Hi Jehova Nagtatagana han Aton Adlaw-adlaw nga mga Panginahanglan

“Diri man kamo magmarinuhaduhaon ha hunahuna. Kay . . . an iyo Amay maaram, nga kamo nagkikinahanglan hini nga mga butang.”—LUKAS 12:29, 30.

1. Paonan-o hi Jehova nagtatagana para ha mga hayop nga linarang?

 NAKAKITA ka na ba hin usa nga maya o iba nga tamsi nga nanunuktok ha baga in hugaw la pagkit-on? Bangin naghunahuna ka kon ano an hiaagian hito nga makakaon pinaagi han pagtuktok ha tuna. Ha iya Sermon ha Bukid, ipinakita ni Jesus nga makakakuha kita hin leksyon tikang ha paagi han pagtagana ni Jehova ha katamsihan. Hiya nagsiring: “Kitaa an katamsihan ha langit, nga waray magsabwag, bisan pagbari, bisan pagtirok ha buhos; ngan an iyo Amay, nga aadto ha langit nagpapakaon ha ira. Diri ba kamo maromahal pa ha ira?” (Mateo 6:26) Ha urusahon nga mga paagi, hi Jehova nagtatagana hin pagkaon para ha ngatanan nga iya mga linarang.—Salmo 104:14, 21; 147:9.

2, 3. Ano nga espirituwal nga mga leksyon an makakarawat naton tikang ha kamatuoran nga hi Jesus nagtutdo ha aton nga mag-ampo para han aton pagkaon ha adlaw-adlaw?

² Niyan, kay ano nga igin-upod ni Jesus ha iya modelo nga pag-ampo an hangyo nga: “Tagan mo kami niyan hin kan-on namon ha ikinaadlaw”? (Mateo 6:11) May-ada kita makukuha nga importante nga mga leksyon tikang hinin simple nga hangyo. Siyahan, nagpapahinumdom ito ha aton nga hi Jehova an Harangdon nga Paratagana. (Salmo 145:15, 16) An mga tawo makakatanom ngan makakakultibar, kondi an Dios la an makakapatubo han mga butang, ha espirituwal ngan ha pisikal. (1 Korinto 3:7) An aton kinakaon ngan iniinom mga regalo tikang ha Dios. (Buhat 14:17) An paghangyo ha iya nga hatagan kita han aton adlaw-adlaw nga mga panginahanglan nagpapakita nga pinabibilhan naton an sugad nga mga tagana. Syempre, an sugad nga hangyo diri naglilibre ha aton ha responsabilidad nga magtrabaho kon mahihimo naton ito.—Efeso 4:28; 2 Tesalonika 3:10.

³ Ikaduha, an aton paghangyo hin ‘kan-on ha ikinaadlaw’ nagpapasabot nga diri kita sadang mabaraka hinduro mahitungod ha tidaraon. Hi Jesus dugang nga nagsiring: “Diri kamo mangarit, nga masiring: Ano an aton kakaunon, o ano an aton iinumon, o ano an aton igpapanapton? Kay an mga Hentil namimiling han ngatanan hini nga mga butang; kay an iyo Amay nga langitnon, maaram nga kamo nagkikinahanglan hini ngatanan. Kondi pamilnga niyo siyahan an ginhadian han Dios, ngan an iya katadongan; ngan ngatanan ini nga mga butang mahidudugang ha iyo. Busa, diri kamo mangarit tungod han buwas nga adlaw; kay an buwas nga adlaw may-ada kalugaringon nga pangarit.” (Mateo 6:31-34) An pag-ampo hin ‘kan-on ha ikinaadlaw’ nagpapakita han surubdan para ha pagkinabuhi hin simple ha “diosnon nga debosyon nga may pagkakontento.”—1 Timoteo 6:6-8, NW.

Espirituwal nga Pagkaon ha Adlaw-adlaw

4. Ano nga mga hitabo ha kinabuhi ni Jesus ngan han mga Israelita an nagpapabug-at han pagkaimportante han pagkaon hin espirituwal nga pagkaon?

