Kon Paonan-o Naton Ipinapakita nga Hinigugma Naton an Dios

AN PAGPATUBO han gugma ha Dios diri la kay paghibaro mahitungod ha Iya. Sugad han mapapamatud-an han mga surugoon han Dios ha bug-os nga kalibotan, an totoo nga gugma ha Dios nagtutubo samtang nakikilala han usa an iya personalidad, ngan nagigin mas marig-on pa gud ito samtang mas hinbabaroan han usa kon ano an hinigugma han Dios, an iya kinangangalasan, ngan an iya mga naruruyagan ngan mga ginkikinahanglan.

Ha mahigugmaon nga paagi, iginhatag ni Jehova ha aton an iya Pulong, an Biblia, diin iya iginpapahayag an iya kalugaringon. Tikang hito, hinbabaroan naton kon paonan-o gin-atubang ni Jehova an magkalainlain nga mga kahimtang. Sugad la nga an usa nga surat tikang ha usa nga hinigugma naghahatag ha aton hin daku nga kalipay, ha pariho nga paagi an Biblia naghahatag ha aton hin kalipay samtang nakikita naton nga naipapahayag an bag-o nga mga bahin han personalidad ni Jehova.

Kondi, sugad han aton naoobserbahan usahay ha aton ministeryo ha publiko, an paghibaro mahitungod ha Dios diri pirme nag-aaghat ha usa ka tawo ha paghigugma ha iya. Hi Jesus nagsiring ha pipira nga waray-apresasyon nga mga Judio han iya panahon: “Gin-usisa niyo an Santos nga Surat; kay kamo naghunahuna, nga ha ira may kinabuhi niyo nga waray kataposan; . . . kondi ako maaram ha iyo, nga waray kamo hin gugma ha Dios ha sulod niyo.” (Juan 5:39, 42) An iba nagamit hin mga tuig ha paghibaro mahitungod han mahigugmaon nga mga buhat ni Jehova kondi gutiay la an ira gugma ha iya. Kay ano? Napapakyas hira nga pamalandungon an mga kamatuoran nga ira hinbabaroan. Ha kabaliktaran, minilyon nga sinsero nga mga tawo nga aton gindudumarahan hin pag-aram ha Biblia an nakakaeksperyensya nga an ira gugma ha Dios padayon nga nagtutubo. Kay ano? Tungod kay sugad han aton ginbuhat, ira ginsusunod an susbaranan ni Asap. Ha ano nga paagi?

Pamalandong nga May Apresasyon

Determinado hi Asap ha pagpatubo hin gugma para kan Jehova ha iya kasingkasing. Hiya nagsurat: “Namamalandong ako han akon kalugaringon nga kasingkasing . . . Maghihimangraw ako han mga buhat ni Jehova; kay hinunumdoman ko an imo mga  urusahon nga kasanhi. Magpapalandong liwat ako han bug-os mo nga buhat, ngan magdumdom han imo mga binuhatan.” (Salmo 77:6, 11, 12) An gugma ha Dios magtutubo ha kasingkasing han usa nga namamalandong han mga paagi ni Jehova sugad han ginbuhat han salmista.

Dugang pa, an paghinumdom han mga eksperyensya nga aton napapahimulosan samtang nag-aalagad kan Jehova nagpaparig-on han aton relasyon ha iya. Hi apostol Pablo nagsiring nga kita “mga igkasi-magburuhat” han Dios, ngan an pagkamagsangkay nga mahimo magtubo butnga han mga igkasi-magburuhat espesyal hinduro. (1 Korinto 3:9, NW) Kon aton iginpapahayag an aton gugma kan Jehova, iya inaapresyar ito, ngan nagpapalipay ito han iya kasingkasing. (Proberbios 27:11) Katapos, kon nangangaro kita han bulig ni Jehova ngan binubuligan kita niya nga masulbad an espisipiko nga problema, maaram kita nga kaupod naton hiya, ngan naghihilarom an aton gugma ha iya.

