Relihiyon ba an Hinungdan han mga Problema han Tawo?

“KON an relihiyon diri nag-aaghat hin araway, nagios ito sugad hin droga nga nagpapabanhod han konsensya han tawo ngan nagpupuno han hunahuna han tawo hin mga pantasya nga nabulig ha relihiyoso nga mga tawo nga ibalewaray an maraot nga mga hitabo ha kinabuhi. . . . Nag-aaghat [ito] ha mga tawo nga magin haligot an panhunahuna, diwatahan, puno hin kapungot ngan kahadlok.” An misyonero nga Metodista hadto nga nagsurat hito nagdugang: “Totoo ini nga mga akusasyon. May-ada maraot ngan maopay nga relihiyon.”—Start Your Own Religion.

‘Sigurado nga diri ito makatadunganon nga kritisismo,’ bangin sumiring an iba. Kondi, hin-o an makakagnigar han mga hitabo ha kasaysayan? Ha daku nga sukol, an relihiyon—nga gintagan hin kahulogan sugad nga “an pag-alagad ngan pagsingba ha Dios o ha labaw ha natural”—may-ada makangingirhat nga kasaysayan. Sadang ito maghatag hin kahibaro ngan makaaghat ha aton. Kondi, agsob nga nakakaaghat ito hin araway, pagkadiri-matinuguton, ngan kapungot. Kay ano?

Usa nga Malimbungon nga ‘Anghel han Kahayag’

Sumala ha Biblia, may-ada simple hinduro nga baton. Tungod kay nagpapakilala sugad nga ‘anghel han kahayag,’ hi Satanas nga Yawa naglilimbong ha  minilyon nga mga tawo ha pagsunod han iya mga katutdoan imbes han kanan Dios. (2 Korinto 11:14) Iginpakita ni apostol Juan nga kaylap gud an impluwensya ni Satanas nga “an bug-os nga kalibotan aada ha gahum han usa nga maraot.” (1 Juan 5:19, NW) Maaram hi Juan nga hi Satanas “[naglilimbong] ha bug-os nga kalibotan.”—Pahayag 12:9.

Ano an nagin mga resulta hini? Iginpahamtang ni Satanas an relihiyoso nga mga sistema nga baga hin baraan pagkit-on an dagway. Ito nga mga sistema may-ada “dagway han ‘relihiyon’ ” kondi an ira totoo nga kahimtang iginbubuhayhag pinaagi han ira maraot nga mga bunga. (2 Timoteo 3:5, J. B. Phillips; Mateo 7:15-20) Imbes nga bumulig ha pagsulbad ha mga problema han mga tawo, an relihiyon ha pagkatinuod nagigin bahin han problema.

Ayaw dayon igbalewaray ito nga ideya sugad nga imposible o diri makatadunganon. Hinumdumi, an totoo nga kahimtang han panlimbong amo nga an ginlilimbongan diri maaram hito. Naghatag hi apostol Pablo hin ehemplo mahitungod hini han hiya nagsurat: “An mga bagay nga iginhahalad han mga Hentil, ira iginhahalad ha mga yawa, ngan diri ngadto ha Dios.” (1 Korinto 10:20) Posible nga nahipausa adto nga mga tawo ha paghunahuna nga nagsisingba hira ha mga demonyo. Naghuhunahuna hira nga nagsisingba hira ha usa nga maopay nga klase hin dios, o mga dios. Kondi, ha kamatuoran nalimbongan hira han “espirituhanon nga kasundalohan han karaotan ha mga langitnon nga lugar,” nga nasuporta kan Satanas ha iya mga pangalimbasog nga limbongan an katawohan.—Efeso 6:12.

Aton paghisgotan, pananglitan, kon paonan-o naglampos hi Satanas ha paglimbong ha damu nga nag-aangkon nga mga Kristiano nga nagpili ha pagbalewaray han pahamangno ni apostol Juan mahitungod han maraot nga impluwensya han mga demonyo.—1 Korinto 10:12.