⁴ An aton pag-ampo para han aton pagkaon ha adlaw-adlaw sadang magpahinumdom liwat ha aton han aton panginahanglan hin espirituwal nga pagkaon ha adlaw-adlaw. Bisan kon gutom hinduro katapos han maiha nga pagpuasa, waray sunda ni Jesus an pagsulay ni Satanas nga himoon nga tinapay an mga bato, nasiring: “Diri la an tinapay an nakakabuhi han tawo, kondi an ngatanan nga pulong, nga nagowa ha baba han Dios.” (Mateo 4:4) Ginkotar dinhi ni Jesus hi propeta Moises, nga nagsiring ha mga Israelita: “Ginpaubos ka [ni Jehova],  ngan ginpaantos ka hin gutom, ngan ginpakaon ka han mana, nga waray mo hikilal-i, bisan an imo mga amay waray makakilala; nga makagpasabot hiya ha imo nga an tawo diri mabubuhi ha tinapay la, kondi han ngatanan nga bagay nga magowa ha baba ni Jehova mabubuhi an tawo.” (Deuteronomio 8:3) An paagi han paghatag ni Jehova han mana nagtagana ha mga Israelita diri la hin pisikal nga pagkaon kondi hin espirituwal nga mga leksyon liwat. An usa nga espirituwal nga leksyon amo nga hira kinahanglan “mamurot han iya bahin kada adlaw.” Kon hira nagtirok hin sobra kay han igo ha usa ka adlaw, an nahisalin nagtikang manimaho ngan gin-ulod. (Eksodo 16:4, 20) Kondi, waray ini mahitabo ha ikaunom ka adlaw han kinahanglan magtirok hira hin doble ha kadamu nga para ha usa ka adlaw basi matagbaw an ira mga panginahanglan para ha adlaw nga iparahuway. (Eksodo 16:5, 23, 24) Salit an mana nagpahinumdom gud ha ira nga kinahanglan magin masinugtanon hira ngan nga an ira kinabuhi nadepende diri la ha tinapay kondi ha “ngatanan nga bagay nga nagowa ha baba ni Jehova.”

5. Paonan-o hi Jehova nagtatagana ha aton hin espirituwal nga pagkaon adlaw-adlaw?

⁵ Kinahanglan kumaon liwat kita adlaw-adlaw hin espirituwal nga pagkaon nga igintatagana ni Jehova pinaagi han iya Anak. Tungod hini nga katuyoan, hi Jesus nagpili hin usa nga “matinumanon ngan maaramon nga uripon” basi magtagana hin “pagkaon ha husto nga panahon” para ha panimalay nga may pagtoo. (Mateo 24:45, NW) Iton matinumanon nga uripon nga klase diri la naghahatag hin hura nga espirituwal nga pagkaon pinaagi han mga bulig ha pag-aram ha Biblia kondi nagdadasig liwat ha aton nga basahon an Biblia adlaw-adlaw. (Josue 1:8; Salmo 1:1-3) Pariho kan Jesus, makakarawat liwat naton an espirituwal nga pagkaon pinaagi han adlaw-adlaw nga pangalimbasog nga hibaroan ngan buhaton an kaburut-on ni Jehova.—Juan 4:34.

Pagpasaylo ha mga Sala

6. Ano nga mga utang an iginhahangyo naton nga pasayloon, ngan ha ano nga mga kondisyon andam hi Jehova ha pagpara hito?

⁶ An sunod nga hangyo ha modelo nga pag-ampo amo an: “Pagwad-on mo an amon mga utang, sugad han amon pagwara han mga nakakautang ha amon.” (Mateo 6:12) Hi Jesus diri naghihisgot dinhi mahitungod han mga utang nga salapi. Ginhuhunahuna niya an pagpasaylo ha aton mga sala. Ha rekord ni Lukas han modelo nga pag-ampo, ini nga hangyo mababasa: “Pagwad-on mo an amon mga sala, kay kami nagwawara han ngatanan nga nakakautang ha amon.” (Lukas 11:4) Salit, kon kita nakakasala, sugad hin may utang kita kan Jehova. Kondi an aton mahigugmaon nga Dios andam ha ‘pagpara,’ o pagwara, hiton nga utang kon kita sinsero nga magbasol, ‘bumalik,’ ngan mangaro ha iya hin pasaylo pinaagi han pagtoo ha halad lukat ni Kristo.—Buhat 3:19; 10:43; 1 Timoteo 2:5, 6.

