Istorya han Kinabuhi

Nakakaeksperyensya han Mahigugmaon-nga-pagkabuotan Ngan Pag-ataman ni Jehova

IGINSUMAT NI FAY KING

Buotan an akon mga kag-anak, kondi pariho han damu hinduro nga iba pa, nadiri gud hira ha relihiyon. Agsob sumiring hi Nanay: “Sigurado nga may-ada Dios, kay kon waray, hin-o an naghimo han mga bukad, ngan hin-o an naghimo han kakahoyan?” Kondi tubtob la dida an iya panhunahuna mahitungod ha relihiyon.

NAMATAY hi Tatay han 1939 han 11 anyos ako, ngan nag-ukoy ako kaupod han akon iroy ha Stockport, ha sur la han Manchester, Inglatera. Maiha na nga karuyag ko mahibaro hin dugang pa mahitungod han akon Maglalarang ngan gintahod ko an Biblia, bisan kon waray ako hinbabaroan mahitungod hito. Salit nagdesisyon ako nga tumambong ha Iglesia han Inglatera basi hibaroan kon ano an maihahatag hito.

An mga seremonya han singbahan waray epekto ha akon, kondi kon binabasa an Mga Ebanghelyo, an mga pulong ni Jesus ha anoman nga paagi nakakombinse ha akon nga an Biblia totoo gud. Ha paghunahuna mahitungod hito, baga hin urusahon nga waray ko personal nga basaha an Biblia. Bisan ha urhi, han gintagan ako han usa nga sangkay han amon pamilya hin “Bag-o nga Testamento” ha moderno nga hubad, waray ko gud hatagi hin panahon nga basahon ito.

An pagtikang han Girra ha Korea han 1950 nakaaghat gud ha akon nga maghunahuna. Magsasarang ba an girra, sugad han nahitabo han Girra ha Kalibotan II? Kon nagsarang adto, paonan-o ko masusunod an sugo ni Jesus nga higugmaon an akon mga kaaway? Kondi, mahimo ba ako mag-inukoy ngan magkita na la ha mga tawo nga nagsasakop ha akon nasud ngan waray binubuhat ha pagpaundang ha ira? Kon buhaton ko ito, sigurado nga linilikyan ko an akon responsabilidad. Bisan kon nawurok ako, kombinsido pa gihapon ako nga  an mga baton ha ngatanan ko nga mga pakiana aada ha Biblia, bisan kon waray ako ideya kon paonan-o o kon diin ko hiaagian ito.

Pagbiling han Kamatuoran ha Australia

Han 1954 nagdesisyon kami ni Nanay nga bumalhin ngadto ha Australia, diin nag-uukoy an akon bugto nga hi Jean. Paglabay hin pipira ka tuig, ginsumatan ako ni Jean nga ginhangyo niya an mga Saksi ni Jehova nga bumisita ha akon tungod kay maaram hiya nga interesado ako ha Biblia ngan nasingba ako. Karuyag niya hibaroan kon ano an akon panhunahuna mahitungod ha mga Saksi ni Jehova. “Diri ako maaram kon husto o diri an ira mga pagsaysay,” nagsumat hiya ha akon, “kondi nakakasaysay hira hin mas maopay kay han ha mga singbahan.”

Makaruruyag nga magpadis hira Bill ngan Linda Schneider, an mag-asawa nga binisita ha akon. Hirani na hira magsetenta ngan mga Saksi ha sulod hin damu ka tuig na. Nagtrabaho hira hadto ha estasyon han radyo nga gindumara han mga Saksi ni Jehova ha Adelaide, ngan han igdiri an pagsangyaw nga buruhaton ha Australia durante han Girra ha Kalibotan II, nagpalista hira sugad nga bug-os-panahon nga mga ebanghelisador. Kondi, bisan kon mabinuligon hira Bill ngan Linda ha akon, nag-uusisa pa gihapon ako ha iba nga mga relihiyon.

Igin-upod ako han usa nga katrabaho ha usa nga katirok han ebanghelista nga hi Billy Graham, ngan katapos hito an pipira ha amon nakigkita ha usa nga klerigo nga nag-aghat hin mga pakiana. Iginbangon ko an usa nga pakiana nga nakakawurok pa gihapon ha akon hito nga panahon: “Paonan-o ka magigin usa nga Kristiano ngan hihigugmaon an imo mga kaaway kon nakadto ka ha girra ngan ginpapatay hira?” Tigda nga nag-aringasa an bug-os nga grupo—ito nga pakiana matin-aw nga nakapabaraka ha ira ngatanan! Waray pag-iha, an klerigo nagsiring: “Diri ako maaram han baton hito. Ginhuhunahuna ko pa an mahitungod hito.”

