Malalamposan Mo an Kawaray-Kasigurohan

“SIGURADO!” “Totoo gud ito!” “Garantisado!” Sigurado nga hinbatian mo na an sugad nga mga ekspresyon hin damu ka beses. Kondi, ha aton adlaw-adlaw nga kinabuhi, gutiay la nga butang an sigurado. Diri gud mahihibaroan an mahitatabo ha kinabuhi salit agsob nga naghuhunahuna kita kon may-ada ba bisan ano nga makakasiguro gud kita. An pagruhaduha ngan an kawaray-kasigurohan baga hin bahin na han kinabuhi.

Normal la nga kadam-an nga mga tawo an naghihingyap hin seguridad ngan kalipayan para ha ira kalugaringon ngan ha ira pamilya. Nagtatrabaho hira hin maduruto basi magkaada han mga butang nga ha ira pagtoo magpapalipay ngan maghahatag hin seguridad ha ira—kasagaran na nga kwarta ngan materyal nga mga panag-iya. Kondi, an linog, bagyo, aksidente, o madarahog nga krimen tigda nga makakadaot han sugad nga mga panag-iya. An grabe nga sakit, diborsyo, o kawaray-trabaho tigda nga makakagbag-o han mga kinabuhi. Oo, bangin diri ito mahitabo ha imo. Kondi, an paghibaro la nga posible nga may-ada maraot nga mahitabo ha bisan ano nga oras usa nga nakakapabaraka ngan nakakaguol nga pagpabati. Kondi diri la ito an problema.

An pulong nga “kawaray-kasigurohan” pariho an kahulogan ha pagruhaduha, ngan usa nga diksyonaryo an naghahatag hin kahulogan ha “pagruhaduha” sugad nga “kawaray-kasigurohan ha gintotoohan o opinyon nga agsob nga nag-uulang ha pagdesisyon.” Dugang pa, sumala ha libro nga Managing Your Mind, “an pagruhaduha mahitungod ha usa nga butang nga importante usa nga daku nga hinungdan han kaguol ngan kabaraka.” An padayon nga pagruhaduha mahimo magresulta ha kaguol, kapakyasan, ngan kasina. Oo, an kabaraka mahitungod ha posible o imposible mahitabo mahimo makadaot han aton mental ngan pisikal nga kahimsog.

Sugad nga resulta, an iba nga mga tawo nagbubuhat han kabaliktaran. Pariho hira ha usa nga batan-on nga taga-Brazil nga nagsiring: “Kay ano nga mabaraka mahitungod han mahitatabo? Sadang la kita mabaraka han yana, diri han tidaraon.” An sugad nakakadaot nga panhunahuna nga “pangaon ngan panginom kita,” magtutugway la ha kapakyasan, kabidoan, ngan ha kataposan, ha kamatayon. (1 Korinto 15:32) Mas maopay gud nga sumarig kita ha Maglalarang, hi Jehova nga Dios, nga mahitungod ha iya, an Biblia nasiring nga “waray pagkabarobalyo bisan landong tungod ha pagliso.” (Jakobo 1:17) Kon aton uusisahon an Pulong han Dios, an Biblia, makakabiling kita hin maopay nga sagdon ngan giya ha paglampos han waray-kasiguradohan nga mga kahimtang ha kinabuhi. Makakabulig liwat ito ha aton nga hisabtan kon kay ano nga may-ada damu hinduro nga kawaray-kasigurohan.

Hinungdan han Kawaray-Kasigurohan

An Kasuratan nagtatagana hin reyalistiko nga panlantaw mahitungod han kinabuhi ngan nabulig ha aton nga mapatubo an husto nga panhunahuna mahitungod ha kawaray-kasigurohan ngan  pagbag-o. Bisan kon an mga relasyon ha pamilya, katungdanan ha sosiedad, intelihensya, maopay nga kahimsog, ngan iba pa mahimo magtagana hin usa ka sukol han seguridad, iginpapakita han Biblia nga diri kita mahimo maghunahuna nga an sugad nga mga butang diri magbabag-o o maglaom ha pagkaada maopay nga kinabuhi. An maaramon nga hi Hadi Salomon nagsiring: “An rumba diri ha malaksi, diri man an away ha makusog, diri ngani an tinapay ha makinaadmananon, diri ngani an bahandi ha mga tawo nga may sarabotan, diri ngani an pagpalabi ha mga tawo nga senate.” Kay ano nga diri? “[Kay] an panahon ngan an higayon [“diri-linalaoman nga hitabo,” NW] nahinanabo ha ira ngatanan.” Salit, hi Salomon nagpahamangno: “Sugad han kaisdaan nga nakukuha ha maraot nga pukot, ngan sugad han katamsihan nga nagkadadakop ha bitik, amo man bisan an mga anak han mga tawo nanhihibitik ha maraot nga panahon, kon ini ha hinanali nahuhulog ha ira.”—Eklesiastes 9:11, 12.

