“An Taran-awon Hini nga Kalibotan Nagbabag-o”

“Isiniring ko ini ha iyo, mga kabugtoan, nga an panahon [“nga nahibibilin,” NW] ginpahalipot.”—1 KORINTO 7:29.

1, 2. Ano nga mga pagbag-o an nakikita mo ha imo panahon?

 ANO nga mga pagbag-o ha kalibotan an nakikita mo ha imo panahon? Maisusumat mo ba an pipira hito? Pananglitan, may-ada pag-uswag ha syensya han medisina. Tungod han pagsaliksik dida hito nga kanataran, an aberids nga kahilawig han kinabuhi ha pipira nga mga nasud naghilawig na tikang ha ubos han 50 anyos ha tinikangan han ika-20 ka siglo ngadto ha sobra 70 anyos yana! Hunahunaa liwat an mga paagi diin nagpapahimulos kita ha husto nga paggamit han radyo, telebisyon, selyular nga mga telepono, ngan mga fax machine. Makatirigamnan liwat an pag-uswag ha edukasyon, ha transportasyon, ngan ha pagpanalipod ha mga katungod han tawo, nga ito ngatanan nagpauswag han kinabuhi han minilyon.

² Syempre, diri ngatanan nga mga pagbag-o nagin mapulsanon. Diri gud maibabalewaray an nakakadaot nga mga epekto han nagtitikadamu nga mga krimen, nag-uubos nga moral, nagkakaylap nga pag-abuso ha droga, madagmit nga pagdamu han mga diborsyo, nagdudugang nga implasyon, ngan nagsasarang nga terorismo. Ha anoman nga kahimtang, posible nga mauyon ka ha iginsurat ni apostol Pablo han maiha na nga naglabay: “An taran-awon hini nga kalibotan nagbabag-o.”—1 Korinto 7:31, NW.

 3. Ano an karuyag sidngon ni Pablo han nagsurat hiya nga “an taran-awon hini nga kalibotan nagbabag-o”?

³ Han ginsiring ito ni Pablo, iya iginpapariho an kalibotan ha usa nga entablado. An mga nasalida dida hito nga entablado—bantogan nga mga tawo ha politika, relihiyon, ngan kultura—nagpapakita, nagbubuhat han ira tagsatagsa nga bahin, ngan katapos, nabaya ha entablado ngan ginsasaliwnan han iba. Ini an nahitatabo ha sulod hin mga siglo na. Ha naglabay nga mga panahon, an usa nga dinastiya  bangin nagmando ha sulod hin mga dekada—mga siglo pa ngani—ngan mahinay an mga pagbag-o. Diri sugad hito yana, nga an kasaysayan mahimo magbag-o dayon kon ginpapatay an usa ka prominente nga lider! Oo, hinin masamok nga mga panahon, diri kita maaram kon ano an mahitatabo buwas.

 4. (a) An mga Kristiano kinahanglan magkaada ano nga timbang nga panhunahuna may kalabotan ha mga hitabo ha kalibotan? (b) Ano nga duha nga makakombinse nga ebidensya an aton paghihisgotan yana?

⁴ Kon an kalibotan usa nga entablado ngan an mga lider hito amo an mga nasalida, niyan an mga Kristiano amo an mga nagkikita. a Kondi, tungod kay hira “diri bahin han kalibotan,” diri gud hira interesado ha salida o bisan ha tagsa han mga nasalida. (Juan 17:16, NW) Lugod, namimiling gud hira hin mga tigaman nga an drama nasangpot na ha pungkay—ha makabungkag nga kataposan—kay maaram hira nga ini nga sistema kinahanglan matapos antes ipahamutang ni Jehova an maiha na nga ginhihinulat nga matadong nga bag-o nga kalibotan. b Aton kon sugad usisahon an duha nga ebidensya nga nagpapakita nga nagkikinabuhi na kita ha panahon han kataposan ngan nga hirani na an bag-o nga kalibotan. Ito amo an (1) kronolohiya han Biblia ngan (2) nagtitikaraot nga mga kahimtang ha kalibotan.—Mateo 24:21; 2 Pedro 3:13.