7. Kay ano nga sadang kita mag-ampo nga pasayloon an aton mga sala kada adlaw?

⁷ Tikang ha usa pa nga punto, nakakasala kita kon napapakyas kita ha pagsunod ha matadong nga mga suruklan ni Jehova. Tungod han napanunod nga sala, kita ngatanan nagsasayop ha pulong, buhat, ngan hunahuna o napapakyas kita ha pagbuhat han sadang naton buhaton. (Eklesiastes 7:20; Roma 3:23; Jakobo 3:2; 4:17) Salit, maaram man kita nga nakasala kita durante han adlaw o diri, kinahanglan iupod naton ha aton adlaw-adlaw nga mga pag-ampo an hangyo nga pasayloon an aton mga sala.—Salmo 19:12; 40:12.

8. An pag-ampo para ha pagpasaylo sadang magpagios ha aton nga buhaton an ano, nga may-ada ano nga mapulsanon nga resulta?

⁸ Sadang kita mag-ampo para ha pagpasaylo katapos han tangkod nga pag-usisa-ha-kalugaringon, pagbasol, ngan pagsumat han sala, nga iginbasar ha pagtoo ha nagtutubos nga gahum han iginbubo nga dugo ni Kristo. (1 Juan 1:7-9) Basi pamatud-an an sinseridad han aton pag-ampo, kinahanglan pamatud-an naton an hangyo nga pasayloon pinaagi han ‘mga buhat nga takos han pagbasol.’ (Buhat 26:20) Niyan makakatoo kita ha pagin andam ni Jehova ha pagpasaylo ha aton mga sala. (Salmo 86:5; 103:8-14) An resulta amo an diri-maitanding nga kamurayaw ha hunahuna, “an kamurayaw han Dios, nga nalabaw ha ngatanan nga hibabroan,” nga amo an “magbabantay han [aton] mga kasingkasing ngan [aton] mga hunahuna [pinaagi kan] Kristo Jesus.” (Filipos 4:7) Kondi an modelo nga pag-ampo ni Jesus nagtututdo ha aton hin dugang pa mahitungod ha kon ano an kinahanglan buhaton naton basi makarawat an pagpasaylo ha aton mga sala.

 Basi Pasayloon, Kita Kinahanglan Magpasaylo

9, 10. (a) Ano nga komento an igindugang ni Jesus ha modelo nga pag-ampo, ngan ano an pinabug-atan hini? (b) Paonan-o dugang nga igin-ilustrar ni Jesus an aton panginahanglan nga magin mapinasayloon?

⁹ Makapainteres nga an hangyo nga “pagwad-on mo an amon mga utang, sugad han amon pagwara han mga nakakautang ha amon,” amo la an bahin han modelo nga pag-ampo nga dugang nga iginsaysay ni Jesus. Kahuman niya tapuson an pag-ampo, hiya nagdugang: “Kay kon kamo magpasaylo han mga tawo han ira mga kasaypanan, an iyo Amay, nga aadto ha langit, mapasaylo man han iyo mga kasaypanan.” (Mateo 6:14, 15) Pinaagi hini, iginpatin-aw gud ni Jesus nga an pagpasaylo ni Jehova ha aton nadepende ha aton pagin disidido nga pasayloon an iba.—Markos 11:25.

¹⁰ Ha lain nga okasyon, iginhatag ni Jesus an usa nga ilustrasyon nga nagpapakita han panginahanglan nga kita magin mapinasayloon kon karuyag naton nga pasayloon kita ni Jehova. Iya iginsaysay an istorya mahitungod han usa nga hadi nga mahinatagon nga nagpara han daku nga utang han usa nga uripon. Ha urhi ginsirotan hinduro han hadi ini nga tawo han nagdumiri hiya ha pagpara han gutiay hinduro nga utang han usa nga igkasi-uripon. Gintapos ni Jesus an ilustrasyon ha pagsiring: “Amo man ito an bubuhaton han akon langitnon nga Amay ha iyo, kon diri an tagsatagsa ha iyo magpasaylo ha iyo bugto tikang ha iyo mga kasingkasing.” (Mateo 18:23-35) Matin-aw an leksyon: An utang nga sala nga ginpapasaylo ni Jehova ha kada usa ha aton mas daku gud kay ha bisan ano nga kasaypanan nga bangin nahimo han bisan hin-o kontra ha aton. Dugang pa, ginpapasaylo kita ni Jehova adlaw-adlaw. Kon sugad, sigurado nga mapapasaylo naton an mga sala nga nahihimo han iba ha aton ha panapanahon.

