“Pakig-away hin Maopay nga Pakig-away ha Pagtoo”

MAHAHANDURAW mo ba an bisan hin-o nga sundalo ha panahon han girra nga masusubo nga sugoon: “Uli ngan magkaada panahon ha imo asawa ngan pamilya”?

Usa nga sundalo ha panahon ni Hadi David han Israel an ginsugo hin sugad hito. Hi Uria nga Hitihanon ginsugo han hadi mismo ngan gin-aghat nga umuli. Kondi nagdumiri hi Uria ha pag-uli. Han ginpakianhan mahitungod han iya talagsahon nga reaksyon, binaton hi Uria nga an arka han kauyonan, nga nagrirepresentar han presensya han Dios, ngan an kasundalohan han Israel aadto ha kanataran han pakig-away. “Makadto la ba ako,” nagpakiana hiya, “ha akon balay, ha pagkaon ngan pag-inom, ngan pagdirig ha akon asawa?” Para kan Uria, an sugad nga buhat diri gud angayan ha sugad kapeligroso nga panahon.—2 Samuel 11:8-11.

An ginbuhat ni Uria nagbabangon hin importante nga mga pakiana, tungod kay kita liwat nagkikinabuhi ha panahon han girra. Usa nga girra an nagpapadayon yana nga waray kapariho ha bisan ano nga girra nga ginpakig-awayan han mga nasud han kalibotan. Kon itanding hini, baga hin diri gud makatirigamnan an duha nga girra ha kalibotan, ngan nahidadabi ka hini nga girra. Daku gud an posibilidad han peligro hito, ngan makaharadlok an kaaway. Dida hini nga girra, waray pusil nga pabubuthon, waray mga bomba nga ihuhulog, kondi nagkikinahanglan gihapon ito hin gamhanan nga mga taktika ha pakiggirra.

Antes magpalista sugad nga sundalo hini nga girra, kinahanglan hibaroan mo kon husto ba o kon ano an katuyoan han girra. Takos ba han pangalimbasog ito nga girra? An katuyoan hinin  naiiba nga girra iginpapatin-aw ni apostol Pablo ha iya surat ngadto kan Timoteo: “Pakig-away hin maopay nga pakig-away ha pagtoo.” Oo, hini nga girra kinahanglan depensahan mo, diri an usa nga kuta, kondi, an “pagtoo”—an bug-os nga Kristiano nga kamatuoran sugad han iginpahayag ha Biblia. Matin-aw, kinahanglan karawaton mo gud an pagkatotoo han “pagtoo” basi makig-away para hito ngan magdaog.—1 Timoteo 6:12.

An maaramon nga sundalo nangangalimbasog nga makilala an iya kaaway. Hini nga away, an kaaway may-ada na hilawig nga eksperyensya ha taktika han pakig-away, ngan may-ada damu hinduro nga mga katigayonan ngan mga hinganiban nga iya magagamit. Mas gamhanan liwat hiya kay ha tawo. Hiya mabangis, madarahog, ngan maraot; hiya hi Satanas. (1 Pedro 5:8) An literal nga mga hinganiban sugad man an tuso ngan malimbungon nga taktika han tawo waray pulos kontra hini nga kaaway. (2 Korinto 10:4) Ano an imo magagamit ha pakig-away hini nga girra?

An nangunguna nga hinganiban amo an “kampilan han espiritu, nga amo an pulong han Dios.” (Efeso 6:17) Iginpapakita ni apostol Pablo kon mationan-o kaepektibo ito: “An pulong han Dios buhi, ngan maabtik, ngan mamatarom pa kay han bisan ano nga kampilan nga duduha iton tarom, matarom kaopay nga sadang makagbahin han kalag ngan han espiritu, han kaluluthan ngan han mga utok, ngan madagmit makasabot ha mga hunahuna ngan mga tinguha han kasingkasing.” (Hebreo 4:11, 12) An hinganiban nga matarom hinduro, eksakto hinduro, nga nakakadulot ha mga panhunahuna ngan mga motibo han usa nga indibiduwal sigurado nga kinahanglan gamiton ha maabtik ngan ha maikmat nga paagi.

