmaon ha katadongan ha bug-os nga kalibotan nahibaro ha paghimaya ha Dios han magkatirok hira ha “Hatagi an Dios hin Himaya” Distrito nga mga Kombensyon han mga Saksi ni Jehova. Aton repasuhon an edukasyonal nga programa nga iginpresenta didto.

An basado-ha-Biblia nga programa inabot hin tulo nga sunod-sunod nga mga adlaw para ha kadam-an nga mga kombensyonista ngan upat ka adlaw para hadton nakatambong ha espesyal nga internasyonal nga mga kombensyon. Ha kabug-osan, an mga tinambong nakabati hin sobra 30 nga Kasuratanhon nga mga bahin, upod na an mga pahayag nga nagpahilarom han espirituwal nga apresasyon han mga mamarati, mga eksperyensya nga nagparig-on han ira pagtoo, mga pasundayag nga nagpabug-at han praktikal nga paggamit han mga prinsipyo ha Biblia, ngan usa nga naka-costume nga drama nga naghulagway han mga kakurian nga gin-atubang han siyahan-siglo nga mga Kristiano. Kon nakatambong ka ha usa han mga kombensyon, kay ano nga diri repasuhon an imo mga nota samtang binabasa mo ini nga artikulo? Sigurado kami nga magpapahinumdom ito han makalilipay nga mga hitabo ha usa nga hura nga espirituwal nga piyesta ngan makakagtutdo liwat.

Tema han Siyahan nga Adlaw: ‘Takos Ka, Jehova, nga Kumarawat han Himaya’

Katapos han siyahan nga kanta ngan pag-ampo, malipayon nga gin-abiabi han siyahan nga mamumulong an ngatanan nga tinambong pinaagi han pahayag nga nakasentro ha nangunguna nga hinungdan han kombensyon: “Nagkakatirok Basi Paghimayaon an Dios.” Pinaagi ha pagkotar han Pahayag 4:11, ginpabug-atan han mamumulong an kabug-osan nga tema han kombensyon. Iginsaysay dayon niya kon ano an kahulogan han paghatag ha Dios hin himaya. Pinaagi han paggamit han libro nga Mga Salmo, iya ginpabug-atan nga an paghimaya ha Dios nag-uupod han “pagsingba,” “pagpasalamat,” ngan “pagdayaw.”—Salmo 95:6; 100:4, 5; 111:1, 2.

An ulohan han sunod nga bahin amo an “Binendisyonan Adton Naghihimaya ha Dios.” Usa ka makapainteres nga obserbasyon an ginhimo han mamumulong. Tungod kay sobra unom ka milyon han mga Saksi ni Jehova an aada ha 234 nga nasud ha bug-os nga kalibotan, masisiring nga an adlaw sugad hin diri gud natutunod para hadton naghihimaya kan Jehova. (Pahayag 7:15) An interbyu ha pipira nga Kristiano nga kabugtoan nga aada ha espesyal nga bug-os-panahon nga pag-alagad inapresyar gud nga sangkap hini nga bahin nga nakabantad ha mga kasingkasing han mga mamarati.

“An mga Linarang Nagpapahayag han Himaya han Dios” amo an sunod nga pahayag. Bisan kon diri nagyayakan, an literal nga mga langit nagpapasidungog ha pagkaharangdon han Dios ngan  nabulig ha aton nga maghilarom an aton apresasyon ha iya mahigugmaon nga pagmangno. Detalyado gud nga iginsaysay ini.—Isaias 40:26.

An pagtimaraot, pagkontra, kalibotanon nga mga impluwensya, ngan makasasala nga mga hilig nagsasari ha integridad han totoo nga mga Kristiano. Tungod hito, an pahayag nga “Lakat ha Dalan han Integridad” takos han bug-os nga atensyon han mamarati. Sumunod an bersikulo-por-bersikulo nga paghisgot han Salmo 26, ngan an mga interbyu ha usa nga estudyante pa nga Saksi nga nagin marig-on ha moralidad ngan ha usa pa nga sobra an paggamit hin panahon ha diri maopay nga kaliawan kondi naghimo hin mga paagi basi malamposan an problema.