Samtang hito nga panahon, nagpapadayon an akon pag-aram ha Biblia upod ni Bill ngan ni Linda, ngan han Septyembre 1958, nabawtismohan ako. Nagdesisyon ako nga sundon an susbaranan han mga nagdumara han pag-aram ha akon, salit han Agosto han sunod nga tuig, nagpalista ako sugad nga regular payunir, usa nga bug-os-panahon nga ebanghelisador. Paglabay hin walo ka bulan ginhangyo ako nga magin espesyal payunir. Nalipay gud ako han hinbaroan ko nga an akon bugto nga hi Jean nag-uswag liwat ha iya pag-aram ngan nabawtismohan!

Naabrihan an Purtahan han Higayon

Nag-aalagad ako hadto ha usa han mga kongregasyon ha Sydney ngan nagdudumara hin pipira nga pag-aram ha Biblia ha balay. Usa ka adlaw nakaistorya ko an usa nga retirado nga klerigo han Iglesia han Inglatera ngan nagpakiana ha iya han ginsisiring han iglesia mahitungod ha kataposan han kalibotan. Bisan kon ginsumatan niya ako nga igintutdo niya an doktrina han singbahan ha sulod hin 50 ka tuig, kinalasan ako han iya baton: “Kinahanglan ko pa hin panahon ha pagsaliksik hito tungod kay diri ako sugad han mga Saksi ni Jehova nga maaram gud han Biblia.”

Waray pag-iha katapos hini, may-ada panawagan para ha mga boluntaryo nga mag-alagad ha Pakistan. Nagpalista ako, tungod kay diri ako maaram nga an solo nga kababayin-an diri iginpapadara ngadto, an mga solo nga kalalakin-an la o mga mag-asawa. Matin-aw nga iginpadara an akon aplikasyon ngadto ha sentro nga opisina ha Brooklyn tungod kay waray pag-iha nakakarawat ako hin surat nga nagsusumat ha akon nga may-ada abrido nga pribilehiyo ha Bombay (tinatawag nga Mumbai yana), India, kon karuyag ko karawaton ito. Nahitabo ito han 1962. Ginkarawat ko ito ngan nagpabilin ako ha Bombay ha sulod hin 18 ka bulan antes bumalhin ngadto ha Allahabad.

Nangalimbasog dayon ako ha pag-aram hin Hindi. Ini nga yinaknan han India ha kabug-osan magkapariho an pagkasurat ngan pagkaluwas, salit diri  makuri hinduro hibaroan. Kondi, agsob nga nakakapanluya kon an mga tagbalay naghahangyo ha akon nga mag-Ingles imbes nga mangalimbasog ha pagyakan han ira yinaknan! Kondi inin bag-o nga nasud may-ada makapainteres ngan makapaaghat nga mga ayat, ngan naruyagan ko an asosasyon han mga igkasi-Saksi nga tikang ha Australia.

Han batan-on pa ako, naghunahuna ako mahitungod ha pag-asawa, kondi han nabawtismohan ako, sagipo ako hinduro ha pag-alagad kan Jehova salit nawarayan ako panahon ha paghunahuna hin dugang pa mahitungod hito. Kondi, yana, nagtitikang na liwat ako pag-abat han panginahanglan hin kaupod ha kinabuhi. Syempre, diri ko karuyag nga bayaan an akon toka ha iba nga lugar, salit nag-ampo ako kan Jehova mahitungod hito ngan ginpara ito ha akon hunahuna.

Diri Linalaoman nga Bendisyon

Hi Edwin Skinner an nagdudumara han buruhaton han sanga han India hito nga panahon. Nakatambong hiya ha ikawalo nga klase han Watchtower Bible School of Gilead han 1946 kaupod han damu nga matinumanon nga kabugtoan, upod na hi Harold King ngan Stanley Jones, nga igintoka ha Tsina. a Han 1958, hira Harold ngan Stanley ginbartolina tungod han ira pagsangyaw nga buruhaton ha Shanghai. Han ginpagawas hi Harold han 1963, ginsuratan hiya ni Edwin. Binalos hi Harold han iya pagbalik ngadto ha Hong Kong tikang ha iya mga pagbiyahe ngadto ha Estados Unidos ngan Britanya ngan nagsiring nga karuyag niya mag-asawa. Ginsumatan niya hi Edwin nga iya ini igin-ampo samtang priso hiya, ngan nagpakiana hiya kan Edwin kon may kilala hiya nga usa nga Saksi nga magigin maopay nga asawa.

