‘Ginoo, Tutdui Kami ha Pag-ampo’

“Usa han iya mga tinon-an an siniring ha iya: Ginoo, tutdui kami ha pangamuyo [“pag-ampo,” NW].”—LUKAS 11:1.

 1. Kay ano nga an usa han mga disipulo ni Jesus naghangyo ha iya nga tutdoan hira ha pag-ampo?

 HA USA nga okasyon han 32 K.P., usa nga disipulo ni Jesus an nag-obserba ha Iya nga nag-aampo. Diri niya nababatian an ginsisiring ni Jesus ha iya Amay, kay posible nga usa ito nga hilom nga pag-ampo. Kondi, han matapos hi Jesus, an disipulo nagsiring ha iya: “Ginoo, tutdui kami ha pangamuyo, [“pag-ampo,” NW].” (Lukas 11:1) Ano an nagpagios hini nga paghangyo? An pag-ampo usa ka regular nga bahin han kinabuhi ngan pagsingba han mga Judio. Ha Hebreo nga Kasuratan mababasa an damu nga mga pag-ampo ha libro nga Mga Salmos ngan ha iba pa nga bahin. Salit an disipulo diri naghahangyo nga tutdoan hiya hin usa nga buruhaton nga diri niya hinbabaroan o nga waray pa gud niya buhata. Sigurado, maaram hiya han pormalistiko nga mga pag-ampo han relihiyoso nga mga lider han Judaismo. Kondi yana naobserbahan niya an pag-ampo ni Jesus, ngan posible nga inabat niya nga daku an kaibahan han mga pag-ampo han mga rabi nga sobra nga nagpapakabaraan ngan han paagi han pag-ampo ni Jesus.—Mateo 6:5-8.

 2. (a) Ano an nagpapakita nga diri karuyag sidngon ni Jesus nga aton uutruhon an mga pulong mismo han modelo nga pag-ampo? (b) Kay ano nga interesado kita nga mahibaro ha pag-ampo?

² Mga 18 ka bulan una pa, ha iya Sermon ha Bukid, tinagan ni Jesus an iya mga disipulo hin usa nga modelo nga babasihan han ira mga pag-ampo. (Mateo 6:9-13) Posible nga inin partikular nga disipulo diri presente hiton nga panahon, salit may pagkabuotan nga gin-utro ni Jesus an importante nga mga punto hiton modelo nga pag-ampo. Makatirigamnan an kamatuoran nga waray niya utroha an pag-ampo ha pariho gud nga mga pulong, nga nagpapasabot nga diri hiya naghahatag hin minimorya nga pag-ampo nga diri ginhuhunahuna an kahulogan. (Lukas 11:1-4) Pariho hiton waray-ngarani nga disipulo, karuyag naton liwat nga tutdoan kita ha pag-ampo basi an aton mga pag-ampo makabulig ha aton nga magin mas duok kan Jehova. Salit aton usisahon an mas bug-os nga bersyon han modelo nga pag-ampo, sugad han iginsurat ni apostol Mateo. May-ada ito pito nga hangyo, tulo hito an may kalabotan ha mga katuyoan han Dios ngan upat an may kalabotan ha aton materyal ngan espirituwal nga mga panginahanglan. Hini nga artikulo, aton paghihisgotan an siyahan nga tulo nga pangamuyo.

Usa nga Mahigugmaon nga Amay

3, 4. Ano an iginpapasabot han aton pagtawag kan Jehova sugad nga “Amay namon”?

³ Tikang ha tinikangan, ipinakita ni Jesus nga an aton mga pag-ampo sadang magpakita hin duok kondi matinalahuron nga relasyon kan Jehova. Han nagyayakan labi na para ha kapulsanan han iya mga disipulo nga nagkatirok nga duok ha iya ha ligid hito nga bukid, ginsumatan hira ni Jesus nga tawagon hi Jehova sugad nga ‘Amay namon nga aada ha langit.’ (Mateo 6:9) Sumala ha usa nga eskolar, nagyakan man hi Jesus ha usa nga popular nga klase hin Hebreo o ha Aramaiko, an termino nga iya ginamit para han “Amay” paru-pariho ha mahigugmaon nga pagtawag han usa  nga bata ha iya amay, ‘ha pulong han usa nga bata.’ An pagtawag kan Jehova sugad nga “Amay namon” nagpapasabot hin mahigugmaon, may-pagsarig nga relasyon.