An keynote address nga, “An Mahimayaon Ngan Matagnaon nga mga Bisyon Nagpapagios ha Aton!” nagtapos han programa ha aga. Gin-unabi han mamumulong an mga susbaranan ni propeta Daniel ngan nira apostol Juan ngan Pedro sugad nga may-ada pagtoo nga ginpagios han mahimayaon ngan matagnaon nga mga bisyon mahitungod ha katukod ngan paggios han Mesianiko nga Ginhadian han Dios. May kalabotan ha bisan hin-o nga bangin nahingangalimot na ha matin-aw nga pamatuod nga iini na kita ha panahon han kataposan, an mamumulong nagsiring: “Naglalaom gud kita nga isisentro utro han sugad nga mga tawo an ira atensyon ha pagkatotoo han presensya ni Kristo ha himaya han Ginhadian ngan mabuligan hira nga magin makusog utro ha espirituwal.”

An programa ha kulop nagtikang pinaagi han usa nga pahayag nga may ulohan nga “An Himaya ni Jehova Iginpapahayag ha mga Mapainubsanon.” Iginsaysay han mamumulong kon paonan-o nagpapakita hi Jehova han susbaranan han pagpaubos, bisan kon hiya an gihitaasi nga Persona ha uniberso. (Salmo 18:35) Inuuyonan ni Jehova adton totoo nga mapainubsanon, kondi nakontra hiya hadton nagpapaubos la kon nakikig-upod ha ira mga kasangkayan o ha mga mas labaw ha ira kondi mapintas magtrato ha ira nasasakopan.—Salmo 138:6.

Sunod, an tagna ha Biblia iginsaysay ha usa nga simposyum nga nagpapatin-aw han magkalainlain nga mga bahin han nangunguna nga tema: “An Tagna ni Amos—An Mensahe Hito Para ha Aton Panahon.” Ha pag-unabi han susbaranan ni Amos, gindani han siyahan nga mamumulong an atensyon ngada ha aton responsabilidad ha pagpahamangno ha mga tawo mahitungod han tiarabot nga paghukom ni Jehova. An tema han iya pahayag amo an “Igyakan an Pulong han Dios nga May Kaisog.” An ikaduha nga mamumulong nagbangon han pakiana: “Tatapuson pa ba ni Jehova an karaotan ngan pag-antos dinhi hini nga tuna?” An iya ulohan nga “Paghukom han Dios Kontra ha Magraot,” nagpakita nga an paghukom han Dios pirme nga may hustisya, diri malilikyan, ngan may pinipili. An kataposan nga mamumulong han simposyum nagpatin-aw han tema nga “Hi Jehova Nag-uusisa han Kasingkasing.” Adton naghihingyap nga lipayon hi Jehova kinahanglan mamati ha mga pulong ha Amos 5:15: “Dumti an maraot, ngan higugmaa an maopay.”

An de-alkohol nga mga irinmon, sugad han alaksiw nga nagpapalipay ha kasingkasing, mahimo abusuhon. Ha iya pahayag nga “Likayi an Lit-ag han Pag-abuso ha Irinmon nga de-Alkohol,” gin-usa-usa han mamumulong an mga peligro ha pisikal ngan espirituwal han diri-kasadangan nga paggamit han irinmon nga de-alkohol, bisan kon diri nahuhubog an tawo. Naghatag hiya hin usa nga naggigiya nga prinsipyo: Tungod kay ibaiba an kapasidad han kada tagsa nga tawo ha pag-inom hin irinmon nga de-alkohol nga diri nahuhubog, an anoman nga kadamu nga nakakadaot han imo “praktikal nga kinaadman ngan abilidad ha paghunahuna” sobra na para ha imo.—Proberbios 3:21, 22, NW.