Ha Kataposan, Iginpahayag Na an Usa nga Misteryo!

 5. Ano “an itinanda nga mga panahon han mga nasud,” ngan kay ano nga interesado kita hito?

⁵ An kronolohiya amo an pag-aram ha relasyon han panahon ngan mga hitabo. Gin-unabi ni Jesus an mahitungod han usa ka panahon nga durante hito an mga lider han kalibotan amo an aada ha butnga han entablado nga waray paghilabot an Ginhadian han Dios. Tinawag ni Jesus iton nga peryodo nga “an itinanda nga mga panahon han mga nasud.” (Lukas 21:24, NW) Ha kataposan hiton “itinanda nga mga panahon,” magtitikang pagmando an langitnon nga Ginhadian han Dios, nga hi Jesus an may katungod nga Magmarando hito. Ha siyahan, hi Jesus magmamando “ha butnga han [iya] mga kaaway.” (Salmo 110:2) Katapos, sumala ha Daniel 2:44, an Ginhadian “magpipinitpinit ngan mag-aanaw” han ngatanan nga mga gobyerno han tawo, ngan ito matindog ha kadayonan.

 6. Kakan-o nagtikang an “itinanda nga mga panahon han mga nasud,” mationan-o kahilawig ito, ngan san-o ito natapos?

⁶ San-o matatapos “an itinanda nga mga panahon han mga nasud” ngan san-o magtitikang an pagmando han Ginhadian han Dios? An baton, nga “sinadhan ngan linakrehan ngada ha panahon han kataposan,” nag-uupod han kronolohiya han Biblia. (Daniel 12:9) Samtang nagtitiarabot iton nga “panahon,” hi Jehova naghimo hin mga paagi basi igpahayag an baton ha usa ka grupo han mapainubsanon nga mga estudyante ha Biblia. Pinaagi han bulig han espiritu han Dios, ira nasabtan nga “an itinanda nga mga panahon han mga nasud” nagtikang ha kabungkag han Jerusalem han 607 A.K.P. ngan nga iton nga “mga panahon” may kahilawig nga 2,520 ka tuig. Tikang hini, ira nasantop nga an 1914 nagtigaman han kataposan han “itinanda nga mga panahon han mga nasud.” Nasantop liwat nira nga an 1914 amo an tinikangan han kataposan hini nga sistema han mga butang. Sugad nga estudyante ha Biblia, maisasaysay mo ba tikang ha Kasuratan kon paonan-o nadangat an petsa nga 1914? c

 7. Ano nga mga teksto an nabulig ha aton nga hibaroan an tinikangan, an kahilawig, ngan an kataposan han pito ka panahon nga gin-unabi ha libro nga Daniel?

⁷ An usa nga tigaman gintipigan ha libro nga Daniel. Tungod kay ginamit ni Jehova hi Hadi Nabukodonosor han Babilonya ha pagbungkag han Jerusalem ha tinikangan han “itinanda nga mga panahon,” han 607 A.K.P., Iya iginpahayag pinaagi hiton nga magmarando nga an mga nasud magpapadayon ha pagmando nga waray paghilabot an Dios ha sulod hin pito ka simboliko nga panahon. (Esekiel 21:26, 27; Daniel 4:16, 23-25) Mationan-o kahilawig iton nga pito ka panahon? Sumala ha Pahayag 11:2, 3, ngan 12:6, 14, an tulo ngan tunga ka panahon 1,260 ka adlaw an kahilawig. Salit, an  pito ka panahon sigurado nga doble hito an kahilawig, o 2,520 ka adlaw. Ito ba an kataposan hito? Diri, kay hi Jehova naghatag ha kadungandungan ni Daniel nga hi propeta Esekiel, han surundon ha pag-interpretar han simbolismo: “An kada adlaw para ha usa ka tuig, akon igintanda ini ha imo.” (Esekiel 4:6) Salit, an pito ka panahon magigin 2,520 ka tuig an kahilawig. Ginagamit an 607 A.K.P. sugad nga tinikangan ngan an 2,520 ka tuig sugad nga kahilawig, makakasiring kita nga an itinanda nga mga panahon natapos han 1914.