⁴ Ha pagsiring nga “Amay namon,” kinikilala naton liwat nga bahin kita han usa ka daku nga pamilya han kalalakin-an ngan kababayin-an nga nakilala kan Jehova sugad nga an Humaratag-Kinabuhi. (Isaias 64:8; Buhat 17:24, 28) An inanak-ha-espiritu nga mga Kristiano ginmamangnoan sugad nga “mga anak han Dios,” ngan ha iya hira ‘makakapangaraba: Abba, Amay!’ (Roma 8:14, 15) Minilyon an nagin ira maunungon nga mga kaupod. Ira igindedikar an ira kinabuhi ngadto kan Jehova ngan ginsimbolohan an ira dedikasyon pinaagi han bawtismo ha tubig. Ini ngatanan nga ‘iba nga mga karnero’ makakadaop liwat kan Jehova ha ngaran ni Jesus ngan makakatawag ha Iya nga “Amay namon.” (Juan 10:16; 14:6) Regular nga makakadaop kita ha aton langitnon nga Amay ha pag-ampo basi dayawon hiya, pasalamatan hiya tungod han ngatanan nga iya mga kapahayagan han pagkamaopay ha aton, ngan isumat ha iya an aton mga pangarit, nasarig nga hiya nagmamangno ha aton.—Filipos 4:6, 7; 1 Pedro 5:6, 7.

Gugma ha Ngaran ni Jehova

 5. Ano an siyahan nga pangamuyo ha modelo nga pag-ampo, ngan kay ano nga angayan ini?

⁵ An siyahan nga pangamuyo naghihisgot dayon han mga butang nga prayoridad. Ito nasiring: “Pagbaraanon an imo ngaran.” (Mateo 6:9, NW) Oo, an pagbaraan han ngaran ni Jehova sadang magin pinakaimportante ha aton tungod kay nahigugma kita ha iya ngan nangangalas kita nga makita an ngatanan nga paagi han pagpasipara ha iya ngaran. An pagrebelde ni Satanas ngan an iya pagsulay ha siyahan nga tawhanon nga mag-asawa nga magtalapas kan Jehova nga Dios nagpakaraot han Iya ngaran pinaagi han pagpahayag hin pagruhaduha ha paagi han pagdumara han Dios han iya pagkasoberano ha uniberso. (Genesis 3:1-6) Dugang pa, tikang pa han siyahan nga pagrebelde, an ngaran ni Jehova ginpapasiparahan han makaarawod nga mga buhat ngan mga katutdoan hadton nag-aangkon nga nagrirepresentar ha iya.

 6. Ano an diri naton bubuhaton kon nag-aampo kita nga pagbaraanon an ngaran ni Jehova?

⁶ An aton pag-ampo nga pagbaraanon an ngaran ni Jehova nagpapakita kon diin kita nadapig ha isyu han pagkasoberano ha uniberso—bug-os nga nasuporta kita ha katungod ni Jehova ha pagmando ha uniberso. Karuyag ni Jehova nga ukyan an uniberso han intelihente nga mga linarang nga kinaburut-on ngan malipayon nga nagpapasakop ha iya matadong nga pagkasoberano tungod kay nahigugma hira ha iya ngan nahigugma ha ngatanan nga ginrirepresentaran han iya ngaran. (1 Kronikas 29:10-13; Salmo 8:1; 148:13) An aton gugma ha ngaran ni Jehova mabulig ha aton nga likyan an pagbuhat hin bisan ano nga bangin magpasipara hiton baraan nga ngaran. (Esekiel 36:20, 21; Roma 2:21-24) Tungod kay an kamurayawan han uniberso ngan han mga umurukoy hito nadepende ha pagbaraan han ngaran ni Jehova ngan ha mahigugmaon nga pagpasakop ha iya pagkasoberano, an aton pag-ampo nga “pagbaraanon an imo ngaran” usa nga kapahayagan han aton pagsarig nga matutuman an katuyoan ni Jehova para ha iya kadayawan.—Esekiel 38:23.