Posible nga maaram ka nga bisan kon an usa ka grupo han kasundalohan bangin may-ada han pinakabag-o nga mga hinganiban, kondi waray pulos ito kon an mga sundalo waray kaabtik ha paggamit hito. Ha sugad nga paagi, kinahanglan mo an instruksyon ha paggamit han imo hinganiban ha epektibo nga paagi. Makalilipay, mahimo ka bansayon han pinakaeksperyensyado nga mga sundalo. Gintawag ni Jesus ini nga mga sundalo-magturutdo sugad nga “matinumanon ngan maaramon nga uripon,” nga gintaporan hin responsabilidad ha pagtagana han napapanahon nga espirituwal nga pagkaon, o instruksyon, para ha iya mga sumurunod. (Mateo 24:45, NW) Makikilala mo ini nga grupo nga uripon pinaagi han pag-usisa han maduruto nga mga pangalimbasog hini ha pagtutdo ngan ha paghatag hin napapanahon nga mga pahamangno mahitungod han mga taktika han kaaway. An ebidensya nagpapamatuod nga ini nga grupo nga uripon ginkukompuwesto han mga membro han dinihogan-han-espiritu nga mga membro han Kristiano nga kongregasyon han mga Saksi ni Jehova.—Pahayag 14:1.

Ini nga grupo nga uripon diri la kay nagtututdo. Nagpapakita ito han disposisyon ni apostol Pablo, nga nagsurat ngadto ha kongregasyon ha Tesalonika: “Magtalunoy kami ha butnga niyo, sugad hin usa nga yaya nga nag-uugay ha iya kalugaringon nga anak: tungod hini, naghigugma gud kami ha iyo, ngan naruruyag kami, diri la ha paghatag han maopay nga sumat han Dios, kondi sugad man an amon mga kalag, tungod kay mga hinigugma kamo namon.” (1 Tesalonika 2:7, 8) Responsabilidad han tagsa nga Kristiano nga sundalo nga gamiton an igintagana nga mahigugmaon nga pagbansay.

An Bug-os nga Hinganiban

An bug-os nga simboliko nga hinganiban igintatagana basi magpanalipod ha imo. Mababasa mo an lista hini nga hinganiban ha Efeso 6:13-18. An maikmat nga sundalo diri magbubutang han iya kalugaringon ha peligro kon may bahin han iya espirituwal nga hinganiban nga nawawara o nagkikinahanglan aydon.

An usa nga Kristiano nagkikinahanglan han ngatanan han iya kompleto nga hinganiban, kondi an daku nga kalasag han pagtoo labi nga importante. Tungod hito hi Pablo nagsurat: “Labaw ha ngatanan kuhaa niyo an pagtoo nga iyo kalasag, nga dida hito sadang kamo makapalong ha ngatanan nga mga pana nga naglalaga han maraot.”—Efeso 6:16.

An daku nga kalasag, nga makakatabon han bug-os nga lawas, nagrirepresentar han kalidad han  pagtoo. Kinahanglan magkaada ka marig-on nga pagtoo ha giya ni Jehova, ngan bug-os nga karawaton nga matutuman an ngatanan nga iya mga saad. Sadang abaton mo nga ito nga mga saad sugad hin natuman na. Ayaw gud pagruhaduha nga an bug-os nga sistema han kalibotan ni Satanas diri na maiha mabungkag, nga an tuna hihimoon nga paraiso, ngan an mga tawo nga maunungon ha Dios ibabalik ha kahingpitan.—Isaias 33:24; 35:1, 2; Pahayag 19:17-21.

Kondi, hinin presente nga diri-ordinaryo nga away, may-ada ka labaw nga ginkikinahanglan—usa nga sangkay. Ha panahon han girra, napuporma an duok nga pakigsangkay samtang an mga igkasi-sundalo nagdadasig ngan nagpapanalipod ha kada tagsa, usahay ginluluwas pa ngani an usa kag usa ha kamatayon. Bisan kon importante an mga kaupod, basi maluwas hini nga away, kinahanglan mo an pakigsangkay ni Jehova mismo. Salit gintapos ni Pablo an iya lista mahitungod han nagkukompwesto han hinganiban pinaagi hini nga mga pulong: “Ha bug-os nga pag-ampo ngan pakimalooy, mag-ampo kamo ha ngatanan nga panahon ha espiritu.”—Efeso 6:18.

Naruruyag gud kita nga makaupod an usa ka duok nga sangkay. Nangangalimbasog kita nga magkaada panahon ha iya. Pinaagi han regular nga pakiistorya kan Jehova ha pag-ampo, nagigin totoo hiya ha aton, usa nga masasarigan nga sangkay. Hi disipulo Jakobo nagdadasig ha aton: “Magin duok ha Dios, ngan hiya magigin duok ha iyo.”—Jakobo 4:8, NW.