Nasiguro Na “an Panahon han Kataposan”

 8. Ano nga ebidensya an magagamit mo ha pagpamatuod nga an mga kahimtang ha kalibotan nagtitikaraot tikang han 1914?

⁸ An mga hitabo ha kalibotan tikang han 1914 padayon, nagpapamatuod nga husto an pagsabot nga ginhisgotan ha igbaw nga iginbasar ha kronolohiya han Biblia. Hi Jesus mismo nagsiring nga “an kataposan han kalibotan” titigamnan han mga girra, mga gutom, ngan mga peste. (Mateo 24:3-8; Pahayag 6:2-8) Iton gud an kahimtang tikang han 1914. Hi apostol Pablo naghatag hin dugang nga impormasyon, nasiring nga magkakaada daku nga kaibahan ha pagtagad han mga tawo ha usa kag usa. Husto an iya paghulagway han mga pagbag-o nga nakikita naton ngatanan.—2 Timoteo 3:1-5.

 9. Ano an ginsiring han mga paraobserba mahitungod han mga kahimtang ha kalibotan tikang han 1914?

⁹ “An taran-awon hini nga kalibotan” nagbag-o na gud ba hinduro tikang han 1914? Ha libro nga The Generation of 1914, hi Propesor Robert Wohl nagsiring: “Adton nakakita han girra makakatoo gud nga natapos an usa nga kalibotan ngan may-ada lain nga nagtikang han Agosto 1914.” Ha pagpamatuod hini, an direktor ha kahimsog ha hunahuna para ha World Health Organization, hi Dr. Jorge A. Costa e Silva, nagsurat: “Nagkikinabuhi kita ha panahon han sobra kadagmit nga mga pagbag-o, nga ha kataposan nagigin hinungdan han pangarit ngan tensyon ha sukol nga waray pa gud maeksperyensyahi ha kasaysayan han katawohan.” Ito ba an imo naieksperyensyahan?

10. Paonan-o iginpapahayag ha aton han Biblia kon ano an hinungdan han nagtitikaraot nga mga kahimtang ha kalibotan tikang han 1914?

¹⁰ Hin-o an kriminal nga hinungdan han nagtitikaraot nga mga kahimtang ha kalibotan? Iginpapakilala han Pahayag 12:7-9 an kriminal: “Nag-araway ha langit: hi Miguel [Jesu-Kristo] ngan an iya mga anghel nakikipag-away kontra han dragon [Satanas nga Yawa]; ngan an dragon ngan an iya mga anghel nakikipag-away. Ngan waray hira makadaog, ngan waray na hin-agian nga lugar nira ha langit. Ngan an daku nga dragon iginlabog, . . . nga amo an malimbong ha bug-os nga kalibotan.” Salit hi Satanas nga Yawa an salaan nga parasamok, ngan an pagpaiwasa ha iya ha langit han 1914 nangangahulogan han pagin “kairo han tuna ngan han dagat: kay an Yawa linusad ha iyo, nga may daku nga kasina, kay hinbaroan niya nga halipot na la nga oras iton iya pag-ukoy.”—Pahayag 12:10, 12.

Kon Paonan-o Ipapakita an Ultimo nga Salida

11. (a) Ano nga mga paagi an ginagamit hi Satanas ha paglimbong ha “bug-os nga kalibotan”? (b) Ano nga espesyal nga pangalimbasog ni Satanas an iginpatin-aw ni apostol Pablo?