 An Ginhadian nga Igin-aampo Naton

7, 8. (a) Ano an Ginhadian nga igintutdo ni Jesus ha aton nga ig-ampo? (b) Ano an hinbabaroan naton mahitungod hini nga Ginhadian ha mga libro nga Daniel ngan Pahayag?

⁷ An ikaduha nga pangamuyo ha modelo nga pag-ampo amo an: “Kumanhi an imo ginhadian.” (Mateo 6:10) Ini nga hangyo duok nga may kalabotan ha nahiuna nga pangamuyo. An instrumento ni Jehova ha pagbaraan han iya ngaran amo an Mesianiko nga Ginhadian, an iya langitnon nga gobyerno, nga an iya Anak, hi Jesu-Kristo, amo an takos nga pinili nga Hadi. (Salmo 2:1-9) An tagna ni Daniel naghuhulagway han Mesianiko nga Ginhadian sugad nga “usa nga bato” nga gintibag tikang ha usa nga “bukid.” (Daniel 2:34, 35, 44, 45) An bukid nagrirepresentar han pagkasoberano ha uniberso ni Jehova, salit an bato nga nagrirepresentar han Ginhadian usa nga bag-o nga kapahayagan han pagmando ni Jehova ha uniberso. Ha tagna, an bato ‘nagin usa nga daku nga bukid ngan nakapuno han bug-os nga tuna,’ nagpapasabot nga an Mesianiko nga Ginhadian magrirepresentar han supremo nga awtoridad han Dios ha pagmando ha tuna.

⁸ Kaupod ni Kristo hini nga Ginhadian nga gobyerno an 144,000 nga iba pa, nga “mga tinubos tikang ha mga tawo” basi magmando upod niya sugad nga mga hadi ngan mga saserdote. (Pahayag 5:9, 10; 14:1-4; 20:6) Tinawag hira ni Daniel nga “mga baraan han Gihitaasi,” nga, upod ni Kristo nga ira Ulo, makarawat han “ginhadian ngan han kagamhanan, ngan han pagkadaku han mga ginhadian ha sirong han bug-os nga langit . . . An ira ginhadian amo an ginhadian nga waray kataposan, ngan an ngatanan nga kagamhanan mag-aalagad ngan masugot ha ira.” (Daniel 7:13, 14, 18, 27) Ito an langitnon nga gobyerno nga igintutdo ni Kristo ha iya mga sumurunod nga ig-ampo.

Kay Ano nga Ig-ampo pa Gihapon nga Kumanhi an Ginhadian?

 9. Kay ano nga angayan nga ig-ampo naton nga kumanhi an Ginhadian han Dios?

⁹ Ha iya modelo nga pag-ampo, gintutdoan kita ni Kristo nga ig-ampo nga kumanhi an Ginhadian han Dios. An katumanan han mga tagna ha Biblia nagpapasabot nga an Mesianiko nga Ginhadian natukod na ha langit han 1914. a Salit, angayan pa ba gihapon nga ig-ampo naton nga “kumanhi” iton nga Ginhadian? Sigurado. Kay ha tagna ni Daniel, an Mesianiko nga Ginhadian, nga ginsimbolohan han usa nga bato, aada ha direkta nga pakig-away ha politikal nga mga gobyerno, nga ginsimbolohan han usa nga daku nga imahen. Maatake pa an bato ha imahen, maghahampak hito nga bug-os nga magbubungkag hito. An tagna ni Daniel nasiring: “Diri man an kagamhanan hini itatapod ha iba nga katawohan. Kondi ini magpipinitpinit ngan mag-aanaw hini ngatanan nga ginhadian, ngan ini matindog ha kadayonan.”—Daniel 2:44.