11. Ano nga sagdon ni apostol Pablo an susundon naton kon karuyag naton nga pasayloon kita ni Jehova, ngan ano an maopay nga mga resulta?

¹¹ Hi apostol Pablo nagsurat: “Magmalolooyon kamo an usa kag usa, magmahumok an iyo kasingkasing. Magpinasayloay kamo an usa kag usa, sugad nga ginpasaylo man kamo han Dios pinaagi kan Kristo.” (Efeso 4:32) An pagpasaylo ha usa kag usa nag-aaghat hin kamurayawan ha butnga han mga Kristiano. Hi Pablo dugang nga nagsagda: “Panul-ot kamo, sugad nga mga pinili han Dios, mga baraan ngan mga hinigugma, usa nga kasingkasing han pagpuangon, pagkalooy,  pagpaubos, pagkaaghop, pagkamailob; nga mag-inantusay kamo an usa kag usa, ngan magpinasayloay kamo an usa kag usa, kon may-ada usa ka tawo nga may igsusumbong kontra ha iba; sugad nga an Ginoo nagpasaylo ha iyo, sugad man buhaton ini niyo: ngan labaw pa hini nga mga bagay, manul-ot kamo hin paghigugma nga amo an higot han pagkahingpit [“hingpit nga bugkos han pagkaurosa,” NW].” (Kolosas 3:12-14) Ini ngatanan iginpapasabot ha pag-ampo nga igintutdo ni Jesus ha aton: “Pagwad-on mo an amon mga utang, sugad han amon pagwara han mga nakakautang ha amon.”

Panalipod Kon Ginsusulay

12, 13. (a) Ano an diri mahimo magin kahulogan han sunod nga hangyo ha modelo nga pag-ampo? (b) Hin-o an bantogan nga Parasulay, ngan ano an kahulogan han aton pag-ampo nga diri kita pagdad-on ngadto ha pagsulay?

¹² An sunod nga hangyo ha modelo nga pag-ampo ni Jesus amo an: “Diri mo kami pagdad-on ngadto ha panulay.” (Mateo 6:13) Karuyag sidngon ba ni Jesus nga sadang kita maghangyo kan Jehova nga diri kita niya sulayon? Diri ito an kahulogan, kay an disipulo nga hi Jakobo giniyahan ha pagsurat: “Waray bisan hin-o nga ginsusulay nga magsiring, Ginsusulay ako han Dios; kay an Dios diri sadang pagsulayon hin maraot, ngan diri hiya nagsusulay hin bisan hin-o nga tawo.” (Jakobo 1:13) Dugang pa, an salmista nagsurat: “Kon imo panginanoon, O Jehova, an mga karat-an, O Ginoo, hin-o pa an matindog?” (Salmo 130:3) Hi Jehova diri gud nagpapamulat ha aton tagsa nga sayop, ngan sigurado nga diri hiya nangangalimbasog ha pagsulay ha aton nga magsayop. Salit, ano an kahulogan hini nga bahin han modelo nga pag-ampo?

¹³ An usa nga nangangalimbasog ha pagsulay ha aton, ha pagpahinabo nga mahulog kita pinaagi han malimbong nga mga buhat, ngan paglamoy pa ngani ha aton amo hi Satanas nga Yawa. (Efeso 6:11) Hiya an bantogan nga Parasulay. (1 Tesalonika 3:5) Pinaagi han pag-ampo nga diri kita dad-on ngadto ha pagsulay, naghahangyo kita kan Jehova nga diri kita tugotan nga mahulog kon kita ginsusulay. Naghahangyo kita ha iya nga buligan kita nga diri ‘malimbongan ni Satanas,’ nga diri sumunod ha mga pagsulay. (2 Korinto 2:11) Nag-aampo kita nga magpabilin ha “tago nga lugar han Gihitaasi,” nga nakarawat han espirituwal nga panalipod nga iginhahatag ngada hadton nakilala ha pagkasoberano ni Jehova ha ngatanan nga ira ginbubuhat.—Salmo 91:1-3, NW.