Mga Taktika han Kaaway

An pakig-away hini nga kalibotan usahay maipapariho ha paglakat ha usa nga lugar nga ginlubngan hin mga bomba. Mahimo magtikang an pag-atake ha bisan diin nga direksyon, ngan nangangalimbasog an kaaway ha pag-atake ha imo kon diri ka naglalaom ngan diri andam para hito. Kondi, sarig nga nagtatagana hi Jehova han ngatanan nga panalipod nga imo ginkikinahanglan.—1 Korinto 10:13.

Bangin isentro han kaaway an iya nakakadaot nga pangalimbasog pinaagi han pagpakaraot ha mga kamatuoran han Biblia nga importante ha imo pagtoo. An mga apostata mahimo gumamit hin mag-opay nga mga pulong, pag-ulog-ulog, ngan ginbaliko nga pangatadongan ha pangalimbasog ha pagpirde ha imo. Kondi an apostata diri napaid han imo kaopayan. An Proberbios 11:9 nasiring: “Pinaagi han iya baba an tawo nga waray Dios nakakagunaw han iya igkasi-tawo; kondi pinaagi han hibaro an matadong maluluwas.”

Magigin usa nga sayop an paghunahuna nga kinahanglan mamati ka ha mga apostata o magbasa han ira mga sinurat basi mabaton an ira mga argumento. An ira baliko, malara nga pangatadongan makakadaot ha espirituwal ngan makakahugaw han imo pagtoo pariho han madagmit magsarang nga kalamayo. (2 Timoteo 2:16, 17) Lugod, subara an baton han Dios ha mga apostata. Hi Job nagsiring mahitungod kan Jehova: “Ha iya waray makakaatubang nga apostata.”—Job 13:16, NW.

An kaaway mahimo magsari hin iba nga taktika, usa nga naglampos na. Kon masusulay an usa nga nagmamartsa nga sundalo ha pagbaya ha linya han mga sundalo basi magbuhat hin kalaw-ayan, imoral nga paggawi, mahimo ini magresulta hin kasamok.

Epektibo nga paon an kalibotanon nga kaliawan, sugad han imoral nga mga pelikula ngan mga kiritaon ha telebisyon ngan maaringasa nga musika. An iba nasiring nga mahimo hira magkita hin imoral nga mga salida o magbasa hin imoral nga literatura nga diri naaapektohan. Kondi usa nga tawo nga regular nga nagkikita hadto hin mga pelikula nga nagpapakita gud hin seksuwal nga buhat an prangka  nga nagsiring: “Diri mo gud hingangalimtan ito nga mga salida, kon mas ginhuhunahuna mo an mahitungod hito, mas naruruyag ka pagbuhat han imo nakita . . . An mga sine nakakaaghat ha imo ha paghunahuna nga may-ada gud nakukulang ha imo.” Takos ba an paglikay ha peligro han pagin nadaot tungod hinin tuso nga pag-atake?

Usa pa nga paagi ha pag-atake han kaaway amo an pagsulay han materyalismo. An peligro mahimo magin makuri hibaroan tungod kay kita ngatanan may-ada materyal nga mga panginahanglan. Nagkikinahanglan kita hin urukyan, pagkaon, ngan panapton; ngan diri sayop an pagkaada mag-opay nga mga butang. An pagtagad han usa ha materyal nga mga butang an bangin pagtikangan han peligro. Mahimo magin mas importante an kwarta kay ha espirituwal nga mga butang. Mahimo kita magin mahigugmaon ha kwarta. Sadang naton pahinumdumon an aton kalugaringon mahitungod han mga limitasyon ha paggamit han bahandi. Temporaryo la ito, samtang an espirituwal nga mga bahandi nagpapadayon ha waray kataposan.—Mateo 6:19, 20.

Kon maluya an kompyansa han usa nga sundalo, nagluluya liwat an posibilidad nga magdaog. ‘Kon ikaw mahiraptay ha adlaw han kakurian, an imo kusog gutiay.’ (Proberbios 24:10) An panluya usa nga hinganiban nga epektibo nga ginagamit ni Satanas. An pagsul-ot “han kalasag han paglaom han kaluwasan” makakabulig ha imo nga malamposan an panluya. (1 Tesalonika 5:8) Pangalimbasog nga matipigan nga marig-on an imo paglaom sugad han kan Abraham. Han ginhangyo nga ighalad an iya bugtong nga anak, hi Isaak, waray mag-alang hi Abraham. Hiya tinoo nga tutumanon han Dios an Iya saad nga bibendisyonan an ngatanan nga mga nasud pinaagi han iya anak ngan nga babanhawon han Dios hi Isaak tikang ha mga patay kon kinahanglanon basi tumanon ito nga saad.—Hebreo 11:17-19.