Ha India an kadam-an nga mga pag-asawa ginhihikay, ngan pirme nga ginhahangyo hi Edwin nga maghimo han sugad nga mga paghikay, kondi pirme hiya nadiri ha pagbuhat hito. Salit iya iginhatag an surat ni Harold kan Ruth McKay, nga an bana, hi Homer, usa nga nagbibiyahe nga paramangno. Ha urhi, nagsurat ha akon hi Ruth ha pagsumat nga may misyonero nga damu na ka tuig ha kamatuoran nga namimiling hin maarasawa, ngan nagpakiana hiya kon interesado ako ha pagsurat ha iya. Waray niya ako sumati han ngaran han bugto o hin dugang pa mahitungod ha iya.

Waray maaram mahitungod han akon pag-ampo para hin makakaupod, gawas syempre kan Jehova, ngan an akon siyahan nga reaksyon amo an pagdumiri hito nga ideya. Kondi, han mas ginhunahuna ko an mahitungod hito, mas nahunahuna ko nga talagsa la batunon ni Jehova an aton mga pag-ampo ha paagi nga mahimo naton hunahunaon. Salit ginbalosan ko hi Ruth ngan nagsiring nga basta la diri ako obligado ha pag-asawa ha iya, mahimo pasuraton ni Ruth utro an bugto. An ikaduha nga surat tikang kan Harold King iginpadara ha akon.

An mga retrato ni Harold ngan an istorya mahitungod ha iya nakita ha magkalainlain nga mga pahayagan ngan mga magasin katapos pagawason hiya ha kapriso ha Tsina. Hini nga panahon, kilala hiya  ha bug-os nga kalibotan, kondi an iya rekord han matinumanon nga teokratiko nga pag-alagad an akon naruyagan. Salit nagsuratay kami ha sulod hin lima ka bulan, ngan katapos kinadto ako ha Hong Kong. Ginkasal kami han Oktubre 5, 1965.

Karuyag namon nga duha nga mag-asawa ngan magpabilin ha bug-os panahon nga pag-alagad, ngan samtang nagtitikalagas kami, inabat namon an daku nga panginahanglan hin kaupod. Nagtikadaku an akon gugma kan Harold, ngan samtang nakikita ko an buotan ngan mapinairon nga paagi han iya pagtagad ha mga tawo ngan ha mga problema nga nabangon may kalabotan ha amon pag-alagad, nakuha niya an akon hilarom nga pagtahod. Ha sulod hin 27 ka tuig nagpahimulos kami hin malipayon hinduro nga pag-asawa ngan kinarawat hin damu nga mga bendisyon tikang kan Jehova.

Maduruto nga mga tawo an mga Tsino, ngan karuyag ko gud hira. Ha Hong Kong, Cantonese an yinaknan nga ginagamit, usa nga yinaknan han mga Tsino nga may-ada damu nga mga tono, o mga punto, kay han Mandarin ngan salit baga hin makuri pag-adman. Katapos han amon kasal nag-ukoy kami ni Harold ha urukyan han mga misyonero ha sanga nga opisina han mga Saksi ni Jehova, ngan katapos nag-alagad kami ha mga toka ha magkalainlain nga mga bahin han Hong Kong. Oo, malipayon kami hinduro, kondi han 1976 nagkaada ako grabe nga problema ha kahimsog.

 Pag-atubang ha mga Problema ha Kahimsog

Gindinugoan ako ha sulod hin pipira ka bulan, ngan an akon blood count nag-ubos gud. Kinahanglan operahan ako, kondi an mga doktor ha ospital nagsiring ha akon nga diri hira mag-oopera nga waray dugo tungod kay kon buhaton nira ito, bangin ako mamatay ha shock. Usa ka adlaw han naghihisgot an mga doktor mahitungod han akon kahimtang, nangalimbasog an mga nars ha pagbag-o han akon hunahuna, nasiring nga waray ako katungod ha pagtapos han akon kinabuhi ha diri kinahanglanon nga paagi. May-ada 12 nga operasyon nga nakaeskedyol hiton nga adlaw, 10 hito an pagpunit, kondi naobserbahan ko nga waray nagpugong ha burod nga kababayin-an ha pagpatay han ira mga minasus-an.