Nagtutubo an pagkamagsangkay han duha nga tawo samtang ira iginpapahayag an ira mga pagbati ha usa kag usa. Ha pariho nga paagi, kon aton ginsusumatan hi Jehova kon kay ano nga debotado kita ha iya, napaparig-on kita ha aton gugma ha iya. Aton pamamalandungon an mga pulong ni Jesus: “Higugmaon mo an imo Ginoo nga Dios ha bug-os mo nga kasingkasing, ngan ha bug-os mo nga kalag, ngan ha bug-os mo nga hunahuna, ngan ha bug-os mo nga kusog.” (Markos 12:30) Ano an aton mahimo buhaton basi masiguro nga magpapadayon kita ha paghigugma kan Jehova ha aton bug-os nga kasingkasing, ha aton bug-os nga kalag, ha aton bug-os nga hunahuna, ngan ha aton bug-os nga kusog?

Paghigugma kan Jehova ha Aton Bug-os nga Kasingkasing

An Kasuratan nag-uunabi han simboliko nga kasingkasing, nga amo an totoo nga pagkatawo—an aton mga hingyap, mga pamatasan, ngan mga pagbati. Salit an paghigugma kan Jehova ha aton bug-os nga kasingkasing nangangahulogan nga labaw ha ngatanan, hingyap naton nga lipayon an Dios. (Salmo 86:11) Ipinapakita naton nga may-ada kita han sugad nga gugma pinaagi han paghimo han aton personalidad nga magin kinakarawat niya. Nangangalimbasog kita ha pagsubad ha Dios pinaagi han ‘kangalas ha maraot ngan pagkupkop ha maopay.’—Roma 12:9.

An aton gugma ha Dios nakakaapekto han aton mga pagbati mahitungod han ngatanan nga butang. Pananglitan, bangin nakukuha han aton trabaho an aton interes o kadak-an han aton atensyon, kondi aada ba hito an aton kasingkasing? Diri. Tungod kay hinigugma naton hi Jehova ha aton bug-os nga kasingkasing, siyahan ha ngatanan mga ministro kita han Dios. Sugad man, karuyag naton nga lipayon an aton mga kag-anak, an aton padis, ngan an aton agaron, kondi labaw ha ngatanan pinamamatud-an naton an aton bug-os-kasingkasing nga gugma kan Jehova pinaagi han pagpalipay ha iya. Tutal, takos hiya han siyahan nga bahin ha aton kasingkasing.—Mateo 6:24; 10:37.

Paghigugma kan Jehova ha Aton Bug-os nga Kalag

Ha Kasuratan an pulong nga “kalag” nagtutudlok ha aton bug-os nga persona sugad man ha aton kinabuhi. Salit an paghigugma kan Jehova  ha aton bug-os nga kalag nangangahulogan nga ginagamit naton an aton kinabuhi ha pagdayaw ha iya ngan ha pagpamatuod han aton gugma ha iya.

Syempre, bangin may-ada kita iba nga mga naruruyagan ha kinabuhi, sugad han pag-aram hin usa nga trabaho, pagnegosyo, o pagpamilya. Kondi ha pariho nga panahon, aton pinamamatud-an an aton bug-os-kalag nga gugma kan Jehova pinaagi han pagbuhat hin mga butang ha iya paagi ngan pinaagi han pagtipig han iba nga mga butang ha husto nga dapit hito ha aton kinabuhi, hito nga paagi aton ‘pinamimiling siyahan an Ginhadian ngan an iya katadongan.’ (Mateo 6:33) An bug-os-kalag nga pagsingba nangangahulogan liwat hin pagin madasigon. Ipinapakita naton kan Jehova nga hinigugma naton hiya pinaagi han madasigon nga pagsangyaw han mensahe han Ginhadian, paghatag hin makapadasig nga mga komento ha mga katirok, o pagbulig ha aton Kristiano nga kabugtoan. Ha ngatanan nga butang, aton padayon nga “ginbubuhat an kaburut-on han Dios hin bug-os-kalag.”—Efeso 6:6, NW.