¹¹ Tungod kay maaram nga tiarabot na an iya kataposan, tikang han 1914 gindudugangan ni Satanas an iya mga pangalimbasog ha paglimbong  ha “bug-os nga kalibotan.” Tungod kay pirme nga maabtik nga paralimbong, hi Satanas nagbubuhat nga diri nakikita han mga tawo, iginbubutang ha entablado han kalibotan an mga lider ngan mga nangunguna ha pagbag-o sugad nga mga bida. (2 Timoteo 3:13; 1 Juan 5:19) Usa han iya mga tumong amo an paglimbong ha katawohan nga hunahunaon nga an iya paagi han pagmando makakagdara ha ira hin totoo nga kamurayawan. Ha kabug-osan, naglampos an iya propaganda, kay an mga tawo nagpapabilin nga positibo bisan pa han nagtitikadamu nga ebidensya nga an mga kahimtang padayon nga nagtitikaraot gud. Hi apostol Pablo nagtagna nga antes gud bungkagon ini nga sistema han mga butang, magkakaada makatirigamnan nga pagpahayag han propaganda ni Satanas. Hiya nagsurat: “Kon magsiring hira, Pakigdait ngan karig-onan [“kamurayawan ngan kasigurohan,” NW], ha kadagmitan an pagkabungkag maabot ha ira, sugad han oras han pag-anak han sagpon nga babaye.”—1 Tesalonika 5:3; Pahayag 16:13.

12. Ano an nagpapadayon nga mga pangalimbasog ha pagdara hin kamurayawan ha aton panahon?

¹² Ha bag-o la nga mga tuig, agsob nga ginagamit han mga politiko an mga pulong nga “kamurayawan ngan kasigurohan” ha pagsaysay han magkalainlain nga mga plano han tawo. Ira gintawag pa ngani an 1986 nga Internasyonal nga Tuig han Kamurayawan, bisan kon iton nga tuig waray magresulta hin internasyonal nga kamurayawan. An sugad ba nga mga pangalimbasog han mga lider ha kalibotan amo na an bug-os nga katumanan han 1 Tesalonika 5:3, o gintutudlok ba ni Pablo an usa ka espisipiko nga hitabo nga makatirigamnan gud salit hibabaroan ito han bug-os nga kalibotan?

13. Han igintagna ni Pablo an pagsinggit hin “Kamurayawan ngan kasigurohan!,” ha ano iginpariho niya an kabungkagan nga masunod, ngan ano an mahibabaroan naton tikang hini?

¹³ Tungod kay an mga tagna han Biblia agsob nga nasasabtan hin bug-os katapos la matuman ito o natutuman pa, kinahanglan maghulat kita ngan magkita. Kondi, makapainteres nga an tigda nga kabungkagan katapos han pagsinggit hin “Kamurayawan ngan kasigurohan!” iginpariho ni Pablo ha kasakit han pag-anak han burod nga babaye. Ha sulod hin mga siyam ka bulan, mas inaabat han tipanganak nga iroy an bata nga nagtutubo ha iya tiyan. Bangin nababatian niya an pitik han kasingkasing han iya anak o inaabat an pagkiwa hito ha iya tiyan. Bangin magbanyak pa ngani ito ha iya. An mga tigaman agsob nga nagigin mas matin-aw tubtob nga usa ka adlaw, inaabat niya an tigda ngan duro nga kasakit, nga nagpapasabot nga inabot na an ginlalaoman nga hitabo—an katawo han bata. Salit, ha anoman nga paagi nga mahimo matuman an igintagna nga pagsinggit hin “Kamurayawan ngan kasigurohan!,” magriresulta ito ha tigda, masakit, kondi ha kataposan ha makalilipay nga hitabo—an kabungkagan han karaotan ngan an tinikangan han sistema han bag-o nga kalibotan.