Tungod kay nagkikinabuhi kita ha peligroso nga mga panahon, an sunod nga tema, “Hi Jehova, an Aton ‘Arayopan ha mga Panahon han Kasakitan,’ ” nakaliaw gud ha mga mamarati. An pag-ampo, baraan nga espiritu, ngan an mga igkasi-Kristiano makakabulig ha aton nga maglampos.

An kataposan nga pahayag han adlaw, “An ‘Maopay nga Tuna’—Abanse nga Pagpakita han Paraiso,” nagtapos pinaagi han makalilipay nga surprisa para ha ngatanan—usa ka bag-o nga publikasyon nga may-ada damu nga mga mapa han Biblia! May-ada ito ulohan nga See the Good Land.

Tema han Ikaduha nga Adlaw: “Igsumat an Iya Himaya ha mga Nasud”

Katapos paghisgotan an inadlaw nga teksto, iginpresenta an ikaduha nga simposyum han kombensyon, nga may-ada tema nga ‘Ighayag Pariho hin Espiho an Himaya ni Jehova.’ An siyahan nga bahin nagsaysay han “Pinaagi han Pagpasamwak han Maopay nga Sumat ha Bisan Diin” ngan nag-upod hin mga pasundayag han aktuwal nga nahitabo ha mga eksperyensya ha pag-alagad ha kanataran. An ikaduha nga bahin nagkaada usa nga pasundayag han pagbalik bisita samtang iginpipresenta han mamumulong  an tema nga “Pinaagi han Pagkuha han Tabon Tikang ha mga Ginbutahan.” An kataposan nga pahayag han simposyum, nga may-ada ulohan nga “Pinaagi han Bug-os nga Pagbuhat hito ha Aton Ministeryo,” ginpabug-atan pinaagi han makapainteres nga mga interbyu may kalabotan ha mga eksperyensya ha kanataran.

An sunod nga bahin han programa may-ada ulohan nga “Kinangangalasan nga Waray Hinungdan.” Nag-upod ito hin makapadasig nga mga interbyu ha matinumanon nga mga indibiduwal nga pinaagi han kusog han Dios nagtipig han integridad ilarom han pagkontra.

Usa nga ginpapamulat gud nga bahin han mga kombensyon amo an pahayag ha bawtismo nga susundan han bug-os nga pagpailarom ha tubig han ngatanan nga kuwalipikado nga mga kandidato. An bawtismo ha tubig nagsisimbolo han bug-os nga dedikasyon han usa ka tawo ngadto kan Jehova. Salit, angayan hinduro an tema: “An Pagkinabuhi Uyon ha Aton Dedikasyon Naghihimaya ha Dios.”

 An programa ha kulop nagtikang pinaagi han pahayag nga nag-aaghat hin pag-usisa-ha-kalugaringon, “Pagpatubo han Sugad-Kristo nga Panhunahuna Mahitungod han Kabantogan.” Gin-unabi han mamumulong inin makapainteres nga punto: An kabantogan nagtitikang ha pagsubad han pagpaubos ni Kristo. Salit, an usa nga Kristiano diri sadang maghingyap hin awtoridad basi matagbaw an iya personal nga ambisyon. Sadang niya pakianhan an iya kalugaringon, ‘Disidido ba ako magbuhat hin mapulsanon nga mga buruhaton nga diri dayon hibabaroan han iba?’

Kinakapoy ka ba? Syempre, oo. An pahayag nga “Kinakapoy Kondi Diri Nanluluya” gin-apresyar han ngatanan. Ipinakita han mga interbyu ha mag-iha na nga mga Saksi nga mahimo kita ‘pakusgon ni Jehova pinaagi han iya espiritu.’—Efeso 3:16.

An pagkamahinatagon usa nga kalidad nga waray naton mapanunod tikang ha katawo kondi kinahanglan hibaroan. Inin importante nga punto ginpabug-atan ha bahin nga “Magin Mahinatagon, Andam ha Pagpaangbit.” Ngan iginbangon inin makapaaghat-ha-paghunahuna nga pakiana: “Andam ba kita ha pagpaangbit hin pipira ka minutos han aton adlaw upod han kabugtoan nga mga lagas, magsakit, naguguol, o namimingaw?”

