Kon Paonan-o Mo Matatagbaw an Imo Espirituwal nga mga Panginahanglan

HA NAGLABAY nga dekada, sobra 300 nga libro nga iginsurat mahitungod ha bahin han espirituwalidad ha sekular nga trabaho han usa—tikang ha Jesus CEO tubtob ha The Tao of Leadership—an nakapuno ha mga tindahan han libro,” siring han U.S.News & World Report. Ini nga uso naghuhulagway la han kamatuoran nga ha damu nga mainuswagon ha ekonomiya nga mga nasud, nag-uuswag an hingyap para ha espirituwal nga giya ha kinabuhi. Ha pagkomento may kalabotan hini, an barasahon ha komersyo nga Training & Development nakaobserba: “Ha usa ka panahon nga makakaimpluwensya an teknolohiya ha ngatanan nga iba pa nga bahin han aton kinabuhi, namimiling kita hin mas hilarom nga kahulogan, hin katuyoan ha kinabuhi,  ngan hin mas daku nga personal nga katagbaw.”

Kondi, diin mo mabibilngan an makapatagbaw nga espirituwal nga giya? Ha naglabay, naglaom an katawohan ha establisado nga relihiyon ha pagbulig ha ira nga makabiling hin “mas hilarom nga kahulogan” ngan “katuyoan” ha kinabuhi. Yana nga panahon, damu an nagsalikway ha establisado na nga relihiyon. Usa nga surbey han 90 nga higtaas-an-ranggo nga mga manidyer ngan mga ehekutibo an nakaobserba nga “an mga tawo may-ada matin-aw nga pagkilala ha pagkaiba han relihiyon ngan espirituwalidad,” siring han Training & Development. Ginhunahuna han mga inapi ha surbey an relihiyon sugad nga “istrikto ngan nakakabahin,” samtang an espirituwalidad ginsabot sugad nga “unibersal ngan nag-uupod han ngatanan.”

Damu nga mga batan-on ha diri relihiyoso nga mga sosiedad, sugad han Australia, New Zealand, United Kingdom, ngan Europa, an nakakakita liwat han kaibahan butnga han relihiyon ngan espirituwalidad. Ha pagsurat ha Youth Studies Australia, hi Propesor Ruth Webber marig-on nga nasiring: “An kadam-an han mga batan-on natoo ha Dios, o ha usa nga klase han labaw-ha-natural nga puwersa kondi diri nagtatagad ha relihiyon sugad nga importante o makakabulig gud ha pagpahayag han ira espirituwalidad.”

An Totoo nga Relihiyon Nag-aaghat han Espirituwalidad

Hinsasabtan inin maruhaduhaon nga pagtagad ha relihiyon. Damu nga relihiyoso nga mga organisasyon an nahidadabi gud ha intriga ha politika ngan pagkasalingkapaw ha moral ngan salaan ha pagpatay o pag-uyon ha pagpatay ha inosente nga mga tawo ha diri maihap nga mga away han mga relihiyon. Kondi, samtang iginsasalikway an relihiyoso nga mga organisasyon nga nahugawan han pagkasalingkapaw ngan panlimbong, an pipira nagsasayop ha pagsalikway liwat han Biblia, nga ginhuhunahuna nira nga nakonsinter han sugad nga mga buhat.

Ha pagkamatuod, ginkukondenar han Biblia an pagkasalingkapaw ngan karaotan. Hi Jesus nagsiring ha relihiyoso nga mga lider han iya panahon: “Kairo niyo, mga eskriba ngan mga Pariseo, mga salingkapaw! Kay sugad kamo han mga pinabusag nga mga lurubngan, nga ha gawas matahom, kondi an sakob puno han mga tul-an han mga patay nga mga tawo, ngan han ngatanan nga mga kahugawan. Sugad man kamo, nga ha gawas napakita ha mga tawo nga mga magtadong, kondi ha sakob mga puno kamo hin pagkasalingkapaw ngan karaotan.”—Mateo 23:27, 28.

Dugang pa, gindadasig han Biblia an mga Kristiano nga magin neutral ha ngatanan nga mga buruhaton han politika. Imbes nga aghaton an mga tumuroo nga magpinatyanay ha usa kag usa, nagsusugo ito nga sadang hira magin andam nga mamatay para ha usa kag usa. (Juan 15:12, 13; 18:36; 1 Juan 3:10-12) Imbes nga magin “istrikto ngan nakakabahin,” an totoo nga relihiyon, nga basado ha Biblia, “nag-uupod han ngatanan.” Hi apostol Pedro nagsiring: “An Dios waray ginpasulabi han mga tawo; kondi tikang ha ngatanan nga mga nasud hiya nga nahahadlok ha iya, ngan nagbubuhat hin matadong, naruruyagan niya.”—Buhat 10:34, 35.