Tikang ha Dios an Igintutdo ni Jesus

“An akon pagtutdo,” nagsiring hi Jesu-Kristo, “diri akon, kondi kanan han nagpakanhi ha akon.” (Juan 7:16) Oo, an iya igintutdo tikang ha Makagarahum-ha-ngatanan nga Dios. Salit an mga katutdoan ni Jesus may-ada gamhanan, naghahatag hin kahayag nga epekto ngada hadton namati ha iya. Waray hito ‘pabanhura an pagbati han tawo o punoa an hunahuna han tawo hin mga pantasya nga nabulig ha relihiyoso nga mga tawo nga ibalewaray an magraot nga mga hitabo ha kinabuhi.’ Ha kabaliktaran, an mga katutdoan ni Jesus naghahatag hin kagawasan ha mga tawo tikang ha mga sayop han relihiyon ngan mga pilosopiya han tawo nga resulta han kalibotan nga ‘ginpadulman an sarabotan’ tungod han panlimbong han Yawa.—Efeso 4:18; Mateo 15:14; Juan 8:31, 32.

Nakilala an totoo nga mga Kristiano, diri pinaagi ha pagpahayag la hin pagkadiosnon, kondi pinaagi han usa nga relihiyon nga nagpapakita han mag-opay nga mga kalidad nga bunga han baraan nga espiritu han Dios. (Galasia 5:22, 23; Jakobo 1:22; 2:26) An pinakamakatirigamnan hini nga mga kalidad—ngan an pangirilal-an han totoo nga Kristianidad—amo an putli nga kalidad han gugma.—Juan 13:34, 35.

Kondi, tigamni inin importante nga punto: Waray maglaom hi Jesus o an iya mga apostol nga an Kristiano nga kongregasyon magpapabilin ha orihinal nga establisado na nga kahimtang hito. Maaram hira nga magtutubo an apostasya ngan nga an totoo nga relihiyon matatabonan ha sulod hin usa ka panahon.

An Totoo nga Relihiyon Natabonan ha Sulod hin Usa ka Panahon

Ha usa nga ilustrasyon mahitungod han trigo ngan mga lakatan, igintagna ni Jesus nga an totoo nga relihiyon matatabonan gud ha sulod hin usa ka panahon. Basaha an asoy ha Mateo 13:24-30, 36-43. Hi Jesus nagsabwag ha uma hin mga trigo, an “maopay nga gahi,” nga naghulagway han iya matinumanon nga mga disipulo nga magkukompuwesto han orihinal nga Kristiano nga kongregasyon. Hiya nagpahamangno nga maabot an panahon nga an “kaaway,” hi Satanas nga Yawa, magsasabwag ha  bawbaw han uma han mga trigo hin “mga lakatan”—mga tawo nga nag-angkon nga nasunod kan Jesu-Kristo kondi ha pagkatinuod nagsalikway han iya mga katutdoan.

Waray gud pag-iha katapos magkamatay an mga apostol ni Jesus, nagkaada mga indibiduwal nga napamatud-an nga “mga lakatan,” nga nauyon ha ginbaliko nga mga katutdoan han tawo imbes nga ha “pulong ni Jehova.” (Jeremias 8:8, 9; Buhat 20:29, 30) Sugad nga resulta, an usa nga baliko, palso nga Kristianidad nakita ha kalibotan. Ginkontrol ito han gintatawag han Biblia nga “maraot nga usa”—an malimbungon nga klero nga klase nga puno han “ngatanan nga magraot nga panlimbong.” (2 Tesalonika 2:6-10, NW) Igintagna ni Jesus nga ini nga kahimtang magbabag-o “ha kataposan han sistema han mga butang.” An sugad-trigo nga mga Kristiano pagtitirukon ngan an “mga lakatan” ha kataposan pagbubungkagon.