14. Paonan-o nagpapasarig hi apostol Pablo nga diri kita babayaan ni Jehova kon maglaom kita ha Iya kon kita ginsusulay?

¹⁴ Makakasiguro kita nga kon ito an aton sinsero nga hingyap, nga iginpapahayag ha aton mga pag-ampo ngan ha aton mga buhat, diri gud kita babayaan ni Jehova. Hi apostol Pablo nagpapasarig ha aton: “Waray pagsulay nga maabot ha iyo nga diri sadang maantos han tawo: kondi an Dios matinumanon, nga diri matugot nga pagsulayon kamo labaw ha iyo kasadangan; kondi upod ha pagsulay mahatag liwat hiya hin katigayonan ha paglikay, basi nga kamo makahimo ha pag-antos.”—1 Korinto 10:13.

“Luwasa Kami Tikang ha Usa nga Maraot”

15. Kay ano nga mas importante yana kay ha naglabay an pag-ampo nga luwason kita tikang ha usa nga maraot?

¹⁵ Sumala ha pinakamasasarigan nga mga manuskrito han Kristiano Griego nga Kasuratan, an modelo nga pag-ampo ni Jesus natatapos ha mga pulong: “Luwasa kami tikang ha usa nga maraot.” a (Mateo 6:13, NW) An panalipod tikang ha Yawa labaw gud nga ginkikinahanglan durante hini nga panahon han kataposan. Hi Satanas ngan an iya mga demonyo nakikig-away ha dinihogan nga nanhibilin, “nga nagbabantay han mga sugo han Dios, ngan nagtitipig han pagpamatuod mahitungod kan Jesus,” ngan ha ira mga kaupod nga “daku nga panon.” (Pahayag 7:9, NW; 12:9, 17) Hi apostol Pedro nagsagdon ha mga Kristiano: “Magbuotan kamo, ngan mag-agma kamo: kay an iyo kaaway nga amo an Yawa, sugad hin maaringasa nga leon, naglilinakatlakat, pagpinamiling hin iya lalamyon. Ato kamo ha iya, nga marig-on an iyo pagtoo.” (1 Pedro 5:8, 9) Karuyag ni Satanas nga paundangon an aton pagsangyaw nga buruhaton,  ngan pinaagi han iya mga ahente dinhi ha tuna—ha relihiyon man, komersyo, o ha politika—nangangalimbasog hiya nga tarhugon kita. Kondi, kon magpabilin kita nga marig-on, luluwason kita ni Jehova. An disipulo nga hi Jakobo nagsurat: “Busa magpasakop kamo ha Dios; kondi tigia niyo an Yawa, ngan mapalagiw hiya ha iyo.”—Jakobo 4:7.

16. Hin-o an ginagamit ni Jehova ha pagbulig ha iya mga surugoon nga ginsusulay?

¹⁶ Gintugotan ni Jehova nga sulayon an iya Anak. Kondi katapos atohan ni Jesus an Yawa, nga ginagamit an Pulong han Dios sugad nga panalipod, hi Jehova nagsugo hin iya mga anghel ha pagparig-on ha iya. (Mateo 4:1-11) Ginagamit liwat ni Jehova an iya mga anghel ha pagbulig ha aton kon nag-aampo kita nga may pagtoo ngan ginhihimo naton hiya nga aton arayopan. (Salmo 34:7; 91:9-11) Hi apostol Pedro nagsurat: “An Ginoo maaram ha pagluwas ha matinumanon ha Dios tikang ha panulay, ngan pagkapot ha diri matinumanon ha Dios ha ilarom ha pagkahinukman ngada ha adlaw han paghukom.”—2 Pedro 2:9.