An Biblia—Masasarigan nga Giya Ngadto ha Espirituwal nga Kahimsog

An Biblia nagsusumat ha aton nga an katawohan ginlarang ha dagway han Dios. (Genesis 1:26, 27) Bisan kon diri ini nangangahulogan nga an mga tawo pariho ha Dios ha pisikal nga paagi, nangangahulogan ito nga an mga tawo may-ada abilidad ha pagpakita han mga personalidad han Dios, upod na an abilidad para han espirituwal nga mga butang, o espirituwalidad.

Tungod kay ito an kahimtang, makatadunganon an tumoo nga ihahatag liwat han Dios ha aton an mga paagi ha pagtagbaw han aton espirituwal nga mga panginahanglan, sugad man an husto nga giya nga pinaagi hito aton makikilala an makakaopay ngan an makakadaot han aton espirituwalidad. Sugad la nga ginlarang han Dios an aton mga lawas nga may maopay hinduro an pagkadisenyo nga immune system, nga nakikig-away ha sakit ngan nabulig ha aton nga magin mahimsog, gintagan liwat kita niya hin konsensya, o tingog ha sulod naton, nga nakakabulig ha aton nga maghimo hin husto nga mga desisyon ngan malikyan an mga buhat nga nakakadaot ha pisikal ngan ha espirituwal. (Roma 2:14, 15) Sugad han aton hinbabaroan, basi gumios an aton immune system, kinahanglan pakaunon ito hin husto. Ha pariho nga paagi, basi gumios an aton konsensya, kinahanglan naton pakaunon ito hin maopay nga espirituwal nga pagkaon.

Ha pag-unabi han klase han pagkaon nga magtitipig ha aton nga mahimsog ha espirituwal, hi Jesus nagsiring: “Diri la an tinapay an nakakabuhi han tawo, kondi an ngatanan nga pulong, nga nagowa  ha baba han Dios.” (Mateo 4:4) An mga kapahayagan ni Jehova nakarekord ha iya Pulong, an Biblia, ngan ito “may kapulsanan man ha [pagtutdo], ha pagbadlong, ha pagsaway, ha panutdoan nga ha katadongan.” (2 Timoteo 3:16) Salit, responsabilidad naton nga mangalimbasog ha pagkaon hito nga espirituwal nga pagkaon. Samtang gin-aadman naton an Biblia ngan nangangalimbasog kita nga iaplikar an mga prinsipyo hito ha aton kinabuhi, padayon nga magpapahimulos kita hin espirituwal ngan pisikal nga mga bendisyon.—Isaias 48:17, 18.

Takos Ba Ito han Pangalimbasog?

Oo, nagkikinahanglan hin panahon an pagpauswag han aton espirituwal nga kahimsog pinaagi han pag-aram ha Biblia; ngan baga hin an mga tawo waray na daku nga sobra nga panahon nga diri pa kinahanglan ha partikular nga katuyoan. Kondi an mga balos takos han pangalimbasog! Tigamni kon paonan-o an pipira nga sagipo nga propesyonal nga mga tawo nagsasaysay kon kay ano nga importante ha ira an paggahin hin panahon ha pag-ataman han ira espirituwal nga kahimsog.

Hi Marina, usa nga doktora, nasiring: “Ha pagkatinuod waray gud ako maghunahuna mahitungod han akon espirituwalidad tubtob nga nagtrabaho ako ha usa nga ospital ngan nagtikang umabat gud ha pag-antos han iba. Hito nga panahon, nasantop ko nga kinahanglan ko kilalahon ngan tagbawon an akon espirituwal nga panginahanglan basi magin mamurayawon ngan kalmado, tungod kay an kahimtang han kinabuhi ngan an obligasyon ha pagtagad ha mga kabaraka han mga tawo mahimo makaapekto gud ha mga tawo ha akon propesyon.

“Nag-aaram na ako yana ha Biblia kaupod han mga Saksi ni Jehova. Ini nga pag-aram nabulig ha akon nga usisahon an akon mga panggawi ngan mga motibo ha positibo nga paagi ngan nagbabansay han akon panhunahuna nga magin mas positibo, basi matipigan ko nga timbang an akon kinabuhi. Daku gud an akon katagbaw ha akon sekular nga karera. Kondi an akon pag-aram ha Biblia an nagpauswag han akon maopay nga emosyon, binubuligan ako ha pagkontrol han diri maopay nga mga pagbati, pag-iban han tensyon, ngan pagin mas pasensyoso ngan mapinairon ha mga tawo. An pag-aplikar han mga prinsipyo han Biblia nakabulig liwat ha akon pag-asawa. Labaw nga importante, nakilala ko hi Jehova ngan nakaeksperyensya ako, ha gutiay nga sukol, han waray ulang nga pag-agos han iya espiritu, nga nakahatag ha akon kinabuhi hin mas daku nga kahulogan.”

