Pagliaw Para ha mga Nagsasakit Hinduro

HAN an matinumanon nga kalalakin-an ngan kababayin-an ha naglabay nag-antos hin duro nga kasakit, sinsero nga nag-ampo hira ha Dios para han giya. Kondi, ginbuhat liwat nira an kinahanglanon nga mga pitad basi maibanan an problema, sugad han paggamit han kaabtik basi malikyan an mga nagtatalumpigos. Pananglitan, an pagsarig kan Jehova nga may personal nga pangalimbasog nakabulig kan David nga mailob an iya kakurian. Kumusta man kita yana?

Kon nakakaeksperyensya hin duro nga kasakit, posible nga buhaton mo an mga paagi basi masulbad an imo problema. Pananglitan, kon waray ka trabaho, diri ka ba nangangalimbasog ha pamiling hin maopay nga trabaho nga makakabulig ha imo ngan ha imo pamilya? (1 Timoteo 5:8) O kon nag-aantos ka hin sakit ha lawas, diri ka ba namimiling hin igo nga bulig han doktor? Makapainteres nga hi Jesus, nga may-ada gahum tikang ha Dios ha pagtambal han ngatanan nga klase han mga sakit, nakasantop nga ‘an masakit nagkikinahanglan hin magtarambal.’ (Mateo 9:12) Kondi, an imo mga kakurian posible nga diri pirme kuhaon; bangin kinahanglan padayon nga ilubon mo ito ha usa ka sukol.

Kay ano nga diri iampo ito ngadto kan Jehova nga Dios? Pananglitan, kon namimiling hin trabaho, an pagsarig ha Dios upod an pag-ampo mabulig ha aton nga malikyan an bisan ano nga pagsulay ha pagkarawat hin trabaho nga nasupak ha mga prinsipyo ha Biblia. Malilikyan liwat naton nga ‘mahisimang ha pagtoo’ tungod han kahakog o gugma ha kwarta. (1 Timoteo 6:10) Oo, kon naghihimo hin importante nga mga desisyon may kalabotan ha trabaho o pamilya o mga kabaraka ha kahimsog, mahimo naton sundon an sagdon ni David: “Ibutang an imo dinara ha bawbaw ni Jehova, ngan ikaw iya bubuligan; diri gud hiya makakailob nga pagkiwahon an matadong.”—Salmo 55:22.

An kinasingkasing nga pag-ampo mabulig liwat ha aton nga matipigan an aton panhunahuna nga timbang basi diri kita maapektohan han aton duro nga kasakit. Sugad nga totoo nga Kristiano, hi apostol Pablo nagsurat: “Ha ngatanan nga bagay tungod ha pag-ampo ngan pangamuyo upod an pagpasalamat ipahibaro niyo ha atubangan han Dios an iyo mga pinangangaro.” Ha ano nga paagi nga an sinsero nga pag-ampo nakakaliaw ha aton? “An kamurayawan han Dios, nga labaw ha ngatanan nga hibabroan, magbabantay ha iyo mga kasingkasing ngan ha iyo mga hunahuna [pinaagi] kan Kristo  Jesus.” (Filipos 4:6, 7) An kamurayawan han Dios “labaw ha ngatanan nga hibabroan.” Salit, mapaparig-on kita hito kon nabubug-atan kita han nakakaguol nga mga emosyon. ‘Mababantayan hito an aton mga kasingkasing ngan an aton hunahuna,’ salit binubuligan kita nga malikyan an diri-ginhuhunahuna ngan diri-maaramon nga paggios, nga mahimo makadugang ha aton duro nga kasakit.

An pag-ampo mahimo pa ngani magkaada makatirigamnan nga epekto ha usa nga kahimtang. Han napriso hi apostol Pablo ha Roma, mapainubsanon nga ginhangyo niya an mga igkasi-Kristiano nga mag-ampo para ha iya. Kay ano nga naghangyo hini hi Pablo? “Naglalaygay gud ako ha iyo nga iyo ini buhaton,” hiya nagsurat ha ira, “basi nga mahibalik gud ako hin madali pa nganhi ha iyo.” (Hebreo 13:19) Ha iba nga pagkayakan, maaram hi Pablo nga an pagpamati ni Jehova ha mapinadayunon nga mga pag-ampo han iya mga igkasi-tumuroo mahimo makaapekto ha kon san-o hiya pagagawson.—Filemon 22.

Mababag-o ba han pag-ampo an resulta han aton duro nga kasakit? Posible. Kondi, sadang naton hibaroan nga bangin diri batunon ni Jehova nga Dios an aton mga pag-ampo uyon ha aton karuyag. Hi Pablo nag-ampo hin damu ka beses mahitungod han iya “tunok ha unod,” bangin usa nga sakit ha lawas. Kondi, imbes nga kuhaon an kasakit, an Dios nagsiring kan Pablo: “Iton akon grasya igo ha imo: kay iton akon gahum mahihingpit ha kamaluya. Busa maghihimaya gud ako hin labi ha akon mga kaluyahan.”—2 Korinto 12:7-9.

Salit, kon sugad, an aton kasakit bangin diri mawara dayon. Kondi, magkakaada kita higayon nga pamatud-an an aton pagsarig ha aton langitnon nga Amay. (Jakobo 1:2-4) Sarig nga bisan kon diri kuhaon ni Jehova nga Dios an aton duro nga kasakit, “mahatag liwat hiya hin katigayonan ha paglikay, basi nga [kita] makahimo ha pag-antos.” (1 Korinto 10:13) Makatirigamnan nga hi Jehova tinatawag nga “Dios han ngatanan nga paglipay; nga hiya an naglilipay ha aton ha ngatanan nga aton mga kagol-anan.” (2 Korinto 1:3, 4) Maihahatag han Dios ha aton an aton ginkikinahanglan basi makailob, ngan may-ada kita paglaom nga kinabuhi nga waray kataposan.

An Pulong han Dios, an Biblia, nagsasaad nga hi Jehova “[magpapahid han] ngatanan nga luha tikang ha ira mga mata; ngan mawawaray na kamatayon; ngan mawawaray na an kabidoan, bisan pagtangis, bisan kasakit pa gud.” (Pahayag 21:3, 4) An kalibotan ba nga waray duro nga kasakit baga hin makuri gud toohan? Makuri gud ito katoohan kon nahiara ka na ha pag-ukoy ha kakurian. Kondi, an katalwasan tikang ha kahadlok ngan kalamidad amo an iginsaad han Dios, ngan an iya katuyoan sigurado nga maglalampos.—Isaias 55:10, 11.

[Retrato ha pahina 9]

Tikang ha kawaray-paglaom ngadto ha katalwasan