Ini nga palso nga Kristianidad an responsable han “mga siglo han duro nga karaotan” ngan han espirituwal nga kasisidman nga nakaimpluwensya ha Kakristianohan ha mga siglo nga sumunod. Tungod kay nakita nga daan ini ngan an ngatanan nga iba pa nga magraot ngan madarahog nga mga buhat tikang ha pag-abot han palso nga Kakristianohan ha ngaran han relihiyon, husto nga nagtagna hi apostol Pedro nga “tungod ha ira [nag-aangkon nga mga Kristiano] an dalan han kamatuoran pagyayaknan hin maraot.”—2 Pedro 2:1, 2.

“An Teolohiya han Kapungot Ngan Kasina”

Sigurado nga diri la an Kakristianohan an naghatag ha relihiyon hin maraot nga reputasyon. Pananglitan, hunahunaa an mga bersyon han “militante nga pagkadiosnon” han pundamentalista nga relihiyon, nga ginsiring han madre hadto nga hi Karen Armstrong nga nagpatikang han “ngatanan nga nangunguna nga relihiyoso nga tradisyon.” Sumala kan Armstrong, an usa nga importante nga pagsari han bisan ano nga relihiyon amo nga sadang ito magresulta ha “nakikita-ha-buhat nga pagpaid.” Ano an rekord han pundamentalista nga mga relihiyon may kalabotan hini? “An pundamentalista nga relihiyon,” nagsurat hiya, “Judio man ito, Kristiano, o Muslim, napapakyas hini nga importante nga pagsari kon nagigin teolohiya ito han kapungot ngan kasina.” (The Battle for God—Fundamentalism in Judaism, Christianity and Islam) Kondi an “pundamentalista” nga klase la ba hin relihiyon an napakyas hini nga pagsari ngan nagin “usa nga teolohiya han kapungot ngan kasina”? Iba an iginpapakita han kasaysayan.

Ha pagkamatuod, hi Satanas nagtukod hin imperyo han palso nga relihiyon han kalibotan, nga kilala ha kapungot, kangalas, ngan ha haros waray kataposan nga pagpaagas hin dugo. Gintawag han Biblia ini nga imperyo nga an “Daku nga Babilonya, iroy han . . . mga kadurumtan ha tuna,” ngan iginhulagway ito sugad nga puta nga nasakay ha likod han usa nga sugad-hayop nga sistema han politika. Makatirigamnan nga gin-unabi hiya nga may baratunon tungod ha “dugo . . . han ngatanan nga pinamatay ha tuna.”—Pahayag 17:4-6; 18:24.

Diri Ngatanan Nalilimbongan

Kondi, pinamamatud-an han kasaysayan nga diri ngatanan nalilimbongan. Bisan ha pinakamaraot nga panahon ha kasaysayan han tawo, hi Melvyn Bragg nasiring, “damu nga mag-opay nga mga tawo an nagbuhat hin maopay samtang an kadam-an nga nakapalibot ha ira magraot.” An totoo nga mga Kristiano nagpadayon ha ‘pagsingba ha [Dios] ha espiritu ngan ha kamatuoran.’ (Juan 4:21-24) Iginbulag nira an ira kalugaringon tikang ha bug-os-kalibotan nga sistema han relihiyon nga nagin puta sugad nga “parasuporta ha puwersa militar.” Nagdumiri hira nga mahidabi ha relasyon han Iglesia ngan Estado nga iginpapakita han kasaysayan nga “mas masisiring nga usa nga kauyonan nga hinimo ni Satanas imbes nga han bisan hin-o nga Jesus han Nasaret.”—Two Thousand Years—The Second Millennium: From Medieval Christendom to Global Christianity.