10. Kay ano nga ginhahandom naton an pagkanhi han Ginhadian han Dios?

¹⁰ Ginhahandom naton nga makita an pagkanhi han Ginhadian han Dios ha pag-atake ha maraot nga sistema han mga butang ni Satanas tungod kay mangangahulogan ini han pagbaraan han ngaran ni Jehova ngan pagpoo han ngatanan nga mga nakontra ha pagkasoberano han Dios. Sinsero kita nga nag-aampo nga: “Kumanhi an imo ginhadian,” ngan upod ni apostol Juan, kita nasiring: “Amen: Kadi Ginoo Jesus.” (Pahayag 22:20) Oo, hinaot kumanhi hi Jesus ha pagbaraan han ngaran ni Jehova ngan pagbindikar han Iya pagkasoberano,  basi matuman an mga pulong han salmista: “Basi nga hira kumilala nga hi ikaw la, nga an ngaran hi Jehova, amo an Gihitaasi ha bawbaw han tuna.”—Salmo 83:18.

‘Matuman an Imo Kaburut-on’

11, 12. (a) Ano an ginhahangyo naton kon nag-aampo kita nga an kaburut-on han Dios “matuman, sugad ha langit, amo man ha tuna”? (b) Ano pa an kahulogan han aton pag-ampo nga matuman an kaburut-on ni Jehova?

¹¹ Sunod nga gintutdoan ni Jesus an iya mga disipulo nga mag-ampo: ‘Matuman an imo kaburut-on, sugad ha langit, amo man ha tuna.’ (Mateo 6:10) Iniksister an uniberso tungod han kaburut-on ni Jehova. An gamhanan nga langitnon nga mga linarang nagsinggit: “Aton Ginoo, ngan aton Dios, takos ikaw ha pagkarawat han himaya, ngan han dungog ngan han gahum: kay ikaw an nagbuhat han ngatanan nga mga bagay, ngan tungod ha imo kaburut-on nagkahihimo, ngan pinanmuhat hira.” (Pahayag 4:11) Hi Jehova may-ada katuyoan para ha “mga bagay nga aadto ha langit ngan hahani na tuna.” (Efeso 1:8-10) Pinaagi han pag-ampo nga matuman an kaburut-on han Dios, ha pagkamatuod, aton ginhahangyo hi Jehova nga tumanon an iya katuyoan. Dugang pa, ipinapakita naton nga ginhahandom naton nga makita nga natuman an kaburut-on han Dios ha bug-os nga uniberso.

¹² Pinaagi hini nga pag-ampo ipinapakita liwat naton an aton pagin disidido ha pagpahiuyon han aton kinabuhi ha kaburut-on ni Jehova. Hi Jesus nagsiring: “An akon karan-on amo an pagbuhat han kaburut-on han nagpakanhi ha akon, ngan paghuman han iya buhat.” (Juan 4:34) Pariho kan Jesus, sugad nga dedikado nga mga Kristiano, nalilipay kita ha pagbuhat han kaburut-on han Dios. An aton gugma kan Jehova ngan ha iya Anak nagpapagios ha aton nga magkinabuhi ‘diri na ha mga kairiphon han mga tawo, kondi ha kaburut-on han Dios.’ (1 Pedro 4:1, 2; 2 Korinto 5:14, 15) Nangangalimbasog kita nga likyan an pagbuhat han mga butang nga maaram kita nga nakontra ha kaburut-on ni Jehova. (1 Tesalonika 4:3-5) Pinaagi han pagsalingabot han panahon para ha pagbasa ngan pag-aram ha Biblia, padayon nga aton ‘hinbabaroan kon ano an kaburut-on han Ginoo,’ nga nag-uupod han aton aktibo nga pakigbahin ha pagsangyaw ‘hinin maopay nga sumat han ginhadian.’—Efeso 5:15-17; Mateo 24:14.