Naghisgot liwat hi Jesu-Kristo mahitungod ha usa nga panahon han duro nga kabaraka ngan kawaray-kasigurohan tungod han diri sigurado nga mga kahimtang nga mahitatabo ha usa ka bug-os nga henerasyon han mga tawo. Ha matin-aw nga pagkayakan, hiya nagsiring: “Magkakaada mga tigaman ha adlaw, ngan ha bulan, ngan ha mga bitoon; ngan ha tuna an kasakit han mga katawohan upod ha kalisang tungod han kasamok han hagubuhob han dagat ngan han mga balud. Ngan an mga tawo manluluya tungod ha kahadlok, ngan tungod han pagtan-aw ha mga butang nga tiarabot ha kalibotan; kay an mga kagamhanan han kalangitan pag-uuy-ugon.” Kondi, may makapadasig nga ginsiring hi Jesus para ha tangkod-an-kasingkasing nga mga tawo yana: “Kon kamo kumita hini nga mga bagay nga mahinabo, hibabaroan niyo nga an ginhadian han Dios tikahirani.” (Lukas 21:25, 26, 31) Ha pariho nga paagi, imbes nga mahadlok ha waray-kasigurohan nga tidaraon, may-ada kita pagtoo ha Dios nga nabulig ha aton nga makita an lahos pa ha baga hin kawaray-kasigurohan han kalibotan ngadto ha maopay hinduro, sigurado nga tidaraon.

Pagkaada ‘Bug-os nga Paglaom’

Bisan kon diri kita nakakasiguro mahitungod ha ngatanan nga aton nababatian, nababasa, o nakikita, may-ada kita husto nga hinungdan ha pagsarig ha Maglalarang. Diri la hiya an Supremo nga Usa kondi usa liwat nga mahigugmaon nga Amay nga napaid ha iya tunan-on nga mga anak. Mahitungod ha iya Pulong, an Dios nagsiring: “Diri ini mabalik ha akon nga kawang, kondi magtutuman hadton akon karuyag, ngan ini mauswag dida ha bagay ngain ko ini igpapadara.”—Isaias 55:11.

Igintutdo ni Jesu-Kristo an kamatuoran tikang ha Dios, ngan damu nga namati ha iya an kinarawat hito nga may pagtoo ngan pagsarig. Pananglitan, usa nga grupo han tangkod-an-kasingkasing nga mga Samaritano an nagsiring ha babaye nga siyahan nga namati kan Jesus: “Kami natoo na, kondi diri tungod han imo yakan, kay kami ngahaw nakabati, ngan kinilala nga ini amo an matuod nga magluluwas han kalibotan.” (Juan 4:42) Ha sugad man nga paagi yana, bisan pa han pagkinabuhi ha mga panahon han kawaray-kasigurohan, diri kita sadang mawurok mahitungod ha kon ano an totoohan.

Mahitungod ha relihiyoso nga gintotoohan, damu an may-ada opinyon nga imbes nga mangalimbasog nga makasabot, sadang la kita tumoo. Kondi, an parasurat han Biblia nga hi Lukas diri nauyon hito nga opinyon. Hiya nagsaliksik ngan nagtagana hin husto nga impormasyon basi an iba mahimo “sumabot han kamatuoran han mga bagay” nga iya iginsurat. (Lukas 1:4) Tungod kay an mga kapamilya ngan kasangkayan nga diri pariho an relihiyon ha aton bangin nababaraka nga magsayop kita ngan mapakyas, importante nga madidepensahan naton an aton pagtoo. (1 Pedro 3:15) Pinaagi la ha paghibaro hin husto han hinungdan han aton gintotoohan nga makakabulig kita ha iba nga sumarig ha Dios. Iginhuhulagway han Biblia hi Jehova pinaagi hini nga mga pulong: “An bato nga bantilis, an iya buhat hingpit; kay an ngatanan niya nga mga dalan amo an katadongan: usa nga Dios ha pagkamatinumanon ngan waray  karat-an, subay ngan matadong hiya.”—Deuteronomio 32:4.