14. Ha ano nga pagkasunodsunod mahitatabo an tidaraon nga mga hitabo, pakadto ha ano nga resulta?

¹⁴ An tiarabot nga kabungkagan magigin makaharadlok para ha matinumanon nga mga Kristiano nga nagkikita. Siyahan, an kahadian ha tuna (an politikal nga bahin han organisasyon ni Satanas) maatake ha mga nasuporta ha Babilonya nga Daku (an relihiyoso nga bahin) ngan magbubungkag ha ira. (Pahayag 17:1, 15-18) Salit, ha urusahon nga pagbag-o han mga hitabo, an ginhadian ni Satanas mababahin kontra ha kalugaringon hito, nga an usa nga bahin naatake ha iba nga bahin, ngan hi Satanas mawawaray gahum ha pagpugong hito. (Mateo 12:25, 26) Ibubutang ni Jehova ha mga kasingkasing han kahadian han tuna “an pagbuhat han iya hunahuna,” nga amo an pagwara ha tuna han iya relihiyoso nga mga kaaway. Katapos nga mabungkag an palso nga relihiyon, mangunguna hi Jesu-Kristo ha iya langitnon nga kasundalohan ha bug-os nga pagbungkag ha nahisalin han organisasyon ni Satanas—an komersyal ngan politikal nga mga bahin. Ha kataposan, hi Satanas mismo waray na mahihimo. Dida hito, mahuhulog an telon, ngan matatapos an hilawig nga drama.—Pahayag 16:14-16; 19:11-21; 20:1-3.

15, 16. Ano an sadang magin epekto ha aton kinabuhi han pahinumdom nga ‘an panahon nga nahibibilin ginpahalipot’?

¹⁵ San-o mahitatabo ini ngatanan nga mga butang? Diri kita maaram han adlaw o han oras. (Mateo 24:36) Kondi, maaram kita nga “an panahon [“nga nahibibilin,” NW] ginpahalipot.” (1 Korinto 7:29) Importante, kon sugad, nga gamiton naton hin maaramon an panahon nga nahibibilin. Paonan-o? Sugad han iginsaysay ni apostol Pablo, kinahanglan aton ‘pahimulosan an oras’ para ha mas importante nga mga butang ha baylo han diri importante ngan an tagsa nga adlaw himoon nga  mapulsanon. Ano an hinungdan? “Tungod kay an mga adlaw magraot.” Ngan tungod ha ‘paghibaro kon ano an kaburut-on han Ginoo’ para ha aton, diri naton kakaragan an presyoso nga halipot nga panahon nga nahibibilin.—Efeso 5:15-17; 1 Pedro 4:1-4.

¹⁶ Tungod kay maaram kita nga kabungkagan an naghuhulat para ha bug-os nga sistema han mga butang hini nga kalibotan, paonan-o kita sadang maapektohan? Hi apostol Pedro nagsurat para ha aton kaopayan: “Tungod kay ini nga mga butang pagtutunawon, ano nga klase hin pagkatawo an angay ha iyo ha baraan nga mga paggawi ngan mga buhat han diosnon nga debosyon!” (2 Pedro 3:11, NW) Ini gud an klase hin pagkatawo nga angay ha aton! Uyon ha maaramon nga sagdon ni Pedro, kinahanglan (1) padayon nga magbantay kita ha aton paggawi basi masiguro nga ito baraan ngan (2) siguruhon naton nga an aton madasigon nga mga buhat ha pag-alagad kan Jehova pirme nga nagpapakita han aton hilarom nga gugma ha iya.