Hi Nicholas, usa nga arkitekto nga paradisenyo, nasiring: “Antes ako mag-aram ha Biblia kaupod han mga Saksi ni Jehova, waray ako interes ha espirituwal nga mga butang. An akon la tumong ha kinabuhi amo an paglampos ha akon pinili nga propesyon. An akon pag-aram ha Biblia nagtutdo ha akon nga an kinabuhi nag-uupod han iba pa nga mga butang gawas han propesyon han usa ngan an pagbuhat han kaburut-on ni Jehova nagdadara hin totoo ngan nagpapadayon nga kalipayan.

“An akon sekular nga propesyon naghahatag gud ha akon hin katagbaw, kondi an Biblia an nagtututdo ha akon han bili ha pagtipig han kinabuhi nga simple pinaagi han pagsentro ha espirituwal nga mga butang. Pinaagi han pagbuhat hito, nalikyan namon nga mag-asawa an duro nga kaguol tungod han materyalistiko nga estilo han kinabuhi. Nagkaada liwat kami totoo nga kasangkayan pinaagi han amon pakig-upod hadton may-ada pariho nga panlantaw ha kinabuhi.”

Hi Vincent, usa nga abogado, nasiring: “An maopay nga sekular nga propesyon mahimo magtagana hin usa ka sukol han katagbaw. Kondi, hinbaroan ko nga daku pa gud an ginkikinahanglan  basi magkaada kalipay ngan katagbaw. Antes hibaroan an katutdoan han Biblia mahitungod ha kalipay ngan katagbaw, nahinumdoman ko an tigda nga pakasantop han kawaray kahulogan han kinabuhi—katawo, pagtubo, pag-asawa, pagtrabaho basi makagtagana han materyal nga ginkikinahanglan ha pagpadaku han mga anak han usa, pagbansay ha ira nga sumunod ha pariho gud nga sikolo han kinabuhi, ngan ha kataposan pagkalagas ngan pagkamatay.

“Han matapos ko la an akon pag-aram ha Biblia kaupod han mga Saksi ni Jehova nga nakarawat ko an makapatagbaw nga mga baton ha akon mga pakiana mahitungod ha katuyoan han kinabuhi. An akon pag-aram ha Biblia nakabulig ha akon nga makilala hi Jehova sugad nga persona ngan mapatubo an hilarom nga gugma ha iya. Nagin basihan ko ini ha pagtipig hin mahimsog nga espirituwal nga panlantaw samtang nangangalimbasog ako nga magkinabuhi uyon ha akon hinbabaroan nga iya katuyoan. Yana, kami nga mag-asawa natatagbaw tungod kay maaram kami nga ginagamit namon an amon kinabuhi ha may katuyoan nga paagi.”

Ikaw liwat mahimo umabat hin katuyoan ngan kahulogan ha kinabuhi pinaagi han pag-aram ha Biblia. Nalilipay an mga Saksi ni Jehova ha pagbulig ha imo. Pariho kan Marina, Nicholas, ngan Vincent, matatagbaw ka ha paghibaro mahitungod kan Jehova ngan ha iya mga katuyoan para ha katawohan ha kabug-osan ngan para ha imo sugad nga indibiduwal. Magkakaada ka diri la han kalipay ha pagtuman han imo espirituwal nga mga panginahanglan yana kondi han paglaom liwat nga mabuhi ha waray kataposan ha hingpit nga pisikal nga kahimsog—usa nga paglaom nga abrido la ngada hadton “mahunahunaon han ira espirituwal nga panginahanglan.”—Mateo 5:3, NW.

Usa nga paagi nga mapapatubo an aton espirituwalidad amo an pag-ampo. Gumamit hi Jesus hin panahon ha pagtutdo ha iya mga disipulo kon paonan-o an pag-ampo, gintagan hira han komon nga tinatawag nga Pag-ampo han Ginoo. Ano an kahulogan hito nga pag-ampo ha imo yana? Paonan-o ka makakapahimulos tikang hito? Mahibabaroan mo an mga baton ha sunod nga duha nga artikulo.

[Mga Retrato ha pahina 6]

Marina

[Mga Retrato ha pahina 7]

Nicholas

[Mga Retrato ha pahina 7]

Vincent