Tagda ito nga kataposan nga mga pulong: “Subay ngan matadong hiya.” Ano an aton ebidensya nga makakasiguro kita hini? Hi apostol Pedro bug-os nga kombinsido hito nga kamatuoran. Hiya nagsiring ha usa nga Romano nga opisyal ngan ha iya panimalay: “Matuod, akon nakita nga an Dios waray ginpasulabi han mga tawo; kondi tikang ha ngatanan nga mga nasud hiya nga nahadlok ha iya, ngan nagbubuhat hin matadong, naruruyagan niya.” (Buhat 10:34, 35) Ginyakan ni Pedro ini nga mga pulong tungod kay hinkit-an pa la niya kon paonan-o gingiyahan han Dios mismo an mga panhitabo basi an usa nga pamilya han mga Hentil, nga gintagad hadto nga mahugaw ngan diri kinakarawat, ginkarawat na Niya. Pariho kan Pedro, mahimo liwat kita makombinse han kawaray-pagpasulabi ngan katadongan han Dios kon personal nga nakikita naton “an daku nga panon” han katawohan—yana sobra unom ka milyon an kadamu—tikang ha sobra 230 nga nasud ha bug-os nga tuna nga binaya na ha ira daan nga paagi han pagkinabuhi ngan naglalakat na ha dalan han katadongan.—Pahayag 7:9; Isaias 2:2-4.

Sugad nga totoo nga mga Kristiano, karuyag naton nga magin, diri panatiko o dogmatiko, kondi mapainubsanon ngan makatadunganon. Kondi, diri kita nagruruhaduha mahitungod ha aton gintotoohan ngan ha aton ginlalaoman ha tidaraon. Ha siyahan-siglo nga mga Kristiano, hi apostol Pablo nagsurat: “Nagtitinguha kami nga an tagsatagsa ha iyo magpakita ha amo gihapon nga talinguha ngadto ha kabug-osan han paglaom tubtob ha kataposan.” (Hebreo 6:11) Ha pariho nga paagi, an maopay nga sumat tikang ha Biblia naghahatag ha aton ‘han bug-os nga paglaom.’ Ito nga paglaom, nga marig-on nga iginbasar ha Pulong han Dios, “diri nahatag hin kaawod,” sugad han iginsaysay liwat ni Pablo.—Roma 5:5.

Dugang pa, kombinsido gud kita nga an pagtutdo ha iba han maopay nga sumat tikang ha Biblia makakahatag ha ira hin marig-on nga pagsarig ha ira relasyon ha Dios, ngan makakabulig pa ngani ha ira nga umabat hin emosyonal ngan pisikal nga kasigurohan. Mahimo kita dumuyog kan Pablo ha pagsiring: “An amon maopay nga sumat waray umabot ha iyo ha pulong la, kondi sugad man ha gahum, ngan ha espiritu santo, ngan hin daku gud nga karig-onan.”—1 Tesalonika 1:5.

Mga Bendisyon Yana Tungod han Espirituwal nga Kasigurohan

Bisan kon diri kita bug-os nga makakalaom hin kasigurohan ha kinabuhi yana, may-ada naton mahihimo nga makakabulig ha aton nga magkaada marig-on ngan may seguridad nga kinabuhi. Pananglitan, an regular nga pakig-upod ha Kristiano nga kongregasyon ha mga katirok nakakaparig-on tungod kay didto gintututdoan kita hin husto ngan maopay nga mga prinsipyo ngan mga panggawi. Hi Pablo nagsurat: “Sugoa adton mga manggaranon hini yana nga panahon, nga diri hira magpakahitaas, ngan diri nira ibutang an ira paglaom dida ha diri kamarig-on han mga bahandi, kondi ha Dios, nga nahatag ha aton hin kahuraan ha ngatanan ha pagkalipay.” (1 Timoteo 6:17) Pinaagi ha pagsarig kan Jehova ngan diri ha temporaryo nga materyal nga mga butang o mga kalipayan, damu an naglampos ha pagkuha tikang ha ira kalugaringon han mga pangarit ngan mga kapakyasan nga kinahanglan nira antuson hadto.—Mateo 6:19-21.

Ha kongregasyon, nagpapahimulos liwat kita han mahigugmaon nga pagminagburugto, nga nagtatagana hin bulig ngan suporta ha damu nga mga paagi. Ha usa ka takna ha iya ministeryo, hi apostol Pablo ngan an iya mga kaupod ha pagbiyahe inabat hin “mabug-at gud” ngan ‘waray na paglaom nga mabuhi.’ Diin nakabiling hin suporta ngan bulig hi Pablo? Syempre, an iya pagsarig ha Dios waray gud manluya. Kondi, nadasig hiya ngan naliaw han mga igkasi-Kristiano nga binulig ha iya. (2 Korinto 1:8, 9; 7:5-7) Yana kon naabot an mga kataragman o iba nga kalamidad, an aton Kristiano nga kabugtoan an siyahan nga naabot ha paghatag han ginkikinahanglan nga bulig ha materyal ngan ha espirituwal ha mga igkasi-Kristiano sugad man ha iba nga nagkikinahanglan.