Ha kataposan, naghimo hin surat hi Harold nga nagkukuha ha ospital han bisan ano nga baratunon kon ako mamatay, ngan inuyon an mga doktor ha pagbuhat han ginkikinahanglan nga operasyon. Gindara ako ngadto ha kuwarto para han pag-opera ngan gin-andam para ha pag-anestisya. Kondi han ooperahan na unta ako, nagdumiri ha pagpadayon an paraanestisya, ngan kinahanglan pagawason ako han ospital.

Katapos hito nagkonsulta kami hin gynecologist nga diri natrabaho hito nga ospital. Tungod kay nasantop an pagkagrabe han akon kahimtang, nagtanyag hiya ha pag-opera ha himubo nga presyo—basta diri la kami magsumat ha bisan hin-o kon pira an iya ginpabayad ha amon. Naglampos an iya pag-opera ha akon—ngan waray gud gamit hin bisan ano nga dugo. An mahigugmaon-nga-pagkabuotan ngan pag-ataman ni Jehova nakita gud namon ni Harold hinin partikular nga takna.

Han 1992, naggrabe hinduro an sakit ni Harold. Binalhin kami ngadto ha sanga nga opisina ngan mahigugmaon nga gin-ataman kami nga duha didto. Natapos han akon hinigugma nga bana an iya tunan-on nga pagkinabuhi han 1993 ha edad nga 81.

Pagbalik Ngadto ha Inglatera

Nalipay ako ha pagin membro han pamilya han Bethel ha Hong Kong, kondi padayon nga kinukurian ako tungod han kapaso ngan pagkamahulos-hulos han palibot. Katapos inabot an usa nga diri-linalaoman nga surat tikang ha sentro nga opisina ha Brooklyn, nagpapakiana kon maruruyag ba ako pagbalhin ngadto ha sanga nga opisina nga may-ada dugang nga mga pasilidad, tungod han akon kahimsog. Salit han tuig 2000, binalik ako ngadto ha Inglatera ngan nagin membro han pamilya han Bethel ha Londres. Mahigugmaon gud ini nga kahikayan! Mahigugmaon nga gin-abiabi ako, ngan nalilipay gud ako ha akon magkalainlain nga mga toka ha buruhaton, nga nag-uupod han pagbulig ha pag-ataman ha librarya han pamilya han Bethel ngan ha 2,000 nga libro hito.

Nakikig-upod liwat ako ha kongregasyon han mga Tsino nga nagkakatirok ha Londres, kondi nagbag-o na an mga kahimtang dinhi. Yana, gutiay la hinduro nga mga tawo an tikang ha Hong Kong kondi, lugod, tikang ha sentro han Tsina. Nagyayakan hira hin Mandarin, ngan nagigin usa ito nga bag-o nga ayat ha pagsangyaw nga buruhaton. Ha bug-os nga nasud may-ada mga report mahitungod han damu nga makapainteres nga mga pag-aram ha Biblia nga gindudumara ha mga estudyante tikang ha Tsina nga nagpapadayon pag-eskwela katapos han gradwasyon. Maduruto hira ngan naruruyag han kamatuoran han Biblia nga ira hinbabaroan. Makalilipay an pagbulig ha ira.

Ha kahimyang han akon bag-o nga urukyan, agsob nga ginpapamalandong ko an akon malipayon nga kinabuhi ngan padayon nga ginhuhunahuna an mahigugmaon-nga-pagkabuotan ni Jehova. Nakakaapekto ito ha ngatanan nga mga butang nga may kalabotan ha iya katuyoan, ngan nakikita hin matin-aw an iya pag-ataman ha iya mga surugoon sugad nga mga indibiduwal. May-ada ako han ngatanan nga hinungdan nga magin mapasalamaton tungod han ngatanan nga mahigugmaon nga pag-ataman niya ha akon.—1 Pedro 5:6, 7.

[Footnote]

[Retrato ha pahina 24]

Pag-alagad ha India

[Mga Retrato ha pahina 25]

Hi Harold King han 1963 ngan nag-aalagad ha Tsina ha dekada han 1950

[Mga Retrato ha pahina 26]

An amon kasal ha Hong Kong, Oktubre 5, 1965

[Retrato ha pahina 26]

Kaupod an mga membro han Bethel ha Hong Kong, an mag-asawa nga Liang ha butnga, ngan an mag-asawa nga Gannaway ha too