Ha diri pa la maiha nga mga panahon, an mga Saksi ni Jehova nagin kilala tungod han ira impluwensya para ha maopay. Basi magin bulag tikang ha bisan ano nga kahugaw han palso nga relihiyon, iginbasar nira an ira mga gintotoohan ngan mga panggawi dida la ha giniyahan-han-Dios nga Pulong, an Biblia. (2 Timoteo 3:16, 17) Ngan pariho ha siyahan-siglo nga mga Kristiano, ginsunod nira an sugo ni Jesus nga magin “diri kanan kalibotan.” (Juan 15:17-19; 17:14-16) Pananglitan, ha Nazi Alemanya, nagdumiri hira nga ikompromiso an Kristiano nga mga prinsipyo ngan salit diri kinakarawat sumala ha ideolohiya han Nazi. Napungot ha ira hi Hitler tungod hito. Usa nga aradman nga libro ha eskwelahan an nasiring: “An mga Saksi ni Jehova . . . nasunod ha katutdoan han Biblia nga diri magdara  hin mga hinganiban ha anoman nga hinungdan. Salit nagdumiri hira ha pagsundalo o pagkaada bisan ano nga kalabotan ha mga Nazi. Ha pagbulos ha ira, ginpriso han SS an bug-os nga mga pamilya han mga Saksi ni Jehova. Haros ikatulo ka bahin han ngatanan nga mga Saksi ni Jehova [ha Alemanya] an ginpatay ha mga kampo nga prisohan.”—Germany—1918-45.

Syempre, an iba nga maisugon nga mga indibiduwal han magkalainlain nga mga relihiyon nag-antos tungod han ira mga gintotoohan. Kondi ginbuhat ini han mga Saksi ni Jehova sugad nga usa nga nagkakaurosa nga relihiyon. Sigurado nga an kadam-an han mga Saksi ni Jehova marig-on nga nasunod ha basihan nga prinsipyo han Kasuratan: “Sugton an Dios san-o an mga tawo.”—Buhat 5:29; Markos 12:17.

An Hinungdan han mga Problema

Salit diri totoo nga an relihiyon amo an hinungdan han ngatanan nga mga problema han katawohan. An palso nga relihiyon amo an hinungdan. Kondi, katuyoan han Dios nga poohon an ngatanan nga palso nga relihiyon ha diri na gud maiha tikang yana. (Pahayag 17:16, 17; 18:21) An iya sugo ha bisan hin-o nga nahigugma ha hustisya ngan katadongan amo ini: “Gawas kamo ngadi, mga tawo ko, tikang ha iya [nga amo an Babilonya nga Daku, an imperyo han palso nga relihiyon ha kalibotan], basi nga diri kamo makaangbit ha iya mga sala, ngan basi kamo diri makakarawat han iya mga peste: Kay an iya mga sala inabot bisan ngadto ha langit, ngan nahinumdoman han Dios an iya mga karaotan.” (Pahayag 18:4, 5) Oo, nasusubo gud mismo an Dios ha relihiyon nga ‘nag-aaghat hin araway, nagpapabanhod han konsensya han tawo, nagpupuno han hunahuna hin mga pantasya nga nabulig ha relihiyoso nga mga tawo nga igbalewaray an magraot nga mga hitabo ha kinabuhi, ngan nag-aaghat ha mga tawo nga magin haligot an panhunahuna, diwatahan, ngan puno hin kapungot ngan kahadlok’!

Samtang yana, gintitirok han Dios ha putli nga relihiyon adton mga nahigugma ha kamatuoran. Ito amo an relihiyon nga nasunod ha mga prinsipyo ngan mga katutdoan han mahigugmaon, may hustisya, ngan mapinairon nga Maglalarang. (Mika 4:1, 2; Sepania 3:8, 9; Mateo 13:30) Mahimo ka magin bahin hito. Kon karuyag mo hin dugang nga impormasyon kon paonan-o makikilala an putli nga relihiyon, ayaw pag-alang pagsurat ha mga nagpublikar hini nga magasin, o pagpabulig ha bisan hin-o han mga Saksi ni Jehova.

[Retrato ha pahina 7]

An mga tawo ha ngatanan nga mga gintikangan nakakaeksperyensya hin kalipay ha putli nga relihiyon