Usa pa nga bulig ha paglampos han waray-kasigurohan nga mga kahimtang ha kinabuhi amo an pag-ampo. Pirme kita makakasarig ha aton mahigugmaon nga langitnon nga Amay kon aada kita ha diri linalaoman nga pag-ipit. “Hi Jehova amo liwat an hitaas nga kuta nga pangarayupan han mga tinalumpigos. An hitaas nga kuta ha mga oras han kakurian.”  (Salmo 9:9) Mahimo mapakyas an tawhanon nga mga kag-anak ha pagpanalipod ha ira mga anak. Kondi, andam an Dios ha pagbulig ha aton nga malamposan an aton mga kahadlok ngan mga pagbati han kawaray-kasigurohan. Pinaagi ha paghatag han aton mga pangarit ngadto kan Jehova ha pag-ampo, makakasiguro kita nga hiya “[makakahimo] hin labaw gud nga kahuraan labaw pa ha ngatanan nga aton pinangangaro o ginhuhunahuna.”—Efeso 3:20.

Regular ka ba nga nag-aampo ha Dios? Kombinsido ka ba nga an imo mga pag-ampo pinamamatian han Dios? “Hi Nanay nagsiring ha akon nga sadang ako mag-ampo ha Dios,” siring han usa ka batan-on nga babaye ha São Paulo. “Kondi ginpakianhan ko an akon kalugaringon: ‘Kay ano nga makikiistorya ako ha usa nga diri ko ngani kilala?’ Kondi, binuligan ako han Proberbios 18:10 nga hisabtan nga kinahanglan naton an bulig han Dios ngan kinahanglan naton makiistorya ha iya ha pag-ampo.” Ito nga teksto nasiring: “An ngaran ni Jehova amo an marig-on nga balwarte; an matadong nadalagan ngadto ngan naluluwas.” Oo, paonan-o kita makakapatubo hin pagsarig ngan kompyansa kan Jehova kon diri kita regular nga nakikiistorya ha iya? Basi mapahimulsan an mga bendisyon han espirituwal nga seguridad, kinahanglan batasanon naton an kinasingkasing nga pag-ampo kada adlaw. Hi Jesus nagsiring: “Pag-agmahi niyo ha ngatanan nga panahon, ngan mag-ampo basi kamo magpakapalagiw ha ngatanan hini nga mga bagay nga maabot, ngan pagtukdaw hin marig-on ha atubangan han Anak han tawo.”—Lukas 21:36.

Usa pa nga butang nga makakasiguro kita amo an aton paglaom ha Ginhadian han Dios. Tigamni an mga pulong ha Daniel 2:44: “An Dios ha langit magpapabangon hin usa nga ginhadian, nga diri gud magugunaw, diri man an kagamhanan hini itatapod ha iba nga katawohan; kondi ini magpipinitpinit ngan mag-aanaw hini ngatanan nga ginhadian, ngan ini matindog ha kadayonan.” Marig-on ito nga paglaom ngan usa nga masasarigan gud naton. Agsob nga napapakyas an mga saad han tawo, kondi pirme kita makakasarig ha pulong ni Jehova. Imbes han pagin diri-mataporan, an Dios pariho hin usa ka daku nga bato nga aton masasarigan. Mahimo kita umabat han gin-abat ni David, nga nagsiring: “An Dios, akon bato, ha iya ako maayop; akon taming, ngan sungay han akon kaluwasan, akon hitaas nga balwarte, ngan akon arayopan. Akon manluluwas, ikaw nagluwas ha akon tikang ha naggamit hin lugos.”—2 Samuel 22:3.

An gin-unabi na nga libro nga Managing Your Mind dugang nga nakaobserba: “Kon mas ginhuhunahuna han usa an mga magraot nga bangin mahitabo, nagigin mas reyalistiko ito ha aton hunahuna, ngan mas makuri an paghunahuna kon paonan-o ito malalamposan.” Salit, kay ano nga pasagdan an aton kalugaringon nga mabug-atan han mga pangarit ngan mga pagruhaduha han kalibotan? Lugod, ibutang an imo pagsarig, diri ha waray-kasigurohan nga mga butang han kalibotan, kondi ha sigurado nga mga saad nga igintatagana han Dios. Pinaagi ha pagkaada marig-on nga pagtoo ha diri napapakyas nga mga saad ni Jehova, may-ada kita hini nga pasarig: “Bisan hin-o an natoo ha iya diri pagpapakaalohan.”—Roma 10:11.

[Blurb ha pahina 29]

An Pulong han Dios naggagarantiya hin tidaraon nga mga bendisyon para ha katawohan

[Blurb ha pahina 30]

“Bisan hin-o nga natoo ha iya diri pagpapakaalohan”

[Retrato ha pahina 31]

An maopay nga sumat han Ginhadian nagdadara hin seguridad ha mga tawo