17. Kontra han ano nga mga lit-ag ni Satanas kinahanglan magpabilin nga nagbabantay an mga Kristiano?

¹⁷ An gugma ha Dios magpupugong ha aton nga madani ngada hini nga kalibotan tungod han mga butang hito nga nakakalit-ag. Tungod han mahitatabo hini nga presente nga sistema han mga butang, peligroso gud nga madani kita han ranggat ngan kaanyag han kalibotanon, materyalistiko nga paagi han pagkinabuhi. Bisan kon kita nagkikinabuhi ngan nagtatrabaho dinhi ha kalibotan, sadang sundon naton an maaramon nga sagdon nga diri gamiton hin bug-os an kalibotan. (1 Korinto 7:31) Ha pagkamatuod, kinahanglan buhaton naton an aton gimaopayi ha pagbantay nga diri malimbongan han propaganda han kalibotan. Ini nga kalibotan diri maglalampos ha paghimo hin mga solusyon ha mga problema hito. Diri ito makakasustini ha kalugaringon hito ha kadayonan. Kay ano nga makakasiguro gud kita? Tungod kay an inspirado nga Pulong han Dios nasiring: “An kalibotan nawawara, ngan an iya kairiphon: kondi an nagbubuhat han kaburut-on han Dios nagpapadayon ha gihapon.”—1 Juan 2:17.

Tiarabot Pa an Gimaopayi!

18, 19. Ano nga mga pagbag-o an ginpapamulat mo ha bag-o nga kalibotan, ngan kay ano nga takos ito han paghulat?

¹⁸ Diri mag-iiha bubungkagon na ni Jehova hi Satanas ngan an mga nasuporta ha iya. Katapos hito, pinaagi han bendisyon han Dios, an matinumanon nga mga naluwas ha kataposan hini nga sistema magtitikang ha pagbag-o han “taran-awon,” nga magpapabilin ha kadayonan. An girra diri na magdadaot han kalibotan; pauundangon han Dios “an mga pag-away tubtob ha kataposan han tuna.” (Salmo 46:9) Imbes han kakulang hin pagkaon, “magkakaada kahuraan hin lugas ha tuna; . . . an mga bunga hito mauuy-og.” (Salmo 72:16) Mawawaray na mga prisohan, mga presinto han polis, mga sakit nga naitatapon pinaagi han sekso, mga drug lord, mga hukmanan para ha diborsyo, mga kaso han pagkalugi, ngan terorismo.—Salmo 37:29; Isaias 33:24; Pahayag 21:3-5.

¹⁹ Mawawaray na sulod an mga lubnganan, ngan binilyon nga mga binanhaw—damu pa nga mga tawo—an makikita dinhi ha tuna. Magigin makalilipay gud ito samtang an usa nga henerasyon mahihiusa utro ha iba nga henerasyon ngan kon an maiha na nga nagkabulag nga mga hinigugma malipayon ngan mahigugmaon nga maghaharangkopay ha usa kag usa! Ha kataposan, an ngatanan nga buhi magsisingba kan Jehova. (Pahayag 5:13) Kon makompleto na an mga pagbag-o, an telon aalsahon basi makita an bug-os-tuna nga paraiso. Ano an imo aabaton samtang ginkikita mo an taran-awon? Sigurado nga maaaghat ka ha pagsinggit, ‘Ginhinulat ko ini hin maiha nga panahon, kondi takos ito han paghulat!’

[Mga footnote]

Paonan-o Mo Babatunon?

• Paonan-o napamatud-an nga nahitatabo ha aton panahon an mga pulong ni apostol Pablo nga “an taran-awon hini nga kalibotan nagbabag-o”?

• Paonan-o gintutudlok han kronolohiya han Biblia an kataposan han “itinanda nga mga panahon han mga nasud”?

• Paonan-o an nagbabag-o nga mga kahimtang ha kalibotan nagpapamatuod nga an 1914 nagtitigaman han tinikangan han “panahon han kataposan”?

• Paonan-o sadang makaapekto ha aton an kamatuoran nga “an panahon [“nga nahibibilin,” NW] ginpahalipot”?

[Mga Pakiana]

[Retrato ha pahina 20]

Ha kataposan—iginpahayag an misteryo!