Kaburut-on ni Jehova ha Langit

13. Paonan-o natutuman an kaburut-on han Dios maiha na antes pa han pagrebelde ni Satanas?

¹³ Natutuman an kaburut-on ni Jehova ha langit maiha na antes pa magrebelde an usa han iya espiritu nga mga anak ngan nagin hi Satanas. An libro nga Proberbios naghuhulagway han suhag nga Anak han Dios sugad nga personipikasyon han kinaadman. Ipinapakita hito nga ha sulod hin hilawig hinduro nga panahon, an bugtong nga Anak han Dios “malipayon ha iya atubangan,” malipayon ha pagbuhat han kaburut-on han iya Amay. Ha urhi, nagin ‘maabtik nga magburuhat’ hiya ni Jehova ha paglarang han ngatanan nga mga butang “nga aadto ha mga langit ngan hahani ha tuna, an mga bagay nga sadang makita ngan diri sadang makita.” (Proberbios 8:22-31; Kolosas 1:15-17) Ginamit ni Jehova hi Jesus sugad nga iya Pulong, o Tagapagyakan.—Juan 1:1-3.

14. Ano an mahibabaroan naton ha Salmo 103 mahitungod ha kon paonan-o gintutuman han mga anghel an kaburut-on ni Jehova ha langit?

¹⁴ Ipinapakita han salmista nga an pagkasoberano ni Jehova amo an supremo ha ngatanan ngan nga an kadam-an nga mga anghel namamati ha iya mga instruksyon ngan ha iya mga sugo. Aton mababasa: “Gintindog ni Jehova an iya lingkuranan nga hadianon didto ha kalangitan; ngan an iya ginhadian naghahadi ha ngatanan. Bulahana hi Jehova, niyo nga mga manurunda, mga gamhanan ha kusog, mga nagtutuman han iya mga pulong, mga namamati han tingog han iya pulong. Bulahana hi Jehova, ngatanan kamo nga iya mga kasundalohan, kamo nga mga tinaporan niya, nga nagbubuhat han iya kaburut-on. Bulahana hi Jehova, ngatanan kamo an iya mga binuhat, ha ngatanan nga nayon han iya ginhadian [o, “pagkasoberano”].”—Salmo 103:19-22.

15. Paonan-o an pagkarawat ni Jesus han gahum ha Ginhadian nakaapekto ha pagbuhat han kaburut-on han Dios ha langit?

¹⁵ Katapos han iya pagrebelde, nakakadto pa gihapon hi Satanas ha langit, sugad han iginpatin-aw ha libro nga Job. (Job 1:6-12; 2:1-7) Kondi, an libro nga Pahayag nagtagna nga maabot an panahon nga paiiwason ha langit hi Satanas ngan an iya mga demonyo. Iton nga panahon matin-aw  nga inabot katapos gud makarawat ni Jesu-Kristo an gahum ha Ginhadian han 1914. Tikang hadto, waray na lugar ha langit para hiton nga mga rebelde. Aadi na la hira ha hirani han tuna. (Pahayag 12:7-12) Diri na mababatian ha langit yana an paglantugi mahitungod han pagkasoberano ni Jehova, mga tingog na la nga urosa nga nagdadayaw ha “Kordero,” hi Kristo Jesus, ngan mapinasakupon nga naghihimaya kan Jehova. (Pahayag 4:9-11) An kaburut-on ni Jehova tinuod gud nga natutuman ha langit.

Kaburut-on ni Jehova Para ha Tuna

16. Paonan-o an modelo nga pag-ampo diri nauyon ha katutdoan han Kakristianohan may kalabotan ha paglaom han katawohan?

¹⁶ Diri igin-aapi han mga relihiyon han Kakristianohan an tuna ha mga katuyoan han Dios, nag-aangkon nga an ngatanan nga mag-opay nga mga tawo makadto ha langit. Kondi hi Jesus nagtutdo ha aton nga mag-ampo: ‘Kumanhi an imo ginhadian. Matuman an imo kaburut-on, sugad ha langit, amo man ha tuna.’ (Mateo 6:10) Masisiring gud ba nga ha kabug-osan natutuman an kaburut-on ni Jehova yana dinhi ha tuna nga puno hin kamadarahog, kawaray-hustisya, sakit, ngan kamatayon? Diri gud! Salit, kinahanglan sinsero nga ig-ampo naton nga matuman an kaburut-on han Dios dinhi ha tuna, uyon ha saad nga iginsurat ni apostol Pedro: “Sumala ha iya saad, naghuhulat kita hin bag-o nga mga langit [an Mesianiko nga gobyerno han Ginhadian pinaagi kan Kristo] ngan bag-o nga tuna [usa ka matadong nga sosiedad han mga tawo], diin mag-uukoy an katadongan.”—2 Pedro 3:13.