Hirani Na an Bug-os nga Kaluwasan

17. Pinaagi han paghatag ha aton han modelo nga pag-ampo, paonan-o iginbutang ni Jesus an mga kahimtang ha husto nga lugar hito?

¹⁷ Ha modelo nga pag-ampo, iginbutang ni Jesus an mga kahimtang ha husto nga lugar hito. Kinahanglan nga an aton siyahan nga pagtagad amo an pagbaraan han harangdon ngan baraan nga ngaran ni Jehova. Tungod kay an instrumento ha pagtuman hini amo an Mesianiko nga Ginhadian, igin-aampo naton nga kumanhi an Ginhadian basi bungkagon an ngatanan nga diri-hingpit nga mga ginhadian o mga gobyerno han tawo, ngan basi siguruhon nga bug-os nga matutuman an kaburut-on han Dios, sugad ha langit amo man ha tuna. An aton paglaom ha kinabuhi nga waray kataposan ha paraiso nga tuna nadepende ha pagbaraan han ngaran ni Jehova ngan ha pagkilala han iya matadong nga pagkasoberano ha bug-os nga uniberso. Katapos mag-ampo para hinin pinakaimportante nga mga butang, mahimo naton ig-ampo an aton adlaw-adlaw nga mga panginahanglan, an kapasayloan han aton mga sala, ngan an kaluwasan tikang ha mga pagsulay ngan mga limbong han usa nga maraot, hi Satanas nga Yawa.

18, 19. Paonan-o an modelo nga pag-ampo ni Jesus nabulig ha aton nga magpabilin nga nag-aagma ngan himoon an aton paglaom nga ‘marig-on tubtob ha kataposan’?

¹⁸ Nagtitikahirani na an aton bug-os nga kaluwasan tikang ha usa nga maraot ngan ha iya maraot nga sistema han mga butang. Maaram gud hi Satanas nga may-ada na la hiya “halipot nga panahon” nga nahibibilin ha pagpahayag han iya “daku nga kasina” dinhi ha tuna, labi na ha matinumanon nga mga surugoon ni Jehova. (Pahayag 12:12, 17) Ha kabug-osan nga tigaman han “kataposan han kalibotan,” hi Jesus nagtagna hin makalilipay nga mga hitabo, nga an iba hito ha tidaraon pa. (Mateo 24:3, 29-31) Samtang nakikita naton nga nahitatabo ini, an aton paglaom ha kaluwasan magigin mas malamrag. Hi Jesus nagsiring: “Kon ini nga mga bagay magtikang paghinabo, kulaw ha igbaw, ngan ihangad an iyo mga ulo; kay an iyo katubsanan nagtitikahirani.”—Lukas 21:25-28.

¹⁹ An halipot nga modelo nga pag-ampo nga iginhatag ni Jesus ha iya mga disipulo usa nga maopay nga giya ha aton may kalabotan ha kon ano an iuupod ha aton mga pag-ampo samtang nagtitikahirani an kataposan. Hinaot magpabilin kita nga nasarig nga tubtob gud ha kataposan, hi Jehova magpapadayon ha pagtagana han aton adlaw-adlaw nga mga panginahanglan, ha espirituwal ngan ha materyal. An aton mainampoon nga pag-agma mabulig ha aton nga ‘parig-unon an aton una nga pagsarig tubtob ha kataposan.’—Hebreo 3:14; 1 Pedro 4:7.

[Footnote]

Sugad nga Repaso

• Ano an iginpapasabot han aton paghangyo hin ‘kan-on ha ikinaadlaw’?

• Isaysay an kahulogan han pangamuyo nga “pagwad-on mo an amon mga utang, sugad han amon pagwara han mga nakakautang ha amon.”

• Ano an kahulogan kon naghahangyo kita kan Jehova nga diri kita pagdad-on ngadto ha pagsulay?

• Kay ano nga kinahanglan mag-ampo kita nga ‘luwason kita tikang ha usa nga maraot’?

[Mga Pakiana]

[Mga Retrato ha pahina 15]

Kinahanglan pasayloon naton an iba kon karuyag naton nga pasayloon kita

[Ginkuhaan han mga Retrato ha pahina 13]

Lydekker