An pahayag nga “Magbantay ha ‘Tingog han mga Dumuruong’ ” nakadani han atensyon han mga mamarati. Iginpariho hini nga pahayag an mga sumurunod ni Jesus ha mga karnero nga namamati la ha iya tingog sugad nga “an maopay nga paramangno” ngan diri namamati ha ‘tingog han mga dumuruong’ nga nagyayakan pinaagi han damu nga mga ahensya han tawo nga naimpluwensyahan han Yawa.—Juan 10:5, 14, 27.

An usa nga koro kinahanglan durungan nga magkanta basi hisabtan an mga pulong han kanta. Basi himayaon an Dios, an totoo nga mga magsiringba ha bug-os nga kalibotan kinahanglan magkaurosa. Tungod hito, an “Himayaa an Dios Pinaagi han ‘Usa nga Baba’ ” naghatag hin mapulsanon nga instruksyon mahitungod ha kon paonan-o kita ngatanan makakayakan han usa nga “putli nga yinaknan’ ” ngan mag-alagad kan Jehova nga “nagbibinuligay.”—Sepania 3:9, NW.

An mga kag-anak, labi na adton may-ada kabataan pa nga mga anak, nalipay gud ha ultimo nga pahayag han adlaw, “An Aton mga Anak—Presyoso nga Panurundon.” Iginpagowa an usa ka bag-o nga 256-pahina nga publikasyon, nga nagin makalilipay nga surprisa ha mga mamarati. An Mahibaro Tikang ha Bantogan nga Magturutdo usa nga libro nga mabulig ha mga kag-anak ha paggasto hin may balos ha espirituwal nga panahon ha ira mga anak, an regalo han Dios ha ira.

Tema han Ikatulo nga Adlaw: ‘Buhata an Ngatanan nga mga Butang Para ha Himaya han Dios’

Gintikangan han mga pahinumdom han inadlaw nga teksto an ultimo nga adlaw han kombensyon pinaagi han espirituwal nga mga punto. An siyahan nga bahin han programa hini nga adlaw naghatag hin dugang nga pagpabug-at ha kahikayan han pamilya. An siyahan nga pahayag, “Mga Ginikanan, Parig-ona an Iyo Pamilya,” nag-andam han hunahuna han mga mamarati. Katapos repasuhon an mga responsabilidad han mga kag-anak ha pagtagana hin materyal nga mga panginahanglan  ha ira pamilya, ginpamatud-an han mamumulong nga an siyahan nga responsabilidad han mga kag-anak amo an pagtagana han espirituwal nga mga panginahanglan han ira mga anak.

An sumunod nga mamumulong nagdirekta han iya pahayag ha kabataan ngan nag-usisa han tema nga “Kon Paonan-o Gindadayaw han mga Batan-on hi Jehova.” Hiya nagsiring nga an mga batan-on pariho hin mga “tun-og” tungod kay damu hira ngan an ira batan-on nga kadasig nakakarepresko. Nalilipay an mga adulto nga makaupod hira ha pag-alagad kan Jehova. (Salmo 110:3) Ini nga bahin may-ada makaruruyag nga mga interbyu ha susbaranan nga mga batan-on.

An mga drama ha Biblia nga an mga tawohan naka-costume usa pirme nga makalilipay nga bahin han distrito nga mga kombensyon, ngan ini nga kombensyon may-ada liwat sugad nga drama. An drama nga “Maisugon nga Nagpapamatuod Bisan Pa han Pagkontra” naghulagway han siyahan-siglo nga mga sumurunod ni Kristo. Diri la ito nakakaliaw kondi, labaw nga importante, nakakagtutdo. An pahayag nga sumunod ha drama nga, “ ‘Waray Ukoy’ nga Ipahayag an Maopay nga Sumat,” nagpabug-at han mga punto han drama.