17. Ano an katuyoan ni Jehova para ha tuna?

¹⁷ May katuyoan hi Jehova ha paglarang han tuna. Iya giniyahan hi propeta Isaias nga magsurat: “Ha sugad hini nasiring hi Jehova nga nagbuhat han mga langit, an Dios nga naghitsura han tuna ngan naghimo hini, nga nagtukod hini ngan nagbuhat hini nga diri bayaan, nga naghitsura hini ha pagkaurukyan: Ako hi Jehova; ngan waray lain.” (Isaias 45:18) Iginbutang han Dios an siyahan nga tawhanon nga mag-asawa ha paraiso nga hardin ngan ginsugo hira: “Magmabungahon kamo ngan magdamu ngan pun-on niyo an tuna, ngan pagtag-iyahon niyo ito.” (Genesis 1:27, 28; 2:15) Matin-aw, katuyoan han Maglalarang nga an tuna pag-ukyan han hingpit nga magtadong nga mga tawo nga malipayon nga nagpapasakop ha pagkasoberano ni Jehova ngan mabubuhi ha waray kataposan ha Paraiso nga iginsaad ni Kristo.—Salmo 37:11, 29; Lukas 23:43.

18, 19. (a) Ano an kinahanglan buhaton antes matuman hin bug-os an kaburut-on han Dios dinhi ha tuna? (b) Ano nga iba nga mga bahin han modelo nga pag-ampo ni Jesus an uusisahon ha masunod nga artikulo?

¹⁸ An kaburut-on ni Jehova may kalabotan ha tuna diri gud matutuman hin bug-os samtang an tuna inuukyan han kalalakin-an ngan kababayin-an nga nakontra ha iya pagkasoberano. Pinaagi han paggamit ha iya gamhanan nga espiritu nga mga puwersa ha panguna ni Kristo, an Dios ‘maghihibang hadton naghihibang han tuna.’ An bug-os nga maraot nga sistema han mga butang ni Satanas, upod na an palso nga relihiyon, malimbong nga politika, hakog ngan diri-tangkod nga komersyo, ngan an makabungkag nga militar hito, bubungkagon ha kadayonan. (Pahayag 11:18; 18:21; 19:1, 2, 11-18) Mabibindikar an pagkasoberano ni Jehova ngan mababaraan an iya ngaran. Igin-aampo naton ini ngatanan kon kita nasiring: ‘Amay namon nga aada ka ha langit, gindadayaw [“pagbaraanon,” NW] an imo ngaran; kumanhi an imo ginhadian. Matuman an imo kaburut-on, sugad ha langit, amo man ha tuna.’—Mateo 6:9, 10.

¹⁹ Kondi, ha iya modelo nga pag-ampo, ipinakita ni Jesus nga mahimo liwat kita mag-ampo mahitungod han personal nga mga butang. Ini nga mga bahin han iya instruksyon may kalabotan ha pag-ampo uusisahon ha masunod nga artikulo.

[Footnote]

Sugad nga Repaso

• Kay ano nga angayan para ha aton nga tawagon hi Jehova sugad nga “Amay namon”?

• Kay ano nga importante gud para ha aton nga ig-ampo an pagbaraan han ngaran ni Jehova?

• Kay ano nga igin-aampo naton nga kumanhi an Ginhadian han Dios?

• Ano an iginpapasabot kon igin-aampo naton nga matuman an kaburut-on han Dios ha tuna sugad ha langit?

[Mga Pakiana]

[Retrato ha pahina 9]

Naiiba gud an mga pag-ampo ni Jesus ha mga pag-ampo han mga Pariseo nga sobra nga nagpapakabaraan

[Retrato ha pahina 10]

Igin-aampo han mga Kristiano nga kumanhi an Ginhadian han Dios, pagbaraanon an iya ngaran, ngan matuman an iya kaburut-on