Ayaw Undang ha Pakig-away

An iba nga maisugon nga nakikig-away ha sulod hin maiha na nga panahon bangin mahulop ngan salit diri na nakikig-away hin sugad kamabinantayon han hadto. An susbaranan ni Uria, nga gin-unabi ha tinikangan hini nga artikulo, makakabulig ha ngatanan nga nakikig-away tungod ha pagtoo nga magkaada pirme husto nga motibo. Damu han aton igkasi-Kristiano nga mga sundalo an kinahanglan mag-ilob han kakurian, mga peligro, o mag-antos han kahagkot ngan kagutom. Pariho kan Uria, diri maopay nga aton hunahunaon an mahitungod han ngatanan nga mga kahimyang nga mahimo naton pahimulsan yana o magpasulay ha hingyap ha pagkaada komportable nga kinabuhi. Karuyag naton magpabilin nga kaupod han bug-os-kalibotan nga maunungon nga kasundalohan ni Jehova ngan ipadayon an away tubtob nga magpahimulos kita han urusahon nga mga bendisyon nga naghuhulat ha aton.—Hebreo 10:32-34.

Peligroso an pag-undang ha pagin mabinantayon, nga bangin naghuhunahuna nga an ultimo nga pag-atake hirayo pa ha tidaraon. An ehemplo ni Hadi David nagpapatin-aw han peligro. Tungod han usa nga hinungdan, diri hiya kaupod han iya mga sundalo ha away. Sugad nga resulta, seryoso nga nakasala hi David nga nagin hinungdan han iya duro nga  kabido ngan pag-antos ha iya bug-os nga kinabuhi.—2 Samuel 12:10-14.

Takos ba nga makigbahin hini nga away, atubangon an kakurian han away, antuson an pagtamay, ngan likyan an kwestyonable nga mga kaliawan han kalibotan? Adton malampuson nga padayon nga nakikig-away nauyon nga an igintatanyag han kalibotan bangin maopay pagkit-on, pariho hin nagraranggat nga karaykay nga inulang, kondi kon usisahon hin mas maopay, gutiay la an bili hito. (Filipos 3:8) Dugang pa, agsob nga ito nga mga kalipayan nagriresulta ha kasakit ngan kasubo.

An Kristiano dida hinin espirituwal nga away nagpapahimulos hin duok nga relasyon ha totoo nga mga sangkay, hin limpyo nga konsensya, ngan hin makalilipay nga paglaom. An dinihogan-ha-espiritu nga mga Kristiano naglalaom hin diri-mamaratyon nga kinabuhi ha langit kaupod ni Kristo Jesus. (1 Korinto 15:54) An kadam-an han Kristiano nga mga sundalo naglalaom hin hingpit nga tawhanon nga kinabuhi ha paraiso ha tuna. Sigurado nga an sugad nga mga premyo takos han bisan ano nga pag-antos. Ngan diri pariho han bisan ano nga mga girra han kalibotan, sigurado an aton kadaogan hini nga away kon magpapabilin kita nga matinumanon. (Hebreo 11:1) Kondi, an resulta hini nga sistema ilarom ha pagdumara ni Satanas amo an bug-os nga kabungkagan.—2 Pedro 3:10.

Samtang nagpapadayon ka hini nga away, hinumdumi an mga pulong ni Jesus: “Magsarig kamo kaopay; kay akon gindaog an kalibotan.” (Juan 16:33) Nagdaog hiya pinaagi han pagpabilin nga mabinantayon ngan pinaagi han pagtipig han integridad ilarom han pagsari. Mahihimo liwat naton ito.

[Blurb ha pahina 27]

Waray mga pusil nga pabubuthon, waray mga bomba nga huhulugon, kondi nagkikinahanglan gihapon ito hin mga taktika ha girra

[Blurb ha pahina 30]

Sigurado an aton kadaogan hini nga away kon magpapabilin kita nga matinumanon

[Retrato ha pahina 26]

An pandong han kaluwasan mabulig ha aton nga madaog an panluya

Gamita an daku nga kalasag han pagtoo ha pagsagang han “naglalaga nga mga hinganiban” ni Satanas

[Retrato ha pahina 28]

“Magin duok ha Dios, ngan hiya magigin duok ha imo”

[Retrato ha pahina 29]

Sadang kita tumoo ha katumanan han mga saad han Dios