Iginpakita ni Jesus an bug-os-kalag nga gugma ha Dios pinaagi han paglirong han iya kalugaringon. Iya gin-una an kaburut-on han Dios ngan ikaduha la an iya personal nga mga panginahanglan. Gin-aghat kita ni Jesus nga sundon an iya susbaranan. Hiya nagsiring: “Kon may tawo nga buot magsunod ha akon, maglirong ha iya la ngahaw, ngan pas-anon an iya krus, ngan sumunod ha akon.” (Mateo 16:24, 25) An paglirong han aton kalugaringon nangangahulogan hin paghimo hin dedikasyon. Nangangahulogan ito nga hinigugma naton hinduro an Dios salit aton igintutubyan ha iya an pagtag-iya ha aton kalugaringon, sugad han an usa nga Israelita ha panahon han Biblia nahigugma hinduro ha iya agaron salit iya permanente nga igintubyan an iya kalugaringon ha iya agaron sugad nga uripon. (Deuteronomio 15:16, 17) An pagdedikar han aton kalugaringon kan Jehova usa nga makakombinse nga ebidensya nga nahigugma kita ha iya.

Paghigugma kan Jehova ha Aton Bug-os nga Hunahuna

An paghigugma kan Jehova ha aton bug-os nga hunahuna nangangahulogan nga hinihimo naton an ngatanan nga pangalimbasog nga kinahanglanon basi hisabtan an personalidad, mga katuyoan, ngan mga ginkikinahanglan ni Jehova. (Juan 17:3; Buhat 17:11) Aton iginpapahayag an aton gugma kan Jehova pinaagi han paggamit han ngatanan naton nga mga abilidad ha paghunahuna basi mabuligan an iba nga higugmaon liwat hi Jehova ngan pinaagi han pagpauswag han aton kaabtik ha pagtutdo. “Bigkisi niyo an iyo mga hunahuna ha buruhaton,” nagsagda hi apostol Pedro. (1 Pedro 1:13) Nangangalimbasog liwat kita ha pagpakita hin interes ha iba, labi na ha mga igkasi-surugoon han Dios. Maaram kita han ira mga kahimtang ngan nag-oobserba kon angayan an kumendasyon o kon kinahanglanon an pagliaw.

Aton iginpapakita kan Jehova nga hinigugma naton hiya ha aton bug-os nga hunahuna pinaagi han pagpasakop ha iya ha aton hunahuna. Nangangalimbasog kita nga subaron an iya panlantaw ha mga butang, tagdon hiya kon naghihimo kita hin mga desisyon, ngan sumarig nga an iya paagi an gimaopayi. (Proberbios 3:5, 6; Isaias 55:9; Filipos 2:3-7) Kondi samtang nagpapadayon kita ha pagpakita han aton gugma ha Dios, paonan-o naton magagamit an aton kusog?

Paghigugma kan Jehova ha Aton Bug-os nga Kusog

Ginagamit han damu nga mga batan-on ha Kristiano nga kongregasyon an ira kusog ha pagdayaw kan Jehova. (Proberbios 20:29; Eklesiastes 12:1) Usa nga paagi diin ipinapakita han damu nga batan-on nga mga Kristiano nga hinigugma nira hi Jehova ha ira bug-os nga kusog amo an pagpayunir, an bug-os-panahon nga ministeryo. Damu nga mga iroy an nakikigbahin hini nga ministeryo samtang naeskwela an ira mga anak. Gawas pa han pag-ataman han kaopayan han ira kalugaringon nga mga pamilya, an matinumanon nga mga tigurang nga nabisita ha pagmangno ha panon nagpapakita nga hinigugma nira hi Jehova ha ira bug-os nga kusog. (2 Korinto 12:15) Hi Jehova naghahatag hin gahum ngada hadton naglalaom ha iya, basi maipakita nira an ira gugma pinaagi han pagdayaw ha iya, nga ginagamit an anoman nga ira kusog.—Isaias 40:29; Hebreo 6:11, 12.

Magtutubo an gugma kon gin-aataman hin husto. Salit, nagpapadayon kita ha paggamit hin panahon ha pagpamalandong. Aton nahinunumdoman ko ano an ginbuhat ni Jehova para ha aton ngan kon kay ano nga takos hiya han aton debosyon. Sugad nga diri-hingpit nga mga tulin ni Adan, diri gud kita magigin takos han “mga butang nga igin-andam han Dios para hadton nahigugma ha iya,” kondi maipapakita naton nga hinigugma naton hi Jehova ha aton bug-os nga kalag. Hinaot padayon nga buhaton naton ito!—1 Korinto 2:9.

[Retrato ha pahina 20]

Aton iginpapahayag an aton gugma ha Dios pinaagi han mga buhat