An ngatanan nga tinambong nagpamulat han usa nga importante nga bahin han programa han Domingo, an pahayag publiko, “Hin-o an Naghihimaya ha Dios Yana?” An mamumulong naghatag hin totoo nga pamatuod kon paonan-o an syensya ngan relihiyon ha kabug-osan waray maghimaya ha Dios. An mga tawo la nga gintatawag ha iya ngaran, adton nagsasangyaw ngan nagtututdo han kamatuoran mahitungod kan Jehova, an totoo nga naghihimaya han iya ngaran yana.

An pahayag publiko ginsundan han sumaryo han leksyon ha magasin nga Barantayan para hito nga semana. Katapos, an ultimo nga pahayag nga, “ ‘Magpadayon Kamo ha Pamunga hin Damu’ Para ha Himaya ni Jehova.” An mamumulong nagpresenta hin usa nga resolusyon nga may napulo nga punto basi karawaton han ngatanan nga tinambong. Nakasentro ito ha magkalainlain nga mga paagi nga maihahatag an himaya ngadto kan Jehova, an Maglalarang. An nagkakaurosa nga “Oo” hinbatian ha ngatanan nga mga kombensyon ha bug-os nga kalibotan.

Hito nga paagi natapos an kombensyon nga an tagsa nga tinambong nakasentro ha tema nga “Hatagi an Dios hin Himaya.” Ngan pinaagi han bulig han espiritu ni Jehova ngan han nakikita nga bahin han iya organisasyon, hinaot mangalimbasog kita pirme nga ihatag ha Dios an himaya ngan diri ha mga tawo.

[Kahon/Mga Retrato ha pahina 23]

Internasyonal nga mga Kombensyon

An upat ka adlaw an kahilawig nga internasyonal nga mga kombensyon gindumara ha Aprika, Asia, Australia, Europa, ngan Amerika del Norte ngan del Sur. An igintoka nga mga Saksi tikang ha magkalainlain nga dapit han kalibotan gindapit nga magin mga delegado dida hini nga mga katirok. Hini nga paagi nagkaada hin “pagbalyoay hin pagdasig” butnga han mga bisita ngan han mga nag-abiabi ha ira. (Roma 1:12, NW) Nagkirita-utro an mga magkiriglala hadto, ngan nagkaada hin bag-o nga mga kakilala. Usa nga espesyal nga bahin han internasyonal nga mga kombensyon amo an programa nga may ulohan nga “Mga Report Tikang ha Iba nga mga Nasud.”

[Kahon/Mga Retrato ha pahina 25]

Bag-o nga mga Publikasyon nga Naghahatag hin Himaya ha Dios

Duha nga bag-o nga mga publikasyon an iginpagowa ha “Hatagi an Dios hin Himaya” Distrito nga mga Kombensyon. An atlas han Biblia nga See the Good Land may-ada marig-on nga kobre ngan 36-pahina nga mga mapa ngan mga retrato han mga lugar ha Biblia. De-kolor an kada pahina ngan may-ada mga mapa han mga imperyo han Asirya, Babilonya, Medo-Persia, Gresya, ngan Roma. May-ada bulag nga mga mapa nga nagkukobre ha ministeryo ni Jesus ngan ha pag-uswag han Kristianidad.

An Mahibaro Tikang ha Bantogan nga Magturutdo usa nga 256-pahina nga libro nga may-ada mga 230 nga retrato. Damu nga makalilipay nga mga sesyon an mahihimo upod an kabataan pinaagi la ha pagkinita ha mga retrato ngan pagbaton ha makapaaghat-ha-hunahuna nga mga pakiana nga aada ha libro. Inin bag-o nga publikasyon gindisenyo ha pagsagang han pag-atake ni Satanas ha aton kabataan, nga an tumong amo an pagdaot han ira moralidad.

[Retrato ha pahina 23]

An mga misyonero nagsumat hin makaparig-on-ha-pagtoo nga mga eksperyensya

[Mga Retrato ha pahina 24]

An bawtismo usa nga importante nga bahin han “Hatagi an Dios hin Himaya” nga mga kombensyon

[Mga Retrato ha pahina 24]

An mga drama ha Biblia naruruyagan han mga batan-on ngan mga lagas